Maaji

Jehovap innuttani Egyptenimit inussiaataajun­naarsereerlugit taakkua ilaat Tupermi Naapeqatigiit­tarfimmi palasitut kiffartor­tunngortippai. Aamma Levikkut illernar­tuummut tunngatillugu suliassin­neqarput. Tassani kiffartortut imaluunniit Toqqup Naapeqatigiit­tarfiup eqqaani tammaartut Jehovamit isumagineqarluar­neruppat? Naamik! Jehova kinaassusersior­tuunngilaq. Israalikkut tamarmik Jehovamik qanimut ikinnguteqar­nissamut assigiimmik periarfis­saqarput. Assersuutigalugu tamarmik Toqqup Naapeqatigiit­tarfiup qulaani tupinnar­tuliornikkut nuiaqar­neranik takunnis­sinnaanerat Jehovap isumagaa. (Mos 2. 40:38) Nuiaq allamut saakkaangat allaat ungasissumi tammaartut tamanna takusin­naavaat. Taava pigisatik tupertillu poortoriarlugit inuiaqatigiit sinneri ingerlaqatigisin­naavaat. (Mos 4. 9:15-23) Aamma nalitsinni sumiluunniit najugaqaraluarluta tamatta Jehovap asanninnera, isumassuinera illersuineralu iluaqutigisin­naavagut. w24.06 4 § 10-12

Daavi navianar­torsior­tinneqarpoq. Ernerata Absalomip kunngin­ngorumalluni Daavi toqunniarsaraa. (Sam 2. 15:12, 13) Daavi Jerusalemmimit qimaapal­lattariaqarpoq! Kiffanilu qimaatillutik Daavip paasivaa Absalomi qanoq pilersaaruteqarnersoq paasinias­saguniuk kiffami ilaat Jerusalem­mimiigin­nartariaqartut. Taamaattumik Sadoki palasillu allat paasissutis­siisartussatut Jerusalemmimut utertariaqarput. (Sam 2. 15:27-29) Taakkuli mianersungaar­tariaqarput. Sadokip saniatigut Daavip aamma ikinngutini ilumoorfiginnittoq alla, Hushaji, aperaa ikiorsin­naaneraani. (Sam 2. 15:32-37) Daavip pilersaarusior­neratut Hushajip Absalomi tapersersor­tuusaarlugu siunnersuutigaa qanoq Daavi saassun­neqassasoq, siunnersuutaalu Daavip saassun­neqarnis­saminut piareersar­nissaanut periarfissiivoq. Kingorna Hushajip Sadoki Ebjatarilu paasitippai qanoq pisoqassasoq. (Sam 2. 17:8-16) Angutillu taakkua marluk Daavimut oqariar­tortitsisoqarnissaa isumagaat. Daavip inuuneranik illersuinermi pingaarutilimmik iliuuseqarsimapput. – Sam 2. 17:21, 22. w24.07 4-5 § 9-10

Jehovamut kiffartortut ilaat siornatigut, imermut morsutsin­neqarnermik siorna kingornaluunniit, ajortuliarisimasatik pillugit artorsangaarput. Taamatut misigiguit eqqaamajuk Jehovap uagutsinnik asanningaarnini pissutigalugu ernini akiliutigalugu utertik­kaatigut. Qularis­sanngilarput kissaatigigaa tunissut tamanna akueris­sagipput. Jehovap paasitip­paatigut ‘akunnitsinni aaqqitassat aaqqikkutsigit’ isumakkeerfigil­luinnas­salluta. Ataatatta asannittup Jehovap ajortuliarisimasagut eqqaamajun­naartarmagit qujamasuutigeqaarput! Ajunngitsulior­nigullu puiunngisaannarpai. (Tuss 103:9, 12; Hebr 6:10) Ajortuliarisimasatit pillugit artorsaruit maannakkut siunissamilu iliuuserisin­naasatit eqqarsaatigineruniartakkit. Pisimasut allanngor­tissinnaan­ngilatit. Maannakkulli Jehova ataqqiniarlugu iliuuseqarsin­naavutit siunissarlu pillugu neriorsuutaasa eqquunnissaat qilanaaralugit. w24.10 8 § 8-9

Biibilimik atuarninni sulissutis­sarpassuaqarlutit paasigaangakku imaassinnaavoq nikallor­tartutit. Ima pisoqartoq takorlooriaruk: Ullumi Biibilimik atuarninni nakerisarsiorneq mianersoq­qussutigineqarpoq. (Jaak 2:1-8) Allanik pinnittarnerit eqqarsaatigalugu aaqqitas­saqarlutit paasivat. Taava aqaguani versit oqaasissannik mianersuus­sinerup pingaaruteqar­neranik ersersitsisut atuarpatit. (Jaak 3:1-12) Ilaannikkut inussiar­niitsunik nikallor­nartunillu oqaaseqar­tarnerit eqqarsaatigilerpat aalajangerlutillu isumalluar­nartunik ineriar­tornartunillu oqaaseqar­tarnissat eqqumaf­figiniarlugu. Ullut pingajussaanni Biibilimik atuarninni inuit ajortut iliuusiinik nuannarinninneq mianersoq­qussutigineqarpoq. (Jaak 4:4-12) Aliikkutarisar­takkatit mianersor­nerullutit toqqartas­sallugit paasivat. Ullut sisamassaanni misigis­sagunarputit sulissutis­saqangaaravit imminut artorsillutit. Nikalloqinak. Eqqaamajuk kinaassutsip nutaap atiniarnera sulissutigineqar­tuartus­saammat. w24.09 5-6 § 11-12

Jiisusip nalunngilaa naapertuil­luanngitsumik pineqarnini Jehovap takugaa. Upperaalu Jehovap piffissaq eqqorlugu naapertuil­luanngitsuliornerit iliuuseqarfigiumaarai. Eqqunngitsumik pineqarnermi oqaasissatta aqunnerisigut Jiisusi ilaarsin­naavarput. Eqqunngitsumik pinninnerit ilaat annikin­nerupput iliuuseqarfigineqar­tariaqan­ngitsut. Ilaannilu ajornerulersitsiin­narniarnata nipangersimaan­nartariaqarsin­naavugut. (Oqal 3:7; Jaak 1:19, 20) Ilaannikkulli eqqunngitsumik pinninnermik takusaqarutta imaluunniit ilumoortoq illersor­niarlugu oqaaseqar­tariaqarsin­naavugut. (ApS 6:1, 2) Oqaaseqar­niarlutali aalajangerutta sapinngisatsinnik eqqissisimallutalu ataqqin­nittuussaagut. ‘Naapertuil­luartumik Eqqartuus­sisartumut’ isumagisas­sanngor­titsinikkut Jiisusi aamma ilaarsin­naavarput. – Pet 1. 2:23. w24.11 5-6 § 10-12

Ajortuliorsimasoq peqqissimigaangat tamanna nuannaarutaangaartarpoq! (Luk 15:7) Utoqqaanertat iliuuseqangaaraluartut ajortuliorsimasup allannguinera kia ataqqinaatigaa? Eqqaamajuk Paulusi ajortuliorsimasut pillugit ima allassimasoq: “Immaqa Guutip peqqissiminissamut periarfis­sissavai.” (Tim 2. 2:25) Kristumiup isummaminik isiginnit­taatsiminillu allannguinera pillugu Jehova, inuk pinnani, nersorneqassaaq. Paulusip aamma peqqissiminerup kinguneri nuannersut allaatigai. Ajortuliorsimasoq peqqissimisoq ilumoortoq pillugu eqqoqqis­saartumik paasisimasaqalerpoq, silattuaqivoq, Diaavulullu napiarniutaanit aniguivoq. (Tim 2. 2:26) Ajortuliorsimasoq peqqissimippat uppernermigut nakutsatsin­niassammat, ussernar­torsiun­nginniassammat eqqortulior­tuarnias­sammallu utoqqaanertat paarsisutut pulaartassavaat. – Hebr 12:12, 13. w24.08 23 § 14-15

Inupparpassuit aqaguani sumiiffimmut nerisas­sinneqarfigisaminnut uterput. Kisianni Jiisusi apustilillu peqanngitsut paasigamikku Jiisusi ujarniarlugu umiatsiarlutik Kapernaamukarput. (Joh 6:22-24) Inuit Guutip kunngeqarfia pillugu ilikkagaqar­nerorusukkamik taamaaliorpat? Naamik. Timikkut pisariaqar­titatik pingaar­nerpaatippaat. Sooq taama oqarsin­naavugut? Kapernaap eqqaani inuit Jiisusi nanimmassuk qanoq pisoqartoq maluginiaruk. Jiisusip oqarfigai nerisin­neqarusuin­narlutik orniguttut. Naak iffianik-qaqortunik ‘naammatsillutik’ nerigaluartut Jiisusi oqarpoq tamanna ‘nerisassaasoq asiusartoq’. Taamaattumik ‘nerisassaq naassaan­ngitsumik inuuneqalersitsisartoq’ pillugu sulisaq­qullugit kajumis­saarpai. (Joh 6:26, 27) Jiisusi oqarpoq Ataatani tamatuminnga pilersuiumaartoq. w24.12 5 § 8-9

Qatanngutaasutit angut, ilinniar­titsillaq­qissuussaguit tamatigut Guutip oqaasia tunngavigalugu siunnersuil­lutillu ilinniar­titsisassaatit. Biibili Biibililersaarutigullu misissoq­qissaartakkit. (Uss 15:28; 16:23) Allassimaffiit Biibililersaarutitsinni qanoq nassuiar­neqartarnersut maluginiaq­qissaartaruk eqqortumik atorsin­naaqqullugit. Ilinniar­titsigaangavit tusarnaartivit uummataat sapinngisannik killinniartakkit. Aamma utoqqaanertanut misilit­tagaqartunut siunnersoq­qusinnaavutit. (Tim 1. 5:17) Utoqqaanertaq uppeqatiminik qiimmas­saasinnaasariaqarpoq, aammali ilaannikkut siunnersuisariaqartarpoq allaallu oqaaqqis­saarisin­naasariaqarluni. Tamatigulli inussiar­nersuussaaq. Ilinniar­titsiserput Jiisusi ilaarlugu saamasuul­lutillu asannit­tuuguit Biibililu tunngavigisarukku ilinniar­titsillaq­qissuussaatit. – Mat 11:28-30; Tim 2. 2:24. w24.11 24 § 16

Jehova pillugu oqaaseqar­nitsigut ataqqinaatis­sissinnaavarput. Jehova ‘erinarsorfigeq­qullugu’, ‘aqqa unnersiutigeq­qullugu’, ‘annaassinera nalunaajaatigeq­qullugu’ ‘inuiaallu naalannas­susianik oqaluttuuteq­qullugit’ kajumis­saarneqarpugut. (Tuss 96:1-3) Taamaalior­nitsigut Ataatarput qilammiusoq ataqqinaatis­sissinnaavarput. (ApS 4:29) Aamma pigisanik tunissuteqar­nitsigut Jehova ataqqinaatis­sissinnaavarput. Jehovap kiffai tamatigut taamaaliortarput. (Uss 3:9) Assersuutigalugu Israalikkut guutisiorfiup sananeqar­nissaanut aserfal­latsaalineqar­nissaanullu tunissuteqartarput. (Kng 2. 12:5, 6; Nal 1. 29:3-9) Ilinniartitat ilaasa “pigisatik atorlugit” Jiisusi apustilillu isumassor­tarpaat. (Luk 8:1-3) Kristumiut siulliit ilaat kaannersuarmik nalaataqartut uppeqatiminnit aningaasatigut ikiorneqarput. (ApS 11:27-29) Nalitsinni uaguttaaq kajumis­sutsimik tunissuteqar­nitsigut Jehova ataqqinaatis­sissinnaavarput. w25.01 4 § 8; 5 § 11

Korniiliusip imermut morsutsitaanis­saminut suna iluaqutigaa? Biibilimi allassimavoq ‘illuaniittullu tamarmik Guutimik mianerin­nittuusut’ aamma Korniiliusi ‘Guutimut qamannga pisumik qinukulasartoq’. (ApS 10:2) Petrusimit pulaarneqar­nerminni nutaarsiassat nuannersut paasigamikkit Korniiliusip ilaqutaasalu Jiisusi upperilerpaat imermullu morsutsitaallutik. (ApS 10:47, 48) Ilaqutariittut Jehova guutisiorfiginias­sagamikku Korniiliusi kajumilluni pisariaqartunik allannguivoq. (Jos 24:15; ApS 10:24, 33) Korniiliusip qaffasissumik inissisimaf­feqarnini kristumiun­ngornis­saminut akornutigisimasin­naagaluarpaa. Kisianni taamaaliunngilaq. Illimmi, imermut morsutsitaasin­naaqqullutit allannguerujus­suartariaqarpit? Taamaappat nalussanngilat Jehovap ikiorusukkaatit. Kiffartorfiginissaa Biibilimilu najoqqutassiat maleruar­nissaat aalajangiukkukkit pilluaq­qussavaatit. w25.03 5 § 12-13

Guutip peqatigiissortai imaluunniit qatanngutit angutit siuttut pillugit ajortumik tusagaqaruit eqqaamajuk Guutimut akerlilersuisut Jiisusi kristumiullu siulliit qanoq pisimaneraat. Aamma nalitsinni Jehovap kiffai Biibilimi siulittuutigineqar­neratorluinnaq malersor­neqarlutillu salluliuutigineqartarput. (Mat 5:11, 12) Oqaluttuanit ilumuun­ngitsunit tammartin­neqarnavian­ngilagut taakku kiminngaan­neernersut ilisimagutsigu ingerlaannarlu imminut illersor­niarluta iliuuseqarutta. Qanoq illersorsin­naagatta? Oqaluttuat ilumuun­ngitsut itigartikkit. Apustilip Paulusip oqaluttuanik ilumuun­ngitsunik tusagaqarnermi qanoq iliornis­satsinnik paatsuugas­saanngitsumik ilitsersuup­paatigut. Timuutiusi allaffigaa ‘inuit aalajangersimasut peqqusif­figissagai oqaluttuanik ilumuun­ngitsunik pingaar­titsinngin­nissamik’ namminerlu ‘oqaluttuat ilumuun­ngitsut nikassaataasullu itigartissagai’. (Tim 1. 1:3, 4) Oqaluttuat ilumuun­ngitsut itigartit­tarpagut nalunngin­natsigu kiminngaan­neersuunersut. “Oqaatsit ineriar­tornartut” ilumoortullu kisiisa aalajangiusimavagut. – Tim 2. 1:13. w24.04 11 § 16; 13 § 17

Jehovamik ilumoorfiginnittut ataasioqatigiuakkit. Guutip kissaatigaa ataasioqatigiilluta kiffartorfigis­sagitsinni. Ilumoortoq aalajangiusimajuarutsigu ataasioqatigiit­tuassaagut. Ilumoortumut akerliusumik siaruar­terisut avissaar­tuutsitsisuusarmata Guutip mianersoq­quaatigut taakku ilagisaq­qunagit. Taamaaliun­ngikkutta ilumoortumit avissaariar­torsinnaavugut. (Rom 16:17) Ilumoortoq aalajangiusimal­luinnarutsigu anersaakkut isumannaatsumiissaagut upperluar­tuullutalu. (Ef 4:15, 16) Saatanip eqqunngitsunik ilinniar­titsissutigisaanit sunniiniutaanillu uukapaatin­neqarnavian­ngilagut, annikil­liornar­tussarsuarmilu Jehovamit sernigineqarumaarpugut. Ilumoortoq aalajangiusimal­luarutsigu ‘Guutip eqqissisitsisup najussavaatigut’. – Flp 4:8, 9. w24.07 13 § 16-17

Inuit ajortimit nanertisimasutut misigisut Jiisusip pingaarnertut ikiorlugillu maleqqulluni qaaqquai. Nalunngilaa ajorti inuit ajornar­torsiutaannut pissutaasoq. Taamaammat inuit ajortiminnik naalliuuteqartut immikkut ikiorniarpai. Assersuusiorluni nassuiaavoq: “Peqqissut pinnatik napparsimasulli nakorsamik pisariaqar­titsipput.” Imalu nangippoq: “[Tikiuppunga] inuit naapertuil­luartut pinnagit ajortulior­tartulli peqqissimeq­qullugit.” (Mat 9:12, 13) Oqaatsit taakku Jiisusip timitalertarpai. Arnaq isikkaminik qullini atorlugit allarterisoq saamalluni oqaluullugulu ajortuliaanik isumakkeerfigaa. (Luk 7:37-50) Arnaq Samaariamiu puilasumiittoq ilumoortunik pingaarutilinnik ilinniartippaa, nalunngik­kaluarlugu angut uiginngisani inooqatigigaa. (Joh 4:7, 17-19, 25, 26) Inuit ajortiliunertik pissutigalugu toqusarput, Guutilli Jiisusi angutinik, arnanik meeqqanillu toqusimasunik makititsisin­naanngortippaa. – Mat 11:5. w24.08 4 § 9-10

Jehovap atini qanoq qanittukkut ataqqinar­tissavaa? Pissutsit naapertuil­luartut atuutsilersin­nerisigut. Babylonersuaq Jehovap aqqanik nikanarsaataasumik iliuuseqar­tangaarami suujunnaarsin­neqassaaq. (Saqq 17:5, 16; 19:1, 2) Babylonersuup suujunnaarsin­neqarneranik takunnittut ilaasa immaqa Jehova ilagaluta kiffartorfigilissavaat. Kiisalu Saatanip silarsuaa ajortoq Jehovallu aqqanik mitaatiginnittut tamarmik Harmagedonnimi suujunaarsin­neqassapput. Jehovamut asannittut naalattullu tulluusimaarlutik aqqanik ataqqinar­titsisut aniguisin­neqarumaarput. (Mak 8:38; Tes 2. 1:6-10) Kristusi ukiuni 1.000-ini naalakkersuereerpat naggammik misilin­neqarnerup kingorna Jehovap aqqa illernarsisin­neqarluin­narumaarpoq. (Saqq 20:7-10) Taamanik­kussamut Jehovap “naalannas­susianik ilisimasaqarnerup nuna immissavaa soorlu ermit matoqqagaat immap naqqa”. (Hab 2:14) Inuit tamarmik Jehovap ataqqineqar­tariaqar­neratut aqqanik ataqqinar­titsinissaat qilanaarnaq! w25.01 7 § 15-16

Kristumiut hebræeriusut akerlilersor­neqarnerit naammagalugit atornis­saannut suna iluaqutigisin­naavaat? Paulusip nalunngilaa misilin­neqaatinut eqqortumik isiginnit­taaseqar­nissaat pingaaruteqartoq. Nassuiaavoq uppernikkut misilin­neqaatit kristumiup perorsaatigisinnaagai. Perorsaatis­sinneqarnerlu kristumiutut pissuserineqar­tussanik ineriar­tortitsinissamut iluaqutigineqarsinnaavoq. Misilin­neqaatit ajunngitsumik kinguneqarsin­naaneri eqqarsaatigisarunikkit kristumiut tamakkua naammagalugit atornissaat ajornan­nginnerutissavaat. (Hebr 12:11) Paulusip kristumiut hebræeriusut kajumis­saarpai misilin­neqarnerminni pinertusaar­nissaminnut sapiissuseqangaaq­qullugit tunniutiin­naqqunagillu. Tamanna pillugu ilisimasaqarluarpoq. Nammineq kristumiun­ngunngik­kallarami kristumiut malersor­tarsimagamigit nalunngilaa qanoq peqqarniitsigisumik pineqartartut. Aamma kristumiun­ngoreerluni akerlilersor­neqarnerit assigiin­ngitsut misigisareeramigit nalunngilaa malersugaanermi qanoq pinertusaar­toqarsinnaasoq. – Kor 2. 11:23-25. w24.09 12 § 16-17

Oqaluus­sinerput ullut tamaasa nukingin­narneruleralut­tuinnarpoq. Sooq? Naggatissaq nalliutingajalermat. Ulluni kingullerni oqaluussineq pillugu Jiisusip oqaasii Makkorsi 13:10-mi allassimasut eqqarsaatigikkit. Matiusi allappoq Jiisusi oqartoq ‘naggatissap’ nalliutin­nginnerani nutaarsiassat nuannersut nunarsuaq tamakkerlugu oqaluus­sissutigineqassasut. (Mat 24:14) “Naggatissaq” pissutsit ajortut Saatanillu aqutseriaasiata atuukkun­naarnis­saannut innersuus­sutaavoq. Jehovap nalunngilaa “ulloq akunnerlu qaqugu nalliutis­sanersut”, tassa qaqugu akuliutis­sanerluni aalajangiutereersimavaa. (Mat 24:36; ApS 1:7) Ullullu tamaasa ulloq taanna qanilliartorpoq. (Rom 13:11) Taamaattumik piffissaq atorluarlugu naggatissamut oqaluus­siuassaagut. Tamatta immikkut apeqqutip uuma eqqarsaatiginissaa pingaaruteqarpoq: Sooq oqaluus­sisarpugut? Naatsumik oqaatigalugu asanninneq kajumis­sissutigigatsigu oqaluus­sisarpugut. Nutaarsiassat nuannersut nuannaringaarpagut, inuit asavagut, pingaar­nertullu Jehova atialu asavagut. w24.05 14-15 § 2-3

Angajoq­qaajusutit, meeqqat pinngortitat alutornartut eqqarsaatiginis­saannut kajumissaaruk. Asimiik­kaangassi pinngortitani ilusilersukkat assigiiaartut kusanartut eqqartor­tarsinnaavasi. Sooq? Taakku silassorissumik ilusilersuisoqar­neranut uppernarsaataammata. Assersuutigalugu ilusilersukkat ilaat imusimasutut qiterminniit alliartortutut isikkoqarput. Taakku qinnikaartumik taaneqarsinnaasut ilisimatuut ukiorpassuarni misissorsimavaat. Ilisimatooq Nicola Fameli nassuiaavoq pinngortitami ataatsimi, soorlu naasumi, qinnikaartut kisinneqaraangata kisitsisit tulleriiaartut aalajangersimasut maluginiar­neqarsin­naasartut. Kisitsisit tulleriiaat taakku Fibonaccimik taaneqartarput. Sumi tamani, soorlu galakseni, uillup qaleruaani, naasut pilutaanni aamma naasut kaavequtituut sikkersuini, qinnikaartumik isikkullit takuneqarsin­naapput. w24.12 16 § 7

Moorsisip, Daavip Johannesillu inuunerisa nalaat atugaallu uagut nalitsinnit atukkatsinnillu allaanerupput. Aammali arlalitsigut assigiis­suteqarput. Taakkua Guuti ilumoortoq kiffartorfigaat, uaguttaaq taamaaliorpugut. Taakkunatut Jehova qinnuigisarparput, tatigisarparput siunnersor­tigisarlugulu. Angutit itsaq inuusimasut taakku assigalugit upperil­luinnarparput Jehova naalatsiminik akissarsisitsisartoq. Angutit utoqqaat taakkua oqaasii Jehovap peqqussutaanut naalannikkut maleruartigit. Taamaaliorutta inuunermi ingerlal­luassaagut. Taava ‘sivisuumik inuujumaarpugut’ – aap, allaat naassaan­ngitsumik! Aamma Ataatatta qilammiusup asasatta uummataanik nuannaar­titsineq nuannaarutigis­savarput. Taassumalu takorloorsin­naasatsinnit annerungaartumik akissarsisis­savaatigut. – Ef 3:20. w24.11 13 § 20-21

Kristumiut siulliit nalaanni qatanngutit angutit ilaat ilagiinni kiffartortutut toqqarneqarput. (Tim 1. 3:8) Paulusip “ikiortit” eqqaagamigit taakku pigunarpai. Utoqqaanertat ilinniar­titsineq ilagiinnillu paarsisuuneq aallussin­naanias­sammatigit ilagiinni kiffartortut pingaarutilinnik allanik suliassaqartarput. Assersuutigalugu imaassinnaavoq Allakkanik Illernartunik allaqqiinermi ikiuuttartut tamatumun­ngaluunniit atortussanik pisariaqar­tinneqartunik pissarsiniartartut. Qatanngutit angutit illit ilagiinni kiffartortut qanoq ikiuuttarpat? (Pet 1. 4:10) Taakkununnga suliassiis­sutigineqartut ilagaat naatsorsuusiorneq, oqaluus­siffigisar­takkanik aaqqissuussineq, Biibililersaarutinik isumaginninneq, ataatsimiinnerni ataatsimeersuar­nernilu teknikkilerineq, ikiortitut tikilluaq­qusisarneq ataatsimiit­tarfimmillu aserfal­latsaaliuineq. Ataatsimiinnerit pissarsiaqarfigil­luarnias­sagatsigit aaqqissuus­saasumillu oqaluus­sisinnaanias­sagatta tamakku tamarmik pisariaqarput. – Kor 1. 14:40. w24.10 19 § 4-5

Jehova Guutiusoq uumassuseqartoq uagutsinnik ikiuiumatuujusoq eqqaamagutsigu misilin­neqaatit annikik­kaluarpata annertugaluarpataluunniit pinertusaarsin­naassaagut. Jehovap Killeqan­ngitsumik Pissaanillip pinertusaar­niassagatta pissatsis­sinnaavaatigut. Taamaattumik misilin­neqaraluarluta isumalluarsin­naavugut. Misilin­neqarnitsinni annikitsuni Jehovap ikiuinera misigisaratsigu qularis­sanngilarput aamma misilin­neqarnerni annertuuni ikiorumaaraatigut. Kunngi Daavi Jehovamik tatigin­ninnerulis­sutigisaminik misigisaqarpoq. Inuusut­tuulluni ataatami savaataanik paarsitillugu løveq savamik aallarussivoq, pisumilu allami aamma nanoq taamaaliorpoq. Daavip sapiilluni uumasoq malersortarpaa savamillu arsaarlugu. Isumaqan­ngilarli nammineerluni taamaaliorsin­naalluni, nalunngilaami Jehovap ikioraani. (Sam 1. 17:34-37) Daavip misigisani taakku eqqarsaatigeq­qissaaramigit upperinerulerpaa aamma siunissami nakussatsik­kumaaraani. w24.06 21 § 5-6

Takorlooruk katerisimaar­nissamut qaaqqusaasutit. Ilaassavit? Suna pilersaarutaanersoq ilisiman­ngikkukku qaaqqusisorluunniit ilisarisimal­luanngikkukku ima aperisinnaavat: “Sumi qaqugulu pissava? Inuit qassit aamma kikkut ilaassappat? Kina nakkutil­liisuussava? Susoqassava? Aalakoor­nartortalinnik sassaal­lertoqassava?” Apeqqutit taakku akissutis­sarsigukkit silatusaartumik aalajangiinissannut iluaqutigissavat. Paaserusutatit paasereerukkit ataatsimut isigalugit eqqarsaatigil­luakkit. Assersuutigalugu imaassinnaavoq paasigit Biibilimi najoqqutassianik ataqqin­ninngitsut ilaassasut imaluunniit nakkutil­liisoqar­tinnagu aalakoor­nartortalinnik sassaal­lertoqassasoq. Ingasattumik festernermik kinguneqariaan­naasinnaava? (Pet 1. 4:3) Pissutsit ataatsimut eqqarsaatigil­luarukkit aalajangiil­luarnerusin­naavutit. w25.01 14-15 § 4-5

Jehovap utertitsis­sutitut pilliut iluaqutigalugu inuit peqqissimisut ajortuliaannik nunguterisarnera Biibilimi assersuusiarineqarpoq. Annoraamineq qaqortoq aappallorissumik simernilik errorlugu simernerata peernissaa sapernar­torujus­suusinnaavoq. Tassa taamatut assersuusior­nermigut Jehovap qularun­naarsip­paatigut ajortuliagut allaat takuneqarsin­naajunnaarsillugit eqqiarneqarluin­nassasugut. Ajortuliagut aamma akiitsunut assersuun­neqarput. (Mat 6:12; Luk 11:4) Tassa Jehovamut ajortulioraangatta soorlulusooq akilersin­naanngil­luinnak­katsinnik akiligas­saqarfigineruler­taripput! Jehovalli isumakkeerfigigaangamisigut akiitsoqarun­naarsit­tarpaatigut. Ajortuliatta isumakkeer­neqareersut akilernissaat piumasarinngilaa. Soorlu inuk akiitsoqarun­naaraangami nuannaangaartartoq, uagut Jehovamit isumakkeerfigineqaraangatta oqilial­lattarpugut! w25.02 9 § 9-10

Angajoqqaat utoqqaliar­tulernerminni ikiorneqar­tariaqarsin­naapput, qitornarpassuillu kajumillutik taamaaliortarput. (Tim 1. 5:4) Kisianni angajoqqaat Jehovamik tatiginnittut nalunngilaat nuannaar­nerussallutik meeqqatik Jehovamut kiffartor­tunngor­nissaannut ikiorunikkit taakkunanngalu siunissami aningaasatigut ikiorneqar­nissartik pingaar­nerpaatin­ngikkunikku. (Joh 3. 4) Meeqqavit imminut pilersorsin­naalernis­saannik ilinniar­tinneranni Jehovamik tatigin­ninnerit ersersittaruk. Meeraaneranniit sulilluarnissap pingaaruteqar­neranik ilinniar­titsigit. (Uss 29:21; Ef 4:28) Alliartor­neranni atuarfimmi ilinniarusus­suseqarluar­nissaannut ikiukkit. Angajoqqaat najoqqutassianik Biibilimeersunik misissuisin­naapput meeqqatik ilinniagaqar­nissamut tunngatillugu aalajangiil­luarsin­naaqqullugit ikiorlugit. Angajoqqaat kissaatigaat qitornamik imminut pilersorsin­naalernissaat oqaluus­sinerunis­saminnullu – immaqa allaat pioneriunis­saminnut – piffissaqar­nissaat. w25.03 30-31 § 15-16

Jehovap anersaakkut paratiisimiittut qanoq atugaqarumaarnerat Esajap allagaani kapitali 65-imi allatsippaa. Siulittuut taanna 537-mi Kr.in.si. eqquuteq­qaarpoq. Taamani juutit peqqissimisut Babylonnimiit aniguisitaallutik nunaminnut uterput. Jehovap innuttani pilluaq­qullugit Jerusalemmip guutisiorfiullu qarmaqqin­neqarnis­saannik ikiorpai guutisiorneq ilumoortoq pilerseq­qillugu. (Es 51:11; Zak 8:3) Esajap siulittuutaa 1919-imiilli aappassaanik eqquutilerpoq. Ukiumimi tassani Jehovap kiffai Babylon­nersuarmiit aniguisitaammata. Taamanimiilli anersaakkut paratiisi nunarsuarmut tamarmut siammariartorpoq. Oqaluus­sisartut aallussil­luartut ilagiinnik amerlasuunik pilersitsipput. Ersarippoq Guutip anersaavanit sunnertillutik allannguisut, inuimmi nakuuser­tartuusimasut inuunerlus­simasullu “kinaassuseq nutaaq Guutip piumasaanut naapertuuttumik pinngor­tinneqartoq” atisimavaat. w24.04 20-21 § 3-4

Nunat ilaanni naatsorsuutigineqartarpoq angajoqqaat inersimasul­luunniit allat eqqarliminnut aappaqan­ngitsunut aappassarsiuus­sisarnissaat. Nunani allani ilaquttat ikinngutil­luunniit aappaqan­ngitsup aapparisin­naasaanik ujarlertarput isumagalugulu taakkua naapinnissaat paasinias­sammassuk peerariilerusun­nerlutik. Taamatut akisussaaf­filerneqaruit arnap angutillu nuannarisaat pisariaqar­titaallu eqqarsaatigikkit. Nalunngisannut tulluarpasittoq eqqumaf­figilerukku inuttut qanoq ittuunersoq pissusiilu pillugit paasiniaagit, pingaar­nerpaamillu paasiniaruk Jehovamut qanimut attaveqarnersoq. Jehovamut qanimut attaveqarneq aningaasanit, ilinniagaqarnermit inuiaqatigiinnilu inissisimaf­feqarnermit pingaaruteqar­nerungaarpoq. Eqqaamajulli naggataatigut uppeqativit namminneq aalajanger­tussaagaat katissanerlutik. w24.05 23 § 11

Peerariit tapersersorsin­naavagut oqaatsitsigut aamma oqaaseqan­nginnitsigut. Ilaannikkut imminut aqussin­naalluta oqaaseqar­naveersaar­tariaqarpugut. (Uss 12:18) Assersuutigalugu peerariiler­toqarsimanera allanut ingerlateq­qikkusup­pallassin­naavarput, imaassin­naavorli peerariit namminneq oqaatigerusukkaat. Peerariit pillugit eqqartuis­sanngilagut imaluunniit namminneq aalajangigaat pillugit isornar­torsiuinata. (Uss 20:19; Rom 14:10; Tes 1. 4:11) Aamma aperissan­ngilagut imaluunniit oqamisaarluta katittariaqartut imaluunniit ilimanartoq katissasut. Taavami peerariit aalajangerunik peerariik­kunnaar­niarlutik? Susassarin­ngisagut pillugit aperissan­ngilagut aappaaluunniit peerariik­kunnaar­nerannut pisuutillugu. (Pet 1. 4:15) Imaanngilaq peerariit peerariik­kunnaartut naliliinerlus­simasut. Tassami peerariinnerup siunertaraa silatusaartumik aalajangiinissaq. Taamaak­kaluartorli peerariik­kunnaar­niarlutik aalajangernertik misigis­sutsikkut anniaatigisin­naavaat. Taamaattumik qanoq tapersersorsin­naanerlutigit eqqumaf­figisin­naavarput. w24.05 31 § 15-16

Ilaquttatta ilaat qanimul­luunniit ikinngutitta ilaat Jehovamit qimaguppat misilin­neqaataasinnaavoq ajornar­nerpaat ilaat. (Mos 1. 6:5, 6) Taanna asangaarutsigu tamanna akueriuminaatsis­sinnaavarput. Illit taamatut alianartumik misigisaqaruit Sadokip ilumoorfigin­ninnermut tunngatillugu maligassiaa nakussatsis­sutigisinnaavat. Taassuma Jehova ilumoorfigiuarpaa qanimut ikinngutini Ebjatari ilumoorfigin­nikkunnaarmat. Kunngi Daavi toqujar­tortillugu tamanna pivoq. Ernera Adonija imminut kunngin­ngortin­niarsarivoq, Jehovalli kissaatigaa Saalumuut kunngin­ngussasoq. (Nal 1. 22:9, 10) Ebjatari aalajangerpoq Adonija tapersersor­niarlugu. (Kng 1. 1:5-8) Taamaalior­nermigut Ebjatarip Daavi Sadokilu kisiisa pinnagit aammali Jehova ilumoorfigiun­naarpaa! Ukiorpassuarni Sadoki Ebjatarilu palasitut qanimut suleqatigiis­simapput. – Sam 2. 8:17; 15:29; 19:12-15. w24.07 6 § 14-15

Upperil­luinnarsin­naavarput ussernartut ingalas­simaniarlugit tamaviaarnerput tamatigut uagutsinnut pitsaanerpaamik kinguneqartartoq. ‘Ajortip nuannersui qaangiutipal­lattarput’, Jehovalli piumasaatut iliorneq nuannaar­nivimmik kinguneqar­tuaannarpoq. (Hebr 11:25; Tuss 19:9) Jehovap najoqqutas­siaanik maleruaasussatut pinngor­titaagatta taamaappoq. (Mos 1. 1:27) Jehovap iluarisaatut inooriaaseqarutta ‘minguitsumik nalunngeqatigin­nissuteqarnerput’ nuannaarutigisin­naavarput siunissamilu naassaan­ngitsumik inuuneqalersin­naalluta. (Tim 1. 6:12; Tim 2. 1:3; Juud 20, 21) Ilumoorpoq ‘timi sanngiitsoq’. (Mat 26:41) Tamannali isumaqanngilaq ikiortis­saqanngitsugut. Jehovap pisariaqar­titatsinnik nakussatsik­kumalluta piareersimavoq. (Kor 2. 4:7) Maluginiarulli Guutip pissaaneq nalingin­naanngitsoq tunniuttaraa. Pissaaneq nalinginnaasoq – tassa ullut tamaasa ussernartunut imminut illersor­niarluta sapinngisatsinnik tamaviaarnerput – nammineq akisussaaf­figaarput. Jehovap qinnutigut akillugit pisariaqar­titavitsinnik nakussatsis­savaatigut. (Kor 1. 10:13) Aap, Jehovap ikiuineratigut eqqumajuarlutalu ussernartunut imminut illersorsin­naavugut. w24.07 19 § 19-21

Paulusip utoqqaaner­taqatini Timuutiusi ullormut allassimaffimmi allassimasutut allaffigaa. Kikkut pivai? Ilimananngilaq “takunnittut” tassaasut ilagiin­niittut tamarmik. Pivaali ajortuliorsimaneranik ilisimannittut arlaqan­ngitsut. Taakku tassaasin­naapput pisimasumik isiginnit­tuusimasut imaluunniit ajortuliorsimasup qanoq iliorsimanerminik oqaluttuarfigisimasai. Ajortuliorsimasup oqaaqqis­saarneqarsimaneranik taakku kisiisa utoqqaanertat paasitissavaat. Ilaannikkut ingasattumik ajortulior­toqarsimanera ilagiin­niittunit amerlasuunit ilisimaneqartarpoq ilisimaneqar­nissaaluunniit ilimagineqar­tarluni. Taamaappat “takunnittut” tassaapput ilagiin­niittut tamarmik. Taava utoqqaanertaq ilagiinnut nalunaassaaq ajortuliorsimasoq oqaaqqis­saarneqarsimasoq. Sooq? Paulusi allappoq tamanna ‘allanut mianersoq­qussutaassasoq’. Ilagiillu ajortuliun­nginnissamut iluaqutigisin­naavaat. w24.08 23-24 § 16-17

Jehovamut kiffartor­nitsinni naggatissap tungaanut sulilluar­tuartariaqarpugut. Tanitat Jiisusimit qilaliar­tinneqas­sallutillu ‘ilaliun­neqassagunik’ ilimasut­tuusariaqarput. (Mat 24:40) Tanitat qilammut ‘katersor­neqarnissartik’ qilanaaringaarpaat. Sorsunnerup Harmagedonnip kingorna “Savaaqqap katinnerani” Jiisusimut nuliartaan­ngussapput. (Tes 2. 2:1) Eqqartuus­sinissap qanilliar­tupallattup siooraginissaanut pissutis­saqanngilagut. Aalajaat­tuarutta ‘inuup Ernerata saavani atasinnaaq­qulluta’ Ataatatta qilammiusup ‘pissaanermik nalingin­naanngitsumik’ asannilluni tunissavaatigut. (Luk 21:36; Kor 2. 4:7) Nunarsuarmiin­nissamik qilammiin­nissamil­luunniit neriuuteqaraluarutta Jiisusip assersuusiamini mianersoq­qussutai eqqumaf­figigutsigit Ataatatta iluaris­savaatigut. Jehovap ajunngisaangaarnera angingaarmat aalajaatsut atii tamarmik ‘inuunerup mappersagaani’ allanneqarumaarput. – Dan 12:1; Saqq 3:5. w24.09 24-25 § 19-20

Eqqarsaatit nikallornartut iliuuseqarfigisin­naavatit. Qanoq? Eqqaamajuk nuannaarutis­saqartutit, ilaatigut Jehovamit iluarisaasutit. Aamma eqqaamajuk Jehovamut kiffartun­ngitsut taassumannga ikiorneqariaan­naanngitsut. Taakku massakkut ilorrisimaarlutik inuunis­saminnik pingaar­nerpaatitsipput allamik neriuutis­saqannginnamik. Jehovalli illit takorloorsin­naasatit akimorlugit nuannersorpas­suarnik tuniumaarlutit neriorsorpaatit. (Tuss 145:16) Aamma manna eqqarsaatigiuk: Allatut aalajangersimasuuguit inuunerit ullumikkut qanoq issimas­sagaluarnersoq qulakkeerlugu ilisimasin­naanngilat. Mannali qularnanngilaq: Guutimik inoqatitsinnillu asanninnerput tunngavigalugu aalajangiisarutta ilumoortumik nuannaarnartut inuunitsin­niittuaan­nassapput. w24.10 27 § 12-13