Ataatsimeersuarneq „Guutip naapertuilluassusia“

INUPPARUJUSSUIT silarsuarmi naapertuilluanngissuseq naalliuutigaat. Naalakkersuinermik aqutsisuusut ilaasa pissaanerminnik atornerluinerisa kingunerisarpaat inupparujussuit naapertuilluanngitsumik pineqarnerat. Taamatorluinnarlu pisoqartarpoq niuertut piumatuut inuit atornerlukkaangatigik. Aammattaaq upperisarsiorneq naqisimaneqarnermut pissutaasarpoq. Ullumikkut upperisarsiornermik aqutsisuusut ilarpassui upperisarsiornermik aqutsisuusunut Jesusip nalaani inuusunut assingupput, taakkulu pillugit Jesus ima oqarsimavoq: ’Ersugassanik oqimaatsunik ersunneq artornartunik qilersuisaraat inuillu tuiinut ilillugit, namminnerli assammilluunniit nuukkumasarinngilaat.’ (Matîuse 23:4) Aammattaaq ilaqutariit iluanni pissaanermik atornerluineqaqaaq naapertuilluanngitsuliornernik malitseqartunik.

Oqaluttuarisaanerup paasitippaatigut iluaqutaanngitsoq ilimagissallugu inuit naammalluinnanngitsut, qanorluunniit ajunngitsumik isumaqartigigaluarunik, naapertuilluanngitsuliornerit iluarsisinnaagaat. Kisianni Qutsinnerussaartup, qilammi nunamilu Eqqartuussisuunerup, Jehovap, naapertuilluassutsip Guutiata, tamanna iluarsisinnaavaa. Eqqortumik Moses erinarsorsimavoq: ’Qaarsuuvoq; piliai assuarnaapput, massa aqqutigisai tamarmik innarluissutaapput; Guutiuvoq ilumoortoq iluaassuseqanngitsoq, iluartuuvoq peqqusersuillunilu.’ — 5 Môrsase 32:4.

Silarsuarmi naapertuilluanngitsuliornerit Jehovap ilaginnaqqajuarallarsimavai, naassaanngitsumilli taamaaliornavianngilaq. Tamatumunnga qaqugu qanoq iliuuseqarnissani aalajangereersimavaa, taamanikkumullu siulittuut Isaia 14:4-7-imi allassimasoq eqquussimalissaaq. Tassani neriorsuivoq naakkitsaatsuliornerit suulluunniit soraarsikkumaarlugit aammalu ’nunarsuarmiut tamarmik eqqissiumaartut’.

Neriorsuutit taakku siulittuutaasut Jehovap Nalunaajaasuisa upperilluinnarpaat. Taamaattumik nuannaarutigaat erniinnaq Jehovap naqisimanninnermik naapertuilluanngitsuliornernillu soraarsitsinissaa aammalu naalakkersuinerata killeqanngitsup atuutilernissaa sumi tamaani oqaluutigigamikku. Taamanikkussamut ajoqusiisoqassananilu aseruisoqartassanngilaq, tassami ’Jehovamik ilisarsisut nuna tamakkerumaarmassuk, soorlu ermit [immat] ulikkaat immap naqqa’. — Isaia 11:9.

1988-imi aasakkut ataatsimeersuarnerup „Guutip naapertuilluassusia“ tunngavigissavaa, tamatumalu Jehovap eqqartuussutiminik naapertuilluartumik naammassinninnissaanik uppernerput nakussatsissavaa. Tunngaviusup tamatuma erseqqissarneqarnerata neriuutitsinnik — Guutip naapertuilluassusianik neriuutitsinnik — sapinngisarput tamaat inunnut allanut ilisimatitsinissatsinnut kajumissisiinnarnata — aammattaarli Guutip naapertuilluassusianik tamatigut najoqqutarinninnissatsinnut kajumissisippaatigut.

Jehovamut kiffatut tamatta nalunngilarput angajoqqaatta siulliit unioqqutitsisimanerat pissutigalugu namminissarsioqqajaasinnaallutalu naapertuilluanngitsulioqqajaasinnaasarluta. Taamaattumik ajoqersorneqarnissarput Bibeli tunngavigalugu oqalugiaatitigut, piviusuusaartitsilluni takutitsisarnertigut, oqaluussisartunik ataasiakkaanik apersuisarnertigut isiginnaartitsissutikkullu Migga 6:8-mi peqqussutaasumik uuminnga tunngaveqartukkut: ’Naapertuilluartumik iliussasutit, isumassuissasutillu asannillutit, Guutillu saqeqatigissagit makitanaveersaarlutit,’ Guutip naapertuilluassusianik aalajangiussisimajuaannarnissatta pingaaruteqassusianik ersersitsisukkut pisussaq pingaartittariaqarparput. Aammalu tamanna nuannaarnermik, ataqatigiinnermik iluarusunnermillu kinguneqassaaq, nunarsuarlu tamakkerlugu tusagassamik nuannersumik oqaluussissutiginninnermik siuarsaassalluni.

Ataatsimeersuarnerni taakkunani maluginiarnartoq tassaassaaq oqarasuartaatikkut atassuserneqassammata taamaalilluni tusarnaartunit oqalugiaatit immikkut ittortaat Jehovamut Nalunaajaasut Siulersuisoqatigiivinut ilaasortaasut ilaannit oqalugiaatigineqartussat tusarnaarneqarsinnaassallutik. Aammattaaq silarsuaq tamakkerlugu ajoqersuiartortitat periarfissaqassapput nunavimminni ataatsimeersuarnernut peqataanissaminnut, taamaalillutillu ilaquttaminnik takunneqqillutik.

Ataatsimeersuarneq „Guutip naapertuilluassusia“ ulloq siulleq nal. 13.30 aallartissaaq, ullorlu kingulleq nal. 16.00 naassalluni. Ulluni sisamani ataatsimeersuarfiusussani aallarnerneqaraangata ilaasinnaaqqulluta periarfissavut aaqqissorniartigik, aammalu pisut erinarsuummik qinnummillu naggaserneqarnerata tungaanut peqataajuarnissarput piareersarniartigu. Ataatsimeersuarnermullu peqataajartorisa anersaakkut nererusussuseqarluarluta, ilikkakkatsinnillu allattuinissatsinnut piareersimalluta. Qularutigissanngilarput Jehovap ’nerersuarnermik’, suliassariumaagassatsinnut nakussatsissutigisinnaasatsinnik kajumississutigisinnaasatsinnillu, piareersaassimagaatigut. — Isaia 25:6; eríniugagssiat angnerssât 2:4.

Aap, ataatsimeersuarnermi „Guutip naapertuilluassusia“-ni anersaakkut pilluaqqussutinik sapinngisarput tamaat tamatta immikkut katersuiniarniarisa.

[Qupp. 16-mi ungalusaq]

14.-17. juli: Århus Stadion aamma Brøndby-Hallen (ataatsikkut)

21.-24. juli: Århus Stadion aamma Brøndby-Hallen (ataatsikkut)

28.-31. juli: Atuarfik Ukaliusaq, Nuuk, Kalaallit Nunaat