Guutip naalagaaffianik tusarliussinermit nutaarsiassat
Cubami ’isertarfik angisooq ulapinnartoq matuigaavoq’
APUSTILI Paulus Guutip naalagaaffia pillugu nutaarsiassamik nuannersumik oqaluussissutiginnilluartuusimavoq. Pinngortitsisup inuiannut naalattunut inuunermik naassaanngitsumik neriorsuutai periarfissat tamaasa atorlugit allanut oqaluttuariniartarsimavai. Efesusitoqqami tikeraartilluni inunnik suli amerlanerusunik ikiuinissaminut periarfissanik nutaanik nassaarami ima oqarsimavoq: ’Efesusimili . . . unissaanga, isertarfik uannut matuigaammat angisooq ulapinnartoq.’ — 1 Korintumiut 16:8, 9.
Ullumikkuttaaq Cubami Jehovap nalunaajaasui nutaanik periarfissaqalersimapput. Suli pisortatigoortumik nalunaarsugaanngikkaluarlutik Jehovap nalunaajaasuisa neriuutertik Biibilimeersoq nunaqqatiminnut maanna ammasumik oqaluttuarisinnaalerpaat. Qanittukkut Cubami naalakkersuisut upperisarsiortut assigiinngitsut upperisaminnik ingerlatsinissaminnut kiffaanngissuseqartilernissaannik soqutiginninnerminnik pimoorullugu ersersitsipput. Præsidentip Castrop Jehovap Nalunaajaasui upperisarsioqatigiittut Cubami naalakkersuisut attaveqarfigillualeriartugaattut tamanut ammasumik eqqaasimavai.
Pissutsit nutaat tamakkua Jehovap nalunaajaasuinut ’isertarfimmik angisuumik ulapinnartumik’ ammaassipput. Assersuutigalugu, ungasinngitsukkut Jehovap nalunaajaasui Cubami allaffimmik ammaapput, nunami tamaani oqaluussilluni suliamik ataqatigiisitsiniarnermut iluaqutaasussamik. Jehovap nalunaajaasui 65.000-init amerlanerusut inunnik ikiuipput Biibilimik atuaqqissaaqatiginnittarlutik paasisaqartitsisarlutillu. Atuagassiat Biibililersaarutit, Napasuliaq Alapernaarsuiffik aamma Iteritsi!, atortarpaat. Cubamiorpassuit peqqusersuitsut Jehovap nalunaajaasui peqatigalugit Biibilimik atuaqqissaartarnertik iluaqutigaat.
Aammattaaq nalunaajaasut qeqertami tassani sumi tamaniittut ikittunnguakkuutaarlutik aalajangersimasumik ataatsimiittarput. Allaat ilaannikkut amerlanerusukkuutaarlutik, 150-it missaanniittukkuutaarlutik, ataatsimiittarput immikkut pisinnaatitaaffittut isigisaminnik. Cubamiut oqartussaasuinit kiffaanngissuseqartitaalernertik nalunaajaasut qujamasuutigeqaat, taamaalillutimmi qatanngutitik angutit arnallu katersuuteqatigisinnaalerpaat, Guutimut unnersiutiginnissutinik erinarsorlutik qinoqatigiillutillu.
Ataatsimeersuarnerit „Guutimik mianerinninneq“-mik qulequtallit 1000-init amerlanerusut ungasinngitsukkut weekendini pingasuinnarni ingerlanneqarput. Nalunaarutigineqarsimavoq ataatsimeersuarnerni tamani „torissuseq, aaqqissuussaalluassuseq eqqissinerlu“ atuussimasut. Tamatumuunakkut nalunaajaasut oqartussaasunit nersualaarneqarlutillu pilluaqquneqarput.
Kristumiut ilumoortut nunarsuarmi sumi tamaaniittut Guutip naalagaaffia pillugu nutaarsiassamik nuannersumik oqaluussissutiginninnissamik Guutimit peqquneqarnertik ilungersuussilluarlutik malippaat. Tamanna ilutigalugu naalakkersuisunut oqartussaasunut eqqissinartumik attaveqarniarsaripput. (Títuse 3:1) Jehovap nalunaajaasuisa apustilip Paulusip unnersuussutaa manna malippaat: ’Taamaattumik tamanit pingaarnerutillugu oqaassivunga qinnutigalugillu torlulassutigalugillu qinnussissutigalugillu qujassutigissagaat inuit tamaasa, kunngillu akimarnillu tamaasa, ersiornaatsumik eqqissisimaarnartumillu inooqqulluta Guuti mianeriuarlugu titsiillutalu.’ — 1 Timûtiuse 2:1, 2. (wE 1/8 96)