Jehovap piumasaatut iliorput

Imminut pilliutigeriaannaanikkut ilumoorfiginninnikkullu maligassaq

NAASORISSAASUMUT inuusuttumut, Elisamut, ulloq assallatserilluni sulinertut nalinginnaasutut aallartippoq, sunaaffali inuunerani ullut pingaarnersarilissagaat. Elisa narsaammi sulitilluni Eliasimit, Israelimi pruffiitit annersaannit, ilimaginngisaminit pulaarneqarpoq. ’Soormitaavaana pulaaraanga?’ Elisa eqqarsarsimassaaq. Sivitsunngitsorli tamanna akissutissarsivaa. Eliasip pruffiititut qallersaanni Elisamut naloriuppaa taamaalillunilu takutillugu Elisap ullut arlaanni kingoraarumaaraani. Elisap qaaqqusaanini tamanna ilumoorullugu ilassivaa. Ingerlaannaq narsaat qimallugu Eliasimut ikiortaalerpoq. — 1 Kunngit 19:19-21.

Ukiut arfinillit missaanniittut qaangiuttut Eliasip qimagutitaanissaanut piffissanngorpoq. Qimagutitaaneranik oqaluttuaq tassaanerarneqarsimavoq Allakkani Hebriiarisuuni ’oqaluttuat killitsinnarnerit ilaat’.

Elias qimagutitaanissaminut piareersarpoq

Elias Betelimut, Jerikomut Jordanimullu naggammik tikeraarusuppoq. Taamaaliussagaanni qaqqat maniitsut aqqutigalugit kilometererpassuarni pisuttariaqarpoq. Ornigassaminnut apuunnerminni tamatigut Eliasip Elisa uninngaannaqqullugu kajumissaartarpaa. Elisalli naggataa tikillugu naalakkami najuinnarnissaa aalajangiusimavaa. — 2 Kunngit 2:1, 2, 4, 6.

Betelimiinneranni Jerikomiinnerannilu „pruffiiteqatigiit“ Elisamut saaffiginnipput.a „Nalunngiliuk [Jehovap] naalagarisat Elia ullumi ilinnit qimagutitinniaraa?“ aperaat. „Aap, nalunngilara; nipangiinnarniaritsi!“ — 2 Kunngit 2:3, 5.

Taava Elias Elisalu Jordanip kuussuata tungaanut aallarput. Taavunga pigamik Elias tupinnartuliorpoq pruffiiteqatigiit 50-it missingi isiginnaartoralugit. „Eliasip qallersaatini tigoriarlugu imuaa, taassuminngalu kuup ernga anaavaa anaasami nalaa paqqersillugu; marluullutillu masatalaarnatik ikaarput.“ — 2 Kunngit 2:8.

Kuuk ikaareeramikku Elias Elisamut oqarpoq: „Tusariassagiga ilinnit qimagutitaatinnanga sumik kissaateqarfiginerimma.“ Elisap pissaanerata, imaluunniit anersaavata, „marloriaataanik“, imaluunniit nutsigaq pisoqaq naapertorlugu ’ilanngaataanik marlunnik’, tunineqarnissani qinnutigaa — tassa nalinginnaasumik ernerup angajulliliap pisassaanik. Elisammi ernerup angajulliliap ataataminik ataqqinninneratut Elias ataqqilluinnarsimavaa. Aammalu Jehovap Israelimi pruffiitiatut Eliasimut kingoraartaasussatut toqqarneqarsimavoq. Taamaattumik qinnutaa namminissarsiornermik pissuteqanngilaq ippinnaraniluunniit. Elias, qinnummik tamatuminnga Jehovap kisimi naammassinnissinnaanera nalunnginnamiuk, maniguulluni ima akivoq: „Kissaatigisaq taama ittoq naammassiuminaappoq.“ Imalu nangilluni: „Qanoq ilillunga ilinnit qimagutitaaninnik [Jehovap] isiginnaartippatit kissaatigisat pisinnaassavat, taamali pisoqanngippat pisinnaassanngilat.“ — 2 Kunngit 2:9, 10; 5 Moses 21:17.

Qularnanngitsumik Elisap naalakkami najuinnarnissaa aatsaat taama aalajangiusimatigaa. Tassanngaannaq takulerpai „qamutit innerinnaasut innerinnaasunik qimuttullit“. Elisa tupassimaqisoq isiginnaartillugu Elias anorersuakkut qimagutitaavoq allamullu pisinneqarluni.b Eliasip qallersaataa Elisap tiguaa Jordanillu kuussuata sinaanukaqqilluni. Qallersaammik imeq anaavaa oqarlunilu: „Naak [Jehova] Eliap Guutia?“ Anaasaata nalaa paqqerpoq, taamaalilluni paatsuugassaanngitsumik erserluni Guutip Elisa Eliasip kingoraartaatut akuerisimagaa. — 2 Kunngit 2:11-14.

Sumik ilinniarfigisinnaagipput

Elisap Elias peqatigalugu immikkut suliaqarnissaminik kajumissaarneqarami narsaatini ingerlaannaq qimassimavaa Israelip pruffiitiunera suleqatiginiarlugu. Suliassaasa ilaat annertuujusimannginnguatsiarput, tassami ’Eliap assaanut imermik kuisisartutut’ ilisimaneqarsimavoq.c (2 kúngit 3:11) Taamaakkaluartorli Elisap suliani immikkut pisinnaatitaaffittut isigisimavaa, ilumoorfiginnillunilu Elias malittuarsimallugu.

Ullumikkuttaaq Guutip kiffaasa ilarpassui imminut pilliutigeriaannaasumik pissuseqarput. Ilaasa ’narsaatertik’, suliffitsik, qimassimavaat avinngarusimasuni nutaarsiassaq nuannersoq oqaluussissutigiumallugu imaluunniit Betelimi kiffartulerumallutik. Allat nunanut allanut aallarsimapput Peqatigiiffiup sanaartortitsinerinut suleqataajartorlutik. Suliassanik pingaanngitsutut isigineqarsinnaasunik suliaqarnissartik amerlasuut akuerisimavaat. Jehovamulli kiffartortup kialuunniit suliaa pingaanngitsuunngilaq. Jehovap kajumillutik imminut kiffartortut tamaasa pingaartippai, imminnullu pilliutigeriaannaassusiat pilluaqqussavaa. — Mákorse 10:29, 30.

Elisap Elias najortuarsimavaa naggatissaa tikillugu. Allaat periarfissaminik neqeroorfigineqaraluarami pruffiiti utoqqalisoq qimakkumasimanngilaa. Qularnanngitsumik Eliasimut qanimut attaveqalersimanini pissutigalugu ilumoorfiginnilluni asanninnermik taama ittumik ersersitsinissani ajornartorsiutigisimanngilaa. Ullumikkuttaaq Guutip kiffaasa Guutimut uppeqatiminnullu attaveqarnertik nukittorsarniartarpaat. Ataasiussuseq taama ittoq pilluaqqusaassaaq, Biibilimimi Jehova ima oqaatigineqarpoq: ’Ungaginnittumut ungaginnittutut ilisarputit.’ — 2 Sâmuale 22:26. (wE 1/11 97)

[Quppernerup ataani ilanngussat]