Aggusti

Neriuutigaarput inuit amerlanerpaartaasa mianersoqqussut taanna qisuariarfigissagaat Jehovamullu kiffartoqatigilerusulluta. Taavami maannakkut mianersoq­qussutinut qisuarian­ngitsut? Imaassinnaasoq inuit ilaasa Babylon­nersuup suujunnaarsitaanera takugunikku Jehova upperilissagaat tamannalu annaanneqaatigis­sallugu. Tamanna eqqarsaatigalugu qanoq pisoqarumaar­neranik maanna oqaluus­sinissaq nukingin­narnerungaarpoq. Maannakkut eqqartukkagut taamanik­kussamut eqqaassajun­narsivaat. (Aamma takuuk Ezekieli 33:33). Immaqa mianersoq­qussutit eqqaasimasagut eqqaagunikkit kingusin­naanngin­nerminni Jehovamut kiffartulerusussapput. Soorlu Filippimi parnaarussanik paarsisup “nuna sajorujus­sualermat” isummani allanngortikkaa, taamatuttaaq imaassinnaavoq maanna uagutsinnut tusarnaarusun­ngitsut ilaasa Babylon­nersuup suujunnaarsitaanera takugunikku isummartik allanngor­tissagaat. – ApS 16:25-34. w24.05 17 § 9-10

Paulusip kristumiunut hebræerinut allatai ilinniarfigil­luarsin­naavagut. Taakkua ilaat anersaakkut siumukarnatik anersaakkut nerisassat ‘tamuasarissat pinnagit immuk pisariaqar­teqqilersimavaat’. (Hebr 5:12) Ilagiit aqqutigalugit Jehovap ilinniar­titsissutigisai nutaajusut paasinagillu akuerisiman­ngilaat. (Uss 4:18) Assersuutigalugu kristumiut juutiusut ilarpassuisa Moorsisip inatsisai, ukiut 30-t missaat tamatuma siorna Kristusip pilliutaa tunngavigalugu atorunnaareeraluartut, suli maleruar­neqassasoraat. (Tit 1:10) Paulusip ilumoortut itisuut ilinniar­titsissutigisani akuerinias­sammatigit ikiorniarsarivai. Allataalu iluaqutigalugit paasivaat kristumiut Jehovamik guutisioriaasiat juutit guutisioriaasiannit pitsaanerusoq oqaluus­siuarnis­saminnullu sapiillisin­neqarlutik. – Hebr 10:19-23. w24.04 6 § 15

Adamip Evallu Saatani Jehovamut pikitsitseqatiginiarlugu aalajangermatali inuit milliardillit toqusimapput. Toqusut qanoq pineqassappat? Jiisusip malinnittaasa ilaat, katillugit 144.000-t, toqujuitsun­ngorlutik qilaliar­titaassapput. (Saqq 14:1) Jehovamullu kiffartortut aalajaatsorpassuit ‘naapertuil­luartunik makititsinissami’ nunarsuarmi makitin­neqassapput. Jiisusillu ukiuni 1.000-ni naalakkersuinerani inaarutaasumillu misilin­neqarnermi aalajaat­tuarunik tassani naassaan­ngitsumik inuussapput. (Dan 12:13; Hebr 12:1) Aamma ukiuni 1.000-ni naalakkersuinerani naapertuil­luanngitsut – ilaatigut Jehovamut kiffartorsiman­ngitsut allaallu ajortorujus­suarmik iliorsimasut – allannguinissamut Jehovamullu kiffartuler­nissamut periarfis­sinneqassapput. (Luk 23:42, 43; Joh 5:29) Inuilli ilaat ima inupiluutigisimammata Jehova aalajangersimavoq taakku makititaanavian­ngitsut. – Luk 12:4, 5. w24.05 2 § 3; 6 § 15, 17

Jehovamit iluarisaarusuttoq kinaluunniit ‘ilumoortumik uummammit pisumik oqaluttariaqarpoq’. (Tuss 15:2) Tassani pineqaan­nanngilaq salluneq ajortoq. Jehovap kissaatigaa sutigut tamatigut unneqqaris­suussasugut. (Hebr 13:18) Tamanna pingaaruteqarpoq, “Jehovami sianiinaariniar­tartumik iluarin­ninngil­luinnarpoq, unneqqaris­sunulli ikinngutaal­luarpoq.” (Uss 3:32, New World Translation) Inuk taamaallaat allanit isigineqaraangami Guutimut naalattartoq kisimiik­kaangamili naalakkun­naartartoq tassaanngilaq ‘ilumoortumik uummammit pisumik oqaluttartoq’. Tassaavorli inuk sianiinaariniartartoq. Taamaattup immaqa Jehovap inatsisaasa iluaqutaajuarnerat qularilissavaa. (Jaak 1:5-8) Immaqalu pingaaruteqan­ngissorisaminut tunngatillugu Jehova naalakkun­naarpaa. Taavalu naalannginnermi kingunipilui ingerlaannaq misigin­ngikkunigit ajornerusumik iliortalersinnaavoq. Guutimut kiffartorsorigaluartoq Jehovap tamanna iluarinngilaa. (Oqal 8:11) Uagulli sutigut tamatigut unneqqaris­soorusuppugut. w24.06 10 § 7-8

Jehovap kiffaasa ilumoortoq Guutip oqaasianeersoq nuannaringaarpaat. Taanna tunngavigalugu uppertun­ngorsimavugut. (Rom 10:17) Jehovap ilagiit kristumiut ‘ilumoortumut sukaallutillu tapersersuisuusut’ pilersis­simagai upperilersimavarput. (Tim 1. 3:15) Biibili imaluunniit Guutip peqatigiis­sortaanit ilitsersor­neqarnerput tatigiun­naassagipput Saatanip kissaatigaa. (Ef 4:14) Ungasin­ngitsukkut Diaavulup salluliuutit ilumoorsorinartut atorlugit inuiaqatigiit Jehovamut akerlilersuisun­ngortissavai. (Saqq 16:13, 14) Aamma nalunngilarput Saatani Jehovap innuttaanik tammartitsiniarluni aatsaat taama sapinngisaminik iliuuseqar­tigissasoq. (Saqq 12:9) Taamaattumik maanna ilumoortumik sallumillu immikkoor­titsisin­naanermut sungiusar­nissarput aamma ilumoortumut naalannissamik ilinniar­nissarput pingaaruteqarluinnarpoq. (Rom 6:17; Pet 1. 1:22) Annikil­liornar­tussarsuarmi aniguinissarput pineqarpoq! w24.07 8 § 1-3

Jehovap Israalikkut innuttarileramigit isumaqatigiis­suteqarfigai inatsiseqar­tillugillu. Inatsisit taakku naalappatigit illersussavai pilluaq­qullugillu. Israalikkulli Jehovamut naalakkun­naarunik, assersuutigalugu guutipilus­siulerunik, illersor­neqarun­naarlutillu naalliussapput. Taamaattorli suli Guutimit iluarineqaleq­qinnissaminnut periarfis­saqarput. Israalikkut Jehovamut Guutiminnut ‘saappata peqqussutigisaalu naalappatigit’ – tassa peqqissimippata – Jehovap imminut qanillisissavai pilluaq­qoqqillugillu. (Mos 5. 30:1-3, 17-20) Jehovap innuttamisut toqqagai arlaleriarlutik pikitsitsisarput. Tamatuma kingunerisaanik naalliupput. Jehovalli innuttani imminiigin­nanngilai. Pruffiitit aqqutigalugit peqqissimeq­qullugit imminullu saaqqullugit arlaleriarluni kajumis­saartarpai. – Kng 2. 17:13, 14. w24.08 9 § 4-5

Kristumiut hebræeriusut Jerusalemmimi Judiiamilu najugallit Jiisusip toqunerata kingorna artornartunik atugaqalerput. Ilagiit kristumiut pilersin­neqarnerisa kinguninngua sakkortuumik malersugaalerput. Taava ukiut 20-t missaat qaangiummata kristumiut aningaasaqar­niarnikkut ilungersunar­torsiulerput, nunami siusinnerusukkut kaannersuaqarsimanera pissutaagunarluni. (ApS 11:27-30) Ukiup 61-p missaani kristumiut, siunissami malersugaalerumaar­nissaannut naleqqiullugu, piffissaq eqqissisimaffiusoq misigaat. Piffissami tamatumani apustilip Paulusip isumassarsisitaalluni allagaanik, sunaaffami piffissaq eqqoqqis­saarlugu, tigusaqarput. Sooq oqarsin­naavugut piffissaq eqqoqqis­saarlugu allagarsisut? Eqqissineqarun­naartus­saammat. Paulusip kristumiut annikil­liortitaangaangajalersut pinertusaarsin­naaqqullugit atoriaan­naasunik siunnersorpai. w24.09 8 § 1-2

Naalliuuteqaraangatta uppeqatigut tuppallersaataangaarsin­naapput. Aap, Jehovap uagutsinnik asannin­neranut ilumut uppernarsaataapput. Peqatigaluta tuppallersarsin­naavaatigut misigin­neqataallutik tusarnaarnikkut. Allassimaffimmik tuppaller­nartumik atuffas­sinnaavaatigut qinoqatigalutalu. (Rom 15:4) Ilaannikkut uppeqatitta Jehovap eqqarsar­taasianik eqqaasis­sinnaavaatigut taamaalil­lutillu eqqissisimanis­satsinnut ikiorluta. Aamma ikiuuttarsin­naapput, soorlu aliasun­nitsinni nerisas­siuulluta. Imaassinnaavoq ikioqqusariaqartugut. (Uss 17:17) Immaqa allat naluaat qanorpiaq misiginersugut imaluunniit sunik pisariaqar­titaqar­nersugut. (Uss 14:10) Taamaattumik ikinngutaal­luartut oqaloqatigisin­naavatit qanorlu misiginerlutit oqaluttuullugit. Suut iluaqutigisin­naanerlugit paasitikkit. Aamma utoqqaanertanik attaveqarfigil­luakkannik oqaloqateqarsin­naavutit. Qatanngutit arnat ilaasa uppeqammik arnamik inersimal­luartumik oqaloqateqar­tarnertik tuppallersaatigisimavaat. w24.10 10 § 15-16

Inuppassuit sivisuumik inuunissartik kissaatigigamikku peqqissuuniartarput. Nalunngilaalli timersor­taraluarlutik peqqinnar­tunillu nerisaraluarlutik utoqqaliar­tornissartik toqunis­sartillu pinngitsoor­tissinnaanagu. Immaqa isumaqarput inuuneq naassaan­ngitsoq piviusorsior­nerorpasin­ngitsoq. Jiisusilli inuuneq naassaan­ngitsoq inunnut periarfissatut eqqartorpaa, assersuutigalugu Johannesi 3:16-imi aamma 5:24-mi. Jiisusip iffianik-qaqortunik aalisak­kanillu inuppas­suarnut pilersitsinera tupinnar­tuliaavoq. Aqaguanili inupparpassuit Kapernaamut, Galiliiap Tasersuata eqqaanut, malinnaasut tupaallaatigisaannik oqarfigai, tassa toqusut makitik­kumaarlugit naassaan­ngitsumillu inuuneqarsinnaasut. (Joh 6:39, 40) Jiisusimit qularun­naarsin­neqarputit toqusut makitin­neqarsin­naanerannik aamma illit asasavillu naassaan­ngitsumik inuuneqarsin­naanissassinnik. w24.12 8 § 1-2

Nunarsuaq tamakkerlugu peqqinnissamik suliniaqatigiiffiup nalunaarusiaa naapertorlugu uiusorpassuit nuliatik timikkut, oqaatsikkut misigis­sutsikkullu ajortumik pisarpaat. Uiusup allat isigitillugit nuliani ataqqin­nittuliorfigisin­naasarpaa kisimiik­kaangamilli ajortumik pisarlugu. Uiusut ilaasa nuliaminnik ajortumik pinnittarnerat sunik aallaaveqarsinnaava? Imaassinnaavoq nakuuser­tartumik ataataqarsimagamik isumaqartut taamaat­tussaannaasoq. Allat kulturimit avatangiiserisaminnit sunnerneqarsin­naapput isumaqalerlutillu angut “angutaal­luassaguni” naalagaanini takutin­niarlugu nuliaminut nakuuser­tuusariaqartoq. Ilaat misigis­sutsiminnik, soorlu kamannermik, aqutsinis­saminnik ilinniar­tinneqarsiman­ngillat. Angutillu ilaat pornografiimik isiginnaar­tarnermikkut arnanut atoqatigiin­nermullu eqqunngitsumik isiginnit­taaseqalersimapput. Tamakkua saniatigut nalunaarusiami takutin­neqarpoq nappaalanersuup COVID-19-ip nalaani ajornar­torsiutit taamaattut amerleriarsimasut. Soorunami pissutsit tamakku uiusup nuliaminut ajortumik pinninnissaanut utoqqatsis­sutaanngillat. w25.01 8 § 2-3

‘Jehova Guutit uummatit tamakkerlugu, tarnit tamakkerlugu, isumat tamakkerlugu nukitillu tamakkerlugit asassavat.’ (Mak 12:30) Jiisusip erseqqissarpaa Moorsisip inatsisaani inatsit sorleq pingaar­nerpaanersoq. Maluginiaruk Jehova uummaterput tamakkerlugu, tassa kissaatigisagut misigis­sutsigullu tamaasa ilanngullugit, asassagipput. Aamma nukigut tarnerpullu, tassa inuunerput, tamakkerlugit asassavarput. Kiisalu isumarput, tassa eqqarsar­taaserput, tamakkerlugu Jehova asassavarput. Jehovap eqqarsartaasia tamakkiisumik paasisin­naanngik­kaluarlugu isumaa paasilluar­nerusin­naavarput Kristusi qanoq eqqarsarnersoq misissorutsigu, taassumami Ataatami eqqarsartaasia assigeq­qissaarmagu. – Kor 1. 2:16. w25.03 8 § 1

Adami ajortuliun­ngikkallarami naammal­luinnartuusoq assigalugu Jiisusi naammal­luinnartuuvoq. (Kor 1. 15:45) Taamaattumik Jiisusi toqunermigut Adamip ajortuliaanik matussusiisumik akiliilluni annaasaanik taarsiisinnaavoq. (Rom 5:19) Jiisusi taamaalilluni tassaalerpoq “Adami kingulleq”. Adamip annaasaanik inummik naammal­luinnartumik allamik akiliisoqar­tariaqanngilaq. Jiisusimi “ataasiaammik” toquvoq. (Hebr 7:27; 10:12) Paasivarput inuit saammaak­kumallugit ajortuliaminnillu isumakkeerfigineqar­niassammata Jehova aaqqiis­sutissamik pilersitsisoq. Ajornarun­naarsin­niarlugulu utertitsissummik akiliisoqarnissaa aaqqissuuppaa. Jiisusillu inuunini naammal­luinnartoq pilliutigigamiuk akiliut utertitsissut akilerpaa. – Hebr 9:14. w25.02 4-5 § 12-13

Misilin­neqarnitsinni suna pingaar­nerpaajunersoq eqqaamas­savarput. Diaavulu oqarpoq ajornar­torsiulerutta Jehova sumigin­nassagipput. Misilin­neqaraangatta qanoq qisuariar­tarnerput Jehovap misigis­susiinut sunniuteqartarpoq. (Job 1:10, 11; Uss 27:11) Ajornar­torsioraluarluta Jehova ilumoorfigiuaraangatsigu takutit­tarparput taanna asallugu uppernarsar­tarlugulu Saatani sallutuujusoq. Illit arlaatigut misilin­neqarpit? Assersuutigalugu Jehovamut kiffartornerit pissutigalugu pisortanit akerlilersor­neqarpit, aningaasatigut ajornar­torsiorpit imaluunniit oqaluus­sinermi nuanniitsumik qisuariar­toqartarpa? Taamaappat eqqaamassavat pissutsit atukkatit Jehovap uummataanik nuannaar­titsinissamut periarfissaasut. Aamma eqqaamajuk qanorluunniit misilin­neqassagaluaruit pinertusaarsin­naaqqullutit ikiussagaatit. Pissatsis­savaatit! w24.06 22 § 9

Illit ussernar­torsiutigisin­naasatit ilisimavigit? Imminut salloqit­tarluta sanngiis­sutigut miserratigigutsigit eqqarsarut­taluunniit nukittungaaratta eqqunngitsulior­naviarata navianar­torsiussaagut. (Joh 1. 1:8) Eqqaamajuk Paulusi allammat allaat ‘anersaamit siulersortittut’ eqquman­ngikkunik ussernartumut nakkaan­narsinnaasut. (Gal 6:1) Imminut unneqqarif­figisariaqarpugut suullu nukittuf­figinagit paasiniarlugu. (Kor 2. 13:5) Sanngiiffigut suunersut paasereerutsigu qanoq iliussaagut? Imminut illersorumalluta iliuuseqar­tariaqarpugut! Assersuut una eqqarsaatigiuk: Itsaq illoqarfiup qarmarsuisa qajannar­nerpaat tassaapput isaaffii. Taamaattumik illoqarfik illersor­neqarniassammat isaaffiit amerlasuunik paarsisoqartarput. Tamatumunnga assingusumik uaguttaaq sanngiis­sutigut eqqumaf­figeqqis­saartariaqarpagut. – Kor 1. 9:27. w24.07 15 § 5-7

Ajunngitsuliat ullormik allassimaffimmi eqqaaneqartut ilagaat oqaluussineq. Biibili atuaraangatsigu atuakkagullu eqqarsaatigigaangatsigit Jehovamut uppernerput nakussatsin­neqartarpoq, Guutillu Kunngeqarfia pillugu oqaluus­sinerup pingaaruteqangaarnera paasilluar­neruler­tarparput. Guutip oqaasia sapinngisamik pissarsif­figissagutsigu atuarnerup misissuinerullu piffissaqarfigil­luarnissaat pingaaruteqarpoq. Ilikkakkavit eqqarsaatiginis­saannut piffissaqarluartarit. Allassimaffimmik paasiuminaatsitannik atuaruit unillatsiariarlutit misissuigit. Jehovap Nalunaajaasuisa ujarliutaat imaluunniit Register til Vagttårnets publikationer atorlugit allassimaffimmik pineqartumik nassuiaatit misissukkit. Piffissaqarluarlutit misissuisaruit Guutip oqaasiata ilumoornera upperinerulissavat. (Tes 1. 5:21) Ilumoortorlu qularin­ngilluin­narukku ilikkakkannik avitseqateqar­nissamut kajumin­nerulissaatit. w24.04 15 § 4-5

Daavi allappoq Jehova ‘ajunngitsuusoq isumakkeerfigin­nikkumasarlunilu’. (Tuss 86:5) Mika allappoq: “Guuti kina ilittut innerpa pisuusunik isumakkeerfigin­nittarluni asattuus­sisarlunilu?” (Mika 7:18) Aamma Iisaaja ima allappoq: “Iluaatsup qimalliuk aqqutigisani, iluaatsuliortullu soraarulligit pilersaarutini, saallunilu Naalakkamut, imminik naakkin­nikkumaartumut, uterluni Guutitsinnut, taanna isumakkeerfigin­nittuartarmat.” (Es 55:7) Korintimi ilagiit Jehova ilaassagamikku peqquneqarput angut peqqissimisoq isumakkeerfigissagaat asannin­nerminnillu uppernarsaavigalugu. Paulusip taamatut ilitsersuutaanik maleruaanermikkut ‘sutigut tamatigut naalannertik’ ersersippaat. Ajortuliortoq ilagiinnit peerneqarnermi kingorna qaammatialuinnaat qaanngiuttut peqqissimivoq. Taamaattumik ilagiinnut ilaalerseq­qinneqarnissaa utoqqaanertat kinguar­teqqittariaqan­ngilaat. w24.08 17 § 12-13

Piffissami allanngorfiungaar­tussami inuuvugut! Qanittukkut Jiisusip inuit tamaasa eqqartuutissavai. Eqqartuus­siffissaq tamanna sioqqullugu qanoq pisoqassasoq Jiisusip ilinniar­titaminut oqaluttuaraa. Takussaan­ngitsumik ‘najuunnis­saminut naggatissallu nalaanut ilisarnaatit’ eqqartorpai. (Mat 24:3) Taakku Matiusi kapitali 24-mi 25-milu, Makkorsi kapitali 13-mi aamma Lukkarsi kapitali 21-mi allassimapput. Jiisusip assersuusiat pingasut atorlugit asannilluni mianersoq­quaatigut. Taakku tassaapput savat savaasallu pillugit assersuusiaq, arnanik inuusuttunik qulinik assersuusiaq talentinillu assersuusiaq. Assersuusianit taakkunannga paasisin­naavarput inuup pissusilersornera tunngavigalugu Jiisusip taanna eqqartuutissagaa. w24.09 20 § 1-2

Maligas­siuiserput Jiisusi eqqarsaatigeriaruk. Taassuma iliuutsimini tamani kajumis­sissutigiuarpaa Ataataminik asanninnini inunnillu asanninnini. Asanninnini kajumis­sissutigalugu maniguulluni allat suliarerusun­ngisaannik suliaqartarpoq. (Mat 20:28; Joh 13:5, 14, 15) Qatanngutaasutit angut, illit asanninnerit kajumis­sissutigigukku anguniakkavit angunissaanut, soorlu ilagiinni kiffartor­tunngor­nissamut piukkun­narsinissannut, Jehovap ikiorumaarpaatit. (Pet 1. 5:5) Nunarsuarmi inuit takoqqusaarlutik imminut pingaartittut inoqatiminnit nuannaar­torineqalersarput. Jehovalli innuttai taamaaliorneq ajorput. Jiisusi ilaarlugu qatanngutip angutip inoqatiminik asannittup imminut qummut isigeqqunanilu allat naalagaaf­figiniarneq ajorpai. Angutip allanit pingaar­nerusorisup ilagiinni kiffartor­tunngor­tinneqas­sagaluaruni suliassat pingaaruteqarpasin­ngitsut, Jehovalli savaataanik isumassuinermi pisariaqartut, suliarerusun­navianngilai. – Joh 10:12. w24.11 15 § 6-7

Nunarsuaq tamakkerlugu qatanngutit angutit tunissutitut kiffartorsinnaasut amerlanerusut pisariaqar­tippagut. (Ef 4:8) Qatanngutaaguit angut imermut morsutsin­neqarsimasoq ‘ikiuinissat sapinngiliuk’? (Uss 3:27) Ilagiinni kiffartor­tunngornissat anguniagarisin­naaviuk? Ilagiinni kiffartor­tunngoreeruit uppeqatitit pisariaqar­titaannik isumaginiarlugit utoqqaanertatut kiffartornissat anguniagarisin­naaviuk? Kristumiunut Oqaluus­sisartunut Ilinniarfimmut qinnuteqarsin­naajumallutit inuuninni allannguisinnaavit? Ilinniarfimmi tamatumani ilinniar­tinneqaruit Jiisusip atorluar­nerusin­naavaatit. Ajukkullutit sapertutut misigiguit Jehovamut qinugit. Anersaamik illernartumik tuneqqullutit qinnuigiuk qanorluunniit suliassin­neqassagaluaruit tamanna naammas­sisinnaajumallugu. (Luk 11:13) Qatanngutit angutit Jiisusip tunissutitut toqqagai ulluni kingullerni makkunani taassuma najorluta siulersuineranut uppernarsaataapput. (Mat 28:20) Pisariaqar­titatsinnik eqqumaf­figinnittumik asannit­tumillu kunngeqaratta qatanngutit angutit aqqutigalugit uagutsinnik ikiuisartoq qujamasuutigeqaarput. w24.10 23 § 16-17

Jehovap kiffai erloqinartumik misigisaqarsin­naapput. Tamanna Jehovap qanoq iliuuseqarfigissavaa? Isumagiumaarpaa nanertuutaasut ‘puigorneqar­nissaat’, taassumalu ‘isaanut takussaajun­naassapput’. (Es 65:16) Jehovap ajornar­torsiutigut tamaasa peerumaarpai, siunissamilu eqqaamajun­naarlugillu anniaatigiun­naassavagut. Maannangaaq toqqissisimaneq misigisin­naavarput, ataatsimiik­kaangattami ajortut nanertuutaasin­naasullu puioral­lartaratsigit. Tamattalu anersaap inerititaasa – soorlu asanninnerup, nuannaarnerup, eqqissinerup, inussiar­nisaarnerup saamanerullu – ersersin­nerisigut avatangiisitsinnik toqqissisimanar­tuutitseqataasin­naavugut. (Gal 5:22, 23) Ilumut Guutip peqatigiis­sortaanut ilaasin­naanerput pilluaq­qussutaavoq! Anersaakkut paratiisimiiginnartut “qilak nutaaq nunalu nutaaq” pillugit Guutip neriorsuutaata tamakkiisumik eqquunnera misigissavaat. w24.04 22 § 9-10

Peerariinneq nuannersuusin­naagaluartoq aamma piffissaavoq pimoorun­neqartussaq, kingunerisin­naavaami katinneq. Ullormi katiffimminni aappariit inuutillutik asaqatigiin­niarlutillu ataqqeqatigiin­niarlutik Jehovap saavani neriorsuisarput. Neriorsuin­nginnermi tamatigut eqqarsarluaq­qaartoqar­tariaqarpoq. Tamannalu katinnermi neriorsoqatigiinnermut tunngatillugu pingaaruteqarluinnarpoq. Taamaattumik peerariit imminnut ilisarisimal­lualernissaat pingaaruteqarpoq ajunngitsumik aalajangiinias­sammata. Aalajangigaq tassaasinnaavoq katinnissaq imaluunniit qimannissaq. Peerariit peerariik­kunnaarpata imaanngilaq ajortumik iliorsimasut. Tassami aalajangiinermik kinguneqarpoq, tamannalu peerariinnerup siunertaraa. Sooq peerariinnermut tunngatillugu eqqortumik isiginnit­taaseqarnissaq pingaaruteqarpa? Kisimiittut eqqortumik isiginnit­taaseqarunik katikkusun­ngisartik peerariler­navianngilaat. w24.05 26-27 § 3-4

Kristumiut inuusuttut upperisaminnik nassuiaanissartik ernumas­sutigisin­naavaat. Atuarfimmi pinngoriar­tuaarsimanermik ilinniar­titsissut eqqartor­neqaraangat tunuarsimaarsin­naapput. Sooq? Immaqa ilinniar­titsisut tamanna ilumoortutut saqqummiut­tarpaat. Angajoq­qaajuguit, meeqqat upperisaminik sapiilluni qularnanilu nassuiaanissaanut qanoq ikiorsin­naaviuk? Paasitiguk Pinngor­titsisoqar­neranik upperisani kanngusuutigisariaqan­ngikkaa. Sooq? Uumassusillit nalaatsor­nerinnakkut piulersimanerat ilisimatoorpassuit aamma upperin­ngilaat. Uumassusillit sananeqaataasa tupinnangaartumik katitigaanerat pissutigalugu ilisimatuut taakku isumaqarput silassorissumik pinngor­titsisoqarsimassasoq. Taamaattumik pinngoriar­tuaarsimanermik ilinniar­titsissut akuerisin­naanngilaat. Uppeqatitta Pinngor­titsisoqar­neranik upperin­ninnerminnik qularun­naassutigisimasaat meeqqavit misissorunigit uppernerminut nakussatsis­sutigisinnaavai. w24.12 18 § 14-15

Jiisusip oqaluus­siffigisani isumalluarfigiuarpai. Taamaat­tumillu nuannaar­tuarpoq oqaluus­sinermilu aallussil­luartuarluni. Assersuutigalugu ukiup 30-p naalernerani Jiisusip nutaarsiassanik nuannersunik amerlasuut tusarnaarusunnerat maluginiarpaa, narsaatinullu katersuif­figeriaan­naasunut assersuullugit. (Joh 4:35) Aappaaguani ilinniartitani ima oqarfigai: “Karrit katersugassat amerlaqaat.” (Mat 9:37, 38) Kingusin­nerusukkullu ima oqaqqippoq: “Karrit katersugassat amerlaqaat. … Taamaattumik katersuinermi ittuusoq qinnuigisiuk sulisunik aallartitseq­qullugu.” (Luk 10:2) Jiisusip upperiuaannarpaa inuit nutaarsiassanik nuannersunik tusarnaarusulissasut, taamaalioraangatalu nuannaartarpoq. Jiisusip ilinniartitani eqqaasippai tusarliussartik nuannerluin­nartunik kinguneqartoq. Tamannalu aallussil­luartuujuar­nissaminnut iluaqutigaat. w25.03 18-19 § 15-16

Jehova qimarnguffiuvoq. Soorlu anorersuarmi qaarsoq oqqiffiusinnaasoq taamatuttaaq Jehovap ajornar­torsioraangatta illersor­tarpaatigut. Toqqissisimatit­tarpaatigut neriorsorlutalu naalliunnerput ataavar­tuussan­ngitsoq. Aamma oqarfigaatigut uagutsinnik annilaangatitsisut anniartitsisullu suulluunniit peerumaarlugit. (Ez 34:25, 26) Jehovamut qinusarnikkut taanna qaarsorilerlugu qimarnguf­figisin­naavarput. Qinugaangatta Jehovap ‘eqqissinermik uummatitsinnik isumatsinnillu paarsisumik’ tunisarpaatigut. (Flp 4:6, 7) Jehova ikiuinis­saminut piareersimajuaannarpoq. “Qaarsuummat ataavartussaq” tatigil­luinnarsin­naavarput. (Es 26:3, 4) Toqunngisaan­nassagami neriorsuutini eqqortit­tuaannarsinnaavai, qinnutigut tusarnaar­tuaannarsinnaavai pisariaqar­titatsinnillu ikiorsin­naajuaan­narluta. Tatiginis­saanullu pissutaasut allat tassaapput ajunngitsulior­nitsinnik eqqaaman­nittuaan­narnera uagutsinnillu pilluaq­qusisarnera. (Hebr 6:10; 11:6) Aap, kiffani ilumoorfigiuaannarpai! – Sam 2. 22:26. w24.06 27 § 4-6

Aliikkutassat ineriar­tornanngitsut aamma ikinngutipalaat pigisaleritunerlu Jehovamik asannin­nikillis­sutigisin­naavagut. Paasigutsigu asannin­nikillisimalluta ingerlaannaq allannguiumalluta pissutaasorlu peerniarlugu iliuuseqarisa! (Mat 5:29, 30) Uummaterput paarilluar­tariaqarparput. Imminummi salloqit­tarluta isumaqalersin­naavugut Jehovamut kiffartornermi ulapputeqarutta ajortumik sunniuteqarsinnaasut ajoqutiginaviarnagit. Takorlooruk issittumi anorlersumilu silamiillutit. Angerlaravit kiassaatit sakkortusivatit. Tamannali iluaqutaassava matu ammatiin­narukku? Naamik, illup ilua nillertipal­lassaaq. Tamanna Jehovamut attaveqar­nitsinnut assersuun­neqarsinnaavoq. Jehovamut qanillis­sutigisin­naasatsinnik iliuuseqar­tarnitta saniatigut aamma Jehovamik asannin­nitsinnik nillertun­ngortitsisinnaasut suulluunniit uummatitsinnut isertis­sanngilagut. – Ef 2:2. w24.07 21 § 6-7

Jiisusip ataqqinas­susiiagaasutut naapertuil­luanngitsumillu pineqar­nermini anniangaarnera takorluuin­narsinnaavarput. Naalliuutiminilli ajugaaf­figineqanngilaq. Sakkutuut imminik qisummut naalliutsitsiviliamut kikiattuisut pillarneqar­nissaat pinnagu ima qinnuppai: “Ataata, qanoq iliornertik nalummassuk isumakkeerfigikkit.” (Luk 23:34) Uagutsinnik ajortumik pinnittut qinnukkutsigit kamakkun­naamisin­naavugut taakkununngalu misigis­sutsigut sakkortual­laarunnaarsin­naallutik. Naluarput naggatissap tungaanut qanoq nuannin­ngitsumik pineqar­tarumaar­nerluta. Qanorluunniit pisoqas­sagaluarpat Jehovamut ikioqqulluta qinujuaannarta! Aamma Jiisusip ajortumik pineqarnermi qisuariarnera ilaartuarlugulu Biibilimi najoqqutassiat maleruar­tuartigit. Taamaaliorutta Jehovap pilluaq­qussagaatigut qularis­sanngilarput. – Pet 1 3:8, 9. w24.11 6 § 16; 7 § 17, 19

Jehovap Guutip iliuutsit tamaasa akuersaaginnarneq ajorpai, ajortuliornerli uumigaa. (Tuss 5:5-7) Piumasaraa najoqqutassiani naapertuil­luartut Biibilimi allatsitani ataqqis­sagigut. Soorunami naammal­luinnan­ngitsuunerput nalunnginnamiuk kukkujuitsuunissarput naatsorsuutiginngilaa. (Tuss 130:3, 4) Aammali ‘ajunngisaangaar­nerminik kanngut­taatsulior­nissamut utoqqatsis­sutitut atuisut’ akuerinngilai. (Juud 4) Biibilimi eqqaaneqarpoq Guutip Harmagedonnimi sorsunnissamini ‘guutiitsut suujunnaarsissagai’. (Pet 2. 3:7; Saqq 16:16) Jehovalli kissaatiginngilaa kinaluunniit suujunnaarsin­neqassasoq. Biibilimi erseqqissumik allassimavoq ‘inuit tamaasa peqqissiminissamut periarfis­sikkusukkai’. (Pet 2. 3:9) Utoqqaanertat Jehova ilaarusuk­kamikku ajortuliortut allannguinis­saannut Jehovamillu iluarisaaq­qilernis­saannut naammagit­tarlutik ikiorniar­tarpaat. w24.08 26 § 1-2

Jehova ilaarlugu uaguttaaq asanninneq kajumis­sissutigalugu tunisisin­naavugut. Assersuutigalugu uppeqatinnik nerisassanik atisanil­luunniit pisariaqar­titsisumik nalunngisaqarpit? Jehovap illit uppeqatinnik ikiuitis­sinnaavaatit. Jehovap kiffaasa ajunaar­nersuaqaraangat ikiuukkumasarnertik ilisimaneqaatigaat. Assersuutigalugu COVID-19-imik nappaalanersuaqarmat qatanngutit allanik pisariaqar­titsisunik avitseqateqarput, soorlu nerisassanik, atisanik allanil­luunniit pisariaqar­tinneqartunik. Amerlasoorpassuillu nunarsuaq tamakkerlugu suliniuteqarnermut tukkorlutik tunissuteqarsimapput. Tamannalu pissutigalugu qatanngutit ajunaar­nersuaqarfin­niittut ikiorneqarsimapput. Qatanngutit tukkortut Hebræerit 13:16-mi allassimasut maleruarpaat. Ima allassimavoq: “Ajunngitsulior­tarnissarsi avitseqateqar­tarnissarsilu puioqinasiuk, Guutimmi pilliutit taamaattut iluaril­luinnarmagit.” w24.09 27 § 6-7

Takorlooriaruk ilaquttatit pilersorumallugit suliffis­sarsiortutit. Marlunnik periarfis­saqarputit. Assigiin­ngitsunik paasisaqarputit, soorlu sumik suliaqas­sanerlutit, qaqugukkut suliffiunersoq, suliartorlutit angalasariaqar­nerlutit il.il. Periarfissani taakkunani marlunni suliaq najoqqutassianut Biibilimeersunut akerliunngilaq. Immaqa aappaa iluarineruat nuannarisannik suliaqas­sagavit imaluunniit akissarsior­nerussagavit. Aalajangiitinnalli aamma allanik eqqarsaatigisas­saqarputit. Assersuutigalugu ataatsimiinnerup nalaani sulisariaqassavit? Imaluunniit taanna suliffit­taarissagukku ilaquttavit misigis­sutsikkut anersaakkullu pisariaqar­titaannik matussusiinissannut ajoqutaassava? Taakku eqqarsaatigigukkit “suut pingaar­nerpaanersut” – tassa Jehovamut kiffartornerit ilaquttavillu pisariaqartitaat – pingaar­nerpaatis­savatit, aningaasarsiorneq pinnagu. Taava Jehovap pilluaq­qusinnaasaanik aalajangiisin­naassaatit. w25.01 17 § 11-13

Allanit ajortumik pineqar­tarsimagaluaruil­luunniit qularis­sanngilat Jehovap asallutillu naleqar­tikkaatit. Naleqan­ngitsutut misigiguit eqqaamajuk Jehovap uummammiutit takullugit imminut qanillisikkaatit. (Joh 6:44) Asangaaramisit ikiuinis­saminut piareersimajuaannarpoq. Jiisusip maligassiaata eqqarsaatigineratigut Jehovap misigissusii pillugit ilinniarsin­naavugut. Nunarsuarmiik­kallarami Jiisusip inuit allanit nikagineqartut maluginiartarpai, misigin­neqatigalugillu inussiar­nersumik pisarlugit. (Mat 9:9-12) Arnap anniaatigeqisaminik nappaatillip ajorunnaar­nissani kissaatigalugu Jiisusip qallersaataa attoramiuk uppernini pillugu Jiisusimit nersualaar­neqarpoq. (Mak 5:25-34) Jiisusi angusisarluinnarmat qularis­sanngilat taassuma arnamik pinninneratulli Jehovap illit pissagaatit. (Joh 14:9) Jehovap pingaar­tillutillu pissuserisatit ajunngitsut, ilaatigut uppernerit taassumunngalu asanninnerit, maluginiartarpai. w24.10 7 § 4-5

Daavi aqqusaagarpas­suaqarpoq aliasuutigilik­kaminik. Allanit akeqqersimaarfigineqarpoq, allaat tatigisaminit ilumoorfigineqarun­naarpoq ajoquser­niarneqarlunilu. (Sam 1. 19:10, 11; Sam 2. 15:10-14, 30) Erloqinar­torsior­nermini ima allappoq: “Anersaarulunnermit qasuleqaanga, unnuat tamaasa innanngaviga masatserpara qullinnik, siniffiga masammik pitartillugu.” (Tuss 6:7) Aqqusaagarpassuani imaannaan­ngikkaluaqisut nalunngil­luinnarpaa Jehovap asagaani. Jehova pillugu allappoq: “Qiasarnera tusarsimavaa.” (Tuss 6:9) Jehovap isumassuingaarnera Daavip ullormi allassimaffimmi kusanarluin­nartumik allaatigaa. Takorloorpaa qullini Jehovap imiisivimmut katersortarai atuakkamul­luunniit allattor­tarlugit. Daavip upperil­luinnarpaa anniaatini Jehovap malugigai eqqaamal­lugillu. Nalunngilaa aqqusaakkani Jehovap arajutsineq ajorai aamma naluneq ajoraa inuttut qanoq sunniuteqar­tarnersut. w24.12 22 § 11-12