Qilammi nunarsuarmilu Qutsinnerpaaq tatigiuk

1. Juubi alianartunik sunik nalaataqarpa?

JUUBI angut itsaq inuusimasoq alianangaartunik nalaataqariataarpoq: Meerai toqupput, kiffai amerlanerit toqupput, nersutaatai tillinneqan­ngikkunik toqunneqarput, namminerlu perulun­nartumik nappaateqalerpoq. Tamakkualu saniatigut allanit ataqqisaajun­naarpoq. Aamma ikinngutaaneraasut pingasut nikallor­nangaartumik oqaaseqarfigaat. Allaat nuliata aliasungaarami oqarfigaa: “Guuti perloqquinnaruk toqullutillu!” (Job 2:9; 15:4, 5; 19:1-3) Juubip misilin­neqaatini naalliunnartut taakku pissutigalugit Guuti tatigiun­naarsimasin­naagaluarpaa, aamma Guutip kiffani asallugillu illersornerai qularilersimasin­naagaluarpaa.

2-3. Naalliuuteqaraangatta qanoq eqqarsar­toorsin­naasarpugut, aamma Jobimik allakkat qanoq ilinniarfigisin­naavagut?

² Uaguttaaq artornartunik nalaataqaraangatta Jehovamik tatigin­ninnerput misilin­neqangaarsinnaavoq. ‘Pissutsit anigoruminaal­lutillu erloqinartut’ misigisarpagut. (Tim 2. 3:1) Ataatsikkut arlalinnik ajornar­torsiuteqarutta misigisin­naavugut anigorsin­naanagit. Immaqa ilaasa qularilissavaat Jehovamit isumassor­neqarnerlutik.

³ Illit taamatut misigiguit nikalloqinak. Juubip paasivaa Jehovap ilumoorfigin­nitsini ikiortarai. Uaguttaaq Jehova Ataatarput qilammiusoq tatigil­luinnarsin­naavarput. Tatiginninneq taamaattoq ineriar­tortikkumallugu Jobimik allakkat misissoriartigit. Misissuinitsinni ilumoortut tunngaviusut uku marluk erseqqis­sarneqassapput: Siullertut, Jehova tassaavoq qilammi nunarsuarmilu Kisimi Oqartus­saallunilu Naalagaasoq. Aappaattut, piumasani naammas­sineqar­niassammat kiffanilu anersaakkut timikkullu ataavartumik ajoquser­neqanngin­niassammata pisussat aqussinnaavai.

JEHOVAP SAAVANUT SAATANI SASSARPOQ

4. Jobimik allakkat naapertorlugit Jehova inngilillu qilammi naapimmata qanoq pisoqarpa?

⁴ Biibilimi ima oqaluttuarineqarpoq: “Ullut ilaanni Guutip erneri takkupput Naalakkamullu sassarlutik; Saatani aamma taakkununnga ilaavoq.” (Job 1:6) Uani Jehovamut akerlilersuisuunerpaaq ‘Saatanimik’ taaneqaq­qaarpoq. Guutip ernerinut aalajaatsunut ilaanngik­kaluarluni najuuppoq. Jehovamut, inngilinut inunnullu upperluartunut tamanut akeraavoq. Mosesimik allakkat siulliit 3:15-imi allassimasut Jehovap allatsik­kamigit ersersippaa ilaqutariis­sortaminut qilammiusunut – ‘arnamut’ assersuutaasumut – Saatani ilaajun­naarsimasoq.

5. Saatanip Jehovallu oqaloqatigiinnerat qanoq ilikkagaqarfigisin­naavarput?

⁵ Jehovap kissaatigaa qilammi katersuunnermi tamatumani oqaatigineqartut paasissagigut, taamaat­tumillu Biibilimi allatsin­neqarnissaat isumagaa. Saatanip sallutuujunera ajortuuneralu oqaasiinit erserpoq. (Job 1:9; aamma takuuk Saqqummersitat 12:10). Qilammi katersuunnermit aamma erserpoq Jehova killeqan­ngitsumik pissaaneqartoq, naapertuil­luartuusoq asannit­tuusorlu. Aamma allat iliuusiinik killiliisarpoq.

JEHOVA KILLILIISARPOQ

6. Jehovap qanoq ersersippaa qilammi katersuunnermi kisimi aqutsisuulluni? (Jobi 1:7, 8)

⁶ Jobi 1:7, 8 atuakkit. Jehovap ersersippaa katersuunnermi tamatumani kina aqutsisuusoq. Saatani ima oqarfigaa: “Kiffara Jobi arajutsisimagunanngilat.” Jehovap nalunngilaa Saatanip Juubi saassuk­kusukkaa. Sammeriartigu Jehovap Juubi ikiorniarlugu pissaanini qanoq atoraa.

7. Jobi 1:10, 11 naapertorlugit Saatani Jehovamut kiffartortut pillugit qanoq oqarpa?

⁷ Jobi 1:10, 11 atuakkit. Jehova qilammi nunarsuarmilu Naalagaavoq Qutsinnerpaaq. Killeqan­ngitsumik pissaanini pitsaanerpaamik qanoq atussallugu naluneq ajorpaa. (Jer 32:17; Dan 4:32) Taamaattorli Saatani oqamisaarpoq Jehovap pissaanini kukkusumik atoraa. Saatani oqarpoq Jehova nammineq guutisiorfigineqarusukkami inunnut, soorlu Juubimut, ajunngisaangaartuusoq. Oqamisaarportaaq inuit namminis­sarsior­tuugamik iluanaar­niutigiin­narlugu Guutimut kiffartorusuttut. Jehova sua?

8-9. Jehovap Saatani qanoq killilerpaa, aamma sooq? (Jobi 1:12) (Aamma asseq takuuk).

⁸ Jobi 1:12 atuakkit. Jehovap akueraa Saatanip Juubi misilis­sinnaagaa, aammali ima naalakkerpaa: “Taannali [Juubi] nammineq pinerlis­sanngilat.” Inngilit tamarmik takkuanni Jehovap taamatut Saatani killilerpaa. Saatanilu naalattariaqarpoq. Killissani qaangerlugit Juubi misilis­sinnaanngilaa. Ullumik­kuttaaq taamaappoq. Jehovap pissaanini atorlugu Juubi illersorpaa. Aamma tamanut ersersippaa Guutiulluni naapertuil­luartoq asannittorlu.

⁹ Saatanip siulliulluni saassussinera iluatsin­ngilluinnarpoq. Juubip Ataatani qilammiusoq ilumoorfigaa. (Job 1:22) Saatanilli Juubi misileq­qikkusuppaa.

10. Sooq Juubip misilin­neqaqqinnera Jehovap akueraa? (Jobi 2:2-6)

¹⁰ Jobi 2:2-6 atuakkit. Saatanip Juubi sakkortunerusumik misilik­kusuppaa. Takutik­kusuppaa Juubip inuunini annaassasoriguniuk Jehova uumigilissagaa kiffartorfigiun­naassallugulu. Juubip misileq­qinneqarnissaa Jehovap akueraa uppernarsar­niarlugu Saatani kukkusuusoq. Jehovalli Saatani killileqqippaa ima peqqullugu: “Inuunerali asattuutissavat!” Saatanip Juubi toqussin­naanngilaa Jehovammi tamanna akuerin­ngimmagu. Saatanip Juubimik misiliinermini killiler­neqarnini allanngor­tissinnaan­ngimmagu Jehovap erserseqqippaa Qutsinnerpaajulluni.

JEHOVAP JUUBI ANIGUISIPPAA

11. Jehovap Juubi naalliuutaanit aniguisikkamiuk qanoq akissarsisippaa? (Jobi 42:10-13)

¹¹ Jobi 42:10-13 atuakkit. Juubip Jehovamut ilumoorfigin­nittuarnera uppernarsineqarmat misilin­neqarneri Jehovap unitsippai. Juubi naalliuutaanit aniguisippaa. Saatani akuliun­nissaminut pissaaneqanngilaq. Jehovap erligisani Juubi illersor­niarlugulu akissarsisin­niarlugu aalajangernera Saatanip allanngor­tissinnaanngilaa.

12. Jehovap imminik tatigin­nittunik aniguisitsisin­naaneranik assersuuteqarit.

¹² Ulluni kingullerni makkunani Jehovap kiffani ikiorniarlugit pissaanini arlaleriarluni atorsimavaa. Assersuutigalugu 1945-mi Jehovap Nalunaajaasui 230-t nazistit tigusanut inissiarsuanniit pinngitsaaliissummik angalatin­neqarput, sissamullu apuukkunik toqunneqar­tussaapput. Tamarmilli aniguipput! Misigisatik pissutigalugit aalajangersagaq una allappaat: “Sivisuumik peqqarniitsumillu misilin­neqarfiusoq anigorparput, aniguisullu, aatsitsivimmiit annaanneqar­tutullusooq ittut, qilussun­ninngil­lalluunniit. … Jehovamilli nakussatsin­neqangaarput nukissaqar­tinneqangaarlutillu.” Imalu nangipput: “Løvip inaanit aniguereerluta ataasiinnarmik kissaateqarpugut: Jehova naassaan­ngitsumik kiffartorfigerusupparput. Taamaaliorsin­naatitaagutta inuunitsinni akissarsias­saasimassaaq annerpaaq.” – Danieli 3:27; 6:23.

13. Misilin­neqangaarninni suna qularin­ngissin­naaviuk? (Aamma assit takukkit).

¹³ Misilin­neqangaarnermi naalliukkutta løvip inaaniittutut misigisin­naavugut. (Pet 1. 5:8-10) Nikallungasin­naavugut aniguif­fissaqan­ngitsutullu misigaluta. Taama misigigaangatta Juubip misigisaata eqqarsaatiginissaa iluaqutaassaaq. Jehovap naalliuutinit aniguisitsinissamut pissaaneqangaarnera eqqaamajuk. Upperil­luinnarsin­naavarput maanna paratiisimiluunniit aniguisik­kumaaraatigut. Qaqugu naggatissaq nalliutis­sanersoq aalajangereersimavaa, piffissarlu eqqoqqis­saarlugu nalliuk­kumaarpoq!

JEHOVAP ILUMOORFIGIN­NITSINI ASAVAI

14-15. Jehovap kiffani ilumoorfigin­nitsini qanoq isumaqarfigai? (Jobi 14:15) (Aamma asseq takuuk).

¹⁴ Jobi 14:15 atuaruk. Ataatatta qilammiusup ilumoorfigin­nitsini ilumoorfigai. Kiffani asangaaramigit toqugaluarpataluunniit makitik­kumaarpai. Makititaaf­fissami inuit naallius­simanerat nuannaangaarnermit taarser­neqarumaarpoq. – Es 65:17.

¹⁵ Juubi misilin­neqarun­naaraluarluni suli Saatanip silarsuaani inuuvoq. Biibilimili allassimavoq Juubi peqqissisoq Jehovamillu suli annerusumik ajunngisaarfigineqartoq. Ajunngisaarfigineqarnerit taakku Jehovap Juubimut siunissami ajunngitsuliorumaar­neranut qilanaar­tuutaapput. Jehovap takutippaa kiffani ilumoorfiginnittut pilluar­nissaat inuunerminnillu nuannaarutigin­ninnissaat kissaatigigini. Aamma Jehovap ilumoorfigin­nitsini nunami paratiisimi naammal­luinnartumik inuunis­saannik periarfis­sikkusuppai. (Saqq 21:3, 4) Qilammi nunarsuarmilu Qutsinnerpaatut pissaaneqarpoq, taamaalior­nissanilu kissaatigaa. Taamatut ajunngisaarfigerusuk­kaatigut nalunagu tuppallersaatigingaarsin­naavarput misilin­neqaraluarluta!

16. Jehovap qilammi nunarsuarmilu Qutsinnerpaatut tatiginissaanut sunik allanik pissutis­saqarpugut?

¹⁶ Juubi sivisuumik inooreerluni toquvoq. Jehovap qilammi nunarsuarmilu Qutsinnerpaap Juubi inuulerseq­qissinnaavaa. (Mos 5. 32:39) Taamaattumik asasani piffissani nalliuppat toqusunit makitissavai, taamaalior­nissaanullu kialuunniit unitsis­sinnaanngilaa. – Rom 8:38, 39.

JEHOVA TAMATIGUT TATIGIL­LUINNARUK

17. Qanoq nalunngilarput Jehovap kiffai Saatanip suujunnaarsis­sinnaan­ngikkai?

¹⁷ Juubip misigisaanit ilikkarparput Jehovamik tatigin­nilluin­narnissatsinnut pissutis­sarpassuaqartugut. Guutip kiffaanik Saatanip suujunnaarsitsiniaanera Jehovap akuerin­ngimmagu qujamasuutigeqaarput! Nalunngilarput Jehova tassaasoq qilammi nunarsuarmilu Qutsinnerpaajusoq, nalitsinnimi kiffai 9 millioningajaat aalajaallutik taassumunnga kiffartorput. Arlaleriarluta takusimavarput sakkut suulluunniit Jehovap kiffaanut silugus­simasut atorsin­naassuseqan­ngitsut. (Es 54:17) Oqartus­saassusillit pissaanillit aamma upperisarsiornikkut peqatigiiffiit Jehovap kiffaanik imminnut illersorsin­naarpasin­ngitsunik suujunnaarsitsisin­naasiman­ngillat. Jehovalu pillugu ilumoortut pillugit oqaluus­sinerput Saatanillu sallutuujuneranik toqutsisuuneranillu qulaajaanerput kialuunniit unitsis­sinnaanngilaa. Allaat toqup unitsis­sinnaan­ngilaatigut, Jehovammi kinaluunniit aalajaalluni toqusoq makiteq­qikkumaarpaa. – Hos 13:14.

18. Sooq siunissami pisussat annilaangatigisariaqan­ngilagut?

¹⁸ Juubimik oqaluttuami atuakkagut eqqarsaatigeq­qissaarutsigit siunissami qanoq pisoqas­sagaluarpal­luunniit Jehovamut upperluar­nerulissaagut. Annikil­liornar­tussarsuarmi Guutip kiffai saassun­neqariaan­naarpasis­sammata Saatanip taassumalu inngilipiluisa saassutissavaat. Juubilli nalaanisulli Jehovap pissaanini atussavaa Saatanillu ataavartumik ajoqusiinissaa akueriun­nanngilaa. Ungasin­ngitsukkut naalliuutit Saatanip pilersitai Jehovap atuukkun­naarsissavai. Diaavulu anersaapiluilu ukiuni 1.000-ni itinersuarmut parnaarutissavai. (Luk 8:31; Saqq 20:1-3) Naggataatigut Saatani taassumunngalu ililius­simasut suujunnaarsin­neqassapput. (Saqq 20:10) Jehovap oqarneratut Saatanip niaqua sequmin­neqarumaarpoq. Suujunnaarsin­neqarluin­nassaaq. – Mos 1. 3:15; Rom 16:20.

19. Jehovamik tatigin­nilluinnartut suna qilanaarisin­naavaat? (Aamma asseq takuuk).

¹⁹ Nunarsuup paratiisin­ngornissaa qilanaareqaarput, naammal­luinnar­tuullutami piviusumillu pilluarluta inuussagatta. Takorloorsin­naasatsinniit nuanner­nerungaartumik inuuneqalissaagut. Jehova ima neriorsuivoq: “Takuat! Suut tamaasa nutaanngor­tippakka.” (Saqq 21:5) Tamanna qanoq isumaqarpa? Naatsiiviup Edenip nalaaniilli aatsaavissuaq Saatani anersaapiluilu inunnik ajortumik sunniisarun­naassapput. Kiisami aniguisitaal­luinnarneq misigis­savarput! Ernumaneq pissutigalugu sinissaarus­sinnaasarneq qaangiutissaaq. Harmagedonnimi aniguisut tupinnar­tuliarpassuit takussavaat. Napparsimasut peqqississapput. Kiisalu asasagut toqukkut annaasimasagut makitin­neqassapput. Ataatatta qilammiusup siunertaatut inuuneqalissaagut!

20. Sunissat aalajangiusimaviuk?

²⁰ Ullussani kingullerni inuutilluta misilin­neqarnerit nalaattas­sagunarpagut, aalajaak­kumallutalu sapiitsuusariaqarpugut. Taamaattumik Jehovap tatigiuarnissaa Kisimilu Oqartus­saasutut naalattuarnissaa kissaatigaarput. Ataatatsinnut qilammiusumut asanninnerput ersersit­tuarisigu uppernarsarlugulu Saatani sallutuujusoq. Qutsinnerpaamut, Jehovamut, aalajaat­tuarutta pilluar­nartumik siunissaqassaagut, Jehovammi kiffani ilumoorfiginnittut ajunngisaarfigerusuppai – taamaaliorumaarporlu!