Akiuugit

INUUNERMI siusissorujussuakkut kinguaassiuutitigut atoqatigiinnikkut ileqqussat TV-mi aallakaatitanit, atuakkanit, atuagassianit, filminit nipilersukkanillu atoqatigiinnernik sammisaqartunit aseroriartorneqartarput. Inuusuttut misigissutsikkut suli patajaallisimanngitsut inersimasut atoqatigiinnikkut ileqquinik ilaarsinissaminnik kajumissaarneqartarput. Angajoqqaallu ilaasa meeqqamik atoqateqajaarpallaarnissamik tatineqarnerat allisittarpaat peeraqarnissaannik akuersinermikkut. Ilagisartakkanit tatineqarnerup aamma inuusuttut peeraqartilersinnaavaat, inuusuttorpassuillu aalajangersimasumik peerallit pilerissutsitik noqinnagit atoqatigiittarput. „Nalinginnaasorujussuuvoq . . . niviarsiaqqap inuusuttup angajoqqaaminit asaneqanngitsutut misigisup . . . peeqqaminik atoqateqalersarnera kukkulluni isumaqarami asannittumik tatigeqatigiillunilu attaveqarnermik kinguneqassasoq,“ Luther Baker ilaqutariinnik misissuinermi professori oqarpoq.

Inuusuttuaqqat inuusuttuaraanertik iliuuseqarnissamut periarfissamissut kingullertut isigalugu inuugajupput inuunermut piareersarfissatut isiginagu. ’Nukappiaqqat inuusuttorpassuit inuusuttuunerminni kinguaassiuutitigut pilerissuseqangaalersarput kinguaassiorsinnaanertik aatsaat paasisartik nuannarinermik ikinngutitillu kinguaassiuutitigut piginnaassuseqarnerup angutinngornissamut aqqutaaneranik oqaatiginninniartut upperisaramikkik,’ professori Luther Baker oqarpoq. Ukiut 30-t matuma siorna oqaluttuarisaanermik ilisimatuup Arnold Toynbeep inuusuttunut salloqittaat tamanna aliasuutigisimavaa. Taanna isumaqarpoq nunani killerni nukiit pilersitsiortorluartut pissuteqartut inuusuttuaqqat ’atoqatigiinnikkut uummarnerannik’ kinguartitsisinnaassutsimik taamaalillutillu ilinniagaqarnissamik aallussilluarsinnaanerunerannik.

Angajoqqaat pitsaasumik sunniuteqarnerat

Angajoqqaat inuusuttuaqqanik nuannaariinnarlugu peerariittunik akuersinngitsut meeqqamik siunissami peqqissuunissaannik pilluarnissaannillu soqutiginninnermik ilumoortumik ersersitsipput. Ileqqussatigut najoqqutassat qutsissut malinnerisigut pitsaasumillu attaveqatigiittuarnikkut meeqqatik ajunngitsumik sunnersinnaavaat. Journal of Marriage and the Family naapertorlugu inuusuttut atoqatigiinnikkut ileqquinik misissuinerup takutissimavaa „sunniineq tamanna meeqqat atoqateqaqqaarnissaannik kinguartitsisinnaasoq“.

Angajoqqaat meeqqaminnik imminut naalakkersinnaanermik akisussaassusermillu sakkortuumik ilinniartitsisut pitsaanerpaanik angusaqartarput. „Inuusuttuaqqat angajoqqaallu najoqqutassiat akisussaanermik pingaartitsisut malikkaangatigik inuusuttuaqqat katissimanatik meerartaarnissaat ilimanaateqannginnerusarpoq,“ misissuinerup ataatsip uppernarsarpaa. Angajoqqaat meeqqamik ulluinnarni inuunerannik malussajallutik malinnaasariaqarput — ilinniagassaat soqutigalugit, sumiittarnerat kikkunnillu ilaqartarnerat ilisimallugit, meeqqat ilinniagaqarnissaannik piviusorsiortumik anguniagaqartillugit, anersaakkullu eriagisassanik avitseqatigalugit. Meeqqat angajoqqaatik qanimut attavigalugit alliartorunik imminnut tatiginerussapput kinguaassiorsinnaanertillu pissusissamisoortumik isigissallugu.

Angajoqqaanut meeqqanullu siunnersuutit pitsaanerpaat ilisimassummik Biibilimeersumik tunngaveqarput. Itsaq Israelimi angajoqqaat meeqqatik najoqqutassianik eqqortunik ilinniartittussaasimavaat. Taakku Jehovap ima aperisimavai: „Sumi inuiaqarnerpa pissaanilissuarnik ileqqoreqqusanik inatsisinillu pigisaqartunik inatsisitut ullumi ilissinnut saqqummiussattut naapertuilluartigisunik?“ ’Ileqqoreqqusat naapertuilluartut’ taakkua asannittumik tatiginnittumillu ilaqutariit iluanni meeqqaminnut ilinniartitsissutigissavaat. „Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Meeqqat ima kajumissaarneqarput: „Ataatavit inassutai maleruarniakkit anaanannillu ilinniakkatit asiginnarnagit!“ Attaveqatigiilluarneq asannittoq taamaattoq ataataasumillu anaanaasumillu ilinniartinneqarneq inuunermut kinguaassiuutinullu oqimaaqatigiissumik isumaqarnermut tunngaviupput. Tunngaviit taakkua inuunermi inuusuttut ’sernissussavaat’. — 5 Moses 4:8; 6:7, Ussatit 6:20, 22.

Inuusuttuaqqat, atoqatigiikkusunnermut nakkaannarnissigut sooq siunissarsi aserussavisiuk? Ukiunut 50-inut 60-inulluunniit tulliuttunut piareersarluni sianissutsikkut, misigissutsikkut anersaakkullu ineriartornermut aammattaaq kinguaassiuutinut tunngasunut oqimaaqatigiissumik isumaqarnermik ineriartortitsinissamut inuusuttuaraanerup ukiui atortariaqarput. Angajoqqaat, akisussaaffissi Guutimeersoq ilumoorussiuk kinguaassiuutitigullu tunillaattartunik nappaatit kissaatiginngisamillu naartunerit pissutigalugit ’ugguutissaasinnaasunut’ meeqqasi sernissorsigik. (Nalunaajaasup oqaasii 11:10) Ulluinnarni inuunissinni asanninneq isumassuinerlu qanoq ilillutik attaveqarnernut ataavartunut ineriartortitsisartoq meeqqassinnut takutissiuk.

Iluatsittumik akiuunneq

Ullumikkut amerlasuut tiinganeq sammisaraat, tamannali inuunermut isumaqarninnut ajoqutigeqinagu siunissamilu nalerisimaarnissamut pilluarnissamullu periarfissannut aseruiseqinagu. Inuit akornanni qanimut attaveqartunik maligassarpassuit Biibilimeersut eqqarsaatigikkit. Inuusuttuaraanerup kingorna inuunerup asanninnerullu suli pingaaruteqarnissaa qularutiginngilluinnaruk. Taamaannerata Guutip angutinut arnanullu kristumiunut piumasaanut naapertuunnera eqqarsaatigeqqissaartariaqarpat. Taamaalilluni inuit asaqatigiittut marluk akornanni ataavartumik tatigeqatigiittumillu attaveqarnissaat tunngavilerneqassaaq.

Aappariit soorlu Jakob Rakelilu, Boaz Ruthilu aamma savanik paarsisoq niviarsiarlu Sjulamimiu pillugit Biibilimi oqaluttuat atuarukkit takussavat imminnut kinguaassiuutitigut pileriginerat attaveqatigiinnerannut ilaasoq. Mosesimik allakkat siulliit kapitali 28 aamma 29, Rutimik allakkat aamma Taalliat Asanninnilersaarutit atuaqqissaarukkit paasissavat aappariinneranni pisuunngortitsisunik allanik aamma pingaaruteqartoqartoq.a

Jehovap inuunissamut aaqqissuussineri ilassikkit

Jehovap, inummik pinngortitsisup, inuup kinguaassiuutitigut pilerissusia tamatumunngalu tunngatillugu misigissusii nalunngilai. Asanninnermini imminut assililluni pinngortippaatigut ’tamalikattunik genilersimanata’, piumasaali naapertorlugu misigissutsitsinnik aqutsisinnaatilluta. ’Tassaammat Guutip peqqusaa . . . uersaaneq nigussagissi nungullusilu timisi pigisinnaassagisi iluarsiartortillusi ataqqinartillusilu pilerinermit illigutsinnasi kuisimanngitsutut Guutimik nalusutut; ilassi kialuunniit qatanngunni sukkut peqqusersiorfigalugu innarlissanngikkaa.’ — 1 Tásalûníkamiut 4:3-6.

Silarsuarmi tamarmi Jehovap nalunaajasui oqaatsit taakku malillugit inuupput. Kristumiunut angutinut arnanullu Guutip najoqqutassiai qutsissut ataqqivaat. Angutit utoqqaanerusut ataatatut isigineqarput angutillu ’inuusuttut qatanngutitut ilillugit, arnallu utoqqaat anaanatut ilillugit, arnallu inuusuttut qatanngutitut ilillugit tamatigut minguitsumik’ isigineqarput. (1 Timûtiuse 5:1, 2) Tamanna niviarsiaqqat nukappiaqqallu inuusuttut alliartorfissaattut peqqinnartuuvoq. Peeraqalernissaminnut tatineqarneq ajorput katiaarpallaartarnatillu kinguaassiuutitigullu tunillaattartunik nappaateqalernissaat aarlerinarneq ajorpoq. Ilaqutariit kristumiuusut sulissuteqartartut ilagiinni kristumiuni nukittorsartartut silarsuarmi tiingaffioqisumi umiarsualivittut isumannaatsutut ipput.

Inuusuttuaqqat Biibilip najoqqutassiaanik maleruaanermikkut kinguaassiuutitigut atoqatigiinnerit inuunerminni pingaarnerpaanngortinnaveersaarsinnaavaat Guutillu oqaasiani oqaaqqissaarut manna nuannaarutigisinnaallugu: „Inuusutsillutit qiimasaarniarit, uummativit nuannarisai malillugit iliortarit; nuannaarniarit inuusunnerpit ulluini, isivillu alianaagisaat malillugit pisarlutit. Eqqaamassavalli qanoq iliorninni tamani Guuti akisussaaffigissagakku. Ugguutissaasinnaasumik eqqarsaateqarnaveersaarniarit ajunaarnartullu ilinnut nalliunnaveersimatillugit, inuusuttuunerup ullui naajammata suiallannerinnartut illutik.“ — Nalunaajaasup oqaasii 11:9, 10. (gE 8/6 97)

[Quppernerup ataani ilanngussaq]

[Qupp. 10-mi issuagaq]

Ullutsinni tiinganersuaq siunissami pilluarnissamut periarfissannut aseruiseqinagu

[Qupp. 9-mi assiliartat]

Inuusuttuaqqat ilaquttatik ilagisarunikkik kinguaassiuutitigut atoqateqarniarnissaat ilimanannginnerussaaq