Ilinniar­titsineq qanoq pikkorif­figinerusinnaagit

1. Suna pikkorif­figerusupparput, aamma sooq? (Timuutiusimut 2. 4:2) (Aamma asseq takuuk).

JIISUSIP malinnitsini ima oqarfigai: ‘Inuit uannik malinnit­tunngoq­qullugit ilissinnullu peqqussutinnik tamanik maleruaaq­qullugit ilinniar­tissigit.’ (Mat 28:19, 20) Tamatumannga paasivarput kristumiut tamarmik ilinniar­titsisuussasut. Jehovap ‘eqqortumik pissutiginiagaqartut’ imminut qanillisittarpai, inngilillu taakkununnga siulersor­tarpaatigut. (ApS 13:48; Joh 6:44; Saqq 14:6) Uagulli aamma iliuuseqar­tariaqarpugut. Apustilit Paulusi Barnabalu assersuutigisin­naavagut. Biibilimi allassimavoq Ikonionnimi synagogimi ‘ilisimas­suseqarlutik oqalugiarmata juutit grækerillu amerlasoorpassuit uppertun­ngortut’. (ApS 14:1) Ersarippoq Paulusip Barnaballu ilinniar­titsilluar­tuunissartik sulissutigisimagaat. (Timuutiusimut 2. 4:2 atuaruk). Tamatta aamma taamaaliorusuppugut.

2. Sooq ilaat misigippat ilinniar­titsineq pikkorif­figilersin­naanagu?

² Ilaat misigipput ilinniar­titsineq pikkorif­figilersin­naanagu ilinniagaqarsimanertik killeqarmat nassuiaal­luarsin­naanngitsutullu misigigamik. Taamatut misigisut kisimiin­ngillat, Biibilimimi eqqaaneqartut ilaat aamma suliassiis­sutigineqartumut piukkun­nanngitsutut misigipput. (Mos 2. 4:10; Jer 1:6) Aamma imaassinnaavoq ilaat allatulli oqaluus­sinermi angusaqar­tiginnginnamik misigisut ilinniar­titsillaq­qinnatik. Soorunami nalunngilarput oqaluus­sigaangatta naapitatta ilaannaat tusarnaarusuttartut. Aamma ilinniar­titsillaq­qinnerput pissutigiin­narlugu inuit tusarnaarusulerneq ajorput, eqqaaneqareersutummi Jehovap inngilillu tusarnaarusuttunut siulersor­tarpaatigut. Taamaak­kaluartoq sapinngisatsinnik soqutigin­nilersitsisumik oqaluus­seriaaseqarusuppugut. Allaaserisami matumani ilinniar­titsillaq­qinnerulerumalluta iliuuserisin­naasagut pingasut sammissavagut.

INUNNIK SOQUTIGIN­NITTUUGIT

3. Sooq Jiisusip tusarnaartimi uummataat killissin­naasarpai?

³ Biibilimi allassimavoq Jiisusip oqaluussani ‘qanoq ittuusut nalunngereeraa’. (Joh 2:25) Tassa inuit qanoq eqqarsarnersut misigis­susiinullu pissutaasut nalusanngilai. Tusarnaartini qanoq pisariaqar­titaqarnersut nalunnginnamiuk uummataat killissin­naasarpai. Takusin­naasarpaami anersaakkut kaattut aammalu upperisarsiornikkut siuttut maleruaqqusaat sukannersut pissutigalugit artorsartartut. (Mat 9:36; 23:4) Jiisusip inuit inuunerminni iluaqutigisin­naasaannik ilinniar­tillugit ikiortarpai, soorlu qaqqami oqalugiar­nermini taamaaliortoq. Inuit pingaar­titaminnik ilinniar­titsisarmat tusarnaarusut­tarpaat.

4. Inuit soqutigalugit qanoq ersersis­sinnaavarput? (Aamma assit takukkit).

⁴ Inuit qanoq isumakuluuteqarsin­naanersut eqqarsaatigineratigut soqutigalugit ersersis­sinnaavarput. Oqaluus­siffigisatta tamarmik pissutsit ajortut nalitsinni atuuttut arlaatigut sunnerneqaatigaat. Tamanna eqqaamasarutsigu inuit oqaluus­siffigisatta misigin­neqatiginis­saannut iluaqutigis­savarput. Assersuutigalugu illoqarfigisanni nunagisan­niluunniit inuit isumakuluutigisin­naasaannik qanittukkut pisoqarsimava? Angajoq­qaajusut meeqqamik ajortumik pineqar­nissaat ernumas­sutigisarpaat? Naammattumik aningaasarsiornissaq ajornar­torsiutaava? Takorloor­niarsariuk ‘pissutsit anigoruminaal­lutillu erloqinartut’ nalaanni Biibilimeersumik neriuuteqarnani inuuneq qanoq innersoq. – Tim 2. 3:1; Es 65:13, 14.

5. Jiisusi ilinniar­titsisutut farisiiarinit qanoq allaanerua? (Matiusi 11:28-30)

⁵ Jiisusip inuit asavai tamannalu allanik pinnittar­neranit erserpoq. Farisiiarinit inunnik nikassaasartunit allaanerul­luinnarpoq! (Mat 23:13; Joh 7:49) Jiisusilli inuit inussiar­nersumik ataqqin­nittumillu pisarpai. ‘Saamallunilu maniguut­tuugami’ sunniuteqarluartumik ilinniar­titsisinnaavoq. (Matiusi 11:28-30 atuaruk). Uaguttaaq tusarnaartigut ataqqin­nittumik inussiar­nersumillu pisassavagut.

6. Tusarlius­satsinnik itigartitsisut qanoq inussiar­nersumik ataqqin­nittumillu pisarsin­naavagut?

⁶ Inuit ilaat tusarlius­satsinnik itigartitsisarput allaallu akerlilersuisin­naallutik. Qanoq qisuariar­tassaagut? Iliuuseqan­ngiinnassaagut? Naamik. Jiisusip ima ilinniar­tippaatigut: “Uumissortisi ajunngitsuliorfigiuarsigit, ilissinnik perloqqusisut ajunngitsumik eqqartor­tuarsigit ajuallatsitsisisilu qinnuttuarlugit.” (Luk 6:27, 28) Inuit akerlilersuisut inussiar­nisaarfiginissaat ajornan­nginnerutis­savarput eqqaamagutsigu arlaannik peqquteqarlutik tusarnaarusun­ngitsut. Inuit ilaasa uummigigamisigut oqaluus­sinerput unitsin­niarsarissavaat. Imaassin­naavorli ilaat ilaquttaminni ajornar­torsiuteqaramik allamil­luunniit isumakuluuteqaramik tusarnaarusun­ngitsut. Imaassinnaavoq nuanniil­liuuteqar­neranni kasuttortugut. Qanorluunniit ikkaluarpat kajumissaarut una malissavarput: “Kinaluunniit qanoq akissallugu nalunngin­niassagassiuk tamatigut inussiar­nersumik, taratsikkamik, oqaluttassaasi.” (Kol 4:6, q.a.i.) Inuit soqutigigutsigit sumillu ajornar­torsiuteqarsin­naanersut eqqarsaatigisarutsigu ajuallannata iluaqutigisin­naasaannik ilinniar­tikkusus­savagut.

BIIBILI TUNNGAVIGISARUK

7. Jiisusip qanoq ersersippaa Guutip oqaasia pingaar­tillugu? (Johannesi 7:14-16)

⁷ Jiisusip ilinniar­titsinermini nammineq isummani tunngaviginagit Guutip oqaasia tunngavigisarpaa. Allakkallu Illernartut nassuiarluar­tarmagit tusarnaartut ilinniar­titsissutigineqartut eqqaamajuminar­tillugillu ingerlaannaq maleruarsin­naavaat. Biibilimi allassimavoq ‘allakkanik ilisimasut assiginagit Guutimit piginnaaniligaasutut ilinniar­titsisoq’. Inuillu “ilinniar­titseriaasia tupigusuutigaat”. (Mak 1:22; aamma quppernerup ataani ilanngussaq takuuk). Taamani allakkanik ilisimasut ilinniar­titsinerminni rabbinerit nuimasut issuartarpaat. Jiisusilli Allakkat Illernartut issuakulasarpai. Qilammiis­simagami ilisimas­suseqangaarnini atorlugu tusarnaartini sianiitsutut misigitis­sinnaagaluarpai. Taamaaliun­ngilarli. Guutip piumasaa oqaasiilu ilinniar­titsinermini pingaar­nerpaatippai. (Johannesi 7:14-16 atuakkit). Jiisusip ersersil­luarpaa qanoq ilinniar­titsisas­sasugut.

8. Apustilip Petrusip Jiisusi qanoq ilaarpaa?

⁸ Jiisusip ilinniartitai Guutip oqaasia tunngavigalugu ilinniar­titsisarput. Assersuutigalugu ukiumi 33-mi ullormi piinsimi Petrusip oqalugiaataa eqqarsaatigiuk. Petrusi qaffasissumik ilinniarsimanngilaq. Taamaak­kaluartorli Allakkani Illernartuni siulittuutit Jiisusimut eqquussimanerat nassuiarmagu tusarnaartai killitsipput. (ApS 2:14-37) Qanoq kinguneqarpa? “Oqaasiinik nuannaarlutik upperinnittut imermut morsutsin­neqarput, ullormilu tassani inuit 3.000-t missaan­niittut ilanngutitin­neqarput.” – ApS 2:41.

9. Ilinniar­titsigaangatta sooq Guutip oqaasia tunngavigisas­savarput?

⁹ Inuit uummataat killissagutsigit atorsin­naasarput pitsaanerpaaq tassaavoq Guutip oqaasia. (Hebr 4:12) Taamaattumik ilinniar­titsigaangatta Biibili pingaar­tittassavarput. Nammineq isumarput tunngaviginagu Guutip oqaasia tunngavigerusupparput. (Tim 2. 4:2) Ussatit 2:6-imi Jehova pillugu ima allassimavoq: “Ilisimas­suseqalersitsisarpoq, ilisimasaqarneq sianissuseqarnerlu qarnanit pilersarput.” Taamaattumik Biibili atoraangatsigu soorlulusooq Jehova oqalutsit­taripput. (Mal 2:7) Inunnut erseqqis­sarusupparput Biibili inuit siunnersuutaannit pitsaanerungaartunik siunnersuuteqartoq. Biibili Pinngor­titsisitsinnit isumassarsiarititaavoq, ersersippaalu Jehova qanoq nuannaar­tissinnaagipput qanorlu pilluarluta inuusin­naasugut. – Tim 2. 3:16, 17.

10. Qanoq erseqqis­sarsinnaavarput Biibili tunngavigalugu ilinniar­titsisugut?

¹⁰ Biibilimik misissueqateqar­nissamut piareersarninni eqqarsaatigiuk qanoq erseqqis­sarsinnaanerlugu Biibili tunngavigalugu ilinniar­titsisutit. Ilinniar­titsinitsinni assit videullu atortaraluarigut ilinniar­titavit paasissavaa pingaarnertut Biibili ilinniar­titsissutigigipput. Taamaattumik allassimaffiit pingaarnerit atuartarsigit, erseqqis­sartarullu qanoq iluaqutigisin­naagigut. Assit videullu atoraangakkit Biibilimi najoqqutassiaq tassani ilinniar­titsissutigineqartoq ilinniar­titavit paasisimaneraa qulakkeertaruk. Oqaaserpas­suaqartariaqan­ngilatit allassimaf­fippassuillu atuartariaqarnagit. Allassimaffiilli atuartillugit ilinniartitat paasinnin­nissaanut piffissaqar­tittaruk. Imaassinnaavoq ilaannikkut allassimaffik atuaqqam­misarsi atuaqqit­tariaqarissi. Siunnersuutit taakku maleruar­tarukkit atuakkamik, assimik videumil­luunniit misissuineruin­narnani Biibilimilli misissuinerussaaq. – Kor 1. 2:13.

11-12. (a) Ilinniar­titarput qanoq naammagit­tarfigisin­naavarput? (Apustilit Suliaat 17:1-4) (Aamma asseq takuuk). (b) Ilaasa Biibili pillugu suna naluaat, aamma qanoq ikiorsin­naavagut?

¹¹ Ilinniar­titarput paasiuminaatsitaqaraangat naammagit­tarfigisas­savarput. Ilaat arriinnerusumik anersaakkut siumukartarput. Allat paasiuminar­titatta paasinissaanut piffissaqar­nerusariaqarsin­naapput. Juutit Tessaluunikamiittut Paulusip ilinniar­titsissutigisai ingerlaannaq paasinngilaat. Taamaattumik arlaleriarluni Allakkani Illernartuni allassimasut taakkununnga nassuiarpai. Taava ilaasa paasinngisatik paasilerpaat. – Apustilit Suliaat 17:1-4 atuakkit.

¹² Aamma oqaaseqarpal­laarnata apeqquteqar­tarnikkut akinissaannullu piffissaqar­tittarnerisigut Biibilimik misissueqatigisar­takkagut naammagit­tarfigisin­naavagut. Qanoq eqqarsarnersut paasiumallugu tusarnaaq­qissaartakkit. Taava allassimaffiit Guutip eqqarsar­taasianik ersersitsisut atuarlugillu eqqartorsigit. Aamma una eqqarsaatigiuk: Inuit ilaasa Biibili ilisimanagulu qanoq imaqarnersoq naluaat. Immaqa Biibili naqitigaq takutis­sinnaavarput. Pingaarutillit suut Biibilimi sammineqarnersut erseqqis­sarniarlugu Nunarsuup nutaanngor­nissaanik nutsikkami “Guutip oqaasia qanoq iluaqutigisinnaagit” takutis­sinnaavat. Assersuutigalugu qanoq pillualer­toqarsin­naaneranik Biibilimi siunnersuutit erseqqis­sarniarlugit apeqqut 15-imi allassimaffiit ilaat atuarsin­naavasi. Naatsumik oqaatigalugu, Biibili qanoq iluaqutaatigisoq ilinniar­titannut erseqqis­sarukku sunniuteqarluartumik ilinniar­titsissaatit.

JEHOVAMUT QANILLINISSAANUT IKIORUK

13. Ilinniar­titsigaangatta kina eqqartor­nerussavarput? Assersuusiorit.

¹³ Ilinniar­titatta Jehovamik ilisarisiman­nilernissaat taassumunngalu ikinngutaaler­nissaat ilinniar­titsigaangatta anguniagarisarparput. (Jaak 4:8) Ilinniar­titsinerput isiginnaar­titsisarfimmi qullilerisartup suliarisar­tagaanut assersuun­neqarsinnaavoq. Isiginnaar­titsinerup nalaani qulliit imminut saatsinnagit isiginnaar­titsisartut maluginiagassat qinngorfigisarpai. Ilinniar­titsigaangatta aamma uagut imminut malugeq­qusaarnata Jehova ilisarisimaler­tinniar­tarparput.

14. Ilinniar­titarput Jehovamik asanniler­nissaanut qanoq ikiorsin­naavarput?

¹⁴ Biibilimik misissueqateqaraangavit ilinniartitat Jehovamik nuannaar­titsinissaanik kajumis­suseqalersittaruk. (Uss 27:11) Ilinniar­titarput Nalunaajaasun­ngornissamut piumasaqaatinik eqqortitsinissamik ilinniar­tiinnan­ngilarput, soorlulusooq klubbimut ilaasor­tanngor­tinniarlugu, aammali Jehovamik nuannaar­titserusunnini kajumis­sissutigalugu allannguinissaa anguniagaraarput. Assersuutigalugu ilinniar­titatta ileqqupalaaq qaangeruminaatsippagu ima aperisin­naavarput: ‘Sooq Jehovap ileqqoq taanna uumigaa? Sooq Jehovap nuannarisannik iliuuseqar­tikkusun­ngilaatit? Jehova taama piumasaqarmat qanoq erserpa asagaatit?’ Ilinniartitat Jehovamik pissusiinillu eqqarsaatigin­ninnissamut ikiortarukku paasinerulissavaa Jehovamit qanoq asaneqar­tigaluni. Taavalu Jehova asalissavaa nuannaar­tikkusulis­sallugulu.

ILINNIAR­TITSILLAQQINNEQ SULISSUTIGIUARUK

15. Ilinniar­titsillaq­qinnerulerumallutit susinnaavit?

¹⁵ Ilinniar­titsininni sutigut pikkorin­nerulersin­naanerit paasiumallugu Jehovamut ikioqqugit. (Joh 1. 5:14) Qinoreeruit Jehovap pilluaq­qusinnaasaanik iliuuseqarit. Ataatsimiinnerni ilikkakkatit atorluartakkit. Biibilimik misissueqatigiinnermi oqaluus­sisartumik ilinniar­titsillaq­qissumik ilagisaqartarit. Kingornalu aperisinnaavat sutigut pikkorin­nerulersin­naasutit. Atuaqqis­saarutigisar­takkagut illit ilisimal­luarpatit, eqqaamajulli ilinniar­titavit tamakku nalugai. Taamaattumik takorlooruk ilinniar­titavit sammisassasi qanoq isumaqarfigis­sanerai. Erseqqissaruk tusarliussarput nuannersoq ilinniar­titavit qanoq iluaqutigitigisinnaagaa. Tamanna Jehovamut qanimut ikinnguteqaler­nissaminut kajumis­sissutigissavaa pillualivis­sutigis­sallugulu. – Tuss 1:1-3.

16. Sooq ilinniar­titsineq sulissutigiuas­savarput?

¹⁶ Jehova pillugu ilinniar­titsineq nuannaarutaanerpaat ilagaat. Siunissamilu paratiisimi inuppas­suarnik ilinniar­titsiumaarpugut. Taamaattumik ilinniar­titsinerup pikkorif­figinerunissaa sulissutigiuartigu. Taamaaliorsin­naavugut inoqatigut soqutigisarutsigit, Biibili atorluar­tarutsigu pingaar­nertullu Jehova eqqartor­tarutsigu.