Inuit ’uatsitulli misigissusillit’

KUNNGIUVOQ pruffiitiullunilu, aammali ataataavoq asannittoq. Ernerisa ilaat alliartorami angutinngorpoq ataqqeqqutooq pingaarniartorlu. Ataatani kunngiussusianik arsaarniarlugu innuttaasut akornanni sorsuutsitsilerpoq, ataatami toqutaanissaa siunertarilluinnarlugu. Sorsunnermili erneq taanna nammineq toqutaavoq. Ataataata ernermi toqutaanera tusaramiuk qaliani inimukarpoq qissaserlunilu: „Ernera Absalom! Illit pinnak uanga toqusimasariaqaraluarpunga! Ernera Absalom! Ernera!“ (2 Samuel 18:33) Ataataq taanna tassaavoq kunngi David. Taanna Jehovap pruffiitiisut allatulli inuusimavoq ’uatsitut misigissusilik’. — Jâko 5:17, (NV).

Biibilip nalaani angutit arnallu Jehovap oqaaseqartittagai assigiinngitsunik inooriaaseqarsimapput inuillu nalinginnaasut akornanni inuullutik. Uatsitulli ajornartorsiuteqarlutillu naammalluinnanngissusertik pissutigalugu atugarliuuteqartarsimapput. Pruffiitit tamakku ilaatigut kikkuuppat, qanorlu ilillutik uatsitulli misigissuseqarsimappat?

Moses — imminut tatigivallaartoq maniguuttunngortoq

Kristumiussuseq sioqqullugu pruffiitiusimasoq malunnaatilik tassaavoq Moses. Taanna 40-nik ukioqarnermini Jehovap oqaaseqartitaatut kiffartornissaminut suli piareersimanngilaq. Sooq? Naggueqatini Egyptenimi Faraomit naqisimaneqartut nammineq Faraop inoqutaani peroriartorsimavoq ’pissaaneqarluni oqaatsimigut qanoq-iliornermigullu’. Ima oqaatigineqarpoq: ’Isumaqarpoq qatanngutimi paasissagaanni assammigut Guutip annaanneqartileraatik.’ Imminut tatigivallaarluni pinerluttuliorpoq hebriiareqatini inussiaq illersorlugu Egyptenimiu toqukkamiuk. — apustilit suliait 7:22-25; 2 Moses 2:11-14.

Moses allatut ajornartumik qimaasariaqalerpoq, ukiullu tulliuttut 40-t nunami ungasissumi, Midjanimi, savanik paarsisutut inuuvoq. (2 Moses 2:15) Ukiut taakkua qaangiunneranni 80-inik ukioqarluni Moses Jehovamit pruffiititut kiffartortussanngortinneqarpoq. Maannali imminut tatigivallaarunnaarsimavoq. Jehovap pruffiitinngortitsineranut imminut piukkutinngingaarami ajukkutingaaramilu ima oqaluppoq: „Kinaagama Faraomukartinniarpinga?“ aamma ’Qanoq oqassaanga?’ (2 Moses 3:11, 13) Jehovap annertoqqusersuineratigut ikiuineratigullu Mosesip pruffiititut kiffartornini iluatsilluartumik naammassivaa.

Illit Mosesitut imminut tatigivallaarneq pissutigalugu arlaannik sianiitsumik iliuuseqarlutillu oqaaseqarnikuuit? Taamaappat maniguunnissat ilinniartuaruk. Imaluunniit teokratiimut tunngasunik akisussaaffeqarnissamut piukkunnanngitsutut misigisimavit? Pinaasernissamut taarsiullugu Jehovap taassumalu peqatigiissortai aqqutigalugit ikiorneqarnissat akueriuk. Mosesimik ikiuisimasup illittaaq ikiorsinnaavaatit.

Elias — perorsaatissiinialerami uatsitut misigisimasoq

’Elias inuuvoq uatsitut [misigissusilik], qinullunilu qinnummik sialleqqunagu, nunalu siallinngilaa ukiut pingasut qaammatillu arfinillit.’ (Jâko 5:17) Eliasip qinnutaa Jehovap inuiaqatigiit imminit nigorsimasut perorsaatissinniarlugit piumasaanut naapertuuppoq. Eliasip nalunngilaa panernersuaq qinnutigisani inunnut naalliuutaajumaartoq. Israelikkut nunaateqarnermik annertuumik ingerlatsipput; sialuk pinngitsoorsinnaanngilluinnarpaat. Sivisuumik panernersuaqassappat naalliunnersuaqassaaq. Nunap naasui toqussapput; inerititaqarnavianngillat. Uumasuutit sulinermi iluaqutaasartut nerisarineqartartullu toqussapput, ilaqutariillu ilaat kaannersuarmik eqqorneqariaannaassapput. Kikkut atugaliornerpaassappat? Inuinnaat. Kingusinnerukkut uillarnerup Elias oqarfigaa qajuusat itummap imai uuliamininnguarlu kisiisa pigilersimallugit. Erninilu marluullutik qanittukkut perlerlutik toqunissartik qularinngilluinnarpaa. (1 Kunngit 17:12) Eliasip taama qinusinnaassaguni Jehovap kiffaminik — pisuunik piitsunillu — pallorfiginninnermik ilumoortumik tunussisimanngitsunik isumassuinissaa upperilluinnartariaqarpaa. Soorlu oqaluttuarineqartoq Elias pakatsisinneqanngilaq. — 1 Kunngit 17:13-16; 18:3-5.

Ukiut pingasut qaangiuttut Jehovap qanittukkut siallersitsinissaminik nalunaaruteqarpoq. Eliasip panernersuup taamatitinneqarnissaanik kissaateqarluinnarnera takuneqarsinnaavoq ’nunamut ingilluni peqilluni kiinnani seeqqumi akornannut pisillugu’ ilungersorluni qinujuartarneratigut. (1 Kunngit 18:42) Qinnutiminik Jehova tusarsimanersoq paasiniarlugu kiffani ima peqqujuartarpaa: „Majuarlutit immap tungaa alakkariartorallaak.“ (1 Kunngit 18:43) Nuannaarsimassaqaaq kiisami qinnutini akineqarmat ’qilak siallilerluni, nunallu inerititassani naalersillugit’. — Jâko 5:18.

Angajoqqaajuguit ilagiinniluunniit kristumiuni utoqqaanertaaguit perorsaatissiigaangavit misigissutsinik sakkortuunik akiugassaqartarsinnaavutit. Eqqaamalluinnartariaqarporli perorsaatissiinissaq ilaannikkut pisariaqartarmat, asannittumillu perorsaatissiineq ’eqqissinermik iluarnermillu kinguneqartarmat’. (Eprîarit 12:11) Jehovap inatsisaanut naalannerup kinguneri tamatigut iluaqutaapput. Eliasitut uummatitsinnit qinuvugut inatsisit tamakku maleruarneqassasut.

Jeremias — nikallungagaluarluni sapiitsoq

Biibilimik allaqataasuni tamani immaqa Jeremias inuttut misigissutsiminik eqqartuinersaavoq. Inuusuttuulluni pruffiitinngortitaagami sapiussimagaluarpoq. (Jeremia 1:6) Kingornali sapeeqaluni Guutip nalunaarutigeqqusaanik nalunaaruteqartarpoq, Israelikkunnit akeqqersimaartunit — kunngimit inuinnarnut — sakkortuumik akerlilersorneqaraluarluni. Akerlilersorneqarnini ilaannikkooriarluni kamaatigalugulu aliasuutigisarpaa. (Jeremia 9:3; 18:20-23; 20:7-18) Saassunneqarlunilu, unatarneqarlunilu, qisummullu qilersorneqarluni, parnaarunneqarlunilu, toqumik sioorasaarneqartarlunilu puilasup imaqanngitsup naqqanut marulluinnaasumut toqusussanngorlugu qimanneqarsimavoq. Allaallu ilaannikkut Jehovap nalunaarutigeqqusai Jeremiasimut annernartuusarput, soorlu ima oqarsimasoq: ’Iluga, iluga! Uummatiga kassuppoq ilunni!“ — Jeremia 4:19.

Taamaakkaluartorli Jehovap oqaasii Jeremiasip asavai, imami oqarsimavoq: „Uangali oqaatsisit nuannaarutigaakka uummatikkullu tipaatsuutigalugit.“ (Jeremia 15:16) Tamannali ilutigalugu Jehovamut ima torlulavoq: „Uannut ipputit kuunnguatut paqqerluni pakatsisitsisutut, imissamik isumallualussinnarfittut,“ kuunnguup paqqiasup erngatut. (Jeremia 15:18) Taamaakkaluartorli misigissusii imminnut akiuuttut Jehovap paasivai suliassaminillu naammassinninnissaanut tapersersortuarlugu. — Jeremia 15:20; takujuttaaq 20:7-9.

Illittaaq Jeremiasitut kiffartorninni pakatsissutissaqartarlutillu akerlilersorneqartarpit? Taamaappat Jehova isumalluarfigiuk. Aqqutigeqqusaasigut ingerlajuarit, taamaalioruit illittaaq pilluaqqungaassavaatit.

Jesus uatsitulli misigissuseqarpoq

Pruffiitiusarsimasut annerpaartaat tassaavoq Guutip nammineq ernera, Jesus Kristus. Naammalluinnartuugaluarluni misigissutsini nununeq ajorpai. Qamuuna misigissusii, qularnanngitsumik kiinaatigut allanullu qisuartarneratigut ersertartut, pillugit amerlasuunik atuagassaqarpugut. Jesus amerlasuutigut inunnut ’nalligusuttarsimavoq’, assersuusiaminilu inuttaasut pillugit oqaaseq aamma taanna atortarpaa. — Mákorse 1:41; 6:34; Lúkarse 10:33.

Naalaffimmi tuniniaasunik uumasunillu aniatitsinermini ima oqarami nipituumik oqarsimassaaq: ’Tamakku anissigik!’ (Juánase 2:14-16) Peter oqarmat: ’Sernigilisit, Naalagaq, taamaalineqarnaveerit,’ sakkortuumik ima akisimassavaa: ’Tununnut nigorit, Sataniaa!’ — Matîuse 16:22, 23.

Jesus imminut qaninnerusut ilaannut immikkut tunniusimasimavoq. Apustili Johannes ’taanna Jesusip asasaa’-nik eqqaaneqarpoq. (Juánase 21:7, 20) Allassimavortaaq: ’Jesusip Marta qatanngutaalu arnaq Lazarusilu asavai.’ — Juánase 11:5.

Jesus aamma aliasussinnaavoq. Lazarusip toqunera aliasuutigalugu ’qullilisimavoq’. (Juánase 11:32-36) Judas Iskariotimit killuutigineqarnerminik aliasuutiginninnini ersersillugu Jesus oqaatsit ilungersorpaluttut Tussiaatit-niittut issuarlugit oqarsimavoq: ’Nereqatima kimmissarpaanga.’ — Juánase 13:18; Tussiaat 41:10.

Allaat qisummi kikiattugaaqqalluni anniangaaraluarluni Jesusip isumassuissutsi ersersissimavaa. Saamalluni anaanani ’ajoqersukkaminut asasaminut’ isumagisassanngortissimavaa. (Juánase 19:26, 27) Pinerluttup kikiattugaaqatimi aappaa peqqissimisoq malugisinnaagamiuk naakkinnilluni oqarfigisimavaa: ’Paratiisimeeqatigiumaarpakkit.’ (Lúkarse 23:43) Imatut torlulanerani misigissutsimigut aalaterneqangaarnera tusaasinnaavarpullusooq: ’Guutiga, Guutiga, sooq qimappinga?’ (Matîuse 27:46) Toqulerlunilu oqaasii uummammit pisumik asanninneranik tatiginninneranillu ersersitsipput: ’Ataataq, anersaara assannut pisippara.’ — Lúkarse 23:46.

Tuppallernaqaaq nalunagu ’qajannarsutsitsinnik naakkinnissinnaanngitsumik palasiuneqanngitsugut, kisianni tamatigut uatsitut usserneqartumik, ajorteqarnanili’. — Eprîarit 4:15.

Jehovap tatiginninnera

Jehovap oqaaseqartitassaminik toqqaasarnini peqqissimissutiginngisaannarpaa. Oqaaseqartitassamisut toqqakkami imminut ilumoorfiginninnerat nalunngilaa, naakkinnillunilu inuit naammalluinnanngitsut taakkua sanngiissusii takunngitsuusaartarpai. Taamaakkaluartorli suliassiissutiminik naammassinninnissaat naatsorsuutigisarpaa. Ikiuineratigullu taamaaliorsinnaasarsimapput.

Uaguttaaq naammagittarluta qatanngutitsinnut angutinut arnanullu ilumoorfiginnittunut tatiginninnermik ersersitsisarniarta. Pissutsit aaqqissuussaaneranni matumani taakkua uagutsitulli naammalluinnanngitsuujuassapput. Qatanngutivulli uatsinnit asaneqarnissaminnut soqutigineqarnissaminnullu qinngaqqunnartutut nalilinngisaannassavavut. Paulus allassimavoq: ’Uagulli sanngiitsuusugut sanngiitsut qajannassusiisigut kamagissavavut namminerlu nuannarisatsinnik iliornata.’ — Rûmamiut 15:1; Kulorsamiut 3:13, 14.

Jehovap pruffiitiisa misigissutsit uagut misigisartakkavut tamaasa misigisarsimavaat. Jehovamilli tunaarinnittuusimapput, taassumalu napatittarsimavai. Ikiuinnartarsimanngilai, aamma nuannaarutissittarsimavai — ilerasuuteqannginnermik, paasitillugit iluarigini, tapersersuisunik suleqateqartittarlugit siunissamillu pilluarnartumik qilanaarisaqartillugit. (Eprîarit 12:1-3) Uaguttaaq Jehova tunaaralugu ataffiginiartigu itsaq pruffiitit, angutit ’uagutsitulli misigissusillit’, uppissusiatigut malillugit. (wE 1/3 98)