Inissiarsuarnit inuilaamut — inunnut tamanut oqaluussisa

AALAJANGERSIMASSUSIAT sialummit, apummit, nataqqornanit, amaqqunit, puumanit inuilluunniit akeqqersimaarnerannit qasukkartinneqarsinnaanngilaq. Tupinnaannartumik sukkassuseqarlutik 3000 kilometerisut isorartussusilik hesterlutik pangallussiinnaq ingerlavigisarpaat, narsaannarsuakkoortarlutik, kuussuit supisut ikaartarlugit qooqqullu itisuut aqqusaartarlugit Amerikap kitaata sineriaanut pingaarutilinnik allakkisarlutik. Kikkunuku pineqartut?

Hesterlutik allakkisartartut inuusuttut sapiitsut pineqarput.a Sunaana pillugu angutit inuusuttut taakkua taama aalajangersimatigisimasut? Qularnanngitsumik allakkanik apuuffissaannut anngussiniaanerup unamminiarnartui, pissanganartui nalerisimaarnartuilu pissutigalugit. Soqutiginarpoq hestersut tamarmik allakkisaatimik saniatigut biibilimik pooqattaminniititaqartarsimammata.

Ukiut 100-nit amerlanerusut qaangiunneranni Canadami Guutip naalagaaffianik oqaluussissutiginnittartut 113.000-init amerlanerusut ilungersuussilluartut aalajangersimassutsimik, angorniornermik akisussaaffimmillu misiginermik suli annerusumik ersersitsisarput. Sumik pissuteqartumik? Guutimik tullerminnillu asanninnertik kajumississutigalugu Guutip naalagaaffia pillugu sallusuissut naqitat oqaatsitillu atorlugit siaruartertarpaat. Sallusuissut inuunermik nassatalik tamanna hesterlutik allakkisartartut allakkisaataannit pingaarneroqigami nukinginnarnerujussuuvoq. Guutip naalagaaffia pillugu tusarliussassaq nuanningaartoq Biibilimi, atuakkami hesterlutik allakkisartartut pooqattarmiorisarsimasaanni, nassaassaasoq pineqarpoq. — Ussatit 2:21, 22; Jesaja 2:2-4; 61:2; Matîuse 22:37-39; 24:14.

Jehovamik inoqatiminnillu asanninnerminnit killinneqarlutik

Jehovap nalunaajaasuisa Guutip naalagaaffia pillugu inunnik oqaloqateqassallutik nuannarisarpaat. Taamaattumik inissiarsuarni, inuilaami, timmisartoqarfinni, aqqusinerni allanilu oqaluussisarput, aamma oqarasuaatikkut. Sooruna sumi tamaani periaatsillu assigiinngitsut atorlugit oqaluussisartut?

Inuit angerlarsimaffiini naapinniarnissaat unamminiarnartorujussuuvoq, aningaasatigut inuttullu atugarisatigut allanngornerit pissutigalugit amerlasuut inooriaatsiminnik allannguisimammata. Amerlasuutigut uiusoq nuliaasorlu tamarmik suliffeqartariaqartarput ilaqutariit timikkut pisariaqartitaannik pilersorsinnaajumallugit, taamaalillunilu anersaakkut pisariaqartitat sumiginnarneqarajullutik. Inuit pissutsini tatineqarnartuni taama ittuni neriuummik nuannaajallannartumik Biibilimiittumik assut pisariaqartitsisarput. Jehovap nalunaajaasuisa nuannaarlutik inuit tamatuminnga oqaluttuukkusuttarpaat. Nutaarsiassap nuannersup inunnut assigiinngitsunut tamanut tusaruminartumik eqqarsalernartumillu tusarliunnissaanut periarfissanik isumatusaarnermikkut inussiarnernermikkullu pilersitsisarput. — 1 Timûtiuse 2:3, 4.

Oqaatsit allat atorlugit: ’Aallarnissaminnik inunnillu ajoqersuganngortitsinissaminnik’ Jesusip peqqummatik ajoqersugai inunnut inuiannit tamaneersunut neriuummik tusarliinermikkut iliuuseqarusussutsimik aalajangiusimanninnermillu takutitsinissaminnut periarfissarsipput. (Matîuse 28:19) Nunani allarpassuarnisut Canadami innuttaasut assigiinngitsorpassuarnik kultureqarlutillu oqaaseqarput, taamaammallu Guutip naalagaaffianik oqaluussissutiginnittartut ilarpassui oqaatsinik allanik ilinniarnermikkut tamatumunnga naleqqussarsimapput.

Assersuutigalugu, aappariit piffissaq tamaat oqaluussisartuusut Edmontonimi Albertamiittumi najugallit paasisimavaat tamaani mandarinisut oqaasilinnut oqaluussisussanik pisariaqartitsineqartoq. Oqaatsilli taakku ilinniaqqaartariaqarpaat. Taamaattumik universitetimi ilinniartumut mandarinisut oqalussinnaasumut saaffiginnipput. Taassuma ilinniartikkusuppai, tamannalu ilutigalugu nammineq sallusuissummik Biibilimeersumik ilinniartinneqarusulluni. Ilaa torrak! Ukiut marluk qaangiutinngitsut aappariit mandarinisut oqaluussisinnaalerput, kiisalu ilinniartitsisoralugulu ilinniartitaat kristumiutut kuisissinnaalerluni.

Illoqarfinni allani misigisat assingusut pisarput oqaluussisartut asanninnerminnit killinneqarlutik assersuutigalugu Polenimiusut, russisut Vietnamimiusullu oqalussinnaaleraangata.

Aqqusinerni: Soorlu 1800-kkunni hesterlutik allakkisartartut kisimiillutik allakkisartarsimasut, oqaluussisartut British Columbiap qeqqata tungaaniittut ilaat assut kisimiittarput. Taakkua ilarpassui assartuussuarnik biilerlutik orpinnik orpippassuartigut eqimasutigut pilattuisarfimmukaassisarnermik suliaqarput. Taamatut sulinerminni biilerlutik assartuussisartullu allat aqqusinerni pissutsit ajutoornerillu pillugit radioaqqakkut paasissutisseeqatigiittuartariaqartarput.

Oqaluussisartut suliniarluartuugamik radioaqqanik atorluaaniartarput. Radioaqqakkut suliaminnut tunngasunik paasissutisseereeraangamik Biibilimut innersuussiniartarput. Assartuummik biilertup ataatsip toqusimasut pillugit neriuut Biibilimiittoq ajunngitsumik qisuariarfigisimavaa. (Juánase 5:28, 29; apustilit suliait 24:15) Suleqataasa ilaat aqqusinermi ajutoornermi ajunaarsimavoq, tamannalu assut aliasuutigisimavaa. Biibilimik atuaqqissaaqatiserineqarnerminut qujamasulluni akuersivoq, maannalu suleqatiminut ikinngutiminullu nutaarsiassaq nuannersoq oqaluussissutigisarpaa. Nuannaaqaaq ikinngutigigaluami uillarnera aamma Biibilimik atuaqqissaartalermat. Sallusuissummik tusarliussaq inuunartoq immikkut ittumik periaaseqarluni tusarliunniarlugu iliuuseqarsimanerup tassa akissarsiassartaa angingaartoq!

Timmisartumik: Guutip naalagaaffianik oqaluussissutiginnittartut ilungersuussilluartut ’nunaqarfinni’ inuit najugaanni sallusuissummik tusarliussamik nuannersumik tusarliiniarnerminni ilaannikkut timmisartut atortariaqartarpaat. (Matîuse 10:11, 12) Ungasissorsuunngitsukkut oqaluussisartut ilungersuussilluartut eqimattat marluk, namminneq akilikkaminnik, timmisartorlutik nunami avinngarusimasumi isorartuumilu najugalinnut siamasissunut oqaluussiartorput. Timmisartut marluk qaasuitsup killeqarfianit 250 kilometerisut ungasissusilimmi 3000 kilometerit missaanni isorartutigisoq timmiffigaat inoqarfinnut assigiinngitsunut 14-inut mittarlutik. Oqaluussisartut qasujuitsut taakkua ulluni arfineq-marlunni ingerlaartuarput inuit nunarujussuarmi tamaani avinngarusimallutik inuusut tikikkumallugit.

Ilungersornerat kinguneqarpa? Aap, Biibilip tusarliussaa inunnut tamaani najugaqartunut ajunngitsumik sunniuteqarpoq. Oqaluussisartut Jehovap ungasinngitsukkut nunarsuarmik paratiisinngortitsinissaa nassuiaramikku inuit anersaakkut pisariaqartitaat pingaartoq matussutissippaat. (Matîuse 5:3) Oqaluussisartut aallarnerata kingunerujussuagut inuiaqatigiinnguani tamakkunani inuit peqqusersuitsut atuagassiat 3000-it, biibilit naqitallu Biibilimik atuaqqissaarnermut ikiuutissat allat 542-t pisimasatik atuarsinnaavaat. — Naleqqiuguk apustilit suliáinik agdlagkat 12:24.

Oqarasuaatikkut: Illoqarfinni inuit tuusintilikkuutaat inissiarsuarni isumannaallisagaaqisuni najugaqarput. Taamaakkaluartoq oqaluussisartut ilungersuussillutik isumatusaarlutillu suliniartuarsinnarput. Inuit inissiarsuarni taama ittuni najugaqartut qanoq ilillutik naapinniartarpaat? Soorunami najugaqartut kiinarsillugit oqaloqatigerusunnerusarpaat, tamannali ajornaraangat inissiarsuit silataanni oqaluttaatit atortarpaat. Tamannalu ajornaraangat oqarasuaatit atortarpaat.

Ilaanni ullaap-tungaa arnap utoqqasaap oqarasuaat tigorpallappaa. Naatsumik inussiarnersumik ilassereeramiuk oqaluussisartup arnaq utoqqasaaq aperaa upperineraa piffissaq unnukkut aqqusinermi angalaarnissamut ersisariaaruffissaq nalliukkumaartoq. Oqaluussisartup allassimaffiit atuarpai pissutsit eqqissinartut atuutilingajalernerannik qularunnaarsinniarlugu. (Tussiaat 37:10, 11; Daniel 2:44; Matîuse 6:9, 10) Arnaq akuersivoq oqaluussisartup neqeroorfigimmani sapaatip-akunnerata tulliani taamaalinerani sianeqqissalluni sooq Guutip neriorsuutai upperisinnaagivut pillugu oqaloqatigiumalluni. Qaammammi ataatsimi oqarasuaatikkut oqaluussisartup Biibilimik atuaqqissaaqatigereeraani, atuakkami Biibilimut tunngasumi immikkoortut atuartarlugit pitsaasunillu apeqquteqartarluni, arnap oqaluussisartoq nersualaarpaa sapaatit-akunneri tamaasa sorpassuarnik oqaluussiffigisimammani. Maanna piffissanngorpoq atuakkap Biibilimut tunngasup arnamut ilisaritinnissaanut neqeroorutiginissaanullu. Naapinnissartillu isumaqatigiissutigaat. Aap, Jehovap nalunaajaasuisa tullerminnik asanninnertik ersersittarpaat, inuillu ilaasa tusarnaartarpaat paasisimagamikku kristumiut oqaluussisartut taakku Jehovap ikiortarai. — Naleqqiuguk Korintumiunut agdlagkat sujugdlît 14:25.

Naqitat ikiortigalugit: Oqaluussisartuttaaq franskisut oqaaseqarfiunerusumi Quebecimiittut inuit kiinarsillugit naapinniartarpaat. Nakkutilliisoq angalasartoq oqaluttuarpoq: „Ukiorpassuarni qatanngutit misigisimapput suliartik uninngasoq oqaluffeqarfiup sakkortuumik akerlilersuinera pissutigalugu. Qatanngutilli qasujuillutik suliuarnerat pulaaqattaartuarnerallu pisuulluni Biibili, ilisimaneqarsimanngikkaluartoq ikittuinnarnillu atuarneqartarsimagaluartoq, angerlarsimaffiit amerlanersaanni maanna pigineqalersimavoq.“

Quebecimi inuit innuttaasut inissisimaffiinit assigiinngitsunit tamaneersut, ilaatigut nakorsat, oqaluussisartunngorlaat pillugit nuannersunik pissanganartunillu oqaluttuassaqarpoq. Nakorsap nuliata Jehovamut nalunaajaasuusup uini neriuummik Biibilimiittumik oqaluussiffigillattaasarsimavaa. Ilagiinni utoqqaanertap eqqumaniartup ilagiinni atuagassiaaqqap Hvordan kan blod redde dit liv?-imik (Aak qanoq ililluni inuuninnik annaassisinnaava?) taaguuteqartup atuaqqissaaqatigiissutigineqarnerata nalaani nakorsaq ilagiit ataatsimiinnerannut qaaqquaa. Nakorsaq aggerpoq, allaallu peqataalluni. Ataatsimiinnerup aaqqissuulluagaassusia saqqummiunneqartullu anersaakkut pissarsiaqarnassusiat nakorsap maluginiartorujussuuaa, taamaattumillu Biibilimik atuaqqissaaqatiserineqarnerminut akuersilluni. Maanna oqaluussisartuuvoq.

Oqaluussisartut atuagassianik atuilluaraangata inuit ilarpassui Biibilimik soqutiginnilertarput. Siumut oqaatigereerneqarsinnaaneq ajorpoq allaaserisaq sorleq inunnik sallusuissummut kajungilersitsissasoq. Oqaluussisartup saniliminut tusarliussamik Biibilimeersumik tusarusunngitsumut sullinernilli soqutigisalimmut Iteritsi!-p normua ataaseq neqeroorutigisimavaa. Iteritsi!-p tuluttuuani 22. novembari 1992-imoortumi allaaserisaq ’Chagasip nappaataa toqussutaasoq’ (kalaallisuunngortitaanngitsoq, qallunaatuunngortitaallunili) alapernaasilissutigaa. Atuakkani soqutiginartittorujussuuai, aperalunilu atuagassianik allanik peqqissinnaanerluni. Biibilimik atuaqqissaaqatigineqartalerpoq, ukiullu affaa qaangiutinngitsoq allanut oqaluussisaleriikatappoq.

Sumi tamaani: Canadamiut inatsisaat naapertorlugit sumi tamaani, aamma timmisartoqarfinni, oqaaseqarsinnaanermut kiffaanngissuseq atuuppoq. Oqaluussisartut periaaserillutik Halifaxip nunanut tamalaanut timmisartoqarfiani angalasunik oqaloqatiginninniartarput. Apeqqutit naleqqulluartut Biibilimut sangutitsisinnaasut atortarpaat. Biibilinik atuagassianillu kaasarfimmiorineqarsinnaasunik nassartarput taamaalillutillu inuit anersaakkut pisariaqartitaannik matussutissiinissaminnut periarfissaqartarlutik. Ilaatigut pilattaasartut, ilisimatuut, eqqartuussissuserisut, timmisartortartut, palasit, politiit, taxartartut, ingeniørit, ilinniartitsisut, sakkutuut politikerillu nunanit allaneersut timmisartoqarfimmi oqaluussisunit Guutip naalagaaffia pillugu tusarliussamik tusarlerneqarsimapput, taamaalillunilu sallusuissutip naatsiiassartaa nunani ungasissuni naasinnaalersimavoq. — Kulorsamiut 1:6.

Ilaanni ullaaralaaq Halifaxip nunanut tamalaanut timmisartoqarfiani angut Napasuliaq Alapernaarsuiffik-mik Iteritsi!-millu tunineqarpoq, imminulli ima oqarfigaluni: „Ajja, Jehovap nalunaajaasui?“ Sooruna taamatut qisuariartoq? Angut musliimiulluarniartuuvoq timmisartoqarfiullu qinusarfiani qinoqqammerluni. Guutimut ilungersorluni qinoqqammerpoq ilisimassummut, siuneqarsutsimut sallusuissummullu siulersoqqulluni. Jehovap Nalunaajaasui qinnutiminut ingerlaannaq akissutaasinnaanersut ilimagisimanngilluinnarpaa.

Canadami oqaluussisartut sapiitsut Guutip naalagaaffia pillugu tusarliussap nuannersup tusarliunnissaanut sunaluunniit akornutigiumaneq ajorpaat. Oqaatsit, aqqusernit maniitsut, inoqarfiit avinngarusimasut inissiarsuilluunniit isumannaallisagaaqisut uniinnassutigineq ajorpaat. Guutip tusarliuteqqusaata inuunartup inunnut peqqusersuitsunut sallusuissummillu ujarlersunut tusarliunnissaa aalajangiusimalluinnarpaat. Nunarsuaq tamakkerlugu qatanngutigiissuit peqatigalugit namminissarsiunngissuseqarlutik Jesusip ’aallaqqusinera ajoqersuganngortitseqqusineralu’ naalappaat. — Matîuse 28:19. (wE 15/4 98)

[Quppernerup ataani ilanngussaq]

[Qupp. 27-mi ungalusaq]

Oqarasuaatikkut oqaluussineq

Ilaat ima oqartarput: „Aluu, [imaattukkunniuna]? [Ateq kinguliarlu]-mik ateqarpunga. Ilisarisimanngilarma, sianertungaana nammineerlutit naapissinnaasimannginnakkit. Ilinnununa oqaloqatigiissutigerusullugu eqqissineq nunarsuarmi qanoq ililluni atuutilersinnaasoq. Illit isumaqarpit nunarsuarmi eqqissineqarumaartoq? [Oqaloqatigisat akili.] Biibilimi neriorsuutigineqarpoq Guutip pissutsit eqqissinartut atuutilersikkumaarai. Biibilimi allassimaffimmik atuffatilaarsinnaavakkit?“ Biibili pillugu oqaloqatigiinneq ingerlatiinnaruk. [Soqutiginnippaluppat aperisinnaavat: „Arlaanni naapissinnaavakkit?“ Naapinnissaa ajornakusoorpat oqarsinnaavutit: „Ajunngila angerlarsimanngikkuit atuagassiamik oqaluuserisatsinnut tunngasumik allakkanut nakkartitsivimmut nakkartitsiguma?“] Atuagassiaq allakkap puuanut ikiuk ILLIT NAMMINEQ najukkat tunuanut allallugu.

Allat oqartarput: „Aluu. [Ateq kinguliarlu]-mik ateqarpunga. Sanilitit oqaloqatigigakkit ilarpassui ernumapput najugaqarfimminni nakuusernerup pinerlunniartarnerullu annertusisimanerat pissutigalugu. [Tamanna tamaani ajornartorsiutaappat.] Aamma illit tamanna ernummatigaajuk? [Oqaloqatigisat akili.] Isumaqarpit piffissaq inuit tamarmik toqqissisimalerfissaat nalliukkumaartoq?“ Oqaloqatigisat oqaaseqarli, Biibililu pillugu oqaloqatigiinneq ingerlatiinnarsiuk.