Titartakkanik-tulleriiaagaliortartup pilluarneq piviusoq ujarpaa

1970-IKKUT aallartinneranni Japanimi naqiterisitsisarfimmi ataqqisaasumi, Kodanshami, titartakkanik-tulleriiaagalianik titartaasartut nuimanersaraannga. 23-innarnik ukioqarlunga qaammammut 300.000 yenit 400.000 yenillu akornanni aningaasarsiaqalereerpunga, ilinniarnertuut ilinniarfissuanni soraarummeersimasup niuernerullu iluani ukiuni arlalialunni sulereersimasup aningaasarsiaasa pingasoriaataannik imaluunniit sisamariaataannik. Ukiullu marluk ingerlaneranni angummik inuusuttumik neriunaatilimmik peeraqarpunga, asaqatigiinnittalu katinnermik kinguneqarnissaa ilimanaateqarpoq.

Nunanni ilisimaneqalerninnut pissutaasoq tassaavoq titartakkanik-tulleriiaagaliara „Pilluarneq“-mik taaguutilik 1972-imi februariugaa saqqummertalersoq. Aallaqqaasiutaa ima nipeqarpoq: „Niviarsiaqqap piitsup, Shimap, pilluarneq ujarpaa.“ Titartakkat ilungersorpaluttut ikiortigalugit inuit akornanni asanninneq pingaarteqalugu sammivara. Tamatuminngali siunertarisara tassaanngilaq inuusuttut anersaakkut qaffassarnissaat, tassaallunili titartakkanik-tulleriiaagaliamik iluatsittumik ingerlasumik pilersitsinissara.

Taamani eqqarsaatiginngilluinnarpara, nangeqattaartoq tamanna sapaatit-akunneri 46-t qaangiuttut naammassippat, pilluarnerup suussusianik suli paasinnikkusussuseqassallunga, aammalu inuunermik nutaamik aallartitsissallunga. Siullermilli oqaluttuareqqaalaarallarlara qanoq ilillunga titartakkanik-tulleriiaagaliortartunngorsimallunga.

Qanoq ilillunga titartakkanik-tulleriiaagaliortartunngortunga

Angajoqqaakka piitsuugaluarput, ilinniagaqarnissamilli pingaartitsisuugamik atuakkanik pisinissaminnut sipaartuunngillat. Atuakkat atuartakkama saniatigut niviarsiaqqanut atuagassiat qaammammoortut atuartarpakka. Tamakku titartakkanik-tulleriiaagaliartaannit tiguartilluinnarpunga. Atuaannarnissara naammaginngilara, namminerli ilusilersuillunga titartaasalerpunga.

Alliartorninni titartakkanik-tulleriiaagaliat qaammammoortut niviarsiaqqanoortut pingasuinnaat saqqummertarput. Pissutsilli allanngoriartorput, allaallu ilinniarnertuut atuarfianni ilinniartut inersimasullu titartakkanik-tulleriiaagalianik atuartarnerat saqqumilaartorujussuanngorpoq. Aviisi Asahi Evening News qanittukkut ima maluginiagaqarsimavoq: „Atuagassiat qanoq ittut ima inunnik tiguaasinnaatigippat allaat fjernsynimit unammilleruminaatsinneqarlutik? Japanimi akissut tassaavoq: titartakkanik-tulleriiaagaliat. Japanimimi ’manga’-qarpoq, titartakkanik-tulleriiaagaliaqarpoq, tamanut qinigassianik.“

1986-imi aviisi Mainichi Daily News ima allappoq: „Atuakkat atuagassiallu Japanimi naqiterneqartartut pingasorarterutingajaat tassaapput [titartakkanik-tulleriiaagaliat] — tamakkulu tassaapput nioqqutissiat yeninik 300 milliardinik nalillit ukiumullu 1,5 milliardinngorlugit naqinneqartartut.“ 1987-ilu aallartilaaraa aviisi taanna ima allappoq: „1986-imi augustimi titartakkanik-tulleriiaagaliat arnanut inersimasunut atuartartunoortut assigiinngitsut 21-t nioqqutaasimapput, ataatsimut 58 millionit qaammammut tunineqarsimallutik.“

Inersimalerama titartakkanik-tulleriiaagaliortartut piumaneqartorujussuupput. Gymnasiami atuartillunga Japanimi naqiterisitsisarfiit annerit ilaat atorfinitsitsiniarluni titartakkanik-tulleriiaagaliortartunik nutaanik unammisitsivoq. Qiimmatsaqalunga unamminermut peqataavunga, angusinngitsoorlungali. Ukiorli ataaseq qaangiummat suliakka allat ajugaaniutivittussanut anngupput. Ukiut pingajussaanni naqiterisitsisarfimmit ima nalunaarutisivunga: „Kodanshap 1969-imi meeqqanoortunik titartakkanik-tulleriiaagaliullaqqinnerpaamut nersornaasiuttagaanik nersornaaserneqarputit.“ Oqaatsit taakku uannut tupinnartumik sunniuteqarput, tassami suliara kisiat eqqarsaatigalugu inuusinnaalerpunga.

Nuannarineqarnera alliartorpoq

Titartakkat atuagassiami saqqummersinneqassappata sungiusarluartariaqarpoq. Sapaatit-akunneri tamaasa titartakkanik-tulleriiaagaliama pissanganarnerpaartaqarnissaat aammalu pisisartut normup tullianik pinngitsooratik pisisinnaaqqullugit tulliani nangittussamik naaneqarnissaat isumagisartussaavara. Tamanna oqitsuunngilaq. Suliakka aaqqissuisoqarfimmiittunit isornartorsiuiumatuunit misissorneqartarput. Misigittaappasissumik niuertorpalaartumillu nipeqarlutik ima oqarsinnaasarput: „Una unalu — naqinneqarnissaminnut ajorpallaarput!“

Aallarterlaajugama akerlilersinnaaneq ajorpakka. „Iluarsaakkasuassavakka,“ nikallorlunga akisaraakka, tamaviallu angerlarasuartarlunga unnuarlu tamaat sulisarlunga. Maniguullunga titartakkakka allaat sisamariarlunga tallimariarlungaluunniit iluarsaatereeraluarikka aaqqissuisunit suli naammagineqarneq ajorsinnaasarput. Titartakkama sukkut qanorlu iluarsaannissaat nalulluinnaleraangakku kisimiitillunga qiakulasaqaanga.

Kisianni suliaq tamanna nuannaraara taamaattumillu sapinngisara tamaat aaqqissuisup piumasai naammassiniartarpakka. Suliannik iluatsitsininnut ilaatigut pissutaavoq aaqqissuisunut, pisisartut qisuariarnerinut sianiginneqqissaartorujussuusunut, maleruunnera. Sivitsunngitsoq nuannarineqarnerpaanut ilaalerpunga, tamannalu aallarterlaamut nalinginnaasuunngilaq. Titartaasartullu siornatigut qummut isigisimasaraluakka nuannarineqarneqqusaateqatigisalerpakka. Titartakkanik-tulleriiaagaliara „Pilluarneq“-mik taaguutilik, saqqummeqqaarninnit ukiut pingasungajaat qaangiuttullu aallartissimasara, aallaqqaataaniilli nuannarineqarnerpaanut ilaavoq.

Ilutsit titartarsimasama ilaat Japanimi titartakkanik-tulleriiaagaliat niviarsiaqqanoortut annersaasa marluk aappaanut „Niviarsiaqqat Ikinngutaat“-mik taaguuteqartumut saqqaliunneqartarsimapput. Allatut oqaatigalugu atuagassiamik taassuminnga tunisissutaasartoq tassaavoq uanga atera. Ajoraluartumilli pilluarneq taakkunani allaaserisara uanga nammineq angunngilara.

Qanoq inuunera allanngoriartortoq

Nuannarineqarnera alliartortillugu inooriaasera allanngortikkiartuaarsimavara, ingammik Tokyomut nuunnerma initaarnermalu kingorna. Titartaasartut nuannarineqartut pisarnerattut sulereeraangama unnuarsuarmut imerniartarfimmiinngikkaangama nuannaarniartarfimmiittarpunga, aqaguanilu ulloq tamaat sinittarlunga.

Nuannarineqarnera attatiinnarumallugu suli torrallataanerusunik sulilu amerlanerusunik titartaasalerpunga. Piffissakilliortuaannartuuvunga, tassami titartakkama pitsaassusiat millisarumanagu arriitsumik sulisarama. Ulluni arlalinni uffanngitsoorsinnaasarpunga qaammallu ilivitsoq eqqiaanngitsoorsinnaasarlunga. Ilaannikkut nalunaaquttap akunneri 30-t 40-lluunniit ingerlatiinnavillugit sulisinnaasarpunga titartakkama kingusinnerpaamik tunniunneqarfissaannik angumersiniaallunga. Suna tamaat suliannut pilliutigisimavara.

Aningaasaateqaraluarpungami, kisianni atornissaannut piffissaqanngilanga, taamaattumillu arsillunga atortalerpakka. Assersuutigalugu taasinnaavara qaammatit tamaasa atisartaartarpunga, qaqutiguinnarli atortarlugit. Tamatigut taxanut ilaasarpunga, yenillu 10 tuusintilikkaat nalinginut ataatsikkut oqaluttartup nuutisisalerlunga. Tamatumali kiserliornera sakkortusisiinnarpaa.

Silarsuarmi matumani nuannarineqarnissamik pingaartitsiffioqisumi nuannarineqarnerulernerup kingunerisarpaa unammillerumatussuseq nuanniitsoq. Alla qaffariartoraangat, alla nakkariartoraraaq. Qaffassimagaanni titartaasartut allat akeqqatut ilisarput, ataqqineqarunnaarsitsiniaasarpullu. Nuannarineqarneq milliartoraangat susoqartarpa? Akissarsiat qaffassimagaangamik appaqqinneq ajorajupput, tamannali ilutigalugu nuannarineqarneq milliartorsimappat suliassamik neqeroorfigineqarnissaq ilimanarunnaartarpoq. Taava titartaasartoq puiorneqartarpoq.

Naammassisaqarlunga misigigaluarpunga, kisianni titartaasartut nuannarineqartut silarsuaanni soqanngissuseq eqqissiveqanngissuserlu anoritut nillertutut uummatinnik supoorisutut misinnartut misigisimavakka. Kisianni tamatuma nassuerutiginissaa ornigisimanngilara.

Pilluarnermut piviusumut aallaavik?

1971-imi oktoberiugaa angut inuusuttoq torerpasissoq matunnut kasuttorpoq. Jehovap Nalunaajaasuisa ilagaat. Arlaleriarluni pulaartareerlunga arnamut ilisaritippaanga ima oqarluni: „Maannamiit anaanaga aggertalissaaq.“

Tusaamasaaneq aningaasallu anguniakkakka angusimavakka, kisianni fru Satogamitut, uannik Bibelimik atuaqqissaaqatiginnittartutut, atugarissaarpasitsiginangalu pilluarpasitsiginngilanga. Allaat peeqqannut misigissutsikka Fru Satogamip Guutini, Jehova, eqqartoraangamiuk nuannaarpasittarneranut nallersuunneqarsinnaanngillat. Sunaana allaassutaasoq? Paaserusussimavara Bibelimi tamatumunnga akissutissarsisinnaanerlunga.

Kisianni atuaqqissaarnissamut piffissarsinissara ajornakusooqaaq, tassami ullup-qeqqalernerani innarajuppunga, unnulernerani arfinernut makittarlunga aqaguanilu ullup-qeqqata tungaanut sulisarlunga. Fru Satogami matukkut sianeraangat itertarpunga, asattoreeraangamalu atuaqqissaaqatigiittarpugut.

Akornutaasut

Piffissap ingerlanerani ikiortikka peeraralu ilikkakkannik oqaluttuuppakka. ’Aammattaaq taakkua paasisariaqarpaat,’ taama eqqarsarpunga. Kissaatiginerpaasara tassaavoq aammattaaq peeqqama Bibelimik misissuilernissaa. Soqutiginnippasinngivipporli, tamannalu oqaluuserileraluaraangakku annulertarpoq. Tamanna tupigusuutigaara eqqissiveerussutigalugulu. Ilumoornerpa oqarami salloqittarneqarsimasunga? Atuaqqissaartarnera ingerlatiinnarukku ullut arlaanni peerara annaassanerpara? Annaanissaanik eqqarsaat saperluinnarpara. Immitsinnut asannilerfigisorujussuusimavugut; taamatummi isumaqarpugut, ullullu arlaanni sianerfiginngikkaanganga sulerusussuseqarneq ajorpunga. Kissaatiginerpaasaraaralu taassumunnga katinnissara.

Atuaqqissaartarnera sivitsoriartortillugu pissutsit allat eqqissiunnaarutigisalerpakka. Inooriaasera inuunermillu isiginnittaasera Bibelimi najoqqutassiaasunut naapertuutinngilluinnarput. Titartakkanik-tulleriiaagaliat suliarinnitsimik isumaanut ersiutaasarnerat eqqarsaatigileraangakku, aammalu qanoq meeqqanik tuusintilikkuutaanik sunnertiasunik sunniisarnerat eqqarsaatigileraangakku qanoq annertutigisumik akisussaaffeqarnera annilaajallaatigisarpara. Titartakkama oqaasertaasa eqqunngitsunut immaqa siuarsaataasinnaanerat isumanerluutigisaqaara. Sapaatit-akunneri tamaasa uannik nuannarinnittunit allagarsiarisartakkakka naapertorlugit nalunngilluinnarpara titartakkat oqaasertaat naatsunnguugaluilluunniit inuusuttut isumaannut qanoq sunniuteqartartut.

Kisianni inuussutissarsiutigalugu titartaasartutut titartakkanik-tulleriiaagaliat pisiarineqarumalluartut sanasariaqarpakka. Suut pisiariumaneqarluarnerpaanersut takuneqarsinnaavoq ullumikkut titartakkanik-tulleriiaagaliat kanngunartuliornernik nakuusernernillu imallit iluatsittumik tunisaanerannit. Titartaasartutut nuimasutut piumaffigineqarpunga atuartartut tamakku tungaasigut nuannarisaannik pikkunarsaarisarnissannik. Inuusuttuaqqat asannilertarnerannut tunngasut aammalu pissangaqatigiillutik imminnut attaveqatigiittarnerannut tunngasut kajuminnarsaaqalugit titartakkanni sammisarnerisigut niviarsiaqqat takorluukkersaarumatuut misigissusii sunnertarpakka. Tamannalu pissutaarpiarpoq taama sukkatigisumik suliannik iluatsitsininnut.

Maanna isummakka paalerput. Bibelimik atuaqqissaartarninni inooriaatsinnik allannguinissara kissaatigilersimavara, kisianni sakkortuumik qanoq ilioriataarsinnaassusermik amigaateqarpunga. Suut tamarmik pinngoriartorsimanerannik eqqarsaat upperaara, Pinngortitsisoqarneranillu eqqarsaat assortorlugu. Aappaatigulli ilinniakkama tunngaveqarluarpasinnerat miserratigisinnaanngilara.

Qamuuna kissaatigaara peeqqama Bibelimik misissueqatigissagaanga! Kisianni taamaaliorumanngilluinnarpoq. Ullulli ilaanni ima oqaratarpoq: „Misissussallugu ersigaara.“ Ila qunutussusia! Qularutigilerpara ilumut asaneraanga. Uangami nammineq? Imaassinnaava asannilersoornerinnarmik asannilerfigisimagiga?

Allanngulerfik

1972-imi majiugaa Jehovap Nalunaajaasuisa tamanut ammasumik ataatsimiinneri aappassaanik ilaaffigitillugit fru Satogamip Bibelimik atuaqqissaaqatigisimasaminut arnamut inuusuttumut ilisaritippaanga. Immitsinnut nuannariilerpugut, neriorsorparalu ullup ilaa pulaarumaarlugu. Taavunnartillunga quaappunga singernera nukkilisillugu, taamaattumik arnami inuusuttumi tassani unnuisariaqalerlunga.

Unnuk taanna atuagaasivianit atuakkamik atuagassannik tigusivunga. Atuagaq tigusara taaguuteqarpoq Inuk pinngoriartorsimava — imaluunniit pinngortitaava? Atuakkap taaguutaata paasiniaarusussuseqangaalersippaanga. Saagut saagusimapput, aqqusinermili qulliit ilummut qinngulaarsimapput. Saagut tunuannut pivunga sapinngisannillu qaamaneq ikinngutinnut sinittumut saqqartinnaveersaajutigalugu atuarsuataalerlunga.

Atuagaq pissanganarluinnartuuvoq! Atuarninni arlaleriaqalunga unillatsiartarpunga qianiarlunga. Ullup qaalernerani atuagaq naangajalluinnarsimavara. Qianngitsoorsinnaanngilanga. Pinngoriartorsimanermik isumaliutersuut eqqunngilaq! Nunarsuarmik avataaniittunillu tamanik inunnillu Pinngortitsisoqarpoq pissaaneqangaartumik! Unnuaq tamanna inuuninni killitsisimaarnerpaavunga. Guuteqarpoq! Sumi tamaani siuninnguatsinni isigisinnaasatsinni tunngavissaqarluartunik tamatumunnga uppernarsaatissaqarpoq. Guutip ajugaqanngitsup kiffartuunnissaanut nangaajuartariaqarnerpunga?

Guutimik kiffartuussinissaminnik uattulli kissaateqartut maanna ilagisalerakkit imeriartarneq piunngitsunillu oqaluuserisaqartarneq nuannersutut isigiunnaarpakka — soqutaanngitsutut isigilerpakka. Maanna ikinngutigisimasama oqaloriaasii kusananngitsut aammalu kanngunartuliornernik tulluusimaarutiginnittarnerat maajugilerpakka.

Sulisitsisima aaqqissuisoqarfiani titartaasartut suleqataasullu allat inuinnartut inussiarnersuupput, kisianni titartakkanik-tulleriiaagaliat silarsuaat Satanip anersaavanit ileqqorluttumit sunnerneqarsimavoq ajortunngortinneqarsimallunilu. Inuit uummatimik ulikkaarutaanit oqaluttaraat. (Matîuse 12:34) Titartakkanik-tulleriiaagaliat kanngunartunik imallit pilerfimmik najoqqutarisaat ersersittarpaat. Nakuuserneq kanngunartuliornerlu siuarsarumallugit titartakkanik-tulleriiaagalianik sunniuteqangaartumik peqqusersiortumillu Satanip atuisimanera kialuunniit ilumoorluni assortorsinnaanerpaa? Uanga nammineq nassuerutigisariaqarpara titartakkanik-tulleriiaagaliakka aqqutigalugit sapaatit-akunneri tamarluinnaasa eqqarsartaatsimik kanngunartumik siuarsaasimagama.

Eqqarsarluaqqissaareerlunga paasivara nuannarineqarlunga titartakkanik-tulleriiaagaliortartuujutigalunga inuuninni Guutip salliutinnissaa ajornarluinnassasoq. Taamaattumik suliffinni aaqqissuisoqarfik nalunaarfigaara soraarniarlunga, peeraralu attaveqarfigiunnaarpara.

Pilluarnerup aqqutaa

Titartakkanik-tulleriiaagaliara, „Pilluarneq“, 1972-imi decemberiugaa naavoq, naaneranilu Shima neriulluaateqaqaluni nutaamik inuuneqalerpoq. Sapaatip-akunnera qaangiuttoq aammattaaq uanga nutaamik inuuneqalerpunga, Jehova Guutimut tunniulluinnarsimanera ersersinniarlugu kuisikkama.

1973-imi juniugaa suliffinnik isumaqatigiissutiga naammat titartakkanik-tulleriiaagaliortarneq taamaatippara, septemberimilu Jehovap Nalunaajaasuatut allamik atorfeqarnanga oqaluussisartunngorlunga. Nuannaarutigalugu oqaatigisinnaavara ikiortima ilaat marluk pilluarnerup piviusup aqqutaanik ilinniartissimagakkit. 1975-imiilli qaammatit tamaasa nalunaaquttap-akunneri 140-nit amerlanerusut kristumiutut oqaluussinermi atortarsimavakka.

Tamannali tassaasimava pilluarneq? Aap. Maanna siornatigutut annertutigisumik isertitaqanngikkaluarpunga, kisianni naammagisimaarinninneq titartakkanik-tulleriiaagaliortartutut misigisimanngisara pigilersimavara. Naassaanngitsumik pilluarnerup aqqutaa inunnut allanut nanineqarsinnaaqqullugu sulivunga, suliarlu tamanna titartakkanik-tulleriiaagalianik suliaqarnermit pilersitsisinnaanerungaarpoq. Aammattaaq uppeqatit piviusumik qatanngutinnersumillu tunniussimasut inooqatigaakka. Tamanillu pingaarnerusoq tassaavoq pisinnaatitaaffik nuanningaartoq pisimagakku, tassa tamanik Pinngortitsisumik ilisarsineq kiffartuussinerlu aammalu nunarsuarmi paratiisiusumi naassaanngitsumik taassuminnga unnersiutiginninnissamik neriuut. — Oqaluttuarpoq Yumiko Fujii. (gD 22/2 88)

[Qupp. 28-mi assiliartaq]

Ilutsit titartakkakka titartakkanik-tulleriiaagaliamut (aviiseeqqamut) ilisimaneqarluartumut saqqaliunneqartarsimapput

[Qupp. 31-mi assiliartaq]

Maanna Jehovap Nalunaajaasuisa oqaluussinerannut peqataavunga