Sinissaarunnerit kinguneqarluartut
ALLAAT kunngit sinissaaruttarput. Tamanna ukiut hundredellit tallimassaanni u.n.s. Persiamiut kunngiata pissarsuup Ahasverusip misigisimavaa. Ilaanni sinissaarukkami pisimasunik nalunaarsuiffimmik atuffatsippoq — immaqa misigisimagami pisussaaffimmi ilaat sumiginnarsimallugit. Paasivaa kiffap aalajaatsup, Mordokajip, imminut toqutseriaraluarneq akornusersimagaa, tamannali pillugu nersornaaserneqarsimanngitsoq. Ahasverus aalajangerpoq tamanna piaartumik iliuuseqarfiginiarlugu. Kunngip Mordokajimik nersornaasiinerata kinguneri Guutip innuttaanut iluaqutaasut takutitsipput kunngip sinissaarunneranut Guuti pisuusoq. — Ester 6:1-10.
Afrikap Kujalliup sineriaani illoqarfimmi Hermanusimi Jehovap Nalunaajaasuisa ilagiivi Biibilimi oqaluttuap tamatuma eqqaanissaanut ilaanni pissutissarsipput. Inersuarmi attartukkaminni ataatsimiittarput. Naalagaaffilersaartarfiliorniarlutik illuliorfissamik ukiorpassuarni pisiniartarsimagaluarput. Kiisamilu 1991-imi illoqarfimmi aqutsisut illuliorfissamik pitsaasumik tuniniagaqarput.
Jehovalli nalunaajaasuisa illuliorfissamik pisinissaat ilaannit akerlerineqarpoq. Qaammatini arlalinni utaqqereerlutik ilagiit ilisimatinneqarput oqaluffeqarfiit ukiunik pingasunik piffissalerlugit pisisussanngortinneqarsimasut, allanullu neqerooruteqarneq taamaatinneqarsimalluni. 1993-imi maajimi ilagiit illoqarfimmi aqutsisunut allagaqaqqipput qinnuigalugit aalajangernertik isumaliutigeqqeqqullugu. Akissutisipput oqaaseqatigiinnik ataasiinnarnik allagartalimmik, tassa piffissaliilluni pisisussanngortitsisimaneq allanngortinneqarsinnaanngitsoq.
Ukiumi tamatumani oktobarimi unnuit ilaanni illoqarfimmi aqutsisunut ilaasortat ilaat sinissaaruppoq. Piffissaq atorluarniarlugu ataatsimmiinnernik imaqarniliaasarsimasut atualerpai paasiniarlugu suliassat ilaannik sammeqqinneqartariaqartoqarnersoq. Jehovap Nalunaajaasuisa illoqarfimmi aqutsisut aalajangernerminnik isumaliutiginneqqeqqullugit taakkununnga allagarisimasaat maluginialerpai. Aalajangerpoq suliassaq tamanna tulliani ataatsimiinnissami ullormut oqaluuserisassanut ilanngunniarlugu. Jehovap Nalunaajaasuisa piffissaliilluni pisisussanngortitsinerup pilersinneqanngikkarneranili qinnuteqarsimanerat tikkuarusuppaa.
Tamatuma kingunerisaanik ilagiit illuliorfissamik 1991-imi imminnut neqeroorutaasimasumik pisinissaminnut akuerineqarput! Illuliorfissaq illoqarfiup qeqqani aqqusinersuup eqqaaniippoq, taamaattumillu ilagiinni ilaasortaasunut soqutiginnittunullu tikikkuminartumiilluni. Kusanartumik naalagaaffilersaartarfiliortoqarpoq, oktobarip 5-iani 1996-imi Jehovamut pigititassanngortinneqartumik.
Ilagiit illoqarfimmi aqutsisunut ilaasortaq sinissaarussimaneranik misiginneqatigaat, immaqali tuppalliutigissavaa allaat kunngi Ahasverus sinissaaruttarsimammat. Pisullu marluk taakkua tamarmik ajunngitsumik kinguneqarput. Hermanusimi ilagiinnut ilaasortaasut illoqarfimmi ilisimaneqarluartumi tamaani namminneq pallorfiginninnermut minguitsumut qitiusumik teokratiimillu ilinniartitsiffiusumik naalagaaffilersaartarfittaarnertik qujamasuutigeqaat. — Eprîarit 10:24, 25. (wE 15/11 97)