Tuppalleritsi aniguiffissarsi qanilliartortillugu
’„Uanga najussavakkit annaatissallutillu,“ oqarpoq [Jehova].‘ — JEREMIA 1:19.
1, 2. Suna pillugu inuiaat aniguisinneqartariaqarpat?
ANIGUINISSAQ! Oqaaseq tuppallernartoq! Aniguisinneqarneq tassaavoq atukkanit ajortunit nuanniitsunillu annatsinneqarneq. Tamatumunngalu ilaavoq pitsaanerusunik nuannernerusunillu atugaqalerneq.
2 Inuiaat maannakkut aniguisinneqarnissartik pisariaqartingaarpaat! Sumi tamaani inuit erloqisinneqartarput ajornartorsiuteqartarlutillu — aningaasatigut, innuttaaqatigiissutsikkut, timikkut, isumakkut misigissutsikkullu. Inuit amerlanersaat silarsuarmi atukkat ineriartorsimanerat pissutigalugu naammagittaalliortarput pakatsisinneqartarlutillu pitsaanerulernissaannillu kissaatigisarlugu. — Jesaja 60:2; Matîuse 9:36.
’Artornartunik nalliuttoqassaaq’
3, 4. Sooq maannakkut aniguinissamik pisariaqartitsineq aatsaat taama angitigaa?
3 Ukiuni 1900-kkunni makkunani aatsaat taama naalliunnartoqartigimmat maannakkut aatsaat taama aniguinissamik pisariaqartitsitigivugut. Ullumikkut inuit 1 milliardit sinnerlugit piitsooqalutik inuupput ukiullu tamaasa 25 millioninik amerlisarlutik. Ukiut tamaasa meeqqat 13 millionit missaat nerisassaaleqinermit imaluunniit piitsuunerup nassatarisai pissutigalugit toqusarput — ullormut 35.000-it sinnerlugit! Inuit allat millionilikkuutaat nappaatit assigiinngitsut pissutigalugit toqujaarpallaartarput. — Lúkarse 21:11; sarĸúmersitat 6:8.
4 Sorsunnerit pikitsitsinerillu pissutigalugit naalliunnartoqarsimaqaaq. Atuakkami Death by Government-mi allassimavoq naalagaaffiit innuttaminnit sorsunnerni, naggueqatigiit upperisarsiortullu akersuunneranni toqoraanernilu „ukiuni hundredelinni makkunani inuit 203 millionit sinnerlugit toqutaasimasut“. Nangilluni allassimavoq: „Imaassinnaavoq inuit 360 millionit missaat taamaalillutik toqutaasimasut. ’Perluup qernertup’ inuit toqorarsimavaallusooq. Tassaavoq pissaanermik perluk, tassaananilu nappaammik perluk.“ Atuakkiortoq Richard Harwood oqarsimavoq: „Ullutsinnut naleqqiutissagaanni ukiuni hundredelinni qaangiussimasuni sorsunnerit naakkittaatsut tassaannaapput ’tilluunnertut ittut’.“ — Matîuse 24:6, 7; sarĸúmersitat 6:4.
5, 6. Suut pissutigalugit ulluvut taama artornartigaat?
5 Ukiuni kingullerni nakuusernikkut pinerluttuliornerit kanngunartuliornerillu amerliartuinnarmata ilaqutariittullu inuuneq aseroriartortuarmat pissutsit artornarnerulersimapput. USA-mi siornatigut ilinniartitaanermut direktøriusup William Bennettip eqqartorpaa ukiut 30-t ingerlaneranni USA-mi inuit 41 procentinik amerlisimasut, nakuusernikkulli pinerluttuliornerit 560 procentinik, meeqqat aappariinnerup avataani inunngortut 400 procentinik, avinnerit 300 procentinik inuusuttuaqqallu imminortut 200 procentinik amerlisimasut. Princeton Universitetimi professoriusup John DiIuliop inuusunnerup mianersoqqusilluni eqqaavai inuusuttut amerliartuinnartut ’nersutitut kiisortutut illutik’, „toqutsisartut, saassussisartut, pinngitsaaliillutik arneriffiginnittartut, ujajaasartut, tillittartut taamaalillutillu innuttaaqatigiinni eqqissiviilliortitsisarlutik. Tigusaanissartik kanngusuutiginngilaat, parnaarussaanissartik ilerasuuteqarnissartilluunniit erngumassutiginagu.“ Nunami tamatumani inuusuttut 15-inik 19-inillu ukiullit akornanni toqussutiginerpaartaasa tulleraat toqutsineq. Meeqqallu sisamat inorlugit ukiullit pinerluffigineqarnermit toqusut napparsimanermit toqusunit amerlanerusarput.
6 Pinerluttuliornerit nakuusernerillu nunarsuaq tamakkerlugu pisarput. Tamakkununnga pissutaasut ilaat tassaavoq ikiaroornartunik atornerluineq inuit millionilikkuutaat inuunerannik aseruisoq. Australiami aviisimi Sydney Morning Herald-imi ima allassimasoqarpoq: „Nunarsuaq tamakkerlugu ikiaroornartunik tuniniaaneq tassaalersimavoq silarsuarmi niuernerit aningaasarsiorluarnarnerpaartaat sakkunik tuniniaaneq eqqaassanngikkaanni.“ Pissutaasoq alla tassaavoq tv-mi nakuusernerup kanngunartuliornerullu atugaangaarnerat. Nunani amerlasuuni inuusuttut 18-inik ukioqaleraangamik tv-mi nakuusernerit tituusintilikkuutaat kanngunartuliornerillu kisinneqarsinnaanngitsut takoreertarsimavaat. Sunniineq tamanna ajortorujussuuvoq inuttummi pissuserisavut isumatsinnut isertunit aalajangerneqartarput. — Rûmamiut 12:2; Evfisumiut 5:3, 4.
7. Ullumikkut pissutsit artornartut qanoq Biibilimi siulittuutigineqarsimappat?
7 Ukiuni 1900-kkunni makkunani pisimasut tamakku annilaarnartut Biibilimi eqqorluartumik siulittuutigineqarsimapput. Tassani allassimavoq nunarsuaq tamakkerlugu sorsunnersuit, nappalaanersuit, nerisassanik amigaateqarnerit inatsisaatsuliornerillu annertusiartuinnartut nalliuttarumaartut. (Matîuse 24:7-12; Lúkarse 21:10, 11) Siulittuut 2 Timûtiuse 3:1-5-imi allassimasoq atuaraanni nutaarsiassat tusarnaarnerannut assinguvoq. Tamatuma takutippaa ’ullut kingulliit’ inuuffigigivut, inuit tassaammata ’imminnik asasut, aningaaserituut, angajoqqaaminnut naalanngitsut, qujasuitsut, soqqusaatsut, asanniuitsut, nunujuitsut, qiningasut, ilisimatuuniartut, Guuti kajumiginagu nuannaarutinut kajumittut’. Ullumikkut silarsuaq taamatorluinnaq ippoq. Soorlu William Bennett oqarsimasoq: „Atugartuussutsip ajortunngorsimaneranut . . . uppernarsaatissaqarpallaarpoq.“ Allaat oqartoqarsimavoq sorsunnersuarmi siullermi atugartuussuseerussimasoq.
8. Sooq Guutip Noap nalaani ulersuaqartitsiva, tamannalu ullutsinnut qanoq pingaaruteqarpa?
8 Maanna „nunarsuaq iluaatsuliornermik ulikkaarmat“ pissutsit Noap nalaani ulersuup siornanit ajornerulersimapput. Taamani inuit amerlanersaasa ajortumik inooriaasertik peqqissimissutigiumanngilaat. Taamaattumik Guuti oqarsimavoq: „Ajortuliornerisigut nunarsuaq iluaatsuliornermik ulikkaarmat; taamaammat nungutillugit nunarsuarmit piiassavakka.“ Silarsuaq nakuuserfiusoq tamanna ulersuarmi aserorsimavoq. — 1 Moses 6:11, 13; 7:17-24.
Inuit aniguisitsisinnaanngillat
9, 10. Suna pillugu inuit aniguisitsisinnaanngillat?
9 Inuit artornartunit tamakkunannga aniguisissinnaanerpaatigut? Guutip oqaasiani akissuteqarpoq: „Tunaareqinasigit naalagaanertat, inuit annaassisinnaanngitsut.“ „Jehova, nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ (Tussiaat 146:3; Jeremia 10:23) Ukiuni tuusintilinni inuiaat oqaluttuarisaaneratigut oqaatsit tamakkua ilumoornerat uppernarsarneqarsimavoq. Inuiaat naalakkersuinikkut, aningaasatigut innuttaaqatigiissutsikkullu aaqqissuussaanerit assigiinngitsorpassuit misilissimagaluarpaat, pissutsilli ajorsiartuinnarput. Inuit tamatuminnga aaqqiisinnaagaluarpata taamaalioreersimassagaluarput. Kisianni ’inuit ilaat inoqatiminnut ajoqutaasumik pissaaneqarpallaarsimapput’. — Nalunaajaasup oqaasii 8:9; Ussatit 29:2; Jeremia 17:5, 6.
10 Ukiualuit matuma siorna USA-mi isumannaassutsimik siunnersuisimasoq Zbigniew Brzezinski oqarpoq: „Nunarsuarmi ineriartorneq eqqortumik misissussagaanni ima isummertariaqarpoq innuttaaqatigiissutsikkut pikitsitsiniarnerit, naalakkersuinikkut eqqissiviilliornerit, aningaasatigut ajornartorsiutit nunarsuarlu tamakkerlugu ilimasupilunnartoqarneq qularnanngitsumik atugaangaarnerulerumaartut.“ Imalu nangippoq: „Nunarsuaq tamakkerlugu uivernersuaqarnissaa aarlerinarpoq.“ Ullumikkut silarsuarmi pissutsinik isummerneq tamanna eqqorneruvoq. Ullut nakuuserfiusut makku pillugit Connecticutimi New Havenimi aviisimik Register-imik aaqqissuisut ima allassimapput: „Unitsitsisinnaajunnaarsimagunarpugut.“ Aap, silarsuup matuma ajorsiartuinnarnera unitsinneqarsinnaanngilaq, ’ullussat kingulliit’ makku pillugit siulittuummi ima allassimasoqarmat: ’Inuilli ajortut salloqittaapiluttullu ajoriartorsinnararaat tammartitsisarlutillu tammartitaasarlutillu.’ — 2 Timûtiuse 3:13.
11. Suna pillugu inuit pissutsit ajorsiartuinnarnerat unitsissinnaanngilaat?
11 Ineriartorneq tamanna inuit unitsissinnaanngilaat Satan tassaammat ’silap matuma guutia’. (2 Korintumiut 4:4) Aap, ’silarsuaq tamaat ajortup pissaaneqarfigaa’. (1 Juánase 5:19, NV; takujuttaaq Juánase 14:30.) Ulluvut pillugit Biibilimi eqqorluartumik allassimavoq: ’Eqqanaq nuna immarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ (sarĸúmersitat 12:12) Satanip nalunngilaa naalagaajunaarlerluni silarsuaarutilerlunilu, taamaattumik ’liivertut uiannisaartutut angalasarpoq iisassarsiorluni’. — 1 Pîtruse 5:8.
Aniguinissaq qanillivoq — kikkunnut?
12. Kikkut aniguinissaat qanilliva?
12 Nunarsuarmi pissutsit artornaqisut takutilluarpaat allannguinissaq — aap, aniguinissaq — qanillisoq! Kikkut aniguissappat? Mianersoqqussummik eqqumaffiginnittut tamannalu naapertorlugu iliuuseqarumasut qanittukkut aniguissapput. 1 Juánase 2:17-imi nassuiarneqarpoq qanoq iliortariaqartugut: ’Silarsuarlu [tassa Satanip pissutsinik aaqqissuussaanera] pilerinartuilu nungujartorput; Guutilli peqqusaanik naammassinnittoq naassaanngitsumik atassaaq.’ — Takujuttaaq 2 Pîtruse 3:10-13.
13, 14. Jesusip qanoq ililluni erseqqissarsimavaa eqqumasariaqartugut?
13 Jesusip siulittuutigisimavaa innuttaaqatigiit ajortunngorsimasut ullumikkut inuusut qanittukkut peerneqassasut ’naalliunnartoqangaassammat silarsuaqaleqqaarneranit mannalu tikillugu naleqanngisaannartumik kingornalu naleqassanngitsumik’. (Matiuse 24:21) Taamaattumik ima mianersoqqusivoq: ’Mianersoritsili uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi; nigatummi nunap tamarmi qaani ineqartunut tamanut nalliukkumaarpoq. Eqqumattuinnaritsilu qinullusi tamakkuninnga piumaartussanik tamanik qimarratiginnissinnaaqqullusi.’ — Lúkarse 21:34-36.
14 ’Mianersortut’ aamma ’eqqumattuinnartut’ paasiniassavaat Guutip piumasaa sunaasoq piumasaatullu iliorniarlutik. (Ussatit 2:1-5; Rûmamiut 12:2) Taakku Satanip silarsuaa aserorneqarpat ’qimaasinnaassapput’. Aniguisinneqarnissartik qulakkeerluinnarsinnaavaat. — Tussiaat 34:16; Ussatit 10:28-30.
Aniguisitsisoq pingaarnerpaaq
15, 16. Aniguisitsisoq pingaarnerpaaq kinaava, sunalu pillugu qularisariaqanngilarput taanna naapertuilluartumik eqqartuussissasoq?
15 Guutip kiffai aniguisinneqassappata Satan taassumalu silarsuarmi tamarmi pissutsinik aaqqissuussinera peerneqaqqaartariaqarpoq. Aniguinissamik taama ittumik pilersitsisussaq inunnit pissaaneqangaarnerusariaqarpoq. Aniguisitsisussaq tassaavoq Jehova Guuti, kisimi Oqartussaasoq, nunarsuarmik avataaniittunillu ataqqinangaartumik Pinngortitsisoq ajugaqanngitsoq. Taanna aniguisitsisuussaaq pingaarnerpaaq: „Uanga kisima tassaavunga [Jehova], uangaanngitsumik annatsitsisinnaasoqanngilaq.“ — Jesaja 43:11; Ussatit 18:10.
16 Jehova pissaaneqangaarpoq, ilisimassuseqarluni, naapertuilluartuulluni asannittuullunilu. (Tussiaat 147:5; Ussatit 2:6; Jesaja 61:8; 1 Juánase 4:8) Taamaattumik eqqartuussigaangami naapertuilluartuliussasoq qularisariaqanngilarput. Abraham ima aperisimavoq: „Nunarsuarmik tamarmik eqqartuussisuusoq naapertuilluartumik iliussannginnerpa?“ (1 Moses 18:24-33) Paulus allassimavoq: ’Guuti iluanngitsumik iliortarpa? Ajornaqaaq.’ (Rûmamiut 9:14) Johannes allassimavoq: ’Ilumut, Naalagaq Guuti ajugaqanngitsutit, eqqartuussinitit ilumoorput iluarlutillu.’ — sarĸúmersitat 16:7.
17. Jehovap kiffaasa qangali inuusut qanoq ilillutik takutissimavaat neriorsuutai tatigalugit?
17 Jehovap aniguisitsinissamik neriorsuutini eqquutissavai. Josua ima oqarsimavoq: „[Jehovap] Israelikkunnut neriorsuutigisimasaasa ilaat ataasiinnarluunniit qammuinnarsimanngilaq; tamarmik eqquussimapput.“ (Josva 21:45) Salomon ima isummerpoq: „Oqaasiisa ajunngitsut ilaat ataasiinnarluunniit maangaannanngilaq.“ (1 Kunngit 8:56) Apustili Paulusip eqqartorpaa Abrahamip ’Guutip unnersuutaa uppinnginnermit qularnartinngikkaa, . . . nakimmatiginngilluinnarpaalu taassuma unnersuunni naammassisinnaagaa’. Sarattaaq Guuti ’unnersuisoq ilumoorsoraa’. — Rûmamiut 4:20, 21; Eprîarit 11:11.
18. Suna pillugu Jehovap kiffaasa ullumikkut aniguinissartik qulakkeersinnaavaat?
18 Inuit assiginagit Jehova tatiginarluinnarpoq oqaatsinilu eqquutittuarlugit. „Katersaarsuit [Jehovaat] uppernarsaavoq oqarluni: ’Ilumut eqqarsaatikka eqqorlugit pisoqassaaq, pilersaarutikkalu pinngitsoornatik naammassineqassapput.’“ (Jesaja 14:24) Taamaattumik tatigisinnaavarput Biibilimi allassimammat: ’Taava Jehovap mianerinnitsini ussernartumit annaanneq nalussanngilai, iluaatsulli ullormut eqqartuutiffissamut toqqorumaarpai pillaqqullugit.’ (2 Pîtruse 2:9) Allaat akeqqanit pissaaneqartunit inuunertik aarlerinartorsiortinneqaraangat Jehovap kiffai isumalluartarput Jehovap neriorsuutaa pruffiitit ilaata oqaatigisimasaa nalunnginnamikku: „Saassutissavaatsit artorsartissinnaanatilli, uanga najussagakkit annaatissallutillu, oqarpoq [Jehova].“ — Jeremia 1:19; Tussiaat 33:18, 19; Títuse 1:2.
Siornatigut aniguisitsinerit
19. Jehovap qanoq ililluni Lot aniguisissimavaa, tamannalu qanoq ullutsinnut assersuutaava?
19 Jehovap siornatigut aniguisitsinerisa ilaat misissorutsigik kajumissisineqangaassaagut. Assersuutigalugu Lotip Sodomamiut Gomorramiullu iluaatsuliorneri ’erloqissutigisarpai’. Jehovalli illoqarfiit taakku pissutigalugit „maalaarneq“ soqutigaa. Piffissami eqqortumi inngilit aallartippai Lot ilaqutaalu qimaanissaannut kajumissaaqqullugit. Sumik kinguneqarpa? Jehovap ’Lot iluartoq annatsippaa’, ’illorpassuaqarfiillu Sodoma Gomorralu arsaannanngorlugit piuneerutsillugit’. (2 Pîtruse 2:6-8; 1 Moses 18:20, 21) Ullumikkuttaaq Jehovap silarsuup matuma ajussusia pissutigalugu maalaarneq soqutigaa. Ullutsinni aallartitaasa nalunaajaassutiginninnertik nukinginartoq taassuma piumasaa naapertorlugu naammassippassuk silarsuarmut matumunnga akuliutissaaq kiffanilu aniguisillugit soorlu Lot aniguisissimagaa. — Matîuse 24:14.
20. Nassuiaruk Jehovap qanoq ililluni Israelikkut Egyptenimit aniguisissimagai.
20 Egyptenitoqqami Guutip innuttai millionillit inussiaasimapput. Jehova taakku pillugit oqarsimavoq: „Naalliunnerat arajutsisimanngeqaara . . . Erloqissutaat nalunngilakka. Taamaattumik aqqarpunga . . . aniguisikkumallugit.“ (2 Moses 3:7, 8) Guutilli innuttai aallartereeraluarlugit Faraop isummani allanngortippaa sakkutoorpassuaminillu malersorlugit. Israelikkut Immami Aappalaartumi qimaaffissaaruttutut ipput. Taamaattoq Moses oqarpoq: „Erseqinasi! Aalajaallusi [Jehovap] annaanniarlusi qanoq iliornissaa isiginnaaginnarsiuk.“ (2 Moses 14:8-14) Jehovap Immaq Aappalaartoq avissaartippaa, Israelikkullu aniguipput. Faraop sakkutoorpassuisa malersorpaat, Jehovalli pissaanini atorpaa „immamillu matoorneqarput, aqerlutut kiviorarput imarsuarmut“. Kingorna Moses Jehovamut ima erinarsorpoq: „Kina ilittut pissaava illernartuullunilu, mianernangaartutit malunnangaartulianni, tupinnangaartutit naammassisanni?“ — 2 Moses 15:4-12, 19.
21. Jehovap innuttai qanoq ilillutik Ammonikkunnit, Moabikkunnit Seirikkunnillu aniguisinneqarsimappat?
21 Kingusinnerusukkut inuiaqatigiinnit akeraasunit Ammonikkunnit, Moabikkunnit Seirikkunnillu (Edomikkunnit) Jehovap innuttaasa nungutitaanissaannik aarlerinartoqarpoq. Jehova ima nalunaarpoq: „Annilaaqinasi, sakkutoorpassuillu taakku ersigeqinasigit ilissi sorsuttussaannginnassi, Guutili sorsuttussaammat. . . . Ilissi sorsuttussaassanngilasi. . . . Uningaannarumaarpusi isiginnaarlugulu [Jehovap] qanoq ililluni annaatissagaasi.“ Jehovap innuttani aniguisippai akeqqat paatsiveerutsillugit imminnullu saassullutik nungutipput. — 2 Israelikkut 20:15-23.
22. Jehovap qanoq ililluni tupinnartuliornikkut Israelikkut Assyriamiunit aniguisissimavai?
22 Assyriamiut sakkutoorpassuisa Jerusalem saassutilermassuk kunngip Sankeribip Jehova mitallerfigaa inuit qarmarsuarmi issiasut ima oqarfigalugit: „Nunat taakkua [ajugaaffigisimasama] tamarmik guutii ilaqarnerpat nunaminik uanga assannit annaassisimasumik? Taava [Jehovap] qanoq Jerusalaat annaassinnaassanerpaa?“ Guutip kiffai ima oqarfigai: „[Ezekias] uppereqinasiuk nakutinniaraluarmasi [Jehova] isumalluutigeqqullugu ima oqarluni: ’[Jehovap] annaakkumaarpaatigut.’“ Ezekias ilungersorluni aniguinissamik qinuvoq „nunarsuarmi naalagaaffinnut tamanut ilisimaleqqullugu illit [Jehova] kisivit Guutiusutit!“ Jehovap Assyriamiut sakkutuuisa ilaat 185.000-t toquppai kiffanilu aniguisillugit. Tamatumalu kingorna Sankerib guutipiluni pallorfigitillugu ernerminit toqunneqarpoq. — Jesaja kapitalit 36 37-lu.
23. Ullumikkut aniguinissaq pillugu apeqqutit suut akineqartariaqarpat?
23 Isumalluarnissatsinnut pissutissaqarpugut paasigatsigu itsaq Jehovap qanoq ililluni tupinnartuliorluni innuttani aniguisissimagai. Ullumikkummi? Kiffai aalajaatsut qanittukkut suna navianartorsiuutigissavaat tupinnartuliornikkut taassumannga aniguisinneqartariaqalerlutik? Suna pissutigalugu suli aniguisissimanngilai? Jesusip oqaasii makku qanoq ilillutik eqquukkumaarpat: ’Tamakkuli pilerpata aarloritsi, niaqusilu makitissigik, utertinneqarfissarsi qanillimmat’? (Lúkarse 21:28) Guutillu kiffai toqoreersimasut qanoq ilillutik aniguisinneqassappat? Ilanngutassiami tulliuttumi tamakku sammissavavut. (wE 1/4 97)
Uteqqiinissamut apeqqutit
□ Suna pillugu aniguinissamik pisariaqartitsisoqaqaa?
□ Sooq inuit aniguisitsisinnaanngillat?
□ Kikkut aniguisinneqarnissaat qanilliva?
□ Sooq Jehova aniguisitsissasoq tatigilluinnarsinnaavarput?
□ Siornatigut aniguisitsisimanerit suut kajumississutigisinnaavavut?
[Qupp. 10-mi assiliartaq]
Abraham Jehovamik tatiginnilluinnartut ilagaat