Atuagassiat atuartarpigit?
1 Aappariit ajoqersuiartortitat Afrikamiittut atuagassiaativut pillugit ima oqarsimapput: „Napasuliaq Alapernaarsuiffik ikiortigalugu oqaluussiffigisatsinni anersaakkut eqqumajuarsinnaavugut. Normuisa tamarmik . . . nakussatsittarlutalu kajumissisittarpaatigut.“ Illit taakkunatut atuagassiat pingaartitsigivigit? Atuassallugit aamma taama kajumissuseqartigivit?
2 Allaaserisaq minutsialuit atorlugit atuarneqarsinnaasoq sivisuumik suliarineqartarpoq. Tamanna eqqarsaatigalugu allaaserisat qaapiarlugit qimerluualaaginnartarpigit, assiliartaat immaqaluunniit allaaserisat immikkut soqutiginartitatit kisiisa atuartarlugit? Silatusaarnerussaaq iliuuseqarnerusarutta. Atuagassiani tamani allaaserisat tamaasa atuarlugillu eqqarsaatigisariaqarpavut. Pingaartumik Napasuliaq Alapernaarsuiffik aqqutigalugu anersaakkut inuussutissanik tunineqartarpugut. Iteritsi!-mi soqutiginartunik ilikkarnartunillu allaaserisaqartarpoq assigiinngitsorpassuit pillugit. Atuagassiat tamakkua atuarneratigut anersaakkut nakussatsiinnartanngilagut, aamma oqaluussinermut piukkunnarnerulertarpugut. Eqiasuilluta atuagassiat atuartarutsigik angorniorluta allanut neqeroorutigisinnaassavavut.
3 Qanoq ililluni atuartarneq pitsaanerulersinneqarsinnaasoq: Atuagassiat atuartarniarlugit iliuuseqarnerusinnaavit? Siunnersutit marluk uku amerlasuut iluaqutigisimavaat: (1) Atuarnissannut pilersaarusiorit. Tupigusuutigissavat paasigukku ullormut minutsit 10-15-it atorlugit sapaatip-akunneranut qanoq amerlatigisut atuarneqarsinnaasut. (2) Suut atuareernerlugit aalajangersimasumik nalunaarsueriaaseqarit. Immaqa allaaserisat atuarsimasavit aallaqqaataanni nalunaaqutsiisarsinnaavutit. Taamaaliunngikkutta allaaserisat ilaat immaqaluunniit allaat atuagassiaq ilivitsoq atuanngitsoorsinnaavavut. Atuarnissamut atoriaannaasumik malinneqarsinnaasumillu pilersaaruteqarneq pingaaruteqarpoq, tamannalu ilungersuussilluni maleruarniarneqartariaqarluni. — Naleqqiuguk Filípimiunut agdlagkat 3:16.
4 ’Kiffap ilumoorlunilu silatuup’ silarsuarmi pissutsit allanngoqattaartuartut soqutigalugit allaaserisat inuit piviusumik pisariaqartitaannut tunngasut saqqummersittarpai. (Mat. 24:45) Atuagassiat tamakkua inuunitsinnut sunniuteqarsimapput. Teokratiimut tunngasumik atuartarnerput anersaakkut ineriartornissatsinnut pingaaruteqartorujussuuvoq. Atuagassianik tamanik atuarnissaminut piffissaqarniartoq anersaakkut ittumik annertuumik pilluaqquneqarumaarpoq.