Imermut morsutsin­neqarnissat sulissutigiuaruk

1. (a) Imermut morsutsin­neqarnerput qanoq iluaqutigaarput? (b) Allaaserisami matumani suut sammissavagut?

JEHOVAMUT tunniul­luinnarsimal­lutillu imermut morsutsitaanikuuit? Taamaappat nalunngeqatigin­nissummik ajunngitsumik tuneqqullutit qinunikuuvutit. (Pet 1. 3:21) Silatusaartumik aalajangiisimavutit, ilagiinnilu inuusuttunut soqutigin­nittunullu maligas­saalluarputit. Taavami suli imermut morsutsin­neqarsiman­ngikkuit? Ilimanarpoq Jehova asagit taassumalu piumasaatut iliorusuttutit. Nalugunanngilat ajortuliannik isumakkeerfigineqassaguit Jehovamullu qanimut attaveqassaguit imermut morsutsin­neqartariaqartutit. (ApS 2:38-40) Immaqali taamaalior­nissannut nangaas­suteqarputit. Qanoq ilillutit siumukar­tuarsinnaavit? Allaaserisami matumani sammissavarput (1) sooq ilaat imermut morsutsin­neqarnissamut nangaas­suteqartut, (2) sooq naggatissap qanilliar­tornerata eqqarsaatigeq­qissaarnissaa pingaaruteqartoq aamma (3) sooq imermut morsutsin­neqarnissaq maannak­korpiaq sulissutigisassaasoq.

SOOQ ILAAT IMERMUT MORSUTSIN­NEQARNISSAMUT NANGAAS­SUTEQARTUT

2. Sooq ilaasa imermut morsutsin­neqarnissartik nangaas­sutigaat?

² Ilaat annilaangas­suteqaramik suli imermut morsutsin­neqanngillat. Assersuutigalugu Jehova kiffartorfigerusuk­kaluarlugu misigipput piumasaatut iliorsin­naanatik. Taama misigiguit Biibilimi allassimaffiit qularun­naarnartut atuartar­nissaat iluaqutigisinnaavat. Biibilimi erseqqis­sarneqarpoq Jehovap kukkujuitsuunissat piumasarin­ngikkaa sapinngisannillu iliuuseqar­tarnissat nuannaarutigigaa. (Tuss 103:13, 14; Kol 3:23) Malersor­neqarnissat annilaan­ngatigigukku Jehova qinnuigisinnaavat tatigin­ninneruleq­qullutit, soorlu tussiaasiortup Jehova ima tatigigaa: “Jehova ikiortigigakku annilaangas­sanngilanga. Inuup qanoq iliorfigisin­naagaminga?” – Hebr 13:6; Tuss 118:6.

3. Ilaasa imermut morsutsin­neqarnissamut suna akornutigaat? (Aamma asseq takuuk).

³ Jehovamik asannittut allat suli imermut morsutsin­neqarsiman­ngillat naammattumik ilisimasaqarsorin­nginnamik. Kisianni suut tamaasa ilisimareer­tariaqarpagut? Assersuuteqariarta. Paulusi Siilarsilu parnaarus­saaqqatillutik nunap sajunnera pissutigalugu aniguisin­neqaramik parnaarus­sivimmi paarsisoq ilaqutaalu oqaluus­siffigaat. Ilimanarpoq paarsisup ilaqutaasalu paasisimagaat taakku Guutimit aniguisin­neqartut. Unnuaq taanna aamma Jehova Jiisusilu pillugit pingaarutilinnik oqaluus­siffigineqarput. Paasisakik­kaluarlutik “ingerlaannaq imermut morsutsin­neqarput”. (ApS 16:25-33) Illit Jehova ilisarisimagukku, uummatit tamakkerlugu asagukku, Biibilimi ilinniar­titsissutigineqartut tunngaviusut paasereerukkit, ajortuliatit peqqissimis­sutigigukkit Guutillu piumasaa naapertorlugu inoorusukkuit imermut morsutsin­neqarnissamut piukkun­narputit. – Mak 12:30.

4. Imermut morsutsin­neqarnis­saminnut nangaas­suteqartut ilaasa suna isumakuluutigaat? (Aamma asseq takuuk).

⁴ Guutip iluarisaatut iliorusuttut ilaasa inooriaatsiminnik allannguinissartik sapernar­tissasoraat. Soorunami aalajangiin­nginnitsinni eqqarsaatigis­savarput aalajangiun­niagarput inuunitsinnut qanoq sunniuteqas­sanersoq. (Luk 14:27-30) Ilaalli isumaqarput Guutimut kiffartor­tunngor­niarlutik pilliuteqarpal­laartariaqarlutik. Qatanngut arnaq, Candace, taama isumaqar­nikuuvoq. Meeraanermini Jehova pillugu ilisimasaqalaaraluarluni inersimasun­ngorami Biibilimik misissueqatigineqar­talernissamik neqeroorfigineqarpoq. Ima oqarpoq: “Jehovap piumasaqaatai nalunngik­kaluarlugit inooriaaseq sungiusimasara nuannaraara. Nalunngilara inooriaasera allanngor­tikkuminaatsis­sallugu.” Allat isumakuluutigaat Jehovap najoqqutassiai qutsissut naapertorlugit inuusin­naanerlutik. Ernumas­sutigaat imermut morsutsin­neqareerlutik ingasattumik ajortulius­sagunik ilagiinnit peerneqar­nissartik. Taamatut isumakuluuteqaruit qanoq iliorsinnaavit?

5. Imermut morsutsin­neqarnissamut nangaas­suteqarutta suna eqqaamas­savarput? (Matiusi 13:44-46)

⁵ Arlaannik pisiniaraangatta qanoq akeqartoq isigiin­narnagu aammali qanoq iluaqutaatigissasoq eqqarsaatigisarparput. Pisariaqar­tilluin­narutsigu akisugaluartoq ingerlaannaq pisiarisarparput. Taamatuttaaq imermut morsutsin­neqarnissamut tunngatillugu qanoq allannguitigisariaqartugut eqqarsaatigiin­narnagu aammali Jehovamut attaveqarluarnerput qanoq naleqangaar­tigisoq eqqarsaatigis­savarput. Jiisusip assersuusiamini marlunni tamanna erseqqissarpaa. (Matiusi 13:44-46 atuakkit). Assersuusiani taakkunani angutit pigisatik erliginagit tunivaat nanisartik naleqangaar­nerusoq pisiariniarlugu. Illittaaq nalilerujussuaq nanivat – tassa Guutip kunngeqarfia pillugu ilumoortoq paasivat. Taamaattumik imermut morsutsin­neqarnissannut nangaas­suteqaruit Jiisusip assersuusiai taakku eqqarsaatigeq­qissaakkit. Imminut ima aperisin­naavutit: ‘Upperil­luinnarpara ilumoortoq Biibilimeersoq naleqangaartuusoq? Jehovamut attaveqarnera, neriuutiga uppeqatikkalu asanartut pingaar­tippakka?’ Apeqqutinut akissutitit iluaqutigalugit paasisinnaavat imermut morsutsin­neqarumallutit suna sulissutigisariaqarlugu.

6. ‘Uummat ajunngitsoq’ qanoq ineriar­tortissin­naavarput?

⁶ Naajartor­tussanik siaruar­terisumik assersuusiamini Jiisusi oqarpoq inuit ilaat anersaakkut siumukar­nissamut uummatimikkut akornuteqartut. Jiisusili aamma oqarpoq ilaasa nutaarsiassat nuannersut “ajunngitsumik minguitsumillu uummateqarlutik” upperilissagaat. (Luk 8:5-15) Marloqiusamik uummateqar­nerlutit isumakuluutigigukku tamanna iliuuseqarfigisinnaavat. Guutip ikiuineratigut ‘nutaamik uummateqalersin­naavutit’ siulersuineranut naalakkusuttumik. Jehova qinnuigisaruk uummatit aqilisaq­qullugu ilumoortorlu ilinni inerititaqaleq­qullugu. – Ez 18:31; 36:26.

7-8. Sooq inuusuttut ilaat imermut morsutsin­neqarnissamut siumukan­ngitsoorpat? (Aamma asseq takuuk).

⁷ Inuusuttut Jehovamik asannittut ilaat allanit sunnerneqaramik imermut morsutsin­neqarnissamut siumukan­ngitsoorput. Assersuutigalugu atuarfimmi ilinniar­titsisut kajumis­saarisin­naapput atuartut inooriaatsinut allanut, allaat Jehovap najoqqutas­siaanut naapertuutin­ngitsunut, ammasumik isiginnit­taaseqaq­qullugit. Siunnersuutaalli kingunipiloqarsinnaavoq. (Tuss 1:1, 2; Uss 7:1-5) Silatusaar­nerussaaq tussiaasiortup Jehovamut oqaasii uku maleruarukkit: “Ilinniar­titsisinnit tamanit paasisimasaqar­neruvunga eqqarsaatigiuar­tarakkit oqaaqqis­saarutitit.” – Tuss 119:99.

⁸ Imaassinnaavoq angajoqqaat Nalunaajaasut ilaat meeqqamik anersaakkut siumukar­nissaannut akornutaasut. Meeqqatik sumik ilinniagaqas­sanersut qanorlu ittumik suliffeqas­sanersut pingaar­tippallaaramikku anersaakkut anguniagaqar­nissaannut ikiunngitsoorpaat. Misigivit imermut morsutsin­neqarnissamik anguniagaqarninni angajoqqaavit ikiornerusin­naagaluaraatsit? Taamaappat nangaanak oqaloqatigisin­naavatit. Eqqaamajuk qanorluunniit ukioqaraluaruit Jehovamut qanimut attaveqarlualersin­naasutit. – Uss 20:11.

9. Sooq ilaat suli imermut morsutsin­neqarsiman­ngillat?

⁹ Imermut morsutsin­neqarnissamut piukkunnartut ilaat suli taamaaliorsiman­ngillat ikinngutertik ilaqutar­tilluunniit morsutseqatigerusuk­kamikku. Soorunami ikinngutit ilaquttal­luunniit morsutseqatigisinnaavat. Taassumali imermut morsutsin­neqarnissamut piareer­nissaanut utaqqisariaqarpit? Eqqaamajuk Guutimut tunniul­luinnarsimanerit tassaasoq illit nammineq neriorsuinerit. Allat iliuusii illit imermut morsutsin­neqarnissannut aalajangiisuun­ngillat. – Rom 14:12.

SOOQ NAGGATISSAP QANILLIAR­TORNERA EQQUMAF­FIGISSAGIPPUT

10. Sooq ilaat anersaakkut siumukarluan­ngillat?

¹⁰ Allat anersaakkut siumukarun­naarsimapput eqqarsaramik naggatissap nalliun­nissaanut suli piffissaqarluartoq. Kisianni taamatut eqqarsarneq silatusaarnerua? Jiisusip ilinniartitani ima mianersoqquai: “Inuup Ernera akunnermi ilimagin­ngisassinni tikiutissammat aamma ilissi piareersimajuar­tariaqarpusi.” – Luk 12:40.

11. Tussiaat 119:60 naapertorlugu Jehovap piumasaqaatai ilisimanerujar­tortillugit qanoq iliorusulerpugut, aamma sooq?

¹¹ Jehovamut tunniul­luinnar­nissamut pissutaasoq pingaar­nerpaaq tassaavoq asanninneq. Jehova ilisarisimanerujar­tortillugu inassutai nuannarinerulerlugillu taakkua maleruar­nissaannut kajumin­nerulissaagut. (Tussiaat 119:60 atuaruk). Jehovap peqqussutaasa ingerlaannaq naalannis­saannut pissutaasoq alla Jaakup eqqaavaa: Aqagu qanoq issanersoq naluarput. Taamaattumik ullut tamaasa ‘eqqortuliussaagut’, tassa Jehovap suna piumasarigaa paasigutsigu nangaanata iliuuseqassaagut. – Jaak 4:13-17.

12. Jiisusip viinnequteqarfimmi sulisunik assersuusiaa qanoq ilinniarfigisin­naavarput?

¹² Jiisusip viinnequteqarfimmi sulisunik assersuusiaa eqqarsaatigiuk. Jiisusi oqarpoq ulloq naallugu sulisut akunnerlu ataasiinnaq sulisut assigiimmik akissarsisin­neqartut. Kisianni sooq akunneq ataasiinnaq sulisut siusinnerusukkut sulilersiman­ngillat? Nassuiaapput: “Sulisus­sarsiarineqan­nginnatta.” Sulisut taakku eqiasut­tuunngillat. Ulloq naallugu sulinissamut piareersimapput. Sulisus­sarsiarineqaramillu ingerlaannaq suleqataalerput. (Mat 20:1-16) Nalitsinni Jiisusip inuit imminik malinnit­tunngor­nissamut oqaluus­seqataaler­nissamullu qaaqquai. Uagut kajumis­saarutaa paasigutsigu suliassamut ingerlaannaq peqataaler­tariaqarpugut.

13. Lotsip nulia qanoq ilinniutigisin­naavarput?

¹³ Allannguinis­saminnut nangaas­suteqartut ilaat eqqarsarput naggatissap nalliutilernerani aatsaat allannguipal­lassinnaallutik. Anersaakkulli siumukar­nissartik kinguar­teqattaarunikku allannguinissartik sapernar­tinnerulissavaat. Jiisusip tamanna nalunnginnamiuk ilinniartitani ima mianersoqquai: “Lotsip nulia eqqaamasiuk.” (Luk 17:31-35) Lotsip nuliata nalunngilaa Soodomap Gomoorallu piuneerun­neqarnissaat qanillisoq, taamaattorli pigisani erligingaaramigit qimakkumanngilai. (Mos 1. 19:23-26) Oqaluttuamit aamma eqqaasin­neqarpugut piffissami killilimmi allannguinissamut periarfis­saqartugut. Naggatissaq nalliuppat Guutip aniguinissamut ‘matu’ matussavaa ammaqqinnagulu. – Luk 13:24, 25.

14. Naggatissaq pillugu Biibilip siulittuutai qanoq sunnerneqaatigis­savagut?

¹⁴ Ullut tamaasa nunarsuarmi pisartut naggatissaq pillugu Biibilip siulittuutaasa eqquunnerannut uppernarsaataapput. Pisartut taakku illit inuuninni toqqaan­nartumik sunniuteqan­ngikkaluartut sumiiffinni tamalaani pisartut ilisimagakkit imermut morsutsin­neqarnissamut siumukapal­lannissannut kajumin­nerulissaatit. Apustilip Petrusip kristumiunut kajumis­saarutaa eqqarsaatigeriaruk: Allaffigai ‘suut tamarmik naggatissaat qanillimmat eqqumajuassasut’. (Pet 1. 4:7) ‘Naggatissaq’ Petrusip eqqaasaa tassaavoq Jerusalemmip tassanilu guutisiorfiup suujunnaarsin­neqarnerat. Petrusip allaffigisai amerlasuut Jerusalemmimiit ungasissumi najugaqaramik illoqarfiup suujunnaarsin­neqarnera toqqaan­nartumik sunnerneqaatigisimas­sagunan­ngilaat. (Pet 1. 1:1) Taamaattorli siulittuutip tamatuma eqquunnera tusaramikku Jehovap siulittuutaasa allat eqquukkumaarnerat upperinerulersimassavaat. Taamatuttaaq illit naggatissaq pillugu siulittuutit eqquunnerat eqqumaf­figiuarukkit paasilissavat naggatissaq qanoq qanillitigisoq imermullu morsutsin­neqarnissannut kajumis­sissutiginerulerlugu.

15. Jehovap ullussaanut qanoq piareersimasin­naavugut? (Petrusimit 2. 3:10-13)

¹⁵ Petrusi allakkami aappaanni nassuiaavoq Jehovap ullussaata nalliuf­fissaanut qanoq piareersimasin­naasugut. Kristumiut taamani inuusut Jehovap ullussaa misiginavian­ngilaat. Taamaattorli Petrusip allaffigai ullussaq tamanna ‘eqqarsaatigiuassagaat’ imaluunniit ‘assut qilanaariuassagaat’. (Petrusimit 2. 3:10-13 atuakkit; q.a.i.) Uaguttaaq eqqarsaatigiuarutsigu Jehovap ullussaa qanittuararsuakkut nalliutissasoq qilanaarluta piareersimasin­naavugut. ‘Illernartumik pissuseqar­nitsigut Guutimullu tunniusimanitsigut’ ersersit­tarparput piareersimalluta. Taamaaliortaruit Jehova qanoq nuannaar­tigisimassasoq takorlooriaruk! Tunniul­luinnarsimal­lutillu imermut morsutsin­neqarnissat Jehovap assut nuannaarutigisimassavaa.

SOOQ MAANNA ILIUUSEQAR­TARIAQARTUTIT

16. Inuup imermut morsutsin­neqarnissani qaqugukkut sulissutigilissavaa? (Korintimiunut 2. 6:1, 2) (Aamma assit takukkit).

¹⁶ Imermut morsutsin­neqarnissamut siumukarnissaq maanna piffissaavoq. (Korintimiunut 2. 6:1, 2 atuakkit). Eunukkip Etiopiamiup paasivaa ingerlaannaq iliuuseqar­tariaqarluni. Nutaarsiassat nuannersut paasigamigit imermullu morsutsin­neqarnissamut periarfis­saqarmat ima eqqarsanngilaq: ‘Amerlanerusunik paasisaqaq­qaarusuppunga. Ingerlaq­qikkuttami imeqarluartumik allamik aqqusaagaqaq­qikkumaarpugut.’ Taama eqqarsarnani Fiilippi aperivaa: “Imermut morsutsitaanissannut suna akornutaava?” (ApS 8:26, 27, 35-39) Maligas­saalluangaarami! Imermut morsutsin­neqareerluni ‘nuannaangaarluni ingerlaqqippoq’.

17. Suna upperil­luinnarsin­naavarput?

¹⁷ Illit imermut morsutsin­neqarnissamut nangaas­suteqaruit eqqaamajuk Jehovap qanimut ikinngutigerusukkaatit. (Rom 2:4) Annilaangas­suteqaruit, isumakuluuteqaruit siumukar­nissannul­luunniit allanik akornuteqaruit Jehovap taakkua qaanger­nissaannut ikiorsin­naavaatit. Imermut morsutsin­neqaruit ilerasunnak Jehovap piumasaatut iliorlutit “tununniittut” – tassa siornatigut inooriaaserisimasan­niittut – suunngitsutut isigisimas­sagunarpatit. (Flp 3:8, 13) Taavalu “siuninniittut” – tassa Jehovap imermut morsutsin­neqartunut neriorsuutaasa eqquunnissaat – qilanaarisinnaavat. – ApS 3:19.