’Epikuriiarit’ mianersorfigikkit

„Pitsaaqaaq ileqqoreqalunilu. Pujortarneq ajorpoq, imerneq ajorpoq oqaasipilunnerlu ajorluni. Ilami kristumiuunerarlutik oqartartut ilaannit pissuserinneroqaaq!“

OQAATSIT taama ittut naleqqutinngitsumik ikinngutilersornermut patsisissarsiorniarluni atorneqartut tusarnikuuigit? Tamanna pillugu Biibilimi qanoq allassimasoqarpa? Ukiuni hundredelinni siullerni ilagiinni kristumiuni assersuutissaq iluaqutigalugu tamatumunnga eqqortumik isummersinnaassaagut.

Ukiuni hundredelinni siullerni apustilip Paulusip ilagiit Korinthimiittut ima mianersoqqusimavai: ’Tammarnaveeritsi; ajortut ikinngutigalugit ileqqut ajunngitsut aserortarput.’ Immaqa kristumiut ilaat griikerit isumaliutersuutaannit, ilaatigut epikuriiarit eqqarsartaasiannit, sunnertissimasunik ikinngusersortarsimapput. Epikuriiarit kikkuugamik? Sooq kristumiunut Korinthimiittunut ulorianartorsiortitsisuusimappat? Ullumikkut inunnik taama ittunik mianersorfigisariaqakkatsinnik nassaassaqarpa? — 1 Korintumiut 15:33.

Epikuriiarit kikkuuppat?

Epikuriiarit tassaapput griikerip isumaliutersortartup Epikurip, ukiumit 341-mit 270-imut u.n.s. inuusimasup, malittai. Epikurip ajoqersuutigisimavaa inuulluataarneq inuunermi ajunngitsorsiassat annersarigaat anguniagassallu pingaarnersaralugu. Tassa imaappa epikuriiarit assuarnarluinnartumik najoqqutaqanngilluinnartumillu inuusimasut, inuulluataarnissaminnik noqqaassutiginnittuarnerminni kanngunartuliortarlutik? Tupinnaraluartumik Epikurip malitsini taamatut inuunissaannik ilinniartissimanngilai! Akerlianilli ilinniartitsivoq nuannisarneq inuulluataarnerluunniit pitsaanerpaamik anguneqarsinnaasoq silatussutsimik, sapiissutsimik, imminut naalakkersinnaassutsimik naapertuilluassutsimillu ersersitsinikkut. Nuannisarneq naajasoq pinnagu nuannaarnerup inuuneq naallugu atasinnaasup anguniarneqarnissaa tapersersugaraa. Taamaattumik epikuriiarit annertuumik ajortuliortunut naleqqiullugit ileqqorippasinnerusimassaqaat. — Naleqqiuguk Títuse 1:12.

Kristumiuuneraqatigiinnut assinguppat?

Taamanikkut Korinthimi ilagiinnut ilaasimasuuguit epikuriiarit eqqarsartaasiannit sunnerneqarsimassagaluarpit? Immaqa kristumiut ilaat isumaqarsimassapput epikuriiarit taama ileqqoritsigigamik ikinngutigissallugit annilaanganartoqanngitsoq. Immaqa Korinthimiut eqqarsarsimassapput epikuriiarit najoqqutarisaat Guutip oqaasiani najoqqutassianit allaanerussuteqarpallaanngitsut.

Assersuutigalugu, epikuriiarit nuannaarniutinik killilimmik atuiniartuupput. Isumakkut eqqissisimanissartik timikkut iluarusunnissaminngarnit pingaarnerutippaat. Kimik nereqateqarnissartik sumik nerinissaminngarnit pingaarnerutippaat. Epikuriiarit politikkimut akuliunnaveersaartuupput isertortukkullu inatsisinik unioqqutitsiniassanatik. Imatut eqqarsarnissaq ajornarsimassanngeqaaq: „Uagutsitulli iinnarput!“

Ilumulli epikuriiarit kristumiutut siullertut issimappat? Naamerluinnaq. Immikkoortitsisinnaassutsimik eqqortumik sungiusaasimasut assigiinngissut takulluarsinnaavaat. (Eprîarit 5:14) Illimmi? Epikuriiarit ajoqersuutaat samminerulaariartigik.

Epikuriiarit pitsaanngequtaat

Inuit guutinut toqumullu sioorajunnaarnissaannik ikiorniarlugit Epikurip ajoqersuutigisimavaa guutit inunnik soqutigisaqanngitsut inuilluunniit suliaannut akuliunneq ajorlutik. Aammagooq, Epikur ajoqersuivoq, nunarsuaq avataarsualu guutinit pinngortinneqanngillat inuunerlu nalaatsornerinnakkut pilersimalluni. Tamanna Biibilip ’ataasiinnarmik Guuteqarneranik’, Pinngortitsisoqarneranik, taassumalu pinngortitaminik nunarsuarmiunik tamanik isumassuineranik ajoqersuutaanut akerliulluinnannginnerpa? — 1 Korintumiut 8:6; Evfisumiut 4:6; 1 Pîtruse 5:6, 7.

Epikuriiarittaaq ajoqersuutigaat toqup kingorna inuuneqarsinnaanavianngitsoq. Tamannali Biibilip toqusut makititaanissaannik eqqartuineranut naapertuutinngilaq. Apustili Paulusip Areopagusimi oqalugiarnermini makititaanissaq pillugu eqqartugaanut qularnanngitsumik epikuriiarit isumaqataanngitsunut ilaapput. — apustilit suliait 17:18, 31, 32; 1 Korintumiut 15:12-14.

Epikurip isumaliutersuutaasa navianarnersaat aamma nakutitaanarnerpaavoq. Kingusinnerusukkut inuunissamik tunuartitseriarluni isummerpoq inuk nunarsuarmi inuunermini sivikitsumi sapinngisamik pilluarluni inuuniartariaqartoq. Soorlu iserfigereeripput siunertaa tassaanngilaq inuunerlunnissaq, kisianni inuuneq massakkut nuannaarutigisariaqartoq, taannatuaammat.

Epikurip isertortumik eqqunngitsuliortarnissaq inassutiginngilaa, taamaappammi paasineqarnissaq annilaanngagineqartuassammat, annilaanganerlu pilluarnermut ilasaataanngeqimmat. Killilimmik pinissaq kajumissaarutigaa ingasattumik iluarusunniarnerup, maannakkut pilluarnermik akornusiisinnaasup allap, kinguneri pinngitsoorniarlugit. Aammattaaq allanut ajunngitsumik attaveqarnissaq siunnersuutigaa, imminut akilersinnaanera piinnavillugu. Soorunami isertortumik eqqunngitsuliornaveersaarneq, killilimmik pineq ikinngusersornerlu imminni ajortuunngillat. Taamaattumik sooq Epikurip isumaliutersuutai kristumiunut navianartuuppat? Siunnersuutai inuup uppissuseqanngitsup isiginnittaasianik tunngaveqarmata. Oqaasinnaaliaa ima nipeqarpoq: ’Nerillutalu imeqisa, aqagu toqussagatta.’ — 1 Korintumiut 15:32.

Maannakkorpiaq qanoq ililluni pilluarluni inuusoqarsinnaasoq Biibilimi ersersinneqarpoq, kisianni aamma ima unnersuussuteqarpoq: ’Guutimut asanartittuinnaritsi Naalakkatta Jesus Kristusip naakkinninnera ilimasuutigalugu inuunermut naassaanngitsumut.’ (Jûtarse 21) Aap, Biibilimi siunissaq naassaanngitsoq maannakkorpiaq inuunermit naajasumit pingaarnerutinneqarpoq. Kristumiup soqutigisaa pingaarnerpaaq tassaavoq Guutimut kiffartorneq, inuunerminilu Guuti salliutikkaangamiuk nuannaarneq nalerisimaarnerlu misigisarpai. Aammattaaq Jesusip nammineq inuttut soqutigisani salliutissimanngilai, nukinili namminissarsiornani Jehovamut kiffartornermut inunnillu ikiuinermut atorsimavai. Ajoqersukkani inunnut allanut ajunngitsuliornissaannik ilinniartissimavai, imaanngitsoq akineqarnissartik neriuutigalugu, kisianni asanninnerminnut piviusumut ersiutaasumik. Taamaattumik nalunanngilaq kristumiut epikuriiarinit allaanerujussuarmik pissutiginiagaqartuusut. — Mákorse 12:28-31; Lúkarse 6:32-36; Galâsiamiut 5:14; Filípimiut 2:2-4.

Navianaat nakutitaanartoq

Epikuriiarit pilluarnissamik taama pingaartitsitigalutik pilluarnerat killilerujussuusimavoq. Epikurip ’Jehovami nuannaarneq’ amigaatigaa inuunerlu ’tunissummik sungarnitsumik’ taasimallugu. (Nehemja 8:10) Kristumiut siulliit epikuriiarinut naleqqiullugit pilluarsimaqaat! Jesusip nuannaassuseqanngitsumik ujariagisaqarlunilu inuunissaq siunnersuutigisimanngilaa. Taassuma aqqutigeqqusaa ingerlaffigigaanni pilluarneq annerpaaq anguneqarsinnaavoq. — Matîuse 5:3-12.

Korinthimi ilagiinniittut ilaat isumaqarsimagunik uppernertik ulorinartorsiortinngikkaluarlugu epikuriiarit eqqarsartaasiannit sunnerneqarsinasunik ikinngusersorsinnaallutik, kukkorujussuarput. Paulusip Korinthimiunut siullermeerluni allannerani ilaasa makititaanissamut uppernertik annaareersimavaat. — 1 Korintumiut 15:12-19.

Nalitsinni epikuriiarit?

Epikuriiarit ukiuni 300-kkunni oqaluttuarisaanermit tammarput, inuunerulli matuma allamik ilaqannginneranik isuma suli ullumikkumut pigineqarpoq. Inuit ilaat ileqqorissuugaluarput, amerlanerilli Guutip inuunermik naassaanngitsumik neriorsuutaanut uppertuunngillat.

Immaqa kristumiup inunnik taama ittunik ikinngusersornissani ussernartorsiorfigisinnaavaa, eqqarsarluni pissuserissuugamik ikinngutigissallugit ajunngitsoq. Soorunami allanit pitsaanerusutut immitsinnut isiginaveersaartariaqarpugut, tamannali ilutigalugu eqqaamasariaqarparput ’ajortut’ tamarmik — aamma nakutitaanartumik sunniutillit — ’ikinngutigalugit ileqqut ajunngitsut aserortarmata’.

Maannakkorpiaq inuunerup allamik ilaqannginneranik eqqarsaat aammattaaq ersertarpoq suliffeqarfiit pikkorissartitsinerini, imminut ikiornissaq pillugu atuakkiani, oqaluttualiani, filmini, tv-kkut aallakaatitassiani nipilersukkallu ilaanni. Uppinngissuseq tamanna eqqunngitsuliornissamik toqqaannartumik siuarsaasuunngikkaluartoq arlaatigut nakutitaanarnerusukkut sunnertiffigisinnaavarput? Assersuutigalugu, namminissarsiortumik ulapputeqangaaratta Jehovap kisimi oqartussaassusianut apeqqut soqutigiunnaartooratarsinnaavarput? ’Naalakkap suliaanik naammassisaqangaartuinnarnissamut’ taarsiullugu aqqutikkut allakkut ingerlalersoorsinnaavugut ilungersuussiunnaarlutalu? Imaluunniit tammartitaalluta Jehovap maleruaqqusaasa naapertuilluartuunerannik iluaqutaanerannillu qulalersinneqarsinnaavugut? Kanngunartuliorneq, nakuuserneq anersaarsiornerlu mianersorfigisariaqarpavut silamiullu isumaannit sunnertissimasut sunnertiffiginaveersaarlugit. — 1 Korintumiut 15:58; Kulorsamiut 2:8.

Taamaattumik Jehovap unnersuussutaanik uummatikkut iluunngarlutik maleruaaniartut ilaginiarnerusarniartigik. (Jesaja 48:17) Taamaalilluta ileqquvut ajunngitsut pitsaanerulissapput, uppernikkullu nakussatsissaagut. Ullumikkuinnaanngitsoq inuuneq pilluarnartoq angussavarput, inuunermilli naassaanngitsumik siunissaqalissalluta. — Tussiaat 26:4, 5; Ussatit 13:20. (wE 1/11 97)

[Qupp. 28-mi assiliartaq]

Epikur ajoqersuisimavoq guutit inunnik soqutigisaqanngitsut

[Suminngaanneernera]

The British Museumip akuersineratigut