Telefonforkyndelse — amerlasuut angunissaannut

¹ Ersarippoq ’ulluni kingullerni’ inuusugut. (2 Tim. 3:1) Qularnanngitsumillu aamma piffissaq Naalagaaffimmik oqaluussiffissaq ajoqersuganngortitsiortorfissarlu sivikitsuinnaavoq. Taamaattumik sapinngisatsinnik iliuuseqartariaqarpugut inuit allat ikiorlugit Jehova Guutimik pallorfiginnittunngornissaannik iluarisaasut.

² Apustilip Paulusip uppernerminik tamanut nalunaarutiginninnissani nammineq inuttut akisussaaffittut misigisimavaa. (Rûm. 10:10) Nalunngilaa Guutip piumasarigaa inuit inuiannit tamaneersut annassasut eqqorluartumillu ilisimassuseqalissasut. (Tim. 2:4) Sallusuissut pillugu ilisimassuseqarnermi kingunerisaanik Paulus kikkunnut tamanut akisussaasutut misigisimavoq. Taamaattumik aamma misigiartuinnarsimavoq tusagassamik nuannersumik oqaluussissutiginninnissaq pisariaqarluinnartuusoq. Ima oqarsimavoq: ’Taamaammat uanga kajumikkaluarpunga . . . iivangkiiliu oqaluutigiumallugu. Iivangkiiliumi ittoorutiginngilara Guutimit pissaataammat uppertut tamarmik annassutissaat.’ — Rûm. 1:14-17.

³ Uaguttaaq taamatut akisussaasutut misigisimavugut, uagullu oqalussiffigisartakkatsinniittut tamaasa anguniarlugit taama ilungersortigisarpugut? Soorunami illumiit illumut imaluunniit sumi tamaani oqaluussisarnitsinni pisarnitsitut inuit tikillugit oqaloqatigerusunnerusarpavut, tamannali naammappa? Immaqa oqaluussiffigisartakkatsinniittut ilarpassui Jehovap nalunaajaasuinik siornatigut oqaloqateqarsimanngisaannarput. Soormitaava?

⁴ Oqaluussiffigineqarsimanngitsut: Oqaluussiffigisartakkassinni inissiarsuaqarpa immikkut isumannaallisagaasunik matumiit matumut oqaluussinissamik ajornalersitsisunik? Oqaluussisartut sakkutooqarfinnut inissianulluunniit pigineqartunut isernissaminnut akueriumaneqanngillat? Taamaappat qularnanngilaq tamakkunani ineqartut ilaasa Guutip naalagaaffiata naammassiumaagassaanik tusarsimanngisaannarnissaat. Aammalu immaqa ilaqarput angerlarsimatillugit naapinneqarsimanngisaannartunik.

⁵ Inuit taakku naapikkuminaakkaluarpataluunniit uniinnassanngilagut. Pissutsit tamakku Jehovap qanoq isigai? Apustili Peter allassimavoq Jehovap kissaatigigaa kikkut tamarmik annassasut isumataassasullu. (2 Pitr. 3:9, 15) Inuit inuunerat pineqarpoq, Jehovallu inuit tamaasa immikkut soqutigai. (Mat. 18:14) Misiginneqataassuseq naakkinnissuserlu Jehovap inunnut ataasiakkaanut ersersitaa qanoq ililluta uagut ersersissinnaavarput? Oqaluussiffigisartakkatsinni najugallit tamarluinnaasa nalunaajaaffiginiarnerisigut. — ap. sul. 20:20, 21; sark. 14:6, 7.

⁶ Nalunaajaaqqissaarnissamut aaqqissugaasut: Napparsimaneq timikkulluunniit innarluuneqarneq pissutigalugu angerlarsimaannartut angerlarsimaannarallartulluunniit oqarasuaat atorlugu oqaluussisarnissaannik Peqatigiiffiup ukiut ingerlaneranni kajumissaartarsimavai. Sulilu taamaaliortarnissaannik kajumissaarneqarput. Paasinarsisimavorlu qatanngutit, ilaatigut pionerit ikiorti-pionerillu, illumiit illumut oqaluussisarnerminnut nalinginnaasumut tapiliullugu oqarasuaat atortaraat.

⁷ Ilagiit ilaanni qatanngutit peqatigiillutik oqarasuaatikkut oqaluussisarneq aaqqissuussimavaat. Utoqqaanertat oqaluussiffiusartunik aaqqissuussilluartuugaangata namminnerlu peqataanermikkut oqaluussisartunilluunniit allanik peqataaqqusinermikkut oqaluusseriaatsimik tamatuminnga tapersersuisuugaangata kinguneqarluarnerusarpoq. Kiffartornermik nakkutilliisoq suliamik tamatuminnga siulersuinissamut akisussaasuuvoq. Aammali utoqqaanertat ataatsimiititaat utoqqaanertamik piukkunnaatilimmik imaluunniit ilagiinni kiffartortumik akisussaassusermik misigisisaqarluartumik toqqaasinnaapput kiffartornermik nakkutilliisoq qanimut suleqatigalugu kiffartornermik immikkut ittumik tamatuminnga aaqqissuussisinnaasumik.

⁸ Oqaluussisartut kisikkunnaarsimasut oqarasuaatikkullu oqaluussinermik ileqquliussisimasut paasisimavaat taamaaliorneq ajunngitsumik kinguneqarsinnaasoq. Immaqa aallaqqaammut oqaluussisartut pionerillu ikittuinnaat oqarasuaatikkut inunnut oqaluussinermut peqataassapput. Taakkuali sungiussinerujartuinnartillutik angorniornerujartuinnarunik ajunngitsunillu angusaqarlutik allat peqataalernissaannik kajumissisitsissapput.

⁹ Qanoq aallartissaagut? Immaqa inissiarsuit silataanni najugaqartut allattorsimaffiat ikiortigalugu atii paasineqarsinnaapput. Taava oqarasuaatit allattorsimaffianni ujarneqarsinnaapput. Immaqaluunniit atuakkanik atorniartarfimmi kommunemi najugaqartut tamarmik aqqisa najuagaasalu allattorsimaffiannik peqarpoq. Ilaatigullu aamma najugaqartut oqarasuaataasa normui allassimasarput. Tamakkuninnga kupeerilluni oqarasuaatikkut oqalussisarfimmik pilersitsisoqarsinnaavoq. Oqarasuaatikkut oqaluussisarfiit angisoorsuussanngillat.

¹⁰ Oqaluussinermi allattueqqissaarneq tamatigut pitsaasuuvoq. Aamma oqarasuaatikkut oqaluussinermi. Paasissutissat iluaqutaasut illumiit illumut allattuiffimmut allattoqqissaartakkit, soorlu suna oqaluuserisimagissi, oqaluussap qanoq soqutiginnitsiginera, tullianillu suna oqaluuserissagissi. Aamma allattaruk tulliani oqaloqatigiinnissaq oqarasuaatikkut pissanersoq imaluunniit aggissanerlutit.

¹¹ Pilersaarusiorneq pisariaqarpoq: Oqarasuaatikkut oqaluussinermut aalajangersimasumik peqataasaruit annilaangajunnaariartussaatit. Pitsaaneruvoq piffissami inuit angerlarsimanissaata ilimanarneruffiani sianerluni, soorlu unnulernerani weekendimiluunniit. oqaluusseriaatsimut tamatumunnga sapaatit-akunneri tamaasa piffissamik immikkoortitsisarit. Ilaasa paasisimavaat atuakkamik atuaqqissaaqatigiinnissaq sioqqutitsiarlugu sianerneq kinguneqarluartartoq. Nammineq paasiartuaassavat illit oqarasuaatikkut oqaluussiffigisartakkanni suna pitsaanerunersoq.

¹² Qanoq piareersarsinnaasutit: Oqarasuaatikkut oqaluussisartut allat oqaloqatigisakkit isumassarsiffigiumallugit. Nukissannik siulersuinissaanillu Jehova qinnuigisaruk. (Tuss. 27:14; Fil. 4:13) Kiffartornerup ilaatut allatulli tamakkiisumik uummateqarlutit suliamut tamatumunnga peqataanissat aalajangiusimajuk. — Naleqqiuguk Mak. 12:33.

¹³ Misilittakkat ersersippaat nerriviup allaffiusup assigisaataluunniit saani issialluni oqarasuaatikkut oqaluussineq pitsaanerusoq. Ilorrisimaarnarpallaarsuunngitsumilu issiaguit eqqarsarluarsinnaanerussaatit. Atuagassiat atugassatit tamaasa saqqummeqqakkit — naqitaaqqat, qaammammi neqeroorut, Biibili, ’Ræsonnerebogi’, atuagassiat nutaat nutaannginnerusulluunniit immikkut soqutiginaatillit, ilagiit ataatsimiittarnerinut qaaqqusissut rigssaalillu sumiiffia, aqerluusaq allattuiffissallu. Atuagassiat inornanngitsumut ilikkit, immaqaluunniit aalajangersimasumik quppersimatitsigit. Qanoq oqassallutit sungiusartaruk. Eqqarsaatigissavat oqaloqatiginninnerpit siunertarimmagu nalunaajaateqarnissaq sapinngisamillu piaartumik pulaarnissannik isumaqatigiissuteqarnissat.

¹⁴ Oqaloqatigiinneq: Eqqissisimagit. Inussiarnersumik tusaajuminartumillu oqalunnissat pingaaruteqarpoq. Qungujulaguit nipikkut tusarneqarsinnaassaaq. Arriitsumik ersarissumillu oqalugit. Inussiarnernisaarit naammagittarillu. Ilassineqanngitsoornissat annilaangageqinagu. Tusagassamik inuit immaqa soqutiginninninngerat akueriuk. Pissutsit illumiit illumut oqaluussisarnittut isigikkit.

¹⁵ Atit kinguliallu atorlugit ilisaritigit. Pitsaanerussaaq eqqaangikkukku inissiarsuarmi najugaqartunut tamanut sianerlutit, nalornisuuleqinammat.

¹⁶ ’Ræsonnerebogimi’ aallarniutit ilarpassui ilaaginnarneqarsinnaapput. Soorlu ima aallartissinnaavutit: „Aluu, . . .-mik ateqarpunga. Nammineq naapissinnaannginnakkit sianerfigaakkit.“ Ima ingerlaannarsinnaavutit: „Inuunerput pitsanngortinniarlugu qanoq iliuuseqartoqarsinnaanersoq isummat tusarusukkaluarpara. Amerlanersatta inuunertik nuannaarutigaat, taamaakkaluartorli amerlaqisut ima aperisarput: Inuunermi pilluarneq piviusoq anguneqarsinnaanerluni? (Oqaluussat akinissaanut periarfissiguk.) Illit qanoq isumaqarpit, piviusumik pilluarnissamut ullumikkut suna akornutaanerpaava?“ Imaluunniit, ilisaritereeruit, ima oqarsinnaavutit: „Nunarsuaq tamakkerlugu kajumissutsimit suliniarnermut peqataavunga, inuunermut qanoq isiginninnerit tusarusussinnaavara. Utoqqaliartortilluta paasilersarparput inuuneq sivikitsuararsuusoq. Inuuneq sivikitsoq tamanna ilumut tamannaannaanerluni? Illit qanoq isumaqarpit?“ (Takuuk ’Ræsonnerebogi’, qupperneq 13, qulequtalik „Inuuneq/Pilluarneq“.) Oqarasuaatikkut oqaluussinermi aallarniutinik atuineq akerliliissutinillu akisineq pillugit paasissutissat pitsaasut amerlanerusut Naalagaaffimmik Kiffartuuteqarneq-mi juuli 1990-imeersumi, quppernermi 4-mi, nassaarineqarsinnaapput.

¹⁷ Oqaloqatigiinnermi erniinnaq Biibili atoruk. Naleqqussorigukku Jehovamut nalunaajaasuunerit taasinnaavat. Oqaluussat isummaminik anitserusuppat tusarnaarnissannut piumassuseqarit. Isummaminik anitsineranik nersualaaruk. Ajornanngippat oqaloqatigisavit isumaanut isumaqataanerit ersersiguk. Misiginneqataanermik ersersitsigit isumaalu ammaffigikkit. Oqaloqatigisalli oqaluppallaalerpat oqqannialerpallu inussiarnersumik oqaloqatigiinneq kipitiguk. Ilungersorlutit suliniuteqarninni Guutip anersaavanit siulersortigit Guutimillu ilassinneriaannaasumik uummatillit ujarniarneranni Guutimit ikiortigit.

¹⁸ Pitsaanerussaaq illit, oqaloqatigisaviinngitsoq, oqaloqatigiinneq unitsikkukku. Naggasiutitut rigssalimi tamanut oqalugiartoqarnissaanut qaaqquinnarsinnaavat, sumiiffissaalu qaqugulu pinissaa oqaatigalugit. Aamma aperisinnaavat pulaarneqarusunnersoq, oqaloqatigiissutigisassinnut tunngasunik suli amerlanerusunik paasisaqarniassammat. Immaqa allaat atuagassiat oqarasuaatikkut saqqummiunneqarsinnaapput. Soorlu atuagassiat neqeroorutigisinnaavatit, taamaalillutit aalajangersimasumik pajutsisarnissamut tunngavissiuillutit.

¹⁹ Oqarasuaatikkut oqaluussinermik nuannaarutiginninnermut peqataagit: Oqarasuaatikkut oqaloqatiginninnerit tamarmik Biibilimik atuaqqissaaqateqalernermik kinguneqassappat? Naamik, ilaannaalli taama kinguneqarsinnaapput. Assersuutigalugu, qaammatip ataatsip ingerlanerani qatanngut arnaq 300-t sinnerlugit oqaloqatiginnissimavoq. Ilisaritereeraangami nassuiartarsimavaa sooq pulaarnissaminut taarsiullugu sianerluni. Taava naatsumik saqqummiussisarsimavoq. Tamanna 12-inik oqaloqatiginnilluarneranik kinguneqarsimavoq. Soqutiginnittut pingasut suli oqarasuaatikkut attaveqarfigisarpai, allallu sisamat pulaarneqarnissaminnut akuersisimapput. Ataaseq ’atuakkamik paratiisilersaarummik’ pisimavoq aalajangersimasumillu maanna pulaarneqartarluni.

²⁰ Jesus Kristusip ajoqersukkani peqqusimavai oqaluussineq ’nunap isuanut allaat’ siaruarteqqullugu. (ap. sul. 1:8) Peqqussut tamanna naalanniarlugu sumiiffiit ilaanni oqarasuaatikkut oqaluussisoqartariaqartarpoq. Maanna ilanngutassiaq manna atuareerlugu imminut ima aperisinnaavutit: ’Nutaarsiassaq nuannersoq inunnut kikkunnulluunniit, ilaatigut sumiiffinni oqaluuffigineqarsimanngisaannartuni najugalinnut, oqaluussissutigiumallugu oqaluussiffigisartakkanni iliuuseqarnerusinnaavunga?’ Oqaluussisartut siunnersuutinik qulaani taaneqartunik maleruaasimasut nuannersorujussuarnik angusaqarsimapput. Paasisimavaat oqarasuaatikkut oqaluussisarnertik ’kiffartornerminnik nersorinnissutissaalluartoq’. (Rûm. 11:13) Aamma illit oqarasuaatikkut oqaluussinikkut nuannaarneq tamanna misigisinnaavat.