Allat Jehovamik ilisarisiman­nilernis­saannut ikiukkit

1. Biibilimik ilinniartoq anersaakkut siumukartoq takullugu qanoq misigisarpit?

BIIBILIMIK ilinniartup ataatsimiigiar­talernera, akisalernera, oqaluus­sisalernera Jehovamullu tunniul­luinnarlunilu imermut morsutsitaanera takullugu qanoq misigisarpit? Qularnan­ngitsumik nuannaar­taqaatit. Soorunami nalunngilarput Jehovap taamaalior­nissaanut ikioraa, tamannalu pillugu Jehova qutsavigisarparput. – Kor 1. 3:5-9; Joh 3. 3, 4.

2. Jehova Biibilimik ilinniartut pillugit qanoq kissaateqarpa? (Timuutiusimut 1. 2:3, 4)

² Guutip piumasaraa “inuit tamalaat annaanneqarlutillu ilumoortoq pillugu eqqoqqis­saartumik paasisimasaqalissasut”. (Timuutiusimut 1. 2:3, 4 atuakkit). Tassa Jehovap kissaatigaa inuit ilisarisimalis­sagaanni siunertanilu ilisimalissagaat. (Jer 9:23) Taamaalius­sagaanni eqqoqqis­saartumik paasisimasaqarnissaq pisariaqarpoq. Oqaaseq “eqqoqqis­saartumik paasisimasaqarneq”-mik nutserneqartoq paasissutissanik ilisimasaqarnermut tunngaan­nanngilaq. Biibilimik ilisimatooq naapertorlugu oqaaseq taanna paasissutissanut iliuuseqarusulersitsisunut tunngavoq.a Tassa Biibilimik ilinniartup Jehova ilisarisimaleraangamiuk ilikkakkani inuunerminik allannguis­sutigil­luinnartarpai. Tamannalu ‘naassaan­ngitsumik inuuneqalis­sutigisinnaavaa’. – Joh 17:3.

3. Allaaserisami matumani suut sammissavagut?

³ Jehovap nuannersumik suliassip­paatigut, tassa allat taassuminnga ilisarisiman­nilernis­saannut ikiussavagut. Allaaserisami matumani apeqqutit uku sammissavagut: Sooq Biibilimik ilinniar­titatta Jehovamik ilisarisiman­nillualer­nissaat pingaaruteqarpa? Jehovamik ilisarisiman­nilernis­saannut qanoq ikiorsin­naavagut? Aamma Jehova pillugu ilikkak­kaminnik inuunerminni atuinis­saannut qanoq ikiorsin­naavagut?

JEHOVAMIK ILISARISIMAN­NILLUARNISSAA SOOQ PINGAARUTEQARTOQ

4. Biibilimik misissueqateqaraangatta suna anguniagarisarparput? (Makkorsi 12:30)

⁴ Jiisusi oqarpoq inassut pingaar­nerpaaq tassaasoq Jehova uummaterput, tarnerput, isumarput nukigullu tamakkerlugit asassagipput. (Makkorsi 12:30 atuaruk). Biibilimik ilinniar­titatta Jehova asalissaguniuk ilisarisimal­luartariaqarpaa. Ilinniar­titatta uagutsin­nuunngitsoq, ilinniar­titsissutigisatsin­nuunngitsoq, peqatigiis­sortatsin­nuungitsoq Jehovamulli tunniul­luinnarnissaa kissaatigaarput. Taamaattumik Biibilimik misissueqateqaraangatta ilinniar­titatta Jehovamik ilisarisiman­nilernissaa asanniler­nissaalu pingaarnertut siunertarisarparput.

5. Biibilimik ilinniar­titatta Jehovamik asanninnini sunissamut kajumis­sissutigissavaa?

⁵ Asanninneq iliuuseqar­nissamut kajumis­sissutaangaartarpoq. Biibilimik ilinniar­titatta Jehova ilisarisimaleruniuk asaleruniullu naalannissaanut kajumis­sissutigissavaa. Jiisusi oqarpoq: “[Inuit] Ataataq asagiga paasinias­sammassuk Ataatamit inanneqarnittut iliorpunga.” (Joh 14:31) Taamatuttaaq Biibilimik ilinniartup Jehova asaguniuk naalakkusus­sallugulu ilumoorfigerusussavaa. – Joh 1. 5:3.

6. Biibilimik ilinniartoq Jehovamik ilisarisiman­nilluassaguni susariaqarpa, tamannalu qanoq iluaqutigissavaa?

⁶ Biibilimik ilinniartoq Jehovamik ilisarisiman­nilluaruni aalajangiil­luarnerusalissaaq. Kisianni atuakkersuin­narluni ilisimasaqarneq naammanngilaq. Una assersuutigisin­naavarput: Timmisartumik aqutsisun­ngorniaraanni atuakkersuin­narluni ilisimasaqarneq, timmisar­tornermut najoqqutassianik paasinninneq misilitsin­nermillu angusineq naamman­ngillat. Aamma piffissangaatsiaq atorlugu timmisartumik aqutsineq misilit­tagaqarfigil­luartariaqarpaa. Tassami piffissap ingerlanerani ilikkassavaa silap pissusiini assigiin­ngitsuni timmisartoq qanoq aqunneqar­tariaqarnersoq. Aamma ilikkassavaa aalajangiinini timmisartup ingerlaneranut qanoq sunniuteqar­tarnersut. Taamatuttaaq Biibilimik ilinniartup misissueqateqar­nerminiinnaq Jehova ilikkagaqarfiginagu aamma najoqqutassiat Biibilimeersut tunngavigalugit aalajangiisarneq qanoq kinguneqarluar­tartiginersoq maluginiaraangamiuk Jehova ilisarisimanerulertarpaa. Jehova ilisarisimal­lualeruniuk taassumanngalu ikiorneqar­tarnini maluginiar­neruleruniuk qanorluunniit nalaataqaraluaraangami aalajangiil­luarnerusalissaaq.

7. Juuserfip Jehovamik ilisarisiman­nilluarnini aalajangiil­luarnis­saminut qanoq iluaqutigaa?

⁷ Juuserfip Jehovamik ilisarisiman­nilluarnini iluaqutigaa Potifarip nulianit atoqateqarumaneqarami. Qularnan­ngitsumik meeraanermini Adami Evalu aamma Aaperaat Saaralu pillugit oqaluttuat tusarnikuuai. (Mos 1. 2:24; 20:3, 6) Oqaluttuanit taakkunannga Juuserfip paasisinnaavaa Jehovap aappariinneq atoqateqarnerlu qanoq isiginnit­taaseqarfiginerai. Jehova ilisarisimal­luaramiuk Potifarip nulia itigartippaa ima oqarluni: “Qanoq taama kanngunar­tigisumik iliussaanga Guutimut ajortuliorlunga?” (Mos 1. 39:7-9) Juuserfip nalunngilaa Jehovap suut nuannarinerai suullu nuannarin­nginnerai. Aamma nalunngilaa aalajangiinerlukkuni Jehova aliasutsis­sallugu. Tamakku tamaasa eqqortumik aalajangiinis­saminut iluaqutigai. Biibilimik ilinniar­titagut Jehovap ilisarisimal­lualernissaanut ikiorutsigit aamma taakku taassuma nuannarisaanik aalajangiisin­naassapput.

JEHOVAMIK ILISARISIMAN­NILLUAR­NISSAANUT IKIORUK

8. Atuagaq Naassaan­ngitsumik pilluarsin­naavutit! atorlugu ilinniartitat qanoq ikiorsin­naaviuk?

⁸ Biibilimik ilinniar­titaqaruit Jehovamik ilisarisiman­nilluar­nissaanut taanna ikiorniarlugu qanoq iliorsinnaavit? Jehovap qanorpiaq ittuunerminik Juubi paasitik­kusukkamiuk aperisarpaa. Allaat apeqqutit 50-it sinnerlugit apeqqutigai! (Job 38:1–41:26) Aamma uagut apeqquteqar­tarnissarput pingaaruteqarpoq. Atuakkami Naassaan­ngitsumik pilluarsin­naavutit!-mi ilinniar­titatta Jehovamik ilisarisiman­ninnerujar­tornissaanut iluaqutaasunik apeqquteqartarpoq. (Ungalusaq “Apeqqutit eqqarsalersitsisut” takuuk). Ilinniartitat Jehovap kinaassusianik paasinnin­nissaanut ikiorniarlugu apeqqutit taakku atukkit.

9-10. (a) Ilinniartitap Biibilimik atuartarnini qanoq pissarsif­figilluar­nerusinnaavaa? (Jaaku 5:11) (b) Nassuiaruk Daanialimik oqaluttuamit Jehova pillugu qanoq ilikkagaqarsin­naanersugut.

⁹ Biibilimik misissueqateqaleraangatta ilinniar­titarput kajumis­saartarparput nammineq Biibilimik atuartaq­qullugu.b Atuarnermini Jehova pillugu paasisaqaq­qullugu qanoq ikiorsin­naavarput? Siunnersorsin­naavarput eqqarsaatigisaq­qullugu atuagartik taannarpiaq Jehovap sooq Biibilimut ilanngutitis­simagaa Jehovalu pillugu qanoq ilikkagaqarnersoq. Jaaku Juubimik oqaluttuamut innersuussigami taamaaliorpoq. Juubip pinertusaarsimanera eqqaagin­narnagu aamma Jehova pillugu oqaluttuamit qanoq ilikkagaqarsin­naanersugut eqqartorpaa, tassa Jehovap qamannga pisumik misigis­suseqarlunilu nallittuisuunera eqqaavai. – Jaaku 5:11 atuaruk.

¹⁰ Kissaatigaarput ilinniar­titatta oqaluttuat Biibilimeersut nammineq misissorlugit paasissagaa Jehovap suut nuannaarutigisarnerai suullu nuannarin­nginnerai. Assersuutigalugu imaassinnaavoq ilinniar­titatta Naassaan­ngitsumik pilluarsin­naavutit!-mi quppernermi “Biibili atuartaleruk”-mi Daanialip løvinut iginneqar­neranik oqaluttuaq takusimagamiuk atuarusullugu oqarfigigaatigut. Taava siunnersorsin­naavarput atuareeruniuk apeqqutit soorlu uku eqqarsaatigissagai: ‘Sooq Jehovap Daaniali aniguisippaa? Tamatumannga Jehovap nuannarisaanik sumik ilikkagaqarpunga?’ (Dan 6:11, 23) ‘Angutit Daanialimik unnerluutigin­nissimasut qanoq pineqarpat? Tamatumannga Jehovap nuannarin­ngisaanik sumik ilikkagaqarpunga?’ (Dan 6:5, 6, 25) Aamma eqqarsaatigeq­qusinnaavarput Jehovap pissusii allat suut oqaluttuamit ersersin­neqarnersut. – Dan 6:27, 28.

11. Ilinniar­titarput qanoq paasitis­sinnaavarput ilinniar­titaanera Jehovameersuusoq?

¹¹ Nuannaarutigisarparput ilinniar­titatta misissueqateqarnini nuannaarutigigaangagu iluaqutis­sartaalu paasigaangagit. Pingaaruteqarporli paasitis­sallugu ilinniar­titaanera Jehovameersuusoq. (Es 30:20, 21) Imaassinnaavoq ilinniar­titatta ilinniar­tinneqarnini pillugu uagut qutsavigigaatigut ilinniar­titseriaaserpullu nersualaarlugu. Soorunamilu taamaaliornera kukkunerunngilaq. Eqqaasit­tuassavarpulli qutsavigisassaa pingaar­nerpaaq tassaasoq Jehova.

ILIKKAK­KAMINIK ATUINISSAANUT IKIORUK

12-13. Ilinniar­titatta oqaluttuaq Biibilimeersoq paasiuminaatsikkuniuk Jehovamik ilisarisiman­ninnini qanoq iluaqutigil­luarsinnaavaa? (Aamma asseq takuuk).

¹² Eqqoqqis­saartumik paasisimasaqarnerput iluaqutigil­luassagutsigu paasisimasagut inuunitsinni atortariaqarpagut. Ilinniartitat taamaalior­nissaanut qanoq ikiorsin­naaviuk? Siullertut, ilinniar­tissinnaavat oqaluttuaq Biibilimeersoq atuartillugu paasiuminaatsitaqaruni Jehova pillugu ilisimariikkani eqqarsaatigissagai. Assersuutigalugu imaassinnaavoq Jehovap eqqartuussineri pillugit atuaraangami paasiuminaatsikkaa sooq Jehovap inuit ilaat toqumut pillarai allallu inuugin­nartillugit. Qanoq ikiorsin­naaviuk?

¹³ Biibilimik ilinniartitat kajumis­saarsinnaavat Jehova pillugu paasereersimasani eqqarsaatigeq­qullugit. Assersuutigalugu apeqqutit uku eqqarsaatigisinnaavai: Jehovap inuuneq qanoq naleqar­titsigaa? (Pet 2. 3:9) Ajortiliugaluartugut annaanniarluta qanoq iliuuseqar­tigisimava? (Ef 2:4, 5) Jehovap inuit pisuussuteqan­ngitsut pillartarpai? Inuillu pisuussutillit pillanngitsoortarpai? (Mos 2. 34:6, 7) Ilaannikkut Biibilimi allassimaneq ajorpoq sooq Jehova aalajangersimasumik aalajangiinersoq. Tamatigulli sunnguit tamaasa paasisariaqan­ngilagut. Guuterput ilisarisimagatsigu qularin­ngilarput eqqortumik iliortuaannartoq.

14. Ilinniartitat ilagiin­niittut ilaannik iluaagisaqarpat qanoq ikiorsin­naaviuk?

¹⁴ Ilinniar­titarput Jehova pillugu ilisimariik­kaminik atuinissaanut aamma qanoq ikiorsin­naavarput? Takorlooruk ilinniartitat ataatsimiit­talersoq. Ilagiin­niittulli ilaat iluarival­laanngilaa. Imaassinnaavoq iluaagisaa taanna ilinniar­titavit ajuallaatigisaanik oqaaseqarsimasoq iliuuseqarsimasorluunniit. Ilinniartitat kajumis­saarsinnaavat Jehovap uppeqatigut qanoq isiginnit­taaseqarfiginerai eqqarsaatigeq­qullugu. Assersuutigalugu apeqqutit uku eqqarsaatigisinnaavai: Jehova ilagiin­niittunik asannikkami qanoq pilliuteqarsimava? (Joh 3:16) Ilagiinni ataasius­suseqarnerput qanoq pingaar­titsigaa? (Kol 3:14) Ilagiinni ataasius­suseqar­tuarnissarput sulissutigigaangatsigu qanoq misigisarpa? (Kor 2. 13:11) Ilinniar­titannut eqqarsaatigeqqujuk Jehova qanoq nuannaar­tigisarnersoq allat kukkussutaat pinnagit ajunngitsortaat eqqarsaatiginerugaangatsigit.

15-16. (a) Biibilimik ilinniartup pingaarutilimmik aalajangigas­saqaraangami Jiisusi qanoq ilaartarsinnaavaa? (Joh 8:29) (b) Mariannep ilinniartitani aalajangiil­luarnissaanut qanoq ikiorpaa? (Aamma asseq takuuk).

¹⁵ Ilinniartitat ikiorsinnaavat Jehova pillugu ilisimariikkani iluaqutigalugit aalajangiil­luarnissaanut. Atuakkami Naassaan­ngitsumik pilluarsin­naavutit!-mi ilinniagassaq 35 “Qanoq aalajangiil­luarsin­naasartugut” innersuus­sutigisinnaavat. Taavami ilinniar­titavit siunnersuutitsialaat tassaniittut maleruarlugit qinoreeraluarluni misissuereeraluarlunilu qanoq aalajangiis­sanerluni suli nalornis­sutigippagu? Imaassinnaavoq najoqqutassiat Biibilimeersut tulluartut amerlangaarmata nalornis­sutigigaa sorliit maleruas­sanerlugit. Siunnersorsinnaavat Jiisusip maligas­siuilluarnera eqqarsaatigeq­qullugu. Jiisusip aalajangiinialeraangami suna eqqarsaatigisarpaa? Oqarpoq Ataatami ‘iluarisaatut iliortuaan­narluni’. (Johannesi 8:29 atuaruk). Ilinniartitat kajumissaaruk una eqqarsaatigeq­qullugu: ‘Misissuillunga paasisakka Jehovalu pillugu ilisimariikkakka tunngavigalugit periarfissaq sorlermita Jehovap iluarissavaa?’ Aalajangiineq Jehovap iluarisaa sunaluunniit aalajangiil­luarneruvoq.

¹⁶ Arnaq Biibilimik misissueqatigineqartartoq Chilemi najugalik pingaarutilimmik aalajangigas­saqalerpoq. Ilaqutaasa kissaatigaat suliffimmik akissarsiagis­saarfiusumik neqeroorfigineqarnini akuerissagaa. Tassanili sulilissaguni ilaannikkut ataatsimiin­ngitsoor­tassaaq. Biibilimik ilinniar­titsisua Marianne ima oqaluttuarpoq: “Kajumis­saarpara eqqarsaatigeq­qullugu tassani sulileraluarpat Jehova qanoq misigis­sanersoq. Nuannaassava, imaluunniit aliasussava? Aamma kajumis­saarpara tamanna pillugu Jehovamut qinoqqullugu akissutaalu eqqumaf­figeqqullugu. Aalajangerpoq tassani suliler­niarnani. Sivitsun­ngitsorlu ataatsimiigiar­tarnerminut akornutaan­ngitsumik suliffit­taarpoq.” Maluginiaruk Mariannep ilinniartitani qanoq iliussanersoq oqarfiginagu Jehova pillugu ilisimasai eqqarsaatigeqqugai. Tamatuma kingunerisaanik ilinniartitap Marianne qanilliin­narnagu aamma Jehova qaninnerusumik attaveqarfigilerpaa. Ilinniartitani pillugu Marianne ima oqarpoq: “Paasivaa Jehovamut kiffartornerput pingaar­nerpaatik­kaangatsigu taassuma isumagisaraatigut.”

JEHOVAMIK ILISARISIMAN­NILLUARTUT PILLUAQ­QUSSUTISIASSAAT

17. Biibilimik ilinniartut pingaarnertut suna ilikkagassaraat?

¹⁷ Ilinniar­titagut Biibilimik pikkoris­sarnerminni pingaarutilinnik amerlasuunik ilikkagaqartarput. Ilumoortut tunngaviusut Biibilimeersut – ilaatigut toqusimasut pillugit, sooq Jiisusip uagut pilluta inuunini pilliutigineraa aamma Guutip kunngeqarfia qanoq naammas­sisaqas­sanersoq – ilinniar­tarpaat. Aamma paasisarpaat peqatigiiffipput qanoq ingerlan­neqartarnersoq – soorlu ataatsimiinnerni suut sammisar­nerigut, utoqqaanertat sulerisarnersut aamma Siulersuisoqatigiit qanoq akisussaaf­feqarnersut. Kisianni ilinniar­titatta paasisimasaqar­nissaat kissaatigiin­narnagu pingaarnertut anguniagaraarput Jehovamik ilisarisiman­nillualer­nissaat.

18. Jehovamik ilisarisiman­nilluartut suut pilluaq­qussutisiassaraat?

¹⁸ Allat Jehovamik ilisarisiman­nillualer­nissaannut ikiorsin­naagatsigit qujamasungaarpugut! Jehovamik ilisarisiman­nillutik taassumunnga kiffartortut maanna pilluar­narnerpaamik inooriaaseqarput. (Tuss 25:12-15) Siunissamilu ‘Guuti ilumoortoq pillugu paasisimasaqalersimasut’ naassaan­ngitsumik inuujumaarput. (Joh 1. 5:20) Tamakkuin­naanngillalli. Biibilimi allassimavoq Jehovamik ilisarisimannittut asannittullu ‘Guutimit ilisimaneqartut’. (Kor 1. 8:3) Eqqarsaatigeriaruk! Jehovap Guutip Killeqan­ngitsumik Pissaanillip maluginiar­tarpaatigut ikinngutimisullu pisarluta. Taama tupinnar­tigisumik pilluaq­quneqarpugut Guutimik ilisarisiman­nilersimagatta!