Napasuliaq Alapernaarsuiffik aamma Iteritsi! — oqaatsit sallusuissutip pii piffissaq eqqorlugu
„Akiliullunga iperagaatissavarma illit [Jehova], sallusissutip Guutia.“ — TUSSIAAT 31:6 NV.
1, 2. (a) Qatanngutip arnap Napasuliaq Alapernaarsuiffik-mi atuarsimasani qanoq isumaqarfigai? (b) Atuagassiaativut pillugit qanoq aperisoqarsinnaava?
„QUJANARSUAQ Napasuliaq Alapernaarsuiffimmi allaaserisami ’Annikilliorfiup nalaani tuppallersaatissarsisoqarsinnaavoq’-mia paasissutissanut nuanningaartunut. Misigissutsit anniaatigisama ilarpassui attorpasi. Soorlumi allaaserisaq taanna uannorpiaq allanneqarsimasoq. Atuaqqaarakku qullilivunga. Nuanneqaaq paasillugu qanoq ittunga allat nalunngikkaat! Qujamasoqaanga Jehovap Nalunaajaasuisa ilagimmannga. Aammami sumi allami nassaarisinnaagatsigt siunissami qanittumi paratiisimi naassaanngitsumik inuusinnaanissamik neriorsuutit aammalu maannakkut tarnitsinnut tuppallersaatissat! — Qujanaq — qujanarujorujussuaq.“
2 Illit taama misigisaqarsimavit? Misigisimaviuk Napasuliaq Alapernaarsuiffik-mi imaluunniit „qatanngutaani“ Iteritsi!-mi allaaserisat ilaat ilinnorluinnaq allagaasoq? Suunuku atuagassiaatitsinni inuit uummataannik attuisartut? Qanoq ililluta inuit allat iluaqusersinnaavavut atuagassiat taakkua imarisaat oqariartuutit inuunermik annaassisinnaasut atorlugit? — 1 Timûtiuse 4:16.
Atuagassiat sallusuissummik illersuisut
3. Napasuliaq Alapernaarsuiffik aamma Iteritsi! sumik pissuteqarluarluni atuartartut uummataannik killiisimava?
3 Jehova ’sallusuissutip Guutigaa’. (Tussiaat 31:6, NV) Oqaasia, Biibili, sallusuissutip atuagaraa. (Juánase 17:17) Inuit ilumoortut sallusuissummut qisuariartarput. (Naleqqiuguk Juánase 4:23, 24.) Atuagassiat Napasuliaq Alapernaarsuiffik-p aamma Iteritsi!-p atuartartorpassuit uummataannik attuisarnerat ilaatigut pissuteqarpoq atuagassiat taakku ataasiusumik nalorninaatsumik pissuseqarnerannik — sunik ilumoortunik illersuiuiarlutik. Aap, sallusuissummut Biibilimeersumut ilumoorneq pissutigalugu Napasuliaq Alapernaarsuiffik saqqummertalersimavoq.
4, 5. (a) Sooq C. T. Russellip Napasuliaq Alapernaarsuiffik saqqummersittalerpaa? (b) „Inussiap aalajaallunilu silatuup“ Napasuliaq Alapernaarsuiffik qanoq atorpaa?
4 1876-imi Charles T. Russellip suleqatigilerpaa Nelson H. Barbour, Rochesterimiu naalagaaffimmi New Yorkimi. Taamani Russell aningaasaliivoq Barbourip atuagassiaa upperisarsiornermut tunngasoq Herald of the Morning saqqummertaleqqinniassammat, Barbour aaqqissuisuunerulluni Russellilu aaqqissuisooqataalluni. Kisiannili ukiup aappaa qeqqa tamatuma kingorna qaangiuttoq 1878-imi aggustip normuani Barbour allaaserisaqarpoq Kristusip toquata utertitsissutaanera akerlilersorlugu. Russell, Barbourimit ukiunik 30-ngajannik nukarliusoq, atuagassiap normuata tulliani qisuariaateqareerpoq allaaserisaqarluni utertitsissut illersorlugu, oqarluni taanna „Guutip oqaasiini ajoqersuutit pingaarnerpaartaasa ilagigaat“. (Matîuse 20:28) Biibilimik tunngavilersorluni Barbour arlaleriarluni oqaloqatigeriaraluartareerlugu Russell aalajangerpoq Herald of the Morning attaveqarfigiunnaavinniarlugu. 1879-imi juunip normuaniit Russell aaqqissuisooqataajunnaarpoq. Qaammat ataaseq qaangiummat 27-nik ukioqartup Russellip aallarnerpaa atuagassiaq Zion’s Watch Tower and Herald of Christ’s Presence (Zionip napasuliaa alapernaarsuiffik Kristusillu najuunneranik tusarliisoq; Maanna: Napasuliaq Alapernaarsuiffik, Jehovap naalagaaffianik tusarliisoq). Atuagassiap taassuma aallaqqaammulli sallusuissutit Biibilimeersut saqqummiuttarpai, ilaatigut utertitsissummik ajoqersuut.
5 Ukiuni 114-ini qaangiuttuni Napasuliaq Alapernaarsuiffik takutissimavoq Biibilip sallusuissutaanik ajoqersuutaanillu illersuisutut, eqqartuussissuserisutut, advokatitut, pikkorissutut. Taamaalilluni atuartartunit millionilikkaanit tatigineqalersimavoq. Utertitsissummik ajoqersuut atuagassiap suli tamakkiisumik tapersersorpaa. (Soorlu takuuk Vagttårnet, 15. februaari 1991.) Atuagassiarlu suli tassaavoq „inussiap ilumoorlunilu silatuup“ taakkualu Siulersuisoqatigiivisa Jehovap naalagaaffianik pilersinneqarsimasumik tusarliiniutaat aamma anersaakkut inuussutissanik ’piffissaq nalliuttaraangat’ agguaassissutigisartagaat pingaarneq. — Matîuse 24:14, 45.
6, 7. Den Gyldne Tidsalder-imik suna siunertaasimava, suullu ersersippaa ullumikkut inuit eqqarsartartut atuagassiap tusarliussassaanik soqutiginnittut?
6 Iteritsi! aamma assingusumik oqariartuuteqarpa? Aamma taassuma aallaqqaammulli sallusuissut saqqummiuttagaraa. Taanna siullermik qallunaatut taaguuteqarpoq Den gyldne Tidsalder (’Piffissaq pingaartorsuaq’) naatsorsuussaajuarsimallunilu tamanut agguaattagassatut. Atuagassiap siunertaa normumi siullermi 1. oktoberi 1919 ima oqaatigineqarpoq: „Siunertaa tassaavoq ilisimassut Guutimeersoq qaammaqqutigalugu piffissami inuuffigisatsinni allanngornersuit ilumoortumik nassuiarnissaat aammalu nalunaajaatit assortorneqarsinnaanngitsut ungaqqunneqarsinnaanngitsullu atorlugit inuit isumaliorsinnaasut uppernarsaaffiginiassallugit piffissaq maanna nalliussimasoq nunarsuarmiut pilluaqqussummik annerpaamik tigusinissaannut.“ Inuit isumaliortartut Den gyldne Tidsalder-ip oqariartuutai maluginiarpaat. Allaammi ukiut arlallit ingerlaneranni atuagassiaq taanna Napasuliaq Alapernaarsuiffik-mit amerlanerusunngorlugu naqiterneqartarpoq.b
7 Napasuliaq Alapernaarsuiffik-p Iteritsi!-llu pingaaruteqaatigiinnanngilaat ajoqersuutit pillugit ilumoortunik nassuiaasaramik silarsuarmilu pissutsit siulittuutini pingaaruteqarnerat nassuiartaramikku. Aammali atuagassiaativut taakku pingaartumik ukiuni kingullerni 10-20-ni inuit uummataannik attuisarsimapput allamik pissuteqartumik.
Allaaserisat soqutiginartut ulluinnarni inuunermut tunngasut
8. Judasip allakkani qanoq ilillugit naleqqussartariaqarsimavai, ilagiillu iluanni sunniineq suna atuartiminut akiorniaqqusariaqarsimavaa?
8 Jesus Kristusip toqunerata makinneratalu kingorna ukiut 30-t missiliorlugit qaangiunneranni biibilimik allattut ilaat Judas ajornartorsiuteqalersimavoq. Angutit inuunerluttut piitaatsullu kristumiunut akuulersimapput. Judas isumaliorsimagaluarpoq kristumiut allaffiginiarlugit ajoqersuummik aalajangersimasumut tunngasumik — tassa annannissamik, kristumiut tanitaasut ataatsimoorutigisaannik. Taamaaliornanili pisariaqarsorilerpaa, anersaamit illernartumit siulersorneqarluni, atuartussani kajumissaassallugit ilagiit iluanni aserorsaarinermut akiuunnissaannut. (Jûtarse 3, 4, 19-23) Judasip isumaliutini pissutsinut naleqqussarpai piffissarlu eqqorlugu ajoqersuussivoq qatanngutimi kristumiut pisariaqartitaat naapertorlugu.
9. Ilanngutassianik ullutsinnut soqutiginartumik allassagaanni suna pisariaqarpa?
9 Taamattaaq angisuumik akisussaaffiuvoq ullutsinni soqutiginartunik atuagassiaatitsinni allaaserisaqarnissaq. Pissutsit allanngorarput, aamma inuit taamaapput — pisariaqartitaat soqutigisaallu ukiut 10-20-t matuma siorna allaapput. Nakkutilliisoq angalasartoq qanittukkut ima oqarsimavoq: „1950-ikkunni Jehovamut Nalunaajaasunngorama inuit ajoqersuutinik atuaqatiginerusarpavut — ataasiullunilu pingasuussutsimut, anniarfimmut, tarnimut il. il. tunngasunik. Maannali inuit inuunerminni ajornartorsiuteqangaarmata soorluluunniit qanoq inuunissaannik ajoqersuinnartariaqarivut.“ Sooruna taamaattoq?
10. Sooq tupaallaatigisariaqanngilarput inuiaqatigiit 1914-imiilli kinguariartuinnarnerat?
10 Biibilimi oqaatigineqarpoq ’ullussani kingullerni inuit ajortut salloqittaapiluttullu ajorsiartuinnassasut tammartitsisarlutillu tammartitaasarlutillu’. (2 Timûtiuse 3:1, 13) Taamaattumillu tupaallaatigisariaqanngilarput nunarsuarmiut kinguariarsimammata ullussat kingulliit 1914-imi aallartimmatali. Satanip kamannini inunnut annerujartuinnartumik ajoqutaatippaa. (sarĸúmersitat 12:9, 12) Tamatuma kingunerisaanik ileqqussatigut ilaqutariinnikkullu naleqartitat ukiuni kingullerni 30-40-ni nalikillerujussuarsimapput. Inuit siornatigornit upperisarsiornermik pingaartitsinnginnerulersimapput. Pinerlunniartarnerit ima nalinginnaatigilersimapput allaat inuit sillimaniarnikkut iliuuseqartalersimallutik ukiut 20-30-t matuma siornatigut takorloorsinnaasimanngisaminnik. — Matîuse 24:12.
11. (a) Apeqqutit suut inuit soqutigaat, pisariaqartitallu tamakku inussiaqatigiit aalajaallutillu silatuut qanoq qisuariarfigisimavaat? (b) Napasuliaq Alapernaarsuiffik-mi Iteritsi!-miluunniit ilanngutassiamik illit inuuninnik sunniisimasumik taasaqarit.
11 Taamaattumik tupinnarpallaanngilaq inuppassuit apeqqutinik ilaqutariinnermut, misigissutsinut isumaginninnermullu tunngasunik sammisaqarmata. Inussiat ilumoorlutillu silatuut sapiillutik tamanna malittarisimavaat Napasuliaq Alapernaarsuiffik aammalu Iteritsi! aqqutigalugit allaaserisanik soqutiginartunik saqqummiussuisarlutik inuit pisariaqartitaannik inuunerminnilu sunniuteqartissinnaasaannik paasissutissittarlugit. Marlussunnik assersuuteqariarta.
12. (a) Sooq Napasuliaq Alapernaarsuiffik-p 1980-imi ilanngutassiaq angajoqqaanut kisimiittunut tunngasoq saqqummiussimavaa? (b) Ilaqutariit ataasiinnarmik pilersuisullit pillugit ilanngutassianik pingaartitsinini qatanngutip arnap qanoq oqaatigaa?
12 Ilaqutariinnermut tunngasut. Nunarsuarmi tamarmi nalunaarusiatigut ersermat kisimiillutik pilersuisut amerleriapiloorsimasut, Napasuliaq Alapernaarsuiffik-mi qallunaatuumi 15. decembari 1980-imi naqinneqartussanngorlugit suliarineqarput allaaserisat aqqutissiuussilluartut apeqqummik uuminnga sammisaqartut: „Angajoqqaat kisermaat qanoq ilillutik ajornartorsiutitik anigorsinnaavaat?“ Allaaserisat marlunnik siunertaqarput: (1) angajoqqaat kisermaat ajornartorsiutiminnik immikkut ittunik aniguinissaannut ikiussallugit, aammalu (2) inuit allat paasissutississallugit, ’misigeqatiginnissinnaaniassammata’ aammalu ’takusaasarlutik’. (1 Pîtruse 3:8; Jâko 1:27) Atuartartut ilarpassui allattarput allaaserisanik pingaartitsinertik ersersinniarlugu. „Atuagassiap saqqaa takugakku qullikka nakkaalerput,“ anaanaq kisimiittoq allappoq, „atuagassiarlu qupperalerakku atuarlugulu uummatiga Jehovamut qujaniarnermik ulikkaarpoq, isumagisimammagu piffissaq eqqorlugu taamaattunik paasissutissinneqarnissara.“
13. Iteritsi!-mi 1982-imi isumatsassimaneq qanoq sukumiisumik sammineqarpa?
13 Misigissutsinut tunngasut. Isumatsassimaneq sammineqartarsimavoq Napasuliaq Alapernaarsuiffik-mi Iteritsi!-milu 1960-ikkunnili. (1 Tásalûníkamiunut 5:14) Kisiannili Iteritsi!-p qallunaatuup 8. januaari 1982-imi saqqummiummagit allaaserisat nutaamik isiginneriaaseqarlutillu qiimmassaarisuusut qulequtaqartut „Isumatsassimaneq ajugaaffigineqarsinnaavoq“, Napasuliaq Alaapernaarsuiffiup Peqatigiiffia silarsuarmit tamarmit qujaniutinik allaffigisaqattaarneqalerpoq. „Misigissutsikka qanoq ilillunga pappiarami oqaluttuarisinnaavakka?“ qatanngut arnaq allappoq. „24-nik ukioqarpunga ukiunilu kingullerni qulini isumatsattarnernik erloqissuteqarlunga. Maannali misigivunga Jehova qaninnerulerlugu qujassutigalugulu nikallungasut pisariaqartitaannik isumaginiarmagit allaaserisat asannittut atorlugit. Tamanna ilissinnut oqaatigerusuppara.“
14, 15. (a) Meeqqanik atornerluineq atuagassiaatitsinni qanoq sammineqarsimava? (b) Ilanngutassiat Iteritsi!-meersut suut Australiami hestimik sukkaniuttartup soqutiginartissimavai?
14 Isumaginninnermut tunngasut. Biibilimi siulittuutigineqarpoq ’ullussani kingullerni inuit inuujumaartut imminnut asasut . . . asanniuitsut, . . . nunujuitsut, qiningasut, ajunngitsunik uumissuisut’. (2 Timûtiuse 3:1-3) Taamaattumik tupaallaatigisariaqanngilarput ullutsinni meeqqanik atornerluisarneq nalinginnaaqimmat. Tamanna ammasumik unneqqarissumillu sammineqarpoq Napasuliaq Alapernaarsuiffik-mi qallunaatuumi 1. januaari 1984-imi qulequtaralugu „Atornerlugaasunut ikiuinissaq“. Ukiut arfineq-pingasut qaangiuttut allaaserisat qulequtaqartut „Meeqqanik atornerluineq — ikit qanoq mamitinneqarsinnaasut“ peqqissaartumik suliarineqarput Napasuliaq Alapernaarsuiffik-mi 1. februaari 1992-imi saqqummersumi, siunertaralugu eqqugaasut neriuutissaqalersinnissaat paasinninnissaallu aammalu allat paasissutissinnissaat tapersersuisinnaanngorlugit ikiuisinnaanngorlugillu. Allaaserisat taakku atuagassiaatitta oqaluttuarisaaneranni aatsaat taama atsigisumik atuartartunit aalassaataapput. Atuartartut ilaat allappoq: „Ajunnginnerulersimaninnut pissutaasut pingaarnerpaat tassaapput allaaserisani taakkunani isummat tuppallernartut innersuutillu Biibilimut tunngasut. Jehovap uannik nikanarnerusutut isiginninnginnera paasillugu oqiliallannaqaaq. Taamatullu tuppallernartigaaq paasillugu kisimiinngitsunga.“
15 Hestini sukkaniuttuni qimussersuusartoq Melbournemi Australiamiittumi najugaqartoq Napasuliaq Alapernaarsuiffiup Sydneymi allaffianut telefonerpoq hestinik sukkaniutsitsisarfinni pissutsit ajortut maajunnarnerarlugit. Oqaluttuarpoq Iteritsi!-mi qallunaatuumi 8. martsimeersumi allaaserisat atuaqqammersimallugit qulequtaqartut „Pinngitsaalineqarluni arneriffigisaaneq — arnap siooragisaa“. Uissuumminarnerarpaa atuagassiamik taama naleqartigisumik peqarmat. Nalunaaqquttap-akunnerata affaani apersuivoq, akissutigineqartullu nuannareqai.
16. Atuagassiaatitsinnik pingaartitsinerit illit sutigut ersersissinnaaviuk?
16 Illimmi? Inuunerit Iteritsi!-mi imaluunniit Napasuliaq Alapernaarsuiffik-mi allaaserisat ilaannit attorneqarsimava? Taamaassimappat qularnanngitsumik atuagassiaativut qujamasuutigissaqaatit. Qanorlu ilillutit pingaartitsinerit takutissaviuk? Soorunami atuagassiat normui tamakkerlugit atuartarnerisigut. Kisiannili aamma atuagassiat naleqaqisut taakku sapinngisamik annerpaamik siaruarterniarneqarneranni peqataasinnaavutit. Qanoq iliorlutit?
Allat atueqatigikkit!
17. Ilagiit atuagassianik tunioraanertik annertusisinniarlugu qanoq iliorsinnaappat?
17 Ilagiit tamarmik iliuuseqarsinnaapput. Budbringer-imi (maanna Naalagaaffimmik kiffartuuteqarneq) 1952-imi novemberimoortumi ima allassimasoqarpoq: „Suleriaaseq sunniuteqarsinnaanerpaaq tassa atuagassiat illumiit illumut aammalu pisiniarfinni agguaallugit. Taamaattumillu Peqatigiiffiup kaammattuutigaa suleriaatsit taakku aalajangersimasumik atorneqartassasut ulluni atuagassialeriffinni.“ Siunnersuut tamanna suli atorsinnaalluarpoq. Ilagiit aalajangersinnaapput aalajangersimasunik ulloqartarnissaminnik atuagassialeriffiusunik, tassa ullunik oqaluussiffiusunik pingaartumik atuagassianik agguaassiniarfiusunik. Ilagiit amerlanerit qularnanngitsumik arfininngornerit aalajangersimasut inniminnerumassavaat. Aap, ilagiit ullut imaluunniit unnuit immikkut ittut atuagassianik agguaassiniarnermut atorsinnaavaat — illumiit illumut, pisiniarfimmiit pisiniarfimmut, aqqusinermi aammalu atuagassianik pajuttuiffinni. Illit oqaluussisartutut qanoq iliorsinnaavit atuagassianik tunioraasarneq annerulersikkumallugu?
18, 19. (a) Atuagassianik atuinissamut eqqumasuuneq qanoq iluaqutigissavarput? (b) Naatsumik pivisorsiortumillu atuagassianik saqqummiineq qanoq iluaqutaava? (c) Atuagassiat inuit angerlarsimafiinut anngunnissaata naleqassusia suup takutippaa?
18 Atuagassianik atuinissamut eqqumagit, siunnersuut siulleq taamaappoq. Atuagassiat atuaqqaartakkit. Allaaserisaq atuaraangakku imminut aperisarit: ’Kia allaaserisaq taanna soqutiginartissavaa?’ Oqaaserisinnaasatit eqqarsaatigikkit allaaserisaq soqutigineqartilersinniarlugu. Ullormi atuagassianik agguaaffiusumi peqataanerpit saniatigut aamma nammineq atuagassianik nassartuaannarit, periarfissat tamaasa atorlugit atuagassiat allanut neqeroorutigisinnaaniassagakkit — angalagaangavit pisiniaraangavilluunniit, aammalu oqaloqateqaraangavit suleqatinnik, sanilissinnik, atuaqatinnik ilinniartitsisunnillu.
19 Paasiuminartumik pigit, siunnersuutip aappaa taamaappoq. Napasuliaq Alapernaarsuiffik qallunaatooq 1. apriili 1957-imi saqqummersoq ima allaaserisaqarpoq: „Pitsaanerpaavoq sivikitsunnguamik piviusorsiortumillu oqalulluni allaqqaasiissalluni atuagassianik neqerooruteqaleraanni. Siunertaq tassa atuagassiarpassuarnik tunioraanissaq. Taakku namminneq sinnera oqaatigiumaarpaat.“ Oqaluussisartut ilaasa sunniuteqarluarnerartarpaat allaaserisat ilaannit eqqarsaatinik saqqummiussillutik, oqaatsinik ikittunnguanik oqaatigalugu atuagassianik tunniussinialernerminni. Atuagassiat illumut eqqunneqareeraangamik immaqa inunnut amerlanerusunut „oqalussinnaasassapput“. Ilaannigooq Irlandimi ilisimatusarfimmi ilinniartut arnat ilaata Napasuliaq Alapernaarsuiffik 1. september 1991-imoortoq atuarpaa, sunaaffa angutaata oqaluussisartumit pisimasaa. „Attaveqatigiinneq“ allallu pillugit allaaserisat soqutigilerpai. Atuagassiaq atuareerniariarlugu Jehovap Nalunaajaasuinut sianerpoq telefonillit allattorsimaffianni ujariarlugit. Erniinnaq biibilimik atuaqqissaaqatigineqalerpoq, arnarlu inuusuttoq kuisippoq ataatsimeersuarnermi qulequtaqartumi „Guutimit ajoqersorneqartut“ juulimi 1993-imi. Tamatigut iliuuseqarniartariaqarpugut atuagassiat angerlarsimaffinnut isertinniarlugit, tamakkunani inunnut „oqalussammata“! Nakkutilliisoq angalasoq pisariitsumik siunnersuuteqarpoq ima: „Atuagassiat pooqattannit amuniakkit.“ Oqaatsitit pulaakkannik soqutiginnilersitsinngippata atuagassiap saqqaata assiliartaa kusanartoq immaqa soqutiginnilersitsissaaq.
20, 21. (a) Atuagassianik siaruarterinermi qanoq ililluni eqaatsumik periaaseqartoqarsinnaava? (b) Qaammatit tamaasa atuagassianik amerlanerusunik siaruarterisalersinnaajumalluni qanoq iliortoqarsinnaava?
20 Siunnersuutit pingajuat imaappoq: Eqaatsumik periaaseqarit. (Naleqqiuguk 1 Korintumiunut 9:19-23.) Aallarniutinik sivikitsunik marlussunnik piareersaagit. Allaaserisaq ataaseq angutinut atussallugu eqqarsaatigiuk, alla arnanut. Inuusuttuaqqanullu atorsinnaavatit allaaserisat „Inuusuttut aperipput“. Aamma eqaatsumik periaaseqarit qaqugukkut atuagassianik agguaassinermut peqaataasarnissatit eqqarsaatigalugit. Ullup atuagassianik agguaassiffiup saniatigut immaqa unnukkut oqaluussineq periarfissarisinnaavat illumiit illumut atuagassianik neqerooruteqarnissamut.
21 Siunnersuutit sisamaat: Nammineq anguniagaqarit. 1984-imi martsimut Rigets Tjeneste-mi allaaserisami qulequtaqartumi „Atuagassiat inuunermut aqqummik tikkuussipput“-mi ima allassimasoqarpoq: „Oqaluussisartut anguniarsinnaavaat qaammammut atuagassianik soorlu 10-nik tunniussisarnissartik, soorunami namminneq pisinnaasartik naapertorlugu, pionerillu anguniarsinnaavaat 90-inik tunniussisarnissartik. Oqaluussisartut ilaasa soorunami atuagassiat amerlanerusut agguaassinnaavaat taamaattumillu namminneq amerlanerusunik anguniagaqarsinnaallutik. Allat ikinnerusunik anguniagaqarsinnaapput peqqiilliornertik, angalaartarfimminni pissutsit allalluunniit pissutigalugit, Jehovamut kiffartuussinertik tamanna pissutigalugu ajornerulersinngikkaluarlugu. (Matîuse 13:23; Lúkarse 21:3, 4) Pingaartoq tassaavoq nammineq inuttut anguniagarnissaq.“
22. Sukkut takutissinnaavarput atuagassiaatitsinnut soqutiginartunut Jehova qujamasuffigalugu?
22 Qujamasuffigaarput Jehova, „sallusuissutip Guutia“, inussiat ilumoorlutillu silatuut taakkualu Siulersuisoqatigiivi atorsimammagit atuagassianik soqutiginartunik taakkuninnga pilersorneqartilluta! (Tuss. 31:6, NV) Jehovap kissaatigippagu atuagassiat taakku inuit ilumoorlutik pisariaqartitaannik tuniuassavai. Jehovap ileqqussatigut piumasaanik angisuunik ilungersuutiginnissapput. Soraassanngillat ajoqersuut ilumoortoq siuarsarniarlugu, kisiannili ilisimatitsissutigiuassavaat Guutip naalagaaffia aqutsimmat aammalu Jehovamut pallorfiginnittut amerliartuinnartut Guutip nunami piumasaanik iliormata siornatigut nalisineqanngitsumik. (Matîuse 6:10; sarĸúmersitat 11:15) Nalilissuarnik erlinnartuuteqarpugut Napasuliaq Alapernaarsuiffik-mi Iteritsi!-milu. Periarfissaq sunaluunniit atorlugu inuit isumagissut atuagassianik pingaartunik taakkuninnga tunisartigit, atuagassiat inuit inuunerannik attuimmata aammalu Guutip naalagaaffianik sallusuissutit illersormagit.
[Quppernerup ataani ilanngussat]
a 15. juuli 1992, qupp. 19-22.
b Ukiorpassuarni Napasuliaq Alapernaarsuiffik isigineqarpoq kristumiunut tanitanut immikkut sammisutut. 1935-miit pingaartinneqalerpoq ’amerlangaartut’ nunami naassaanngitsumik inuunissamik neriugisaqartut kajumissaassallugit Napasuliaq Alapernarsuiffik-mik pisarnissaannik atuartarnissaannillu. (sarĸúmersitat 7:9) Ukiualunnguit qaangiuttut, tassa 1940-mi, Napasuliaq Alapernaarsuiffik aqqusinermi inunnut neqeroorutigineqartalerpoq. Tamatuma kingorna naqiterneqartartut amerliartupallapput.
Qanoq akissavit?
Suut takutippaat Napasuliaq Alapernaarsuiffik Iteritsi!-lu sallusuissummik saqqummiussisartut?
Napasuliaq Alapernaarsuiffik aamma Iteritsi! qanoq inuit inuunerannut sunniisimappat?
Atuagassiat siaruartikkat amerlisinniarlugit ilagiit qanoq iliorsinnaappat?
Siunnersuutit suut iluaqutigalugit atuagassianik amerlanerusunik siaruarterisalersinnaavugut?
[Qupp. 25-mi ungalusaq]
Ilanngutassiat inuit inuunerannik sunniisimasut
Ukiut ingerlaneranni inuppassuit allattarsimapput Napasuliaq Alapernaarsuiffi-mi Iteritsi!-milu allaaserisanik qujamasuutiginnillutik. Matuma ataaniipput allaaserisat atuagassiat taakku atuartartuinut sunniisimasut ilamininngui. Immaqa aamma illit sunniuteqarfigisimavaatsit?
Napasuliaq Alapernaarsuiffik
„Sanngiissutit ersinngitsut ajugaaffigikkit Guutip ikiuineratigut“ (15. apriili 1985, qallunaatooq).
„Angajoqqaavut utoqqalisut qanoq ililluta Guutimut tunniusimanermik takutitsivigisinnaavavut?” (1. juuni 1987, qallunaatooq)
„Ilinniagaqarneq — ataatsimik siunertaqarluni“ (1. novemberi 1992, qallunaatooq)
Iteritsi!
„Isumatsassimaneq anigorneqarsinnaavoq!“ (8. januaari 1982, qallunaatooq)
„Asasamik annaasaqaraanni“ (8. augusti 1985, qallunaatooq)
„Meeqqatit illersorniakkit!” (Oktoberi-decemberi 1993)
[Qupp. 26-mi assiliartaq]
Canadami atuagassiat atorlugit illumiit illumut oqaluussineq