Pinnissuseq piviusoq ilinni ineriartortissinnaavat

BIBELIMI angutinut arnanullu isikkoq pillugu pitsaasunik siunnersuuteqarpoq. Angutinut ima oqarpoq: ’Sakkunerlaat [inuusuttut] nukisik usornaatigaat.’ (ússatit 20:29) Aap, nukappissat piumassuseqassusiat inuummarissusiallu ilalernartorujussuusinnaasarput. Inuusuttuunerulli nukii peerukkaangata susoqartarpa? Bibelimi ussateqarpoq imaattumik: ’Qiit niaqorussuupput usornaatit, iluarnermut aqqutaasukkut pigiligaasut.’ (ússatit 16:31) Iluarneq, imaluunniit naapertuilluassuseq, ilorlikkut pinnissutsip ilaasa pingaartut ilagaat. Angutip inuusuttup naapertuilluassuseq immini ineriartortikkuniuk inuusuttutut piumassutsimi katakkiartulernerani inuttut pissutsiminut pinnersaatigiuaannarsinnaassavaa.

Arnat pillugit Bibeli ima oqarpoq: ’Alianaassut [kusanassuseq] sallutaasarpoq, inuginnerlu [pinnissuserlu] piunngilaq; arnaq Jehovamik mianerinnittoq tassa nersortariaqartoq.’ (ússatit 31:30) Arnaq inuusuttoq pinnerlunilu kusanartoq kajungernartarpoq. Qallikkulli pinnissuseq ilumoortuusaassutsimik, namminissarsiussutsimik perruussutsimillu toqquisoq kajungernartarpa? Naagga, pinnissuseq taama ittoq qalliinnakkuuvoq suussuseqarnanilu. Arnallu pinnissusia nungukkaangat suna kiserngoruttarpa? Pitsaanerungaassannginnerpali isikkorissusia nungunneq ajortumit — ilorlikkut pinnissutsimit ’Jehovamik mianerinninnermik’ pigiliussisimanermit pisumit — ingiallorneqaruni?

Inuttut pissuseq nutaaq

Ilorlikkut pinnissuseq tamanna namminermi ineriartortinneqarsinnaava? Aap, kristumiullu taamaaliortussaapput. Pinnissuseq piviusoq Guutip pingaartippaa. Soorlu akugdlîssup oĸausê 3:11-mi allassimasoq: ’Suut tamaasa pitsassuanngorlugit suliarisarpai taamaaffissaasigut.’ Inuttut kusanaatsumik pissuseqarnermik ersersitsisumik pissusilersortumit pallorfigineqarnissi taassuma kissaatiginngilaa.

Apustili Paulusip kristumiunut Kolossæmiittunut oqaasiisa ilaasa ersersippaat ilorlikkut pinnissutsip namminermi ineriartortinnissaa pisariaqartuusoq. Siullermik ima kajumissaarpai: ’Makku tamaasa iperarsigik: ajuallanneq, kamanneq, iluaatsuliorneq, mitallerneq, oqaatsit kanngunartut qanissinnit aninnaveerlugit. Salluffigeqatigiinnaveeritsi, inutoqaq ileqqui tappullugit iperarsiuk.’ Aap, tamakkuninnga pissusilersortut tamarmik Guutimut — inunnullu naapertuilluassutsimik nuannarisaqartunut — iluarinanngitsuupput. Paulus nangippoq: ’Inuttaaq [eqqorluartumik] ilisarsissalluni pinngortitsisi assigilerlugu nutaanngortoq atiniarsiuk.’ (Kulorsamiut 3:8-10) Eqqarsariartaaseq nutaaq misigeriaaserlu nutaaq Guutip piumasaanut naapertuuttut ’atisariaqarpavut’. ’Inuttaap,’ imaluunniit inuttut pissutsip nutaap, tamatuma suut ilisarnaatigai?

Kristumiutut pissutsit

Pissutsit kusanartorpassuit kristumiup inuttut pissusiinut ilaasut Bibelimi eqqartorneqarput. Ilorlikkulli pinnissutsip tunngavigisaa Jesusimit eqqartorneqarpoq: ’„Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Tassa inassut siulleq annerusorlu. Aappaatalu taamaaqatigaa: „Tullit ilittut asassavat.“’ (Matîuse 22:37-39) Guuti asagutsigu taassuma iluarisaanik iliornissarput kissaatigissavarput. Aammattaaq asanninnitta inuit allat taanna pillugu oqaluttuunnissaannut Pinngortitsisumillu ilisarsinissaannik ikiornissaannut killissavaatigut. — Isaia 52:7.

Apustili Paulusip aammattaaq pissutsit inuttut pissutsimut nutaamut ilaasut arlallit eqqaavai: ’Asanninneq tipaatsunnerlu eqqissinerlu kamajuinnerlu avaaginninnerlu angajoqqaatsernerlu ilumoornerlu qanilaarnerlu piitaajuinnerlu. Taamaattunut inatsisit assortuinngillat.’ — Galâsiamiut 5:22, 23.

Aammattaaq Bibelimi uiusut ima oqarfigineqarput: ’Arnap uini niaqorimmagu, soorluttaaq ilagiit Kristusi niaqorigaat; ilissi angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit.’ (Evfisumiut 5:23, 25) Nuliaasullu ima oqarfigineqarput: ’Arnat ilissi, uisi naalassigik soorlu Naalagaq. Arnap uini mianeriniarliuk.’ (Evfisumiut 5:22, 33) Uiusup akisussaaffini asannilluni, namminissarsiujuilluni kamagittarlunilu ingerlappagu ilaqutariittut inuuneq ajunngitsumik aaqqiagiiffiusumillu ingerlasinnaassaaq. Nuliaasullu uini isornartorsiortuaannanngikkaluarlugu unamminngikkaluarlugulu ilorlikkut pinnissutsimik ersersitsivigineratigut asannittumillu tapersersorneratigut suliassaanik oqilisaassinnaavaa. Pissutsit taama ittut atuukkaangata ilaqutariittut inuuneq uiusumut nuliaasumullu nuannaarutissaasarpoq.

Ilanngutassiap matuma siuliani eqqartorneqartunit paasineqarsinnaavoq qanoq ililluni pissutsit tamakkua ilaat pissuserineqarsinnaasut. Niviarsissap Sjunemimeersup savanik paarsisuunni ilumoorfigiuarpaa qamanngalu pisumik asallugu. Salomonip illussaarsuani alutornartorpassuit piniaannarlugit savanik paarsisuunni alaannarumanngilaa. Naalakkaminut, Potifarimut, ajortuliorumannginnami Josef ajunngissutsimik inunnguutigisaminik ersersitsivoq. Potifarip nuliata anguseriffigeriaraluarmani qimaanermigut imminut naalakkersinnaanermik ersersitsivoq. Aammattaaq annikilliortitaanerminik narrujuummissutiginninnginnermigut saamassutsimik, eqqissinermik ilalaarnermillu ersersitsivoq.

Silarsuarmi kusanaatsumiikkaluarluni pinnissuseq

Ullumikkut tamakkuninnga pissuseqartoqarsinnaava? Inuppassuit taama isumaqanngillat. Silarsuarmi asannissuseqarfiunanilu piumatooqarfioqisumi matumani iluatsittumik ingerlasinnaajumallutik sukannersuuniartarput, misigisimasarlutillu aniguiumagunik soqutigittaatsuullutillu piumatuujullutillu namminissarsiortuusariaqarlutik, sapinngisaminnillu ’aaqqissuussaaneq’ atornerluttariaqarlugu.

Bibelimili ima kajumissaaruteqarpoq: ’Saqitsaagajunnermit piunngitsumillu ataqqineqarumanermit pinnasi, kisianni qanilaarlusi ilasi immissinnit annerutinniarsigik, kialuunniit namminissani pinnagu, kisianni allattaaq iluaqutissaat piniarliuk.’ (Filípimiut 2:3, 4) Inuit akornanni pissutsit ajorsiartuinnarnerannut pissutaasoq tassaavoq unnersuussutit pitsaasut tamakkua inunnit nalinginnaasumik maleruarneqannginnerat.

Aammattaaq ullumikkut silarsuarmi nalinginnaasuuvoq inuup qanoq aningaasaateqartiginera imaluunniit sumik atorfeqarnera tunngavigalugu iluatsitsisimassutsimik naliliisarneq. Angut pisooq iluatsitsilluarsimasutut isigineqartarpoq. Pingaarutillilli piviusut eqqarsaatigigaanni pisuujuneq imaluunniit piitsuuneq apeqqutaanngilluinnarput. Allaammi pisuujuneq navianaateqarpoq. Bibelimi ima mianersoqqussuteqarpoq: ’Pisuunngorumasut usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik.’ Ima ilaqarpoq: ’Aningaasanik piumatuunermit ajortut tamalaat naasarput.’ — 1 Timûtiuse 6:9, 10.

Ullumikkut inuit namminissarsiortut, piumatuut, pigisanik pingaartitsivallaartut soqutigittaatsullu ’iluatsitsillutik’ ingerlasut takusaraluarpavut. Tamannali tassaanngilaq iluatsitsineq piviusoq, tassami inooriaatsimut taama kusanaatsigisumut aki annertooq tassaammat inunnut allanut attaveqarnerlunneq, avinneq, peqqiinneq uisakajaarnerlu. Inuit Guuti assilillugu pinngortinneqarsimapput, pissutsilli Guutip aallaqqaataaniilli tunniussimasaasa akerlerluinnaanik iliuuseqartarunik pillualernissaq neriuutigilersinnaanngilaat. — 1 Môrsase 1:27.

Ilorlikkut pinnissuseq ilinni ineriartortiguk

Qanoq ililluta silarsuup matuma sunniipilunneri akiorniarsinnaavavut, pissutsillu ajunngitsut Guutimillu mianerinnippaluttut immitsinni ineriartortillugit? Pissutsit asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq imminullu naalakkersorsinnaaneq apustili Paulusip taavai ’anersaap inerititai’-nik. (Galâsiamiut 5:22, 23, NV) Tassa pissutsit tamakku kusanartut immitsinni ineriartortissinnaajumallugit Guutip anersaava pisariaqarparput.

Qanoq ililluta Guutip anersaava pisinnaavarput? Bibelimik, Guutip anersaavanit isumassarsiarititaasumik, atuaqqissaarneq iluaqutigissavarput pissutsit sorliit ersersinnissaata aammalu qanoq ililluta tamakku immitsinni ineriartortissinnaanissaata paasiniarneranni. (2 Timûtiuse 3:16) Inuit allat Bibelimik atuaqqissaarneranni ikiornissaat Jehovap Nalunaajaasuisa kiffartornermik ilaattut isigaat. Ilumoorluni imminut misiligarnerup paasitissavaatigut sutigut kukkunerluta, tamakkunuunatigullu ikiorneqarnissatsinnut Guutip anersaava qinnutigisinnaavarput. Guutimik pallorfiginnittut allat ataatsimooqatigisarnerisigut tapersersortigisinnaavavut, aammattaaq tamaani Guutip anersaavanik ilangeeqataassaagut, Jesus ima oqarsimammat: ’Marluk pingasulluunniit atera tunaaralugu katisimasaraangata akornanniittaraanga.’ — Matîuse 18:20.

Silarsuassaq pinnersoq

Soorunami arlaannattaluunniit kukkunini sanngiissutinilu tamaasa ajugaaffigisinnaanngilai, ilumoorlutali ilorlikkut pinnissuseq immitsinni ineriartortinniarlugu ilungersorutta Guutip pilluaqqussavaatigut. Aammalu akilingaarumaarpaatigut. Bibelimi oqaluttuarineqarpoq taassuma siunertarigaa aaqqissuussaanermik nutaamik aaqqissuussaanermit ullumikkut atuuttumit allaanerulluinnartumik pilersitsinissani. Aaqqissuussaanissami nutaami „iluartut nuna kingornutissavaat najugaqassallutillu tassani naassaanngitsussamut“. (Tussiaat 37:29) Soorlu Jesus oqarsimasoq: ’Pilluarput qanilaartut, nuna pigissagamikku.’ — Matîuse 5:5.

Aaqqissuussaanerup matuma unammillerumatussusia namminissarsiorumatussusialu taamanikkussamut eqqissinermik toqqissisimanermillu nuannerluinnartunik taarserneqarsimassapput. ’Ajunaarsisoqarnanilu aseruisoqassanngilaq qaqqanni illernartumi ilaaniluunniit naami, Jehovamik ilisarsisut nuna tamakkerumaarmassuk, soorlu ermit ulikkaat immap naqqa.’ (Isaia 11:9) Aap, ’qulliit tamaasa isaannit Guutip allarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata’. — sarĸúmersitat 21:4.

Ilaa nuannerunangaarami? Taamanikkussamut inuit nunarsuarmi najugaqartut Guutimik tullermillu asanninnermik tunngaveqartumik ilorlikkut pinnissuseqarnerat tunngavigiinnarlugu tamanna piviusunngorsinnaassaaq. Guutilu neriorsuisimavoq maannakkut imminik kiffartuussisut, ’inuttut pissutsimik nutaamik’ imminni ineriartortitsisut aammalu najoqqutassiaminik ilungersorlutik maleruaaniartut, taamanikkussaq tamanna misigiumaaraat. Timikkut pinnissuseq pilluaqqussutinik taama ittunik kinguneqarsinnaanngilluinnarpoq. Taamaattumik pissutissaqarluarpoq pingaaruteqarneroqisoq — soraajannginneroqisorlu — ilorlikkut pinnissuseq, inunnut ajunngitsumik eqqarsariaasilinnut Guutimullu kajungernaqisoq, namminermi ineriartortissallugu. (wD 1/2 89)

[Qupp. 6-mi assiliartaq]

Inuit timikkut pinnersut namminissarsiortuunaveersaarlutillu inunnut allanut iluareqqusaartuunaveersaartariaqarput. Ilorlikkulli pinnissuseq Guutip iluarisaa imminni ineriartortinniartariaqarpaat