Ataatsimeersuarnissaq „Guutimut-tunniusimaneq“
APUSTILI PAULUS ima allappoq: ’Ullussani kingullerni ajornartunik nalliuttoqassaaq, inuit inuujumaarmata Guuti kajumiginagu nuannaarutinut kajumittut, Guutimik mianerinninneq ileqqorisuusaarlugu, pissaaneqarfigiumanaguli.’ — 2 Timûtiuse 3:1-5.
Oqaatsit taakku kristumiuunerartunut amerlanernut naleqqulluavipput! Palasit ilaat oqarsimavoq ’ullumikkut oqaluffippassuit . . . nuannaarniartarfiinnanngorsimasut’. Tamatuma akerlerluinnaanik Jesus Kristusip ajoqersugai ilumoortut tassaapput inuiaat ’ajunngitsuliornermut ilungersortut’. (Títuse 2:14) Taakku ’nunap tarajorai’ aamma ’silarsuup qaamasorai’. — Matîuse 5:13, 14.
Ukiumoortumik aasakkut ataatsimeersuartarnivut Jehovap Nalunaajaasuisut peqatigiinnitsinnik asseqanngitsunngortitseqataapput. 1989-imi ataatsimeersuaqattaarnissatta qulequtaa, „Guutimut-tunniusimaneq“, pallorfiginninnitta uagutsinnik silarsuarmit avissaartitsisortaanik ersersitsivoq.
Guutimut-tunniusimanissap pingaaruteqassusia Bibelimi erseqqissarneqarpoq. Ataatsimeersuarnerup naammattumik periarfississavaatigut guutimut-tunniusimanermik sungiusarnissatsinnut. ’Timitsigummi sungiusarnerput imma iluaqutaavoq, guutimut-tunniusimanerli (NV) sunut tamanut iluaqutaavoq inuunermut matumunnga piumaartussamullu atasumik unnersuummik ilaqarami.’ (1 Timûtiuse 4:7, 8) Timûtiusimut agdlagkat sujugdlît 6:6-imi ima nangippoq: ’Iluanaarnaraluaqaarmi Guutimut tunniusimagaanni (NV) pinilu naammagalugit.’ Jesus Kristus nammineq guutimut-tunniusimaneq eqqarsaatigalugu maligassaalluarnerpaavoq. — 1 Timûtiuse 3:16.
Oqaaseq grækerisooq kalaallisut „guutimut-tunniusimaneq“-mik nutserneqarsimasoq tassaavoq euseʹbeia. Tamanna tassaavoq „Guutimut tunniusimaneq annerpaaq“ kristumiunit pigineqarsinnaasoq. Tunniusimanerup nassatarai upperisarsiornermi pisussaaffiit pingaartillugit ilungersuullugillu suliarinissaat. Guutimut-tunniusimaneq uummammit pisarpoq, Guutillu iluarisaanik inuunissatsinnut killittarpaatigut. Guutimut attaveqarnitta inuunitsinni pingaarnerpaatinnissaa tamatumunnga ilaavoq. Naak silarsuarmiikkaluarluta silarsuarmut ilaalinnginnissarput mianersuutigisariaqarparput. Guutimik-mianerinninnerup ajortumik iliornissamut ingalassimatissinnaavaatigut, guutimut-tunniusimanerulli Guutip piumasaanik iliornissatsinnut kajumissisittarpaatigut. Pîtrusip agdlagaisa áipait 2:9-mi (NV) qiimmaallannartumik neriorsoqqissaarneqarpugut „Jehovap imminut tunniusimasut ussernartumit annaanneq nalussanngikkai“.
Guutimut-tunniusimalerusukkaanni Guuti taassumalu oqaasii ilumoorullugit pisariaqarpoq. Guutimut-tunniusimanermillu ersersitsisinnaassagaanni Guuti pillugu eqqorluartumik ilisimassuteqartariaqarpoq tamannalu malillugu iliuuseqartariaqarluni. Tamatumani pisariaqarpoq anersaakkut pisariaqartitsinermik miserratiginninnginnissaq. Piviusumik guutimut-tunniusimanissarput pingaaruteqaqimmat tamakkiisumik ikiorneqarnissarput pisariaqartipparput, tamatumanilu ataatsimeersuarnerit iluaqutigilluassavavut. Oqalugiaatit, takutitsinerit misigisalikkersaartitsinerillu aqqutigalugit ilinniartinneqassaagut qanoq ililluta inuunitsinni sutigut tamatigut guutimut-tunniusimanermik ersersitsisinnaanersugut.
Kissaatigaarput silarsuarmit immikkoorluta kristumiut ilumoortuunissarput. Taamaattumik ataatsimeersuarneq najuffiginiariuk tusarnaaqqissaarnissallu siunniusimajuk. Tallimanngornermi ullaap-tungaa aallarniilluni erinarsornerminngaanniit sapaatikkut ualikkut naggasiilluni qinunermut peqataanissat aalajangiusimajuk. Ataatsimeersuarnermi sammineqartut tamaasa tusarnaaqqissaarniarigit, pisoqarneratalu nalaani ataatsimeersuarfiusumi angalaarlutit oqaloqateqaqattaarnaveersaarniarna. Allattuiniarna. Ataatsimeersuarnermi tusarnaaqqissaaruit inuunermi sutigut tamatigut, ilaqutariit iluanni, ilagiit iluanni inunnullu oqaluussiffigisannut guutimut-tunniusimanermik ersersitsisinnaalissaatit. (wD 15/2 89)
[Qupp. 7-mi ungalusaq]
Kalaallit Nunaanni ataatsimeersuarnissaq:
4.-6. augusti: Nuuk