’Siuneqartutut Guutimut kiffartuussineq’
’Oqaaqqissaarpassi . . . timisi tunniuteqqullusigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ — RÛMAMIUT 12:1.
1, 2. Biibilip najoqqutassiaasa maleruarnissaannik ilinniarneq qanoq oqaatsinik nutaanik ilinniarnissamut assersuunneqarsinnaava?
MISILINNIKUUIUK oqaatsit nutaat ilinniarlugit? Taava qularnanngitsumik miserratigissanngilat tamanna qanoq ilungersunartigisoq. Tassaaginnanngilaq oqaatsinik nutaanik ilinniarneq. Oqaatsit nutaat iluamik atussagaanni aamma oqaasilerissutit tamakkununnga atasut atorsinnaasariaqarpatit. Paasisariaqarpat oqaatsit qanoq imminnut attuumassuteqartut qanorlu imminnut attaveqartariaqartut oqaaseqatigiinngorlugit anissagaanni.
2 Guutip oqaasianik ilisarsissagaanni aamma taamaappoq. Allassimaffiit ilaannaasa ilikkarnissaat naammanngilaq. Aamma Biibilip ’oqaasilerissutaalusooq’ ilikkartariaqarpavut. Allassimaffiit imminnut qanoq atassuteqarnersut najoqqutassianillu sunik ulluinnarni atorsinnaasatsinnik imaqarnersut paasisariaqarparput. Taamaalilluta ’piginnaassuseqarluarsinnaavugut ajunngitsuliornernut tamanut piareersarluagaalluta’. — 2 Timûtiuse 3:17, NV.
3. Guutimut kiffartuussineq eqqarsaatigalugu ukiumi 33-mi u.n.k. sumik pisoqarsimava?
3 Mosesip inatsisaasa nalaanni maleruagassat sukumiisut maleruarnerisigut ilumoorneq annertuumik takutinneqarsinnaavoq. Ukiumili 33-mi u.n.k. Jehovap Inatsisit atorunnaarsippai, ’nappakkamut naalliutsitaaffimmut’, ernermi toqutsinneqarfianut, ’paagukkamigit’. (Kulorsamiut 2:13, 14, NV) Tamatuma kingorna Guutip innuttai pilliuteqaqqussutinik maleruagassanillu amerlasuunik tunineqanngillat. Imali oqarfigineqarput: ’Taamaattumik oqaaqqissaarpassi, qatanngutikka, Guutip nallittuissusia pillugu timisi tunniuteqqullusigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ (Rûmamiut 12:1) Aap, kristumiut Guutimut kiffartuussinermi imminnik pilliuteqartariaqarput, uummatikkut, tarnikkut isumakkullu iluunngarlutik nukitillu tamakkerlugit. (Mákorse 12:30; naleqqiuguk Tussiaat 110:3.) Kisianni qanoq ililluta ’siuneqartutut Guutimut kiffartuussisinnaavugut’?
4, 5. ’Siuneqartutut Guuti kiffartorfigissagaanni’ qanoq paasisariaqarpa?
4 Oqaaseq ’siuneqartutut’ griikerit oqaasiannit logikosʹ-imit nutserneqarsimavoq isumaqarlunilu ’silaqassuseq’ imaluunniit ’silassorissuseq’. Guutip kiffai kajumissaarneqarput nalunngeqatiginnissuseq Biibili tunngavigalugu ajoqersorneqarsimasoq atortaqqullugu. Kristumiut maleruagassat amerlasuut tunngaviginagit najoqqutassialli Biibilimeersut eqqarsaatigeqqissaarlugit aalajangertariaqarput. Biibilip ’oqaasilerissutai’ qanorlu najoqqutassiai assigiinngitsut imminnut attuumassuteqartut paasisariaqarpaat. Taamaalillutik silaqassusertik atorlugu oqimaaqatigiissumik aalajangersinnaasarput.
5 Imali paasisariaqarpa kristumiut inatsiseqanngitsut? Naamerluinnaq. Kristumiut Allagaataanni griikerisuuni guutipilussiorneq, kinguaassiuutitigut kanngunartuliorneq, inuarneq, salluneq, anersaapilussiorneq, aammik atornerluineq ajortuliallu allat erseqqissumik inerteqqutigineqarput. (apustilit suliait 15:28, 29; 1 Korintumiut 6:9, 10; sarĸúmersitat 21:8) Kisianni Israelikkunnut sanilliulluta uagut annertuneroqisumik silaqassuserput atortariaqarparput Biibilimi najoqqutassiat ilikkarniarlugit paasiniarlugillu qanoq atussanerlugit. Soorlu oqaatsit nutaat ilinniassagutsigik piffissaq atortariaqarparput sukataartariaqarlutalu. Qanoq ililluta silaqassuserput ineriartortissinnaavarput?
Silaqassutsit ineriartortiguk
6. Biibili atuaqqissaaraanni aamma suna pisariaqarpa?
6 Siullermik eqiasuilluta Biibili atuaqqissaartariaqarparput. Guutip oqaasii isumassarsiarititaasut ’iluaqutaapput ajoqersuutaallutillu inerteqqutaallutik, iluarsiartuutaallutik, iluarnermut perorsaataallutik’. (2 Timûtiuse 3:16) Ilimagisinnaanngilarput Biibilimi allassimaffimmi ataasiinnarmi ajornarsiummut aalajangersimasumut aaqqiissutissaq nassaarineqarsinnaassasoq. Immaqa allassimaffiit arlallit ajornartorsiummut tamatumunnga paasissutissat misissorlugit eqqarsaatigisariaqarpavut. Guutip tamatuminnga isiginninnera paasiniarlugu ilungersorluta ujarlertariaqarpugut. (Ussatit 2:3-5) Unnersuunneqarnissamik ujartuinitsigut ’ilisimasuunerput’ ersersittariaqarparput, tassami „unnersuunneqarfissarsisoq silatuujuvoq“. (Ussatit 1:5, NV) Inuup paasisallip pingaaruteqartut tamaasa immikkoortissinnaavai paasillugulu tamakku imminnut qanoq attuumassuteqartut. Ikkussortakkatut suut tamaasa katersorsinnaavai tamakkerlugillu paasisinnaallugit.
7. Angajoqqaat qanoq ilillutik perorsaaneq pillugu najoqqutassiat Biibilimeersut eqqarsaatigeqqissaarsinnaavaat?
7 Assersuutigalugu, meeqqanik perorsaaneq pillugu Ussatit 13:24-mi allassimavoq ataataasup ernerminik asannittup ’sukannersumik perorsartaraa’. Allassimaffik tamannaannaq eqqarsaatigigutsigu kukkusumik isumaqarsinnaavugut sukannersumik pillaasarneq akuerisaasoq. Kulorsamiut 3:21-mili tamatumunnga oqimaaqatigiissumik unnersuussuteqarpoq: ’Angajoqqaat ukorsii, qitornasi uumitsatseqinasigik anusinngoqqunagit.’ Angajoqqaat silaqassusillit najoqqutassiat tamakku imminnut naleqquttunngortikkunikkik perorsaanertik atornerlussanngilaat. Meeqqatik misiginneqataasumik, paasinnittumik ataqqinnittumillu iliorfigissavaat. (Evfisumiut 6:4) Taamaattumik, angajoqqaatut allatulluunniit najoqqutassiat Biibilimeersut atoraangatsigik, silaqassuserput ineriartortissinnaavarput pingaaruteqartut tamaasa misissoqqissaaqqaarlugit. Taamaalilluta Biibilip ’oqaasilerissutai’ ilikkarsinnaavavut, paasillugu Guutip siunertaa sunaasoq tamannalu qanoq anguneqarsinnaasoq.
8. Aliikkusersuineq pillugu sukannersumik ingasattumillu isumaqarneq qanoq pinngitsoortissinnaavarput?
8 Silaqassuserput aamma ineriartortissinnaavarput sukannersumik ingasattumillu isumaqarniarnata. Aalajangiussiniarutta tamanna silaqassutsitta ineriartornissaanut akornutaassaaq. Assersuutigalugu aliikkusersuineq taaneqarsinnaavoq. Biibilimi allassimavoq: „Ilisimavugut Guutimit pisugut, silarsuarli tamaat ajortup pissaaneqarfigigaa.“ (1 Juánase 5:19, NV) Tamanna ima paasisariaqarpa atuakkat, filmit tv-milu allakkaatitat tamavimmik ajortunik imaqartut Satanerpalaartuusullu? Isuma tamanna ingasaassinngitsutut oqaatigineqarsinnaanngilaq. Soorunami ilaat aalajangersinnaapput tv, filmit atuakkallu silamiorpalaartuusut tamaasa ingalassimaniarlugit. Taamaaliorsinnaapput tamannalu pillugu isornartorsiorneqartariaqaratik. Aammali taakkua allat assingusumik taama sukannertigisumik isumaqarnissaannut kimigiiserfigisariaqanngilaat. Peqatigiiffiup ilanngutassiat aliikkusersuineq aliikkusersuutissallu pillugit saqqummersissimavaat silatuumik qinersisinnaanissatsinnut najoqqutassianik Biibilimeersunik imallit. Silatusaarnerussanngilarlu tamakku ilaginnaannassagutsigik taamaalilluta eqqarsariaatsimit kanngunartuliortitsisumit, sualuttumik nakuusernermit anersaapilussiornermillu aliikkusersuinerup silamiorpalaartuusup imarisaanit sunnertikkutta. Aliikkusersuutissanik silatuumik qinersissagutta silaqassuseqarluta Biibilip najoqqutassiai atortariaqarpavut Guutimut inunnullu ilerasuuteqaqqunata. — 1 Korintumiut 10:31-33.
9. ’Ilisarsineq sianinerlu’ qanoq paasisariaqarpat?
9 Ersarippoq ullumikkut aliikkusersuutit amerlasuut kristumiunut naleqqutinngimmata.a Taamaattumik uummaterput sungiusartariaqarparput ’ajortup uumiginissaanik’ inuit ukiuni hundredelinni siullerni inuusimasut ileqqussatigut ’sianigisaaruttut’ assigeqqunagit. (Tussiaat 97:10; Evfisumiut 4:17-19) Tamakku eqqarsaatigisinnaajumallugit ’ilisarsineq sianinerlu’ pisariaqartippavut. (Filípimiut 1:9) Griikerit oqaasiat ’sianineq’-mik nutserneqarsimasoq isumaqarpoq ’ileqqussatigut siuneqassuseq imaluunniit paasinnissinnaassuseq’. Eqqortumik oqaatigalugu oqaatsip inuup misigissutai, soorlu ilaatigut takusaqarsinnaassuseq, pivai. Aliikkusersuutit allalluunniit inuup nammineq aalajangigassarisai eqqarsaatigigutsigik, ileqqussatigut siuneqassuserput ima eqqorluartigisariaqarpoq ajortuusorisat ajunngitsuusorisallu aammalu tamakkua akornanniittut immikkoortilluarsinnaallugit. Tamatumanili Biibilip najoqqutassiai atorlugit ingasaassiniartariaqanngilagut isumaqarluta qatanngutivut tamarmik uatsitut aalajangertariaqartut. — Filípimiut 4:5.
10. Jehovap kinaassusia soorlu Tussiaat 15-imi saqqummersinneqartoq qanoq ililluta paasilersinnaavarput?
10 Silaqassutsitta ineriartortinnissaanut periaatsit pingajuat tassa Jehovap eqqarsariaasianik pigiliussinissaq tamatuminngalu uummamiugisaqalernissaq. Jehovap oqaatsimini kinaassutsini najoqqutassianilu saqqummersissimavai. Assersuutigalugu Tussiaat 15-imi allaatigineqarpoq inuit qanoq ittut Jehovap iniminut qaaqqusarai. Inuit taamaattut naapertuilluartuliortarput, uummatimikkut ilumoortumik oqaluttarlutik, neriorsuutitik eqquutittarlugit allallu namminissarsiorlutik iluaqutiginiarnagit. Tussiaat tamanna atuartillugu imminut aperigit: ’Uanga taama pissuseqarpunga? Jehovap iniminut qaaqqussavaanga?’ Siuneqassuserput sungiusarneqartarpoq uagut eqqarsariaaserput Jehovap aqqutigeqqusaanut eqqarsaataanullu naapertuunnerujartorortillugu. — Ussatit 3:5, 6; Eprîarit 5:14.
11. Farisiiarit qanoq ilillutik ’eqqartuussisissaq Guutimillu asanninneq saneqquttarsimavaat’?
11 Tamatumani farisiiarit unioqqutitsilluinnarsimapput. Farisiiarit Inatsisit maleruagassatut nalunngilluarpaat kisianni ’oqaasilerissutaat’ paasinagu. Inatsiserpassuit sukumiisumik alanngaarsinnaavaat tamakkuninngali Inatsisiliorsimasup kinaassusia ilisarinagu. Jesusip ima oqarfigai: ’Naatsiiat akussat naasullu qajaasaasat naatsiiallu nalinginnaat qulinginik tunniussisarassi, eqqartuussisissarli Guutimillu asanninneq saneqquttarlugit.’ (Lúkarse 11:42) Sukannersumik isumaqartaramik uummatimikkullu manngertikkamik farisiiarit silaqassusertik atunngitsoortarpaat. Tunngavimminut akerliusumik eqqarsariaasiat ersersinneqarpoq Jesusip ajoqersugai isornartorsiulermatigik ajoqersukkat sabbatimi karrinik nutsuillutik nerimmata; taamalu ullormi tassanerpiaq ilerasuuteqanngivillutik Jesus toqutsissallugu pilersaarusiorput! — Matîuse 12:1, 2, 14.
12. Qanoq ililluta Jehovap pissusiinut naapertuunnerujartorsinnaavugut?
12 Farisiiarit assigerusunngilluinnartariaqarpavut. Guutip oqaasianik ilisarsinerput ikiortigalugu eqqarsaativut pissutsivullu Jehovap pissusiinut naapertuunnerujartortissavavut. Qanoq ililluta? Biibilimi Biibililersaarutinilluunniit atuaraangamik ilaasa iluaqutigisimavaat apeqqutissat imaattut eqqarsaatigalugit: ’Paasissutissat tamakku Jehova taassumalu pissusii pillugit sumik ilinniutigisinnaavakka? Qanoq ilillunga allanik iliorfiginninninni Jehovap pissusii ersersissinnaavakka?’ Apeqqutit taamaattut eqqarsaatigalugit silaqassuserput ineriartortissinnaavarput tassuunalu ’Guuti malinniarlugu’. — Evfisumiut 5:1.
Guutip Kristusillu kiffaraatigut, inuit pinnatik
13. Farisiiarit qanoq ilillutik ileqqussat eqqarsaatigalugit kisermaassisutut iliortarsimappat?
13 Utoqqaanertat akuerisariaqarpaat ilagiinni paarisamik namminneq silaqassusertik atussagaat. Ilagiinniittut inunnut kiffaanngillat. ’Suli inuit nuannarisaannik iliorniaraluaruma Kristusip kiffarinngeqqajarpaanga,’ Paulus taama allassimavoq. (Galâsiamiut 1:10; Kulorsamiut 3:23, 24) Akerlianik farisiiarit inuit isumaqartittarpaat inunnut iluarisaaneq Guutimut iluarisaanermit pingaarnerusoq. (Matîuse 23:2-7; Juánase 12:42, 43) Farisiiarit ileqqussanik kisermaassisutut namminneq inatsisiliortarput allallu tamakkuninnga qanoq maleruaaqqissaartiginersut misileqqissaartarlugit. Farisiiarinik malinnittut Biibili tunngavigalugu nalunngeqatiginnissusertik atorsinnaajunnaariartortarpaat taamaalillutillu inunnut inussiaalerlutik.
14, 15. (a) Utoqqaanertat qanoq takutissinnaavaat ilagiinniittunut suleqataallutik? (b) Inuup nammineq nalunngeqatiginnissusia tunngavigalugu aalajangigassat utoqqaanertat qanoq iliuuseqarfigisariaqarpaat?
14 Ullumikkut utoqqaanertat nalunngilaat savaatit nassuertittussaanagit. Kristumiut tamarmik immikkut akisussaaffeqarput. (Rûmamiut 14:4; 2 Korintumiut 1:24; Galâsiamiut 6:5) Tamannalu naleqqulluartuuvoq. Aap, ilagiinnut ilaasortat inunnut kiffaagaluarunik nakkutigineqarnertillu pissutigiinnarlugu naalattarlutik, taava allanit nakkutigineqarunnaarunik qanoq iliussappat? Paulusip pissutissaqarluarluni Filippimiut nuannaarutigisimavai, ima allakkami: ’Taamaattumik, asasakka, soorlu naalattaannartusi, taamaallusi najornissisut piinnarnasi maannali alisimatillunga annerusumik annannissarsi sulissutigisiuk mianersorlusi uulillusilu.’ Taakku Kristusimut, Paulusimuunngitsoq, kiffaasimapput. — Filípimiut 2:12.
15 Taamaattumik apeqqutit inuup nammineq nalunngeqatiginnissusia tunngavigalugu aalajangerneqartariaqartut pineqaraangata utoqqaanertat allat pillugit aalajangerniarneq ajorput. Najoqqutassiat Biibilimeersut pineqartut nassuiarsinnaavaat taava aalajangigassaqartup nammineq silaqassutsini atorlugu aalajangiisittarlugu. Tassaavoq akisussaaffik ilungersunartoq inuup nammineq akisussaaffigisaa.
16. Israelikkut akornanni ajornarsiutit qanoq iliuuseqarfigineqarsinnaasarsimappat?
16 Eqqarsaatigiuk taamani Jehovap Israelikkut eqqartuussisut atorlugit siulersorsimammagit. Biibilimi ima allassimavoq: „Tamatuma nalaani Israelikkut kunngeqanngillat. Angutit tamarmik namminneq iluarisaminnik iliuinnartarput.“ (Eqqartuussisut 21:25) Taamaattoq Jehovap innuttami unnersuunneqarnissaat isumagisimavaa. Illoqarfinni tamani angutit utoqqaanertat inersimalluartuusut apeqqutissalinnik ajornartorsiutilinnillu ikiuisinnaasimapput. Saniatigullu palasit Levikkuusut pitsaasumik sunniuteqartarsimapput inuit Guutip inatsisaanik ajoqersortarlugit. Apeqqutissallu paasiuminaangaartut takkukkaangata palasiunerup immeraatit Urim Tummimilu atorlugit Guuti toqqaannartumik aperisinnaavaa. Qinerlerfissiami Insight on the Scriptures-imi ima allassimavoq: „Inuup periarfissat tamakku atorsimagunigit, Guutip inatsisaanik ilisarsisimalluni maleruaallunilu nalunngeqatiginnissutsiminut pitsaasumik unnersuunneqartarpoq. Taamaalilluni taanna ’nammineq iluarisaminik iliortaruni’ iluatsitsissaaq. Jehovap innuttani kajumillutik pitseriillutilluunniit isumaqarnissaannut iliortarnissaannullu periarfissaqartissimavai.“ — Atuagaq 2, quppernerit 162-3.b
17. Utoqqaanertat qanoq takutissinnaavaat Guutip najoqqutassiai naapertorlugit, namminneq isumartik naapertornagu, siunnersuisarlutik?
17 Israelitoqqami eqqartuussisunut utoqqaanertanullu assingusumik ilagiinni utoqqaanertat ajornartorsiutit pillugit inersimalluarlutik ikiuisarlutik iluaqutaasunillu siunnersuisarput. Pisariaqaraangat ’inerterillutik oqaaqqissaarillutillu tamatigut kamajuillutik ajoqersuiniartariaqarput’. (2 Timûtiuse 4:2) Guutip najoqqutassiai naapertorlugit, namminneq isumartik naapertornagu, taamaaliortarput. Utoqqaanertat maligassaalluarlutik uummatit anguniarlugit ajoqersuigaangata iluaqutaasorujussuusarpoq!
18. Sooq immikkut kinguneqarluassava utoqqaanertat allat uummataat killinniartarpatigik?
18 Uummat kristumiut suliniutaannut kajumissutaavoq ingerlatitsissutaallunilu. Taamaattumik Biibilimi allassimavoq: ’Inuuneq tassannga aallaaveqarpoq.’ (Ussatit 4:23) Utoqqaanertat allat uummataat killippassuk ilagiinniittut Guutimut kiffartuussinermi sapinngisamik iliuuseqarnissaminnut kajumissaarneqassapput. Namminneq kajumissutsiminnik iliuuseqartassapput, tamatigut allanit kajumissaarneqartariaqaratik. Jehovap pinngitsaaliinermit naalannissarput kissaatiginngilaa. Uummammit asanninnermik ulikkaartumit naalannissarput kissaatigaa. Utoqqaanertat kiffartuussinermut uummammit kajuminnermit aallaaveqartumit kajumissaarisinnaapput ilagiinniittut silaqassutsimik ineriartortitsinissaannut ikiortarlugit.
’Kristusip isumaa’ ineriartortiguk
19, 20. Sooq ’Kristusip isumaanik’ ineriartortitsinissaq pingaaruteqartorujussuua?
19 Soorlu eqqaaneqareersoq Guutip inatsisaanik ilisimasaqarneq naammanngilaq. „Siuneqassusermik tuninnga unioqquteqqunagit inatsisitit, maleruaqqullugillu uummatikkut iluunngarlunga,“ tussiaasiortoq taama allassimavoq. (Tussiaat 119:34) Oqaatsimini Jehovap ’Kristusip isumaa’ saqqummersissimavaa. Jesusip silaqassuseqarluarluni Jehova kiffartorfigigamiuk naammalluinnartumik maligassiuussimavaatigut. Guutip inatsisai najoqqutassiaalu paasillugit assuarnaatsumik maleruaqqissaartarsimavai. Taassuma maligassiaa misissorluarutsigu ’siunersisinnaassavarput silissusia takissusialu itissusialu kingissusialu, Kristusillu asannissusia ilisarsinermit annerungaartoq ilisarileqqullugu’. (Evfisumiut 3:17-19) Aap, Biibili tunngavigalugu Jesus pillugu ilinniarsimasavut inuit ilisimassusiannit annerungaarpoq, Jehovammi qanoq ittuussusianik ilisimasaqarluartippaatigut. — Juánase 14: 9, 10.
20 Taamaattumik Guutip oqaasia atuaqqissaartarutsigu Jehovap eqqarsariaasia ilinniarsinnaavarput taamaalillutalu oqimaaqatigiissumik aalajangersinnaalluta. Ilungersortariaqarpugut. Eqiasuilluta Guutip oqaasia atuaqqissaartariaqarparput Jehovallu kinaassusianut najoqqutassiaanullu ilisimassuseqarluariartorluta. ’Oqaasilerissutit’ nutaat ilikkariartorpavullusooq. Taamaaliorutta Paulusip kajumissaarutaa manna maleruassavarput: ’Oqaaqqissaarpassi . . . timisi tunniuteqqullusigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ — Rûmamiut 12:1. (wE 15/6 95)
[Quppernerup ataani ilanngussat]
a Tassaapput aliikkusersuutissat anersaapilussiornermik, kanngunartuliornermik naalliutsitsinermillu imallit, aammalu aliikkusersuutissat ’ilaqutariinnut tamanut naleqquttuusorisat’ tamakku kanngunartuliornermik allamillu kristumiut akuerisinnaanngisaannik imaqarpata.
b Napasuliaq Alapernaarsuiffiup Peqatigiiffianit naqiterneqartoq. (Tuluttuinnaavoq)
Suut ilikkarpigit?
□ Ukiumi 33-mi u.n.k. Guutimut kiffartuussineq eqqarsaatigalugu allanngortitsineq suna pisimava?
□ Qanoq ililluta silaqassuserput ineriartortissinnaavarput?
□ Utoqqaanertat qanoq ilillutik ilagiinniittut Guutimut Kristusimullu kiffanngornissaannut ikiorsinnaavaat?
□ Sooq ’Kristusip isumaanik’ ineriartortitsisariaqarpugut?
[Qupp. 24-mi assiliartaq]
Utoqqaanertat allat silaqassutsiminnik atuinissaannut ikiortarpaat