Angerutsit Guutip siunertarisaanut naassaanngitsuusumut tunngasut
„[Jehovap] angerutsi naassaanngitsumut eqqaamavaa, kinguaariinni tusindilinni eqqaamavaa neriorsuutini.“ — TUSSIAAT 105:7, 8.
1, 2. Sooq oqarsinnaavugut tamangajatta angerutsimit sunniuteqarfigineqarsimalluta?
ILLIT qanga, maannakkut siunissamilu inuunerit angerutsimit sunniuteqarfigineqarsimassaaq. Angeruseq tamatumani pineqartoq tassaavoq aappariinnermik angeruseq, tassami amerlanerpaasugut aappariinneq pinnguutigaarput, ilarpassuavullu nammineq aappaqarput. Ilattalu suli aappaqanngitsut siunissami aappaqalernissartik immaqa eqqarsaatigaat.
2 Ukiut hundredelippassuit matuma siorna pruffiitip hebræeriusup Malakiasip oqaatsit ’nuliaqqaat [inuusuttuuninni nuliarilikkat, NV]’ aammalu ’angerfigisimasat nuliarigakku’ atorsimavai. (Malakia 2:14-16) Aappariinneq angerutsimik taasinnaavaa, tassaammat pissusissamik isumaqatigiissut, tassaallunilu inuit marluk peqatigiissuteqarnissaminnut isumaqatigiissutaat. Aappariinnermik angeruseq isumaqatigiissutaavoq inuit marluk uiusutut nuliaasutullu aappariilernissaminnik isumaqatigiissutigisaat, pisussaaffigeqatigiinnissaminnik akuersillutik ataavartussaasumillu ajunngitsorsiassaminnut qilanaarlutik.
3. Suna pissutigalugu aappariinnermik angerutsimit annerusumik angerutsinit allanit sunniuteqarfigineqassaagut?
3 Aappariinnermik angeruseq tassaasorineqarsinnaavoq angerutsit uatsinnut sunniuteqarnerpaartaat, angerutsilli tamatumannga annertunerungaartumik sunniuteqartut Bibelimi eqqartorneqarput. Angerutsinik Bibelimi eqqartorneqartunik upperisarsiornerit Bibelimut tunngaveqanngitsut angerusiinut naleqqiussilluni qinerlerfissiat ilaanni allassimasoqarpoq Bibeliinnarmi „Guutip taassumalu innuttaasa imminnut attaveqarnerata taama aalajangersarneqarnera aaqqissuussanngortoq ataatsimut katitigaasoq naggataagullu qilammi nunamilu attuumassuteqalerumaartussaasoq“. Aap, Pinngortitsisitta asannittup siunertarisaa naassaanngitsoq angerutsinut tamakkununnga ilaavoq. Soorlu takussagipput angerutsit tamakku peqqutigalugit uagut annertuumik pilluaqqusaajumaarpugut.
4. Angeruseq pilersinneqartoq siulleq suna Guutip naassaanngitsumik siunertarisaanik tikkuussiva?
4 Guutip oqartussaaneranik Adamip Evallu tunussisimanerata kingunipiluinik ilisimannilluarputit. Uagut taakku naammalluinnanngissutsimik kingornussaqarfigaavut, tamannalu nappaatigisartakkatsinnut toqumik kinguneqarumaartunut pissutaavoq. (1 Môrsase 3:1-6, 14-19) Qujamasussinnaavugulli pallorfiginnittunik ilumoortunik ataavartumik peqqissuseqarlutillu pilluartunik nunap tamakkerumaarnissaanik Guutip siunertarisaa Adamikkut ajortuliorneratigut allanngortinneqarsinnaasimanngimmat. Angeruseq tamatumunnga tunngasoq Môrsasip agdlagai sujugdlît 3:15-imi allaatigineqartoq Jehovap pilersissimavaa: ’Akerariissikkumaarpassi illillu arnarlu, illit kinguaassat taassumalu kinguaassaa; taassuma niaqqut aserortissavaa, illilli kimmia aserorterumaarpat.’ Siulittuutilli assersuutaasumik oqaasertallip tamatuma apeqqutit amerlangaatsiartut apeqqutaalersippai. Neriorsuut angerusiusoq tamanna Jehovap qanoq ililluni eqqortikkumaarpaa?
5, 6. (a) Siunertarisaminik naammassinninnissamini suut atussallugit Guuti aalajangersimava? (b) Suna pissutigalugu Guutip angerusiinik soqutiginnissaagut?
5 Angerutsit immikkut ittut, angeruseq Edenimi pilersitaq ilanngullugu arfineq-marlunngortut, pilersinneqarnissaat aaqqissorumallugu Guuti aalajangersimavoq. Naassaanngitsumik pilluaqqusaajumasugut tamatta angerutsit tamakkua qanoq imaqarneri pingaaruteqarnerallu paasisariaqarpavut. Angerutsit tamakkua qanga aamma qanoq ilillutik pilersinneqarsimanerat, angerfigeqataasut kikkuuneri, suut siunertarineqartut suullu piumasarineqartut, kiisalu inuiaat naalattut inuunermik naassaanngitsumik pilluaqqujumaarlugit Guutip siunertarisaani imminnut atassuteqarnerat paasisariaqarpavut. Angerutsit tamakkua misissornissaannut maanna piffissaalluarpoq, kristumiummi ukioq manna aprilip ulluisa qulinganni Naalakkap unnukkorsiortitsinera, angerutsinut tamakkununnga toqqaannartumik attuumassuteqartoq, nalliuttorsiutigissallugu ilagiissiminni katersuutissapput.
6 Angerutsit paasiuminaatsutut nalinginnarnillu soqutiginaateqanngitsutut qularnanngitsumik inuit ilaannit isumaqarfigineqassapput. Malugeriarulli Theological Dictionary of the Old Testament-imi qanoq allassimasoqarnera: „Oqaatsit ’angeruseq’ pillugu qanga nunani kangianiittuni aammalu grækerit Romamiullu nunaanni atorneqartarsimasut . . . marlunnut attuumassuteqartinneqarsinnaapput: siullermik uppernarsaanermut pisussaanermullu, aappassaanillu asanninnermut ikinngutigiinnermullu.“ Taaneqartut tamarmik, tassa uppernarsaaneq kiisalu ikinngutigiinneq, Jehovap angerusiinut tunngaviupput.
Abrahamimik angeruseq — naassaanngitsumik pilluaqqusaanernut tunngavik
7, 8. Angeruseq qanoq ittoq Guutip Abrahamimut pilersippaa? (1 nalunaerssûtigdlit 16:15, 16)
7 Ataataanerpaaq Abraham, ’uppertunut tamanut ataataasoq’, tassaavoq „Jehovap ikinngutaa“ (NV). (Rûmamiut 4:11; Jâko 2:21-23) Guutip naqqissigisaqarluni taanna uppernarsaaffigaa angerfigeqatigissagini, taamaalilluni angeruseq uagut naassaanngitsumik pilluaqqusaanissatsinnut tunngaviusoq pilersillugu. — Eprîarit 6:13-18.
8 Abraham Urimiikkallarmat Jehovap peqquaa nunamut allamut, Kana’animut, nooqqullugu. Taamani Jehovap Abraham ima neriorsorpaa: ’Inuiassuanngortikkumaarpakkit, pilluaqqullutillu, aqqillu allisikkumaarpara, ilikkullu pilluaqqunarsissapput nunami eqqarleriit tamarmik.’a (1 Môrsase 12:1-3) Tamatuma kingornagut angerutsimut, Abrahamimik angerutsimik taaneqarluarsinnaasumut, Guuti annikitsualunnik ukuninnga ilangussisarsimavoq: Abrahamip kinguaavata, tassa kingornussisissaata, nuna neriorsuutigisaq kingornussariumaaraa; kinguaassai kisissaanngitsunngorumaartut; Abraham Saralu kunnginik kinguaaqassasut. — 1 Môrsase 13:14-17; 15:4-6; 17:1-8, 16; Tussiaat 105:8-10.
9. Qanoq nalunngissinnaavarput Abrahamimik angeruseq aammattaaq uatsinnut sunniuteqarsinnaassasoq?
9 Guutip tamanna taavaa ’angerusiga uannullu ilinnullu [Abrahamimut]’. (1 Môrsase 17:2) Aammattaarli uatsinnut attuumassuteqarnera qularissanngilarput, kingornagummi Guutip angeruseq tamanna annertusisissimavaa ima oqarnermigut: ’Pilluaqqulluinnarpakkit, kinguaassatillu amerlisangaarumaarpakka qilaap ulloriaasut immallu sioraasut, kinguaassavillu akeqqamik isaaffiat pigissavaat. Kinguaassakkullu nunami inuiaqatigiit tamarmik pilluaqqunarsissapput.’ (1 Môrsase 22:17, 18) Uagut inuiannut taakkununnga ilaavugut; uaguttaaq pilluaqqusaasinnaassaagut.
10. Abrahamimik angeruseq sumik ilinniarfigisinnaavarput?
10 Unikkallarta Abrahamimik angeruseq sumik ilinniarfigisinnaanerlugu eqqarsaatiginiarlugu. Angerutsitut Edenimi pilersinneqarsimasutut Abrahamimik angeruseq ’kinguaassamik’ tikiukkumaartumik tikkuussivoq, taamaalilluni kinguaassap inunnik siuaasaqarnissaanik takutitsitsiarluni. (1 Môrsase 3:15) Kinguaariinnut taakkununnga Sem, Abraham aammalu Isak ilaassapput. Kinguaariit taakku kunnginik ilaqassapput, sukkullu arlaatigut eqqarleriit ataasiinnaanngitsut inuiaalli nunanit tamaneersut pilluaqqusaanissaannik kinguneqarumaarluni. Angeruseq tamanna qanoq ililluni naammassineqarpa?
11. Neriorsuutit Abrahamimik angerutsimut attuumassuteqartut qanoq eqqortinneqarsimappat?
11 Jakob, imaluunniit Israel, aqqutigalugu Abrahamip kinguaavi amerliartorlutik inuiassuanngorsimapput. Abrahamip uinikkut kinguaavisut kisinneqarsimanngitsutut Abrahamip, Isakip Jakobillu Guutiannik minguitsumik pallorfiginninnermut tunniulluinnarsimasuupput. (1 Môrsase 28:13; 2 Môrsase 3:6, 15; 6:3; apustilit suliait 3:13) Israelikkut minguitsumik pallorfiginninnermit tunussigajuttuusimapput, taamaakkaluartorli ’Jehovap saammaappai nallittorlugillu Abrahamimut Isakimullu Jakobimullu angerutsi pillugu; aserorumanngilaalu’. (2 kúngit 13:23; 2 Môrsase 2:24; 3 Môrsase 26:42-45) Allaat ilagiit kristumiut innuttamisut ilassereeraluarlugit Guutip Israelikkut inuiattut Abrahamip uinikkut kinguaavisut immikkut ajunngisaarfigiuarallarpai. — Dâniale 9:27.
Abrahamip anersaakkut kinguaassai
12, 13. Abrahamimik angerutsip anersaakkut eqquutitaanerani qanoq ililluni Jesus tassaalerpa kinguaassaq pingaarneq?
12 Abrahamimik angeruseq aappassaanik, anersaakkut ittumik, eqquutinneqarpoq. Annertunerusumik eqquutitaanera Jesusip nalaa sioqqullugu saqqummersitaasimanngilaq, Guutilli oqaasiani nassuiarneqarsimammat tamatuminnga paasinnissinnaanerput uagut ullumikkut inuusugut pilluaatigisinnaavarput. Paulus ima allappoq: ’Unnersuutit Abrahamimut kinguaassaanullu oqaaserineqarput. Ima oqanngilaq: „Kinguaassanullu,“ qassiiutillugit, kisianni ataasiutillugu: „Kinguaassannullu,“ tassa Kristus.’ — Galâsiamiut 3:16.
13 Aap, kinguaassaq kinguaariitsigut ataatsitigut pisussaasimavoq, tamannalu Jesusimut tunngatillugu ilumoorpoq, juutimit erniarineqarami, uinikkut Abrahamimik siuaasaqarluni. (Matîuse 1:1-16; Lúkarse 3:23-34) Aammattaarli Abrahamip Annerup qilammiittup ilaqutariissortaanut ilaasortaavoq. Eqqaaniarsiuk uppersuseqangaarluni ataataanerpaap Abrahamip ernini Isak pilliutigiumasimagaa Guutip tamanna piumagaluarpagu. (1 Môrsase 22:1-18; Eprîarit 11:17-19) Taamatut Jehovap ernituani nunamut aallartippaa inuiaat uppertut utertinneqaatissaattut pilliutinngoqqullugu. (Rûmamiut 5:8; 8:32) Taamaattumik paasineqarsinnaavoq suna pissutigalugu Abrahamimik angeruseq eqqarsaatigalugu Paulusip Jesus Kristus tassaaneraraa Abrahamip kinguaassaa pingaarneq.
14. Abrahamip kinguaassai pingaannginnerusut kikkuuppat, tamannalu pillugu suna sammilissavarput?
14 Nangilluni Paulusip nassuiarpaa anersaakkut eqquutitaanerani Guutip ’Abrahamip kinguaassai amerlisangaarumaarai’. Ima allappoq: ’Kristusip pigippasi Abrahamip kinguaaraasi, kingornussisussaallusilu unnersuut naapertorlugu.’ (1 Môrsase 22:17; Galâsiamiut 3:29) Taakku tassaapput kristumiut anersaamit tanitaasut 144.000-iusut Abrahamip kinguaassai pingaannginnerusut. Taakku kinguaassamut pingaarnermut akerliunngillat, ’Kristusilli pigai’. (1 Korintumiut 1:2; 15:23) Nalunngilarput taakkua ilarpassuisa Abraham siuaasarinngikkaat, inuiaqatigiinnit juutiunngitsuneersuugamik. Anersaakkulli eqquutitaanerani suli pingaaruteqarnerusoq tassaavoq allaat Abrahamip Annerup, Jehovap, ilaqutariissortaanut uinikkut ilaasortaannginnerat; ajortuliortulli Adamip ilaqutariissortaanut naammalluinnanngitsuusunut ilaasortaapput. Taamaattumik angerutsit kingusinnerusukkut pilersinneqarsimasut paasiniaaffigisariaqassavavut qanoq ilillutik taakku ’Abrahamip kinguaassaanut’ ilaasortanngorsinnaassanersut.
Inatsisinik angeruseq — ilanngussaagallartoq
15-17. (a) Suna pissutigalugu Inatsisinik angeruseq Abrahamimik angerutsimut ilanngunneqarpa? (b) Inatsisinik angeruseq siunertaminik qanoq ililluni naammassinnissimava?
15 Guutip Abrahamimik angeruseq siunertarisaminik naammassinninniarnermut alloriarnertut tunngaviusutut pilersereermagu kinguaassap tikiunnerata tungaanut qanoq ililluni kinguaariissortai mingutsinnaveersaarneqassappat nungusarnaveersaarneqassallutillu? ’Kinguaassaq’ tikiuppat eqqortumik pallorfiginnittut qanoq ilillutik ilisarisinnaassavaat? Paulusip apeqqutit taamaattut akivai Guutip Inatsisinik angerutsimik ilanngussinermini ilisimatussusia tikkuarlugu. Apustili ima allappoq:
16 ’Inatsisit taava sussappat? Ilanngussaapput uniuinerit pillugit [uniuinerit ilisimaneqartikkumallugit, NV] (kinguaassaq unnersuutitigut pineqartoq tikiutserlugu), peqqussutigineqarpullu inngilitigut, akunnermiliuttup assaasigut. Inatsisit Kristusimut perorsaasigaavut uppernikkut iluartuutinneqaqqulluta.’ — Galâsiamiut 3:19, 24.
17 Sinajip Qaqqaani Jehovap inuiaat Israelikkut asseqanngitsumik angerfigeqatigai Moses akunnermiliuttoralugu Inatsisinik angeruseq pilersikkamiuk.b (Galâsiamiut 4:24, 25) Inuiaat Israelikkut angeqataapput, angeruserlu ussigit savaasallu aavata kuineratigut atortuulersinneqarpoq. (2 Môrsase 24:3-8; Eprîarit 9:19, 20) Tassuuna Israelikkut inatsisinik Guutimeersunik naapertuilluartumillu aqutsinissamut najoqqutassanik tunngaviunerusunik tunineqarput. Israelikkut guutipilussiortunik aappaninnissaat kanngunartunillu aammalu eqqunngitsumik upperisarsiorpaluttunik ileqqoqarnissaat angerutsip inerteqqutigaa. Tassuuna angeruseq Israelikkunnut sernissortaavoq kinguaassallu kinguaariissortaanut mingutsinnaveeqqutaalluni. (2 Môrsase 20:4-6; 34:12-16) Israelikkulli naammalluinnanngitsut arlaannaataluunniit inatsisit tamaasa tamakkiisumik maleruarsinnaanngilai, taamaalillutik inatsisit taakkua ajortaannik ilisimaneqalersitsisuupput. (Galâsiamiut 3:19, NV) Aammattaaq palasip naammalluinnartup toqusuitsullu kiisalu pilliutip ukiut tamaasa pilliutigineqartaqattaartariaqanngitsup pisariaqarnerat tikkuarpaa. Inatsisit perorsaasutut meeqqamik ilinniartitsisussaanut pisariaqartumut siulersuisutut ipput. Ilinniartitsisoq taanna tassaavoq Messias imaluunniit Kristus. (Eprîarit 7:26-28; 9:9, 16-22; 10:1-4, 11) Siunertani naammassereeruniuk Inatsisinik angeruseq taamaatittussaasimavoq. — Galâsiamiut 3:24, 25; Rûmamiut 7:6.
18. Inatsisinik angeruseq aammattaaq sumik siunertaqarpa, sunali pissutigalugu tamanna paasiuminaappa?
18 Angeruseq utaqqiisaannaasoq tamanna pilersikkamiuk aammattaaq siunertaa pissanganartoq manna Guutip taavaa: ’Nipiga taava naalalluarussiuk angerusigalu aalajangiullugu, taava pigisassarsiariumaarpassi. Pigissavassilu palaseqatigiit kunngiuffiusut, inuiaat illernartut.’ (2 Môrsase 19:5, 6) Pissanganassusissaa! Inuiaat kunngiullutillu palasiusut. Tamannali qanoq pisinnaassava? Inatsisit kingusinnerusukkut erseqqissaanerattut naggueqatigiit naalakkersuisuusut (Judakkut) naggueqatigiillu palasiusut (Levikkut) tamarmik immikkut assigiinngitsunik suliassinneqarsimapput. (1 Môrsase 49:10; 2 Môrsase 28:43; 4 Môrsase 3:5-13) Inoqarsimanngilaq ataatsikkut naalakkersuisuusinnaallunilu palasiusinnaasumik. Taamaakkaluartorli Guutip oqaasii Môrsasip agdlagaisa áipait 19:5, 6-imiittut isumaqalersitsipput sukkut arlaatigut, taamani suli ilisimatitsissutigineqarsimanngitsukkut, Inatsisinik angerutsimut angeqataasut ilaat ’palaseqatigiinnut kunngiuffiusunut, inuiannut illernartunut’ ilaasortanngornissaminnik periarfissinneqarumaartut.
Naalagaaffik pillugu Davidimik angeruseq
19. Angerutsit kunngiussutsimik qanoq tikkuussippat?
19 Kingusinnerusukkut Jehovap angeruseq aamma alla pilersippaa uagut naassaanngitsumik pilluaqqusaanissatsinnut siunertarisaminik qanoq naammassinninniarnissaminut paasissutissiisoq. Paasereersimavarput Abrahamimik angeruseq Abrahamip uinikkut kinguaassaasa akornanni kunngeqarnissamik tikkuussisuusoq. (1 Môrsase 17:6) Aammattaaq Inatsisinik angeruseq ilimanarsisitsivoq Guutip innuttaasa akornanni kunngeqarumaarnissamik, Mosesimmi Israelikkut ima oqarfigai: ’Nuna neriorsuutigisaq nunagilerukku, oqaruillu: „Kunngissaq uannut ivertissavara, soorlu inuiaat avatinniittut tamarmik kunngeqartut,“ — taava Jehova Guutivit qinerumasaa ilinnut kunnginngortissavat. Inuk allanertaq qatanngutiginngisat ilinnut ivertissinnaanngilat.’ (5 Môrsase 17:14, 15) Taama ittumik kunngeqarnissaq Guutip qanoq ilillugu aaqqissussavaa, tamannalu Abrahamimik angerutsimut qanoq sunniuteqassava?
20. David kinguaariissortaalu qanoq soqutigisaalerpat?
20 Naak Israelikkunni kunngi siulleq tassaagaluartoq Saul naggueqatigiinnit Benjaminikkunneersoq, taassuma kingoraartigaa David qunusuitsoq ilumoortorlu naggueqatigiinnit Judakkunneersoq. (1 Sâmuale 8:5; 9:1, 2; 10:1; 16:1, 13) David sivisungaatsiartumik kunngioreersorlu Guutip taanna angerfigeqatigiumalerpaa. Siullermik ima oqarpoq: ’Kingunikkut kinguaassat makitikkumaarpara timinnit pinngorumaartussaq, naalagaaffialu aalajangersarumaarpara; taassuma atera illuliorumaarpaa, issiaffialu qilaalik [issiavissaarsua] naalagaaffiata pia aalajangersikkumaarpara naassaanngitsumik.’ (2 Sâmuale 7:12, 13) Soorlu angerutsimi tassani takutitsiarneqarsimasoq, Davidip ernini Salomon kunngitut kingoraartigaa, taannalu Guutip illuutaata, imaluunniit naalaffiutaata, Jerusalemimiittup sananeqarnerani kiffarineqarpoq. Tamannaannaanngilarli.
21. Naalagaaffik pillugu Davidimik angeruseq sumik pisinnaanngortitsiva?
21 Nangilluni Jehovap David imaattumik angerfigaa: ’Inoqutit naalagaaffiillu atattuinnassapput naassaanngitsumik kiinnavit saani; issiaviit qilaalik aalajaassaaq soraajuitsumik.’ (2 Sâmuale 7:16) Erseqqilluinnarpoq Israelimi kinguaariit kunngikkormiut Davidip kinguaariissortai Jehovap kingornussisussanngortikkai. Tassaaginnassanngillalli Davidip kinguaassaani kunngit tulleriiaartussat. Davidip kinguaassaasa ilaat kunngiujumaarpoq „naassaanngitsumut, issiavissaarsua seqinertut atassaaq“. — Tussiaat 89:21, 30, 35-37; Isaia 55:3, 4.
22. Davidimik angeruseq kinguaariinnut kinguaassap saqqummerfigisinnaasassaanut qanoq sunniuteqarpa?
22 Taava erseqqippoq Davidimik angeruseq peqqutigalugu kinguaariit kikkut kinguaassap saqqummerfigisinnaasassai killilerneqaqqissimasut. Allaat juutit ukiuni hundredelinni siullerni inuusut nalunngilaat Messias Davidip kinguaassaanut ilaassasoq. (Juánase 7:41, 42) Jesus Kristusip, Abrahamimik angeruseq naapertorlugu kinguaassap pingaarnerusup, Davidip kunngeqarfianik naassaanngitsumik kingornussisussamut piumasarineqartut tamaasa naammassivai, soorlu inngilip nalunaajaatigisimagaa. (Lúkarse 1:31-33) Taamaalilluni Jesus nunamut neriorsuutigisamut, Davidip nunami naalakkersuiffigisimasaanut, naalakkersuisussanngorpoq. Tamanna Jesusimik tatiginninnerulissutigissavarput; taanna naalagaaffimmik pigisassaviginngisaminik tigusisimanngilaq, kisianni inatsisitigut aaqqissuussaq Guutillu angerusia tunngavigalugit naalakkersuivoq.
23. Apeqqutit suut suli akineqartariaqarpat?
23 Angerutsit Guutip pilersissimasaasa ilaat sisamaannaat inuiaat naassaanngitsumik pilluaqqusaalernissaannut siunertarisaminik naammassinninnissaminut Guutip aaqqissuussineranut attuumassuteqartut matumuuna misissoreerpavut. Malugisimagunarpalli apeqquteqartoq suli akineqarsimanngitsunik, soorlu makku: Inuit naammalluinnanngitsuunerat palasimit kimit imaluunniit pilliummit sumit ataavartumik allanngortinneqarsinnaassanerpa? Inuit qanoq ilillutik Abrahamip kinguaassaanut ilaasinnaatitaassanerpat? Naalagaasinnaatitaanerup nunamuinnaanngitsoq aammattaarli allamut annertusisinneqarnissa ilimanarpa? Qanoq ilillutik ’nunami inuiaqatigiit tamarmik’, aammattaaq uagut tamatta, Abrahamip kinguaassaagut pingaarnerusukkut pingaannginnerusukkullu pilluaqqunarsisinnaassanerpat? Apeqqutit tamakku Napasuliaq Alapernaarsuiffik-up normuani tulliuttumi sammineqassapput. (wD 1/2 89)
[Quppernerup ataani ilanngussat]
a Illuinnarsiortumik angerfigeqatigiinneq pineqarpoq, angerfigeqatigiittut aappaannaa (Guuti) pisussaatimmat.
b „Angerutsinik aaqqissuussaq Israelikkut upperisarsiornerannut ilisarnaataavoq immikkut ittoq. Upperisarsiortuni allani asseqanngitsumik taakkua upperisarsiorneranni ilumoorfigisamut ilumoorluinnarneq piumasarineqarpoq, ataatsikkullu guutinik allanik ilumoorfiginninneq, upperisarsiornerni allani akuerineqartoq, pinngitsuugassaavoq.“ — Theological Dictionary of the Old Testament, atuagaq II, qupperneq 278.
Qanoq akissavit?
□ Abrahamimik angeruseq uagut naassaanngitsumik pilluaqqusaanissatsinnut qanoq tunngaviliiva?
□ Abrahamip uinikkut kinguaassaa kinaava? Anersaakkut kinguaassaanut kikkut ilaappat?
□ Suna siunertaralugu Inatsisinik angeruseq Abrahamimik angerutsimut ilanngunneqarpa?
□ Naalagaaffik pillugu Davidimik angeruseq qanoq ililluni Guutip siunertarisaanut siuarsaataava?
[Qupp. 11-mi diagrammi]
(Allassimasut qanoq inissisimanersut naqitami takuneqarsinnaavoq)
Angeruseq Edenimi pilersitaq 1 Môrsase 3:15
Abrahamimik angeruseq
Kinguaassaq pingaarneq
Kinguaassaq pingaannginnerusoq
Naassaanngitsumik pilluaqqusaanerit
[Qupp. 12-mi diagrammi]
(Allassimasut qanoq inissisimanersut naqitami takuneqarsinnaavoq)
Angeruseq Edenimi pilersitaq 1 Môrsase 3:15
Abrahamimik angeruseq
Inatsisinik angeruseq
Naalagaaffik pillugu Davidimik angeruseq
Kinguaassaq pingaarneq
Kinguaassaq pingaannginnerusoq
Naassaanngitsumik pilluaqqusaanerit
[Qupp. 8-mi assiliartaq]
Inuiaat pillugit siunertarisaminik naammassinnikkumalluni Guutip Abraham aalajaatsoq angerfigeqatigaa