Angajoqqaat — Meeqqasi naalungiarsuuneranniilli uummataasigut sunnerniarsigik
„[Qitornasi perorsartuarsigik] Jehovap ileqqoreqqusai oqaaqqissaarutaalu malillugit.“ — EVFISUMIUT 6:4, NV.
1. Ulluni Jesusimut erloqinarnerusuni suna pisimava?
JESUS KRISTUS ajoqersugaalu Jerusalemiliarput. Tamatuma siunitsiannguagut Jesusip marloriarluni ajoqersukkani oqaluttuussimavai illoqarfimmi tassani amerlasuunik naalliutsitaajumaarluni aammalu toqunneqarumaarluni. (Mákorse 8:31; 9:31) Ulluni Jesusimut erloqinartorsiorfioqisuni inuit ’naalungiat taassumunnga aappaat attoqqullugit’, Bibelimi taama oqaluttuarineqarpoq. — Lúkarse 18:15.
2. (a) Apustilit inunnik peersitsiniarnerannut sunamitaava pissutaasinnaava? (b) Jesus tamatumunnga qanoq qisuariarpa?
2 Tamanna qanoq qisuariarfigineqarpa? Ajoqersukkat isumaqarunaramik inuit taamaaliornerata ingasattumik Jesus akornuseraa, inuit avoqqaaraat peersinniarlugillu, isumaqarlutik taamaaliornermikkut Jesus ikiorlugu. Jesusilli ajoqersukkani kamaammiuppai oqarluni: ’„Merlertunnguit uannut qaaginnarlit pitsaaleqinasigillu.“ Pakkullugillu assamminik patippai pilluaqqullugillu.’ (Mákorse 10:13-16) Aap, naak eqqarsaateqaraluaqaluni, Jesusip meerannguit piffissaqarfiginiarpai.
Angajoqqaat tamanna sumik ilinniarfigisinnaavaat?
3. Pisimasoq tamanna angajoqqaat sumik ilinniarfigisinnaavaat?
3 Angajoqqaat ilissi tamanna ima ilinniarfigisinnaavarsi: Pisussaaffisi ajornartorsiutisilu qanoq ittuugaluarpataluunniit, qitornassi piffissaqarfiginissaat salliutittariaqarparsi. Piffissami meeqqassinnik ataatsimooqatiginniffinni periarfissaqartassaasi anersaap piinik eriaginartunik, uummataannut illersuutaasunik eqqortumillu ingerlavissiisunik, puiutsaaliniarnissaannut. (5 Môrsase 6:4-9; ússatit 4:23-27) Eunikep Loisillu, Timoteusip arnaata aanaatalu, piffissaq atorluarniartarpaat uummataanut killiisumik inooriaasianillu ilusilersuisumik ajoqersornissaanut, taassuma tunniusimalluni Guutimut kiffanngorneranik kinguneqartumik. — 2 Timûtiuse 1:5; 3:15.
4. Meeqqat qanoq erlinnartigaat, angajoqqaallu qitornaminnik pingaartitsinertik qanoq ersersissinnaavaat?
4 Angajoqqaat kristumiuususi, meeqqat tassaammata Jehova Guutip ilissinnut tunissutai erlinnartut, isumaginngitsoortariaqanngilasi. (Tussiaat 127:3) Taamaattumik piffissaqarfigisartigik uummataasigullu sunnertarlugit — Timoteusip anaanaata aanaatalu maligassiaat pitsaasoq malillugu. Qitornassi qanoq ileqqoqartariaqarnissaannik oqaluuttarlugillu perorsartarnissaat naammanngilaq, aammattaarli nereqatigisariaqarpasi, atuffattarlugit, pinnguaqatigalugit, unnukkut innartittarlugit — sapinngisamik piffissami annertuumi peqatigiittarnissarsi pingaartorujussuuvoq.
5. Ataataq angajoqqaajusutut pisussaaffimminik pingaartitsinerminik ersersitsisoq oqaluttuariuk.
5 Japanimiup naalagaaffimmi nuimasumik atorfiliusimasup maanna Jehovap Nalunaajaasuinut ilaasup tamanna paasilersimavaa. „JNR-mi nuimasumik atorfilik ilaquttani ilagerusukkamigit tunuarpoq“ qulequtaralugu aviisimi Mainichi Daily News-imi februarip 10-at 1986-imi saqqummersumi ima allassimasoqarpoq: „Japanip qimuttuitsoqarfiani (JNR-mi) nuimasumik atorfilik ilaquttaminit avissaarumannginnami atorfimminit tunuarpoq . . . Tamura oqarsimavoq: ’Direktøriunertut atorfik kimilluunniit atorfigineqarsinnaavoq. Uangali kisima qitornama ataatagaannga.’“ Illit angajoqqaatut pisussaaffiit taama pingaartitsigaajuk?
Suna pillugu maannakkut ilungersoqqissaartariaqartoq
6. Meeqqanik eqqortumik perorsaaneq ullumikkut sooq taama artornartigaa?
6 Guutip oqaasia najoqqutaralugu, tassa „Jehovap ileqqoreqqusai oqaaqqissaarutaalu malillugit“, meeqqanik perorsaaneq inuiaat oqaluttuarisaaneranni immaqa ullumikkut aatsaat taama ajornakusoortigaaq. (Evfisumiut 6:4, NV) Tamatumunnga peqqutaavoq ’ulluni kingullerni’ inuunerput, Satanillu inngilipiluni ilagalugit piffissakissusertik nalunnginnamikku kamangaarlutik eqqanangaartorsiortitsinerat. (2 Timûtiuse 3:1-5; sarĸúmersitat 12:7-12) Taamaakkami angajoqqaat Guutimik mianerinnillutik qitornaminnik perorsaaniarneri ’silaannarmit’ assersuutaasumit Satanip pissaaneqarfigisaanit akornusersorneqartuaannarput. ’Silaannaap’ tamatuma, tassa namminissarsiorumatunerup naalasseriinnerullu, silaannartut najuussukkatsitut illuni suut tamaasa pitarpai. — Evfisumiut 2:2.
7, 8. (a) Fjernsynikkut suut angerlarsimaffimmut eqqunneqarsinnaappat, taamaakkaluartorli angajoqqaat ilarpassui qanoq iliortarpat? (b) Suna pillugu fjernsynimik meeqqanut paarsisunngortitsineq angajoqqaatut pisussaaffimmik sumiginnaanerua?
7 ’Anersaaq silamiusoq’ tamanna, silaannaq toqunartoq, ingammik fjernsynikkoorusiatigut inuit angerlarsimaffiinut annguttarpoq. (1 Korintumiut 2:12) Fjernsynikkut isiginnaagassiat ilarpassui aliikkutassiortartunit sunniinertuunit kanngunartumik inooriaasilinnit anguteqatiminnik arnaqatiminnillu atoqatiginnittartunit sunnerneqangaarsimasarput. (Rûmamiut 1:24-32) Eqqarsariaatsimit guutiitsoorpaluttumit kanngunartuliornernillu isiginnaagassiarineqartartunit ingammik meeqqat sunnertiasuupput, soorluttaaq silaannarmit mingutsitaasumit sunnertiasuusut. Angajoqqaalli ilarpassui qanoq iliortarpat?
8 Fjernsyni meeqqanik paarsisunngortittarpaat. „Massakkuunngitsoq, asasannguara. Ulapeqigama, fjernsynimi isiginnaarniarit,“ meeqqatik oqarfigisarpaat. Fjernsynikkut isiginnaagassiortartoq tusaamasaq oqarsimavoq oqaatsit taakku tassaasut „Amerikamiut angerlarsimaffiisa ilarpassuini oqaatsit aninneqarajunnerpaat“. Kisianni meeqqat fjernsynikkut aallakaatitaq sunaagaluartorluunniit isiginnaariartoqqullugu oqarfigineqaannartarunik eqqortumik oqaatigalugu imminiiginnagaapput. (ússatit 29:15) Taamaaliorneq angajoqqaatut pisussaaffimmik sumiginnaaneruvoq. Isiginnaagassiortartoq taanna meeqqanik perorsaaneq pillugu ima oqarsimavoq: „Angajoqqaajuneq piffissamik atuinartorujussuuvoq pisussaaffiullunilu angingaartoq, allamullu isumagitinneqartussaanngilaq — fjernsynimut isumagitinneqartussaanngivilluni.“
9. Mingutsitsinermut ingammik qanoq ittumut meeqqat illersorneqartariaqarpat?
9 Ullunili paatsiveqanngiffiusuni inuugatta angajoqqaajusut ilaat, ajoqersukkatut ilillusi, immaqa meeqqat qaangiinnartarajuppasi sammisassat pingaarnerutitasi piffissaqarfiginerujumallugit. Namminerli qitornassinnit pingaarnerusoqarsinnaanerpa? Taakkua anersaakkut inuunerat nalorninartorsiorpoq! Atomip nukinga atorlugu nukissiorfimmi Tjernobylimiittumi 1986-imi ajunaarnersuaqarmat meeqqat qimarngunneqarput qinngornernit ulorianartunit mingutsitaannginniassagamik. Ilissi meeqqasi anersaakkut peqqissusiatigut paarissagussigik silap matuma ’silaannartaanut’ toqunartuusumut, fjernsynimit aniagajoqisumut, illersortariaqarpasi. — ússatit 13:20.
10. ’Silaannaq’ toqunartoq meeqqanut navianartuusoq aamma suminngaanneersuusinnaava, aamma Bibelimi oqaluttuarineqartup sorliup tamatuma navianartuunera ersersippaa?
10 ’Silaannarli’ toqunartoq ileqqussanik ajortunngortitsisinnaasoq inuusuttullu isumaannik ajortunngortitsisinnaasoq tamanna aamma allaminngaanneertarpoq. Atuaqatiminnik meeqqanillu allanik naleqqutinngitsumik ilaginnittarnermikkut Bibelimi ajoqersuutigineqartut meeqqat uummataannut nakkalatserneqarsimasuugaluit ipitinneqarsinnaapput. (1 Korintumiut 15:33) Jakobip panianut inuusuttumut, Dinamut, pisimasoq ilinniutissaalluarpoq. Taanna ’anisarpoq nunap inuisa panii takujartorlugit’, taamaaliortarneratalu kinguneraa angummit inuusuttumit arneriffigineqarnera. (1 Môrsase 34:1, 2) Silarsuarmi matumani, itsarsuup silarsuaanit ajortunngorsimanerungaartumi, kanngunartuliornermut nakkartitsiniutit ingalassinnaassagunikkik, inuusuttut ajoqersorluagaasariaqarput perorsarluagaasariaqarlutillu.
Sooq naalungiarsuuneranniit ajoqersorneqassappat?
11. (a) Angajoqqaat meeqqaminnik ajoqersuinertik qaqugukkut aallartittussaavaat? (b) Kingunerit ajunngitsut suut ilimagineqarsinnaappat?
11 Angajoqqaat meeqqaminnik ajoqersuinertik qaqugukkut aallartissavaat? Bibelimi allassimavoq Timoteus „naalungiannguu“nerminiit ajoqersorneqartoq. (2 Timûtiuse 3:15, NV) Oqaaseq grækerisooq tassani atorneqartoq, breʹfos, meeraq inunngorsimanngitsoq pillugu atorneqarajuppoq, soorlu Lúkarse 1:41, 44-mi. Tassani allassimavoq Johannes ilumiuutilluni arnami iluani aalalersoq. Aammattaarli Israelikkut meerartaat inoorlaat Mosesip inunngornerata nalaani Ægyptenimi navianartorsiortitaasut pillugit oqaaseq breʹfos atorneqarpoq. (apustilit suliait 7:19, 20) Timoteusip pineqarnerani erseqqippoq meeraaraq pinnani naalungiarsulli pineqartoq. Timoteus eqqaamannissinnaalernerminiilli, aap naalungiarsunnguunerminiilli, allakkanik illernartunik ajoqersorneqartarpoq. Kinguneqarluarporlu! (Filípimiut 2:19-22) Inoorlaalli ajoqersorneqarnerat ilumut iluaqutaasinnaava?
12. (a) Naalungiarsuit qanoq mikitigalutik sunnertillutillu ilinniartinneqarsinnaalersarpat? (b) Qaqugukkut qanoq-ilillutillu angajoqqaat qitornaminnik anersaakkut ajoqersuineq aallartittussaavaat?
12 „Tarnip pissusiinik ilisimatusaatitigut ineriartorsimanerit nutaanerusut pissanganarnerpaartaat tassaavoq naalungiarsuup ilinniarsinnaassusia angisooq pillugu paasisavut nutaat,“ ilisimatusarfimmi Yale Universitymi professoriusoq dr. Edward Zigler 1984-imi taama allappoq. Allaat atuagassiami Health-imi ima allassimavoq: „Misissuinerit nutaanerusut takutitsiarpaat naalungiarsuit suli naartuutillutik isigisinnaannguatsiarlutillu, tusaasinnaannguatsiarlutillu, ooqattaarisinnaannguatsiarlutillu — misigissuseqarsinnaannguatsiartut.“ Ilissi angajoqqaajususi, meeqqassinnik ajoqersuinissinnik aallartinnissarsi piaarpallaalernaviarunanngilaq. (5 Môrsase 31:12) Aallarniutigalugu assilissanik isiginnaartissinnaavasi oqaluttuanillu oqaluttuuttarlugit. Masaru Ibuka, Kindergarten Is Too Late! (Meeqqerivimmi kingusippallaarpoq!)-mik atuakkiortoq, ima oqarsimavoq: „Ukiut pingaarnerusut [tassaapput] inunngorneraniit meeqqap pingasunik ukioqalernerata tungaanut.“ Tamatumunnga pissutaavoq meeraaqqap isumaata sunnertianerunera ilikkajaneruneralu, soorlu tamanna meeqqap oqaatsinik nutaanik ilikkajaneranit paasineqarsinnaasoq. Ilisimatusarfimmi New York Universitymi professoriusoq, meeraaqqanik ilinniartitsinermik immikkut paasisimasalik, allaat oqarsimavoq „angajoqqaat ernisussiorfimmiit angerlamut apuutiinnarlutik meeqqatik atuarnermik ilinniartillugit aallartittariaqaraluartut“!
13. Naalungiarsuit ilinniarsinnaassusiat tupinnartoq suup ersersippaa?
13 Anaanaq Canadami najugalik meeqqami ilinniarsinnaassusia pillugu ima allappoq: „Ullut ilaanni ernera sisamanik affarmillu ukiulik, Shaun, oqaluttuamik bîbilimik oĸalugtuautíka-meersumik atuffappara. Unillatsiarninni tupigutsaatigalugu tusaavara oqaluttuaq nangikkaa, oqaatsit issuaqqissaarlugit, bîbilimik oĸalugtuautíka-mi allassimanera alanngaarlugu. . . . Oqaluttuanik allanik misileqattaarpara, taakkuttaaq alanngaarlugit oqaluttuarisinnaavai. . . . Oqaluttuat siulliit 33-t, oqaatsit issuaqqissaarlugit, inuit najukkallu aqqi taajuminaannerusut ilanngullugit, alanngaarlugit oqaluttuarisinnaavai.“a
14. (a) Naalungiarsuit pisinnaaneri kikkut tupinnartutut isigineq ajorpaat? (b) Angajoqqaat kristumiuusut suna anguniagarissavaat? (c) Meeqqat sunut siumut piareersarneqartariaqarpat, sunalu pillugu?
14 Meeraaqqat ilinniarsinnaassusiannik ilisimannittut taamaaliorsinnaasunik tusakkatik tupigusuutigineq ajorpaat. „Meerartavut naalungiarsuuneranniilli ilinniartikkaluarutsigik inunnik silassorissunik, Einsteinitut, Shakespearetut, Beethovenitut aammalu Leonardo da Vincitut ittunik silarsuarput ulikkaassagaluarpoq,“ taamatut oqarsimavoq perorsaanermik atuartitsinermillu ilisimatusarfimmi (The Institutes for the Achievement of Human Potential)-imi pisortaasoq, dr. Glenn Doman. Angajoqqaat kristumiuusut anguniagaat soorunami tassaanngilaq silassorissutsikkut pisinnaassuseqangaartunik ineriartortitsinissaq, tassaallunili meeqqamik uummataasigut sunnernissaat, meeqqat Guutimik kiffartorfiginnikkunnaaqqunagit. (ússatit 22:6) Meeqqat atualernerata siunerujussuatigut tamanna sulissutigilersimasariaqarparsi, atuarfimmi misilinneqarumaarnissaannut piareersarniarlugit. Meeqqerivinni inuuissiortoqartarpoq allanillu nalliuttorsiortoqartarluni meeqqat kajungerisinnaasaannik. Taamaattumik meeqqat paasisariaqarpaat sunarpiaq pissutigalugu Jehovap kiffai tamakkununnga nalliuttorsioqataaneq ajortut. Paasitinneqarneq ajorunik angajoqqaamik upperusiat uumigileriartorsinnaavaat.
Qanoq ililluni meeqqat uummatimikkut sunnerneqarsinnaasut
15, 16. Qitornaminnik uummataasigut sunniiniarnermikkut angajoqqaat suut ikiortigisinnaavaat, atortussallu tamakku qanoq kinguneqarluartumik atorneqarsinnaappat?
15 Angajoqqaat qitornaminnik uummataasigut sunniiniarneranni ikiorumallugit Jehovap Nalunaajaasuisa atuakkat soorlu Ajoĸersuissorssuaĸ tusarnârparput naqitersimavaat. Atuakkami tassani inuuissiornerit oqaluttuarineqarput kapitalimi ima qulequtalimmi: „angutit mardluk inûvigssiortut.“ Tassani allassimavoq ’nalliuttorsiornerit ajunngikkunik nuannertaqisut’, aammattaarli erseqqissarneqarpoq inuuissiornerit marluk Bibelimi oqaluttuarineqartutuat Guutimik nalusunit, Jehovamik pallorfiginninngitsunit, nalliuttorsiutigineqarsimasut, pisimasunilu tamani niaquersittoqarsimasoq. (Mákorse 6:17-29; 1 Môrsase 40:20-22) Qanoq ilillusi paasissutissat tamakku iluaqutigalugit meeqqat uummataasigut sunnerniarsinnaavisigik?
16 Periaaseq pitsaasoq Ajoĸersuissorssuaĸ tusarnârparput-mi atorneqartoq atorsinnaavarsi ima oqarlusi: ’Nalunngilarput Bibelimiittut tamarmik aalajangersimasoq siunertaralugu allanneqarsimasut.’ Taava ima aperisinnaavat: ’Taava qanoq isumaqarpit Guutip inuuissiortarnerit pillugit qanoq oqaluttuunniaraatigut?’ Tassuuna meeraq ikiorneqarpoq pineqartumik eqqarsaatiginninnerunissaminut eqqortumillu isummernissaminut. Allanittaaq ikiuutissaqarpoq angajoqqaat atorsinnaasaannik, soorlu atuagaq bîbilimik oĸalugtuautíka aammalu ilanngutassiat nangeqattaartut „Jesusip inuunera ajoqersuineralu“ 1. juli 1986-imiilli Napasuliaq Alapernaarsuiffik-mi saqqummersartut. Ilanngutassiat tamakku ikiortigalugit qitornasi ajoqersortarpisigik — immissinnuttaaq ajoqersorlusi?
17. Angajoqqaat atorluarsinnaasunik sunik matumuuna siunnersorneqarpat?
17 Atuagassat aalajangigassanut nalorninartuusinnaasunut pissutsinullu meeqqat atuarfimmi nalaakkumaagassaannut tunngasut qitornasilu atuaqatigiissutigisarlugillu oqaloqatigiissutigisartuartariaqarpasi. Paasitinniarsigik meeqqallu inersimasullu Jehovamut akisussaammata. (Rûmamiut 14:12) Ajunngitsorpassuit uagut pilluta Jehovap naammassisartagai erseqqissartarsigik, taamaalillutik meeqqat uummataasigut killissinnaaqqullugit taassuminnga nuannaartitserusulersillugit. (apustilit suliait 14:17) Atuaqatigiiffisi nuannersuutinniarsigik. Meeqqat oqaluttuanik tusarnaarnissartik nuannareqaat, taamaattumik atuffakkaangassigik sapinngisassinnik meeqqat uummataannut annguttussamik uumassuseqarpaluttumik ilinniartittakkit. Ilaqutariit ilarpassuisa taamaaliornissaminnut periarfissaraluatik pinngitsoortarpaat, nereqatigiinneq ajungajakkamik. Ilaqutariillusi nereqatigiittarpisi? Taamaaliortanngikkussi taamaaliortalersinnaanerpisi? — Naleqqiuguk apustilit suliáinik agdlagkat 2:42, 46, 47.
18, 19. (a) Angajoqqaat qitornaminnik ilinniartitsinertik suut eqqarsaatigalugit aaqqissortariaqarpaat, aamma suna ingasagineqalersinnaanngila? (b) Meeqqanik perorsaariaaseq matumuuna innersuussutigineqartoq illit qanoq oqaatigissaviuk, aamma angajoqqaat allat taamaalioraluarpata qanoq kinguneqarsinnaassasoq isumaqarpit?
18 Meeqqap qassinik ukioqarnera piffissap ilinniartitsiffiusup sivisussusianut aalajangiisuussaaq. Meeraaqqap aalajangersimasumik sivisunerusumik aallussisinnaanngitsup ullormut sivikitsuinnarmik arlaleriarlunili ajoqersorneqartarnissaa pitsaanerussaaq. Taava piffissaq ilinniartitsiffiit sivitsortikkiartuaarneqarsinnaapput imaqarnerulersikkiartuaarneqarsinnaallutillu. Meeqqat aalajangersimasumik akuttunngitsumik ilinniartinneqartarnerata pingaaruteqassusia ingasagineqalersinnaanavianngilaq. (1 Môrsase 18:19; 5 Môrsase 11:18-21) Ataataq, maanna 70-it sinnerlugit ukiulik, ernerminik, maanna kristumiutut utoqqaanertaasumik, perorsaanermigut maligassiuilluarsimavoq. Ukiorpassuit matuma siornagut perorsaariaatsini ima oqaluttuaraa:
19 „Ernerput ataatsip missaanik ukioqalermat innaleraangat Bibelip oqaluttuaanik oqaluttuuttalerpara, pingaartortaat erseqqissarniarlugit pissanganartumik uumassuseqarpaluttumillu oqaluttuaralugit. Ataatsimik ukioqarluni oqalussinnaaleriarmat marluulluta siniffiata saani seeqqumiarluta ’Ataatarpoortalerpugut’, oqaaseqatigiit ataasiakkaarlugit oqaatigereeraangakkit taassuma utertarlugit. . . . Pingasunik ukioqalermat aalajangersimasumik akuttunngitsumik Bibelimik atuaqqissaaqatigisalerpara . . . Atuakkamini atuakkavut malinnaaffigisarpai, atuareeraangama oqaatsit nipituumik utertarlugit. Taamaalilluni oqaatsit ersarissumik taasalerpai, allaallu oqaatsit taajuminaannerusut erseqqissumik taasalerlugit. . . . Bibelimi ajoqersuutigineqartut uummatimini aalajangiussinnaaqqullugit pingasunik ukioqalermat Bibelimi allassimaffiit eqqaamajuminarnerusut alanngaartalersippavut. Meeqqerivimmiittalinnginnermini allassimaffiit 30-t missaanniittut alanngaarsinnaalereersimavai, siornalu septemberimi atualeqqaarami allassimaffiit 70-it missaat alanngaarsinnaalersimallugit. . . . Innaleraangat allassimaffiit ilikkarsimasaasa ilaannik alanngaartittarpara. Aamma ullaakkut makikkaangami Bibelimi allassimaffiit marlussuit eqeerluaqqusissutigigajuppai.“
20. Aamma suna ilinniartitsinermut ilaatinneqartussaava, meeqqallu qanoq iliorunik oqaluussinermut peqataanertik nuannarinerussavaat?
20 Ilinniartitseriaatsip annertusiartuaartitap taama ittup, angajoqqaat maligassiuilluarnerat allanngoratuunngitsumillu perorsaanerat ilanngullugit, meeqqat inuunerannik aallarniisilluassavai qujamasuutigiuagassaannik. (ússatit 22:15; 23:13, 14) Ilinniartitseriaatsip pinngitsoorneqarsinnaanngitsortaasa ilaat tassaavoq meeqqat meeraaraanerminniilli oqaluussinermut sungiusarneqarnissaat. Angalaarnissinni peqataanerunissaat pillugu piareersaqatigisarussigik angalaaqataanissaminnut kajuminnerussapput. Ataataq matuma siuliani eqqartorneqartoq ernermi oqaluussinermut sungiusarneqarnera pillugu ima oqarpoq: „Allassimaffinnik alanngaarsinnaanini pissutigalugu illumiit-illumut angalaarluta oqaluussinitsinni angusaqarluartarpoq, tassami naapitatta ilarpassuisa tamanna tupigusuutigisaramikku atuagassiat Bibelilersaarutaasut neqeroorutigisartagai itigartissinnaaneq ajorpaat. Pingasunik ukioqalernerminiilli kristumiutut oqaluussinermut peqataasarpoq, maannalu [arfinilinnik ukioqarluni] atuagassanik Bibelilersaarutaasunik agguaanermigut uannit nuliannillu angusaqarnerusarpoq.“ — Vågn op!, 8. aprili 1965, qupperneq 3, 4.
21. (a) Angajoqqaat qitornaminnut kingornussaritissinnaasaasa pitsaanersaat sunaava? (b) Angajoqqaat tamatumuuna qanoq siunnersorneqarpat, angajoqqaallu mikisunik meerallit tamarmik sumik ingerlatitsiuartussaappat?
21 Angajoqqaat kristumiuusut qitornaminnut nalilerneqarsinnaanngitsumik kingornussarititaqarput, tassa Jehovamik ilisarsissut tamatumalu kingunerisaanik, tassa silarsuarmi nutaassami nuanningaartumi inuunermik naassaanngitsumik, eqqissinermik pilluarnermillu neriugisaqarnermik. (ússatit 3:1-6, 13-18; 13:22) Allanit tamanit pingaarnerusumik qitornasi uummataasigut tatiginnilersinniarsigik siunissap nuanningaartup tamatuma piviusunngorumaarnissaanik, aammattaaq Jehova kiffartuukkumallugu kissaateqarnermik. Eqqortumik pallorfiginninnissaat taakkununnga pissusissamisoortuutillugulu pilluarnartuutinniarsiuk. (1 Timûtiuse 1:11) Naalungiarsunnguuneranniilli Jehovamik tatiginninneq uummataannut ikkunniarsiuk. Aalajangersimasumillu akuttunngitsumik ilinniartinnissaat pinngitsuunngisaannarsiuk! Tamanna allanit tamanit salliutittuaannarsiuk, paasissutissat sorpiaat qitornassi pisariaqartinneraat qanorlu ilillusi paasissutissanik tamakkuninnga ikkussuiniarlusi uummataasigut pitsaanerpaasumik sunnersinnaanerlugit eqqarsaatigiuaannarlugu. Suliassaqaqaasi sakkortuumillu tatineqarlusi; Satanip silarsuaatalu tamanna isumagaat. Jesusilli maligassiaa eqqaamaniarsiuk! Ulapippallaarnaveeritsi! Qitornassi aalajangersimasumik akuttunngitsumik atuaqqissaaqatigisarnissaannut piffissaqarniartaritsi. (wD 1/8 88)
[Quppernerup ataani ilanngussaq]
a Atuarsinnaalernermi siunerujussuatigut oqaluttuat taakku ilikkarsimavai atuakkap immiunneqarnerata tusarnaartarneratigut.
Illit qanoq akissavit?
□ Bibelimi oqaluttuarineqartup sorliup ersersippaa angajoqqaat qitornamik pisariaqartitaat pingaartingaartussaagaat?
□ Suna pillugu ullumikkut angajoqqaat qitornatik illersorniarlugit immikkut ittumik ilungersortariaqarpat?
□ Meeqqat naalungiarsuunerminniilli perorsarneqarnissaat sooq taama pingaaruteqartigaa?
□ Qitornaminnik uummataasigut sunniiniarnermikkut angajoqqaat siunnersuutit atorluarsinnaasut suut malinniarsinnaavaat?
□ Angajoqqaat kristumiuusut suna pinngitsuunngisaannartariaqarpaat?
[Qupp. 10-mi assiliartaq]
Angajoqqaat ajoqersuilernerat siusippallaarsorineqalersinnaanngilaq