Juuni

Jiisusip utertitsis­sutitut pilliutaa maanna iluaqutigisalereerparput. Assersuutigalugu utertitsis­sutitut akiliut tunngavigalugu Jehovap ajortuliatsinnik isumakkeerfigisarpaatigut. Isumakkeerfigerusut­tarpaatigut naak isumakkeerfigisariaqan­ngikkaluarluta. (Tuss 103:3, 10-13) Immaqa ilaat Jehovamit isumakkeerfigineqar­nissaminnut ajukkupput. Ilumoorpoq arlaannarpul­luunniit Jehovamit isumakkeerfigineqar­nissaminut pisinnaatitaan­ngikkaluartoq. Apustili Paulusi tamanna paasillugu allappoq ‘apustilisut taaneqar­nissamut ajukkulluni’. Nangillunili ima allappoq: ‘Guutip ajunngisaangaarfigimmanga apustiliuvunga.’ (Kor 1. 15:9, 10) Ajortuliagut peqqissimis­sutigigutsigit Jehovap isumakkeerfigis­savaatigut. Sooq? Asagamisigut, imaanngitsoq pisassarigatsigu. Ajukkunnerit pissutigalugu nikallungaguit eqqaamajuk Jehovap utertitsissut ajorteqan­ngitsut pinnagit ajortuliaminnilli peqqissimis­sutiginnittut pillugit pilersikkaa. – Luk 5:32; Tim 1. 1:15. w25.01 26-27 § 3-4

Allat uagutsinnut iliuusii oqaasiiluunniit aqussin­naanngilagut. Namminerli iliuutsigut aqunniarsin­naavagut. Amerlaner­tigullu iliuuserisassaq pitsaanerpaaq tassaavoq isumakkeerfiginninneq. Sooq? Jehova asagatsigu, taassumalu kissaatigaa isumakkeerfigin­nikkumas­sasugut. Kamassimajuaan­narutta allanillu isumakkeerfigin­ninngikkutta sianiitsulior­nissarput ilimanar­nerussaaq, immaqalu allaat peqqissutsikkut ajoqutigis­savarput. (Uss 14:17, 29, 30) Narrutsas­simajun­naarutta misigissutsit nuanniitsut inuunitsinnut sunniutipiloqar­nissaat pinaveersaar­tissavarput. Tamannalu nammineq iluaqutigis­savarput, pisimasormi eqqarsaatigiun­naarlugu nuannaaq­qilersin­naavugut. Qanoq ilillutit ajuallaq­qajunnaarsinnaavit? Siullertut sianigissavat imaalial­laannaq taama pisoqar­navianngimmat. Ajutoornerup kingorna timikkut sivisuumik aaqqinniaaluusaarsin­naavugut. Taamatuttaaq misigis­sutsikkut anniaateqarutta imaassinnaavoq ilumoorluta isumakkeerfigin­ninnissamut piareer­tinnata piffissaq ingerlaq­qaartariaqartoq. (Oqal 3:3; Pet 1. 1:22) Isumakkeerfigin­nikkumallutit qinunikkut Jehovamut ikioqqusarit. w25.02 16-17 § 8-11

Ilinniar­titsissutigineqartut pingaarnerit ilagaat peqqissimineq, upperneq, imermut morsutsin­neqarneq toqusunillu makititaaneq pillugit ilinniar­titsissutit. (Hebr 6:1, 2) Ilinniar­titsissutit taamaattut kristumiut upperisaannut tunngaviupput. Taamaattumik apustili Petrusi ullormi piinsimi oqalugiarami taakku eqqartorpai. (ApS 2:32-35, 38) Kristusimut ilinniar­titanngus­sagutta ilinniar­titsissutit pingaarnerit taakku upperisariaqarpagut. Assersuutigalugu Paulusi allappoq toqusunit makititaaneq pillugu ilinniar­titsissummik upperin­nikkusun­ngitsut kristumiutut upperneq tamaat itigartittaraat. (Kor 1. 15:12-14) Tunngaviusulli naammaginagit suli ilinniar­tuartariaqarpugut. Anersaakkut nerisassat tamuasarissat tassaagin­nanngillat Jehovap inatsisai, aammali tassaapput najoqqutassiai. Taakkulu iluaqutigalugit Jehova qanoq isumaqarnersoq paasisin­naavarput. Nerisassat taakku iluaqutigis­sagutsigit Biibilimik misissueq­qissaar­tariaqarpugut, atuakkagut eqqarsaatigeq­qissaar­tariaqarpagut sapinngisatsinnillu ilikkakkagut maleruarlugit. Taamaalilluta sungiusarlutalu Jehovap iluarisaanik aalajangiinissarput ilikkas­savarput. w24.04 5 § 12-13

Jehovap Juuna eqqaasippaa Niinivimiut ‘talerpimmik saamimmillu paatsiveqar­titsinngitsut’, tassa eqqortumik eqqunngitsumillu immikkoor­titsisin­naanngitsut. (Jon 1:1, 2; 3:10; 4:9-11) Jiisusip kingusin­nerusukkut Jehovap naapertuil­luarnera nallittuineralu pillugit ilinniar­titsilluni Niinivimiut eqqaavai. Niinivimiut ‘eqqartuus­sinermi makititaanissaat’ qanoq isumaqarpa? Jiisusip ukiuni 1.000-ni naalakkersuinerani toqusimasunik “naapertuil­luartunik naapertuil­luanngitsunillu” makititaasoqassaaq. (ApS 24:15) Tamatuma nalaani Jiisusip oqarneratut naapertuil­luanngitsut makititaasut eqqartuun­neqassapput. (Joh 5:29) Eqqartuun­neqarnissaat isumaqarpoq taamanik­kussamut pissusilersornerat ilikkak­kaminnullu qanoq qisuariarnerat Jehovap aamma Jiisusip nakkutigalugillu nalilersorumaaraat. Niinivimiu toqusunit makititaasoq Jehovamut kiffartoruman­ngikkuni inuuinnar­tinneqar­navianngilaq. (Es 65:20) Kisianni Jehova guutisiorfiginiarlugu aalajangertut tamarmik naassaan­ngitsumik inuusin­naatitaassapput! – Dan 12:2. w24.05 5 § 13-14

Jiisusip Ataatami nallittuinera ilaaqqis­saarpaa. (Joh 14:9) Jiisusip oqaasiinit iliuusiinillu ilinniarparput Jehova nallittuisuullunilu inuit ajortiliusut asagai ikiorusukkaalu. Inuit ajortulioq­qajaasartut allannguerusuler­nissaannut imminullu malinnit­tunngor­nissaannut Jiisusip ikiortarpai. (Luk 5:27, 28) Jiisusip nalunngilaa inuunini pilliutigiumaarlugu. Ataasiaannarani malinnitsini oqarfigai akeqqanut pisinneqarumaarluni qisummilu naalliutsitsiviliami toqunneqarumaarluni. (Mat 17:22; 20:18, 19) Nalunngilaa pilliutini inuit ajortiliunerannik peersitsiumaartoq. Jiisusip aamma ilinniar­titsissutigaa inuunini pilliutigereeruniuk ‘inuit tamalaat imminut qanillisis­sallugit’. (Joh 12:32) Inuit ajortiliusut Jiisusip naalakkamissut akuerineratigut maligas­siaanillu ilaarsinermikkut Jehova nuannaar­tissinnaavaat. Taamaaliorunik kiisami ‘ajortimut inussiaajun­naarsin­neqassapput’. (Rom 6:14, 18, 22; Joh 8:32) Taamaammat Jiisusi kajumilluni sapiillunilu ajorluin­nartumik toqujumavoq. – Joh 10:17, 18. w24.08 5 § 11-12

Ilumoortut Biibilimeersut ilinnialeq­qaarakkit qanoq misiginerlutit eqqarsaatigiuk. Paasivat Ataataqarlutit qilammiusumik ilinnik asannittumik aamma taassuma kissaatigigaa ilaqutariis­sortaminut ilaalis­sasutit. Aamma anniarneq naalliuutillu atuukkun­naarsissagai, asasatit toqukkut annaasimasatit paratiisimi takoqqin­nissaannut periarfis­saqarsin­naasutit nuannersorpassuillu allat paasivatit. (Mak 10:29, 30; Joh 5:28, 29; Rom 8:38, 39; Saqq 21:3, 4) Ilumoortut taakku qamuuna killitsis­sutigingaarpatit, ilaa? (Luk 24:32) Ilikkak­katillu nuannaringaarakkit kikkut tamaasa oqaluttuuk­kusuttalerpatit! (Aamma takuuk Jeremia 20:9). Biibilimi ilumoortut pigiliullugit nuannaril­luinnaleraangatsigit nipangersimaannarneq ajorpugut. (Luk 6:45) Jiisusimit ilinniartitat ima oqartut assigalugit misigivugut: “Takusagut tusakkagullu eqqartorun­naarsin­naanngilagut.” (ApS 4:20) Biibilimi ilumoortut nuannaringaaratsigit taakku pillugit kikkut tamaasa oqaluttuuk­kusuttarpagut. w24.05 15 § 5; 16 § 7

Ataatarput qilammiusoq asagatsigu inoqatigullu taassuminnga ilisarisiman­nilernis­saannik ikiorusuk­katsigit oqaluus­siffigisarpagut. Ilaasali oqaluus­sinissartik unamminiar­nartittarpaat. Sooq taamaappa? Ilaat ittuutupput, ilaallu misigisarput ilinniar­titsillaq­qissuunatik. Ilaasa qaaqquneqaratik kasuttornissaq nuannarineq ajorpaat. Imaassin­naavorlu itigartitaanissartik ernumagisaraat. Ilaat akerleriis­suteqarnerit ingalas­simanis­saannut perorsar­neqarsimapput. Qatanngutit taakkua inunnut nalusaminnut oqaluus­sinissartik sapernar­tittarpaat. Misigissutsit eqqartoriikkagut ilisarnarpat? Taamaappat nikalloqinak. Tunuarsimaarnerit maniguut­tuuninnut, malugeq­qusaarusun­nginninnut oqalliseqateqarusun­nginninnullu ersiutaasinnaavoq. Kialuunniimmi, pingaartumik allanut ajunngitsulior­niarnermi, itigartitaanissani nuannarineq ajorpaa. Ataatavit qilammiusup unamminiar­nartitatit ilisimavai, ikiorusup­paatillu. – Es 41:13. w24.04 14 § 1-2

Biibilimi atuakkatit tamaasa ataatsikkut maleruar­niarsarinagit piviusorsiortumik anguniagaqarsin­naavutit. Immaqa imaaliorsin­naavutit: Sulissutissatit allattukkit. Taava ataaseq marlulluunniit toqqariarlugit sulissutigeq­qaakkit, sinnerilu kingusin­nerusukkut sulissutigalugit. Suna aallartis­sutigissaviuk? Immaqa anguniagassaq sapernar­tinngisat aallartis­sutigisinnaavat. Imaluunniit ingerlaannaq sulissutigineqartussaq aallartis­sinnaavat. Suna sulissutigis­sanerlugu aalajangereerukku atuagas­siaatigut misissorsin­naavatit. Anguniakkat pillugu qinugit Jehovalu qinnuigalugu ‘piumassuseqalersin­naaqqullutit pissatsil­lutillu’. (Flp 2:13) Taava ilikkakkatit maleruar­niartakkit. Anguniakkat siulleq angoreerukku anguniakkavit allap angunissaanut piumassuseqar­nerulis­sagunarputit. Tamannalu allannguiuar­nissannut kajumis­sissutigisinnaavat. w24.09 6 § 13-14

Allat anniaatigisaannik siornatigut iliuuseqarsimaguit immaqa ilerasullutit artorsaateqarputit. Suna iluaqutaasinnaava? Aaqqiiniarlutit sapinngisannik iliuuseqarit, aamma aliasutsitatit ajuusaarninnik paasitil­lugillu ersersitsivigikkit. Jehova qinnuigiuk ikioqqullugit. Taassumami tamassi kiffartor­tuarsin­naaqqullusi eqqissisis­sinnaallusilu ikiorsin­naammasi. Kukkussutigisimasatit ilinniutigisakkit qanorluunniillu Jehovamit suliassin­neqarnissannut piumassuseqarlutit. Pruffiiti Juuna eqqarsaatigiuk. Guutip peqqussutigisaatut iliornani kangianut Niinivimut aallarnani kitaanut Tarshishimut qimaavoq. Jehovap oqaaqqis­saarmani Juunap kukkussutigisani ilinniutigaa. (Jon 1:1-4, 15–2:1, 8-11) Jehovap Juuna atorsin­naanngitsutut isiginagu oqarfigeqqippaa Niinivimukassasoq, Juunalu ingerlaannaq naalappoq. Peqqissimis­sutigisaminik kukkussutigisimasani Jehovamit suliassin­neqaqqin­nissamut akornutaasutut isiginngilaa. – Jon 3:1-3. w24.10 8-9 § 10-11

Jehovap akiitsugut isumakkiigin­narnagit piiartarpai. Takorloorsin­naavarput akiitsut isumakkeer­neqaraangamik krydsiler­neqartartut, kisitsisilli suli takuneqarsin­naapput. Piiaanerli allaaneruvoq. Itsaq pilikki atorneqartartoq svampimik masattumik nunguter­neqariaan­naasarpoq. Tassa akiitsut piiarneqartut nunguter­neqarluin­nartarput. Akiitsut allanneqarsimagaluartut takuneqarsin­naajunnaartarput, soorlu piusiman­ngitsut. Jehovap ajortuliagut isumakkiigin­narnagit piiarluin­nartarmagit uummatikkut kissaammernaq, ilaa? – Tuss 51:11. w25.02 10 § 11

Allat uagut pilluta eqqunngitsumik isummerpata ajortumil­luunniit pippatigut Jehovap susoqarnersoq nalunngikkaa tuppallersaatigisin­naavarput. Jehovap pisunik aaqqiiumaarnera upperigutsigu eqqunngitsumik pineqar­nitsinni isumalluarsin­naassaagut. Jehovamut isumagisas­sanngor­titsinikkut kamannermik uumigin­ninnermillu iperaasin­naavugut. Kamattuarneq qisuariapiloornermik, nuannaarun­naarnermik Jehovamullu attaveqarnermut ajoqusiinermik kinguneqarsinnaavoq. Soorunami kukkunata Jiisusip maligassiaa maleqqis­saarsin­naanngilarput. Ilaannikkummi peqqissimis­sutigisatsinnik oqaaseqar­toorlutalu iliuuseqar­toortarpugut. (Jaak 3:2) Eqqunngitsumilli pineqarnitta ilaat misigis­sutsikkut timikkullu anniaatigiuarsin­naavagut. Taama eqqugaasimaguit aqqusaakkannik Jehovap takunninnera tuppallersaatigisinnaavat. Aamma Jiisusip eqqunngitsumik pineqarnermi naalliuuteqarsimasup misigis­sutsitit paasisinnaavai. (Hebr 4:15, 16) Jehovap eqqunngitsumik pineqar­nitsinni naammagit­tarnissamut iluaqutis­satsinnik siunnersormatigut qujamasunnaqaaq. w24.11 6 § 12-13

Inuk naassaan­ngitsumik inuussaguni Jiisusimut uppertuusariaqarpoq. (Joh 3:16-18, 36; 17:3) Juuterpassuit akueriuman­ngilaat Jiisusi upperisariaqarlugu. Ima aperivaat: “Upperinias­sagatsigit takusas­satsinnik qanoq tupinnar­tuliussavit?” (Joh 6:30) Taava eqqaavaat Moorsisip nalaani Guutip innuttani mannanik tunisarai. (Neh 9:15; Tuss 78:24, 25). Erserpoq nerisas­sinneqar­nissartik suli eqqarsaatigigaat. Jiisusilu oqarmat Guutip ‘nerisassanik ilumoortunik’ – naassaan­ngitsumik inuuneqalersitsisunik – qilammit tunigai aperinngilaat tamanna qanoq isumaqarnersoq. (Joh 6:32) Timikkut pisariaqar­titatik pingaar­nerpaatik­kamikkit Jiisusip anersaakkut ittut pillugit ilinniar­titsissutigisaa tusaruman­ngilaat. w24.12 5-6 § 10-11

Immaqa meeqqat pinngortitami ilusilersukkat pillugit atuarfimmi ilinniassaaq. Assersuutigalugu nittaallat geometriimut naapertuuttumik ilusilersugaapput, tamannalu fraktalimik taaneqartarpoq. Fraktalimik ilusillit aamma pinngortitani allani takuneqarsin­naapput. Kiali ilusilersukkat kusanartut taakku torersumik ilusilersorpai? Kia pinngortitap inatsisai atuutilersippai? Meeqqap tamakku eqqarsaatigeq­qissaarunigit qularnan­ngitsumik Guutip tamanik pinngor­titsisuunera upperinerulissavaa. Perorneruguni aamma paasilissavaa Guutip inatsisai nammineq naalassallugit. Ima aperisinnaavat: “Guutip pinngor­tissimagunisigut qanoq pilluar­nartumik inooriaaseqarsin­naanersugut siunnersus­sanngin­nerpaatigut?” Taava eqqaasinnaavat Guutip Biibili aqqutigalugu nassuiaak­kaatigut qanoq pilluarsin­naasugut. w24.12 16 § 8

Jehovap Paulusi isumassarsisillugu allatsippaa ajortuliortoq peqqissimin­ngitsoq ilagiinnit peerneqassasoq. (Kor 1. 5:13) Taava ilagiin­niittut qanoq iliussappat? Paulusip allaffigai “ilagisarun­naaqqullugu”. Imalu nangippoq: “Aap, nereqatigis­sanngilarsiluunniit.” (Kor 1. 5:11) Sooq? Nereqatigisarunikku ikinngutigiittut oqaloqatigiittarneq peqatigiit­tarnerlu attatiin­nassagamikku. Ilagiilli angut taanna ilagisarun­naarunikku qanoq iluaqutigissavaat? Ajortumik sunnertin­nginnissamut illersuutigissavaat. (Kor 1. 5:5-7) Tamatumalu saniatigut ilagisarun­naarmanni angutip immaqa paasilissavaa Jehova aliasutsis­simallugu iliuuserisimasanilu peqqissimis­sutigilerlugu. w24.08 15 § 4-5

Israalikkut ulloq saammaan­nartitsivik ukiumoortumik nallius­sisarpaat. Ullormi tamatumani palasiuneq inuit sinnerlugit uumasunik pilliuteqartarpoq. Uumasut inunnit pingaaruteqan­nginnerummata taakkua pilliutiginissaat ajortulianik matussusiil­luinnarsin­naanngillat. Israalikkulli peqqissimillutik Jehovap piumasaqaataatut pilliigaangata ajortaannik kajumilluni isumakkeerfigisarpai. (Hebr 10:1-4) Israalikkut ullormi saammaan­nartitsivimmi ajortiliunerminnik eqqaasin­neqartarput. Inuilli ajortuliaminnik isumakkeerfigineqar­nissaat Jehovap qanoq ajornarun­naarsippaa? Ernermi asasami ‘inuppassuit ajortuliaat nammakkumallugit ataasiaammik imminut pilliutiginissaanut’ pilersaarusiorpoq. (Hebr 9:28) Jiisusip ‘inuunini amerlasuut utertin­neqaatis­saattut akiliutigaa’. – Mat 20:28. w25.02 4 § 9-10

“Soorunami siunertarineqartoq ajunngitsuuvoq, timili sanngiippoq.” (Mat 26:41b) Taamatut oqarami Jiisusip paasilluin­narsimavaa naammal­luinnan­ngissuserput pissutigalugu kukkusarumaartugut. Oqaasiili aamma mianersoq­qussuteqarput: Imminut tatigival­laalissan­ngilagut. Akunnialuit sioqqullugit ilinniartitat imminut tatigalutik neriorsuisimapput Jiisusi qimanngisaan­narniarlugu. (Mat 26:35) Eqqortumik iliuuseqarusupput. Taamaak­kaluartorli paasinngilaat tatineqarnermi eqqortumik iliuuseqarusun­nissamut aalajangius­simasaraluartik eqqortin­ngitsooriataarsin­naallugu. Taamaattumik Jiisusip ullormut allassimaffimmi allassimasutut mianersoqquai. Ajoraluartumik ilinniartitat eqquman­ngitsoorput. Jiisusi tigusarineqarmat qanoq pippat? Najuinnarpaat, imaluunniit annilaangaleramik qimaappat? Eqquman­ngitsooramik qimanniarnagu oqaraluarlutik Jiisusi qimappaat. – Mat 26:56. w24.07 14 § 1-2

Inuit siulliit Ataataminnut Jehovamut attaveqarun­naarlutik taassumunnga akeranngorput. Adami Evalu Jehovap ilaqutariis­sortaanut ilaagaluarput. (Luk 3:38) Meeqqiun­nginnerminnili Jehovamut naalannginnamik ilaqutariis­sortaanit avissaar­titaapput. (Mos 1. 3:23, 24; 4:1) Kinguaavi kikkulluunniit, aamma uagut, Jehovap ilaqutariis­sortaanut ilaasin­naanngillat. Taamaattumik Jehovamut akeraajun­naarluta taassumunnga attaveqarluas­sagutta ikiorneqar­tariaqarpugut. (Rom 5:10, 11) Tupinnaan­nartumillu tamanna piniassammat Jehova siulliulluni iliuuseqarpoq. Qanoq iliorami? Inuit ajortillit imminut qanimut attaveqaler­niassammata saammaan­nartitsivoq. Tassa Adamip annaasaa utertik­kumallugu nalinganik pilersitsivoq. w25.02 3-4 § 7-8

Paulusi allappoq: “Amerlanersassi angummik taassuminnga naqqiinerat naammappoq.” (Kor 2. 2:5-8) Allatut oqaatigalugu perorsaatis­siinerup siunertaatut pisoqarpoq, angummut siornatigut ataatami nuliaanik atoqateqar­tarsimasumut sunniuteqarsimavoq. (Kor 1. 5:1) Tassami ajortuliortup ilagiinnit peerneqarnermi kingorna paasivaa peqqissimisariaqarluni. (Hebr 12:11) Paulusip ilagiit paasitippai angut peqqissimigami ilagiinnut utersinnaasoq. Imalu allaffigai: “Ilumoorlusi isumakkeerfigalugulu tuppallersas­savarsi”, aamma: “Asannin­nissinnik uppernarsaavigeq­qullugu kajumis­saarpassi.” Maluginiaruk Paulusip kissaatigigaa qatanngutit iliuutsimikkut oqaatsimikkullu ersersissagaat ilumoorlutik isumakkeerfigisimallugu asallugulu. Taamaalillutik ersarissumik paasitis­sinnaavaat ilagiinnut uternera nuannaarutigigitsik. w24.08 15 § 4; 16-17 § 6-8

Paulusip pinertusaar­nissamut suna pisariaqarnersoq qularuteqan­ngivilluni eqqartorsinnaavaa. Kristumiut eqqaasippai misilin­neqartillutik imminut pinnatik Jehova tatigissagaat. Paulusi isumalluarluni ima oqarsinnaavoq: “Jehova ikiortigigakku annilaangas­sanngilanga. Inuup qanoq iliorfigisin­naagaminga?” (Hebr 13:6) Maannak­korpiaq qatanngutitta ilaat malersugaanerminni pinertusaar­niarsaripput. Uagullu taakkununnga asanninnerput ersersis­sinnaavarput qinnuttar­nerisigut immaqalu pisariaqar­titaannik ikiortarlugit. Biibilimi ersarissumik allassimavoq ‘Guutimut tunniusimallutik Kristusimillu Jiisusimik ataasioqateqarlutik inuujumasut tamarmik aamma malersor­neqassasut’. (Tim 2. 3:12) Tassa tamatta qanoq pisoqar­nissaanut piareersimasariaqarpugut. Taamaattumik pisarnitsitut Jehova tatigiuartigu misilin­neqarnitsinni tamani pinertusaar­nissatsinnik ikiorumaaraatigut upperalugu. Piffissan­ngorpat kiffami aalajaatsut naalliuutaat peerluin­nassavai. – Tes 2. 1:7, 8. w24.09 12-13 § 17-18

Korintimiut imermut morsutsitaanis­saminnut suna iluaqutigaat? (Kor 2. 10:4, 5) Guutip oqaasianit anersaavanillu illernartumit pissatsin­neqarlutik inooriaatsiminnik allannguerujus­suarput. (Hebr 4:12) Korintimiut ilaat imerajut­tuusimagaluarput, pinerlut­tuusimagaluarput suiaqatiminnillu atoqateqar­tartuusimagarluarlutik. Kristusili pillugu tusarliussaq nuannersoq paasigamikku taamatut inooriaaseqarun­naarput. (Kor 1. 6:9-11) Korintimiut ilaat akiugas­saminnik sivisuumik ileqqupalaaqarsimagaluarlutik isummin­ngillat kristumiun­ngorsin­naanatik. Allannguerujus­suarlutik naassaan­ngitsumik inuunissamut aqqutikkut nerukitsukkut ingerlaniarlutik tamaviaarput. (Mat 7:13, 14) Illit imermut morsutsitaanissamut piukkunarsar­niarninni ileqqupalaamik qaangeruminaatsitannik akiugaqarpit? Taava tunniutiin­naqinak! Jehova qinnuigiuaruk anersaava illernartoq ilinnut tunniuteq­qullugu. Ajortulior­nissamut ussernar­torsiulissaguit nakkaan­nanngin­nissamut pissatsin­neqassaatit. w25.03 6 § 15-17

Jehovap neriorsorpaatigut ilisimas­susermik tunissalluta. Aalajangiineq aalajangersimasoq iluarinerlugu paasinias­sagatsigu ilisimas­susermik “isornar­torsiuinani tamanut tukkorluni” tunissuteqartarpoq. Qinunikkut Jehovamut ikioqqoreeruit akissutaa eqqumaf­figilluaruk. Assersuuteqariarta: Nunami allami angalatillutit tammaruit angalaf­figisanni najugaqartumut ikioqqusin­naavutit. Taavali suli akissuteqan­ngitsoq ingerlaan­nassavit? Soorunami naamik. Akissutaanut tusarnaaq­qissaassaatit. Taamatuttaaq Jehovamut ilisimas­susermik tuneqqullutit qinoreeraangavit Biibilimi inassutit najoqqutassiallu suut atukkannut naleqqunnersut misissor­nerisigut akissutaa paasiniartaruk. Assersuutigalugu katerisimaarnermut ilaassanerlutit aalajangiileruit pitsaassaaq uku pillugit Biibilimi allassimasut eqqarsaatigigukkit: Ingasattumik festerneq, ileqqorluttunik ilagisaqartarneq aamma Guutip kunngeqarfiata nammineq kissaatigisanniit salliut­tuarnissaa. – Mat 6:33; Rom 13:13; Kor 1. 15:33. w25.01 15-16 § 6-7

Anersaakkut paratiisimiittut atugaat tassaniin­ngitsut atugaannit allaanerul­luinnarnerat Esajap siulittuutaani allaatigineqarpoq. Jehovap kiffani imminut qanimut attaveqarsin­naaqqullugit anersaakkut pisariaqartitaat naammat­torsuarmik isumagil­luartarpai. Anersaavanik illernartumik tunineqaratta, Biibileqaratta anersaakkullu inuussutis­sarpassuaqaratta ‘nerillutalu imerlutalu nuannaarsin­naavugut’. (Aamma takuuk Saqqummersitat 22:17). Anersaakkut paratiisimiin­ngitsut allaanerul­luinnartumik atugaqarput. Taakkumi ‘kaallutillu imerusul­lutillu kanngusutsin­neqarput’. Jehova nalugamikku anersaakkut pisariaqartitaat matussuser­neqarneq ajorput. (Am 8:11) Jehovap tukkorluni pisariaqar­titatsinnik tamanik tunisarpaatigut. (Joel 2:21-24) Assersuutigalugu Biibili, Biibililersaarutigut, nittartagarput aamma ataatsimiinnerit ataatsimeersuar­nerillu aqqutigalugit isumassorluar­tarpaatigut. Ullut tamaasa anersaakkut inuussutissat pisarsin­naavagut, taamaat­tumillu anersaakkut peqqillutalu nakussatsin­neqartarpugut. w24.04 21 § 5-6

Ilisarisimanerulerusutat qanoq paasitis­sinnaaviuk soqutigalugu? Allanit takuneqarsin­naasumiillusi imaluunniit oqarasuaatikkut oqaloqatiginissaa pilersaarusiorsinnaavat. Ersarissumik oqaluttuuguk soqutigisaralugu ilisarisimanerulerusullugulu. (Kor 1. 14:9) Imaassinnaavoq qanoq pissanerluni eqqarsaatigeq­qaarusukkaa. (Uss 15:28) Peerariiler­nissarsilu kissaatigin­ngippagu ataqqiuk. Taavami arlaata oqarfigippatit soqutigalutit? Ilinnut saaffigin­ninnissaminut sapiiserunarmat inussiar­nersuugit ataqqin­nillutillu. Peerarilerusun­nerlugu eqqarsaatigeq­qaarusullugu oqarfigisinnaavat. Piaarnerpaamilli ilisimatiguk. (Uss 13:12) Peerarilerusun­ngikkukku ersarissumik inussiar­nersumillu oqarfigiuk. Kisianni ilisarisimanerulerusukkukku qanoq misiginerlutit oqarfigiuk, aamma immissinnut peerariin­nissinnullu qanoq naatsorsuuteqar­nerlusi eqqartuigitsi. Eqqartor­nissaat pingaaruteqarpoq assigiin­ngitsunik naatsorsuuteqarsin­naagassi. w24.05 23 § 12-13

Daavi suli inuusut­tuaraagunarluni Israalikkut sakkutuuisa tammaarfian­nukarpoq. Inorujussuup filisterip Goliatimik atillip ‘Israelip sakkutuui kanngunarsar­niarlugit’ suaartarmatik annilaangasorujus­suupput. (Sam 1. 17:10, 11) Ajoraluartumik Goliatip angissusersuanut oqaasiinullu ersinermik susinnaajun­naarput. (Sam 1. 17:24, 25) Daavili allamik isiginnit­taaseqarpoq. Israalikkut sakkutuuinut sassussiin­narnertut isiginagu ‘Guutilli uumasup sakkutuuinik’ inukkutigin­nilluni unammil­lernertut isigaa. (Sam 1. 17:26) Daavip pingaarnertut Jehova eqqarsaatigaa. Savanik paarsisuulluni ikiorsimammani Daavip Jehova tatigil­luinnarpaa pisumi aamma tassani ikiorumaaraani. Jehova ikiortigalugu Daavi Goliatimut saassussivoq – ajugaallunilu! – Sam 1. 17:45-51. w24.06 21 § 7

Jehovamut kiffartulersiman­ngitsuugutta inuunitta allaanerusimas­sagaluarnera eqqarsaatigisin­naavarput. Tamanna aalajaan­nissamut iluaqutigis­savarput. Aamma tussiaasiortutut ima oqarusussaagut: “Guuti qanillugu inuuneq tassa pilluar­nartora.” (Tuss 73:28) “Guutimut uumassuseqartumut ilumoor­tumullu” kiffartoratta ulluni kingullerni makkunani qanorluunniit misilin­neqassagaluarutta pinertusaarsin­naavugut. (Tes 1. 1:9) Guutitta isumassorlutalu tamatigut ikiorumaarpaatigut. Itsaq kiffani najorpai, uagullu ikiorluta najorpaatigut. Qanittukkut inuit oqaluttuarisaaneranni asseqan­ngitsumik annikil­liornar­tussarsuaqassaaq. Kisimiin­navianngilagulli. “Isumalluarluta oqarsin­naavugut: ‘Jehova ikiortigigakku annilaangas­sanngilanga.’” – Hebr 13:5, 6. w24.06 25 § 17-18

Israalimi kunngiusimasut 40-t sinnerlugit Biibilimi oqaluttuarineqarput. Kunngit ajunngitsut ilaannikkut ajortumik iliuuseqartarput. Daavi kunngiul­luartoq pillugu Jehova ima oqarpoq: ‘Kiffara Daavi uummatimigut iluunngarluni uannik malinnippoq tamatigut uanga isinni eqqortuusumik iliuuseqarluni.’ (Kng 1. 14:8) Daavilli arnaq uilik allasiorfigaa uialu sorsunnermi toqutaatillugu. (Sam 2. 11:4, 14, 15) Aammali kunngit ajortut ilaasa ajunngitsulior­tarnerat Biibilimi oqaluttuarineqarpoq. Assersuutigalugu Rehabeammi Jehovap isaani “ajortumik inuuseqarpoq”. (Nal 2. 12:14) Kisianni Rehabeammi aamma ajunngitsuliortarpoq. Assersuutigalugu Jehovamit peqquneqarami Israalip naggueqatigiissortai qulit allamik kunngeqarusuttut sorsuffigis­sanngikkai naalappoq. Aamma inuiaat iluaqutigisaannik illoqarfiit ilaat pallitaalisaliorpai. (Kng 1. 12:21-24; Nal 2. 11:5-12) Suna tunngavigalugu Jehovap nalilertarpaa kunngi aalajaannersoq? Uummat tamakkerlugu kiffartor­tarnersoq, ajortuliani peqqissimis­sutigisarnerai guutisiornerlu ilumoortoq aalajangiusimaneraa tunngavigalugit naliliisarsimavoq. w24.07 20 § 1-3

Taavami imermut morsutsitaasimasoq 18-t inorlugit ukiulik ingasattumik ajortuliorsimappat? Utoqqaanertat marluk inuusut­tuaqqamik angajoq­qaavinillu kristumiunik naapeqateqar­nissaat utoqqaaner­taqatigiit isumagissavaat. Utoqqaanertat paasiniassavaat angajoqqaat meerartik peqqissiminissamut ikiorniarlugu qanoq iliorsimasut. Inuusuttuaraq taanna angajoqqaami oqaaqqis­saarutaannut tusarnaarpat ajunngitsumillu isiginnit­taaseqarpat utoqqaanertat marluk taakku aalajangersin­naapput allanik iliuuseqar­niarnatik. Angajoqqaammi meeqqaminnik asannittumik perorsaanis­saminnik Jehovamit akisussaaf­filerneqarput. (Mos 5. 6:6, 7; Uss 6:20; 22:6; Ef 6:2-4) Utoqqaanertat ilaannikkut angajoqqaat aperisin­naavaat inuusuttuaraq pineqartoq pisariaqar­titaminik ikiorneqar­tarnersoq. Taavami inuusuttuaraq imermut morsutsitaasimasoq peqqissiminani ingasattumik ajortulior­tuarpat? Taamaappat utoqqaanertat pingasut taanna angajoq­qaavilu kristumiut ataatsimeeqatigissavaat. w24.08 24 § 18

Tamatta tunisik­kaangatta nuannaar­tarpugut. Uagulli tunnius­saqaraangatta nuannaar­neruler­tarpugut. Jehovap taama pinngor­tikkamisigut nammineq pilluar­nissatsinnut sunniinissamut periarfis­sippaatigut. Tassa allanut tunisinissamut asannit­tuliornis­samullu periarfis­sarsiorutta nuannaar­nerulersin­naavugut. Taama pinngor­titaagatta tupinnangaarpoq, ilaa? (Tuss 139:14) Biibilimi paasitin­neqaratta tunisineq pilluar­narnerusoq tupinnanngilaq Jehova ‘Guutitut pilluartutut’ allaatigineqarmat. (Tim 1. 1:11) Jehova tunisisut siullersaraat, aamma allanut naleqqiullugu Jehova tunisinerpaajuvoq. “Taannami pissutigalugu inuullutalu aalallutalu maaniippugut”. (ApS 17:28) Ilumut, “tunissutit ajunngitsut naammal­luinnartullu tamarmik” Jehovameersuupput. (Jaak 1:17) Ilimanarpoq tamatta tunisinerup pilluarnartua suli misiginerorusut­taripput. Jehovallu tunisiumatunera ilaarutsigu tamanna piviusun­ngorsinnaavoq. – Ef 5:1 w24.09 26 § 1-4

Ilagiinni kiffartortut utoqqaanertanut piumasaqaatit misissoreerlugit ilaat immaqa ajukkullutik qaqugumul­luunniit utoqqaaner­tanngorsin­naanaviarnatik misigisin­naapput. Eqqaamajulli Jehovap peqatigiis­sortaasalu naatsorsuutigin­ngikkaat kukkujuitsuus­sasutit. (Jaak 3:2) Jehovallu anersaavata asseqan­ngitsup piumasaqaatinik eqqortitsinissannut ikiussavaatit. (Flp 2:13) Piumasaqaatit ilaat aalajangersimasoq sulissutigerusuppiuk? Tamanna pillugu Jehovamut ikioqqugit. Sulissutigerusutat nammineq misissoq­qissaaruk, aamma utoqqaanertat ilaat aperiuk inuttut qanoq piukkun­narnerulersin­naanerlutit. Anersaakkut siumukartuarit! Jehova qinnuigiuk ilinniar­teqqullutit ilusilersoq­qullutillu, taamaalillutit taassumunnga ilagiinnullu iluaqutaal­luarnerulissaatit. (Es 64:7) Qularis­sanngilat Jehovap utoqqaaner­tanngor­nissannut piukkun­narsiniarlutit ilungersornerit pilluaq­qussagaa. w24.11 24-25 § 17-18

Isumaqas­sanngilagut ukiorpassuarni Jehovamut kiffartorsimagatta taassumannga isumakkeerfigineqar­nissatsinnut pisinnaatitaalluta. Soorunami aalajaatsuunerput Jehovap maluginiarlugulu nuannaarutigisarpaa. Erninili tunissutitut tunniuppaa, imaanngilaq imminut kiffartor­nitsinni iliuutsigut pillugit akilerluta. Taamaattumik isumaqarutta nallittor­neqarnissarput imaluunniit immikkut ittumik pineqar­nissarput pisinnaatitaaf­figalugu assigiin­nassavaa oqartugut Kristusi asulersuaq toqusimasoq. (Aamma takuuk Galaatiamiut 2:21) Paulusip nalunngilaa Jehova pillugu qanorluunniit iliuuseqar­tigigaluaruni isumakkeerfigineqar­nissani pisinnaatitaaf­figinagu. Taavami sooq Jehovamut kiffartor­nermini ilungersorpa? Jehovap ajunngisaangaarnera pillugu qujamasunnini ersersin­niarlugu, imaanngitsoq isumakkeerfigineqar­nissani qulakkeer­niaramiuk. (Ef 3:7) Paulusitulli aallussil­luarluta kiffartor­tuarpugut, Jehovap isumakkeerfigin­ninnera pillugu qujamasunnerput ersersin­niarlugu. w25.01 27 § 5-6