Apriili

Jiisusip pilliutaata utertitsis­sutaaneranik upperin­nittariaqarpugut naassaan­ngitsumik inuujumalluta. (Ef 1:7) Jiisusip ‘savanik allanik’ taasai ukiumoortumik Naalakkap unnukkorsior­titsinerani iffiamik-qaqortumik viinnimillu ilangiineq ajorput. (Joh 10:16) Taamaak­kaluartorli Jiisusip utertitsis­sutitut pilliutaanik upperin­ninnermikkut taassuma timaanik aavanillu iluaqutiginnipput. (Joh 6:53) Taavami iffiamik-qaqortumik viinnimillu ilangiisut? Taakku taamaalior­nermikkut ersersitsipput isumaqatigiissummut nutaamut ilaallutik Kunngeqarfimmilu qilammiittumi naalakkersuinis­saminnik neriuuteqarlutik. Tassa tanitaagaluarutta savanul­luunniit allanut ilaagaluarutta naassaan­ngitsumik inuujumalluta tamatta Jiisusip utertitsis­sutitut pilliutaanik upperin­nilluin­nartariaqarpugut. w24.12 12 § 14; 13 § 16

Naalakkap unnukkorsior­titsinerani Jiisusip apustiliminut iffiaq-qaqortoq seernarsaateqan­ngitsoq tunniuppaa timiminullu assersuutaanerarlugu. Taava viinni tunniuppaa oqarfigalugillu ‘aamminut isumaqatigiissummik atuutsitsilersussamut assersuutaasoq’. (Mak 14:22-25; Luk 22:20; Kor 1. 11:24) Jiisusip ‘isumaqatigiissummik nutaamik’ taavaa, Jehovallu isumaqatigiis­suteqarfigisai tassaapput “inuiaqatigiit Israalikkut”, tassa Guutip kunngeqarfiani Jiisusip naalakkersueqatigisassai. (Hebr 8:6, 10; 9:15) Naalakkap unnukkorsior­titsinerani Jiisusip oqaasii inunnut killilimmik amerlas­susilinnut, ‘savarpan­nguanik taaneqartunut’, atuupput. Taakkununnga ilaasut siulliit tassaapput apustilit aalajaatsut taamani unnummi tamatumani inimeeqatigisai. Taakku tassaapput Jiisusip qilammeeqatigisassai. w24.12 11 § 9-10

Jiisusi ikinngutiminit akeqqanut pisinneqarpoq, tigusaavoq, nikassar­neqarpoq, eqqartuun­neqarpoq allaallu naalliutsin­neqarluni. Toqunniarlugu qisummut sakkutuunit nivinngar­neqarpoq. Jiisusi naalliungaar­nermini pinertusaarpoq. Jehovali ernermi naalliunnera isiginnaarlugu suli anniangaar­nerusimassaaq. Pissaanini killeqan­ngitsoq noqippaa akuliunnanilu. Sooq? Asagamisigut. Jiisusip pilliutaa Jehovap ilinnik qanoq asannitsigineranut uppernarsaataavoq. Ernerminik asasaminik pilliutigin­ninnini anniaatigingaarpaa illit ajortimit toqumillu annaanniarlutit. (Joh 1. 4:9, 10) Aap, tamatta ajortimut akiuunnitsinni ikiorusup­paatigut, ajugaatik­kusuppaatigullu! w24.08 6 § 13-14

Ernini anniartoq isigalugu Jehovamut ajorsimas­saqisoq eqqarsaatigigutsigu qanoq asatigigaatigut aatsaat paasilluarsin­naavarput. Saatani oqamisaar­nikuuvoq Guutimut kiffaasup kialuunniit inuunini annaajumanagu Guuti ilumoorfigerusun­navianngikkaa. Saatanip salluliuutaa uppernarsar­niarlugu Jiisusip toqunngin­nermini naalliunnissaa Jehovap akueraa. (Job 2:1-5) Jehova isigitillugu Jiisusi upperisarsiortunit akeqqersimaartunit illaruaatigineqarpoq, sakkutuunit iperartor­neqarpoq naalliutitsiviliamullu kikiattuun­neqarluni. Jehovallu isiginnaarpaa ernini anniangaarluni toqujartortoq. (Mat 27:28-31, 39) Jehovap pissaaneqangaartup tamanna pinngitsoor­tissinnaagaluarpaa. (Mat 27:42, 43) Taamaaliorsimagaluarpalli Jiisusip utertitsis­sutissaq akilersimanavian­ngikkaluarpaa, uagullu neriuuteqalersimanavian­ngikkaluarpugut. Taamaattumik Jehovap ernermi anerninger­nissaata tungaanut anniarnissaa akueraa. w25.01 22 § 7

Ukiumi 33-mi nisanip 16-ianni Jiisusip ilinniartitai aliasungaarlutillu annilaanganermik soriarsin­naanngillat. Taakkua ilaat marluk Jerusalemmimiit Emmausiliarput. Aqqutaani takornartamit ingerlaqatigineqalerput. Ilinniartitat takornartaq oqaluttuuppaat Jiisusi ajortumik qanoq pineqarsimasoq. Takornartallu puiugas­sarinngisaannik oqaluttuutilerpai. “Moorsisimit pruffiitinillu allakkat tamaasa aallarniutigalugit” sooq Missiarsi naalliut­tariaqarlunilu toqusariaqartoq nassuiaappai. Emmausimut tikikkamik takornartap kinaanini qulaarpaa – tassaagamimi Jiisusi makititaasimasoq. (Luk 24:13-35) Jiisusi qilalian­nginnermini ilinniar­titaminut arlaleriarluni saqqummertarpoq. Ilinniartitat aliasuttut annilaangasullu Jiisusimit qiimmas­sarneqaramik nuannaangaalerput sapiissuseqarlutillu Kunngeqarfik pillugu nutaarsiassat nuannersut oqaluus­sissutigalugillu ilinniar­titsissutigaat. w24.10 12 § 1-3

Meeqqat piffissap ingerlanerani peroriar­tortarput inersimasun­ngortarlutillu. Uagulli iliuuseqarpiarata anersaakkut inersimal­luartun­ngornavian­ngilagut. Assersuutigalugu kristumiut Korintimiittut nutaarsiassat nuannersut tusarlugillu upperilerpaat, imermut morsutsin­neqarput, anersaamik illernartumik tunineqarput apustilimillu Paulusimit ilinniar­tinneqarnertik iluaqutigalugu. (ApS 18:8-11) Ukiuni arlalinni kristumiooreeraluarlutik taakkua ilarpassui suli anersaakkut inersimal­luartun­ngorsiman­ngillat. (Kor 1. 3:2) Inersimal­luartun­ngornissarput kissaatigisariaqarparput. ‘Misilit­tagakinnermik iluarinnittut’ allanngorusun­navianngillat anersaakkullu nukangajuas­sallutik. (Uss 1:22) Inersimasun­ngorsimagaluartut nammineq akisussaaf­feqarusunnatik qanoq iliornis­saminnik angajoq­qaaminnit aalajangius­sissunneqartartut assigerusun­ngilagut. Anersaakkut ineriar­tornerput nammineq akisussaaf­figerusupparput. Suli anersaakkut inersimal­luartun­ngorsiman­ngikkuit Jehova qinnuigiuk ‘piumassuseqalersit­taqqullutit pissatsit­taqqullutillu’. – Flp 2:13. w24.04 4 § 9-10

Jehovap asannittumik paasitip­paatigut inunnik eqqartuus­sisarnini pillugu qanoq misiginerluni. (Ez 33:11) Aatsaat pissutis­saqarluaraangami makititaanissamik neriuuteqar­titsinani inunnik piuneerus­sisarpoq. Inuit asangaaramigit nallittuinis­saminut periarfis­saqaraangami taamaaliortarpoq. Makititaanavian­ngitsut pillugit qanoq ilisimasaqarpugut? Biibilimi makititaanavian­ngitsut ikittuinnaat eqqaaneqarput. Jiisusi oqamisaarpoq Juudarsi Iskaariuuti makititaanavian­ngitsoq. (Mak 14:21; Joh 17:12) Juudarsimi piaaraluni sianigalugulu Jehovamut Jiisusimullu akerliusumik iliorpoq. (Takukkit Makkorsi 3:29 aamma nassuiaatit). Jiisusi aamma oqarpoq juutit upperisarsiornikkut siuttuisa ilaat imminut akerlilersuisimasut makititaanavian­ngitsut. (Mat 23:33; Joh 19:11) Aamma apustili Paulusi allappoq tunussisut peqqissimin­ngitsut makititaanavian­ngitsut. – Hebr 6:4-8; 10:29. w24.05 4 § 10-11

Jehovamut qanimut attaveqar­tuarutta Saatanip ataavartumik ajoqusersin­naassan­ngilaatigut. (Joh 1. 3:8) Paratiisimilu Jehovap kiffani aalajaatsut anersaakkut ajoqutaasunut allaallu toqumut illersor­tuarumaarpai. (Saqq 21:4) Jehovap tupianiinneq immikkut pisinnaatitaaf­ferujusuuvoq – tassami naassaan­ngitsumik Jehova ikinngutigisin­naagatsigu! (Ez 37:27) Jehovap tupianiitilluta qanoq pissuseqassaagut? Inoqatinnut qaaqqutikkuit qaaqqusisup iluarisaatut iliorusussaatit. Taamatuttaaq Jehovap tuperminiit­tuarusuttunut piumasaqaatai soorunami paaserusuppagut. Jehova asagatsigu sapinngisatsinnik taassuma ‘iluaril­luinnagaatut’ iliorusuppugut. (Kol 1:10) Jehovap Ataatatta qilammiusup ataqqinissaa puigunngisaan­nassavarput. Taamatullu mianerin­nittuarutta iluarin­ngisaanik iliuuseqar­naveersaar­nissatsinnut iluaqutigis­savarput. ‘Maniguulluta Guutitta kiffartorfigiuarnissaa’ kissaatigaarput. – Mika 6:8, New World Translation. w24.06 4 § 8-9

Jehovap Aaperaat peqquaa ernini Iisaaq pilliutigissagaa. Aaperaap anniaatigingaarsimassavaa. Taamaak­kaluartoq naalannis­saminut piareersimavoq. Taamali pisoqan­ngitsiartoq Guutip sernigigamiuk unitsippaa. Pisorli Jehovap siunissami iliuusissaa pillugu ilinniarfigaarput. Jehovap inuit asangaaramigit nammineq ernini pilliutigiumavaa. (Mos 1. 22:1-18) Ukiut hundredillit kingorna Moorsisip inatsisaani Israalikkut peqquneqarput ajortiminnik isumakkeerfigineqarumallutik uumasunik pilliisassasut. (Mos 3. 4:27-29; 17:11) Pilliutit taamaattut pilliummut annerungaartumut inunnik ajortimit annaassisussamut tikkuussipput. Guutip pruffiitii kinguaassaq neriorsuutigisaq pillugu nassuiaanissamut isumassarsisin­neqarput. Siulittuutigaat Guutip ernera immikkuul­larilluinnartoq naalliut­tariaqarlunilu toqunneqassasoq inuit – illit ilanngullutit – ajortimit toqumillu annaanniarlugit! – Es 53:1-12. w24.08 4 § 7-8

Biibilimik atuaraangavit eqqarsaatigisaruk atuakkatit qanoq maleruarsin­naanerlugit. Guutip oqaasianik atuarninni una eqqarsaatigisaruk: ‘Paasissutissat ullumikkut siunissamilu qanoq maleruarsin­naavakka?’ Assersuutigalugu takorlooriaruk Tessaluunikamiunut allakkat siulliit 5:17, 18-ilu atuarlugit. Versit taakku atuareerlugit unikaal­lassinnaavutit eqqarsaatigalugulu qanoq akulikitsigisumik qamanngalu pisumik qinusar­nerlutit. Aamma qujamasuutigisatit eqqaasin­naavatit. Immaqa aalajangerputit aalajangersimasut pingasut pillugit Jehova qutsaviginiarlugu. Biibilimi ilinniar­titsissutigineqartut eqqarsaatiginis­saannut minutsialuin­nannguil­luunniit atoraluarukkit Guutip oqaasianik paasinnin­nissannut maleruaanis­sannullu iluaqutigissavat. Biibili atuartarukku ullullu tamaasa ilikkakkatit maleruar­tarukkit Jehovap oqaasianik maleruaanissat pikkorif­figinerulissavat! w24.09 4-5 § 9-10

Jehovap immikkut piginnaasaqar­tilluta pinngor­tissimavaatigut. Soorunami tunisik­kaangatta nuannaar­tarpugut, allanulli tunissuteqaraangatta pilluar­neruler­tarpugut. Uppeqatigut ikiorsin­naagaangatsigit nuannaarutigisaqaarput. Nuannaarutigisarparputtaaq qujamasunnertik ersersik­kaangassuk. Qujamasuf­figineqan­ngikkaluarut­taluunniit nuannaarutigisin­naavarput eqqortumik iliuuseqarsimagatta. Puiunngisaannaruk qanorluunniit annertutigisunik tunissuteqaraluaruit Jehovap ‘anneroqisunik tunisin­naagaatit!’ (Nal 2. 25:9) Jehova sunit tamanit annermik tunisisuuvoq! Tunissut allanit tamanit pilluar­narnerpaaq tassaavoq Jehovamit akissarsisin­neqarneq. Ataatatta qilammiusup tunisiumatuup ilaartuarnissaa aalajangiusimajuarisigu. w24.09 30-31 § 20-21

Jehova misigit­tarlunilu nallittuingaarpoq. (Tuss 103:13; Es 49:15) Aliasuk­kaangatta nammineq aliasuttarpoq. (Zak 2:12) Qanimut ikinngutigiler­niassagatsinni ilisarisimaler­niassagatsinnilu ikiortarpaatigut. (Tuss 25:14; ApS 17:27) ‘Pavanersuaq issiagaluarluni maniguulluni nikanartoq pujualannit makitittarpaa.’ (Tuss 113:6, 7) Guuterput asseqan­ngitsoq unnersiutigerusupparput, ilaa? Jehova pillugu ilumoortoq inunnut oqaluus­sissutigerusuk­katsigu unnersiutigaarput. Inuppassuit Jehova ilisarisiman­ngilaat. Sooq? Saatanip salluliuutinik siuarsaanermigut inuit tappiil­lisimmagit. (Kor 2. 4:4) Taamaattumik inuppassuit isumaqarput Jehova Guutiusoq akiniaajumatooq, misigit­taatsoq naalliuutinullu pisuusoq. Uagulli Guuti pillugu ilumoortoq ilisimavarput! Inuit Jehovamik ilisarisiman­nilernis­saannut ikiorsin­naavagut taamaalillutalu Jehova ataqqinaatis­sillugu. – Es 43:10. w25.01 3 § 6-7

Saatani inuit ilaat aqqutigalugit Guutip ernera, naammal­luinnar­tuullunilu tupinnar­tuliortartoq, pillugu salluliuuterpas­suarnik siaruar­terivoq. Assersuutigalugu taamani upperisarsiornikkut siuttut inuit oqarfigaat Jiisusi ‘anersaapiluit naalagaat ikiortigalugu anersaapilunnik anisitsisartoq’. (Mak 3:22) Jiisusi eqqartuun­neqarmat upperisarsiornikkut siuttut taanna Guutimik mitaatigin­ninnerarpaat, inuppassuillu kajumis­saarpaat piumasarissagaat Jiisusi toqutas­sanngor­tinneqassasoq. (Mat 27:20) Kingusin­nerusukkut Jiisusip ilinniar­titaasa nutaarsiassat nuannersut oqaluus­sissutigim­matigit akerlilersuisut “allamiut kamassaaramikkit qatanngutinut akeqqersimaar­tunngor­tippaat”. (ApS 14:2, 19) Apustilit Suliaat 14:2 pillugu Napasuliaq Alapernaarsuiffimmi decembarip aallaqqaataat 1998-imoortumi ima nassuiaateqarpoq: “Juutit akerlilersuisut namminneq tusarliussaq tunuartiin­nanngilaat, aammali asissuillutik oqaaseqarput juutiun­ngitsut kristumiunut akeqqer­tinniarlugit.” Saatani suli ‘nunarsuarmi tamarmi najugaqartunik tammartitsisarpoq’. w24.04 11 § 15-16

Inuup naassaan­ngitsumik inuunissamik periarfis­sinneqar­nissaanut ulloq toquffia aalajangiisuunngilaq. Eqqaamajuk Jehova Eqqartuus­sisuusoq naammal­luinnartoq naapertuil­luartumillu aalajangiisartoq. (Tuss 33:4, 5) Upperil­luinnarsin­naavarput “nunarsuarmik tamarmik eqqartuus­sisuusoq” tamatigut eqqortulior­tuaannassasoq. Aamma isummersin­naavugut inuup naassaan­ngitsumik inuuneqar­nissamik periarfis­sinneqar­nisaanut najugaqarfia aalajangiisuunavian­ngitsoq. Ilimanan­ngivippoq inuit millionillit nunani Guutip kunngeqarfia pillugu tusagaqar­nissaminnut periarfis­saqarfiun­ngitsuni najugaqarnerat pissutigiin­narlugu Jehovap ‘savaasatut’ nalilissagai. (Mat 25:46) Nunarsuarmik tamarmik Eqqartuus­sisuusup naapertuil­luartup inunnik taakkuninnga asanninnera isumassuineralu uagut misigis­sutsitsinnut naleqqiullugit annerungaarput. Naluarput Jehova annikil­liornar­tussarsuup nalaani qanorpiaq iliussanersoq. Jehovap inuiaat tamaasa isigitillugit illernas­sutsini saqqummersippagu imaassinnaavoq inuit taakkua ilaat Jehova pillugu ilinniar­nissaminnut, uppertun­ngornis­saminnut tapersersuinis­saminnullu periarfis­sinneqassasut. – Ez 38:16. w24.05 12 § 14-15

Jehovap innuttai kajumillutik ikioqatigiittarput. (Kor 2. 8:4) Ilaannikkulli taamaalior­nerminni sapiissuseqar­tariaqartarput. Assersuutigalugu sorsuut­toqaleraangat utoqqaanertat tassaniittut nalusan­ngilaat qatanngutitik qiimmas­sarneqar­tariaqartut, tapersersor­neqartariaqartut immaqalu anersaakkut timikkullu pilersor­neqartariaqartut. Asagamikkit pisariaqar­titaannik isumassorumallugit allaat navianar­torsioriaan­naasarput. Taamaat­toqartillugu ataasius­suseqar­tuarnissarput pingaaruteqarluinnarpoq. Ilitsersuutit immikkoor­tortaqarfitsin­neersut malikkit. (Hebr 13:17) Utoqqaanertat ajunaar­nersuaqar­nissamut piareersimajuarsin­naanias­sagamik tamatumunnga aaqqissuussatik ilitsersuutillu akuttual­laanngitsumik misissor­tassavaat. (Kor 1. 14:33, 40) Sapiitsuugit mianersor­tuullutillu. (Uss 22:3) Silatusaarit pisariaqan­ngitsumillu navianar­torsior­titsinak. Jehova tatigiuaruk. Taassuma qatanngutivit isumannaatsuunis­saannik ikiuisarninni ikiorsin­naavaatit. w24.07 4 § 8; 5 § 11

Kunngip Daavip Jehova ilisarisimavaa tatigalugulu. Daavi kunngimit Saulimit allanillu toqunniar­neqarami Jehovamut ikioqquvoq. Qinnutini akillugu Jehovap annaammani Daavi ima nillerpoq: “Naalagaq uumavoq!” (Tuss 18:47) Daavi qanoq isumaqarpa? Qinerlerfissiaq naapertorlugu Daavip Jehovamik tatigin­ninnini oqaatigaa nalunnginnamiuk taanna “Guutiusoq ilumoortutuaq kiffaminik ikiuiuaannartoq”. Daavip nammineq misigisimasaminit paasivaa Jehova ikiuinis­saminut piareersimajuaannartoq. Tamannalu Jehovap kiffartorfigiuar­nissaanut unnersiutigiuar­nissaanullu kajumis­sissutigaa. (Tuss 18:29, 30, 50) Jehova Guutiusoq uumassuseqartoq qularin­ngilluin­narutsigu aallussil­luarluta kiffartorfiginissaanut iluaqutigis­savarput. Misilin­neqarnermi pinertusaar­nissamut nakussatsis­sutigis­savarput kiffartor­nitsinnilu tamaviaarusus­suseqas­salluta. Aamma Jehovap qanimut attaveqarfigiuarnissaa aalajangiusimas­savarput. w24.06 20-21 § 3-4

Paulusip Tessaluunikamiunut oqaasii qanoq ilinniarfigisin­naavagut? Biibilimi ilinniak­katsinnut naapertuutin­ngitsumik tusagaqaraangatta imaluunniit uissuum­minartumik tusagaqarutta silatusaar­tariaqarpugut. Sovjetunioniusimasumi qatanngutit qullersaqarfim­meerpasissunik allagarsipput, allakkalli taakku uagutsinnut akeraasunit pipput. Allakkani qatanngutit ilaat kajumis­saarneqarput peqatigiis­sortamik allamut atanngitsumik pilersitsissasut. Allakkiaq uppernarpasik­kaluartoq qatanngutit aalajaatsut salloqit­tarneqan­ngillat. Paasivaat allakkani oqariar­tuutigineqartut ilinniak­kaminnut naapertuutin­ngitsut. Nalitsinni ilumoortumut akeraasut paatsiveerutsin­niarluta avissaar­tuutsin­niarlutalu teknologii nutaajunerusoq atortarpaat. ‘Paatsiveeruteqqunata’ tusakkagut atuakkagullu ilumoortunut ilinniarsimasatsinnut naapertuunnersut misissor­tarutsigit immitsinnut illersorsin­naavugut. – Tes 2. 2:2; Joh 1. 4:1. w24.07 12 § 14-15

Aalajangigassani tamani pingaaruteqar­nerpaaq tassaavoq Jehovamut tunniul­luinnarneq taassumalu ilaqutariis­sortaanut ilanngunneq. Jehovap kissaatigaa tamatta taamaalius­sasugut. Sooq? Inuit ikinngutigerusuk­kamigit naassaan­ngitsumillu inuuneqaleq­qullugit. (Mos 5. 30:19, 20; Gal 6:7, 8) Jehovap kinaluunniit kiffartorfigeq­qulluni pinngitsaalinngilaa. Taavami imermut morsutsitaasimasoq Guutip inatsisaanik unioqqutitsilluni ingasattumik ajortulioruni qanoq pineqassava? Peqqissimin­ngikkuni ilagiinnit peerneqassaaq. (Kor 1. 5:13) Taamaat­toqaraluarpal­luunniit Jehovap neriuutigiuarpaa ajortuliortoq imminut utissasoq. Tamannalu utertitsissummik pilersitsineranut peqqutaavoq pingaarutilik – tassa ajortuliortut peqqissimisut isumakkeerfiginias­sagamigit. Guutitta asannittup ajortuliortut qamannga pisumik kajumis­saarpai peqqissimeq­qullugit. – Zak 1:3; Rom 2:4; Jaak 4:8. w24.08 14 § 1-2

Johannesip allakkami pingajui allammagit kristumiut ilaat eqqunngitsunik avissaar­tuutaasunik ilinniar­titsipput. Taamaattorli suli ‘ilumoortoq malillugu inuusoqarpoq’. Taakku Jehovamut naalapput ‘inassutaanillu maleruaajuarlutik’. (Joh 2. 4, 6) Kristumiut aalajaatsut taakku Johannesimuin­naanngitsoq aammali Jehovamut nuannaarutaapput. (Uss 27:11) Uagutsinnut suna ilinniutissaava? Jehovamut aalajaanneq nuannaarutaasarpoq. (Joh 1. 5:3) Assersuutigalugu nuannaarpugut Jehova nuannaar­tittaratsigu. Ussernartut itigartik­kaangatsigit eqqortulioraangattalu Jehova nuannaartarpoq. Inngilit qilammiittut aamma tamanna nuannaarutigaat. (Luk 15:10) Aamma uppeqatigut aalajaat­tuartut takugaangatsigit nuannaar­tarpugut. (Tes 2. 1:4) Saatanillu silarsuaa ajortoq peeruppat Jehovamut ilumoorfigin­nittuarsimanerput nuannaarutigis­savarput. w24.11 12 § 17-18

Peeraqalerusullutit uppeqatit soqutiginerarlugu oqarfigin­nginnerani qanoq sivisutigisumik maluginiaq­qaassaviuk? Saaffigiaarpal­laarukku immaqa isumaqassaaq eqqarsaq­qaarnak iliuuseqapal­lattutit. (Uss 29:20) Aappaatigulli malugisin­naaguniuk soqutigineqarluni oqarfiginis­saanullu nangaaguit eqqarsarsinnaavoq nalornisutit. (Oqal 11:4) Eqqaamajuk uppeqatit saaffigigukku qulakkeerlugu isummis­sanngilatit taanna katinniarlugu. Qularin­ngittariaqarpalli katinnissamut piareersimallutit taannalu ilinnut tulluarsinnaasoq. Taavami illit misigiguit uppeqativit soqutigigaatit? Peerarilernissaa soqutigin­ngikkukku ersarissumik takutiguk. Asannit­tuliornerus­sanngilaq eqqarsalersikkukku peerariilersin­naasusi uffa tamanna kissaatiginagu. – Ef 4:25. w24.05 22-23 § 9-10

Tanitat ilumoortut aalajaatsullu kisimik Kunngeqarfimmut qilammiittumut Jiisusimit tikilluaq­quneqassapput. Tanitaq anersaakkut ilimasun­ngikkuni ‘toqqakkanut katersor­neqartussanut’ ilaassanngilaq. (Mat 24:31) Guutimut kiffaasut tamarmik, qanorluunniit neriugisallit, Jiisusip mianersoq­qussutaa aalajaallutik ilimasut­tuujuarnikkut eqqumaf­figissavaat. Jehova ilisarisimal­luaratsigu naapertuil­luartumik eqqartuussinera tatigaarput. Taamaattumik Jehovap aalajaatsut ilaat ukiuni kingulliunerusuni tanitatut toqqarniarlugit aalajangerpagu isumakuluutigis­sanngilarput. Jiisusip viinnequteqarfimmik assersuusiaani nalunaaqutaq tallimat missaanni sulisus­sarsiarineqartut eqqarsaatigisin­naavagut. (Mat 20:1-16) Taakku siusinnerusukkullu sulisus­sarsiarineqartut assigiimmik akissarsisin­neqarput. Tamatumunnga assingusumik tanitat qaquguk­kulluunniit toqqarneqaraluartut aalajaat­tuarunik qilaliar­nissamik akissarsissapput. w24.09 24 § 15-17

Eqqunngitsumik pineqarnerup naammagalugu atornissaanut tunngatillugu Jiisusi maligas­siuilluarpoq. Ilaquttaminit allanillu qanoq pineqar­tarnersoq eqqarsaatigiuk. Ilaquttaminit uppinngitsunit silanngajaar­nerarneqarpoq, upperisarsiornikkut siuttunit anersaapilunnik suleqateqartutut unnerluutigineqarpoq, Romamiullu sakkutuuinit illaruaatigineqarpoq, unatarneqarpoq toqunneqarlunilu. (Mak 3:21, 22; 14:55; 15:16-20, 35-37) Taama naapertuil­luanngitsigisumik Jiisusi pineqaraluarluni akiniaan­ngisaannarpoq. Maligas­siaanit suna ilinniarsin­naavarput? (Pet 1. 2:21-23) Naapertuil­luanngitsumik pineqar­nitsinni sunissatsinnik Jiisusip pitsaanerpaamik maligas­sippaatigut. Qaqugukkut nipangersimaan­nassanerluni qaqugukkullu oqaaseqas­sanerluni naluneq ajorpaa. (Mat 26:62-64) Salluliuutigineqaraangami oqaaseqar­tuaannanngilaq. (Mat 11:19) Oqaaseqaraangamilu imminut akerlilersuisut akillugit ajuallan­nartunik oqaaseqarfigineq ajorpai sioorasaar­nagillu. w24.11 4-5 § 9-10

Takorlooruk asasat immikkuul­larissumik, atorneqarluarsin­naasumik kusanar­tumillu tunissuteqarfigigit. Tunissut quimut iliinnarlugu eqqarsaatigiun­naarpagu pakatsingaas­sagunarputit. Akerlianilli atorluarpagu qujamasun­nerminillu ersersitsippat tamanna nuannaarutigingaassavat. Assersuut tamanna sumut atorsin­naavarput? Jehovap asanninnini kajumis­sissutigalugu ernini uagut pilluta tunniuppaa. Tunissutaa tamanna asanninneralu qujamasuutigalugit ersersitsigutta nuannaangaassaaq. (Joh 3:16; Rom 5:7, 8) Piffissap ingerlanerani utertitsissummik tunissut taamaat­tussaannartut isigilersoorsin­naavarput. Tamatumali assigiin­nassavaa Guutimit tunissutisiarput quimut iliinnarutsigu. Nuannaarutigigaluarlugu eqqarsaatigisarun­naassavarput. Taamatut pisoqan­nginniassammat Jehovap Jiisusillu uagut pilluta iliuusii tamaasa eqqarsaatigisas­savagut. w25.01 26 § 1-2

Qatanngut angut utoqqaaner­tanngor­tinneqartoq uppilerlaajus­sanngilaq. Imaanngilaq ukiorpassuarni Nalunaajaasuusimasariaqartutit, anersaakkulli inersimal­luartun­ngornissannut piffissaqar­tariaqarputit. Utoqqaaner­tanngor­tinneqan­nginninni qanorluunniit ilagiinni suliassin­neqaraluarlutit Jiisusi ilaarlugu maniguullutit kajumil­lutillu kiffartor­tuassaatit. Aamma amerlanerusunik suliassin­neqarnissavit tungaanut Jehova naammagit­tarlutit utaqqissavat. (Mat 20:23; Flp 2:5-8) Aalajaallutit Jehovap iluarisaatut inooriaaseqarnikkut aamma peqatigiis­sortaanit ilitsersuutinik maleruaanikkut ersersis­sinnaavat ilumoorfigin­nittuullutit. Biibilimi allassimavoq utoqqaanertaq ilinniar­titsinissamut piukkun­nartuussasoq. Tamanna isumaqarpa oqalugial­laqqissuusariaqartutit? Naamik. Utoqqaaner­taalluartut amerlasuut oqalugial­laqqinngik­kaluarlutik oqaluus­sinermi qatanngutinillu siunnersuinermi ilinniar­titsilluartarput. w24.11 23-24 § 14-15

Biibilimi atuakkatit paasilluan­ngikkaangakkit misissoq­qissaartakkit. Ilikkakkatit aamma Jehova, ernera taakkualu asanninnerat pillugit misissorsimasatit ullup ingerlanerani eqqarsaatigeq­qissaartakkit. (Tuss 119:97) Atuarninni misissueq­qissaar­ninniluunniit nutaanik pissanganar­tunillu paasisaqan­ngikkaangavit nikallus­sutigeqinagu. Kuultisiortutut imminut takorloortarit. Kuultisiortoq nalunaaquttap-akunnerpassuini ullorpas­suarniluunniit ujaaseq­qaarluni aatsaat nassaartarpoq. Nassaanili tamarmik naleqarmata tunniutiinnarneq ajorpoq. Biibilimi ilumoortut kuultimin­ngarnit naleqar­nerungaarput! (Uss 8:10) Taamaattumik Biibilimik atuarnissamut pilersaarusiat naammagit­tarlutit malittaruk. – Tuss 1:2. w25.01 25 § 14-15

Jehovap piumasaraa uagutsinnik ajuallatsitsisimasut isumakkeerfigiumas­sagigut. (Tuss 86:5; Luk 17:4; Ef 4:32) Inuup allap oqaasii iliuusiilu annertuumik ajuallaatigisin­naavagut, ingammik taanna qanimut ikinngutigigutsigu ilaqutarigutsiguluunniit. (Tuss 55:13-15) Misigis­sutsikkut annersin­neqarneq panamik kapineqarnertut misiginarsinnaavoq. (Uss 12:18) Immaqa misigis­sutsigut sumigin­narniarsarivagut. Taamaalior­nerulli assigiinnarpaa savimmik kapineqarneq savimmillu ikitsin­niititsiinnarneq. Tassa ajuallatsin­neqarnermi misigis­sutsigut sumigin­narutsigit ilorraal­lannissarput ilimagisin­naanngilarput. Biibilimi allassimasutut ajuallatsin­neqarutta kamaqqaarsin­naavugut. Aammali allassimavoq kamassimajuaan­nassanngitsugut. (Tuss 4:5; Ef 4:26) Sooq? Kamanneq amerlanertigut kingunipiloqartarmat. (Jaak 1:20) Eqqaamajuk kamaammerneq qisuariar­nerusoq kamassimajuaan­narnerli aalajangiinerulluni. w25.02 15 § 4-6

Jiisusip assersuusiorluni nassuiarpaa aningaasanik katersisoq ‘Guutimili pisuujun­ngitsoq’ sianiitsuusoq. (Luk 12:16-21) Siunissami qanoq pisoqarnissaa kialuunniit ilisimanngilaa. (Uss 23:4, 5; Jaak 4:13-15) Jiisusilu oqarpoq imminut malinnit­tunngorusuttut tamarmik ‘pigisaminnik sussakkeerinis­saminnut’ piareersimasariaqartut. (Luk 14:33) Kristumiut siulliit Judiiamiittut taamaaliorsimapput, pigisaminnimmi annaasaqarnertik ‘nuannaarlutik akuerisarpaat’. (Hebr 10:34) Nalitsinni qatannguterpassuagut suliffimminnik annaasaqarsimapput politikkikkut partiit arlaannaal­luunniit tapersersorusun­nginnamikku. (Saqq 13:16, 17) Taamaalior­nissaminnut suna sapiillis­sutigisimavaat? Jehovap neriorsuutaa una upperil­luinnarpaat: “Qimanngisaan­narlutillu imminiin­ngisaan­nassavakkit.” (Hebr 13:5) Siunissami pisariaqar­titatsinnut pilersaarusior­niartarpugut, ilimagin­ngisatsinnillu pisoqas­sagaluarpat Jehovamit isumagineqar­nissarput tatigis­savarput. w25.03 29 § 13-14

Jehovap naatsorsuutiginngilaa nammineerluta anersaakkut ineriar­tussasugut. ‘Kristusitut inersimal­luartun­ngornis­satsinnut’ ikiorneqar­niassagatta ilagiinni paarsisunik ilinniar­titsisunillu Jehovap tunivaatigut. (Ef 4:11-13) Aamma ‘Kristusitut eqqarsar­taaseqar­niassagatta’ Jehovap anersaaminik illernartumik ikiortarpaatigut. (Kor 1. 2:14-16) Tamatuma saniatigut iivangkiiliut sisamat Biibilimut allatsippai, taakkulu iluaqutigalugit Jiisusip nunarsuarmiin­nermini eqqarsar­tariaasia, oqaloriaasia iliuusiilu paasisin­naavagut. Jiisusip ilaarneratigut anersaakkut inersimal­luartun­ngorsin­naavugut. Anersaakkulli inersimal­luartun­ngussagutta “Kristusi pillugu ilinniar­titsissutigineqartut pingaarnerit” ilikkareerlugit suli ilinniar­tuartariaqarpugut. w24.04 4-5 § 11-12

Ullut tamaasa aalajangigas­saqartarpugut. Aalajangigassat ilaat, soorlu suut ullaakkorsiutigis­sanerlugit imaluunniit qassinut innassanerluta, aalajangeruminar­nerusarput. Aalajangigassalli allat nalorninar­nerusarput. Peqqissutsitsinnut, pilluar­nissatsinnut, asasatsinnut Jehovamul­luunniit kiffartor­nitsinnut sunniuteqarsin­naapput. Iluaqutigisas­satsinnik ilaquttattalu iluaqutigisas­saannik aalajangeerusut­tarpugut. Pingaar­nerpaatullu Jehovap iluarisaatut aalajangiinissarput kissaatigaarput. (Rom 12:1, 2) Aalajangiil­luassagaanni iliuuserisassaq pingaarutilik tassaavoq paasiniaaneq. Tamanna sooq pingaaruteqarpa? Takorlooriaruk perulun­nartumik nappaateqarsorisoq nakorsiartoq. Nakorsap misissornagu apersornagulu nakorsar­tinnissaanut tunngatillugu aalajangiissava? Soorunami naamik. Illittaaq atukkannut tunngatillugu paasiniaaq­qaaruit aalajangiil­luarnerusin­naassaatit. w25.01 14 § 1-3

Jehova nallittuingaarpoq kialuunniillu suujunnaarsitaanissaa kissaatiginagu. (Pet 2. 3:9) Ingasattumik ajortuliorsimasut qanoq nallittorsimavai? Kunngi Daavi ingasattumik ajortuliorsimavoq allasiorluni inummillu toqutsilluni. Ilumoorlunili peqqissimigami Jehovamit nallittor­neqarluni isumakkeerfigineqarpoq. (Sam 2. 12:1-12) Kunngi Mannarsi inuunermi annersaani ingasat­torujus­suarmik ajortuliortarpoq. Taama ingasatsigigaluartoq peqqissimimmat Jehovap nallittuingaarluni isumakkeerfigaa. (Nal 2. 33:9-16) Oqaluttuat taakkua marluk eqqaasip­paatigut Jehova pissutis­saqaraangami nallittuisartoq. Inuillu ajortuliungaarsimanerminnik paasinnil­lutillu peqqissimisut makitissavai. w24.05 5 § 12