Jobimik allakkat naalliuuteqarninni iluaqutigisin­naavatit

1-2. Jobimik allakkat atuarnis­saannut suut pissutis­saalluarpat?

JOBIMIK ALLAKKAT qanittukkut atuarnikuuigit? Ukiut 3.500-t missaasa matuma siorna allanneqaraluartut inuppassuit isumaqarput atuakkat allalluagaanerpaat ilagigaat. Allakkanik tamakkuninnga allattoq nersualaar­neqartarpoq paasiuminartumik, taalliarpalaartumik pikkunar­tumillu allattariaaseqarmat. Moorsisimit allataagaluarlutik Jehovamit isumassarsiaapput. – Tim 2. 3:16.

² Jobimik allakkat Biibilimi pingaarnerit ilagaat. Sooq? Taakkunani erseqqis­sarneqarpoq inngilit inuillu tamarmik aalajanger­tariaqartut Guutimik asanninnertik aqqanillu illersuerusunnertik kajumis­sissutigalugit Jehova kiffartorfigerusun­nerlugu. Aamma Jehovap pissusii nuanningaartut, soorlu asanninnera, ilisimassusia, naapertuil­luartuunera pissaaneralu, paasivagut. Assersuutigalugu Jobimik allakkani Jehova 31-eriarluni ‘Ajugaqan­ngitsumik’ taaneqarpoq. Biibilip sinnerani tamarmi oqaaseq taanna ikinnerusunik atorneqarpoq. Aamma inuunermut tunngatillugu apeqqutit pingaarutillit ilaat akineqarput, soorlu: Sooq Guutip naalliuutit akuerai?

3. Jobimik allakkat misissorutsigit suut paasisin­naavagut?

³ Qaqqap qaavaniik­kaangatta ungasissumut isigisaqarsin­naasarpugut. Tamatumunnga assingusumik Jobimik allakkat misissorutsigit Jehovap naalliuutigut pillugit isiginnittaasia qutsissoq paasilluarsin­naavarput. Allaaserisami matumani aamma paasissavarput Israalikkut Jobimik allakkat qanoq iluaqutigisimasin­naagaluaraat nalitsinnilu uagut qanoq iluaqutigisin­naagigut. Kiisalu sammissavarput oqaluus­sigaangatta oqaluttuaq tamanna qanoq atortarsin­naagipput.

JUUBIP NAALLIUNNERA GUUTIP AKUERIGALLARPAA

4. Juubi Israalikkunnit Egyptenimiittunit qanoq allaanerua?

⁴ Israalikkut Egyptenimi inussiaataallutik naalliunnerisa nalaanni nunami Usimi anguteqarpoq Juubimik atilimmik. Nuna taanna nunap neriorsuutigisap kangianiillunilu Arabiap avannaaniippoq. Israalikkut Egyptenimi guutipilus­siortalerput, Juubilli Jehova aalajaalluni kiffartorfigaa. (Jos 24:14; Ez 20:8) Juubi pillugu Jehova ima oqarpoq: “Taanna nunarsuarmi tamarmi nalissaqanngilaq.”a (Job 1:8) Juubi pisoorsuuvoq ataqqineqangaarlunilu – allaat Kangiamiunit allanit tamanit nuimaneruvoq. (Job 1:3) Angut taanna inuit ataqqisaat aalajaalluni Guutimut kiffartor­tuummat Saatanip kamaatigingaarsimassavaa!

5. Sooq Juubip naalliuuteqalernera Jehovap akueraa? (Jobi 1:20-22; 2:9, 10)

⁵ Saatani oqarpoq Juubi naalliuuteqaleruni Jehovamut kiffartorun­naassasoq. (Job 1:7-11; 2:2-5) Jehovap Juubi asangaarpaa. Saatanilli unnerluussutai pingaarutilinnik akerleriis­sutaalersitsipput. Taamaattumik Jehovap akueraa Saatanip Juubi pillugu oqaatsiminik uppernarsaaniarnissaa. (Job 1:12-19; 2:6-8) Juubip nersutaatai tamaasa meeraalu qulit Saatanip toqutaatippai Juubilu timaatigut annernartumik nappaateqalersillugu. Juubili misilin­neqangaaraluarluni Jehovamut aalajaat­tuarpoq. (Jobi 1:20-22; 2:9, 10 atuakkit). Jehovap peqqissun­ngorteqqippaa pisoorsun­ngortillugulu. Qulinik allanik meerartaaqqippoq inunnillu allanit ataqqineqangaaleq­qilluni. Jehovallu Juubip inuunera ukiunik 140-nik sivitsorpaa, taamaalilluni ernutaq­qiutimi meerai angumeralugit. (Job 42:10-13, 16) Taamani inuusimasut oqaluttuaq tamanna qanoq iluaqutigisimasin­naagaluarpaat, nalitsinnilu qanoq ilinniarfigisin­naavarput?

6. Juubimik oqaluttuaq Israalikkut qanoq iluaqutigisimasin­naagaluarpaat? (Aamma asseq takuuk).

⁶ Israalikkut qanoq iluaqutigisimasin­naagaluaraat. Israalikkut Egyptenimi naalliuuteqangaarput. Assersuutigalugu Josva Kalebilu ukiorpassuarni inussiaataapput. Taavalu ukiuni 40-ni inoqajuitsumiigin­nartariaqarput Israalikkut allat Jehovamut naalanngimmata. Taamaattumik Israalikkut Juubimik oqaluttuaq ilisimagaluarunikku iluaqutigingaarsimas­sagaluarpaat. Paasisimas­sagaluarpaat Saatani naalliuutinut pisuusoq, Guuti pisuunani. Aamma paasisimas­sagaluarpaat sooq Guutip naalliuutit akuerigai kiffanilu misilin­neqarnerminni aalajaatsut asagai pilluaq­qullugillu.

7-8. Naalliuttut Jobimik allakkat qanoq iluaqutigisin­naavaat? Assersuuteqarit.

⁷ Qanoq iluaqutigisin­naagipput. Ajoraluartumik inuppassuit Guuti upperiun­naartarpaat paasisin­naanngin­namikku sooq inuit ajunngitsut naalliuuteqartartut. Taakkua ilagaat Hazelb Rwandameersoq. Meeraagallarami Guuti upperaa. Inuunerali allanngorpoq. Angajoqqaavi avipput, ataatas­saatalu ajortumik pisarpaa. Inuusut­tuaraalluni pinngitsaalineqarluni atoqatigineqarpoq. Uppeqatiminut tuppallersaatis­sarsioraluarluni tuppallersar­neqanngilaq. Kingusin­nerusukkut Guuti pillugu misigis­sutsini allattorpai ima allalluni: “Guuti, qinnuigigaluarpakkit ajunngitsulior­niarsarigaluarlungalu, illilli ajortumik pivarma. Maannalu alarpakkit, pillualerumal­lungalu sunaluunniit iliuuseriumaarpara.” Inuit Hazel assigalugu Guutip naalliuutinut pisuuneranik upperinnittut aliasuutigaagut ikiorusungaarlugillu!

⁸ Jobimik allakkanit paasivarput Guuti naalliuutinut pisuunngitsoq Saatanili pisuusoq. Aamma paasivarput imaanngitsoq naalliuutillit siaruar­tikkaminnik katersuisut. Biibili naapertorlugu kinaluunniit qaquguk­kulluunniillu ajortumik nalaataqarsinnaavoq. (Job 4:1, 8; Jaak 4:13, 14) Aamma nalunngilarput misilin­neqarnitsinni Jehova ilumoorfigiuarutsigu Saatanip sallutuujuneranik uppernarsaanissaanut periarfis­sittaripput. (Job 2:3; Uss 27:11) Ilisimasagut taakku qujamasuutigeqaagut nalunngin­natsigu sooq naalliuttugut asasagullu naalliuttut. Kingusin­nerusukkut Hazel Jehovap Nalunaajaasuinit Biibilimik misissueqatigineqar­talerami paasivaa naalliuutiminut Guuti pisuunngitsoq. Ima oqarpoq: “Guuti qamannga pisumik qinnuigeq­qippara. Taamani oqarama alarniarlugu ilisarisiman­nginnakku alarsiman­ngilara. Maanna nalunngilara Jehovap asagaanga. Kiisami nalerisimaarlungalu pilluarpunga.” Sooq Guutip naalliuutinik akuerinnittoq ilisimagatsigu qujamasoqaagut! Sammeriartigu Jobimik allakkat misilin­neqarnitsinni qanoq iluaqutigisin­naagigut.

JUUBIMIK OQALUTTUAQ PINERTUSAAR­NISSAMUT QANOQ ILUAQUTIGIGIPPUT

9. Juubi qanoq naalliuppa? (Jaaku 5:11)

⁹ Takorlooruk Juubi arsakuni issialluni ajussanik annernartunik ulikkaartoq. Saluttuuvoq timaalu nappaataanit qernertuin­nanngorsimalluni. Amerlungaarpoq marriukkallu aseqqua amerminut kiliortuutigalugu. Nukeerul­luinnarluni naalliuutini pillugit naammagit­taalliorpoq. Taamaattorli Juubi naalliungaaraluarluni Jehovamut ilumoorfigin­nittuugami pinertusaarpoq. (Jaaku 5:11 atuaruk). Juubip pinertusaar­nissaminut suna iluaqutigaa?

10. Qanoq erserpa Juubi Jehovamut attaveqarluartuusoq? Nassuiaagit.

¹⁰ Juubip misigis­sutsini Jehovamut oqaluttuarai. (Job 10:1, 2; 16:20) Assersuutigalugu kapitali 3-mi allaatigineqarpoq Juubip erloqissutini nikallungas­sutigigai Jehovalu kukkulluni pisuutikkaa. Taava Juubip ikinngutai pingasut oqaqattaarput ajortuliorsimanini pissutigalugu Guutimit pillarneqartoq. Juubip oqaasiisa ilaannit erserpoq ilaannikkut Guutimit naapertuil­luarnerusutut imminut isigisoq. (Job 10:1-3; 32:1, 2; 35:1, 2) Nassuerutigaali aalajaannini uppernarsar­niarsarigamiuk ilaannikkut ‘isumaatsutut oqaluttarluni’. (Job 6:3, 26) Kapitali 31-mi Juubip kissaatigaa eqqunngitsumik unnerluun­neqarnini Guutip nalunaarutigissagaa. (Job 31:35) Soorunami Juubip piumasarisin­naanngilaa sooq naalliuuteqarnini Guutip toqqaan­nartumik nassuiassagaa.

11. Jehovap Juubi qanoq ikiorpaa?

¹¹ Juubip Jehovamut oqaasiinit paasisin­naavarput Juubip Jehova ilumoorfigigaa naapertuil­luartumillu eqqartuun­neqarumaarluni upperigaa. Jehovap kiisami Juubi anorersuarmit akigamiuk nassuiaateq­qissaanngilaa sooq naalliuuteqartoq. Aamma Juubip eqqortuliorsimanerminik oqarnera naammagit­taalliutaalu pissutigalugit assuarinngilaa. Ataatatut asannittutut Jehovap Juubi saamasumik ilitsersorpaa. Taamaalilluni Juubi pitsaanerpaamik ikiorpaa. Tamatuma kingunerisaanik Juubip maniguulluni nassuerutigaa qanoq ilisimasakitsigaluni oqaatsinilu peqqissimis­sutigalugit. (Job 31:6; 40:4, 5; 42:1-6) Oqaluttuaq tamanna inuit taamani inuusimasut qanoq iluaqutigisimasin­naagaluarpaat, nalitsinnilu uagut qanoq iluaqutigisin­naavarput?

12. Israalikkut Juubimik oqaluttuaq qanoq iluaqutigisimasin­naagaluarpaat?

¹² Israalikkut qanoq iluaqutigisimasin­naagaluaraat. Juubimik oqaluttuaq Israalikkunnut ilinniutis­saalluartuuvoq. Moorsisip tamanna qanoq iluaqutigisinnaagaa eqqarsaatigiuk. Israalikkunnut siulersuisutut ajornar­torsiutit pakatsinartut nikallor­nartullu arlallit naammagalugit atortariaqarsimavai. Israalikkut Jehovamik naammagit­taalliorfiginnittut assiginagit Moorsisi ajornar­torsior­nermini Jehovamut ikioqqulluni qinusarpoq. (Mos 2. 16:6-8; Mos 4. 11:10-14; 14:1-4, 11; 17:6, 14, 20) Moorsisi Jehovamit naqqinneqarami aamma pinertusaar­tariaqarpoq. Israalikkut ukiut 40-ssaanni inoqajuitsumiin­nerminni Kadeshimi tammaar­tillugit Moorsisi ‘mianersuaal­liorluni oqaluppoq’ Jehovallu aqqa unnersiutigin­ngitsoorlugu. (Tuss 106:32, 33) Taamaattumik Jehovap Moorsisi nunamut neriorsuutigisamut iseqqusaajun­naartippaa. (Mos 5. 32:50-52) Moorsisip perorsaatis­sinneqarnini aliasuutigigaluarlugu maniguulluni akueraa. Israalikkut Moorsisip nalaata kingorna inuusimasut Juubimik oqaluttuaq iluaqutigisimasin­naagaluarpaat. Eqqarsaatigeq­qissaar­neratigut paasisimasin­naagaluarpaat imminnut naapertuil­luartuutinnatik misigis­sutsitik qanoq Jehovamut oqaluttuarisin­naanerlugit. Aamma paasisimasin­naagaluarpaat Jehovap perorsaatis­siinera qanoq maniguullutik akuerisin­naallugu.

13. Juubimik oqaluttuaq pinertusaar­nissamut qanoq iluaqutigaarput? (Hebræerit 10:36)

¹³ Qanoq iluaqutigisin­naagipput. Kristumiuugatta pinertusaar­tariaqarpugut. (Hebræerit 10:36 atuaruk). Assersuutigalugu imaassinnaavoq timikkut misigis­sutsikkul­luunniit nappaateqartugut, ilaqutariinni ajornar­torsiortugut, asasamik toqusoorsimasugut allamil­luunniit ajornar­torsiuteqartugut. Ilaannikkut allat oqaasii iliuusiiluunniit nikallungas­sutigisarpagut. (Uss 12:18) Kisianni Juubimik oqaluttuamit paasivarput qanorpiaq misiginerluta Jehova oqaluttuus­sinnaallugu tusarnaar­neqarnis­sarpullu upperalugu. (Joh 1. 5:14) Allaat qinunitsinni Juubitut ‘isumaatsutut’ oqartoorutta kamannavianngilaq. Guutilli pinertusaarsin­naaqqulluta nukissamik ilisimas­susermillu tuniumaarpaatigut. (Nal 2. 16:9; Jaak 1:5) Immaqa aamma Juubimik pinninnermisut perorsaatis­sissavaatigut. Juubimik oqaluttuamit paasivarput qanoq pinertusaarsin­naasugut Jehovap oqaasianit, peqatigiis­sortaanit ikinngum­milluunniit anersaakkut inersimal­luartumit naqqinneqarutta siunnersor­neqarut­taluunniit. (Hebr 12:5-7) Soorlu Juubip maniguulluni naqqinneqar­nerminik akuerin­ninnini iluaqutigigaa uaguttaaq pisariaqartumik allannguinissaq kajumilluta akuerigutsigu iluaqutigisin­naavarput. (Kor 2. 13:11) Juubimik oqaluttuaq pingaarutilinnik ilinniutis­sartaqarpoq! Maanna sammeriartigu allanik ikiuinitsinni Juubimik oqaluttuaq qanoq iluaqutigisin­naagipput.

ALLAT IKIORNIARLUGIT JOBIMIK ALLAKKAT ATUKKIT

14. Naalliuutit atuunnerannut pissutaasoq oqaluus­sinermi qanoq nassuiarsin­naavarput?

¹⁴ Oqaluus­sinermi aperineqar­nikuuit sooq naalliuuteqartoq? Aperisoq qanoq akiviuk? Immaqa Biibilimit takutippat naatsiivimmi Edenimi qanoq pisoqartoq. Immaqa nassuiarpat Guutimut pikitsitsinermik kinguneqartumik anersaapiluk Saatani inunnut siullernut sallusoq. (Mos 1. 3:1-6) Aamma Adamip Evallu Guutimut naalannginnerat pissutigalugu inuit naalliuuteqarlutillu toqusarput. (Rom 5:12) Kiisalu nassuiarsimasinnaavat Saatanip oqaasiisa ilumuun­nginnerisa uppernarsar­neqarnis­saannut Guuti naammattumik piffissaqar­titsisoq Guutillu paasitik­kaatigut qanittukkut naalliuutit tamarmik atuukkun­naassasut inuillu naassaan­ngitsumik inuulersinnaasut. (Saqq 21:3, 4) Nassuiaat tamanna iluaqutigalugu inuppassuit paasisimavaat sooq naalliuuteqartoq.

15. Jobimik allakkat atorlugit qanoq nassuiarsin­naavarput naalliuutit atuunnerannut suna pissutaasoq? (Aamma assit takukkit).

¹⁵ Inuit naalliuuteqar­nerannut pissutaasoq aamma allatut nassuiar­neqarsinnaavoq – Jobimik allakkat atorlugit. Aperisoq pingaarutilimmik apeqquteqarmat nersualaaq­qaarsinnaavat. Taava eqqaasinnaavat Juubi, angut upperluartoq naalliuuteqangaarsimasoq, assingusumik apeqquteqartoq. Allaammi isumaqarsimagaluarpoq naalliuutiminut Guuti pisuusoq. (Job 7:17-21) Immaqa oqaloqatigisappit tupigisuutigisimassavaa paasillugu itsarli taamatut aperisoqarsimasoq. Taava periaaserillutit nassuiarsinnaavat Juubip naalliuuteqar­neranut Guuti pisuunani Saatani pisuusoq. Saatani inunnik naalliuuteqar­titsivoq isumaqarami inuit aatsaat Guutimit illersor­neqaraangamik naalakkusuttartut. Taava nassuiarsinnaavat Guutip inuit upperluartut namminis­sarsiun­ngitsullu tatigigai taakkualu Saatanip sallutuujuneranut uppernarsaanis­saannut periarfis­sillugit. Kiisalu nassuiarsinnaavat Juubi naalliuuteqaraluarluni aalajaammat Guutip pilluaqqugaa. Taamaalilluta erseqqis­sarutsigu naalliuutit Jehovameersuun­ngitsut allanilli pissuteqartut inuit tuppallersarsin­naavagut.

16. Angut Jobimik allakkanik iluaqutiginnittoq oqaluttuariuk.

¹⁶ Angut Mariomik atilik Jobimik allakkanik qanoq iluaqutigin­nissimasoq sammeriartigu. 2021-mi oqaluus­sisartumit arnamit telefonikkut nalunaajaaf­figineqarpoq. Oqaluus­sisartup allassimaffik Biibilimeersoq eqqartoriarlugu nassuiarpaa Guuti siunissaqar­titsillunilu neriuutis­saqartitsisoq aamma qinnutinik tusartartuusoq. Mario oqaluus­sisartumit isumasior­neqarami oqarpoq imminut toqunniarami ilaquttaminut allaqqam­merluni. Ima nangippoq: “Guuteqarnera upperaara, kisianni ullaaq manna eqqarsaatigaara qimassimaneraanga.” Oqaluus­sisartup aappassaanik sianerfigigamiuk Juubip naalliuutai eqqartorpai. Mario aalajangerpoq Jobimik allakkat naallugit atuarniarlugit. Taava oqaluus­sisartup jw.org-imi Biibilimut linki nassiuuppaa. Qanoq kinguneqarpa? Mario Biibilimik misissueqatigineqar­talerpoq, Guutilu asannittoq inunnik soqutiginnittoq ilisarisimalerpaa tamannalu nuannaarutigalugu.

17. Sooq qujamasuutigaarput Jehovap Jobimik allakkat oqaatsimini ilanngutitikkai? (Jobi 34:12)

¹⁷ Inuit, allaat naalliuttut, Guutip oqaasia pissaaneqartoq tuppallersaatigisin­naavaat. (Hebr 4:12) Qujamasuutigingaarparput Jehovap Juubimik oqaluttuaq oqaatsimini ilanngutitimmagu. (Job 19:23, 24) Tassani erseqqis­sarneqarpoq ‘Guuti eqqunngitsumik iliorfigin­ninngisaannartoq’. (Jobi 34:12 atuaruk). Aamma nassuiar­neqarpoq sooq Guutip naalliuutit atuukkal­lartikkai qanorlu naammagalugit atorsin­naagigut. Aamma allakkat taakku atorlugit naalliuttut tuppallersarsin­naavagut. Allaaserisami tulliuttumi sammissavarput Jobimik allakkat ilinniarfigalugit qanoq sunniuteqarluartumik siunnersuisin­naasugut.