aulajaitsumik ugpertuaritse
„ĸanoĸ sivisutigissumik nangâjuásavise?“ — 1 kúngit 18:21, The New English Bible.
1. inuit ilaisa sagdlusuíssut ĸanoĸ ĸisuariarfigissarpât?
K’ULALERK’AJÂNEK’ uvdlumíkut takornartáungitsoĸ uvagut Gûtimik bîbilimigdlo isumaĸarfigingningnivtínútaoĸ súniuteĸarsínauvoĸ. inuit ilaisa sagdlusuíssut ilínialerpât, nuánaralugo bîbililo atuarĸigsârtalerdlugo. kristumiut atautsimîtitsinere ilâtigut najûvfigissarpait, pâsivdluángilâtdle Gûtimik kivfartũssineĸ inûnerme anguniagarissugssaugaluarigtik. — Matîuse 13:3-9.
2. (a) inuit avdlat ĸanoĸ ĸisuariartarpat? (b) Eprîarinut agdlagkane 10:36-39-me sunik pitsaussunik únersũssuteĸarpa?
2 inuit avdlat sagdlusuíssut ilagsivât, Jehova Gûtimut Jesus Kristus avĸutigalugo túniutdluínardlutik, túniutdluínarsimanertigdlo erssersíkumavdlugo imermut morssugtitauvdlutik kuisíput. sujumukariángitsôrputdle. ilâtigut nalunaerĸútap akúnere mardlugsuit atordlugit oĸalũssissarput. túniutdluínarsimanertigdle aulajangiutdlugo inûniángitdlat, Gûtimut nangãngivigdlune túniutdluínarsimavdlune tássaungmat ũmatíkut ilũngardlune ilungersungârdlunilo inûnine táuna kivfartũkumavdlugo atorniarâ. — Matîuse 16:24; Eprîarit 10:36-39.
3. tamatumúnga ássingussumik píssusigdlit Eliasip ĸanoĸ oĸautigai?
3 nalornissut nangâssutdlo sagdlusuíssut nuánarigaluarpât, ãmátaordle silarssuaĸ nuánaralugo. ilerĸorisimassamik ilait sule ilerĸoriumagaluarpait. ilumôrfigissagssamingnut ilumôrnerat mardlúngordlune avísimavoĸ. ĸangarssuardle Eliasip Israelíkut aperai: „ĸanoĸ sivisutigissumik igdlugtut tusiásavise? [Jehova] Gûtiugpat maligsiuk, Bâlile Gûtiugpat maligsiuk.“ nugtigaĸ avdla nâpertordlugo imáipoĸ: „ĸanoĸ sivisutigissumik nangâjuásavise?“ — 1 kúngit 18:21, kal. ator.; The New English Bible.
4. ilungersortumik kivfartũssineĸ sumut iluaĸutauva?
4 Jehovap ínugtaisa ilungersortumik kivfartũssineĸ nuánârutigalugulo nakũssutigât. (Títuse 2:13, 14) anersãkut ũmârigtuássutigât. ilarpagssue, ingangmik ukiorpagssuarne Gûtimik kivfartũssinermingne misiligtagaĸartut, malungnartumik ilungersússuseĸarput. nalunaerutitdle nunat ilarpagssuinit pissut takutitsiarpât inûsungnerussut ilagîngnutdlo ilánguterĸámersut ilaisa silarssûp pê sule pilerigilersarait, Jehovamik kivfartũssineĸ ũmatíkut ilũngardlutik tamaviârutiginago. nuánãssusigssaraluat pivdluássusigssaraluatdlo sagdlusuíssut aulajaitsumik ilagsigaluaruníko ivdlernartumigdlo kivfartũssinerme tamaviârdlutik sujumukaraluarunik, ímaĸa avdlamik atorfeĸaratik oĸalũssissartúngordlutik, inuit avdlat oĸaorĸigsârtardlugit nalivta ilungersornássusianik nukingingnássusianigdlo.
5. aperĸutit sût ingminut aperĸutigísavdlugit iluaĸutausínauva?
5 ingmingnut aperissariaĸarputit: uvanga aulajaitsumik ugperpunga, imalũnît ardlalingnut sangmissarnerdlunga? nuáneraluartut nalikítut pivfigssaiautigivatdlârtarnerpáka? fjernsynimik issigingnârtarneĸ, timerssortarneĸ avdlanigdlo nuánârniarnerit nuáneraluartut pivfigssamigdle atuinarpatdlârtut Gûtimik kivfartũssinermit pivfigssaĸarfiginerussarnerpáka? imalũnît Gûte kivfartũniardlugo manigũtumigdlo nâlangniardlugo inûnivne anguniagaviginerpara? Gûtip perĸussâ nãmagsiumavdlugo inûningne anguniagarigugko, Gûtip ajortumêrneĸatsailiumârpâtit, táussumalo pivdluarĸussinera nâgssáungitsumik nuánârutigisínáusavat.
6. únersũssutit Jâkup agdlagaine agdlagsimassut sût aulajaitsumik ugpertuarnigssavtínut ikiûtausínáupat?
6 suliniarĸigsârdluta norĸaissariaĸarpugut aulajaitsumik ugpertuarniardluta Gûtip ârĸigssũssinigssâne nutâme inûneĸ nâgssáungitsoĸ piniardlugo. Eliasip inoĸatine kajumigsârpai erĸortoĸ ĸunusuitsumik aulajangerfigerĸuvdlugo. Jakob agdlagpoĸ ima: „taimáitumik Gûte nâlagarsiorfigisiuk; Diâvulule akerartorsiuk, ĸimásavâsilo. Gûtimut patdligúniaritse, tauva ilivsínut patdligutísavoĸ. ajortuliortuse-â, agssase ipîarsigik, atausiúngitsumik isumaĸartuse-â, ũmatise minguiarsigik.“ Jakobip agdlagfigai avdlamik isumatârtariaĸartut, ũmatíkúme nangânermit Gûtip iluaríngisainik iliûseĸalertarput. Jakobip únersũssinere ivdlítaoĸ iluaĸutigisínauvatit silarssûp inuisa ilerĸue pilerigilersimagugkit. Jakob nangitdlune agdlagpoĸ: „upigitse aliasugdlusilo ĸiavdlusilo; igdlarnerse aliasungníngordle, tipaitsungnersilo nikaníngordlune. [Jehovap] sâne nikanartíniaritse, tauva akitsisísavâse.“ — Jâko 4:7-10.
ilisimássutsip ugperneĸ ineriartortíkâ
7. (a) ilisimassaĸarneĸ ugpernermut súkut atássuteĸarpa? (b) ugperneĸ ineriartortíniardlugo suna pivdlugo bîbile atortariaĸarpiuk?
7 ugperneĸ tatigingningneruvoĸ. erĸordluartumik ilisimanermik misiligtagaĸarnermigdlo túngaveĸarpoĸ. Gûte ilisarinerugáine oĸausialo avĸutigerĸussailo misiligtagaĸarfiginerugáine, ugperneĸ sángisunerujartúsaoĸ. bîbilime agdlagsimavoĸ: „ugpernerdle tássauvoĸ neriugissane nakimássutiginavêrdlugit.“ (Eprîarit 11:1) ĸanoĸ nakimanatit ugpersínáusavit Jehovap iliûserisimassainik ilisimassakíkuvit? Gûtip isumaliorsínáussuseĸartípâtigut, silatússuseĸartípâtigut pâsingnigsínáussuseĸartitdlutalo. pigínáussutsit tamáko tuníssutáuput, Gûtivdlo tamákunínga atuerĸuvâtigut ilisariniardlune. inuk agdlagkanik agdlagfigigugko, ilimagísavat agdlagkanik atuarnigssâ, ilissivingmut ilissinigssâ imalũnît nerrivingmut pínersautitut ilissinigssâ ilimaginago. Gûtip uvavtínut agdlagai — oĸausê agdlagaussut — ivdlit atuarêrpigit atuarĸigsârdlugitdlo? atuarĸigsârugko pâsiniarĸigsârdlugulo avdlatigut ilíkarsínáungisatit nalujungnaeriartúsavatit. pâsíssutigssat bîbilíkut pigssarsiarineĸarsínaussut naleĸássusiat erĸaimassariaĸarparput. utorĸaunertaĸ kristumioĸ oĸarpoĸ: „ĸulartartut atuarĸigsârpiartángitdlat. bîbile ilisimassaĸarfigingâtsiángilât — sagdlusuíssut pigissagssamigtut tigusimángisáinarpât.“
8. aperĸúmik akisínáungisangnik aperineĸaruvit, ĸanoĸ iliornigssat inássutigisínauvarput?
8 aperĸúmik akisínáungisangnik aperineĸarângavit isumaĸásángilatit ugpernigkut amigauteĸardlutit. kialũnît tamaisa ilisimasínáungilai. tauva misigssuerĸigsâriarit. agdlagsimavfik versitdlo ataĸatigissai atuákit, misilingniardlutitdlo erĸartorneĸartoĸ erĸortumik pâsisimanerdlugo. Comprehensive Concordance of the New World Translation of the Holy Scriptures, atuagaĸ ĸinerdlerfigssiaĸ Aid to Bible Understanding [Hjælp til forståelse af Bibelen], Index ãmalo Napassuliaĸ Alapernaerssuivfik ukiune matuma sujulîne sarĸúmersimassut iluagtitdlugit agdlagsimavfît aperĸutigineĸartumut atassut, ĸáumarsautigssat aperĸutigineĸartup tunuleĸutarissai navsuiarneĸarfigissailo nanisínáusavatit. ãmátaoĸ kristumioĸatitit misiligtagaĸarnerussut ikiortigisínauvatit. nalunaiaissoĸ ukiorpagssuarne misiligtagaĸarsimassoĸ oĸarpoĸ: „nãmaginartumik akíssutisíngitsũngisáinarpunga.“
9. berøamiut maligagssiât sumik ilíniarfigisínauvarput?
9 berøamiut ássigissariaĸarpavut; táuko bîbilime nersorneĸarput ’uvdlut tamaisa agdlagkat [ivdlernartut] misigssortaramíkik’ apustilip Paulusip ajoĸersûtigissai ilumôrnersut ĸulákêrniardlugit. navssârisimassatik pakatsíssutigíngilait. taimáitumik „ilait amerdlasût . . . ugpertúngorput“. ilâta, Sopaterimik atigdlup, ingmíkut akuerissauvfigâ apustile Paulus Makedoniákut angalaoĸatigalugo apustilip ajoĸersuiartortitatut angalanerisa pingajuáne. — apustilit suliait 17:10-12; 20:4.
ĸanilârneĸ pissariaĸarpoĸ
10. (a) ilisimassaĸarneĸ ĸanoĸ atornerdlungneĸarsínauva? (b) ússatit 16:5-ime agdlagsimassup ĸanoĸ isumaĸartísavâtigut?
10 ilisimassaĸarneĸ ingmine anguniagáungilaĸ. sákûvordle Jehova Gûtimik ilisaringningnigssamut oĸausianigdlo ilíniarniarnigssamut. erĸordluartumik ilisimassaĸarnerup asangningneruvdlo manigũtúngortísavâtigut, ingminik pivdluta ingassagtumik isumaĸarungnaersitdluta. inuit ilait atuarĸigsârtarput, Gûte ĸanoĸ pitsaunerussumik kivfartũsínáusagigtik ilíniarniarnago, ingmingnutdle akitsisíniardlutik nangmingnerdlo isúmatik pingârtíneruniardlugit. makitalersarput inuitdlo avdlat — ĸatángutit utorĸaunerussut agdlâtdlo ilagît kristumiut bîbilivdlo ajoĸersûtitai ilagît ajoĸersûtigissait — issornartorsiulerdlugit. — ússatit 16:5; 1 Korintumiut 8:1.
11. ilisimassavut silatússuserputdlo sumit pivavut, taimáitumigdlo tamána erĸarsautigalugo ĸanilârneĸ ĸanoĸ issigísavarput?
11 túniússatut pisâríngisavtínik peĸángilagut. silatússuserput angajorĸâvtínit kingornússarârput, autdlarĸautânitdle píngortitsissuvta, Jehova Gûtip, inuiait silaĸássusermik tunivai. ilisimassavut pivavut ikiortigissavtigut, atuagkavtigut Gûtimitdlo sagdlusuíssúmik autdlâviussumit. pigissavúme tamavingmik Gûtimit perĸârsimáput. apustile ima agdlagpoĸ: „kiame angnerutípâtit? sunalo pigaiuk túniússatut pisâríngisat? túniússatutdle pisârigagko sôĸ pisârtíneĸángitsutut usorssitsârpit?“ — 1 Korintumiut 4:7.
12. tugsiaut 25:9-me ãmalo Jâkup agdlagaine 4:6-ime erĸarsautigssaĸ kimigtôĸ suna ersserĸigsarneĸarpa?
12 silatússusivtigut kingornússavtigut Jehovap ĸanoĸ íssuserput takuneĸ ajorpâ, ĸanilârnivtigutdle avĸutigerĸussainigdlo ilíniarumássutsivtigut malingnigkumássutsivtigutdle píssuserput takussardlugo. ĸanilârneĸ ugpernerdlo ataĸatigîgput. bîbilime agdlagsimavoĸ Gûtip „ilalârtut“ avĸutigissaminik ajoĸersúsagai. agdlagsimavortaoĸ: „angneruniartut Gûtip akerartorpai, nikanartítutdle sáimáutarpai.“ — tugsiaut 25:9, kal. ator.; Jâko 4:6.
13. ajoĸersoruminássutsimíkut maligagssiuivdluartut kíkut taisínauvavut?
13 ĸanilârnerup ilagâ sujúnersorneĸarumássuseĸ. tamatumûna apustilit Peter Tomasilo malungnartumik maligagssiuíput. Peter oĸalungníkut sagdliussarpoĸ, ãmátaordle táuna akulikínerpâmik sujúnersorneĸartarpoĸ agdlâtdlo avorĸârineĸartardlune. Peterile suleriarsínáussuseĸardluartûvoĸ ilungersortoĸ, ugpernermigutdlo, autdlarnîsínáussutsimigut sapĩssutsimigutdlo tamavta malungnangârtumik maligagssípãtigut. Jesus makísimassoĸ Tomasip ugperíngilâ, ilumutdle taimáitoĸarsimaneranut ugpernarsaut nãmagdluínartoĸ nâpíkamiuk ernĩnardluínaĸ ilagsivâ. uvagut taimatut ĸanilârtigissarnerpugut bîbile atordlugo kúkunivtínik pâsinerdluinivtínigdlũnît pâsitíneĸarângavta? — Juánase 20:24-29.
ugpernerit misiliguk
14. utorĸaunertaĸ kristumioĸ ĸanoĸ iliortarpa aulajaitsumik ugpertuarniardlune?
14 utorĸaunertaĸ kristumioĸ, ukiorpagssuarne sagdlusuíssúmik maleruaissoĸ, ingminut aperissarpoĸ suna píssutigalugo sule sángisûmik ugperssuseĸarnerdlune, uvfa ilisarisimassame ilait sagdlusuíssúmit tunuarsimassut. oĸarpoĸ Paulusip oĸaorĸigsârutâ erĸarsautigiuáinarsimavdlugo: „ingmivsínik misiligitse ugperdluse pissarnersuse; ingmivsínik misilingniaritse.“ (2 Korintumiut 13:5) utorĸaunertaĸ táuna bîlerdlune suliartortitdlune ingminik misiligtarpoĸ, bîbilime ajoĸersûtit ilumôrtut isúmamigut utertardlugit. sagdlusuíssut oĸaloĸatigĩssutigalugo oĸaloĸateĸartûssârtarpoĸ, isúmamigut ajoĸersûtit ilumôrtut inungnut ássigĩngitsunik píssusilingnut navsuiartardlugit igdlersortardlugitdlo. ĸatángutip táussuma uparuarpâ rigssalime oĸalugiarnerit tamanut angmassut ĸularungnaersítarâtigut bîbile ilumut Gûtip oĸauserigâ, tamatumínga ugpernivtíne. aperivordle: „tamákule ĸanoĸ ilisimásanerpavut atautsimĩnernut navsuiarneĸarfigisimassáinut najûtíngitsôrsimaguvta?“ erĸaissaĸátârpai Gûtip ajúngisârnera peĸatigîgsortailo. nákutigdlîssup kristumiup táussuma ĸinunermine tamáko ĸujássutigalugit taissarpai, oĸardlunilo: „Jehova ĸutsavigissarpara ínugtaminĩtuarĸungmanga.“ ’ugperdlutit pissarnersutit’ taimatut ingmingnik misilîssarnigssat iluaĸutigisínáungínerpiuk?
ĸinuneĸ pissariaĸavigsoĸ
15, 16. suna pivdlugo ĸinuneĸ aulajaitsumik ugpertuarniarnivtínut pissariaĸavigpa?
15 taineĸarêrsup ersserĸigsarpai aulajaitsumik ugpertuarnigssamut pissariaĸavigsut mardluk, tássa: ĸinuneĸ ãmalo kristumiut atautsimĩnere. amerdlanertigut inuit sángîtsumik ugperssusigdlit ĸaĸutigôrtumik ĸinussarput. atâtap kristumiup erĸarsautigissarpâ Daniel uvdlormut ardlaleriardlune ĸinussartutut, agdlât ĸinerĸussáungínermut inatsisiliorneĸarêrnerane. (Dâniale 6:7-12) atâtaussup táussuma uvdlormut ardlaleriardlune Jehova sâgfigissarpâ ilisimássúmik tunerĸuvdlune sujúnersorĸuvdlunilo.
16 ivdlit ĸinúngitsôrtarpit? tugsiaut imatut oĸausertaĸarpoĸ: „[Jehova] qanippoq torlorfigisiminut tamanut, tamanut ilumoortumik torlorfigisiminut.“ Jesus aperaoĸ: „ilivse nauk ajortuse ĸitornase tuníssutinik ajúngitsunik tunisínaugavsigik, ĸanorme tauva atâtavse ĸilangmiussup ajúngitsunik tunisínautigísavai ingminit ĸinussut!“ (Tussiaat 145:18; Matîuse 7:11) Jehovap ilumut ugperdlutik ingminit ĸinussut „ajúngitsunik“ tuniumârpai.
atautsimĩnerit pissariaĸássusiat
17. ugpeĸatinik nâpitsissarnerup pissariaĸássusiata ersserĸigsarneĸarnigssânut kíkut bîbilime erĸartorneĸartut maligagssauvdluartutut taineĸarsínáupat?
17 ĸinunerup saniatigut, ugpertuásagáine ugpeĸatinik nâpitsissarneĸ pissariaĸarpoĸ. ukiut tamaisa pingasoriardlutik Israelíkut angutitait tamarmik Jerusalemime „takutísáput [Jehovap] nâlagaussup kînânut“. nâpeĸatigîngnerit táukua anersãkut pigssarsiaĸardluarnássusiat nalúngínamíko, anguterpagssuit ilatik tamaisa ilautítarpait. (2 Môrsase 23:14-17; Lúkarse 2:41-45) ãmátaoĸ, Paulusip ĸilanârâ ilagît Romamĩtut ugperníkut ineriartornartumik kajumigsârinigssât. ugpeĸatine ilagísavdlugit kajungeĸaoĸ „kajumigsâĸatigêrĸuvdluta“gôĸ anersãkutdlo nakússagteĸatigîgdlutik ugpeĸatigĩssutsimíkut. — Rûmamiut 1:11, 12.
18. sángisûmik ugperssusigdlit kristumiut atautsimĩnere ĸanoĸ issigissarpait?
18 inuit sángisûmik ugperssusigdlit kristumiut atautsimĩnere tamaisa iluaĸutigiumassarpait. atautsimĩnerup akúnerata sujugdliup nânerane anissaríngitdlat, atautsimĩneruvdlo akúnerata áipâ autdlartilersoĸ aitsât isertarnatik. atautsimĩnerit pingârtingârpait, nalúngínamíko atautsimĩnerit ilíniarfigssaussut, kãmagtorneĸarfigssaussut, pivdluarĸuneĸarfigssaussut, atautsimĩnernime ĸatángutinit asangnigtunit ikiorneĸarfigssaĸaravta, „asangningnermut ajúngitsuliornermutdlo“ kajumigsâĸatigîgfigssaĸardluta. (Eprîarit 10:24, 25) ĸanoĸ taimatut kajumigsârneĸarsínáusaugut kajumigsârisínaussut nâpeĸatigineĸ ajoruvtigik?
nalunaiaissarneĸ ugpernerputdlo
19. kristumiutut naluaiaissarnerup ugperneĸ ĸanoĸ nakússagtítarpâ?
19 kristumiutut nalunaiaissarnertaoĸ ugperníkut ineriartornarpoĸ. Jakob agdlagpoĸ: „ugpernerit sulianik ilaĸartínago uvavnut nivtaruk, uvangalo ugperneĸ suliavnit ilingnut nivtásavara. sôrdlume time anersâĸángitsoĸ toĸungassoĸ, taimátaoĸ ugperneĸ sulianik ilaĸángitsoĸ toĸungavoĸ.“ (Jâko 2:18, 26) kristumiut suliagssaisa pingârnerit ilagât avdlanik ajoĸersuinigssaĸ, Jehovavdlo nalunaiaissuisa kíkutdlũnît ugpernarsarsínauvât nalunaiaineĸ ugpernermut ineriartornaĸissoĸ! ajoĸersorneĸartuínáungitsumut ãmátaordle ajoĸersuissumut iluaĸutaussarpoĸ. anersãkut ineriartornardlunilo ugperníkut nakússagtínarpoĸ. nalunaiaigângavit ugperissat igdlersortariaĸartarpat. nalunaiainíkut erĸarsatdlarĸigsissarputit. âp, nâlagauvfingmik nalunaiautigingningneĸ Gûtimit pivdluarĸunarpoĸ anersâvanitdlo sujulerssorneĸarnardlune. — Mákorse 13:11; Rûmamiut 10:14, 15.
’kivfamik’ tatigingningneĸ
20, 21. (a) „kivfaĸ ilumôrdlunilo silatôĸ“ pivdlugo suna erĸaimásavdlugo pissariaĸarpa? (b) kristumiup tamána ĸanoĸ oĸauseĸautigâ?
20 pingârportaoĸ puiornavêrdlugo sagdlusuíssut sumit ilíniarĸârsimagigput. kíkut ikiorĸârpãtigut bîbile neriorssûtitailo ugpererĸuvdlugit? bîbilip uvdlumíkut uvavtínut pingâruteĸarnera ĸanoĸ ilíniarĸârparput? Jesus oĸarpoĸ tikiuterĸingnermigut nâpíkumârine „kivfaĸ ilumôrdlunilo silatôĸ“ anersãkut inũssutigssanik tunississartoĸ, oĸardlunilo „kivfaĸ“ taimailiordlune nâpíneĸartoĸ nâlagkap pigissainut tamanut pârssissúngortíneĸásassoĸ. — Matîuse 24:45-47, NW.
21 uviussoĸ kristumioĸ oĸarpoĸ: „Jehovap peĸatigîgsortai takugssaussut tatiginardluínarĸigsârput. sutigutdlũnît támarsãngisáinarpãnga. oĸauseĸautaisa tamarmik Gûtip oĸausia túngavigât uvavnutdlo, ilaĸútavnut ilisarisimassavnutdlo tamanut pitsaunerpârtauvdlutik. uvanga isumaga maligdlugo tamána tatigingnilersitsingârpoĸ.“
22. ugpernerput pârivdluarnerigput misigssuerĸigsârniarnivtíne aperĸutit sût aperĸutigisínauvavut?
22 ivdlit Jehovap oĸausia atuarĸigsâravko, ilagsigagko ugperalugulo? Jehovamut túniutdluínarsimavit, túniutdluínarsimanerdlo erssersíkumavdlugo imermut morssugtitauníkut kuisíkavit? túniutdluínarsimaneĸ nâpertordlugo inûvit? Gûte ĸínuvigissarpiuk sujúnersorneĸarnermik, ilisimássúmik ugpernermigdlo? akulikitsumik perĸigsârtumigdlo atuarĸigsârtuarpit? kristumiut atautsimĩnerinut tamanut najũtarpit? Gûtimik kivfartũssinermut iluartumut ilungersortumik peĸataussarpit? ajoĸersugángortitsiniarningnilo píkorigsiartuínarpit, imalũnît nãmáinartumik oĸalũssissarpit? — Matîuse 28:19, 20.
23. ajornartorsiutit, misilingneĸarnerit akornutaussutdlo ĸanoĸ isumaĸardlutit atúsavigit?
23 sôruname tamavta ajornartorsiuteĸartarpugut, tamavtalo ingmíkut kúkússuteĸartardluta. misilingneĸarângavtale akornutaussutdlo nãmagtôrtarângavtigik, nangâssariaĸángilagut, patajásángilagut nalornísanatalo. kisiánile atausĩnaussumik isumaĸartariaĸarpugut sagdlusuíssutdlo nalorníssutiginago. Jakob agdlagpoĸ ima: „ĸatángutíka, tamalânik misilingneĸarângavse tipaitsûtigĩnarsiuk, nalúngínavse ugperssuserse misilingneĸarune nikatdlujuínermut súniutáusassoĸ.“ Paulus oĸaorĸigsârivoĸ: „erĸumagitse, aulajaitsumik ugperitse, angutaugitse, nukigtoritse.“ (Jâko 1:2, 3; 1 Korintumiut 16:13) Jehovamut nalunaiaissutut erĸortumik ugpertuásaguvta ugperneĸ píssuseriniardlugo ineriartortítariaĸarparput, Gûtip anersâvata inerititaisa ilagingmássuk. — Galâsiamiut 5:22, 23.
24. aulajaitsumik ugperdlune sôĸ taima pissariaĸartigâ?
24 suna pivdlugo taimailiortariaĸarpit? ugpernerme erĸornavêrĸutauvoĸ Satanimut ’lîuvertut uiánissârtutut îssagssarsiordlune angalassartumut’. „pingârtumigdlo ugperneĸ tiguniarsiuk erĸornavêrĸutigalugo, táussumínga ajortup ĸarssue ingnigdlit tamaisa ĸamitísínáusagavsigik.“ (1 Pîtruse 5:8-10; Evfisumiut 6:16) aulajaitsumik ugpertuaruvit, Gûtip iliûsererĸussai maligdlugit iliûseĸarumásautit. ũmatit erĸortumik píssuseĸásaoĸ. Jehovap únersũssutai najorĸutaralugit sulissásautit, sujumutdlo ingerdlajuáinásavdlutit, avĸusinerme inûnartumut sangmissume sujumukariardlutit. — Matîuse 7:14. (wD 1/9 84)
aperĸutit uterĸitagssat
□ suna píssutigalugo inuit ilait ĸularpat, ĸularungnaerniardlutigdlo ĸanoĸ iliorsínauvdlutik?
□ ilisimassaĸarneĸ manigũnerdlo pivdlugit sunik ilíkagaĸarpit?
□ ugpernerit ĸanoĸ nakússagtísínauviuk?
□ aulajaitsumik ugperssuseĸartuarniarneĸ sôĸ taima pissariaĸartigâ?
[Qupp. 7-mi assiliartaq]
oĸalûserissagssat aperĸutitdlo bîbilimut túngassut misigssoráine, Vagttårnip atuagkiai iluaĸutaussorujugssûssarput