Paasiuminaatsoq kinaava Babylon Angisooq?

ARNAQ, atortittartoq tusaamasaanerluttoq inuit milliardilippassuit inuunerannut sunniuteqarsimasoq, pillagaalluni toqunneqassaaq. Matumanili pineqanngilaq pillaalluni toqutsineq nalinginnaasoq, tassami toqutsisussaq tassaavoq nersut, nersut qaasuttoq, arnamik inuunerluttumik atisaajaallunilu uinnganik nerisussaq sinneruttunillu ikuallatsitsisussaq. Arnaq taanna sunniuteqaqisoq kinaana? Sooq nersummit qaasuttumit saassunneqassava? Aammalu qanoq iliorsimagami taama naakkittaatsigisumik toqunneqartariaqarpa?a — sarĸúmersitat 17:16, 17.

Tamanna tassaasinnaagaluarpoq oqaluttualiamut pissanganartulersaarutaasumut aallaqqaasiut — pisorli tamanna oqaluttualiaannaanngilaq. Pisussaq tamanna maannakkorpiaq aallarnisarpoq. Tamanna ilinnut pingaaruteqarpoq, tassami immaqa aammattaaq illit inuuninnut arnaq inuunerluttoq tusaamasaanerluttoq taanna sunniuteqarpoq. Aammattaaq arnamik taassuminnga peqateqarnerit toqumik kinguneqassaaq imaluunniit taassuminnga qimatsinerit inuunermik kinguneqassalluni. Arnaq taanna kinaavami?

Arnap paasiuminaatsup sulissutai

Arnaq kanngusujuitsoq taanna Bibelip atuagartaasa ilaanni, atuakkami siulittuutinik imaqartumi sarĸúmersitat-ni, Johannesimit eqqartorneqarpoq. Ima atuarpugut: ’Inngilip anersaakkut puilasuitsumut pisimmanga, arnaq takulerpara nersut aappalujattoq issiavigigaa tamatigut aternik mitalliutaasunik pilik arfineq-marlunnillu niaqulik qulinillu nassulik. Arnarlu taanna aappallarissumik atisaqartoq aappalujattumillu kuultimillu ujaqqanillu erlinnartunik sapanngarissunillu pilersorsimalluni, ermuserlu kuultiusoq tigumiarigaa, maajunnartunik mingunnartunillu uersarnerata piinik ulikkaartoq, qaavanilu ateq anngigisaq allassimasoq: „Babylon Angisooq, uersartut [arnat inuunerluttut] maajunnartullu nunami pisartut arnaat.“’ — sarĸúmersitat 17:3-5.

„Babylon Angisooq“ taanna arnaasimassaaq nalinginnaanngitsoq, tassami versi 1-imi oqaluttuarineqarpoq ’imerpassuarnik issiaviginnittuusoq’. Tamanna qanoq paasisariaqarpa? Guutip inngiliata Johannes ima nassuiaappaa: ’Ermit takusatit uersartup taassuma issiavigisai tassa immikkut inuiaasut inuppassuillu inuiaqatigiillu immikkullu oqaasillit.’ (sarĸúmersitat 17:15) Arnap inuunerluttup taassuma silarsuaq tamakkerlugu sunniisimanissaa qularutissaanngilluinnarpoq. Tassaanngilarli arnaq inuunerluttoq nalinginnaasoq. Tassaavoq ’uersartut [arnat inuunerluttut] arnaat’ — taanna kinguaassiuutitigut kanngunartuliornissamut kajumissaarisuuvoq. Aammattaaq immikkut illuinnartunik sulissutaqarpoq.

Arnap inuunerluttorsuup sulissutaasa pingaarnersaasa kikkuunerat inngilip qulaarpaa. Oqaatigaa Babylon Angisooq ’nunap kunngiisa uersaagaat, viinnilu uersarnerata pia nunami ineqartut putumassutigigaat’. (sarĸúmersitat 17:2) Arnaq inuunerluttoq taanna silarsuarmi naalakkersuinikkut pissaanilinnit, ’nunap kunngiinit’, kajungerineqarsinnaagami tassaasimassaaq arnaq ajuutiginartoq atassuteqarfigisaqarluartoq! Ila kinaana?

Inngili oqarpoq arnaq taanna ateqartoq, atermik paasiuminaatsumik: „Babylon Angisooq.“ Kinaassusianik paasiniaanitsinni marlunnik ikiortigisinnaasaqalerpugut — siullermik sulissutai taavalu aqqa, Babylon Angisooq. Taakkunannga tunngaveqartumik sumik paasisaqartinneqarsinnaavugut? (wD 1/4 89)

[Quppernerup ataani ilanngussaq]