Juuli

Jehovap kiffaasa ilaat utoqqaliar­toramik, peqqiil­lioramik innarluuteqaramil­luunniit kissaatigisamittut iliuuseqar­tigisin­naanngillat. Taamaat­tumillu misigilersin­naapput Jehovap isaani pingaaruteqarpal­laarnatik. Immaqa imminut ima aperisarput: “Jehovamit suli atorneqarsin­naavunga?” Tussiaat 71-imik allattoq siornatigutut nukissaqar­tiginnginnami aamma taamatut misigivoq. Ima qinuvoq: “Qimaqinanga nukeerutileruma.” (Tuss 71:9, 18) Tussiaasiortulli upperiuarpaa aalajaalluni kiffartor­tuartilluni Jehovamit siulersor­neqarlunilu tapersersor­neqarumaarluni. Tussiaasiortup paasivaa pisinnaasamikkut killeqaraluarlutik sapinngisartik tamaat kiffartortut Jehovap nuannaarutigisarai. (Tuss 37:23-25) Illit utoqqalisimaguit eqqarsaatigiuk Jehovap qanoq isigineraatit. Timikkut sanngiil­lisimagaluartutit anersaakkut ingerlal­luarnissannut ikiorsin­naavaatit. (Tuss 92:13-16) Iliuuserisin­naajunnaarsimasatit eqqarsaatiginagit iliuuserisin­naasatit eqqarsaatigikkit. w24.10 28 § 14-16

Anersaakkut inersimal­luanngitsut Biibilimi aalajangersimasumik inatsiseqan­ngikkaangat eqqortumik aalajangiuminaatsitaqartarput. Inuit ilaat eqqarsartarput qanorluunniit iliuuseqarsin­naallutik. Allat inatsimmik piumasaqartarput, uffa pisariaqan­ngikkaluartoq. Assersuutigalugu kristumiut Korintimiittut Paulusi aperisimagunarpaat nerisassat guutipilunnut pilliutigineqartut nerisin­naaneraat. Qanoq iliornis­saannik allaffiginagit Paulusip nassuiarpaa kinaluunniit nalunngeqatigin­nissutini tunngavigalugu ‘toqqaasin­naatitaasoq’. Ilerasuutaan­ngitsumik allanullu naakkius­sutaanngitsumik aalajangiinias­sammata najoqqutassiat Biibilimeersut iluaqutigisin­naasaat eqqaavai. (Kor 1. 8:7-9) Taamaalilluni Paulusip Korintimiut anersaakkut inersimal­luartun­ngornis­saannut ikiorpai. Tassa inuit allat naatsorsuutiginagit imaluunniit inatsisis­sarsiuin­naratik Biibili tunngavigalugu namminneq aalajangiinias­sammata ikiorpai. w24.04 5 § 14

Juunap nalaani Niinivimiut peqqissiminis­saminnut periarfis­sinneqarput. Eqqaamajuk Jiisusip makititaasussat eqqartuun­neqartussat ‘ajortuliorsimasutut’ eqqaammagit. (Joh 5:29) Tassa imaassinnaavoq aamma Soodomamiunut Gomooramiunullu neriuutis­saqartoq taakkualu ilaat makitin­neqassasut. Taamaappallu Jehova Jiisusilu pillugit ilinniar­tissinnaas­savagut. Jehovap tamatigut “uummatit” misissuif­figisarpai “tartullu”, tassa eqqarsaatit, ilisimallugit. Siunissami inuit makitik­kunigit ‘kinaluunniit inuuserisaa suliaalu’ naapertorlugit nalilissavaa. Jehova nallittuingaarpoq, aatsaallu pisariaqaraangat sukannersumik iliuuseqartarpoq. Tassa Biibilimi allatut allassimasoqan­ngippat isummis­sanngilagut inuk makititaanissamut neriuutis­saqanngitsoq! w24.05 6 § 15-16

Itsarli Guutip kiffai unamminiar­nartitaminnik suliassin­neqaraangamik Guutip oqaasia nakussatsis­sutigisarsimavaat. Pruffiiti Jeremia assersuutigeriartigu. Jehovamit oqaluus­sinissamik suliassin­neqarami nangaagaluarpoq. Ima oqarpoq: “Inuusut­tuuvunga; oqalunneq naluvunga!” (Jer 1:6) Suna sapiissuseqalis­sutigaa? Jehovap oqaasii nakussatsis­sutigai. Ima oqarpoq: “Taava misigilersarpara soorlu ilunni innermik ikumasoqartoq, soorlu saanikka ikuallan­neqartut. Sapilerpunga, artulerpara!” (Jer 20:8, 9) Inuit akerlilersuil­lutillu tusarusun­ngikkaluartut Jeremiap oqariar­tuutissani oqaluus­sinissaminut nakussatsis­sutigaa. Guutip oqaasiani oqariartuut nakussatsis­sutigisin­naavarput. Apustilip Paulusip uppeqatini allaffigai Jehovap piumasaa pillugu ilinniar­neruneq iluaqutigisin­naagaat, ‘sutigummi tamatigut ajunngitsulior­tuarnissamut’ taamaalil­lutillu ‘Jehovap kiffaanut naleqquttumik inuunissamut’ kajumis­sissutigisin­naagamikku. – Kol 1:9, 10. w24.04 14-15 § 2-4

Palasiuneq Ebjatari aalajangeraluartoq Daavip ernera Adonija, imminut kunngin­ngortin­niarsarisoq, tapersersor­niarlugu Sadoki Jehovamut ilumoorfigin­nittuarpoq. Daavip nalunngilaa Sadoki tatigiuarsin­naallugu. Adonijap pilersaarutaa paasinarsimmat Daavip qinnuigai Sadokip, Naatap Benajallu Saalumuut kunngitut tanissagaat. (Kng 1. 1:32-34) Sadokip Jehovamut kiffartor­tuartut, soorlu Naatat aamma Jehovamut Daavimullu ilumoorfiginnittut allat, qanimut suleqatigisin­naagamigit nakussatsis­sutigisimassavai. Saalumuut kunngin­ngorami “Sadoki Ebjatarip atorfigigaluanut ivertippaa” palasiunin­ngortillugu. (Kng 1. 2:35) Sadoki qanoq ilaarsin­naaviuk? Qanigisappit ilaat Jehova qimanniarlugu aalajangerpat illit Jehovamut ilumoorfigin­ninnerit erseqqissumik ersersiguk. (Jos 24:15) Jehovap eqqortulior­nissamut pisariaqar­titannik nakussatsis­savaatit sapiillisis­sallutillu. Jehova qinnuigisaruk ikinngutitillu aalajaatsut peqatigisarlugit. Jehovap ilumoorfigin­ninnerit pingaar­tingaarpaa akissarsisis­sallutillu. – Tuss 37:28. w24.07 6-7 § 16-17

Tussiaat 15:2 naapertorlugu Guutimut ikinngutaasoq tassaavoq “assuarnaalluni inuusoq, innarluitsumik iliortoq”. Inuuneq naallugu taamaat­tuusariaqarpugut. Kisianni ilumut ‘assuarnaatsuusin­naavugut’? Aap. Kukkusaraluarluta sapinngisatsinnik Jehova naalattuarutsigu taassuma ‘assuarnaatsutut’, tassa aalajaatsutut, isigissavaatigut. Guutimut tunniul­luinnarnerput imermullu morsutsitaanerput Guutimut ikinngutaaler­nitsinnut aallarniutaaginnarput. Assersuutigalugu Biibilip nalaani inuk Israalik­kuugaluartoq imaanngilaq aamma Jehovap tupianiis­sinnaasoq. Israalikkut ilaasa Guuti torlorfigisarpaat, ‘kisianni peqqusersuitsumik ilumoor­tumillu pinatik’. (Es 48:1) Israalikkut pimoorus­sinertik ersersin­niarlugu Jehovap piumasaqaatai paasisariaqarpaat maleruar­tariaqarlugillu. Tamatumunnga assingusumik nalitsinni Guutimit iluarisaas­sagutta imermut morsutsitaaneq ataatsimiigiar­tarnerlu naamman­ngillat. ‘Innarluitsumik iliortariaqarpugut.’ w24.06 9 § 4; 10 § 6

Jehovap qanoq takutittarpaa tunisiumatulluni? Assersuutit arlaqan­ngitsut sammeriartigit. Jehovap pisariaqar­titatsinnik tunisarpaatigut. Immaqa piisaan­ngilagut, Jehovali ikiortigalugu amerlanersagut pisariaqar­titaminnik peqarput. Assersuutigalugu Jehovap nerisas­satsinnik atisassatsinnillu isumagisarpaatigut najugas­saqartit­tarlutalu. (Tuss 4:9; Mat 6:31-33; Tim 1. 6:6-8) Jehovap timikkut pisariaqar­titatsinnik ikiussalluta pisussaasutut misiginini pissutigiin­narlugu ikiortarpaatigut? Naamik. Jiisusip oqaasii Matiusi 6:25, 26-milu allassimasut eqqarsaatigeriakkit. Timmissat pillugit ima oqarpoq: “Naajartor­tussanik siaruar­terineq ajorlutillu peqqumaasivinnut ilisassaminnik katersuineq ajorput.” Maluginiarulli nangilluni qanoq oqartoq: “Ataatassi qilammiusup nerisas­saqartittarpai.” Taava Jiisusi ima aperivoq: “Taakkunannga naleqar­nerunngin­nerpisi?” Suna paasissagipput kissaatigaa? Jehovap uumasut pisariaqar­titaannik isumagisarunigit uaguttaaq isumagiumaaraatigut qularis­sanngilarput! Ataatatut ilaquttaminik isumassuisutut Jehovap asanninneq aallaavigalugu ilaquttani isumagisarpai. – Tuss 145:16; Mat 6:32. w24.09 26-27 § 4-6

Ilagiinni kiffartortoq angutaavoq imermut morsutsitaasimasoq utoqqaanertat ilagiinni suliaannik ikiuuttussatut anersaamit illernartumit toqqarneqarsimasoq. Ilagiinni kiffartortut pingaar­nerpaamik anersaakkut ittunik pingaar­titsisuugamik taama suliassin­neqartarput. Jehova asavaat taassumalu najoqqutassiai qutsissut malillugit inuullutik. Aamma uppeqatitik asangaarpaat. (Mat 22:37-39) Qatanngutip angutip qanoq ersersis­sinnaavaa ilagiinni kiffartor­tunngorusulluni? Biibilimi paasitin­neqarpugut qatanngut angut ilagiinni kiffartor­tunngorumalluni piumasaqaatinik sunik eqqortitsisariaqarnersoq. (Tim 1. 3:8-10, 12) Ilagiinni kiffartor­tunngornissat anguniagarigukku piumasaqaatit pineqartut misissoq­qissaakkit sapinngisannillu eqqortin­niarlugit. Taamaalior­tinnalli pingaaruteqarpoq pissutiginiakkat, tassa sooq ilagiinni kiffartor­tunngorusun­nerlutit, eqqarsaatigeq­qissaas­sallugu. w24.11 15 § 4-5

Inuit ilaat oqartarput Biibili arlaleriarlugu atuarsimallugu. Biibilili upperaat? Ilikkakkatik inuunerminni maleruarpaat? Ajoraluartumik akissutaa naamiuvoq, inuimmi amerlanerit Biibilimi siunnersuutit maleruarneq ajorpaat. Jehovap kiffaanit allaanerungaaramik! Inuunitsinni sapinngisatsinnik ilikkakkagut maleruar­niartarpagut. Guutilli oqaasiata atuarnissaa maleruar­nissaalu imaannaan­ngitsuusin­naapput. Atuartar­nissatsinnut piffissaasuasin­naavugut. Imaluunniit atuapal­lassinnaavarput immaqalu pissarsiaqarfiginagu. Aamma imaassinnaavoq sulissutis­sarpassuaqaratta imminut sapersittugut. Sunaluunniit unamminiagarigaluarukku Jehovap ikiuineratigut qaangersinnaavat. Guutip oqaasianik malueruaanissarput aalajangiusimatigu. Qularnanngilaq Biibili atuarnerusarutsigu inuunitsinnilu ilikkakkagut maleruarutsigit pilluar­nerulis­sasugut. – Jaak 1:25. w24.09 7 § 15-16

Kingunerluutigisatsinnik pineqarsimanitsinni toqukkul­luunniit annaasaqarsimanitsinni Jehovap anersaani illernartoq atorlugu tuppallersar­tarpaatigut. Illit ajorluin­nartumik nalaataqarnerit pissutigalugu aliasungaaruit uummammiutit tamaasa Jehovamut aniatis­sinnaavatit. Qaquguk­kulluunniit qanorluunniillu sivisutigisumik qinusin­naavutit. (Tuss 86:3; 88:2) Anersaamik illernartumik tuneqqullutit kimigiiserlutit Jehova qinnuigisaruk. Qinnutitit tusarnaar­tuassavai ikiorlutillu. Artornar­torsiornerit pissutigalugu sumulluunniit nukissaaruttutut misigivit? Jehova kiffartorfigiuar­niassagakku anersaamit illernartumit nakussatsin­neqarsin­naavutit. (Ef 3:16) Anersaamik illernartumik tuneqqullutit Jehova qinnuigereerukku qanoq iliussavit? Taassuma anersaavanik tunineqar­nerujumallutit anersaakkut ittunik sammisaqartarit. Iliuuserisin­naasavit ilaat tassaapput ataatsimiigiartarneq oqaluus­seqataanerlu. Ullut tamaasa Biibilimik atuartaruit Jehovap eqqarsaatai eqqarsaatigeq­qissaarsin­naavatit. (Flp 4:8, 9) Atuarninni maluginiartaruk Biibilimi oqaluttuarineqartut qanoq ajornar­torsior­tarnersut eqqarsaatigeq­qissaar­tarlugulu Jehovamit qanoq ikiorneqar­tarnersut. w24.10 9 § 12-14

Jehova erneralu ilaarlugit inuit asavagut. (Uss 8:31) ‘Neriuuteqaratillu Guuteqan­ngitsut’ misigin­neqatigingaarpagut. (Ef 2:12) Inuunermi ajornar­torsiuterpassuit pissutigalugit ipilersutullusooq ipput. Annanniullu pisariaqartitaat pigaarput, tassa Guutip kunngeqarfia pillugu nutaarsiassat nuannersut. Taakkununnga asanninnerput misigin­neqatigin­ninnerpullu kajumis­sissutigalugu nutaarsiassat nuannersut oqaluus­sissutigerusungaarpagut. Tamanna pissutigalugu neriuuteqalersin­naapput, maanna pitsaanerpaamik inooriaaseqalersin­naapput, siunissamilu “inuunivik” pigilersin­naavaat – tassa paratiisimi naassaan­ngitsumik inuuneqalersin­naapput. (Tim 1. 6:19) Inuit asagatsigit silarsuup ajortup suujunnaarnissaa pillugu mianersoq­qusarpagut. (Ez 33:7, 8) Kikkut tamaasa paasitik­kusuppagut annikil­liornar­tussarsuarmi qanoq pisoqassasoq: Upperisarsiornerit eqqunngitsut peerneqassapput, tamatumalu kingorna Saatanip silarsuaa ajortoq Harmagedonnimi suujunnaarsin­neqassaaq. – Saqq 16:14, 16; 17:16, 17; 19:11, 19, 20. w24.05 16-17 § 8-9

Apustilip Paulusip kristumiut peqquai ‘kamannissaq Guutimut isumagitissagaat’. Taamaaliorsin­naavugut Jehovap nammineq qaqugu qanorlu aaqqiinissaanut inissaqar­titsinitsigut. Qatanngut Johnimik atilik naapertuil­luanngitsumik pineqarami oqarpoq: “Kamassara ajortuliun­nginniassagama aquttariaqarsimavara, imaannaan­ngilarli. Jehovap utaqqinissaanut Romamiut 12:19 iluaqutigaara.” Jehovap aaqqiinissaanut utaqqineq iluaqutigisarparput. Ajornar­torsiummik aaqqiiniarnerup ajornartua misigin­nginnias­sagatsigu Jehovap ikiussavaatigut. Oqarporlusooq: “Ajornar­torsiut uannut tunniuguk, isumagiumaarpara.” Jehovap ‘pillaanissamik’ neriorsuutaa akuerigutsigu iperaasin­naavugut nalunagu Jehovap pitsaanerpaamik isumagiumaaraa. w24.11 6 § 14-15

Pigisat timikkullu iluaqutissat inuunermi pingaar­nerpaatis­sanngilagut. Tamatumunnga tunngatillugu Paulusip kristumiunut allagai ilinniarfigisin­naavagut. Itsaq Israalikkut inoqajuitsumi qaqqallu Siinaajip eqqaani iliuusaat allaatigigamigit kristumiut mianersoq­qullugit allaffigai ‘ajoqutaasunik pilerigisaqas­sanngitsut’. (Kor 1. 10:6, 7, 11) Israalikkut piumatuujullutik nerrersummata nerisassat Jehovap tupinnar­tuliornikkut tunniussai ‘ajoqutaalerput’. (Mos 4. 11:4-6, 31-34) Aamma nersuteeraasaliap kuultiusup guutisiorfiginerani nerillutik imerlutillu festerput. (Mos 2. 32:4-6) Israalikkut migisigisaat atorlugu Paulusip kristumiut ukiumi 70-imi Jerusalemmip suujunnaarsitaanissaata nalaani inuusut mianersoqquai. Uagut silarsuup ajortup suujunnaarsitaanissaata nalaani inuugatta Paulusip mianersoq­qussutaa pimoorut­tariaqarparput. w24.12 6 § 13

Jehova Guutiugami pilluartoq pilluar­nissarput kissaatigaa. (Tim 1. 1:11) Inuunermi nuannaarutis­saqarnias­sagatta tunissuterpas­suarnik tunisimavaatigut. (Jaak 1:17) Taakkualu ilagaat aappariinneq. Angut arnarlu katikkaangamik neriorsuisarput asaqatigiil­lutillu ataqqeqatigiin­niarlutik. Qanimut asaqatigiit­tuarunik pilluarlutik inooqatigiis­sinnaapput. Ajoraluartumik aappariip­passuit katikkamik neriorsuutigisartik puiorsimagamikku pilluan­ngillat. Jehovap uiusut nuliatik qanoq pisassagaat kissaatigaa? Jehovap uiusut nuliaminnik ataqqin­neqquai. Uiusoq nuliaminik ataqqinnittoq nuliaminut inussiar­nersuullunilu asannit­tuussaaq. – Pet 1. 3:7. w25.01 8 § 1-2; 9 § 4-5

Qularnan­ngitsumik kristumiut siulliit Paulusip hebræerinut allagai misilin­neqaatinut nalaakkumaak­kaminnut piareersimanissamut iluaqutigisimassavaat. Paulusip uppeqatini kajumis­saarpai Allakkat Illernartut ilisimal­lualeqqullugit paasiniarluaq­qullugillu. Taamaalior­nermikkut ilinniar­titsissutit eqqunngitsut uppernikkut sanngiil­lissutigisin­naasatik itigartik­kuminar­nerutissavaat. Kajumis­saarpai uppernertik nukittorsar­tuaqqullugu, taamaalior­nermikkut Jiisusip ilagiinnilu siulersuisut maleruaaq­qussutaat nangaanatik maleruarsin­naaqqullugit. Aamma misilin­neqaatit Ataataminnit asannittumit perorsaatis­sinneqar­nissamut periarfissatut isiginerisigut pinertusaarsin­naaqqullugit ikiorpai. Uaguttaaq siunnersuutit taakku maleruartigit! Taamaaliorutta naggatissamut aalajaas­sinnaassaagut. – Hebr 3:14. w24.09 12 § 17; 13 § 19

Jehova aalajangerpoq ajortuliatsinnik isumakkeerfigineqar­niassagatta taassumunngalu ikinngutaaler­niassagatta utertitsissummik akiliisoqar­tariaqartoq. Adamip annaasaa taarserumallugu suna akilerneqar­tariaqarpa? Eqqaamajuk Adamip Evallu naammal­luinnartumik naassaan­ngitsumillu inuunis­saraluartik annaammassuk. Akiliisoq annaasap assinganik akiliisariaqarpoq. (Tim 1. 2:6) Taamaattumik akiliisoq tassaasariaqarpoq angut inersimasoq (1) naammal­luinnartoq; (2) nunarsuarmi naassaan­ngitsumik inuunissamik periarfis­saqartoq aamma (3) uagut pilluta inuunermi pilliutiginissaanut piumassuseqartoq. Sooq Jiisusip akiliut utertitsissut akilersinnaavaa? (1) Naammal­luinnar­tuugami ajortuliunngilaq. (Pet 1. 2:22) (2) Tamanna pissutigalugu nunarsuarmi naassaan­ngitsumik inuunissamik periarfis­saqarpoq. (3) Uagut pilluta inuunini pilliutigerusuppaa. – Hebr 10:9, 10. w25.02 4 § 11-12

Nalussanngilat Jehovap asangaaraatit imermullu morsutsitaanissat ilaqutariis­sortaminullu ilaalernissat kissaatigigaa. Taamaalior­nissannut akornutaasinnaasut qaangeruminaap­pasikkaluartut ikiorniarlutit piareersimavoq. Jiisusip ilinniartitami ilaat oqarfigai: “Siinuppip inerittussaatut mikitigisutut uppersuseqarussi qaqqaq una oqarfigisin­naassavarsi: ‘Uanngaanniit uunga nuugit’, taava nuussaaq, ilissinnullu sumilluunniit ajornar­toqassanngilaq.” (Mat 17:20) Ilinniartitat ukiualuinnaat Jiisusi najorsimagamikku uppernertik suli nakussatsit­tariaqarpaat. Jiisusilli neriorsorpai upperlualerunik Jehova ikiortigalugu akornutaasut qaqqarsuartut ittut qaangersin­naagaat. Illittaaq taamaalior­nissannut Jehovap ikiussavaatit! Imermut morsutsitaanissannut arlaannik akornutis­saqaruit qaanger­niarlugu iliuuseqapallagit. Jehovamut tunniul­luinnarit imermullu morsutsitaallutit. Tassa inuuninni aalajangigassat pitsaanerpaaq! w25.03 7 § 18-20

Guutip uumassuseqartup tamatigut ikiuerusunnera eqqaamagutsigu ajornar­torsiutigut anigorluarsin­naavagut. Itsaq iliuusiisa eqqarsaatigeq­qissaar­nerisigut Jehovamik tatigin­ninnerput nakussatsis­sinnaavarput. (Es 37:17, 33-37) Aamma nalitsinni uppeqatigut qanoq ikiorsimanerai jw.org-imi atuarlutillu videunik isiginnaarsin­naavutit. Tamatumalu saniatigut Jehovap illit qanoq ikiorsimaneraatit eqqarsaatigiuk. Immaqa misigin­ngilatit Jehovap tupinnaan­nartumik ikiorsimagaatit. Jehovalli inuuninni sorpassuartigut ikiorsimavaatit! Taassumunnga ikinngutaanias­sagavit qanillisis­simavaatit. (Joh 6:44) Qinnutitit qanoq akisarsimanerai, piffissaq eqqorlugu ikiuisimaneri aamma artornar­torsiungaarninni qanoq annertoq­qusersorsimagaatit eqqaamaq­qullugit Jehovamut ikioqqusin­naavutit. Misigisimasatit eqqarsaatigigukkit Jehovap ikiortuas­sagaatit upperinerulissavat. w24.06 21 § 8

Jehovamut attaveqar­nitsinnut ajoqutaasinnaasut iliuuserin­ngilluin­narnissaat aalajangiusimavarput. Taamaattorli naammal­luinnan­ngitsuugatta ussernar­torsiorsin­naavugut. (Rom 7:21-23) Eqqunngitsumik iliornissamut ussernar­torsioriataarsin­naavugut. Jehovamut aamma erneranut aalajaat­tuarumalluta Jiisusip siunnersuutaa maleruar­tuartariaqarparput. Tamatta eqqunngitsulior­nissamut ussernar­torsior­tarpugut. Assigiin­ngitsunilli sanngiis­suteqaratta ussernar­torsiornerit inummiit inummut assigiin­ngissin­naapput. Assersuutigalugu ilaata atoqatigiinnikkut eqqunngitsulior­nissamut ussernar­torsiorneq akiugarisinnaavaa. Immaqa allap minguttuumik iliuuseqartarneq, soorlu imminut inertittarneq imaluunniit pornografiimik isiginnaartarneq, akiugarisinnaavaa. Aamma allap immaqa inunnut qununeq, pingaar­niarneq, kamajaneq imaluunniit alla akiugarisinnaavaa. w24.07 14 § 3; 15 § 5

Takorlooriaruk qanoq pisoqarsinnaasoq utoqqaanertat angut ilumoorluni peqqissimisoq ilagiinnut ilaalerseq­qikkuman­ngippassuk imaluunniit ilaalerseq­qinneqarnerata kingorna ilagiit asannin­nerminnik ersersitsivigiuman­ngippassuk. Paulusi allappoq ‘aliasorujus­suarnermik sapilersutut misigilersinnaasoq’. Immaqa isumaqalersinnaavoq Jehovamut kiffartoq­qilersin­naanaviarani, immaqalu allaat Jehovap qanillinissaa sulissutigiun­naarlugu. Ilagiin­niittut angut peqqissimisoq isumakkeerfigiuman­ngippassuk qanoq allatut pisoqarsinnaava? Tamanna Jehovamut attaveqar­nerminnut ajoqutigisin­naavaat. Qanoq? Isumakkeerfigin­nikkuman­ngitsut Jehova ajortuliortunik peqqissimisunik isumakkeerfigin­nittartoq ilaarnagu Saatani naakkit­taatsoq ilaassagamikku. Taamaalillutik angutip Jehovamut kiffartor­niarnissaanik akornusiiniartoq, Diaavulu, ikiussavaat. – Kor 2. 2:10, 11; Ef 4:27. w24.08 16-17 § 7, 10-11

Jiisusip angutit ilaat allatut ikiuisussatut ilagiinnut tunissutigai. Taassumannga siulersor­neqarlutik utoqqaanertat Jerusalem­mimiittut Paulusi, Barnaba allallu nakkutil­liisutut angalasartutut aallartippaat. (ApS 11:22) Sooq? Ilagiinni kiffartortut utoqqaanertallu assigalugit angutit taakkua ilagiit nukittorsar­niassam­matigit. (ApS 15:40, 41) Ilagiinnik nakkutilliisut angalajuarput. Ilaat ilagiit tikeraar­niarlugit kilometerit hundredilip­passuit angalasarput. Sapaatit-akunneri tamaasa ilagiinnik nakkutilliisoq arlaleriarluni oqalugiartarpoq, paarsisutut pulaartarpoq aamma pionerit ataatsimiin­neranni, utoqqaaner­taqatigiit ataatsimiin­neranni katersuun­nernilu aqutsisuusarluni. Oqalugiaatinik piareersaasarpoq ataatsimeersuar­nernillu aaqqissuisarluni. Pionerinut Ilinniarfinni ilinniar­titsisarpoq ilageeqatigiinnilu pionerinut ataatsimiinnermik immikkut ittumik aaqqissuisarluni. Tamatumalu saniatigut pingaarutilinnik allanik – ilaannikkut nukingin­nartunik – immikkoor­tortaqarfim­minngaanniit suliassin­neqartarpoq. w24.10 21 § 12-13

Ullormut allassimaffimmi Jehovap oqaasii pruffiitip Jeremiap issuarpai. Paulusip hebræerinut allakkamini oqaatsit assingusut allappai. (Hebr 8:12) Kisianni qanorpiaq isumaqarpat? Biibilimi oqaaseq “eqqaavaa” atorneqaraangat imaanngilaq eqqaamasaqarneq eqqarsaatigin­ninnerlu pineqar­tuaannartut. Aamma iliuuseqarneq pineqarsinnaavoq. Pinerluttoq Jiisusip saniani nivingasoq ima oqarpoq: “Jiisusi, Kunngeqarfinnut piguit eqqaaginga.” (Luk 23:42, 43) Imaanngilaq taamanik­kussamut eqqarsaatigiin­nassagini oqarfigigaa. Jiisusip akissutaanit erserpoq pinerluttoq makitik­kumallugu iliuuseqassasoq. Tassa Jehova oqarami ajortuliagut eqqaaqqin­naviarnagit isumaqarpoq ajortuliagut isumakkeerfigisimasani pillugit siunissami pillarnaviarnata. w25.02 11 § 14-15

Silaqas­suseqalerumalluta Jehovap kinaassusia, piumasaa aamma suut nuannarinerai suullu uumiginerai pillugit ilisimasaqar­tariaqarpugut. Una eqqarsaatigiuk: ‘Jehova pillugu ilisimariikkakka eqqarsaatigalugit qanoq iluarisaatut aalajangiisin­naavunga?’ (Ef 5:17) Jehovap iluarisaatut iliorumalluta ilaannikkut asasatta pakatsis­sutigisaannik iliuuseqar­tariaqarsin­naasarpugut. Assersuutigalugu imaassinnaavoq angajoqqaat ajunngitsumik siunertallit panitsik inersimasoq angummik pisuumik – Jehovamulli attaveqar­nerminik pingaar­titsinngitsumik – aappaqaq­qullugu kimigiiserfigigaat. Angajoqqaat panitsik ilorrisimaar­nartumik inuuneqassasoq kissaatigaat. Kisianni paniusup eqqarsaatigisariaqarpaa angutip taassuma ikiussaneraani Jehovamut attaveqarluar­neruler­nissaminut. Jehova qanoq isumaqarpa? Tamanna Matiusi 6:33-mi paasisin­naavarput. Tassani kristumiut peqquneqarput ‘Guutip kunngeqarfia salliut­tuassagaat’. Angajoqqaagut nunaqqatigullu ataqqivagut, Jehovalli nuannaar­tinnissaa pingaar­nerpaatipparput. w25.01 17 § 9-10

Akerlilersor­neqartilluta aallussil­luarluta oqaluus­siuarnias­sagatta Jehovamit ikiorneqar­tariaqarpugut. (Saqq 12:17) Sooq Jehovamit ikiorneqarnissat upperil­luinnarsin­naaviuk? Jiisusip qinnutaa Johannesi kapitali 17-imi allaatigineqartoq eqqarsaatigiuk. Jiisusip Jehova qinnuigaa apustilit sernigeq­qullugit. Qinnutaalu Jehovap akivaa. Apustilit malersor­neqaraluarlutik aallussil­luarlutik oqaluus­siuarnis­saminnut Jehovamit ikiorneqarnerat Apustilit Suliaanni allaatigineqarpoq. Jiisusip Jehova aamma qinnuigaa nutaarsiassanik nuannersunik upperinnittut sernigeq­qullugit. Tassa aamma illit sernigeq­quaatit. Jiisusip qinnutaatut Jehova suli iliortarpoq. Soorlu apustilit ikiortarsimagai, aamma illit ikiortas­savaatit. (Joh 17:11, 15, 20) Naggatissaq qanilliar­tortillugu aallussil­luarluta nutaarsiassanik nuannersunik oqaluus­siuarnissarput ajornakusoor­nerulersinnaavoq. Jiisusilli neriorsorpaatigut pisariaqar­titatsinnik ikiorneqas­sasugut. – Luk 21:12-15. w25.03 17-18 § 13-14

Jehovamut qujamasungaaratta ‘qiimmat­tarsinnaavugut’. Guutip oqaasiani ilumoortut, neriorsuutit tuppallernartut Jiisusillu utertitsis­sutitut pilliutaa tunngavigalugu neriuuterput ‘uummatitta iluunngaannit qiimmat­taatigisin­naavagut’. Taakku eqqartoraangatsigit qamuuna nuannaar­tarpugut! (Tuss 34:9; 133:1-3) Jehovap kiffaasa asaqatigiinnerat ataasioqatigiin­nerallu anersaakkut paratiisip immikkuul­larissuuneranut ersiutaapput. Taakku paratiisissami inuunissap qanoq issaneranut qilanaar­tuutaapput. Taamanik­kussamummi Jehovap kiffai suli asaqatigiin­nerulerlutillu ataasioqatigiin­nerulissapput. (Kol 3:14) Kialuunniit qamannga pisumik nuannaarumalluni nalerisimaarumallunilu anersaakkut paratiisi misigisariaqarpaa. Eqqaamajuk Jehovap kiffai allanit ajortumik eqqartor­neqartaraluartut Jehovap ‘allamik ateqartikkai’, tassa ajunngitsumik ilisimaneqartutut isigigai aamma iluaralugillu ataqqinarsisikkai. Aamma anersaakkut ilaquttatsinnit ataqqineqarpugut. – Es 65:15. w24.04 21 § 7-8

Uppeqatigut aappaqan­ngitsut katikkusuttulli qanoq annertoq­qusersorsin­naavagut? Ilaatigut oqaatsitta mianersuutiginissaat pingaaruteqarpoq. (Ef 4:29) Uku eqqarsaatigisin­naavagut: ‘Katikkusuttut quiasaarnikkut ajuallaatigisaannik qinngasaalaar­tarpakka? Angut arnarlu oqaloqatigiittut takugaangakkit peerariiler­nissaminnut soqutigiis­sorisarpakka?’ (Tim 1. 5:13) Aamma aappaqan­ngitsut amigaateqartutut misigitik­kusunngilagut. Pitsaanerungaarpoq aappaqan­ngitsut nersualaar­nissaannut periarfis­sarsior­tarutta! Taavami qatanngut angut qatanngullu arnaq tulluar­tuusorigutsigit? Biibilimi kajumis­saarneqarpugut allat misigis­susiinik innimit­tartuus­sasugut. (Rom 15:2) Kisimiittut amerlasuut kissaatigineq ajorpaat allanut ilisaritin­neqarnissartik, tamannalu ataqqis­savarput. (Tes 2. 3:11) Allat aappassarsior­nerminni ikiorneqar­nissartik qujamasuutigisin­naavaat, kisianni aperineqan­ngikkutta akuliutis­sanngilagut. – Uss 3:27. w24.05 24-25 § 14-15

Inuunitsinnik ajornar­torsior­titsisin­naasumik allanngorluin­nartitsisin­naasumil­luunniit nalaataqar­tarsinnaavugut. Qujanar­tumilli Jehovamut Guutimut ikioqqusin­naavugut! Taassumannga ikiorneqaraangatta oqaatsit uku uppernarsisarpagut: “Naalagaq uumavoq!” (Tuss 18:47) Daavilli Guutip uumanera allaatigeq­qammerlugu ‘qaarsumik’ taavaa. Tassa uumassuseqan­ngitsumut assersuuppaa. Sooq taama taavaa? Biibilimi oqaaseq “qaarsoq” atorneqarmat Jehovap pissusiisa ilaat paasinerusin­naavagut. Kiffaasa taassuminnga unnersiutigin­ninnerminni oqaaseq taanna atorajuppaat. Jehovap ‘qaarsutut’ taaneqarnera siulleq Mosesimik allakkat tallimaat 32:4-mi allassimavoq. Hanna qinulluni oqarpoq ‘Guutitsitut qaarsoqan­ngitsoq’. (Sam 1. 2:2) Habakkukip Jehova ‘qaarsumisut’ taavaa. (Hab 1:12) Tussiaat 73-imik tussiaasiortup Jehova ‘uummatimi qaarsorisaatut’ taavaa. (Tuss 73:26) Allaallu Jehova imminut qaarsumik taavoq. – Es 44:8. w24.06 26 § 1, 3

Israalimi kunngit uummat tamakkerlugu Jehovamut kiffartortut Jehovap iluarai. Josijalu pillugu Biibilimi ima allassimavoq: “Siornatigut kunngeqarsimanngilaq Josijatut uummammigut iluunngarluni … Naalakkamut saanniarsimasumik.” (Kng 2. 23:25) Taavami Saalumuut naggataatigut ajortulior­talersimasoq? Taanna ‘Guutiminut uummammigut iluunngarluni ilumoorun­naarpoq’. (Kng 1. 11:4) Abija, kunngi ilumoorfigin­ninngitsoq alla, pillugu allassimavoq: “Guutini uummammigut iluunngarluni ilumoorfiginngilaa.” (Kng 1. 15:3) Biibilimi oqaaseq “uummat” inuup qamuuna inuttut qanoq ittuuneranut atorneqarajuppoq. Tassa ilaatigut inuup kissaatai, eqqarsaatai, isiginnittaasia, pissutiginiagai anguniagaalu pineqarput. Jehovamut uummatikkut iluunngarluni kiffartorneq qanoq isumaqarpa? Inuup uummammigut iluunngarluni kiffartortup Guuti qamannga pisumik asagamiuk ataqqigamiullu inuunini naallugu guutisiorfigaa, imaanngitsoq guutisiorfigisariaqaramiuk. w24.07 21 § 4-5

Jehovap ajortuliagut qanoq piiartar­nerlugit assersuusiorpoq. Ima oqarpoq: “Piiarpakka unioqqutitsinitit putsutut isillugit, ajortuliatillu aamma nuissatut isillugit.” (Es 44:22) Tassa Jehovap isumakkeerfigigaangamisigut soorlulusooq ajortuliagut putsumik takuneqarsin­naajunnaarsittarai. Jehovap isumakkeerfigin­ninnera pillugu assersuutit qanoq ilinniarfigaagut? Jehovamit isumakkeerfigineqaraangatta ajortuliatsinnik minguiar­neqaratta pisuusutut misigiuaan­nartariaqan­ngilagut. Jiisusip inuunini utertitsis­sutitut tunnius­simammagu akiitsugut Jehovamit isumakkeer­neqarluinnarput. Tassa Jehovamit isumakkeerfigineqaratta soorlulusooq ajortuliagut pisiman­ngisaannartut. Peqqissimigaangatta Jehovap ilumoorluin­narluni isumakkeerfigisaraatigut paasillugu oqilial­lannaqaaq! Jehovamit isumakkeerfigineqaratta taassumunnga ikinngutaaleq­qissinnaavugut ingasat­tumillu ilerasut­tuanngin­nissatsinnut iluaqutigalugu. w25.02 10-11 § 11-14

Utoqqaanertat ilagiinnik minguitsuujuar­titsinissamik Jehovamit akisussaaf­filerneqarput. (Kor 1. 5:7) Aamma ingasattumik ajortuliorsimasoq peqqissiminissaanut sapinngisaminnik ikiorniarsarisarpaat. Neriuutigiuarpaat allannguissasoq. Sooq? “Jehova qamannga pisumik misigis­suseqarlunilu nallittuisuusoq” ilaarusuk­kamikku. (Jaak 5:11) Maluginiaruk apustili Johannesi utoqqalisimasoq taamatut isiginnit­taaseqartoq. Ima allappoq: “Ikinngutikka, ajortulioqqunasi taama allaffigaassi. Ajortulior­toqarpalli Ataatami naapertuil­luartumik, tassa Jiisusimik Kristusimik, ikiortis­saqarpugut.” (Joh 1. 2:1) Ajoraluartumik ilaannikkut kristumiu peqqissimiumaneq ajorpoq. Taamaappat taanna ilagiinnit peerneqar­tariaqarpoq. w24.08 25 § 19-20

Imaassinnaavoq allanut naleqqiuteq­qajaasartutit. Taamaalior­taqinalli! Sooq? Jehovap allanut naleqqiunneq ajormatit. (Gal 6:4) Assersuutigalugu Mariiap Jiisusi uuliamik tipigissumik akisoorujus­suarmik tunivaa. (Joh 12:3-5) Uillarnerlu piitsoq aggorsimasuminin­nguanik marlunnik naleqarpian­ngitsunik guutisiorfimmut tunissuteqarpoq. (Luk 21:1-4) Jiisusilli angusisarluinnarami arnat marluk taakku imminnut naleqqiunnagit upperlutik tunissuteqarnerat maluginiarpaa. Iliuuserisatit qanorluunniit annikigitigigaluarukkit upperneq asanninnerlu kajumis­sissutigalugit iliuuserisatit tamaasa Jehovap pingaar­tingaarpai. Tamatta ilaannikkut nalorniler­tarpugut. Guutilli oqaasia, Biibili, iluaqutigalugu ‘eqqortoq paasiniarsin­naavarput’. Isumakuluutitit iliuuseqarfigikkit taamaalil­lutillu nalorniun­naarlutit isumallualerlutit. Jehovap maluginiar­tarpaatit ilisarisimal­luarlutillu. Pilliuteqar­tarnerit pingaar­tingaarpaa neriorsuisimanermisullu akissarsisik­kumaarlutit. Jehovap kiffani ilumoorfiginnittut tamaasa asangaarlugillu isumassorpai. w24.10 25 § 3; 29 § 17-18