Ataatsimeersuarnissamut „Qaammaqqusersuisut“-mut tikilluarit

ULLUT pinngortitsiffiusut siullianni nunarsuarmi qaamaneq pilersinneqarpoq. Atuarpugut Jehova ima oqartoq: „Qaammarli!“ (1 Moses 1:3) Tamannalu apustilip Johannesip allassimasaanut naleqquppoq: ’Guuti qaamasuuvoq, taassumanilu taartoqanngilluinnarpoq.’ — 1 Juánase 1:5.

Guutip ernera Ataataminut assingulluinnarmat tupinnanngilaq Jesus ilaanni ima oqarsimammat: ’Silamiut qaammaqqutigaannga.’ (Juánase 9:5) Taarmit aniguisinnaavugut qaamanerlu iserfigisinnaallugu Jehova Guuti erneralu upperigutsigik. Jesus aamma oqarsimavoq: ’Qaammaqqutaallunga silarsuarmut pivunga, uannut uppertoq taartumiittuaqqunagu.’ (Juánase 12:46) Taamaattumik ajoqersukkani ilumoortut Jesus Kristusip ima oqaatigisimavai: ’Silarsuup qaamasoraasi. . . . qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ — Matîuse 5:14, 16.

Sallusuissummik ilisimanninneq Guutillu oqaasiinik ’inussiamit aalajaallunilu silatuumit’ nassuiarneqartunik paasisaqarsinnaaneq pilluaqqusaanerupput! (Matîuse 24:45-47) Guuti ataasiullunilu pingasuusumik ajoqersuummit eqqumiitsumit tammartitaajunnaarsimavugut; Guutip ajugaqanngitsup asannittullu sooq ajussuseq nakuusernerlu akuerigallarai nalornisigiunnaarsimavarput; inuk toqugaangat susoqartarnersoq paasisimavarput. Qaamanerup neriuuteqalersissimavaatigut, tassa Naalagaaffimmik neriuummik. Guutip pinngortitsisutut qanoq angingaartiginera nalujunnaarsimavarput. Sallusuissutip qaamanerata inuunerput siunertaqalersissimavaa, tassa pinngortitaasimanitsinnut siunertaasumik iliortarnissaq, Pinngortitsisoq Jehova Guuti unnersiutigalugu. Qaammaqqusersuisuunitsigut taamaaliortarpugut. Qaammaqqusersuisutut kiffartorneq ataqqinaataallunilu immikkut pisinnaatitaaffiuvoq, aammali akisussaaffiuvoq pingaaqisoq. Akisussaaffik tamanna isumaginiarlugu Jehovap ikiuutissiai ilassisariaqarpavut. Taamaattumik naleqqulluartuuvoq 1992-imi ataatsimeersuarnissaq „Qaammaqqusersuisut“-nik qulequtaqassammat.

Qaammaqqusersuisutut suliassatta suliarinissaanut pikkorinnerulerumalluta suliassamillu tamatuminnga pingaartitsinerulersinnaajumalluta erinarsuummit aallarniutaasumit qinnut naggataasoq tikivillugu ataatsimeersuarnissaq najuuffigisariaqarparput. Saqqummiussassat tamaasa, oqalugiaatit, apersuinerit, misigisalikkersaarnerit isiginnaagassiarlu, malinnaaffigilluarniassavavut. Allattuigutta tusakkavut kingusinnerusukkut eqqaaqqittarsinnaassavavut aammalu saqqummiussat malinnaaffigilluarnerusinnaassallugit. Aap, ataatsimeersuarnissaq naallugu ’sianiginiarpugut qanoq ililluta tusartugut’. — Lúkarse 8:18. wD 15/2 92

Kalaallit Nunaanni ataatsimeersuarneq pissaaq

Nuummi julip 31-aniit augustip 2-at ilanngullugu.