Ukiut 70-ingajaat Cubami Jehovamut kiffartorpunga

Taamani najugaqarfin­nguatsinni inuuneq eqqissisimanaqaaq. Ilaqutarpassuagut qanillugit najugaqarpugut. Nerisassanik amigaateqarnata pilluarluta inuuvugut.

Tallimat missaannik ukioqartunga angajoqqaakka Walton Jonesip Biibilimik ilinniar­tittalerpai. Walton oqaluus­sisartuuvoq aallussil­luartoq nunaqarfitsin­nukartarpoq 10 tiimit missaanni pisulluni. Takkukkaangat ilaquttama ilarpassui aataakkun­nukartarput Biibili pillugu eqqartueqatiginias­sagamikku. Angajoqqaakka, akka Pedro atsalu Ela ilikkak­kaminnik assut nuannarin­nikkamik sivitsun­ngitsoq imermut morsutsitaallutik Jehovamik Nalunaajaasun­ngorput. Ela maanna 100-ngajannik ukioqarpoq sulilu Cubami pioneritut kiffartorluni.

Taamanikkut Jehovap Nalunaajaasuisa Cubami guutisiornerat killilersor­neqanngilaq. Illumiit illumut oqaluus­sisarnerput Biibililersaaruterpas­suarnillu agguaasarnerput ilisarnaatigaarput. Pisussuaar­tarpugut! “Ulluni atugaris­saarfiusuni” Jehovamut kiffartornerput nuannersorpas­suarnik eqqaamasaqarfigaara. ‘Erloqinar­torsiorfiusulli’ misigisus­saavagut. – Tim 2. 4:2.

ULLUT ATUGARLIORFIUSUT AALLARTIPPUT

Tallimat missaannik ukioqartunga ataataga akkagalu Pedro ataatsimeersuariarlutik qeqertap illuatungaaniittumut aallarput. Alianaraluaqisumik angalanerminni imermik mingutsitamik imersimapput, taamaalil­lutillu napparsimasorujus­suanngorlutik. Eqqaamavara angerlareernerisa kingorna akkaga nujaaruttoq toqunanili. Ataatagali 32-innarnik ukioqarluni toquvoq.

Tamatuma kingorna anaanaga aalajangerpoq ilaqutariiulluta angannut nunaqarfimmi Lombillomi najugaqartumut nuussasugut. Tassa aataakkut asangaakkagut ilaquttagullu allat qimattariaqalerpagut. Naak pissutsit allanngoraluartut anaanaga, najakka uangalu Jehovamut kiffartor­tuarpugut.

1957-imi aggustip 26-anni qulinik ukioqarlunga tatsimi Lombillop eqqaaniittumi imermut morsutsitaavunga. Ukiut marluun­ngitsul­luunniit qaangiummata Cubami Jehovap Nalunaajaasuinut suna tamarmi allanngorluinnarpoq. 1959-imi naalakkersuisut uppitin­neqarput kommunistillu aqutsilerlutik.

Naalakkersuisut taakkua nutaat sakkutoorpas­suaqarnissartik pingaar­tingaarpaat. Tamanna Jehovap Nalunaajaasuinut ajornar­torsiutaangaalerpoq, uagummi nunami sumiluunniit najugaqaraluarluta politikkimut akuliunneq ajorpugut sorsoqataajumanerlu ajorluta. Tamanna pissutigalugu pisarnitsitut ataatsimiis­sinnaajun­naarlutalu oqaluus­sisinnaajun­naarpugut. Piffissallu ingerlanerani oqaluus­sisarnerput ataatsimiin­nigullu inerteq­qutaatilerpaat. Qatanngutigullu aalajaatsut hundredilip­passuit parnaarus­saapput. Ilaallu paarsisunit annersar­neqartarput nerisas­sanillu tunineqarpiarneq ajorlutik. Ilaannikkullu nerisassanik aattalinnik, Guutip nereqqun­ngisaanik, tunineqartarput.

Naak inerteq­qutigineqaraluartoq Jehova guutisiorfiginiarlugu ataatsimiit­tarnigut ingerlatiin­narpagut. (Hebr 10:25) Nunaateqarfinni sumiiffinnilu nalingin­naanngitsuni allani ataatsimeersuar­tarpugut. Taamaalluni qatanngutip angutip savaateqarfini ataatsimeersuarfissatut atukkiuppaa. Eqqiarnissaanut savalluunniit allamukar­tinnissaannut periarfis­saqanngilagut. Taamaalilluta uagut, Guutip savaatai, savat meertortut akornanni ataatsimeersuarpugut. – Mika 2:12.

Qatanngutitta anersaakkut isumassor­tuarmatigut qujamasuutigingaarparput. Ataatsimeersuarnerit ilaat kassettebåndinik immiunneqariarlutik nunap sinneranut ingerlateq­qinneqartarput. Ilaannikkut qatanngutit angutit marluinnaat ataatsimeersuarnermi oqalugiaatissat tamaasa piareersar­tarpaat immiullugillu. Isertorfiusumi immiussisarmata ilaannikkut kukkukuup angutivissat qarlortarneri nipillu allat quiatsan­narsinnaasut tusaaneqarsin­naasarput. Ataatsimeersuarfik innaallagiaqan­ngikkaangat qatanngutip angutip sikkilit ikiffigeriarlugit tukkaavii ingerlatik­kaangagit innaallagialersor­neqartarpugut. Taamaalilluta kassettebåndit immiussat tusarnaarsin­naalertarpagut. Nunani allani qatanngutitsitulli killilersor­neqarnata kiffartorsin­naanngilagut aamma Biibililersaarutit pissarsiarisin­naasagut amerlaval­laanngik­kaluartut Jehovamut qanittuar­nissatsinnut pisariaqar­titatsinnik amigaateqan­ngisaan­narpugut. Jehovamullu kiffartoqatigiinnerput nuannaarutigeqaarput. – Neh 8:10.

PIONERIN­NGORNERA, NULIARTAARNERA ANGAJOQ­QAANNGOR­NERPULLU

18-inik ukioqarlunga pionerin­ngorpunga illoqarfimmi Floridami. Ukiup ataatsip missaa qaangiummat specialpionerin­ngortin­neqarpunga illoqarfissuarmi Camagüeyimi. Taakani Emilia, qatanngut arnaq pinnerluinnartoq Santiago de Cubamin­ngaanneersoq naapippara. Peerariilerpugut ukiorlu ataaseq qaangiutin­ngitsorluunniit katilluta.

Naalagaaffiup sukkuliorfiuterpassuisa ilaanni ulloq naallugu sulisalerpunga. Emilialu pioneriusin­naajunnaaral­larpugut sulili sapinngisarput tamaat kiffartorusulluta. Ullut tamaasa ullaassakkut pingasuneer­tarpunga aqqarnullu tungaanut sulisarlunga. Ullaaralaakkut makiaar­tarnissara nuannarin­ngikkaluaqalugu taamaalillunga oqaluus­seqataasarsin­naavunga Emilialu ilagalugu ataatsimiinnernut tamanut peqataasarlunga.

1969-imi angajul­liliarput Gustavo inunngorpoq. Ernertaarnitta nalaani kajumis­saarneqarpunga ilagiinnik nakkutil­liisutut kiffartor­tunngorsin­naaniassagama piffissaq tamaat kiffartorneq aallarteq­qeqqullugu. Taamanikkut meerallit ilagiinnik nakkutil­liisuusin­naanerat Cubami nalinginnaavoq. Ulapittorujus­suuvugut nuannerluin­nartumilli. Emilialu misigisimavugut taamatut qatanngutitsinnik kiffartuus­sinerput pisinnaatitaaf­fissuusoq. Angalasartutut kiffartornitta nalaani Obed ernertaaraarput, taassumalu kingorna Abner, ukiualuillu qaangiummata nukarliliarput Mahely panissaaraarput.

Angalasartutut kiffartornerput kingumut qiviaraangakku Jehovap innuttaminik Cubamiittunik isumassuisarnera nuannaarutigisaqaara. Meeqqattalu Jehovamut asannit­tuunissaannik ilinniar­titsinis­satsinnik ikiorsimavaatigut. Taamani nakkutil­liisutut kiffartornerma nalaani qanoq inuusimanersugut oqaluttuarilaarlara.

INERTEQ­QUTEQARNERUP NALAANI ILAGIINNIK NAKKUTIL­LIISUUNERA

1960-ikkunni 1970-ikkunnilu sulinitta inerteq­qutaanera malugil­luinnarparput. Ataatsimiit­tarfigut matuneqarput. Oqaluus­sisartutut aallartitat anisitaallutik nunaminnut uterput. Qatanngutit inuusut­torpassuit tigusaal­lutillu parnaarus­saarrapput. Havanamilu immikkoor­tortaqarfipput matuneqarpoq.

Inerteq­quteqarnerup nalaani weekendiniinnaq ilagiit tikeraarsin­naasarpagut, ilagiit ataatsit weekendini tulleriinni tikeraar­tarlugit. Malugitin­naveersaar­tariaqaratta nassataqarpal­laarnata sikkiler­tarpugut. Angalanigullu tamanut nalunaarutigineq ajorpagut ilaquttatsinnulli tikeraarnertut isikkoqar­tittarpagut. Tamannalu ajornan­nginaaqaarput misigisimagattami ilaqutavigut tikeraarlutigit. Ilaannik­kulluunniit suna pillugu tikeraar­nerluta puiungajat­tarparput. (Mak 10:29, 30) Mianersor­tariaqarpugut politiimmi alapernaarsoq­qissaar­tarmatigut killisior­tarlutalu. Qatanngutigullu unnuiffigisagut uagut pilluta tigusaariaan­naasarput. – Rom 16:4.

Pissakik­kaluaqalutik qatanngutigut amerlasuut tuniusiumatoqaat. Piffiit ilaanni ippernanik ulikkaartarpoq. Qatanngutittalu ippernanut illersuutituan­nguatik netsit uagutsinnut atukkiut­tarpaat sinilluarsin­naanias­sagatta. Ilaasalu unnuisit­tarpaatigut naak nerisas­saateqarpal­laanngik­kaluarlutik. Tamannalu nalunngin­natsigu ilaatigooriarluta nerisassanik nassartarpugut avitseqatiginias­sagatsigit.

Ilagiinnut tikeraaraangatta meeqqagut tamaasa angalaqatigisinnaaneq ajorpagut. Taamaat­tumillu ataasiinnaq ilaasarpoq, sinnerilu anaanama najamalu paarisarpaat. Biibililersaaruteqar­nersugut politiit ilaannikkut misissor­tarpaatigut. Naalungis­sattali angalaqatiginera illersuutigisarparput – Biibililersaarutigummi nangikuusivimmut toqqortarpagut, taannalu misissorusun­neqarneq ajorpoq.

Emilia nersortariaqaqaaq piffissaq tamaat kiffartor­nitsinni meeqqatsinnik isumassuil­luarami tapersersorlungalu. Ilagiinnik nakkutil­liisutut kiffartor­tillunga sukkuliorfimmi suliinnarsin­naavunga. Qanoq ilillunga? Sapaatip-akunneranut ataasiarlunga marloriarlungaluunniit qaangiut­toorlunga sulisarpunga weekendimi freersin­naaniassagama. Kingusin­nerusukkulli suleqatinnut aqutsisun­ngorama sapaatip-akunnera naallugu sulisalerpunga. Tamanna pilersaarutaareermat susinnaan­ngilara. Suleqatimali suliassaat aaqqissuul­luaraangakkit ernumas­suteqarnanga weekendini ilagiit tikeraarsin­naasarpakka. Tassaqaluunniit sulisitsisuma weekendini sulinngit­tarnikka malugisarpaat.

ALLAMIK SULIASSIN­NEQARNERMI NUANNAAR­TUARNEQ

1994-imi ilagiinnik nakkutilliisut tamattaalluta, tassa 80-iulluta, Cubami qatanngutinit siuttunit Havanami immikkut ittumik ataatsimiigiaq­quneqarpugut. Kiisami ukiorpassuit qaangiummata naapissin­naanngornerput nuannaarutigeqaarput! Ataatsimiinnermi peqatigiif­fitsinni allannguutit eqqartoq­qaarpagut. Taava tupannaqisumik nalunaarfigivaatigut atigut pisortanut tunniun­niarlugit pilersaarutigigaat. Aamma sooruna?

Nassuiaap­paatigut oqartussaasut Jehovallu Nalunaajaasuisa pitsaanerusumik attaveqaler­nissaat siunertaralugu atorfillit ataatsimeeqatigisimallugit. Taakkualu nakkutilliisut angalasartut atii tamaasa piumasimavaat. Tamatta isumaqataalluta akuersivugut. Taamanimiilli kinguneqarluartumik oqartussaasut suleqatigil­lualerpagut.

Upperisarsioqatigiittut inatsisitigut suli nalunaarsor­neqanngik­kaluarluta ammasumik ataatsimiillutalu oqaluus­sisalerpugut. Kingusin­nerusukkut paasivarput nakkutilliisut angalasartut ilaat kikkuunersut oqartus­saasunit nalunngin­neqareersoq, uagulli uppernarsaanissarput kissaatigigaat.

1994-imi septembarimi immikkoor­tortaqarfitta ukiut 20-t matuma siorna matuneqarsimasup ammaqqinnissaa naalakkersuisunit akuerineqarpoq.

1996-imi Emilialu aperineqarpugut Betelimi kiffartorusun­nersugut. Tupaallaqaanga, nassuiaap­pakkalu suli meeqqanik marlunnik angerlarsimasuuteqarluta akisussaafigisannik. Betelimili kiffartor­nissarput suli kissaatigineqarpoq. Akuersivugut ilaqutariittullu Havanamut nuunnissarput piareersalerlugu.

Unneqqarillunga nassuerutigissavara Betelimi kiffartorneq aallaqqaammut nuannarival­laannginnakku. Ukiorpassuimmi nakkutil­liisutut angalasarsimanera uummateqarfigeqigakku. Allaffissorneq sapernar­tittarpara. Betelimili kiffartoqatima, minnerun­ngitsumik nuliama, ikiorpaannga allatut isiginnit­taaseqaler­nissannik. Piffissallu ingerlanerani Betelimi suliassin­neqarnera nuannarileralut­tuinnarpara, maannalu nuannaarlunga kiffartorpunga.

Emilialu inuusuk­kunnaarpugut. Ukiulli ingerlanerini qatannguterpassuagut ilisarisimal­lualikkagut suleqatigisimasagullu eqqarsaatigigaangatsigit nuannaar­taqaagut. Minnerun­ngitsumik nuannaarutigaarput meeqqatta erngutattalu Jehovamut kiffartornerat. Apustili Johannesi utoqqalisimasoq assigalugu oqarsin­naavugut: “Qitornakka ilumoortoq malillugu inuusut tusarlugu allanit tamanit nuanner­nerpaavoq.” – Joh 3. 4.

Maanna Emilialu ukiut 30-ngajaat Betelimi kiffartoreerpugut. Utoqqalinerput kræfteqaler­nerpullu pissutigalugit ullut unammin­niarnarsin­naagaluartut suliassiis­sutigineqartut sapinngisatsinnik naammas­siniartarpagut. Jehovamut kiffartor­nitsinni ajornar­torsior­taraluarluta nuannaarutigaarput ukiut 70-ingajaat qeqertami Cubami ‘Guuti pilluartoq’ kiffartorfigisin­naagatsigu! – Tim 1. 1:11; Tuss 97:1.