Ilumut ullut kingulliit inuuffigaavut?

KUUP aqukkuminaaffiunerpaartaatiguulersusilu umiarissap siuaniipputit. Qapussuartigut serpalinnersuartigullu ujararujussuit nueriataarput. Aqunniarsaraatit. Inuk tununniittoq aquttussaaniaraluarpoq misilittagakitsuararsuuvorli. Ajorneruvorli kuup assinganik peqannginnavit naluat sarfarnersaq siunissinni qatsunganersanngorumaarnersoq qorlortunngorumaarnersorluunniit.

Atukkat nuannerpallaanngillat, ilaa! Pissutsit allanngorteriartigik. Takorlooriaruk misilittagaqarluartumik ilisimasortaqartusi, ikkarluusinnaasunik kangerliumanernillu tamanik ilisimannittumik. Immap qaqortuinnaap sumut killinnissaa qanorlu aqussanerluni siumut nalunngereertarpai. Isumannaannerusutut misigissanngilatit?

Pissutsinik tamatumunnga assingusunik tamatta atugaqarpugut. Inuiaat oqaluttuarisaaneranni piffissami ajornakusoortumi inuuvugut. Pissutsit qanoq sivisutigisumik taamatut ingerlassanersut, ajunnginnerulissanersut piffissamilu tamatumani qanoq aniguissanerlutik inuit amerlanersaasa naluaat. Annaffissaqanngitsutulli ikiortissaqanngitsutullu misigisariaqanngilagut. Pinngortitsisitta siulersuisussaqartippaatigut — oqaluttuarisaanermi piffissaq taartoq qanorlu killeqarnissaa siulittuutigisimavaa, annannissatsinnullu siulersorumalluta. Siulersuisoq taanna atuagaavoq, Biibili. Atuakkiortua, Jehova Guuti, imminut Ajoqersuisorsuarmik taasimavoq Esajasilu aqqutigalugu ima neriorsuilluni: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: „Aqqut aana ingerlavigisassarsi“.“ (Jesaja 30:20, 21) Siulersuisoq taamaattoq ilassisanngiliuk? Taava Biibilip nalitsinni ullut qanoq ittuussanersut ilumut siulittuutigigai misissoriartigu.

Jesusip malittaasa siunertaqarluartumik apeqqutaat

Jesusip malittai tupaallassimassapput. Paatsuugassaanngitsumik Jesusip oqaluttuuppai Jerusalemip naalaffia tupinnartoq aserugaajumaartoq! Siulittuut taamaattoq tupaallannarpoq. Kinguninngua uuliap qaqqaani issiatillutik ajoqersugaasa sisamat Jesus ima aperaat: ’Oqarfigitigut: qaqugu tamakku taamaalissappat, sunalu [najuunnissannut pissutsillu aaqqissuussaanerata matuma naggatissaanut, NV] nalunaaqutaassava?’ (Matîuse 24:3; Mákorse 13:1-4) Paasinngikkaluarpassulluunniit Jesusip akissutaa arlaleriarluni eqquutissaaq.

Jerusalemip naalaffiata aserugaanera juutillu aaqqissuussaanerata naanerata Kristusip najuunnera naliginngilaa silarsuarmilu pissutsit aaqqissuussaanerata naanera assiginagu. Taamaakkaluartoq akissummini annertuumi Jesusip apeqqummut tunngasortai tamaasa akilluarpai. Jerusalemip aserugaanissaa sioqqullugu pissutsit qanoq ikkumaarnerannik oqaluttuuppai; aammattaaq oqaluttuuppai najuunnermini, qilammi kunngitut naalakkersuinermini silarsuarmilu aaqqissuusinerit atorunnaarsilerunigit, sunik ilimagisaqarsinnaanersut.

Jerusalemip aserugaanera

Jerusalem naalaffialu pillugit Jesus qanoq oqarsimanersoq eqqarsaatigeqqaariartigu. Ukiut 30-t sioqqullugit silarsuarmi illoqarfiit annersaasa ilaanni annikilliortoqangaarnissaa siulittuutigaa. Lúkarse 21:20, 21-mi allassimasut annikitsualuttai ilanngullugit malugikkit: ’Jerusalem sorsuttorpassuit ilugaat takulerussiuk, taava ilisimassavarsi nungutitaaffissaa qanillisoq. Taava Judæamiittut qaqqanut qimaalit, Jerusalemillu iluaniittut tassannga anilit, nunaannarmiittullu tassunga isernaveerlit.’ Jerusalemili akeqqanik tammaartunik unguneqarpat ’Jerusalemip iluaniittut’ Jesusip peqqusineratut qanoq ilillutik ’anisinnaappat’? Jesusip ersersippaa periarfissaqalerumaartut. Taamaappa?

Ukiumi 66-imi Romamiut sakkutuui Cestius Gallusimit siulersorneqartut juutit pikitsitsisut ajorsartillugit Jerusalemimut utertissimavaat tassanngalu qimagutsaalillugit. Romamiut allaat illoqarfik saassuppaat naalaffiullu qarmarsui angullugit. Gallusilli sakkutuuni ilimagineqanngilluinnartumik naalakkerpai. Uteqquvai. Juutit sakkutuuisa ajugaasimaartut akeqqatik Romamiut malersorpaat ajoquserlugillu. Tamanna tassaavoq periarfissaq Jesusip siulittuutigisimasaa. Kristumiut ilumoortut mianersoqqussutaa eqqumaffigalugu Jerusalem qimappaat. Silatusaarneruvoq ukiummi sisamat qaangiutiinnartut Romamiut sakkutuui naalakkaminnit Titusimit siulersorneqarlutik uterput. Jerusalemimiut tamatumani qimaanissamut periarfissaarupput.

Romamiut sakkutuuisa Jerusalem ungoqqippaat; kaajallallugu qisunnik inngigissunik ungaluliorput. Jerusalem pillugu Jesus ima siulittuisimavoq: ’Ullut ilinnut nalliukkumaarput, taava qinngarsortitit kaajallallutit ungaluliorumaarput ilujumaarlutillu tamaginnillu annikilliortillutit.’a (Lúkarse 19:43) Sivitsunngitsoq Jerusalem ajorsartitaavoq; naalaffialu takoranningaartoq aserugaalluinnarpoq. Jesusip siulittuutaa annikitsualuit tamaasa ilanngullugit eqquuppoq!

Jerusalemip aserugaanissaannaa Jesusip eqqarsaatiginngilaa. Ajoqersugaasa najuunnissaanut nalunaaqutissanik aamma aperisimavaat. Naluaat tamannali Jesusip qilammi kunngiunissaanut tikkuussivoq. Sumik siulittuiva?

Ulluni kingullerni sorsunnerit

Matîuse kapitali 24 aamma 25, Mákorse kapitali 13 aamma Lúkarse kapitali 21 atuarukkit nalerput pillugu Jesusip eqqartugaanut uppernarsaatit assortugassaanngitsut takussavatit. Sorsuttoqarumaartoq siulittuutigaa — ’sorsuttunik tusarneq sorsunnernillu kalerrisaarisut’ oqaluttuarisaanermi inunnik ajoqusiiuarsimasut piinnanngilai sorsunnerilli ’inuiaat inuiaqatiminnut, naalagaaffiillu naalagaaffeqatiminnut’ sorsuttut, aap nunarsuaq tamakkerlugu sorsunnerit, pivai. — Matîuse 24:6-8.

Ukiuni hundredelinni uagut inuuffigisatsinni sorsoriaatsit allanngorneri eqqarsaatigilaariakkit. Itsaq sorsunneq isumaqarpoq inuiaat akerleriittut akornanni sakkutuut sorsuffimmi panalersorlutik aallaasilersorlutilluunniit imminnut aporaattut, tamannalu amiilaarnareerpoq. 1914-imili sorsunnersuaqalerpoq. Silarsuarmi ikuallannermut inuiaqatigiit ilannguttut tulleriiaaginnavipput — nunarsuaq tamakkerlugu sorsunneq siulleq. Aallaasit automatiskiusut inunnik amerlanerusunik ungasinnerusuminngaanniillu toqutsisinnaasut sananeqarsimapput. Aallaasit eqqarasuartaatit eqqugai amiilaarnartunik kinguneqartarput; sakkutuut tuusintilikkuutaat sennepip gassianik ikuallanneqarsimapput, anniartinneqarsimallutik, aqqunartiterneqarlutik toqunneqarsimallutillu; qamutit sorsuutit naakkittaatsumik akeqqatik tikittarpaat, aallaasaallu sakkortoqaat. Timmisartut aqqartartullu aamma atugaalersimapput — eqqasunnarnerungaartussanut siulliuinnarlutik.

Sorsunnersuup aappaani ilimagineqarsimanngitsunik pisoqarpoq — siulia minnerungaarmat — inuit millionilikkuutaat eqqugaapput. Umiarsuit sorsuutit illoqarfittut ittut immamit timmisartorpassuit aallartittarpaat, taakkualu silaannarmit akeqqatik toqorarlugit saassuttarpaat. Aqqartartut akeqqamik imarsiortui qaartartumeerlugit kivisittarpaat. Atomip nukinganik qaartartumeerisoqarpoq inuit hundredetuusintit tikillugit inuunerannik akeqartumik! Jesusip siulittuisimaneratut ’ersinartorsuit’ ukiut sorsuffiusut nalunaaqutigaat. — Lúkarse 21:11.

Sorsunnersuup aappaata kingorna sorsunnerit annikillisimappat? Taamaagunanngilaq. Ilaannikkummi ukiup ataatsip ingerlanerinnaani millionilikkuutaanik toqutaasoqarfiusuni amerlasuunik sorsuttoqartarpoq — allaat 1990-ip aallartinnerata kingorna. Kikkut eqqugaanerusarneri allanngorsimavoq. Toqutaasut amerlanersaat tassaajunnaarput sakkutuut. Ullumikkut sorsunnerni aqqunarneqartartut 90 procentii sakkutuujunngillat.

Nalunaaqutip ilisarnaatai allat

Nalunaaqutip Jesusip taasaata sorsunneq ilaannaraa. ’Kaannersuaqartarnissaa’ aamma mianersoqqussutigaa. (Matîuse 24:7) Taamaassimavorlu naak inuiaat pisariaqartitaat sinnerlugit nerisassanik pilersuisoqaraluartoq, aamma inuit oqaluttuarisaaneranni nunalerinermik ilisimatusaatitigut aatsaat taama siuarsimatigigaluartut, aamma silarsuarmi sumulluunniit nerisassanik sukkasuumik angallassisoqarsinnaagaluartoq. Taamaakkaluartoq nunarsuup inuisa tallimararterutaat ullut tamaasa kaattarput.

Jesusip ’toqorarnerit nalliuttarumaartut’ siulittuutigai. (Lúkarse 21:11) Aamma taamatut nalerput killormut sammisutut ippoq — nakorsaatit tungaatigut aatsaat taama pitsaatigaaq, teknikkikkut atugarissaarnerpaavugut, nappaatinut amerlasuunut illersuutissamik kapitittoqarsinnaavoq; taamaakkaluartoq nappaalanersuit aatsaat taama annertutigipput. Spaniamiut nappaataat sorsunnersuaq siulleq naalersoq aallartittoq sorsunnermi toqutaasunit amerlanerusunik akeqarpoq. Nappaat ima tunillannertigaaq illoqarfinni New Yorkitut ittuni tangajortut pillaatitut akiliisitaasinnaallutik parnaarussaasinnaallutilluunniit. Ullumikkut kræfti uummallunnerlu — ilumut nappaalanersuit — ukiumut millionit inuunerannik akeqartarpoq. AIDS-ilu katsorsarneqarsinnaanani toqoraavoq.

Jesusip ullut kingulliit eqqartoramigit oqaluttuarisaanermi politikkikkullu pissutsit eqqartornerugai, apustili Paulusip innuttaaqatigiit ajornartorsiutaat isummatigullu ineriartornerit sammineruai. Ilaatigut ima allappoq: ’Imaattorli ilisimassavat: ullussani kingullerni ajornartunik nallittoqassammat, inuit inuujumaarmata imminik asasut, . . . asanniuitsut, saamajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut, Guuti kajumiginagu nuannaarutinut kajumittut.“ — 2 Timûtiuse 3:1-5.

Oqaatsit tamakku ilisarnarpat? Nalitsinni silarsuarmi innuttaaqatigiit iluanni nakkaattoorneq ataaseq eqqarsaatigeriartigu — ilaqutariit avissaartuunnerat. Angerlarsimaffiit nakkaattoornerat, aapparmik persuttaaneq, meeqqanik atornerluineq angajoqqaanillu utoqqarnik naalliutsitsineq — tamakku tamarmik takutippaat inuit ’asanniuitsuusut’, ’qiningasuusut’ allaat ’mamarliisuusut’ ’ajunngitsunillu uumissuisuusut’! Aap, ilisarnaatit tamakku ullumikkut sumi tamaani atugaasut takusinnaavagut.

Nalitsinni kinguaariit siulittuutigineqartuuppat?

Eqqarsarsinnaavutit: ’Pissutsit taamaattut inunnik perlussiortitsiuaannarsimanngillat? Qanoq ililluta nalunngissinnaavarput nalitsinni kinguaariit itsaq siulittuummi pineqartut? Sammiviit pingasut Jesusip nalitsinnik eqqartuineranik uppernarsaasut sammeriartigik.

Siullermik, naak Jesusip oqaasii Jerusalemip naalaffiatalu aserugaaneranni ilaatigut eqquukkaluartut aamma siunissamut tikkuussipput. Jerusalemip aserugaanerata kingorna ukiut 30-it qaangiuttut Jesusip apustili Johannes utoqqalisoq takorruuisippaa siulittuutip silarsuarmut tamarmut atuunnissaanik takutitsisumik — sorsunnerit, kaannersuit, nappaalanerit toqorarnerillu. Aap, naalliuutit tamakku ’nunarsuarmi’ tamarmi, sumiiffimmi ataasiinnaanngitsumi, atugaassapput. — sarĸúmersitat 6:2-8.

Aappassaanik, ukiuni hundredelinni makkunani Jesusip nalunaaqutaa annertunerpaamik eqquuppoq. Assersuutigalugu sorsunnernik 1914-ip kingorna pisunik ajornarnerusoqarsinnaava? Sorsunnersuit pingajoqalissagaluarpata, ullumikkut atomip nukinganik sakkussiarpassuaqarfiusumi, nunarsuaq suerutivissagaluarpoq inuiaallu nungutitaalluinnassagaluarput. Tamatumunnga assingusumik sarĸúmersitat 11:18-imi allassimavoq inuiaqatigiit ’kamattunngorpata’ inuiaat ’nunamik aseruiumaartut’. Oqaluttuarisaanermi siullerpaamik avatangiisinik mingutsitsinerup ajorsaanerullu nunarsuup inuuffigineqarsinnaanera navianartorsiortippaat! Ilisarnaat tamanna aamma annertunerpaamik eqquuppoq eqquutingajalerporluunniit. Inuit imminnut nunarsuarmillu nungutitsinissaannut sorsunnerit mingutsitsinerillu ingerlaannassappat? Naagga, Biibilimi allassimavoq nunarsuaq eqqortunik isumalinnik inoqarluni naassaanngitsumut atassasoq. — Tussiaat 37:39; Matîuse 5:5.

Pingajussaanik, ullussanut kingullernut nalunaaqutit ingammik uppernarnerupput ataatsimut isigineqaraangamik. Nalunaaqutit Jesusip iivangkiiliuni pingasuni taasai, Paulusip allatai sarĸúmersitat-niittullu nalunaaqutit amerlasuunik immikkoortortaqarput. Ataasiinnaq tigullugu oqartoqarsinnaagaluarpoq piffissami allami assingusumik ajornartorsiuteqartoqarsimasoq, ataatsimulli tamaasa isigigutsigik akerlilerneqarsinnaanngitsumik nalitsinnut tikkuussipput.

Tamakkua tamarmik qanoq isumaqarpat? Biibilip nalerput isumatsannartutut neriuutissaqanngitsutullu allaatigigaa? Naaggaluunniit!

Nutaarsiassaq nuannersoq

Ullunut kingullernut nalunaaqutit immikkoortuisa maluginiarnarnerpaartaasa ilaat Matîuse 24:14-imi (NV) allassimavoq: „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ Ukiuni hundredelinni makkunani Jehovap nalunaajaasui inuit oqaluttuarisaaneranni nalissaqanngitsumik suliaqarsimapput. Jehova Guutip Naalagaaffia — qanoq ittuunera, qanoq aqunneqarnera sumillu naammassisaqarumaartoq — ilassisimavaat tusarliussarlu nunarsuarmut tamarmut siaruarsimallugu. Oqaatsini 300-nit amerlanerusuni tamanna pillugu atuagassat naqitertissimavaat nunani tamani inuit angerlarsimaffianni, suliffianni aqqusinernilu tamakkuninnga tunisimallugit.

Taamaaliornermikkut siulittuut tamanna eqquutissimavaat. Neriuummilli aamma oqaluussisimapput. Malugiuk Jesusip taammagu ’nutaarsiassaq nuannersoq’ nutaarsiassaq nuanniitsuunngitsoq. Piffissami taartumi qanoq ililluni taamaassinnaava? Silarsuatoqqami maani pissutsit qanoq ajorsitigissanersut Biibilimi tusarliussap pingaarnersarinngimmagu. Guutip Naalagaaffia tusarliussat pingaarnersaraat Naalagaaffiullu tamatuma neriorsuutigai inuit eqqissinermik asannittut aniguisinneqarnissaat.

Aniguisitaaneq suua illillu qanoq ilillutit pigilersinnaaviuk? Tamanna pillugu ilanngutassiani tulliuttuni atuarsinnaavat. (wE 1/4 97)

[Quppernerup ataani ilanngussaq]

[Qupp. 5-imi issuagaq]

Inuit eqqarsaatigalugulu paaseruttarpaat sooq pissutsit taama ajornartiginersut? Inuiaat sumunnarnersut?

[Qupp. 6-imi issuagaq]

Ullumikkut sorsunnerni toqunneqartut amerlanersaat — 90 procentii — sakkutuujunngillat

[Qupp. 7-imi assiliartaq]

Jesusip Jerusalemip aserugaaneranik siulittuutaa eqqorluinnartumik eqquussimavoq