Singaporemi upperisarsiornikkut kiffaanngissuseq ’tullaarineqartoq’

FEBRUAARIP 24-ani 1995-imi illoqarfimmi Singaporemi politiit angerlarsimaffinni sisamani pakasaallutik misissuipput. Inuit katillugit 69-it tigusarineqarput, ilaatigut arnaq 71-inik ukiulik niviarsiaqqallu 15-inik ukiullit marluk.a Pinerlunniarsimagamik imaluunniit isertortukkut ajoqutaasumik suliaqaramik taamaaliorneqarpat? Naamik. Arlaannaalluunniit navianartutut, ileqqorluttutut inuiaqatigiinnulluunniit ajoqutaasutut isigineqarsinnaasumik sumilluunniit iliuuseqarsimanngilaq. Singaporemi najugalinnut ulorianartorsiortitsisuunngillat, ileqqussatigut naleqartitamikkut, isumannaassutsimikkut atugarissaarnermikkulluunniit naamik. Angerlarsimaffinnili sisamani misissuereerlutik politiit inuit 69-it, Biibili atuaqqissaarniarlugu nuannersumillu katerisimaarniarlutik katersuussimasut, politeeqarfiliaappaat. Tassani unnuisinneqarput. Inussamikkut nuutsinneqarput, killisiorneqarlutik assilineqarlutillu. Inupiluttut pineqarput. Tigusaaqqanertik tamanna tamaat — nalunaaquttap-akunnerini 18-ini pitsaanngitsunik atugaqartitaallutik — eqqartuussissuserisumik attaveqarfiginninnissaminnik sumiinnertillu pillugu ilaquttaminnut sianernissaminnik akueriumaneqanngillat. Taama qarsupitsigisumik iliorneq tamanna innuttaasunut eqqissinermik nuannarisaqartunut inatsisinillu malueruaalluartunut taakkununnga qanoq sunniuteqarsimanersoq eqqoriaannarneqarsinnaavoq.

Pissutsit Tysklandimi nazistit nalaanni aammalu Sovjetunionimi Europallu kangiani kommunistit peqqarniitsumik pissaaneqarnerata nalaani pissutsinut avaanngunartunut eqqaanarput. Immaqa Singaporemut takornariartuinnaap illoqarfimmi naalagaaffiutigisumi ipiitsumi pisuumilu tamaani taamatut pisoqarsinnaanera upperiumanavianngilaa. Singapore aningaasatigut inuttullu atugarisatigut siumukarneq eqqarsaatigalugu tupinnaannartumik tusaamasaalersimavoq. Illoqarfimmi naalagaaffiutigisumi tamatumani inuit oqartarput demokratii tunngavigalugu aqutsillutik, inatsiseqarlutik tunngaviusunik innuttaasut inuttut pisinnaatitaaffiinik tunngaviusunik qulakkeerisunik, ilaatigut oqaaseqarnissamut kiffaanngissutsimik, upperisarsiornikkut kiffaanngissutsimik katersuunnissamullu kiffaanngissutsimik.

Februaarimili parnaarussaasut tigusarineqarput Jehovamut nalunaajaasuunertik pissutigalugu aammalu Biibilimik atuaqqissaarniarlutik kristumiutullu nuannaarsaqatigiinniarlutik katersuussimanertik pissutigalugu. „Innuttaaqatigiit inatsisitigut akuerisaanngitsut ataatsimiinnerannut najuussimasutut“ unnerluutigineqarput.

Singaporemi Jehovap Nalunaajaasui 1972-imi inatsisitigut itigartitaasimapput. Singaporemi ilagiit ukiumi tamatumani pisortatigoortumik nalunaarsugaajunnaarput, aammalu atuagassiat, ilaatigut biibilit, Napasuliaq Alapernaarsuiffiup Biibililiornikkut Atuagassialiornikkullu Peqatigiiffianit saqqummersinneqarsimasut inerteqqutaalerput. Aalajangernermut tamatumunnga tunngaviusunik isornartorsiuinissaq akuerineqanngilaq. Jehovap nalunaajaasuisa februaarimi 1994-imi atuagassianik Biibililersaarutaasunik inerteqqutaasunik pigisaqarnertik pillugu eqqartuussaanerannut atatillugu pisortatigoortumik inuluuginninnerup tamatuma inatsisinut naapertuuttuunera Singaporemi eqqartuussisunit qanittukkut apeqquserneqarpoq. Suliassap tamatuma eqqartuussisunit suliareqqinneqarnera 1994-imi aggustimi pivoq qarsupittumillu itigartinneqarluni. Eqqartuussiviit qullersaanni eqqartussisunut siulersuisup, Yong Pung Howip, naliliinini qaammatip tulliani saqqummiuppaa. Pingaartillugu ersersinniarpaa upperisarsiornikkut kiffaanngissuseq pillugu inatsit unioqqutinneqarsimanngitsoq pillaatissiissutillu pissutissaqarluartut Jehovap nalunaajaasui sakkutuujujumannginnertik pissutigalugu nunap isumannaassusianut ulorianartorsiortitsisuummata. 1995-imi februaarip 17-iani Jehovap nalunaajaasui sisamat Singaporemi eqqartuussissutinik suliarinneqqittarfimmi eqqartuussissutip suliarineqaqqinnissaanik qinnuteqarput. Qinnuteqaataat itigartinneqarpoq.

Aalajangerneq kingulleq tamanna Singaporemi tusagassiuutitigut naalakkersuisunit nakkutigineqartutigut eqqartorneqangaatsiarpoq. Aalajangerneq kingornalu oqallisaanera qanoq pisoqarnissaanik ilimanarsisitsipput. Sapaatip-akunnera ataaseq qaangiummat Jehovap nalunaajaasui 69-it taakku tigusarineqarput. Taakkua ilaannut sisamanut — Englandimi, Frankrigimi, Luxembourgimilu innuttaassuseqartunut — unnerluussutit kingusinnerusukkut atorunnaarsinneqarput. Taamaakkaluartorli aamma taakku nuanniitsumik misigisaqarput. Angut nulianilu Singaporemi ukiorpassuarni najugaqarsimallutillu sulisimapput. Maanna suliffitik annaavaat attartorlugulu inigisaminnit anisitaapput taamaattumillu qanimut ikinnguterpassuatik qimattariaqalerlugit.

Inersimasut sinneri 63-it upperisarsioqatigiinnut inerteqqutaasunut ilaasutut unnerluutigineqarput, ilaallu aamma atuagassianik inerteqqutaasunik pigisaqartutut unnerluutigisaallutik. Ukiut pingasut angullugit parnaarussaanissartik imaluunniit 10.000 koruunit qaangerlugit akiliisitaanissartik imaluunniit taakkua tamaasa ilimagisinnaavaat. Niviarsiaqqat 15-inik ukiullit marluk meeqqanut eqqartuussivimmut sassartinneqarput.

Inuiaassutsimut ataasiussutsimullu ulorianartorsiortitsisuunngitsut

Nunani 200-nit amerlanerusuni Jehovap nalunaajaasoqarfiusuni taakkua innuttaasutut ileqqorissutut, assuarnaatsutut inatsisinillu maleruaalluartutut ilisimaneqarput. Sulianut isertortukkut ajoqutaasunut naalagaaffimmullu akeqqersimaartunut sunulluunniit peqataajumanngilluinnartutut ilisimaneqarput. Taama ittunik suliaqarneq kristumiorpalaanngitsutut anisitaanermillu, tassa ilagiinnut ilaasortaajunnaarsinneqarnermik, kinguneqarsinnaasutut isigaat. Taamaattumik Singaporemi naalakkersuisut taakkununnga ersissutissaqanngilluinnarput. Singaporep naalagaaffittut isumannaassusianut imaluunniit inuiaassutsimut ataasiussutsimullu ulorianartorsiortitsisuunngilluinnarput. (Rûmamiut 13:1-7) Tamanna Napasuliaq Alapernaarsuiffiup Peqatigiiffiata præsidentiata, Milton G. Henschelip, Singaporep premierministerianut Goh Chok Tongimut allagaani, 21. marsi 1995-imik ullulerneqarsimasuni, nassuitsumik erseqqissaatigineqarpoq. Allakkat taakku atuartartuvut paasissutissinniarlugit maani issuarneqarput.

Niuernerup silarsuaani, naalakkersuinerup iluani aammalu namminersortut akornanni inuit kiffaanngissutsimik nuannarisaqartut Singaporemi pissutsit qanoq ineriartornerat malinnaaffigissallugu soqutigissagunarpaat. Inuit pisinnaatitaaffii tunngaviusut kiffaanngissutsillu naalagaaffiup nammineq inatsisaani tunngaviusumi nassaassaasut nunarsuullu sinnerani inuiaqatigiinni akuerisaasut naapertorlugit Singaporemi naalakkersuisut iliussanerpat? Jehovap nalunaajaasuisa nunarsuarmi sumi tamaaniittut Singaporemi uppeqatitik isumaalugisorujussuuaat. Qinnutiminni eqqaamasarpaat Biibilimilu neriorsuummut matumunnga tatiginnillutik: ’Jehovap naapertuilluarneq iluaraa imminullu ilumoortut imminiiginnarnagit.’ — Tussiaat 37:28.

[Quppernerup ataani ilanngussaq]

[Qupp. 30-mi ungalusaq]

21. marsi 1995

Goh Chok Tong

Prime Minister

Istana Annexe

Singapore 0923

Republic of Singapore

Lee Kuan Yew

Senior Minister

Prime Minister’s Office

460 Alexandra Road

37-00 PSA Bldg

Singapore 0511

Republic of Singapore

Asasakka naalakkersuisut!

Singaporemi Reuterip Nutaarsiassaqartitsivianit telegrammi 25. februaari 1995-imik ullulerneqarsimasoq assut isumakulunnarpoq. Tassani nalunaarutigineqarpoq Jehovap Nalunaajaasuisa Biibilimik atuaqqissaarnerat politiinit kipitinneqarsimasoq inuillu 69-it tigusarineqarsimallutik. Nalunaarusiap tamatuma silarsuarmiut tikkuartuuppai Jehovap Nalunaajaasuisa Singaporemi, sulinerata atuagassiaataasalu ukiunit 20-nit amerlanerusuni inerteqqutaaffigisaanni, atugaannik.

Paasiuminaapoq sooq upperisarsioqatigiit nunani 200-nit amerlanerusuni akuerisaasut inatsisitigullu tamakkiisumik sernissorneqartut Singaporemi, nunami demokratiip najoqqutassaanik maleruaanerarfiusumi, inerteqqutaasariaqartut. Tamanna ingammik Singaporep inatsisaani tunngaviusumi innuttaasut upperisarsiornikkut kiffaanngissuseqarnissaannik qulakkeerneqarsimanera eqqarsaatigalugu isumakulunnartuuvoq.

Jehovap Nalunaajaasui nunami sumiluunniit naalagaaffiup isumannaassusianut ulorianartorsiortitsisuusimanngisaannarput. Tamatumali akerlianik nunarsuarmi sumi tamaani eqqissinermik nuannarisaqartutut, eqiasuitsutut, ileqqussatigut eqqortuliortutut inatsisinillu maleruaalluartutut tusaamaneqarput, qularinngilaralu inuttut pissutsit taama ittut illit nunanni siuarsarnissaat kissaatigigit.

Ilumoorpoq Jehovap Nalunaajaasuisa Biibilip kristumiunut najoqqutassiaanik maleruaaqqissaartuunerat paasinerlunneqarnerannik imaluunniit kukkusumik isummerfigineqarnerannik kinguneqartarsimammat. Kisianni aammattaaq kristumiussutsip tunngaviliisua, ’kaasarimut’, taamanikkut naalakkersuisunut, akerliuniartutut kukkusumik isumaqarfigineqartarsimasoq, taamatut pineqartarsimannginnerpa? Jehovap nalunaajaasuisa Jesusip kristumiullu siulliit maligassiaat maliinnarpaat. Nunami najugarisaminni naalakkersuisunik ataqqinnittuupput, akileraartarlutik ileqqussatigullu najoqqutassanik pitsaasunik siuarsaallutik. Innuttaapput nalunngeqatiginnissutsiminnik malinnilluinnartut assuarnaatsullu. Jehovap nalunaajaasui nunami sumiluunniit isertortukkut ajoqutaasumik suleqataasimanngisaannarput, uppernarsaaffigisinnaavakkillu taakku Singaporemiinnerat naalagaaffiup soqutigisaanik ulorianartorsiortitsuunngilluinnarmat.

Qanittukkut tusagassiuutitigut nalunaarut tunngavigalugu naalakkersuisuutitavit Singaporemi Jehovap Nalunaajaasuinut naqisimannittumik iliorsimanerat maanna tamanit ilisimaneqalerpoq. Ingammik uppeqataasa 12 millionit missaanniittut nunarsuarmi sumi tamaaniittut tamanna isumakuluutigaat. Taamaattumik qinnuiginiarpakkit atorfiit pissutsit aaqqinnissaannut atoqqullugu illillu nunanni Jehovap Nalunaajaasui upperisarsiornikkut nalunngeqatiginnissutsikkullu kiffaanngissutsimik, inatsisip tunngaviusup qulakkiigaanik, tuneqqullugit.

Qularutiginngilara Jehovap Nalunaajaasuisa aallartitaannik ammasumik oqaloqateqarnerup peqatigiiffitsinnut suliatsinnullu tunngatillugu paasinerluinerit suulluunniit piissagai, qularunnaarsissagaatillu Singaporemi naalakkersuisut Jehovap nalunaajaasuinut ersissutissaqanngitsut. Nuannaarlunga naapeqatigiinnermik taama ittumik aaqqissuusserusuppunga.

Akissutisinissannut qilanaarpunga.

Ataqqinnillunga,

Milton G. Henschel

President

[Qupp. 3-mi suminngaanneernerat]

Nik Wheeler/H. Armstrong Roberts