ATUARTARTUT APEQQUTAAT

Galaatiamiut 4:24-mi apustilip Paulusip isumaqatigiissutit marluk suut eqqartorpai?

Aaperaap nulia, Saara, taassumalu kiffaa, Haakari, eqqartoreerlugit Paulusi ima allappoq: “Tamakku assersuutitut paasineqarsin­naapput. Arnat taakku isumaqatigiis­sutinut marlunnut assersuutaapput.” (Gal 4:22-24) Siornatigut isumaqarsimavugut isumaqatigiissutit taakku marluk tassaasut Moorsisip inatsisai tunngavigalugit isumaqatigiissut aamma isumaqatigiissut nutaaq. Misissueq­qissaareerlutali paasivarput paasinnit­taatsitsinnik allannguisariaqarluta. Paulusip isumaqatigiissut nutaaq pinnagu Aaperaamut isumaqatigiissut pigunarpaa. Sooq taama oqarsin­naavugut?

Paulusi allappoq kiffaq Haakari qaqqamut Siinaajimut assersuutaasoq. (Gal 4:25) Tassa Haakari Moorsisip inatsisai tunngavigalugit isumaqatigiissummut – qaqqami Siinaajimi Kr.in.si. 1513-imi isumaqatigiis­sutigineqartumut – assersuutaavoq. (Mos 2. 19:5, 6) Juutit tamarmik naammal­luinnan­ngitsuugamik Moorsisip inatsisai tamakkiisumik maleruarsin­naanngilaat. Taamaattumik nalunngil­luinnarpaat ajortimut inussiaataallutik. Isumaqatigiissut tamanna iluaqutigalugu paasisin­naavaat Missiarsi kinaanersoq, taassumami kisimi inatsisit maleruaq­qissaarsinnaavai. Missiarsip inuunini naammal­luinnartoq pilliutigigamiuk inuit ajortimit toqumillu aniguisin­neqarnis­saannut periarfissiivoq. (Gal 3:19, 24, 25) Taamaalilluni Guutip piumasaa naammas­sineqarmat Moorsisip inatsisai pisariaqarun­naarput. – Rom 10:4.

Haakarip Saarallu assigiin­ngitsuunerat Paulusip allaatigaa. Saara tassaavoq ‘arnaq inussiaan­ngitsoq’ “neriorsuut pissutigalugu” ernisoq. (Gal 4:22, 23) Neriorsuut tamanna tassaavoq Aaperaamut isumaqatigiissut. (Gal 3:29; 4:28, 30) Isumaqatigiissut tamanna pillugu Jehovap Aaperaat ima oqarfigaa: “[Illit] kinguaassakkut nunarsuarmi inuiaat tamarmik pilluaq­qunarsissapput, naalakkamma.” – Mos 1. 22:18

Aaperaamut isumaqatigiissut ‘kinguaassaq’ pillugu Edenimi Jehovap neriorsuutaanut attuumas­suteqarpoq. (Mos 1. 3:15) ‘Kinguaassaq’ neriorsuutigineqartoq Aaperaamit kinguaarineqarumaarpoq. Paulusip nassuiarpaa ‘kinguaassaq’ taanna pingaarnertut tassaasoq Jiisusi Kristusi. Aammali ‘Kristusip pigisai’ – Jiisusip kunngeqarfimmini naalakkersueqatissai 144.000-t – Aaperaap kinguaavanut ilaapput. (Gal 3:16, 29; Saqq 14:1-3) Jiisusimut upperlutillu naalattut Guutip Aaperaamut neriorsuutaa pissutigalugu ajunngisaangaarfigineqarumaarput.

Sooq Paulusip Haakari Saaralu assersuutitut eqqartorpai? Oqaasiinit paasivarput taamani juutit Moorsisip inatsisai maleruar­tuaraluarunikkit Haakari assigalugu inussiaataagin­nassagaluartut. Kisianni Aaperaap ‘kinguaava’ pingaarneq, Jiisusi Kristusi, upperigunikku Saara inussiaan­ngitsoq assigissavaat. Aap, ajortimit toqumillu aniguisin­neqarsin­naapput. (Joh 8:32-34) Moorsisip inatsisai Kristusip kinaanerata paasinissaanut iluaqutigineqar­tussaammata Jiisusi upperin­ngikkunikku inatsisit taakku siunertaat paasisimanavian­ngilaat.

Galaatiamiut Paulusip allaffigisaasa ilarpassui juutiun­nginnamik Moorsisip inatsisaanik maleruaasiman­ngisaannarput. Ilagiinnili juutiusut ilaasa piumasaraat kristumiut juutiun­ngitsut Moorsisip inatsisai, aamma kipineqar­nissamik inatsit, maleruassagaat. Paulusilli erseqqissarpaa Kristusip kristumiut ‘inussiaajun­naarsereermagit’ Moorsisip inatsisaanut ‘inussiaalernissaq’ sianiitsulior­nerussagaluartoq. – Gal 5:1, 10-14.