APRIILIP 13-19, 2026
ERINARSUUT 52 Kristumiutut tunniulluinnarneq
Imermut morsutsitaanerup isumaa paasilluaruk
“Inuit inuiaqatigiinnit tamaneersut uannik malinnittunngoqqullugit … imermut morsutsissavasi.” – MAT 28:19.
SAMMISAQ
Imermut morsutsitaaneq qanoq isumaqartoq, sooq pingaaruteqangaartoq qanorlu ingerlanneqassasoq.
1. Qanoq nalunngilarput imermut morsutsitaaneq pingaaruteqartoq?
IMERMUT morsutsitaasoqaraangat nuannaangaartarpugut! Kristumiut siulliit aamma taama misigipput ukiumi 33-mi ullormi piinsimi inuppassuit imermut morsutsinneqarmata. Pisumi tamatumani imermut morsutsitaanerup pingaaruteqassusia pillugu oqalugiartoqarpoq. (ApS 2:38, 40, 41) Apustilip Paulusip “Kristusi pillugu ilinniartitsissutigineqartut pingaarnerit” allaatigigamigit aamma “imermut morsutsitaaneq pillugu ilinniartitsissut” eqqaavaa. (Hebr 6:1, 2) Taamaattumik Biibilimi ilinniartitsissutigineqartut tunngaviusut ilagaat kristumiup imermut morsutsitaanera, tamannalu qanoq isumaqartoq paasilluartariaqarparput. Sooq?
2. Sooq imermut morsutsitaanerup isumaa paasilluartariaqarparput?
2 Soorlu illup toqqaveqarluarnerata illu qajannaatsuutittaraa, taamatuttaaq imermut morsutsitaanerup isumaanik paasinnilluarneq uppernitsinnut nakussatsissutaasarpoq. Imermut morsutsitaasimanngikkaluarutta ukiorpaalunniluunniit imermut morsutsitaareersimagaluarutta paasisariaqarparput imermut morsutsitaaneq sooq taama pingaaruteqartigisoq. Taamaattumik allaaserisami matumani apeqqutit uku akissutissarsissavagut: Imermut morsutsitaaneq qanoq paasisariaqarpa? Qanoq ingerlanneqassava? Aamma sooq Ataatap aqqani, Ernerup aqqani anersaallu illernartup aqqani imermut morsutsinneqartariaqarpugut?
IMERMUT MORSUTSITAANERUP ISUMAA
3. Kristumiup imermut morsutsitaanermigut tamanut suna ersersippaa?
3 Illit imermut morsutsitaanikkut allanut suna ersersippiuk? Ersersippat Jehova Jiisusilu pillugit ilikkakkatit upperilluinnarlugit, ajortuliatit peqqissimissutigalugit Jehovap iluarisaanik inooriaaseqalersimallutit aamma Guutip Jiisusi aqqutigalugu ilinnik aniguisitsinissaa upperalugu. Kiisalu ersersippat Jehova qinunikkut neriorsorsimagit peqatigiissortai suleqatigalugit piumasaatut iliorumallutit. Taamatut qinunikkut tunniulluinnarsimaguit imermullu morsutsinneqaruit Jehova pillugu inuulerputit naassaanngitsumik inuunissamik kinguneqarsinnaasumik.
4. Imermut morsutsitaaneq sumut assersuutaava? (Aamma asseq takuuk).
4 Kristumiup imermut morsutsitaallunilu imermit qaqineraa toqungasup ilineqarneranut makititaaneranullu assersuunneqarsinnaavoq. (Aamma takuuk Kolossimiut 2:12). Sooq tamanna assersuutaalluarpa? Imermut morsutsinneqarnikkut ersersippat siornatigut inooriaaserisimasat ‘toqusoq’. Imermillu qaqitinneqaravit ‘inuuneq’ nutaaq aallartippoq Guutip piumasaa pingaarnerpaatillugu.
Imermut morsutsinneqarnikkut ersersippat inooriaaserisimasat qimakkit Guutillu piumasaatut iliortalerlutit (Immikkoortoq 4 takuuk)
5. Imermut morsutsinneqarnissamut piareersaanermi iliuutsit sumut assersuunneqarsinnaappat, aamma sooq? (Petrusimit 1. 3:18-21)
5 Petrusimit 1. 3:18-21 atuakkit. Imermut morsutsinneqarnissamut piareersaanermi iliuutsit Nooap umiarsualiornermini suliaanut assersuunneqarsinnaapput. Jehova aatsaat ilisarisimanerujartulerukku iliuuserineqartussat Nooap umiarsualiornermini suliaatulli artornarpasitsigisinnaapput. Iliuuserineqartussat ilumut pisariaqaramik? Nooa eqqarsaatigiuk. Aniguisinneqarumalluni Guutip ilitsersuineratut peqqissaartumik umiarsualiortariaqarpoq. Taamaaliorsinnaavoq Jehova tatigalugulu naalakkamiuk, Jehovallu Nooa ikiorpaa. Illittaaq “Guutip peqqusineratorluinnaq” iliorsinnaavutit. – Mos 1. 6:22.
6. Imermut morsutsitaanerup qanoq ililluni aniguisissinnaavaatigut?
6 Versi 21-mi apustili Petrusi allappoq ‘imermut morsutsitaanerup aniguisikkaatigut’. Soorunami taamaaliorneq annaanneqarnissamut naammanngilaq. Aamma imermut morsutsinneqarnikkut ajortuliagut piiarneqarneq ajorput; Jiisusip aava kisimi ajortulianik peersisinnaavoq. (Joh 1. 1:7) Taamaattorli imermut morsutsinneqarnissarput Guutip uagutsinnut peqqussutaasa ilagaat pingaarutilik. Aamma imermut morsutsinneqarnikkut ‘nalunngeqatiginnissummik ajunngitsumik tunineqarnissamik Guutimut qinuvugut’. Qinnuterput akillugu Jiisusip pilliutaa tunngavigalugu Jehovap kajumilluni isumakkeerfigissavaatigut. Tamanna pissutigalugu naassaanngitsumik inuulersinnaavugut – tassa taamaalilluni ‘imermut morsutsitaanerup aniguisissinnaavaatigut’.
IMERMUT MORSUTSITSINEQ QANOQ INGERLANNEQASSASOQ
7. Imermut morsutsitsineq qanoq ingerlanneqartarpa?
7 Imermut morsutsitsineq qanorpiaq ingerlanneqassanersoq Biibilimi sukumiisumik allaatigineqanngilaq. Taamaattorli Biibilimi najoqqutassiat iluaqutigisinnaavagut. Assersuutigalugu imermut morsutsinneqartussat Biibilimi najoqqutassiat iluaqutigalugit paasisinnaavat qanoq atisaqassanerlutik, isiginnaartullu paasisinnaavaat qanoq naleqquttumik pissusilersorsinnaallutik. (Kor 1. 14:40; Tim 1. 2:9) Amerlanertigut utoqqaanertaq imermut morsutsitsisartuusarpoq, taannali immikkut ataqqinaatissinneqarneq ajorpoq. (Kor 1. 1:14, 15) Aamma imermut morsutsitsinermi isiginnaartut qassiunersut soqutaanngilaq. – ApS 8:36.
8. Imermut morsutsinneqartussat apeqqutit suut akisarpaat, aamma sooq? (Apustilit Suliaat 2:38-42) (Aamma asseq takuuk).
8 Biibilimi allassimavoq kristumiu ‘annaanneqarumalluni qaniminik tamanut oqaluussisariaqartoq’. (Rom 10:9, 10) Ullormi imermut morsutsitaaffimmi taamaaliorneq tulluaqaaq! Taamaattumik allat takkuanni imermut morsutsinneqartussat apeqqutit marluk akisarpaat. Siullertut: “Ajortuliatit peqqissimissutigereerpigit, Jehovamut tunniulluinnareerpit, aamma Jiisusi Kristusi aqqutigalugu Jehovap annaassinera upperilluinnarpiuk?” Uani inuup morsutsinneqarnissaminut piareersarnermini iliuuserisimasai apeqqutigineqarput. Ullormi piinsimi Petrusi peqqissiminissamut assingusumik kajumissaarivoq. Apeqqutit aappaat imaappoq: “Paasiviuk imermut morsutsinneqarnikkut Jehovap Nalunaajaasuinut Jehovallu peqatigiissortaanut ilaanerit tamanut ersersissallugu?” Uani kristumiup iliuuserisassai erseqqissarneqarput: Jehovap peqatigiissortaanit siulersorneqarnermisut iliortariaqarpoq uppeqatinilu suleqatigalugit Jehova kiffartorfigissallugu. Ullormi piinsimi imermut morsutsinneqartut aamma taamatorpiaq iliorput. (Apustilit Suliaat 2:38-42 atuakkit). Apeqqutinut taakkununnga marlunnut angersinnaasut imermut morsutsinneqarsinnaapput.
Ullormi imermut morsutsitaaffimmi ‘annaanneqarumallutit qaninnik tamanut oqaluussivutit’ (Immikkoortoq 8 takuuk)d
9. Kikkut tamarmik Guutimit iluarisaajumallutik susariaqarpat?
9 Kristumiut ilaat Jehova ilisarisimanngikkallaramikku inuunerlunneq ajorput ingasattumillu ajortuliorneq ajorlutik. Allat angajoqqaaminnit Nalunaajaasunit perorsarneqaramik meeraanerminniilli Jehova asavaat. Taakku aamma Guutimit iluarisaajumallutik imermut morsutsinneqartariaqarpat? Aap. Qanorluunniit tunuliaqutaqaraluarutta tamatta nassuerutigisariaqarparput ajorti inunnguuseralugu ajortiliusugut Guutimillu avissaaqqalluta. (Tuss 51:7) Jehova ilisarisimaleratsigu aalajangerpugut taassuma piumasaa salliunniarlugu. Taamaalioratta inooriaaserisimasarput peqqissimissutigalugu allamik isumataarpugut Ataatattalu qilammiusup iluarisaatut inooriaaseqalerluta. Taava imermut morsutsinneqarnissamut piareerpugut. – ApS 3:19.
10. Upperisarsiornermi allami kuisinnikuuguit sussavit?
10 Upperisarsiornermi allami kuisinnikuugaluaruilluunniit Jehovap Nalunaajaasuisa ilaattut imermut morsutsinneqartariaqarputit. Sooq? Siornatigut Jehova Jiisusilu pillugit eqqoqqissaartumik ilisimasaqannginnavit. Allaat qinunikkut Guutimut tunniulluinnarsimagaluaruit neriorsuinerit tamanna Guutip piumasaanik paasinnilluarnermik tunngaveqanngilaq. Efesossimi uppertut ilaat Kristusip ilinniartitsissutai iluamik paasinngikkallaramikkit morsutsitaagaluarput. Tamannali paasilluaramikku imermut morsutsinneqaqqipput.b (ApS 19:1-5) Aamma nalitsinni inuup Biibilimi ilinniartitsissutigineqartut paasilluareerlugit imermut morsutsinneqarnera Guutip akuerisinnaavaa.
“ATAATAP AQQANI, ERNERUP AQQANI ANERSAALLU ILLERNARTUP AQQANI”
11. “Ataatap aqqani, Ernerup aqqani anersaallu illernartup aqqani” imermut morsutsitsineq qanoq paasisariaqarpa? (Matiusi 28:18-20)
11 Jiisusi peqqusivoq imminik malinnittunngorlaat “Ataatap aqqani, Ernerup aqqani anersaallu illernartup aqqani” imermut morsutsinneqassasut. (Matiusi 28:18-20 atuakkit). Tamanna qanoq paasisariaqarpa? Biibilip nalaani inuup atia aamma taassuma tusaamaneqarneranut, inissisimaneranut oqartussaaneranullu attuumassuteqartarpoq. Taamaattumik Jehovap aqqani Jiisusillu aqqani imermut morsutsinneqarnerput isumaqarpoq taakkua oqartussaanerat akuerigipput naalassallugulu. Anersaap illernartup aqqani imermut morsutsinneqarnerput isumaqarpoq tamatuma siulersuinera akuerissagipput malissallugulu. Qanorpiaq taamaaliorsinnaasugut samminerussavarput.
12. Ataatap aqqani imermut morsutsitaaneq qanoq paasisariaqarpa? (Saqqummersitat 4:11) (Aamma asseq takuuk).
12 Ataatap aqqani. Upperilluinnarparput Jehova qilammi Ataatagalugu inuunitsinnillu Tunisisuusoq. Nalunngilarput Guutiusoq sunillu tamanik Pinngortitsisuusoq. (Saqqummersitat 4:11 atuaruk). Aamma nalunngilarput qinnutigut tusarnaartarai. Qinugaangatta Jehovalu pillugu oqalukkaangatta taassuma aqqa ataqqinnittumik atortarparput. (Tuss 65:3) Ataatap aqqani imermut morsutsinneqartussap suli alla aamma akuerissavaa: Ullormi piinsimi Petrusimut tusarnaartut Jehova ilisarisimavaat, aammali paasisariaqarpaat akueralugulu Jiisusi Kristusi kisiat aqqutigalugu Jehova inunnik aniguisitsisoq. – Rom 5:8.
Imermut morsutsitaareerlutit Ataataq siulersortigiuaruk (Immikkoortoq 12 takuuk)
13. Ernerup aqqani imermut morsutsitaaneq qanoq paasisariaqarpa? (Aamma asseq takuuk).
13 Ernerup aqqani. Upperilluinnarparput Jiisusi tassaasoq Guutip ernitua – Jehovamut attaveqarluarnissamut ‘aqqutissatuaasoq’. (Joh 14:6) Upperilluinnarparput Jiisusip toqunera uagutsinnut annassutaasoq. Taamaattumik ullut tamaasa – ullormi imermut morsutsitaaffiusumiinnaanngitsoq – Jiisusi sapinngisamik ilaarniartarparput. (Joh 1. 2:6) Jiisusitut sapiilluta aallussillutalu oqaluussisarpugut. (Luk 4:43) Allaat malersorneqarnermi Jiisusi malillugulu Guuti ilumoorfigiuarparput. (Tim 2. 3:12) ‘Kristusip ilagiinnut niaquunera’ akuerigatsigu siulersortigut taassuma toqqagai kajumilluta maleruarpagut. – Ef 4:8, 11, 12; 5:23.
Imermut morsutsitaareerlutit Erneq siulersortigiuaruk (Immikkoortoq 13 takuuk)
14. (a) Anersaap illernartup aqqani imermut morsutsitaaneq qanoq paasisariaqarpa? (Aamma asseq takuuk). (b) Tanitat qanoq allatigut morsutsitaappat? (Ungalusaq “Kristumiut tanitat allatigut morsutsinneqarnerat” takuuk).
14 Anersaap illernartup aqqani. Anersaaq illernartoq pillugu ilumoortoq akueraarput. Tassaanngilaq kinaassusilik imaluunniit ataasiullunilu pingasuussusermut ilaasoq. Tassaavorli Guutip nukinga. Nalunngilarput Guutip pruffiitii Biibilimillu allattut anersaavanit illernartumit siulersortissimasut, taamaattumillu ullut tamaasa Biibilimi atuartarpugut atuakkagullu maleruartarlugit. (Pet 2. 1:20, 21) Aamma ingasattumik ajortuliornaveersaartarpugut. Taamaalioraluaruttami Guutip anersaavata uagutsinnut allaallu ilagiinnut sunniinera akornusersinnaavarput. – Ef 4:30.
Imermut morsutsitaareerlutit anersaaq illernartoq siulersortigiuaruk (Immikkoortoq 14 takuuk)
15. Suna aalajangiusimasariaqarparput?
15 Imermut morsutsitaareeruit “imermut morsutsitaaneq pillugu ilinniartitsissut”c eqqarsaatigeqqissaartaruk Jehovamullu tunniulluinnarsimaninni neriorsuinerit malillugu inuujuarit. Taavami imermut morsutsitaanngikkuit? Arlaannik nangaassuteqarpit? Allaaserisami tulliuttumi imermut morsutsinneqarnissamut piareersarninni qanoq iliorsinnaasutit sammissavarput.
ERINARSUUT 161 Piumasat salliuttuarpara
a Grækerisut oqaaseq baptisma ‘imermut morsutsitsinermik’ nutserneqartoq ‘misussinermik’ aamma ‘morsutsitsinermik’ isumaqarpoq. Taamaattumik inuup timaata tamarmi imermut morsutsinneqarnissaa pineqarpoq, tassaaginnarani upperisarsiornerit ilaannit ileqqorineqartutut inuup niaquata imermik kuineqarnissaa serparneqarnissaaluunniit.
b Efesossimiut taakku oqarput “Johannesip imermut morsutsitsisartup ilinniartitsissutaa” tunngavigalugu morsutsinneqarlutik. (ApS 19:3) Johannesi juutinik kajumissaarivoq Moorsisip inatsisaanik unioqqutitsinitik peqqissimissutigeqqullugit, peqqissimisullu Johannesip imermut morsutsippai. (Mak 1:4, 5) Moorsisilli inatsisai kingusinnerusukkut atuukkunnaarmata Johannesip morsutsitsinera aamma atuukkunnaarpoq. Taamanimiilli ‘imermut morsutsitaaneq ataasiinnaavoq’ annassutaasoq Guutimit iluarineqartoq. – Ef 4:5.
c Takuuk allaaserisaq “Imermut morsutsitaaneq qanoq paasisariaqarpa?” jw.org-imi allaaserisat ataqatigiit “Apeqqutit Biibilimi akineqartut” ataanniittoq. (JW Library®-mi tuukkit “Bibliotek” taavalu “Artikelserier”).
d ASSIMI MALUGISASSAT: Ataatsimeersuarnermi imermut morsutsinneqartussat uppernertik tamanut oqaluussissutigaat.