Naapertuilluarneq inuiannut tamanut atuutilingajalerpoq
„Innarluissut — innarluissut noqqaassutigissavat, inooqqullutit nunalu Jehovap Guutivit ilinnut tunniukkumasaa pigileqqullugu.“ — 5 Môrsase 16:20, NV.
1. Aallaqqaamut Guutip inuit sumik siunertaqarfigai, qanorlu iliorunik aatsaat inuit tamanna naammassiniarsinnaassavaat?
JEHOVA GUUTIP angut arnarlu pinngortikkamigit siunertaraa nunarsuup pinngortitanik naammalluinnartunik ulikkaarumaarnissaa. Taakku tamarmik taassuminnga unnersiutiginnittussaapput nunamillu imminnut naalatsigititsisussaallutik. (1 Môrsase 1:26-28) Inuit Guuti assilillugu taassumatullu ittumik pinngortitaagamik, aammattaaq ilisimassutsimik, naapertuilluassutsimik, asannissutsimik pissaanermillu pilersugaapput. Pissutsit tamakku aatsaat oqimaaqatigiissumik atortarunikkik inuit Pinngortitsisimik inunnut siunertaa naammassisinnaalissavaat.
2. Innarluissummik noqqaassutiginninneq Israelip kinguaavinut qanoq pingaaruteqartigaa?
2 Soorlu atuagassiap matuma siuliani eqqartorneqareersimasoq, inuit Guutip iliuuserisartagaanut assortuilersimapput, taamaattumillu toqumut pillagassanngortitaallutik. Maannali, naammalluinnanngissusertik peqqutigalugu, Guutip inunnut aallaqqaammulli siunertaanik inuit naammassinnissinnaajunnaarluinnarsimapput. Tamatumuuna inuit iluatsitsinngitsoornerannut naammalluinnartumik naapertuilluartumik iliorsinnaannginnerat pissutaaqataasorujussuuvoq. Taamaattumik tupinnanngilaq Mosesip Israelip kinguaavi eqqaasimmagit ima: „Innarluissut — innarluissut noqqaassutigissavat“! Naapertuilluarneq aatsaat noqqaassutigigunikku inuuginnarsinnaapput nunamillu unnersuutigisamik piginnilersinnaassallutik. — 5 Môrsase 16:20, NV.
Ajunngitsorsiassat tarraat
3. Jehovap Israelikkunnut iliuuserisartagaanik misissuinissaq suna pillugu ullumikkut uatsinnut pingaaruteqarpa?
3 Jehovap Israelikkunnut iliuuserisartagaasa qularunnaarsippaatsigut Kiffani toqqakkani, Jesus Kristus, aqqutigalugu naapertuilluassutsiminik inuiannut tamanut erseqqissumik takutitsinissaanik. Apustili Paulusip Israelikkut pillugit oqaluttuat ima oqaatigai: ’Siornagut allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ (Rûmamiut 15:4) Guutip ’innarluissut naapertuilluarnerlu nuannarigamigit’ Israelikkut imminnut iliuuserisartakkaminni tamani immisut iliornissaat piumasaraa. (Tussiaat 33:5) Inatsisit 600-t missaanniittut Israelikkunnut inatsisigineqarsimasut ilaannik arlaliannguanik misissuigaanni tamanna malunnarsissaaq.
4. Ajornartorsiutit naalagaaffimmi innuttaasut pisinnaatitaaffiinut tunngasut Mosesip inatsisai naapertorlugit qanoq aaqqinniarneqartarpat?
4 Mosesip inatsisai maleruarneqaraangata Naalagaaffimmi innuttaasut pisinnaatitaaffii pillugit ajornartorsiortoqarneq ajorpoq. Israelikkuunngitsut tassani najugaqavissut pillugit Môrsasip agdlagaisa pingajue 19:34-mi ima allassimasoqarpoq: ’Ilassisut nunassinni inunngortutut itissavarsi takornartaq akornassinni takornartaasoq, asassavallu ilittut.’ Aaqqissuussineq tamanna naapertuilluassutsimut asanninnermullu takussutissaavoq. Eqqartuussisut ilisimannittullu ima oqaaqqissaarneqarput: ’Amerlanersaasut malissanngilatit ajortumut, saqitsaattoqaraangallu akissanngilatit eqqartuussisissaq mumissallugu amerlanersaasut malillugit. Nikanartorluunniit ataqqinartissanngilat saqitsaatigisaagut.’ (2 Môrsase 23:2, 3) Malugeriaruk naapertuilluassuseq pisuunut piitsunullu assigiimmik atortuusussaasimasoq.
5. Inatsisit pillaanermut malittarisassiaasut Mosesip inatsisaaniittut ullumikkut inatsisaasunut sanilliutikkit.
5 Mosesip inatsisaani inatsisit pillaanermut malittarisassiaasut ullumikkut inuiaat inatsisaannit pitsaaneroqaat. Assersuutigalugu, tillittoq innuttaasunut inatsisinik maleruaasunut eqiasuitsunullu nammagassiissutaannginniassagami parnaarussivimmut pisinneqarneq ajorpoq. Sulisariaqarporli tillitami minnerpaamik marloriaataanik utertitsisinnaanissami tungaanut. Taamaammat tilliffigineqartoq annaasaqarneq ajorpoq. Tillittoq suliumananilu akiliiumanngikkuni, inussiatut akigineqartarpoq taarsiinissami tungaanut. Naalasseriilluni eqqartuussisut aalajangigaat assortortuaannarpagu pillagaalluni toqunneqartarpoq. Taamaalilluni tilliffigineqartoq inatsisitigut naapertuilluarnerulluinnartumik pineqartarpoq, tamannalu ilutigalugu aammattaaq anusinngorsaataavoq allanut tillitsaaliutaalluni. (2 Môrsase 22:1, 3, 4, 7; 5 Môrsase 17:12) Aammalu inuuneq Guutip isaani illernartuummat inuartoq kinaluunniit toqunneqartariaqartarpoq. Taamaalilluni inuk ajortoq toqutserusuttoq inuiannit peerneqartarpoq. Piaarinaatsoornikkulli inuartut naakkinnittumik iliorfigineqartarput. — 4 Môrsase 35:9-15, 22-29, 33.
6. Israelip inatsisai misissorutsigik qanoq isummissaagut?
6 Miserratigineqarsinnaanerpa Guutip inatsisiliortutut eqqartuussisutullu inuiaqatigiinnut Israelikkunnut iliuuserisartagaanut tamanut naapertuilluassutsip ilisarnaataanera? Taamaattumik neriullualersarpugut tuppallilersarlutalu Isaia 42:1-imi Guutip neriorsuutaata qanoq ililluni Kristus Jesus aqqutigalugu eqquutitaanissaa eqqarsaatigigaangatsigu! Tassani ima neriorsoqqissaarneqarpugut: ’Innarluissut inuiaqatigiinnut saqqummiutissavaa.’
Naapertuilluassuseq naakkinninnerlu oqimaaqatigiissitaasut
7. Jehovap Israelikkunnut naakkinnilluni iliuuserisartagai oqaluttuarikkit.
7 Guutip naapertuilluassusia naakkinninnermik ilaqarpoq. Tamanna erseqqissumik malunnarsivoq Israelikkut Guutip aqqutigeqqusaanut naapertuilluartunut naalanngittalermata. Israelikkut ukiuni 40-ni puilasuitsumiinneranni Jehovap naakkinnilluni taakkuninnga isumassuineranik Mosesip oqaatiginninnera malugiuk: ’Nunami puilasuitsumi naapippaa, inuilaasumi soqanngitsumi uiannisaarfimmi; iluaa, ajoqersorpaa, paarilluarpaa isimi tappiutaatut. Soorlu nattorallup tukersitani pilerisaartarai piaqqami qulaanni aarsaarluni, taama suluni siaarpai tigullugu nammallugulu isaqumigut. Jehovap kisimi tasissersuuppaa.’ (5 Môrsase 32:10-12) Kingusinnerusukkut, inuiaqatigiit Jehovamik tunusseqqaannalermata, Jehovap ilungersortumik oqaaqqissaarpai: ’Saanniassasusi ingerlavissinnit ajortunit suliassinnillu ajortunit.’ — Saggaria 1:4a.
8, 9. (a) Qanoq annertutigisumik Guutip juutit naakkinnittumik naapertuilluarluni iliuuseqarfigisarpai? (b) Naggataatigut ajunaarnersuarmik sumik eqqorneqarpat, Guutilli taakkununnga iliuuseqarfiginneriaasia qanoq oqaatigineqarsinnaava?
8 Jehovap naakkinnittumik kajumissaarinera tamanna tusaajumaneqanngilaq. Pruffiiti Zakarias aqqutigalugu Guuti ima oqarsimavoq: ’Kisianni tusaanngillat naalannatillu uannut.’ (Saggaria 1:4b) Taava Guutip naakkinnittumik naapertuilluassutsimigut ernituani aallartippaa Israelikkut imminut saanniarnissaannut ikioriartorlugit. Johannes Kuisisup Guutip ernera ilisaritippaa oqarluni: ’Tassa Guutip savaaraa silamiut ajortaannik ersuttoq.’ (Juánase 1:29) Ukiuni arlalinni Jesusip qasusuilluni Guutip aqqutigisaanik eqqortunik juutit ajoqersortuarpai, kisissaanngitsunik tupinnartuliortarluni, tassuuna Aniguisitsisuunini siulittuutigineqartoq uppernarsisillugu. (Lúkarse 24:27; Juánase 5:36) Inuilli tusaajumanatillu upperumanngillat. Taamaattumik Jesus ima oqartariaqarpoq: ’Jerusalem, Jerusalemiaa, pruffiitinik toqutsisutit ilinnullu aallartitat ujaqqanik milloorlugit, qassinimmi taava qitornatit katersorumagaluarikka, soorlu marloraap piaqqani sulummi ataanut katersortarai, piumanngilasili. Ata, illorsi ilissinnut qimagaassaaq inueruttoq.’ — Matîuse 23:37, 38.
9 Eqqartuussumminik naammassinninnissaminut Guuti suli ukiuni 37-ni utaqqigallarpoq, ukiumili 70-imi Romamiut Jerusalemimik piuneerussinerat juutinillu tuusintikkuutaanik aallarussinerat ilaginnarpaa. Ukiut arlalinnik hundredellit ingerlaneranni Jehovap kamaginninnera ilalaarneralu eqqarsaatigigutsigu, erseqqilluinnannginnerpa Israelikkunnut iliuuserisartagai tamarmik naapertuilluartuusut?
Inuiannut tamanut naapertuilluarneq
10. Guutip naapertuilluassusia qanoq ililluni inuiannut tamanut siaruartinneqarpa?
10 Israelikkut Jesus ajattoreeraallu Jakob oqarpoq ’Guutip Guutimik nalusut takusaqqaarai aterminut ilannguttunik innuttassarsivigalugit’. (apustilit suliait 15:14) ’Innuttat’ taakku — juuterpaalunnguanik Jesusip Messiasiuneranik ilassinnissimasunik ilaqartut — katillutik tassaapput ’Israel [anersaakkut ittoq] Guutip pigisaa’, tassaallutillu Kristus Jesusip ajoqersugai anersaakkut qitornarsiarineqartut 144.000-iusut. (Galâsiamiut 6:16; sarĸúmersitat 7:1-8; 14:1-5) Guutimik nalusut kipineqarsimanngitsut uppertunngortut Kornelius siullersaraat. Korneliusip inoqutaasalu Guutip annaassissutaa ilassimmassuk Peter ima oqarpoq: „Ilumut paasilerpara Guuti nakerisarsiorneq ajortoq, kisianni inuianni tamani kinaluunniit mianerinnitsini naapertuilluarnermillu sulisoq nuannarigaa.“ (apustilit suliait 10:34, 35, NV) Jehovap nakerisarsiorneq ajornerata naapertuilluartuunera Paulusip erseqqissarpaa oqarluni: ’Naami juutillu grækerillu, naami inussiallu inussiaanngitsullu, naami angutillu arnallu, tamassi ataasiugassi Kristus Jesusimi. Kristusilli pigippasi Abrahamip kinguaaraasi, kingornussisussaavusilu unnersuut naapertorlugu.’ — Galâsiamiut 3:28, 29.
11. Abraham sumik neriorsorneqarpa, qanorlu ililluni eqqortinneqarumaarpa?
11 Tassani neriorsuummik nuanningaartumik Jehovap Abrahamimut neriorsuutigisimasaanik eqqaasinneqarpugut. Ataataanerpaap taassuma ernerminik asangaakkaminik Isakimik pilleeqquneqarnerminut naalannera pissutigalugu Guutip taanna oqarfigaa: ’Taama ilioravit, ernituat erliginnginnakku, tamanna pillugu pilluaqqulluinnarpakkit . . . kinguaassakkullu nunami inuiaqatigiit tamarmik pilluaqqunarsissapput.’ (1 Môrsase 22:16-18) Neriorsuut tamanna qanoq eqqortinneqassava? ’Abrahamip kinguaassaasa,’ Jesus Kristusip malittaasalu tanitaasut 144.000-iusut toqu tikillugu aalajaatsut, qilammiillutik inuiaat ukiuni tuusintini naalakkersorumaarpaat. (sarĸúmersitat 2:10, 26; 20:6) Ullut pilluarnangaarfiusussat tamakku pillugit Jehovap ima neriorsoqqissaarpaatigut: ’Naalagaassusiata alliartornera eqqissinerlu soraarfeqassanngillat.’ Suna pillugu? Messiasikkut naalagaaffiup tamatuma ’naalagaassusiata tunngavigissammagu innarluissut naapertuilluarnerlu, matumannga isuanullu allaat’. — Isaia 9:7.
12. Abrahamimik angeruseq tunngavigalugu pilluaqqussutit qanoq annertutigisumik maannangaaq iluaqutigineqalereersimappat?
12 Uagulli Abrahamimik angerutsip pilluaqqussutissartaanik iluaqutiginnilernissatsinnut Jesus Kristusip ukiuni tuusintini naalagaanissaanut utaqqisariaqanngilagut. ’Amerlangaartut’ ’inuiaqatigiinnit immikkullu naggueqatigiissunit immikkullu inuiaasunit immikkullu oqaasilinnit’ tamaneersut pilluaqqussutit tamakku maanna iluaqutigilereersimavaat. Assersuutikkut ’atisatik takisuut savaaqqap [Jesus Kristusip] aavanik erroramikkik qaqorsarlugillu’ Jehovap saani iluartutut naatsorsuutigineqalereersimapput. Abrahamitut Jehovamut ikinngutaalersimapput! Aqqummut annassutaasumut Jehovap inuiannut tamanut ammarsimasaanut naapertuilluassuseq maannangaaq ilisarnaataalereersimavoq. — sarĸúmersitat 7:9, 14.
Guutip aqqutigisai naapertuilluartut illit iliuuseqarfigaagit?
13, 14. (a) Tamatta immikkut uummatitsinniittunik qanoq misissuisariaqarpugut? (b) Jehovamut qujamasunnerput qanoq ilillugu ersersinniarsinnaavarput?
13 Illit utertinneqarnissat pillugu ernituaminik tunniussinermigut naapertuilluassutsip asannissutsillu Guutip ersersitaata uummatit qanoq atsigisumik killippaa? Takorloorniariaruk Abraham qanoq misigisimassasoq Jehovap qinnuigimmani ernini asangaakkani pilliutigeqqullugu! Guutili suli sakkortunerusumik misigisimassaaq. Eqqarsaatigeriaruk taanna qanoq misigisimassasoq ernini asangaakkani asissugaallunilu, saneqquttunit mitaatigisaallunilu, nappakkami naalliutsitaaffimmi anniangaarluni toqutaammat. Takorloorniariaruk Jehova qanoq qisuariarsimassasoq Jesus nilliammat: ’Guutiga, Guutiga, sooq qimappinga?’ (Matîuse 27:39, 46) Taamaakkaluartorli naapertuilluarnerup pisariaqartissimavaa Jehova Guutip ernermi taamatut toquneranik akuerinninnissaa, Guutip naapertuilluassusiata qularnarunnaarutissaanik assuarnaassutsi takutinniassammagu. Aammattaaq ernermi toqunera akuerigamiuk Jehovap uagut annassinnaanissatsinnut aqqutissiuuppaatigut.
14 Jehovamut erneranullu qujamasunnitta tamanut ima nassuerumalersittariaqarpaatigut: ’Annaassut Guutitta savaaqqallu pigaat.’ (sarĸúmersitat 7:10) Taamaalilluta ilassinnilluartumik periaaseqarnitsigut ersersissavarput Mosesip oqaasii uku upperigivut: ’Jehovap aqqutigisai tamarmik innarluissutaapput.’ (5 Môrsase 32:4) Guutip aqqutigisaanik innarluissutaasunik inunnut annassutissaasunik ilassinninnitta malinninnittalu qularnanngitsumik Jehova erneralu uummataasigut nuannaartissavaat!
15. Jesusip Nikodemusimut oqaasii uagutsinnut qanoq pingaaruteqartigaat?
15 Pilluaatiginnginnerparput uppeqatitta 1870-ikkunni pilliut utertitsissutaasoq pillugu apeqqummik akerleriissutaasumik aalajaatsumik illersuisuusimanerat? Nuannaarutigaarpullu ullumikkut peqatigiiffimmut Guutip naapertuilluarluni asannillunilu aqqutigisaanik inunnut annassutaasumik aalajangiusimannittuartumut ilaagatta. Taamaattumik Jesusip Nikodemusimut oqaasii immikkut soqutigisariaqarpavut: ’Guutip erni silarsuarmut aallartinngilaa silamiut eqqartooqqullugit, kisianni silamiut taassumuuna annaqqullugit. Taassumunnga uppertoq eqqartuunneqassanngilaq. Sallusuissummik ileqqulik qaamasumut pisaraaq suliani saqqummeqqullugit, Guutimi suliarisaammata.’ Guutip iluarinninnani eqqartuussutaa pinngitsoorumagutsigu Guutip piumasaanut naapertuuttumik suliaqarnitsigut erneranut uppernerput ersersittariaqarparput. — Juánase 3:17, 18, 21.
16. Jesusip ajoqersugaasa qanoq ilillutik Ataataq qilammiusoq naalannartinniarsinnaavaat?
16 Jesus oqarsimavoq: ’Inerititaqangaarussi ataataga naalannarsissaaq uangalu ajoqersugarilissavassi. Inassutikka maleruarussigik asannissutsinniittuassaasi, soorlu uanga ataatama inassutai maleruarikka asannissusianiittuarlungalu.’ (Juánase 15:8, 10) Inassutit suut-uku pineqartut? Ilaat Juánase 13:34, 35-miippoq, Jesusimmi tassani ajoqersukkani oqarfigai: ’Inassummik nutaamik tunivassi, asaqatigeeqqullusi. Matumannga tamarmik ilisarissavaasi ajoqersugarigissi: asaqatigiikkussi.’ Asanninnerup inerititai Jehovap Nalunaajaasuisa akornanni erseqqeqaat. Jesus aamma ima peqqusivoq: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu iluartup aqqanut kuillugit, ajoqersorsigillu ilissinnut peqqusakka tamaasa maleruaqqullugit.“ (Matîuse 28:19, 20, NV) Illit nammineq sulianik Guutip piumasaanut naapertuuttunik taama ittunik suliaqarpit?
17. Angusat suut takutippaat oqaluussinerup ajoqersuinerullu Jehovap naapertuilluassusianut takussutissaanerat?
17 Jehovap Nalunaajaasuisa ukiup ataasiinnaap ingerlanerani naammassisimasaat qimerloorutsigik Jesusip ajoqersugai oqaluussinermik ajoqersuinermillu suliassikkamigit Jehovap aqqutigisaasa naapertuilluassusiat erseqqeqaaq. 1988-imi ajoqersukkat nutaat kuisittut 239.268-iupput! Tamatuma uummaterput tipaatsutsinnginnerpaa?
Guuti naapertuilluartoq iliuuseqarasuassaaq
18. Jehovap innuttaasa malersugaanerat eqqarsaatigalugu apeqqutit suut pilersinnaappat?
18 Nalunaajaanerup ingerlanneqarnerani assortuisoqanngitsoorsimanngilaq. Jesusip ajoqersukkani oqarfigai: ’Uanga qinugigaminnga ilississaaq qinugiumaarpaasi.’ (Juánase 15:20) Jehovap Nalunaajaasuisa ukiuni nutaanerusuni oqaluttuarisaanerata oqaatsit tamakkua ilumoornerat uppernarsarsimavaat. Nunani tulleriiaaginnarni Nalunaajaasut inerteqqutigineqartarlutillu, parnaarussaasarlutillu, allaallu unatarneqartarlutillu naalliutsinneqartarsimapput. Habakkukip oqaasii siulittuutaasut eqqaavavut: ’Inatsisit sunniiunnaarput, eqqartuussullu oqaaserineqartarinngilaq.’ Taamaattumik allaat Jehovap innuttaasa ilaat ilaatigut oqarusuttassapput ima: ’Sooq Jehovap ilumuunngitsut isigiinnarpai? Sooq nipangersarpa iluaatsup imminit iluarnerusoq iiniaraangagu?’ — Hâpakuk 1:4, 13.
19. Guutip isiginneriaasiatut pissutsinik isiginnilernissatsinnik ikiorniarluta Jesus qanoq assersuusiorpa?
19 Jesusip assersuusiarisimasaa ikiortigalugu apeqqutit taamaattut akiniarsinnaavavut pissutsillu Guutip isaanillusooq isiginiarsinnaallutigik. Lúkarse 17:22-37-mi pissutsit nakuuserpaluttut aaqqissuussaanerup matuma naalerfissaanut ilisarnaataasussat Jesusip oqaluttuarai. Oqarsimavoq pissutsit tamakku Noap nalaani Ulersuaq sioqqullugu aammalu Lotip ulluini Sodomap Gomorrallu piuneerussaanerat sioqqullugu pissusiusimasunut assingujumaartut. Taava, soorlu Lúkarse 18:1-5-imi allaatigineqarsimasoq, Jesusip ajoqersukkani saaffigalugit ’assersuummik oqaluffigai, qasusuillutik qinuttuinnariaqartut’. Jesusip oqaluttuarai uillarneq atugarliungaartoq aamma eqqartuussisoq uillarnerup pisariaqartitaanik naammassinnissinnaagaluartoq. Uillarnerup eqqartuussisoq ima qinnuigisaqattaarpaa: ’Saqitsaasinnut innarlernaveersinnga.’ Aggertuaannarmat eqqartuussisup naggataatigut isumagaa uillarnerup naapertuilluartumik iliorfigineqalernera.
20. Jesusip assersuusiaa sumik ilinniarfigisinnaavarput?
20 Uagut ullumikkut tamanna sumik ilinniarfigisinnaavarput? Eqqartuussisoq iluaatsoq Jehovamut naleqqiullugu Jesus ima oqarsimavoq: ’Tusarsiuk eqqartuussisoq iluaatsoq qanoq oqartoq. Guutilli qinikkani ullukkullu unnuakkullu torlorfigisini innarlernaveersissannginnerpai, taakkulu kamajuiffigisannginnerlugit? Oqarfigaassi: Innarlernaveersinnasuassavai.’ — Lúkarse 18:6-8a.
21. Nammineq ajornartorsiutivut qanoq isumaqarfigalugillu iliuuseqarfigisariaqarpavut?
21 Nammineq ajornartorsiutivut eqqarsaatigalugit, isumaqarnaraangat qinnutivut akineqanngimmersortut eqqaamajuaannartariaqarparput imaanngimmat Guuti ikiuinissaminut piumassuseqanngitsoq. (2 Pîtruse 3:9) Uillarnertut aatsaannguaq taaneqartutut malersorneqarutta imaluunniit naapertuilluanngitsuliorfigineqarutta, isumalluarsinnaavugut naapertuilluarnerup naammassineqarnissaa Guutip isumagiumaaraa. Qanoq ililluta taamatut uppersuseqarneq ersersissinnaavarput? Qinuttuinnarnitsigut qinnutivullu naapertorlugit aalajaatsumik iliuuseqarnitsigut. (Matîuse 10:22; 1 Tásalûníkamiut 5:17) Aalajaatsuunitsigut uppernarsaaqataasinnaavugut uppernermik piviusumik nunami nassaassaqarneranik, naapertuilluassutsimik nuannarisaqarluinnartunik inoqarneranik, uagullu taakkununnga ilaanitsinnik. — Lúkarse 18:8b.
„Qiimmattaritsi, inuiaat ukorsii, innuttai ilagalugit“
22. Oqaatsit ajugaasimaarpaluttut suut atorlugit Mosesip erinarsuunni naggaserpaa?
22 Ukiut hundredelippassuit matuma siornagut Mosesip erinarsuunni naggaserpaa oqaatsit ajugaasimaarpaluttut uku oqaaseralugit: „Qiimmattaritsi, inuiaat ukorsii, innuttai ilagalugit, kiffami aavi akiniutigiumaarmagit, qinngarsortinilu kingumut akiniarlugit innuttamilu nunaat saammaannartillugu.“ (5 Môrsase 32:43, NV) Ulloq Jehovap akiniaaffissaa qanilliartuinnarpoq. Jehovap naapertuilluarluni kamaginnittuarnerata ila qujanassusia!
23. Guutip innuttaanik tipaatsoqatiginnittut pilluarnartumik sumik siunissaqarpat?
23 Inuit inuiannit tamaneersut ’allamik isumataarnissaannut’ suli piffissaqarpoq, nukinginnarporli. Peter mianersoqqusilluni oqarpoq: ’Jehovap ullussaa tillittutut nalliukkumaarpoq.’ (2 Pîtruse 3:9, 10) Guutip naapertuilluassusiata piumasaraa pissutsit aaqqissuussaanerata ajortup matuma aserorasuarneqarnissaa. Tamanna nalliuppat, suaarummik nuannersumik matuminnga: „Qiimmattaritsi, inuiaat ukorsii, innuttai ilagalugit,“ tusarlutik iluarinnippasittumik periaaseqartut akornanniikkisatoq. Aap, Guutip iliuuserisartagaanut tamanut naapertuilluassutsip ilisarnaataaneranik takunnittut pilluartut akornanniikkisatoq! (wD 1/3 89)
Qanoq akissavit?
□ Mosesip inatsisaasa suna pillugu Guutip naapertuilluassusianik tatiginninnerulersissavaatigut?
□ Guutip iliuuserisartagaanik naapertuilluartunik pingaartitsilernissatsinnut suut killissavaatigut?
□ Qanoq ililluni Jehova naalannartinneqarsinnaava?
□ Ullumikkut sumi nuannaarneq piviusoq nassaassaava?
[Qupp. 11-mi assiliartaq]
„Ilumut paasilerpara Guuti nakerisarsiorneq ajortoq, kisianni inuianni tamani kinaluunniit mianerinnitsini naapertuilluarnermillu sulisoq nuannarigaa.“ — apustilit suliait 10:34, 35, NV
[Qupp. 14-mi assiliartaq]
Guutip qinikkami torlorfigisimi naapertuilluartumik iliorfigineqalernissaat isumagiumaarpaa