Suup Guutimik kiffartuussininnut killippaatit?
’Asassavat Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit.’ — MÁKORSE 12:30.
1, 2. Oqaluussinermut atatillugu pissanganartut suut naammassineqartarpat?
BIILIP pitsaassusia isikkuaniinnaq aalajangerneqarsinnaanngilaq. Qaliparlaajuguni nutaaliatullu sanaajuguni pisiniartumut pilerinartorujussuusinnaavoq. Imaaliallaannarli takuneqarsinnaanngitsut — motoria atortorissaarutillu allat ingerlaneranut pisariaqavissut — pingaaruteqarnerusarput.
2 Kristumiup Guutimut kiffartuussinera aamma taamaappoq. Jehovap nalunaajaasui Guutimik mianerinninnerminni suliassaqangaartarput. Ukiut tamaasa nalunaaquttap-akunneri 1 milliardit sinnerlugit atortarpaat Guutip naalagaaffia pillugu nutaarsiassaq nuannersoq oqaluussissutigalugu. Biibilimik atuaqqissaaqatigiinnerit millionillit aqunneqartarput inuillu hundredetuusintilikkuutaat kuisittarlutik. Illit nutaarsiassamik nuannersumik oqaluussisartuuguit — angusaqarpallaanngikkaluarlutilluunniit — angusimasarpassuarnut tamakkununnga peqataasimavutit. Qularisariaqanngilallu ’Guuti iluaatsuunnginnami sulinerit asanninnerillu aqqa pillugu ileqqorisat puiussanngikkai’. — Eprîarit 6:10.
3. Suliaqarnerup saniatigut suna kristumiut pingaaruteqartittariaqarpaat, aamma sooq?
3 Kiffartuussinittali piviusumik naleqassusia — eqimattatut ataasiakkaatulluunniit — kisitsisitiguinnaq naatsorsuutigineqarsinnaanngilaq. Soorlu Jehova Samuelimut oqarsimasoq: „Inuit isiminnut saqqumisuinnaat isigisarpaat, [Jehovalli] inuup uummataa isigisarpaa.“ (1 Samuel 16:7) Aap, uummammiugisavut Jehovap isaani pingaarnerupput. Soorunami inuup suliai pingaaruteqarput. Guutimik mianerinnilluni suliaqaraanni tamakku Jehovap ajoqersuutaanut naalannarsisitsisinnaapput allanullu ajoqersuganngorumaartussanut kajungernartuullutik. (Matîuse 5:14-16; Títuse 2:10; 2 Pîtruse 3:11) Suliaqarnerpulli immini naammanngilaq. Jesusip makissimasup ilagiit Efesusimiittut isumakuluutigai naak taakku ajunngitsumik suliaqarluaraluartut. Ima oqarfigai: ’Suliatit ilisimavakka, . . . kisianni assuaraakkit asannissutsit siulleq soraarukkakku.’ — sarĸúmersitat 2:1-4.
4. (a) Guutimut kiffartuussinerput qanoq ililluta ileqqulersuutaannaasutut isigilersinnaavarput? (b) Sooq imminut misiliinissaq pisariaqarpa?
4 Tassa navianartoqarpoq piffissap ingerlanerani Guutimut kiffartuussinerput ileqqulersuutaannaasutut isigilersinnaagatsigu. Arnap kristumiup ima allaatigaa: „Oqaluussiartortarsimavunga, ataatsimiigiartarlunga, atuaqqissaartarlunga, qinusarlunga — maskiinatulli misigissuseqarnanga taamaaliortarsimavunga.“ Soorunami Guutip kiffai ’qunutinneqartutut’ ’nikallortutulluunnit’ misigigaluarlutik taamaattoq qasusuisaartuaraangamik nersorneqartariaqarput. (2 Korintumiut 4:9; 7:6) Kisianni kristumiutut inuunerput assigiiaaginnarmik ingerlalerpat imminut killisiortariaqarpugut. Biilit pitsaanerpaat allaat akuttunngitsumik aserfallattaalineqartariaqarput; tamatumunnga assingusumik kristumiut tamarmik akuttunngitsumik imminut misissoqqissaartariaqarput. (2 Korintumiut 13:5) Allat suliavut takusinnaavaat, pissutiginiakkavulli takusinnaanagit. Taamaattumik tamatta apeqqut manna sammisariaqarparput: ’Suup Guutimut kiffartuussininnut killippaanga?’
Eqqortumik pissuteqarnissamut akornutaasut
5. Jesusip oqaasii naapertorlugit inatsisit suna siullersaraat?
5 Aperineqarami inatsisit Israelikkunnut tunniunneqarsimasut tamarmik suna siullersarineraat Jesusip akilluni inatsisit ilaat, qallikkut atukkat pinnagit inuulli pissutiginiagaanik ersersitsisoq, innersuussutigaa: ’Asassavat Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit.’ (Mákorse 12:28-30) Taamaalilluni Jesusip takutippaa soorpiaap Guutimut kiffartuussinitsinnut killittariaqaraatigut — asanninnerup.
6, 7. (a) Satanip qanoq ililluni ilaqutariinneq saassuttarpaa, aamma sooq taamaaliortarpa? (2 Korintumiut 2:11) (b) Perorsaanerup qanoq ililluni inuup Guutip oqartussaassusianik isumaqarfiginninnera sunnersinnaavaa?
6 Satanip pissutsimik tamatuminnga pingaarutilimmik, asanninnermik, ineriartortitsisinnaanerput akornusersorniartarpaa. Tamanna anguniarlugu ilaatigut ilaqutariit saassuttarpai. Sooq? Pingaartumik ilaqutariit iluanni asanninneq ilinniarneqartarmat. Satanip najoqqutassiaq Biibilimeersoq, meeraanermi ilinniarneqarsimasut inersimasuunermi iluaqutaaqisut, nalunngilluarpaa. (Ussatit 22:6) Nakutitseriaalluni meeraanitsinniilli asanninneq pillugu isumarput sangutinniartarpaa. ’Pissutsit aaqqissuussaanerannut matumunnga guutiugami’ Satanip inuppassuit angerlarsimaffinni asannittoqarfiunngitsuni akiuuttoqarfiusuni, narrutsassimanermik, kamannermik mitallernernillu ulikkaartuni, alliartussasut kissaatigaa. — 2 Korintumiut 4:4; Evfisumiut 4:31, 32; 6:4; Kulorsamiut 3:21.
7 Atuakkami Ilaqutariilluni inuuneq pilluarnartoq qanoq anguneqarsinnaasoq-mi allassimavoq ’ataataasup . . . eqqortitseriaasia sunniuteqangaarsinnaasoq meeqqat kingornatigut inummik Guutimilluunniit oqartussaasunik qanoq isumaqarfiginninnissaannut’a. Angut kristumiu ataataminit sukannersumik perorsagaasimasoq ima nassuerluni oqarpoq: „Jehova naalattassallugu artornartinngilara; asassalluguli artornarnerungaartippara.“ Ilumoorpoq naalanneq pingaaruteqaqisoq, Jehovap isaani ’naalanneq pilliutinit pitsaanernit pingaarnerungaarmat’. (1 Samuel 15:22) Qanorli ililluta naalanneq pissutigiinnarnagu Jehovamut asanninneq ineriartortissinnaavarput tamanna pallorfiginninnitsinni killissutigisinnaajumallugu?
’Kristusip asanninnerata pinngitsaalivaatigut’
8, 9. Jesusip utertitsissummik pilliutaata qanoq Jehovamut asanninneqalersittariaqarpaatigut?
8 Jehova uummatikkut iluunngarluni asassagaanni ingammik Jesus Kristusip utertitsissummik pilliutaanik pingaartitsineq killissutaasinnaavoq. ’Matumuuna Guutip asannissusia uatsinni erserpoq, Guutip ernitui silarsuarmut aallartimmagu taassumuuna inooqqulluta.’ (1 Juánase 4:9) Asanninneq tamanna paasillugulu pingaartikkutsigu uaguttaaq asanninnermik qisuariassaagut. ’Uagut asannippugut [Jehovap] asaqqaarmatigut.’ — 1 Juánase 4:19.
9 Jesus pitseriarluni inuiaat annaassisuattut suliassani akuerisimavaa. ’Matumannga asanninneq nalujunnaarparput: inuunini pilluta iperarmagu.’ (1 Juánase 3:16; Juánase 15:13) Jesusip imminik pilliuteqarluni asanninnerata pingaartitsinermik qisuariartittariaqarpaatigut. Assersuutigalugu, oqarutta immami ipilersutit annaanneqarlutit. Kingorna angerlaannassavit, allarterlutit pisimasorlu puiuinnarlugu? Soorunami naamik! Ilinnik annaassisimasoq qujassutissaqarfigingaassavat. Tassami taassuma inuunerit annaassimavaa. Jehova Guutip Jesus Kristusillu assingusumik annaassimavaatigut. Utertitsissut pisimanngikkaluarutsigu tamatta ajortimi toqumilu ipissagaluarpugullusooq. Akerlianilli asannittuliorneq angingaartoq tamanna pissutigalugu nunami paratiisiusumi naassaanngitsumik inuunissatsinnut periarfissaqarpugut. — Rûmamiut 5:12, 18; 1 Pîtruse 2:24.
10. (a) Qanoq ililluta immitsinnut utertitsissut annerusumik pingaarutilersinnaavarput? (b) Kristusip asanninnerata qanoq ililluni pinngitsaalivaatigut?
10 Utertitsissut tamanna eqqarsaatigeqqissaartaruk. Paulusitullu paasiniartaruk uagutsinnut aamma attuumassuteqarmat: ’Maanna uinimmi inuuserisara Guutip erneranut upperlunga inuuseraara, uannik asannittumut imminillu tunniulluni pillunga.’ (Galâsiamiut 2:20) Tamanna eqqarsaatigigutsigu uummaterput killinneqassaaq, Paulusip Korinthimiut ima allaffigisimammagit: ’Kristusimmi asanninnerata pinngitsaalivaatigut, . . . massalu tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut makittumullu.’ (2 Korintumiut 5:14, 15) The Jerusalem Bible-imi ima nutserneqarpoq: ’Kristusip asanninnerata artorsartippaatigut’. Aap, Kristusip asanninnera eqqarsaatigigutsigu killinneqartorujussuulluta ajugaaffigineqarpugut. Uummaterput killinneqarmat iliuuseqarnissatsinnut kajumissaarneqarpugut. J. B. Phillipsip nutsigaa naapertorlugu ’Kristusip asanninnera iliuusitta aallaavigaat’. Sumit allamit killinneqassagaluarutta ataavartumik inerititaqarsinnaanngilagut, soorlu farisiiarit maligassiaanni takuneqarsinnaasoq.
’Mianersorniaritsi farisiiarit seernarsaatissiaannut.’
11. Farisiiarit upperisarsiornikkut suliaqarnermik isiginneriaasiat nassuiaruk.
11 Farisiiarit Guutimik pallorfiginninneq kimeerutsissimavaat. Guutimut asanninneq pingaartinnagu suliat anersaap piinik pingaartitsinermik ersiutaasutut pingaartinnerusarpaat. Maleruagassaararpassuit salliutikkamikkik naapertuilluartutut pissuserittuusaarput, kisianni ’ilumikkut toqusut saarninik mingunnartunillu nalinginnarnik imalissuullutik’. — Matîuse 23:27.
12. Jesusip innarluutilik ajorunnaarsissimammagu farisiiarit qanoq ilillutik misigittaassusertik takutippaat?
12 Ilaanni Jesusip misiginneqataalluni angut toqungasumik assalik ajorunnaarsippaa. Angut taanna ingerlaannaq innarluumminik timikkut misigissutsikkullu nuanninngitsumik ajorunnaarsinneqarami ila, nuannaangaarsimassaaq! Farisiiarilli nuannaaqatiginngilaat. Akerlianik, annikitsuarannguaq pillugu — Jesus sabbatimi ajorunnaarsitsimmat — isorilerpaat. Inatsisit annikitsualuttaat ilanngullugit nassuiaqqissaarniaramikkik farisiiarit anersaaq Inatsisit tunngavigisaat sumiginnarluinnarsimavaat. Tupinnanngilaq ’Jesusip uummataasa manngertorsuunerat aliasuutigimmagu’! (Mákorse 3:1-5) Saniatigut ajoqersukkani ima mianersoqquai: ’Mianersorniaritsi farisiiarit satusiiarillu seernarsaatissiaannut.’ (Matîuse 16:6) Taakkua suliaat isumaallu ilinniarfiginiassagatsigik Biibilimi oqaluttuarineqarput.
13. Farisiiarit maligassiaat qanoq ilinniutigisinnaavarput?
13 Farisiiarit mianersoqqussutaapput takutillutalu suliat pingaaruteqarnerat ingasaassinngitsumik isigisariaqaripput. Suliat ilumut pingaaruteqarput, ’upperneq sulianik ilaqanngitsoq toqungammat’. (Jâko 2:26) Inuilli naammalluinnanngitsut inuit allat iliuusii naapertorlugit, kinaassusiat naapertornagu, nalileqqajaasarpaat. Ilaatigullu uaguttaaq immitsinnut tamanna tunngavigalugu nalilertarpugut. Immaqa suliat takussaasut aalluneruavut isumaqarluta tamakku kisimik anersaap piinik pingaartitsinermik ersiutaasut. Puigulersinnaavarput nammineq pissutiginiakkatta misissornissaat qanoq pingaartigisoq. (Naleqqiuguk 2 Korintumiut 5:12.) Immaqa maleruagassat pillugit sukannersumik isumaqalerpugut, farisiiaritut ’ippernat kinerisarlugit qatigattuullu iisarlugit’, tassa inatsisit allassimanerat maleruaqqissaaginnarlugu, isumaali unioqqutillugu. — Matîuse 23:24.
14. Farisiiarit qanoq ilillutik ermutsitut puuguttatullu minguttuutut issimappat?
14 Farisiiarit paasisimanngilaat inuup ilumut Jehova asaguniuk aamma iliuuseqarumaartoq. Anersaap piinik pingaartitsineq inuup iluani pilertarpoq timitaliinikkullu sunniuteqartarluni. Jesusip farisiiarit tamatuminnga eqqunngitsumik eqqarsariaasiannik avoqqaaringaarsimavai ima oqarluni: ’Eqqanaq ilissi allakkanik ilisimasusi farisiiarillu, ilumoortuusaarniartusi, ermutsillu puuguttallu qaasigut salittarassigik, ilumikkulli tillikkanik piumatuuallaarnermillu imalissuupput. Uumaa farisiiari tappiitsutit, ermuserlu puugutarlu iluisigut saleqqaarallakkit, qaamikkuttaaq ipeeruteqqullugit.’ — Matîuse 23:25, 26.
15. Assersuutinik taasaqarit Jesusip inuup qallikkuinnaq isikkua pinngikkaa.
15 Ermutsip, puuguttap imaluunniit allaat illup qaasigut isikkua tamatigut imarisaanik ersersitsisariaqanngilaq. Jesusip ajoqersugaasa Jerusalemimi naalaffissuup alutornangaassusia tupigusuutigaat, Jesusilli ’ujajaaffimmik’ taavaa tassani pisartut pissutigalugit. (Mákorse 1:17; 13:1) Assingusumik kristumiuunerartut millionilikkuutaat taamaapput, soorlu kristumiuuneraqatigiit oqaluttuarisaanerannit takuneqarsinnaasoq. Jesus oqarsimavoq atimigut ’killinnartuliortartut’ ’iluaatsuliorumatuutut’ nalunaarfigiumaarlugit. (Matîuse 7:22, 23) Akerlerluinnaanik uillarneq aningaasaarannguanik naalaffimmut tunniussisimasoq ima oqaatigaa: ’Uillarneq una piitsoq aningaasanik ilioraaffimmut ilioraasunit tamanit amerlanerusunik ilisivoq; . . . uuma ajorsartuulluni pini tamaasa ilivai inuutissarsiutissaraluani tamakkerlugit.’ (Mákorse 12:41-44) Jesus tassani imminut akerliua? Naamerluinnaq. Jesus pisuni marlunni tamakkunani Jehovatut isumaqarpoq. (Juánase 8:16) Sulianut tamakkununnga pissutiginiakkat paasillugit eqqortumik misiliisinnaavoq.
’Nungullugit piginnaassusiat naapertorlugu’
16. Sooq naammassisimasarput kristumiup allap naammassisimasaanut sanilliuttariaqanngilarput?
16 Eqqortumik pissutiginiagaqarutta allanik sanilliussisariaqanngilagut. Assersuutigalugu oqaluussinermi kristumiutut allatut piffissamik atuiniaannarluni taassumatulluunniit naammassisaqarniaannarluni ilungersorneq iluaqutaassanngilaq. Jesus oqarsimavoq ’Jehova asassagit illit uummatikkut iluunngarlutit tarnikkullu iluunngarlutit isumakkullu iluunngarlutit’ — allap piginnaassusiagut pinnatit. Inuit tamarmik assigiinngitsunik piginnaassuseqarlutik, nukeqarlutik atugaqartarput. Periarfissaqaruit asanninnerpit killissavaatit oqaluussinermi piffissamik annertuumik atuinissannut — immaqa allaat pioneeritut kiffartuussinissannut. Nappaateqaruilli piffissaq kissaatigisinnaasannit minnerusoq atorsinnaavat. Tamannali sapiissuseerussutigissanngilat. Guutimut aalajaanneq nalunaaqutap akunnerinik misissorneqarsinnaanngilaq. Minguitsumik pissutiginiagaqaruit nuannaarnissannut pissutissaqarluassaatit. Paulus ima allassimavoq: ’Kialuunniilli nammineq suliani misililliuk, taava imminuinnaq usorsitsaatissaqassavoq aapparminullu pinnani.’ — Galâsiamiut 6:4.
17. Nammineq oqaatsitit atorlugit talentinik assersuusiaq oqaluttuariuk.
17 Jesusip talentinik assersuusiaa Matîuse 25:14-30-mi allassimasoq eqqarsaatigeriaruk. Angutip nunamut allamut aallalersup kiffani qaaqquai pigisanilu taakkununnga pisillugit. ’Ilaat tunivaa talentinik tallimanik, ilaallu marlunnik, ilaallu ataatsimik, nungullugit piginnaassusiat naapertorlugu.’ Kiffani naatsorsueqatiginiarlugit uterami suna paasilerpaa? Kiffap talentinik tallimanik tunineqartup tallimanik allanik ilassarsisimavai. Tamatumunnga assingusumik kiffap talentinik marlunnik tunineqartup marlunnik allanik ilassarsisimavai. Kiffalli talentimik ataatsimik tunineqartup nunamut isertorpaa naalakkamilu pigisaasa amerlisinneqarnissaannut iliuseqarumanani. Naalakkap tamanna qanoq qisuariarfigaa?
18, 19. (a) Suna pillugu naalakkap kiffaq talentinik marlunnik tunineqartoq kiffamut talentinik tallimanik tunineqartumut sanilliutinngilaa? (b) Talentinik assersuusiamit nersuineq allanillu sanilliussineq pillugit sumik ilinniagassaqarpugut? (c) Sooq kiffat pingajuat eqqartuunneqarpa?
18 Kiffat talentinik tallimanik marlunnillu tunineqartut sammeqqaariartigik. Tamaasa naalakkap ima oqarfigai: ’Qujanaq kiffaasutit ajunngitsoq ilumoortorlu!’ Kiffap talentinik tallimanik tunineqartup marluinnarnik ilasimagaluarunigit taama oqarfigineqassanerpa? Qularnanngitsumik naamik! Aappaatigullu kiffamut talentinik marlunnik ilassarsiisimasumut ima oqanngilaq: ’Sooq tallimanik ilasimanngiligit? Takuuk, kiffaqatit uannut qanoq pissarsitigisimasoq!’ Naamik, naalagaq misiginneqataasoq, Jesusimut assersuutaasoq, allanik sanilliussinianngilaq. Talentit tunniussimavai kiffanut ’nungullugit piginnaassusiat naapertorlugu’, taakkualu piginnaassutsiminnit annerusumik pissarsinissaat ilimaginagu. Kiffat tamarmik nersorneqarput, tamarmik uummatikkut iluunngaarlutik naalagartik kiffartorfigigamikku. Tamatta tamanna ilinniutigisinnaavarput.
19 Kiffarli kingulleq soorunami nersorneqanngilaq. Akerlianik silataanut taarnersuarmut ajattorneqarpoq. Talentimik ataasiinnarmik tunineqarami kiffatut allatut talentinik tallimanik tunineqartutut pissarsinissaminik piumaffigineqanngilaq. Kisianni misiliisimanngilarluunniit! ’Ajortuugami eqiasukkamilu’ naalakkanilu asanagu inaarutaasumik eqqartuunneqarpoq.
20. Jehovap killiligaanivut qanoq isigisarpai?
20 Jehovap naatsorsuutigaa nukivut tamakkerlugit asassagitsinni, nuanneqaarli nalunagu taassuma ’nalunngimmagu qanoq pinngortitaasugut, eqqaamavaa pujualaannaasugut’. (Tussiaat 103:14) Ussatit 21:2-mi allassimavoq ’Jehovap inuit uummataat misilittarai’ — oqaluussinermik nalunaarusiat misissornagit. Paasivaa aningaasatigut, timikkut, misigissutsikkut allatigullu iliuuseqarfigisinnaanngisatsinnik killiligaasinnaasugut. (Jesaja 63:9) Ilimasuutigisarpaali pisinnaanerput pigisavullu tamakkerlugit sapinngisamik atussagipput. Jehova naammalluinnartuuvoq, pallorfigisinili naammalluinnanngitsut pitsaalluinnartumik piumasaqarfiginagit. Ingasaassiniarnani iliuuseqartarpoq ingasappallaartumillu ilimagisaqarnani.
21. Guutimut kiffartuussinerput asanninnermik aallaaveqarpat sunik kinguneqarluassava?
21 Jehovamik uummatitsigut, tarnitsigut, isummatsigut nukivullu tamakkerlugit asanninnerput ’tunissutinit ikikkagassanit toqutassanillu tamanit anneruvoq’. (Mákorse 12:33) Asanninnerup killippatigut sapinngisamik Guuti kiffartorfigissavarput. Peter Guutimut tunniusimasumik pissuseqarneq, ilaatigut asanninneq, pillugu ima allassimavoq: ’[Pissutsit] tamakku ilissinniippata alliartorlutillu Naalakkatsinnik Jesus Kristusimik ilisarsinissigut eqiattarniassanngilasi pilussinnarnaviassanasilu.’ — 2 Pîtruse 1:8. (wE 15/6 95)
[Quppernerup ataani ilanngussaq]
a Napasuliaq Alapernaarsuiffiup Peqatigiiffianit naqiterneqartoq.
Uteqqiineq
□ Suup Guutimut kiffartuussinissatsinnut killittariaqarpaatigut?
□ Kristusip asanninnerata qanoq ililluni Jehovamik kiffartuussinissatsinnut pinngitsaalissavaatigut?
□ Uagut farisiiaritut suna aalluppallaassanngilarput?
□ Sooq silatusaarnerunngila kiffartuussinerput kristumiup allap kiffartuussineranut sanilliukkutsigu?
[Qupp. 16-mi assiliartat]
Tamatta assigiinngitsunik piginnaassuseqarluta nukissaqarlutalu atugaqartarpugut.