Pinnissuseq qalliinnakkuusinnaavoq

EVA, arnaq Guutip pinngortitaa siulleq toqqaannartumillu arnani pinngortitatuaa, qularnanngitsumik arnani inuusimasuni tamani pinnernerpaavoq. Taannali uinilu, Adam, Jehovamut naalanngitsuliorput. Taamaalilluni Evap Guutimut attaveqarnini pitsaasoq annaavaa inuiaallu alianartunik atugaqalernerannut pisooqataalluni. Naalanngitsulioreernerup kingorna qularnanngitsumik suli pinnersimassaaq — pinnissusiali qalliinnakkuusimassalluni.

Pinnissuseq eqqortumik oqaatigalugu Guutimit tunissutaavoq, tamattalu immikkut naligiinngitsumik pigaarput. Inuit ilaasa kusanarnerunissartik kissaatigisarpaat, inuillu ikinngitsut isikkorinnerulerumallutik aningaasarpassuit piffissarujussuarlu atortarpaat. Evamilli pisimasup ersersippaa qallikkut pinnissuseq immini pissutsinik allanik malitseqanngikkuni piunngitsuusoq. Pissutsinik sunik? Kunngi Salomonip nalaani pisimasumik oqaluttuamit paasineqarsinnaavoq pissutsit suut pineqarnersut.

Pinnissutsimit pingaarnerusoq

Bibelimi eríniugagssiat angnerssât-ni oqaluttuarineqarpoq niviarsiannguaq pinnersoq illoqarfimmit Sjunemimeersoq savanik paarsisumik asannittoq. Kunngilli niviarsiannguup taassuma pinnissusia malugaa, Jerusalemimukaatsillugulu nuliarsarfiginiassagamiuk. Niviarsiannguamut neqeroorutip ila angissusia! Pinnissutsi iluaqutigalugu Salomonip kunngitut illussaarsuani pisuussuseq, pissaaneq sunniinerlu annertooq pisinnaasimagaluarpai. Kunngilli qujanarniarluni qaninniarnera niviarsiannguup aalajangersimalluinnarluni tunuartippaa. Jerusalemip pisuussussui alutornassusialu tunulluinnarpai, savanillu paarsisuumminut ilumoortuarluni. Pinnissusia tassaaginnarsimanngilaq qallikkut kusanassuseq. Qarsupittuusimanngilaq, namminiinnaq iluanaarutissani isumagisuunagu imaluunniit piumatuunani, ilorlikkulli pinnissuseqarsimavoq siuaasami Evap piginngisaanik. — eríniugagssiat angnerssât 1:15; 4:1; 8:4, 6, 10.

Timikkut pinnissutsip navianaatai

Naak timikkut pinnissuseq kissaatiginartuugaluarluni, ajornartorsiutinik ilorlikkut pinnersuseqarnermi naapinneqarsinnaanngitsunik naapitsiffiusinnaavoq. Assersuutigalugu, ataataanerpaaq Jakob, ukiut 4000-ingajaat matuma siornagut inuusimasoq, paneqarsimavoq Dinamik atilimmik, qularnanngitsumillu pinnersuusumik. Taassuma ’nunap inuisa panii’ ilagisalersimavai, taamaaliorneralu silatusaarnerunngilaq. Tamatuma kinguneranik angutip inuusuttup Sikemimik atillip ajuutigingaaleramiuk pinngitsaalivaa. — 1 Môrsase 34:1, 2.

Qallikkut pinnissuseq ilorlikkut pinnissutsimik ilaqanngikkuni pingaakujulersinnaanermittaaq navianaateqarpoq. Kunngi David Absalomimik atilimmik erneqarsimavoq ima Bibelimi allaatigineqartumik: ’Absalomitut angummik pinnersigisoqanngimmat Israelimi tamarsuarmi, nersungaarpaat.’ (2 Sâmuale 14:25) Absalomilli pinnissusia qalliinnakkuusimavoq: qamuuna ilumigut perroortuuvoq, ataqqinaateqarumatuulluni soqutigittaatsuullunilu. Inuusuttuutilluni peqqusersusaarluni kusanassutsi Israelikkunni ilissarsiuutigeriarlugu ataataminut, kunngimut, perlulioqatigiinnermut siulersortaasimavoq. Angutip kusanartup taassuma naggataatigut toqutinnani naalagaaffiup inuinik imminnut sorsulersitsisimavoq.

Angutini pinnissuseq

Soorlu Absalomip oqaluttuarineqarnerani takuneqarsinnaasoq pinnissuseq angutiniittoq aammalu arnaniittoq Bibelimi eqqartorneqarpoq. Angut isikkorissutsiminik pingaakujuutiginnissimanngitsoq tassaavoq Josef, Dinap affarmik aqqaluaa. (1 Môrsase 30:20-24) Josef inuusuttuaraagallarmat qatanngutaasa sinngagileramikku inussiatut tunisimavaat. Tamatuma kingorna Ægypteniliaanneqarpoq. Sakkutuumit nuimasumit Potifarimik atilimmit pisiarineqarpoq, unneqqarissuullunilu eqiasuitsuugami kingorna Potifarip illuani pisortanngortinneqarpoq. ’Josefilu pinnerlunilu inugippoq.’ — 1 Môrsase 39:6.

Potifarip nulia Josefimut asannilersoorpoq kanngusujuillunilu innaqatigeriaraluarlugu. Angutilli inuusuttup taassuma ilorlikkuttaaq pinnissuseqarnini ersersippaa. Naalakkaminut, Potifarimut, ajortuliorumanngilaq qimaallunilu. Tamanna parnaarunneqarneranik kinguneqarpoq. Sooq? Aap, Potifarip nuliata sallulluni unnerluutigimmagu pinngitsaaleriaraluarsimagaani! Josefilli misigisani tamanna narrujuummissutiginngilaa, annikilliornartunillu atugaqarnermini maligassiaa ajunngitsoq taamanerniilli inunnut naapertuilluarnermik nuannarisaqartunut qiimmassaataasarsimavoq.

Soorlu pisimasut tamakkua ersersikkaat ilorlikkut pinnissuseq — ingammik Guutimut uppernermik tunngaveqartoq — qallikkut pinnissutsimit pingaarneroqaaq. Inuusuttut aappaninnissaminnik eqqarsaateqartut tamanna eqqarsaatigisariaqarpaat. Aammattaaq sulisussarsiortut nalunngilaat tamanna eqqarsaatigisariaqartuusoq. Qallikkut pinnersuugaluarutta pinnersuunngikkaluaruttaluunniit tamatsinnut pingaartuuvoq ilorlikkut pinnissutsip naleqarnerungaartup, inuttut pissutsip kusanartup, immitsinni ineriartortinnissaa. Tamannali qanoq ittuua, qanorlu ililluta immitsinni ineriartortissinnaavarput? Ilanngutassiami tulliuttumi tamanna sammissavarput. (wD 1/2 89)