Arnaq inuunerluttorsuaq qulaarneqassaaq
SILARSUARMI aaqqissuussaaneq maannakkut atuuttoq tamarmi Satanimit naalagaaffigineqarpoq, nuimanerusunillu pingasunik immikkoortortaqarpoq ’silap matuma guutianit’ aqunneqartunik. Nuimasut pingasut taakku tassaapput naalakkersuinikkut pissaaneqarneq, aningaasatigut pissaaneqarneq sunniuteqaqisoq, aammalu upperisarsiorneq. Naalakkersueriaatsit inuiaat oqaluttuarisaaneranni atuuttarsimasut tamangajammik nuimanerusunit taakkunannga pingasunit sunniuteqarfigineqartarsimapput. Taakkua arlaat sorleq-una ’uersartut [arnat inuunerluttut] arnaat’-nik taaneqartoq? — 2 Korintumiut 4:3, 4; sarĸúmersitat 12:9; 17:5.
Johannesip takorruugaa naapertussagaanni ’nunap kunngiisa’ arnaq inuunerluttoq kajaratik kanngunartulioqatigisarsimavaat. (sarĸúmersitat 18:3) (Quppernerni tulliuttuni inuiaat oqaluttuarisaaneranni pisimasuiusut tamatumunnga uppernarsaataasut sammineqarput.) Taamaattumik Babylon Angisooq naalakkersuinikkut pissaaneqarnermut assersuutaasimanavianngilaq.
Aningaasaqarnikkummi pissaaneqarneq, ullumikkut inuit atugarisaannut sunniisimaqisoq? Ilumoorpoq nunarpassuarni tamanna pissaanilissuartut sunniuteqarmat, eqqortumillu oqaatigissagaanni kikkut pisuujunissaannut kikkullu piitsuunissaannut aalajangiisuusarpoq. Taava aningaasaqarnikkut pissaaneqarneq tassaasinnaava Babylon Angisooq? Apeqqummut tamatumunnga akissutissamik inngilip Johannes uparuuppaa. Pisussaq tupaallannartoq siumut nalunaarutigaa. Babylonip inissisimaffini nuimasoq annaassavaa! Sulissutani uisunilu imminut maajuginnileriasaartut annaassavai. ’Nunap kunngiisa’ saniatigut kikkut aalajangersimasumik sulissutarisimavai? Inngili ima oqarpoq: ’Viinnimik kamaammit uersarnerata pianit inuiaqatigiit tamarmik imerput, nunallu kunngiisa uersaavaat, nunallu niuertartui inuulluapilunnerata angissusianit pisuunngorput.’ Aap, nunap niuertui arnamik taassuminnga peqateqarnermikkut, niueqateqartarnermikkut aammalu ’inuulluapilunneranik’ annertusisitsinermikkut iluanaaruteqarsimaqaat. Taamaattumik Babylon Angisooq silarsuaq tamakkerlugu niuernermut assersuutaasinnaanngilaq. — sarĸúmersitat 18:3.
Tassa oqarsinnaavugut Babylon Angisooq naalakkersuinikkut pissaaneqarnermut imaluunniit aningaasaqarnikkut pissaaneqarnermut assersuutaanngitsoq. Sunami kiserngoruppa? Babylon Angisooq tassaasimassaaq pissaaneqarfiusoq ima unnerluutigineqartoq: ’Ilisiinnikkut [anersaalerisitsinikkut] inuiaqatigiit tamarmik tammartinneqarput.’ Tamanna tassaavoq malunnaatilik siornatigut pissaanilissuusimasoq, maannali sanngiillisimasoq; malunnaatilik Babylonitoqqap nalaaniilli inuiaat eqqarsartaasiannik iliuusaannillu sunniisimaqisoq, aammalu ’nunap kunngiinut naalagaassuseqartoq’ — aap, Babylon Angisooq tassaavoq eqqunngitsumik upperisarsiorneq! — sarĸúmersitat 17:18; 18:23.
Immaqa inuit unneqqarillutik upperisarsiortut annilaarutigissavaat tusarlugu Babylon Angisooq, ’uersartut [arnat inuunerluttut] arnaat’ Satanip eqqunngitsumik upperisarsiornikkut naalagaaffissuanut, silarsuarmi upperisarsiornernut oqaluttuarisaanerup ingerlanerani naalakkersuinermik suliaqartunik aningaasatigullu pissaanilinnik isumaqatigiissuteqartarsimasunut, assersuutaasoq.
Babylon sorsutsitsiumatooq
Takorruugaq siulittuutaasoq naapertussagaanni Babylon Angisooq tassaavoq arnaq inuunerluttorsuaq inuiannik inuiaqatigiinnik naggueqatigiinnillu sorsutsitsillunilu ilerfiartitsillunilu akiniaaqattaartitsisarsimasoq, ilungersorlunilu oqaassinikkut, imeq illernartitaq atorlugu, qinnussinikkut aammalu inuiaassutsimik pingaartitserpaloqisumik oqaluuseqarnikkut iliuutsinik tamakkuninnga pilluaqqusisarsimasoq.a — sarĸúmersitat 18:24.
Babylon Angisuup palasertaasa, ingammik sakkutuunut sorsuttunut palasiusut, pissaanilissuarnut kiffartuutitut sorsunnersuit taakku marluk nalaanniinnaq isumaqatigiinnginnernilu annerusuni allani sakkutoorpassuit toqoragassaannanngorlugit aallartittarsimavaat. Katuullit katuuleqatitik toquttarsimavaat, naaggaartullu pisussaasutut misigisimallutik naaggaartoqatitik toquttarsimavaat, tamatumalu kingunerisaanik sorsunnersuarni marlunniinnaq inuit 50-60 millionit inuunertik annaasimavaat.
Ukiuni hundredelinni inuuffigisatsinni qaammarsagaaffiusuni upperisarsiorneq uumissuisitsillunilu toqumik kinguneqartitsiuarsinnarpoq — nunani kristumiuunerartut najugarisaanni katuullit naaggaartullu akersuuffigisaanniinnaanngitsoq, aammattaarli nunani kristumiuunerartuunngitsut najugarisaanni muuamaakkut juutillu, hindusiortut muuamaakkullu, Buddhasiortut hindullu, sikhit hindusiortullu, ilaallu ilanngullugit, assortuuffigisaanni.
Aammalu upperisarsiornerup kissaatigiuarsimavaa ’nunap kunngiinut’ sakkortuumik sunniusimanissani, qanorlu atugaqarnissaannik aammalu kikkunnik malinneqarnissaannik aalajangeeriartarsimalluni. Tamatumunnga assersuutit sammilaariartigik. (wD 1/4 89)
[Quppernerup ataani ilanngussaq]
a Ilerfiarnerit „illernartut“ (1096-1270), Ukiuni Trediveni Sorsunneq (1618-48), sorsunnersuit marluk aammalu Indiap avinneqarnerani hindut muuamaakkuusullu akersuunneranni inuit 200.000-it missaanniittut toqutaanerat (1947), tamakku tamarmik upperisarsiornerup aammik kuisinernut qanoq pisuutigineranut assersuutissarpassuit ilaannamininnguaannaraat.
[Qupp. 4-mi assiliartaq]
Ukua arlaannut — naalakkersuinermut, aningaasatigut pissaaneqarnermut imaluunniit upperisarsiornermut — „Babylon Angisooq“ assersuutaava?