Ullut makku sooq taama ajortigippat?

AVIISI atuaraangakku tv-miluunniit nutaarsiassat isiginnaaraangakkit radioaviisiluunniit tusarnaaraangakku nutaarsiassat nuanniitsut ilimagisanngiligit? Sorsunneq suli ingerlasoq, pinerlunnerit ingasatsikkiartuinnartut kaannersuulluunniit nuna ineriartortinniagaq ajoquseraa tusarlugu tupaallakkunanngilatit.

Pissutsit taamaattut atunngikkukkit ilimananngilaq tusaraangikkit pilluaatsorujussuartut misigisassasutit. Kiammi eqqugaasorpassuit tamakku tamaasa misiginneqatigisinnaavai? Taamaakkaluartoq eqqugaasut ataasiakkaat qanimut takkullugit sunnertinngitsoornanngilaq. Allatut oqaatigalugu sorsunneq toqutaasullu pillugit kisitsisitigut paasissutissanik atuarneq Adnaniaraq, nukappiaraq qulingiluanik ukiulik Bosniamiu angerlarsimafitsik qaartartumeerneqarmat anaanami toquneranik isiginnittoq pillugu atuarnermit allaanerulluinnarpoq. Qaammaatiaaluit qaangiutiinnartut Adranip angunni aqqusinikkut ingerlaqatigiitillugu angutaa terlinganeerneqarluni toqutaavoq. Sapaatit akunnialui qaangiutiinnartut qatanngunni niviarsiaraq atuarfiup anitsiartarfiani qaartartumit eqqorneqarluni aanaarnermik toqusoq isigisimavaa. Nakorsap Adnanip tarnikkut ajoquserneranik passussisup paasisimavaa nukappiaraq misigissuseerutivissimasoq, misigissutsit tamaasa, allaat alapernaassinnaaneq, pigiunnaarsimagai. Siooranerup kingumullu qiviarnerup eqqumanera tamaat nuanniillisippaa oqimangernerillu sinia tamaat aserorpaat. Adnan kisitsisitigut naatsueqqissaarnerunngilaq. Meeraavoq naalliuttoq; misiginneqatigiinnarsinnaavarput.

Taamatut aamma ipput silarsuarmi ajortut allat. Kaannersuarmik atuarneq niviarsiaqqap tallimanik ukiulimmik naavanik pullattumik avataanillu saluttunik kaannersuarmik eqqugaalluni inooqqartup assinganik takunninnermit allaanerulluinnarpoq. Pinerlunnerup kisitsisitigut naatsorsoqqissaarsimaneranik atuarneq utoqqarmik uillarnermik unatarneqartumik, ujajaaffigitittumik pinngitsaalineqarlunilu arneriffigitittumik tusarnermit allaanerulluinnarpoq. Ilaqutariit nakkaattoorneranik atuarneq anaanamik piaaraluni meeqqaminik kaatsitsisunik peqqarniitsumillu paasisaqarluni allaanerulluinnarpoq.

Taamaattunik atuarneq annernartuuvoq. Qanorli ajornerutigissava nunarsuarmi perluit atuuttut ilaannik toqqaannartumik eqqugaalluni. Nammineq naalliukkaangavit silarsuarmi nutaarsiassat tusarlugit artorsinneqartutut misigisinnaavutit. Naalliunnerit pinerlunnernik, sorsunnernik, kaannersuarnik nappaatinillu pissuteqartut oqaluttuarisaanermi naleqanngitsumik annertussuseqalersimasut paasilerlugu ajortorujussuuvoq. 1900-kkunni pissutsinik atuisariaqarneq sunniuteqangaarsinnaavoq — amerlasuut siuneerunnermik, siooranermik isumatsangaarnermillu eqqugaasarput.

Inuit uppertut amerlasuut apeqqutit alianartut imaattut akissutissaannik ujartuipput: Sooq pissutsit taama ajortigippat? Inuiaat sumut ingerlappat?

Ajoraluartumik ullumikkut upperisarsiornerit naammaginartunik akissutissaqartitsineq ajorput. Atuagassiap matuma saqqaani apeqqut takoqqaarakku qulartutut qisuariarsimassaatit — qisuariarneq paasinartoq. Allanneri maliinnavillugit upperisarsiortut Biibilimi allassimasut nassuiarniarlugit silarsuup aserornissaa ullulertarpaat nalunaaqutserlugulu taamatulli allassimasoqanngilaq. (Takuuk Matîuse 24:36) Atuagassiamik matumannga saqqummersitsisut Biibilip nammineq nassuiaanissaa piumaneruaat. Biibilip ullut kingullit pillugit eqqartugai piviusorsiortut isumatuujusullu takullugit tupaallaatigissavatit. Biibilillu sooq ullut taama ajortigisut nassuiaannanngilai. Aamma siunissami tuppallernartumik neriuutissaqartitsivoq. Sooq taamaannera ilanngutassiani tulliuttuni atuarsinnaavat.

[Qupp. 3-mi suminngaanneernera]

Jobard/Sipa Press