Septembari

Anersaakkut inersimal­luartun­ngornissarput ilungersuutigisariaqarparput sulissutigiuarlugulu. Inersimal­luartuujuas­saguttalu imminut tatigival­laassan­ngilagut. (Kor 1. 10:12) ‘Imminut misilit­tuartariaqarpugut’ paasiniarlugu anersaakkut siumukar­tuarnerluta. Paulusip Kolossimiunut allakkamini anersaakkut inersimal­luartuujuarnissap pingaaruteqarnera eqqartoqqippaa. Kolossimiut anersaakkut inersimal­luartun­ngoreeraluartut inuit allat eqqarsar­tariaasiannit tigusarineqaq­qunagit Paulusip mianersoqquai. (Kol 2:6-10) Aamma Epafrasip ilagiin­niittut ilisarisimal­luakkani ‘inersimal­luartuujuar­niassammata’ qinnuttuarpai. (Kol 4:12) Qanoq ilinniarfigaarput? Paulusip aamma Epafrasip paasivaat anersaakkut inersimal­luartuujuas­sagaanni nammineq iliuuseqarnissaq Guutimillu ikiorneqarnissaq pisariaqartut. Kissaatigaat Kolossimiut anersaakkut inersimal­luartuujuassasut qanorluunniit unamminiar­nartunik nalaataqaraluarlutik. w24.04 6-7 § 16-17

Jehovamik mianerin­nikkatta Jehova asangaarlugu taassuma iluarin­ngisaanik iliuuseqarusun­navianngilagut. Jehovamit iluarisaarusukkatta eqqortumik eqqunngitsumillu aamma ilumoortumik sallumillu immikkoor­titsisin­naanissaq ilinniarusungaarparput. (Uss 2:3-6; Hebr 5:14) Inunnut qununerput Guutimik mianerin­ninnitsinnit annertuneruppat Jehovap aniguisitsisin­naanera qularilersin­naavarput. Itsaq pisimasoq eqqarsaatigeriaruk. Angutit naggueqatigiis­sortaminni naalagaasut aqqaneq-marluk Jehovap nuna Israalikkunnut neriorsuutigisimasaa alapernaarsoriar­torpaat. Taakkua ilaasa qulit Kanaanikkunnut qununerat Jehovamik asannin­nerannit anneruvoq. Israalik­koqatiminnut ima oqarput: “Inuiaat taakku saassus­sinnaan­ngilavut uatsinnit pissaaneqar­nerujus­suummata.” (Mos 4. 13:27-31) Inuit isaanni Kanaanikkut pissaaneqar­nerupput. Kisianni kialuunniit Israalikkut akeqqatik ajugaaf­figisin­naanngin­nerarlugit oqartup Jehova eqqarsaatigin­ngitsoorpaa. w24.07 9 § 5-6

Jehova Eqqartuus­sisuusoq tamatigut eqqortumik aalajangiisarnera upperil­luinnarsin­naavarput? Aap! Soorlu Aaperaap paasigaa Jehova ‘nunarsuarmik tamarmik eqqartuus­sisuuvoq’ naammal­luinnartoq, sunik tamanik ilisimasaqartoq nallittuisorlu. Ernini ilinniar­tillugu eqqartuus­sinermik suliassat tamaasa taassumunnga isumagisas­sanngortippai. (Joh 5:22) Taakkua marluullutik inuit uummammiugisaat tamaasa nalunngilaat. (Mat 9:4) Taamaattumik eqqartuus­sigaangamik eqqortulior­tuaannarput! Jehovap eqqortumik aalajangiisarnera tamatigut tatigisigu! Nalunngilarput eqqartuus­sinissamut piukkunaateqarata Jehovali eqqartuus­sisuusoq naammal­luinnartoq. (Es 55:8, 9) Taamaattumik eqqartuus­sissanngilagut, Jehovalli eqqartuus­sisuunera aamma Jiisusip, Ataatami naapertuil­luarneranik nallittuineranillu ersersitsil­luinnartup, eqqartuus­sisuunera ataqqivagut. – Es 11:3, 4. w24.05 7 § 18-19

Qamannga pisumik unneqqarissuuneq pingaaruteqarpoq. Tamanna Jiisusip Nataanialimut oqaasiinit erserpoq. Fiilippip ikinngutini Nataaniali Jiisusimut ilisaritimmagu Jiisusip Nataaniali ima oqarfigaa: “Aajinnga Israalikkuusoq unneqqarissoq.” (Joh 1:47) Jiisusip maluginiarpaa Nataaniali immikkuul­larissumik unneqqarissuusoq. Nataaniali uagutsitulli ajortiliuvoq, ilumoor­tuusaarnanili unneqqaril­luinnartuuvoq. Jiisusip tamanna iluarigamiuk tamanna pillugu Nataaniali nersualaarpaa. Jehovamit iluarisaas­sagaanni piumasaqaatit Tussiaat 15-imi allassimasut amerlanerit allanik pinnittar­nitsinnut tunngapput. Tussiaat 15:3 naapertorlugu Jehovap tuperminut qaaqqusaa tassaavoq “oqaasipalaanik angallas­sinngitsoq, tullimi ajoqutissaanik iliunngitsoq, qaninnerpaasaminik tusagaanerlutsitsin­ngitsoq”. ‘Oqaasipalaanik angallas­sisarutta’ inoqatigut aliasutsis­sinnaavagut. – Jaak 1:26. w24.06 10 § 7, 9; 11 § 10

Oqaluus­sinissamut piareersarluaruit allanik oqaloqateqarninni ernuman­nginnerussaatit. Jiisusip ilinniartitami oqaluus­siartor­tinnginnerini piareersar­nissaannut ikiorpai. (Luk 10:1-11) Taakkualu Jiisusip siunnersuutai maleruaramikkit oqaluus­sinermi nuannaarutigisaminnik ajunngitsuliungaarsin­naapput. Qanoq oqaluus­sinermut piareersarsin­naavugut? Eqqarsaatigis­savarput suna eqqartorusun­nerlugu qanorlu nammineq oqaatsigut atorlugit oqaatigisin­naaneripput. Aamma iluaqutaasinnaavoq eqqarsaatigigutsigu inuit oqaluus­siffigisagut qanoq assigiin­ngitsutigut qisuariarsin­naanersut qanorlu naleqqus­sarsinnaanerluta. Taavalu inuit oqaloqatigilerutsigit eqqissisimaniarsarissaagut, qungujulallutalu inussiar­nisaassaagut. w24.04 16 § 6-7

Oqaluus­sinitsinnut pissutaasoq pingaaruteqar­nerpaaq tassaavoq Jehova Guuti atialu illernartoq asagatsigit. Oqaluus­sinerput Guutimik asasatsinnik unnersiutigin­ninnertut isigaarput. Isumaqarluin­narpugut Jehova Guuterput pissaasoq kisimi unnersiutigineqar­tariaqarlunilu ataqqineqar­tariaqartoq. “Suut tamarmik” taassumannga pinngor­tinneqarsimanerat inuunermillu tunisisuunera pillugit oqaluus­sinikkut ataqqillugulu unnersiutigisarparput. Pissutsillu atukkagut naapertorlugit piffissarput nukigullu atorlugit sapinngisatsinnik oqaluus­siniartarpugut. (Mat 6:33; Luk 13:24; Kol 3:23) Guuti asasarput pillugu oqaluus­sinerput nuannareqaarput. Atia Guutitullu qanoq ittuunera killinneqaatigingaaratsigit allanut oqaluttuarin­ngitsoorsin­naanngilagut. w24.05 17 § 11

Jehovap qamuuna eqqissisimanermik nuannaar­nermillu tunisarpaatigut, siunissamilu naassaan­ngitsumik inuulersik­kumaarpaatigut. Upperil­luinnarsin­naavarput Jehovap akissarsisik­kusukkaatigut taamaalior­nissaminullu pissaaneqartoq. Taamaattumik kiffartor­nitsinni sapinngisatsinnik iliortuarusuppugut, soorlu itsaq kiffartortut taamaalior­tarsimasut. Taakkua ilagaat Timuutiusi. (Hebr 6:10-12) Timuutiusip qularinngilaa iliuutsini tamaasa Jehovap pingaartikkai, tamannalu tamaviaarluni assoroorlunilu sulinissamut kajumis­sissutigaa. (Tim 1. 4:10) Timuutiusip suut iliuuserai? Nalunngilarput ilagiinni oqaluus­sinermilu ilinniar­titsillaq­qinneruler­nissaanik Paulusip kajumissaaraa. Timuutiusi aamma uppeqatiminut, inuusuttunut utoqqarnullu, maligas­siuisussaavoq. Tamatuma saniatigut ajornakusoortunik suliassin­neqarpoq. Assersuutigalugu naammagit­tarluni pisariaqar­titsisut toqqaan­nartumik asannit­tumilli ilitsersor­tussaavai. (Tim 1. 4:11-16; Tim 2. 4:1-5) Timuutiusip Jehovamit akissarsisin­neqarumaarluni qularinngilaa. – Rom 2:6, 7. w24.06 22-23 § 10-11

Jehovap innuttani naalanngik­kaangata amerlanertigut pruffiitini aqqutigalugit mianersoq­qusarlugillu naqqittarpai. Assersuutigalugu Jeremia aqqutigalugu ima kajumis­saarivoq: “Saanniarniarit Israeli allasiortoq … Kamaakkun­naassavassi ilumoor­tuugama … Kamaassiuaan­nassanngilanga. Kisianni paasiniaruk iluaatsuliornerit, Naalagaq Guutit tunukkakku.” (Jer 3:12, 13) Joeli aqqutigalugu Jehova ima oqarpoq: “Uannut saanniaritsi uummatissigut iluunngarlusi.” (Joel 2:12, 13) Esajalu aqqutigalugu ima oqariar­tuuteqarpoq: “Eqqiarniaritsi! Iluaatsuliasi isinnit peersigit, ajortumik iliussaaritsi.” (Es 1:16-19) Aamma Ezekieli aqqutigalugu Jehova ima aperivoq: “Iluaatsup toqunissaa piumasaris­sagaluar­nerpara? … Ileqqorisaraluani ajortut tunukkunigit inuugin­nassannginnerpa? Massami, kialuunniit toqunissaanik piumasaqan­ngilanga … Allamut saagitsi, taava inuugin­nassaasi!” (Ez 18:23, 32) Inuit peqqissimigaangata Jehova nuannaangaartarpoq, kissaatigaami naassaan­ngitsumik inuussasut! w24.08 9 § 5-6

Jehovap kiffani immikkut tamaasa anersaakkut nerisittarpai, siulersorpai illersorlugillu. Inuit nunarsuaq tamakkerlugu Biibilimik atuarnissamut periarfis­sinnerisigut Jehovap kinaassusersior­tuunnginnini ersersippaa. Allakkat Illernartut oqaatsini pingasuni – hebræerisut, aramæerisut grækerisullu – allanneqaq­qaarput. Biibilimik oqaatsini taakkunani atuarsinnaasut Jehovamut allanit qaninnerusumik attaveqarpat? Naamik. (Mat 11:25) Jehovamit iluarisaas­sagutta ilinniagaqarnerput sumiutul­luunniit oqaaseqarnerput apeqqutaan­ngillat. Imaanngilaq Jehovap qaffasissumik ilinniagaqartut kisiisa ilisimas­susermik tunisarai. Jehovap inuit tamaasa qanorluunniit ilinniagaqarsimasut ilisimas­suseqar­nissamik periarfis­sittarpai. Oqaasiami, Biibili, oqaatsinut tuusintilik­kuutaanut nutserneqarsimavoq. Taamaalilluni inuit nunarsuaq tamakkerlugu Biibili iluaqutigisin­naavaat Jehovamullu qanoq ikinngutaalersin­naallutik paasisin­naallugu. – Tim 2. 3:16, 17. w24.06 6-7 § 13-15

Taamani Jerusalemmip aserugaangajalernera, Jiisusip siulittuutigisimasaa, qanillimmat kristumiut piffissaq atorluarlugu uppernermik pinertusaar­nermillu ineriar­tortitsillutik piareersar­tussaapput. (Hebr 10:25; 12:1, 2) Uagut annikil­liornar­tussarsuaq kristumiut hebræeriusut misigisaannit sakkortunerungaartoq misigisus­saavarput. (Mat 24:21; Saqq 16:14, 16) Jehovap taakkununnga siunnersuutai atoriaannaasut uagut qanoq iluaqutigisin­naanerigut eqqarsaatigiuk. Paulusip allakkamini uppeqatini kajumis­saarpai Guutip oqaasia itisilerlugu misissor­taqqullugu. (Hebr 5:14–6:1) Hebræerisut Allakkat Illernartut atorlugit Paulusi uppeqatiminut tunngavilersuivoq sooq kristumiut guutisiornerat juutit guutisior­nerannit pitsaanerungaartoq. Paulusip nalunngilaa Allakkani Illernartuni ilumoortut pillugit ilisimasaqar­nerulerunik paasisimasaqar­nerulerunillu ilinniar­titsissutit eqqunngitsut itigartis­sinnaalissagaat. w24.09 8-9 § 2-3; 10 § 6

Jiisusip ilinniartitai qiimmas­sarneqar­tariaqarput. Sooq? Taakkua ilaasa Jiisusi piffissaq tamaat malikkumallugu angerlarsimaffitsik, ilaquttatik suliffitsillu qimassimavaat. (Mat 19:27) Allat Jiisusi malikkamikku juuteqatiminnit ajattor­neqarput. (Joh 9:22) Kisianni upperigamikku Jiisusi tassaasoq Missiarsi neriorsuutigisaq kajumillutik taamatut pilliuteqartarput. (Mat 16:16) Jiisusili toqutaammat aliasungaarput nikallungangaarlutillu neriuutimik piviusun­ngornissaa ilimanarun­naarmat. Qularnan­ngitsumik Jiisusip nalunngilaa ilinniartitami aliasunnerat annaasaqarnermut ersiutaasoq anersaakkut sanngiil­linermut ersiutaanani. Taamaattumik ullormit makititaaf­fimminiilli ikinngutini qiimmas­sartarpai. Assersuutigalugu Mariia Mattaliit ilineqarfimmi silataani qiasoq saqqummerfigaa. (Joh 20:11, 16) Aamma ilinniar­titaminut marlunnut Emmausiliartunut saqqummerpoq. Aamma apustilimut Petrusimut saqqummerpoq. w24.10 13 § 5-6

Angajoq­qaajusutit, meeqqat Pinngor­titsisoqar­neranik upperin­ninnerminik illersuinissaanut piareersaqatigiuk. Pinngor­titsineq pinngoriar­tuaarsimaneraanerlu pillugit allaaserisat jw.org-imiittut misissorsin­naavasi. Eqqartorsiuk Pinngor­titsisoqarnera allanut qanoq sunniuteqar­nerpaamik nassuiar­neqarsin­naanersoq. Atuaqatiminut tusarnaarumasumut paasiuminartumik tunngavilersuinissaanut kajumissaaruk. Assersuutigalugu atuaqatit ilaat oqarsinnaavoq: “Takusin­naasakka kisiisa upperaakka, Guutilu takunngisaan­narpara.” Kristumiu inuusuttoq ima akisinnaavoq: “Takorlooruk asimi pisuttuar­tillutit illu takoriataarit. Suminngaanneerpa? Illumik sanasoqarsimassaaq, ilaa? Illu sanasoqarnermut uppernarsaataammat nunarsuarput uumassusillillu tamarmik aamma silassorissumik pilersitsisoqar­neranut uppernarsaataasimassapput!” w24.12 18 § 16

Tamatta inuunermi silatusaartumik aalajangigas­saqaraangatta siunnersor­neqarnissarput pisariaqar­tittarparput. Ilagiinni utoqqaanertat anersaakkullu inersimal­luartut allat siunnersuutaat iluaqutigingaarsin­naavagut. Uagutsinnit utoqqaanerungaatsiaraluarpataluunniit isumaqas­sanngilagut siunnersuutaat ullumikkut atorsin­naanngitsut. Jehovap kissaatigaa utoqqaanerusut ilinniarfigis­sagigut. Uagutsinnit sivisunerusumik inuusimagamik ilisimas­suseqar­nerullutillu misilit­tagaqar­nerupput. Biibilip nalaani utoqqaat aalajaatsut aqqutigalugit Jehovap innuttani qiimmas­sartarpai siulersorlugillu. Taakkua ilagaat Moorsisi, Daavi apustililu Johannesi. Taakkua inuunerisa nalaat atugaallu assigiin­ngitsorujus­suupput. Tamarmilli utoqqaallutik inuusun­nerusunik siunnersuil­luarsimapput. Guutimut naalannerup pingaaruteqassusia erseqqis­sarpaat. Inuusut­tuugaluarutta utoqqaagaluarut­taluunniit tamatta siunnersuutaat iluaqutigisin­naavagut. – Rom 15:4; Tim 2. 3:16. w24.11 8 § 1-2

Nooap nalaani Guutip inuit aammik nereqqunngilai. (Mos 1. 9:3, 4) Israalik­kunnullu inatsisimini tamanna aamma peqqussutigaa. Kinaluunniit aammik nerisoq “piiagaassaaq”, tassa toqutaassaaq. (Mos 3. 7:27) Jiisusip juutit ilinniartippai Guutip inatsisai naalassagaat. (Mat 5:17-19) Taamaattumik ilimanan­ngivippoq timimi taakkunannga nerineqarnissaa aammilu imerneqarnissaa piumasarigaa. Jiisusi assersuusiorpoq, soorlu siornatigut arnamik Samaariamiumik oqaloqateqar­nermini taamaaliortoq. Taanna oqarfigaa ‘imeq tunniussani naassaan­ngitsumik inuuneqalersitsisoq’. (Joh 4:7, 14) Jiisusi isumaqanngilaq arnaq Samaariamiu puialasumit immikkoorluin­nartumit imermik imiinnaruni naassaan­ngitsumik inuuneqalissasoq. Taamatuttaaq imaanngilaq Kapernaami inuppassuit tusarnaartut Jiisusip timaa nerigunikku aavalu imerunikku naassaan­ngitsumik inuuneqalissasut. w24.12 9 § 4-6

Kristumiut uiusut arnanut eqqunngitsumik isiginnit­taaseqalin­nginnissartik eqqumaf­figisariaqarpaat. Sooq? Pissutaasut ilagaat inuup eqqarsaatini timitalerusut­tarmagit. Apustilip Paulusip Romami kristumiut tanitat ima mianersoqquai: “Nalitsinni pissutsinut naleqqus­sassaaritsi.” (Rom 12:1, 2) Paulusi Romamiunut allammat ilagiit ukiuni arlalinni kristumiooreersimapput. Paulusilli oqaasiinit erserpoq ilagiin­niittut ilaat inuit ileqquinit eqqarsar­taasiannillu suli sunnerneqartartut. Taamaattumik allanngoq­qullugit kajumis­saarpai. Kajumis­saarutaa taanna aamma ullumikkut kristumiunut uiusunut atuuppoq. Ajoraluar­tumilli ilaat inuit eqqarsar­taasiannit sunnerneqarsimapput allaallu nuliaminnik ajortumik pinnittarlutik. w25.01 9 § 4

Utoqqaanertat suliassarpas­suaqartarput. Iivangkiiliulersaar­tuupput. (Tim 2. 4:5) Aallussil­luarlutik oqaluus­sisarput, oqaluus­sinermik aaqqissuisarput aamma oqaluus­sillaqqin­neruler­niassagatta ilinniar­tittarluta. Aamma ilagiinni eqqartuus­sisutut nallittuisutut kinaassusersiun­ngitsutullu kiffartorput. Ingasattumik ajortuliorsimasoq Jehovamut qanimut attaveqaleq­qinniassammat ikiorniar­tarpaat. Aamma ilagiit minguitsuunissaat isumagisarpaat. (Kor 1. 5:12, 13; Gal 6:1) Pingaar­nerpaatulli utoqqaanertat savanik paarsisutut ilagiit paarisarpaat. (Pet 1. 5:1-3) Piareersarluarlutik Biibilimik tunngaveqartumik oqalugiartarput, ilagiin­niittut ilisarisimaler­niartarpaat paarsisutullu pulaartarlutik. Utoqqaanertat ilaat suliassiis­sutigineqartut allat isumagiitigalugit ataatsimeersuarnernik aaqqissuisarnermi aamma ataatsimiit­tarfinnik sanaartornermi aserfal­latsaaliuinermilu ikiuuttarput. Ilaallu Napparsim­mavinnut Attaveqar­titanut napparsim­mavinnilu uninngasunut pulaartar­tussanut ilaapput. Ilumummi, utoqqaanertat uagut pilluta tamaviaartarput! w24.10 20 § 9

Biibilimi allassimavoq akiliut utertitsissut akilerneqarsimammat iperagaasimasugut. Apustilip Petrusip tamanna ima allaatigaa: “Nalunngilarsimi sølvit kuultil­luunniit nunguttartut atornagit inooriaatsimit isumaqan­ngitsumit siuaasassinnit ingerlateq­qinneqartumit iperagaasusi [nutsiinn.: “akiliun­neqarlusi utertin­neqartusi”]. Kristusilli, savaaqqatut ajoquteqan­ngitsutut minguitsutullu ittup, aavanit erlinnartumit aniguisin­neqarpusi.” (Pet 1. 1:18, 19; q.a.i.) Utertitsis­sutitut pilliut pissutigalugu ajortimit toqumillu aliasuutaangaar­tartunit aniguisin­neqarsin­naavugut. (Rom 5:21) Jehovamut Jiisusimullu qujamasungaarpugut Jiisusip aava erlinnartoq aqqutigalugu iperagaasimagatta! w25.02 5 § 15-16

Imminut qanoq illersorsin­naavugut? Angutip inuusuttup Ussatit kapitali 7-imi allaatigineqarnera ilinniutigisin­naavarput. Taassuma arnaq inuunerluttoq atoqatigaa. Versi 22-mi allassimavoq “pinasuarluni” malikkaa. Versinili siulianiittuni erserpoq taamaaliun­nginnermini aalajangiinerloqat­taartoq naggataatigut ajortulior­nerminik kinguneqartumik. Ajortuliun­nginnerani qanoq pisoqarpa? Siullermik “aqqusinermi angalaarpoq arnap illuata teqeqquata eqqaani, taavalu arnap illuata tungaanut ingerlarusaalerluni”. (Uss 7:8, 9) Taava arnaq takugamiuk tununngilaa. Kuninneqaramilu itigartinngilaa. Arnarlu oqarami “pilliutinik nereqatigiis­sutissanik” pilliisimalluni ersersin­niarunarpaa inuttut ajortuunani. Angutillu inuusuttup tusarnaarpaa upperalugulu. (Uss 7:13, 14, 21) Angutip inuusuttup navianartut qanillinaveersaarsimasuugunigit imminut illersorsimas­sagaluarpoq ajortuliorsimas­sanngik­kaluarlunilu. w24.07 16 § 8-9; 19 § 19

Jehovap ingasattumik ajortuliortut peqqissimin­ngitsut ilagiin­niiginnar­nissaat akuerin­ngikkaa. Immaqa ilaat eqqarsarput Jehovap nallittuingaar­nermigut ilagiin­niiginnar­tikkumassagai. Ilumoorpoq Jehova nallittuisuusoq, iliuutsilli ilaat akuerinngilai. Taassuma eqqortoq eqqunngitsorlu pillugit najoqqutassiai allanngorneq ajorput. (Juud 4) Jehovap ingasattumik ajortuliortut ilagiin­niiginnar­nissaat ajorinngik­kaluarpagu tamanna nallittuinerus­sanngik­kaluarpoq, ilagiin­niittummi tamarmik tamanna ajoqutigisin­naavaat. (Uss 13:20; Kor 1. 15:33) Nalunngilarpulli kialluunniit suujunnaarsitaanissaa Jehovap kissaatigin­ngikkaa. Inuit aniguisik­kumasarpai. Inuit eqqarsar­taatsiminnik iliuutsiminnillu allannguisut Jehovamullu ikinngutaal­lualeqqik­kusuttut taassumannga nallittor­neqartarput. (Ez 33:11; Pet 2. 3:9) Taamaattumik angut Korintimiu peqqissimillunilu ingasattumik ajortulior­tarunnaarsimammat Jehovap Paulusi aqqutigalugu ilagiit paasitippai angut taanna isumakkeerfigissagaat ilagiinnullu tikilluaq­qullugu. w24.08 16 § 7; 18 § 14-15

Jiisusip savat savaasallu pillugit assersuusiamini nassuiarpaa qatanngutiminik tanitanik tapersersuinissamut periarfis­saqartut qanoq eqqartuutis­sallugit. (Mat 25:31-46) ‘Annikil­liornar­tussarsuarmi’ Harmagedonni sioqqutitsiarlugu eqqartuus­sissaaq. (Mat 24:21) Soorlu savanik paarsisup savaatini savaasanit immikkoor­tittarai, Jiisusip malinnitsiminik tanitanik tapersersuisut aalajaatsut tapersersuin­ngitsunit immikkoor­tissavai. Biibilimi siulittuutigineqarpoq Jehovap eqqartuus­sisutut toqqagaa, Jiisusi, naapertuil­luartumik eqqartuus­sissasoq. (Es 11:3, 4) Inuit pissusilersornerat, isiginnit­taasiat oqaloriaasiallu – aamma qatanngutini tanitat qanoq pisaraat – maluginiaq­qissaartarpai. (Mat 12:36, 37) Jiisusip nalunngilaa kikkut qatanngutiminik tanitanik taakkualu suliaannik tapersersuisut. Kristusip qatanngutaanik tanitanik tapersersueriaatsit pingaartut ilagaat nutaarsiassanik nuannersunik oqaluus­sinermi peqataaneq. w24.09 20-21 § 3-4

Biibilimi allassimasut nalornis­sutigisatsinnut tunngasut misissor­tariaqarpagut. Oqaluus­sisartoq inuusuttoq Guutimit soqutigineqar­nerluni nalornisoq eqqarsaatigeriaruk. Nalornerusaagin­nassava? Naamik, ‘sunut tamanut tunngatillugu eqqortoq paasiniar­tariaqarpaa’ Jehovap qanoq isigineraani Biibilimi misissoq­qissaarlugu. Biibili atuaraangatsigu Jehovap uagutsinnut oqaatiginiagai tusarnaar­tarpagullusooq. Nalornis­sutigisarpulli Jehovap qanoq isumaqarfigineraa paasissagutsigu Biibili atuaannarnagu iliuuseqar­nerusariaqarpugut. Allassimaffinnik eqqarsaatigisatsinnut tunngasunik ujaasillutalu misissueq­qissaar­tariaqarpugut. Biibililersaarutaatigut ujarliutillu atorluarsin­naavagut. (Uss 2:3-6) Misissuinitsinni Jehovamut siulersoq­qusinnaavugut eqqarsar­taasianillu paasinnin­nissamut ikioqqulluta. Taava najoqqutassianik Biibilimeersunik siunnersuutitsialannillu iluaqutigisin­naasatsinnik ujarlersin­naavugut. w24.10 25 § 4-5

Inuk makitasooq imminullu pingaar­tippallaartoq Jehovamit pilluaq­quneqar­navianngilaq. (Kor 1. 10:24, 33; 13:4, 5) Allaat Jiisusip qanimut ikinngutai ilaannikkut eqqunngitsumik pissutiginiagaqarlutik aalajangersimasumik suliaqarusuttarput. Eqqarsaatigeriaruk Jiisusip apustiliisa ilaat marluk, Jaaku Johannesilu, qanoq iliornersut. Taakkua Jiisusi kimigiiserfigaat Guutip kunngeqarfiani pingaarutilimmik inissis­sinnaaneraatsik. Jiisusilli kissaataat akuersaanngilaa. Apustilini aqqaneq-marluk tamaasa ima nassuiaappai: “[Kinaluunniit] akorngassinni annerujumasoq ilissinnut kiffaassaaq. Kinaluunniillu akorngassinni qaffasissumik inissisimaf­feqarusuttoq tamanut inussiaataassaaq.” (Mak 10:35-37, 43, 44) Qatanngutit angutit eqqortumik pissutiginiagaqartut, tassa allanik kiffartuus­serusuttut, ilagiinnut iluaqutaangaassapput. – Tes 1. 2:8. w24.11 15-16 § 7-8

Aalajangigas­saqartilluta asanninneq kajumis­sissutigalugu anneruniajuitsuulluta “allap iluaqutissaa” salliutis­savarput. (Kor 1. 10:23, 24, 32; Tim 1. 2:9, 10) Taava asannin­nitsinnik ataqqin­ninnitsinnillu ersersitsisumik aalajangiisin­naassaagut. Pingaarutilimmik aalajangigas­saqaruit eqqarsaatigiuk piviusun­ngortik­kumallugu susariaqar­nerlutit. Jiisusip ilinniar­tippaatigut arlaannik pilersaaruteqaraangatta ‘naatsorsor­tassagipput naammas­sinissaanut akissaqar­nerluta’. (Luk 14:28) Taamaattumik aalajangiun­niakkat piviusun­ngortik­kumallugu qanoq piffissar­tornartigis­sanersoq, qanoq aningaasar­tuutaatigis­sanersoq qanorlu iliuuseqar­tigisariaqar­nerlutit eqqarsaatigikkit. Immaqa ilaquttatit oqaloqatigisariaqarpatit aalajangigassaq tapersersus­sagunikku taakkua immikkut qanoq iliortariaqar­nerannik isumaqatigiumallugit. Sooq taamatut pilersaarusiorneq pingaaruteqarpa? Imaassinnaavoq paasissagit arlaatigut allannguisariaqar­nerlutit allatul­luunniit aalajangiiguit pitsaanerus­sanersoq. Aamma ilaquttatit qanoq isumaqarnersut paasigukku ilimanar­neruvoq aalajangigassap kinguneqarluar­nissaanut tapersersus­sagaatsit. w25.01 18-19 § 14-15

Anersaakkut paratiisimiinnitta ‘tipaatsuutiginissaanut qiimmat­taatiginis­saanullu’ pissutis­saqarluarnerput Esajap allaatigaa. Anersaakkut paratiisi alutornartoq Jehovap pilersitaraa. (Es 65:18, 19) Tupinnanngilaq Jehovap inuit anersaakkut taarsiortut ilumoortup qaamaneranut isernis­saannut ikiorusut­tarmagit. Uagullu aqqutigaluta taamaaliortarpoq. Biibilimi ilumoortut ilisimagatsigit qujamasungaarpugut, allanullu oqaluttuarerusoqaagut. (Jer 31:12) Jehova ikinngutigil­luaratsigu neriuuteqarnerput qujamasuutigeqaarput neriorsuutaasalu eqquunnissaat qilanaaringaarlutigu. Biibilimi neriorsuutigineqarpoq ‘illuliorumaartugut nammineq inigisas­satsinnik viinnequtinillu ikkussuilluta inerititaanillu nerilluta’. ‘Sulilus­sinnassan­ngilagut’ Jehovamit pilluaq­qusaassagatta. Neriorsorpaatigut toqqissisimanartumik siunertaqarluar­tumillu inuuneqar­tissalluta. Nalussanngilaa qanoq pisariaqar­titaqar­nersugut, aamma ‘pinngortitat tamaasa kissaatigisaannik qaarsil­lartissavai’. – Es 65:20-24; Tuss 145:16. w24.04 22-23 § 11-12

Jehova tatigil­luinnarutsigu qaarsorilis­savarput. Upperil­luinnarparput allaat artorsar­nitsinni taassumunnga naalannerput iluaqutigis­sallugu. (Es 48:17, 18) Taassumannga tapersersor­neqarnerput misiginerujar­tortillugu tatiginerulis­savarput. Taava qanorluunniit misilin­neqartigigaluarutta pinertusaarsin­naassaagut. Qaqqarsuartut illuni Jehova aalajaatsuuvoq allanngujaatsuullunilu. Kinaassusia siunertaalu allanngun­ngisaannarput. (Mal 3:6) Edenimi pikitsitsisoqarmat Jehovap inunnut siunertani allanngor­tinngilaa. Soorlu apustili Paulusi allattoq, Jehova ‘imminik miserratigisin­naanngilaq’. (Tim 2. 2:13) Tassa imaappoq qanorluunniit pisoqaraluarpat imaluunniit allat qanorluunniit ilioraluarpata Jehovap siunertani najoqqutas­sianilu allanngor­tinngisaan­nassavai namminerlu allanngun­ngisaan­nassalluni. Taamaammat upperil­luinnarparput erloqinar­torsior­nitsinni Jehovap ikiussagaatigut siunissamullu neriorsuutini eqqortissagai. – Tuss 62:7, 8. w24.06 27-28 § 7-8

Katissanerlusi katissan­nginnerlusiluunniit aalajangiiniar­nissinnut suna iluaqutigisin­naavisiuk? Ilisarisimal­lualerneq. Peerariilin­nginnissinni immissinnut tunngasut paasisimagunarpasi. Maannali ‘qamuuna kinaassusersi’ qanoq ittuunersoq ilinniar­nissaanut periarfis­saqalerpusi. Tassa aapparilersin­naasavit anersaakkut nukittussusia, inuttut qanoq ittuunera qanorlu eqqarsar­tariaaseqarnersoq eqqarsaatigalugit ilisarisimanerulersinnaavat. Piffissap ingerlanerani apeqqutit uku akissutis­sarsissagunarpatit: ‘Uannut aappaal­luartuussava?’ (Uss 31:26, 27, 30; Ef 5:33; Tim 1. 5:8) ‘Misigis­sutsikkut pisariaqar­titagut matussusersin­naavagut? Kukkussutai naammagalugit atorsin­naavakka?’ (Rom 3:23) Ilisarisimanerujar­tortillusi una eqqaamasiuk: Assigiis­suteqarnersi pinnani assigiin­ngissuteqar­nissinnulli tulluarsarnersi pingaaruteqar­nerpaajuvoq. w24.05 27 § 5

Kunngi Daavi ingasattumik ajortuliorpoq. Pruffiitimilli Naatammit naqqinneqarami Daavi maniguulluni peqqissimivoq. (Tuss 51:1, 2, 5, 6, 19) Aamma kunngi Hizkia Jehovamut ajortuliorpoq. (Nal 2. 32:25) Daavili assigalugu Hizkia maniguulluni peqqissimivoq. (Nal 2. 32:26) Jehovap naggataatigut qanoq nalilerpaa? Biibilimi allassimavoq ‘Jehovap isaani ajunngitsumik iliortoq’. (Kng 2. 18:3) Kunngit taakku qanoq ilinniarfigisin­naavagut? Ajortuliagut peqqissimis­sutigisariaqarpagut sapinngisatsinnillu iliuusereq­qinnaveersaarlugit. Taavami pingaaruteqarsorin­ngisatsinnut tunngatillugu utoqqaanertanit siunnersor­neqarutta? Eqqarsas­sanngilagut Jehovap asajunnaaraatigut imaluunniit utoqqaanertat nuannarin­ngikkaatigut. Allaat Israalimi kunngit ajunngitsut siunnersor­neqarnissartik naqqinneqar­nissartillu pisariaqar­tittarpaat. (Hebr 12:6) Naqqinneqarutta oqaaqqis­saarneqarut­taluunniit (1) maniguulluta akueris­savarput, (2) pisariaqartumik allannguissaagut aamma (3) uummaterput tamakkerlugu Jehova kiffartorfigiuarlugu. Ajortuliagut peqqissimis­sutigigutsigit Jehovap isumakkeerfigis­savaatigut. – Kor 2. 7:9, 11. w24.07 21 § 8; 22 § 9, 11

Utoqqaanertanit peqqissiminissamut ikiorneqar­niartarnini itigartit­taruniuk ajortuliortoq ilagiinnit peerneqassaaq. (Kng 2. 17:12-15) Iliuusiinit erserpoq Jehovap najoqqutas­siaanut naalanniarnani aalajangersimagaa. (Mos 5. 30:19, 20) Jehovamik Nalunaajaasuujun­naarnera ilagiinnut nalunaarutigineqarpoq. Ajortuliortup kanngutsisin­neqarnissaa siunertarineqanngilaq. Kisianni ajortuliortartup ‘ilagisarun­naarnissaanik nereqatigisan­nginnis­saanillu’ peqqussut ilagiinnit malinneqarsin­naaniassammat nalunaarutigineqartarpoq. (Kor 1. 5:9-11) Biibilimi taamatut peqqussuteqarnera pissutis­saqarluarpoq. Apustili Paulusi allappoq “seernarsaatimininnguup naqittagaq tamaat pullatsittaraa”. (Kor 1. 5:6) Ajortuliortoq peqqissimin­ngitsoq ilagiinnit peerneqan­ngippat ilaat eqqarsalersin­naapput Jehovap najoqqutassiai naalanneqar­tariaqan­ngitsut. – Uss 13:20; Kor 1. 15:33. w24.08 27 § 3-4

Allat nukissaannik tunisin­naanngik­kaluarlugit nukigut atorlugit ikiorsin­naavagut. Assersuutigalugu qatanngutigut utoqqalisut napparsimasul­luunniit angerlarsimaffianni ikiorsin­naavagut pisiniul­lugilluunniit. Ataatsimiit­tarfitsinni eqqiaaqataal­lutaluunniit aserfal­latsaaliueqataasin­naavugut. Aamma eqqaamajuk oqaatsitigut allat qiimmas­sarsinnaagakkit. Kia iliuutsini pillugit ilinnit qiimmas­sarneqarnini qiimmas­saatigisinnaavaa? Tuppallersar­neqarnissamik pisariaqar­titsisumik nalunngisaqarpit? Taamaappat iliuuseqarlutit eqqarsaatigisat attavigiuk. Pulaarsinnaavat, sianerfigisinnaavat imaluunniit allagan­nguamik e-mailikkul­luunniit allaffigisinnaavat sms-erfigaluguluunniit. Qanoq oqassanerlutit ernumas­sutigis­sanngilat. Qamannga pisumik oqaasimininnguit uppeqativit aalajaan­nissaminut isumalluar­nissaminullu piffissami tamatumanerpiaq pisariaqar­tissinnaavai. – Uss 12:25; Ef 4:29. w24.09 28 § 8-10

Ilagiinni kiffartor­tuuguit ilimanarpoq utoqqaanertanut piumasaqaatit ilarpassuinik eqqortitsilereersimasutit. Uppeqatitit kiffartuun­nerujumallugit utoqqaanertatut kiffartor­nissannik anguniagaqarusuppit? Utoqqaanertap suut suliarisarpai? Oqaluus­sisarnermigut maligas­saalluarpoq, aallussilluni qatanngutiminik ilinniar­titsisarlunilu anersaakkut paarsisuuvoq, aamma oqaatsimigut iliuutsimigullu ilagiinnik nakussatsitsisarpoq. Paasinarpoq utoqqaanertat tamaviaartut Biibilimi ‘tunissutaasutut’ taaneqarmata. (Ef 4:8) Ilagiinni utoqqaaner­tanngussaguit susariaqarpit? Paaseqqaassavat nalingin­naasumik suliffis­sarsiornertut inngimmat. Suliffinni naliginnaavoq sulisitsisup sulisorerusutani ujartuk­kaminik aalajangersimasunik piginnaasaqarpat sulisussatut akuerisaraa. Utoqqaaner­tanngor­nissalli sulissutigigukku piginnaasaqarnerit, soorlu oqaluus­sillaqqinnerit ilinniar­titsillaq­qinnerillu, naamman­ngillat. Utoqqaanertanut piumasaqaatit Biibilimi allassimasut eqqortit­tariaqarpatit. – Tim 1. 3:1-7; Tit 1:5-9. w24.11 20 § 1-3