Eqqaamavigit?

Nuannaarutigisimavigit Napasuliaq Alapernaarsuiffik normui kingulliunerusut atuassallugit? Taamaaliorsimaguit soqutigissavat matuma kingulianiittut eqqaaqqilaassallugit.

▫ Upperisarsiornikkut sallusuissut nassaassaava?

Jesus Kristus oqarsimavoq: ’Sallusuissut ilisarissavarsi, sallusuissutillu inussiaajunnaarsissavaasi.’ (Juánase 8:32) Sallusuissutip nassaassaanera Jesusip erseqqissarpaa, aammali ersersippaa pallorfiginninnerput Guutimut iluarisaassappat sallusuissutip nassaarinissaa pisariaqartoq. Arnamut Samariamiumut oqarpoq: ’Pallorfiginnittut ilumoortut Ataataq pallorfigissavaat anersaakkut ittumik ilumoortumillu.’ (Juánase 4:23) — 1/05, qupp. 5.

▫ Ullut tamaasa Biibilimik atuartarnerput qanoq iluaqutigaarput?

Biibili atuaqqikkaangatsigu nutaanik paasisaqartuartarpugut, qaammatini kingullerni tusarsimasat, takusimasat misigisimasallu eqqarsaatigalugit ullut kingulliit pillugit siulittuutit misissoqqikkaangatsigik paasisaqarnerusarpugut. Nammineq inuunermi misilittagaqarnerujartortilluni ajornartorsiutinillu assigiinngitsunik qaangiiniartilluni Biibilimik misissuisartup unnersuussutit siornatigut atuaannarsimasani paasinerulissavai. (Ussatit 4:18) — 1/5, qupp. 16.

▫ Allassimaffiit qanoq eqqaamasinnaavigit?

Biibili atuartillugu allassimasut eqqaamarusutatit nalunaaqutsikkit, imaluunniit pappiaqqamut allattukkit taavalu tamakku ullut tamaasa takusartakkannut inissikkit. Alanngaarniartakkit, eqqarsaatigisakkit atortarlugillu. Ataatsikkut amerlavallaanngitsut alanngaarniartakkit, immaqa sapaatip-akunneranut allassimaffik ataasiinnaq marlulluunniit. — 1/5, qupp. 19.

▫ Aliasuttut qanoq tuppallersarneqarsinnaasut?

Tusarnaarsinnaavugut. Imminut avoqqaarinerit assortukkit. Ikiuinissannut piareersimajuaannarit. Qiimmassaataasunik allagaqarit. Aliasuttoq qinoqatigisaruk. (Jâko 5:16) Ikiuinerit ingerlatiinnaruk. — 1/6, qupp. 14, 15.

▫ Anersaakkut qatanngutaasut ilaqutariinni upperisarsiornikkut avissaarsimasuniittunik Guutimik mianerinninnikkut naalannissamik qanoq ikiuisinnaappat?

Periarfissaqaraangatta kajumissinartumik tuppallernartumillu oqaaseqarfigisariaqarpavut. (1 Tásalûníkamiut 5:14) Periarfissaqarutta naleqqulluarpallu katerisimaarnitsinnut teokratiimullu tunngasumik sammisassatsinnut qaaqqusinnaavavut. Qinnunnissaat eqqaamasariaqarparput. (Rûmamiut 1:9; Evfisumiut 1:16) — 1/6 qupp. 22.

▫ Oqaluussiartornermi naammagittarneq sukkut pitsaaquteqarpa?

Naammagittarnerup oqaluussisartoq ikiortarpaa soqutigisaqannginnerup akerlilersuinerillu naapissinnaasani nikallujuilluni atorsinnaanissaannut. Akerlianik puffassimaarnartumik oqqateqateqarnissamut taarsiullugu, oqaluussisartoq naammagittartoq saamasumik akisinnaavoq imaluunniit eqqissisimasumik qimagutiinnarsinnaalluni, taammaalilluni eqqissisimanini nuannaarninilu attatiinnarsinnaavai. (Mat. 10:12, 13) Taamaaliornikkut inuit peqqusersuitsut Naalagaaffiup tusarliussaanut kajungilersinneqarsinnaapput. — 1/8, qupp. 30.

▫ Sooq pingaaruteqarpa sallusuissut Biibilimiittoq ilisimassallugu?

Sallusuissut ilisimagutsigu sallunermit, salloqittagaanermit upperisapalaanillu aniguisinneqassaagut. Sallusuissut inuunitsinni maleruarutsigu misilinneqarnitsinni nikallujuinnissatsinnut nakussatsissavaatigut. Aammattaarlu neriuutissaqartitsimmat misilinneqarnerit suugaluartulluunniit tamaasa atorneranni nikallujuittuarsinnaavugut. — 1/7, qupp. 31.

▫ Peter qanoq isumaqarluni oqarpa ’uisut nuliaasut ataqqinninnermik’ takutitsivigissagaat? (1 Pîtruse 3:7)

Uisup nuliaminik ataqqinnittup nikanarsassanngilaa nikassaaviginagulu. Akerlianik oqaatsimigut iliuutsimigullu takutissavaa — angerlarsimaffimminniikkaluarunik allamiluunniit — ataqqilluinnarini. (Ussatit 31:10-31) — 1/8, qupp. 19.

▫ Ajortuliorsimasoq peqqissiminngitsoq ilagiinnit anisitaagaangat sooq asannittuliornerua?

Ilagiinnit anisitsisarneq ersiutaavoq Jehovamut aqqutigeqqusaanullu asanninnermut. (Tussiaat 97:10) Asannittuliorfiginninneruvortaaq inunnut peqqusersuitsumik inuusunut, akornanni ajortumik sunniisoq peerneqassammat. Aammattaarli ilagiit minguitsuutittuarneqassapput. (1 Korintumiut 5:1-13) — 1/9, qupp. 20.

▫ Ullumikkut ’inussiaq aalajaallunilu silatooq’ Jesusip Matîuse 24:45-47-mi eqqartugaa qanoq ililluta ilisarisinnaavarput?

Ingammik ilisarineqarsinnaavoq atuagassianik Biibililersaarutaasunik pilersuineratigut; aammattaaq ajoqersuisarpoq oqaluussissutigalugulu ’naalagaaffimmik tusagassaq nuannersoq’. Aammattaaq Guutip oqaasia, Biibili, maleqqissaarpaa. (Matîuse 24:14; 19, 20) — 1/9, qupp. 15, 16.