Marsi

Biibilimi oqaluttuarineqarput inuit aallaqqaammut eqqortuliortut piffissallu ingerlanerani ingasattumik ajortulior­talersut. Kunngi Saalumuut taakkua ilagaat. Jehova inatsisaalu ilisimal­luarpai Jehovamillu pilluaq­quneqangaarluni. Kingusin­nerusukkulli guutipiluit guutisiorfigisalerpai. Jehovap kamaatingaarpaa, ajortuliaalu pissutigalugit inuiaqatigiit Israalikkut ukiorpassuarni naalliupput. (Kng 1. 11:5-9; Kng 2. 23:13) Biibilimi allassimavoq Saalumuut ‘siuaasamini qasuersaalersoq’. Angutillu aalajaatsut, soorlu kunngi Daavi, aamma taama allaatigineqarput. (Kng 1. 11:21, 43) Taamatulli allassimanera Jehovap Saalumuumik makititsinissaanut qulakkeerutaava? Biibilimi allassimanngilaq. Toqusunit makititaaneq Guutimit asannittumit tunissutaavoq. Jehovallu imminut kiffartor­nissamut periarfis­sikkusutaminut tunissutigissavaa. (Job 14:13, 14; Joh 6:44) Saalumuup tunissut taanna pissavaa? Naluarput, Jehovap kisimi akissutaa nalunngilaa. Nalunngilarpulli Jehova eqqortulior­tuaannartoq. w24.05 4 § 9

Jehovamut tunniul­luinnaratta tupianut assersuutaasumut iserpugut. Naammat­torsuarmik anersaakkut inuussutis­saqarnerput Jehovallu qaaqqusaanik allanik peqateqar­tarnerput nuannaarutigaagut. Jehovap tupia assersuutaasoq sumiiffimmi aalajangersimasumiinngilaq. Tassa sumiikkaluarut­taluunniit Jehova aalajaalluta kiffartorfigigutsigu taassuma tupianiissaagut. (Saqq 21:3) Aalajaallutik toqusimasut suli Jehovap tupianiippat? Aap! Sooq taama oqarsin­naavugut? Jehovap taakku eqqaamal­luaramigit suli inuusutut isigai. Tamanna Jiisusip ima nassuiarpaa: “[Moorsisip] orpigaq kapinartulik pillugu oqaluttuamini Jehova ‘Aaperaap Guutianik, Iisaap Guutianik Jaakullu Guutianik’ taagamiuk toqusut makititaajumaartut paasinarsisippaa. Taanna toqusut Guutigin­ngilaat, inuusulli Guutigaat. Taassumami tamaasa inuusutut isigai.” – Luk 20:37, 38. w24.06 3 § 6-7

Sadoki Hebroniliarami sakkulisarluni sorsunnermi akiuunnissamut piareersimavoq. (Nal 1. 12:39) Israali saassun­neqarnerani illersorumallugu Daavi sorsoqatigiumavaa. Sadoki sakkutuutut misilit­tagakik­kaluarluni sapiissuseqangaarpoq. Palasi Sadoki qanoq sapiissuseqalersimava? Angutit nukittuut sapiitsullu amerlasuut ilisarisimavai. Qularnan­ngitsumik taakku ilinniarfigil­luarsimavai. Assersuutigalugu Daavi siulersuisutut sakkutuutullu sapiissuseqangaarmat Israalikkut tamarmik kunngin­ngortik­kusuppaat. (Nal 1. 11:1, 2) Daavip akeqqaminik saassus­sinermini Jehova tatigiuarpaa. Ima allappoq: “Taamani suaarama akivarma; sapiillisipparma nakussatsil­lungalu.” (Tuss 138:3, New World Translation) Sadokip aamma angutit allat ilinniarfigisimavai, soorlu Jojada taassumalu ernera Benaja sakkutuujusoq aamma siuaasaqaqatigiis­sortamini naalagaasut 22-t Daavimut ilumoorfiginnittut. – Nal 1. 11:22-25; 12:27-29.w24.07 3 § 5-6

Saulusip Taarsusimiup Kristusip malinnittai peqqarniitsumik malersorpai. Ilimanarpoq kristumiut amerlanerit isumaqartut allanngorsin­naanngitsoq. Jiisusili makititaasimasoq inuttut ajortiliusutut eqqarsanngilaq. Taassuma Ataatamilu Saulusip ajunngitsortai takusimavaat. Jiisusi oqarpoq ‘oqaluus­sisussatut toqqarlugu’. (ApS 9:15) Saulusi peqqissiminissamut ikiorniarlugu allaat tupinnar­tuliorpoq. (ApS 7:58–8:3; 9:1-9, 17-20) Kristumiun­ngoreerluni Saulusip, kingusin­nerusukkut apustilitut Paulusitut taaneqartup, ajunngisaarfigineqarnini nallittor­neqarninilu qujamasuutigalugu eqqaakulasarpaa. (Tim 1. 1:12-15) Paulusip Korintimi ilagiinni atoqatigiinnikkut eqqunngitsuliortoq iliuuseqarfigineqan­ngitsoq tusaramiuk qanoq siunnersorpai? Korintimiunut allagaanit paasisin­naavarput Jehova kiffaminik qanoq asannilluni perorsaatis­siisartoq peqqissimisunillu qanoq nallittuisoq aamma uagut Jehova qanoq ilaarsin­naagipput. w24.08 13 § 15-16

Inuit ajortiliusut imminut qanoq qanillisin­naanerat piffissap ingerlanerani Jehovap paasitik­kiartuaarpaa. Aabeli, Adamip Evallu ernerat, Edenimi pikitsitsinerup kingorna Jehovamut uppertut siullersaraat. Aabelip Jehova asagamiuk qanillerusuppaa taassumanngalu iluarisaarusulluni. Aabelip savaaraatimi ilaat tiguaa Jehovamullu pilliutigalugu. Jehovap qanoq igaa? “Abelip pilliutaa iluaraa.” (Mos 1. 4:4) Jehovap kiffani asannitsini tatigin­nitsinilu, soorlu Nooatut ittut, pilliigaangata aamma iluarin­ninnini ersersittarpaa. (Mos 1. 8:20, 21) Pilliutit taamaattut akuerinerisigut inuit ajortillit iluarisin­naallugillu imminut qanillisin­naanerat Jehovap ersersippaa. w24.08 3 § 5-6

Eqqunngitsumik pineqarnerput anniaatigingaarsin­naavarput. (Mos 5. 28:33, 34) Jehovamut kiffartortut aalajaatsut, soorlu Juubi Habakkukilu, aamma taama misigipput. (Job 6:2, 3; Hab 1:1-3) Taama misigineq pissusis­samisooraluartoq ajortumik qisuarian­nginnissarput mianersuutigisariaqarparput. Taamaaliun­ngikkuttami ajornerulersitsiin­narsinnaavugut. Ajortuliortut ingerlaannaq pillarneqan­ngikkaangata eqqortuliornerup iluaqutissartai apeqquser­toorsin­naavagut. Maluginiaruk tussiaasiortut ilaat qanoq misiginersoq. Inunnut eqqortuliorusuttunut ajortumik pinnittartut iluatap­pasinnerat maluginiarpaa. Ima allappoq: ‘Tassa taama ipput iluaatsut, isumakuluuteqan­ngittuaannarput.’ (Tuss 73:12) Naapertuil­luanngitsuliorneq aliatsaatigingaaramiuk Jehovamut kiffartornerup iluaqutissartai apeqquserpai ima allalluni: “Taava eqqarsarpunga paasiniarumallugu. Uanga isinni tamanna eqqunngitsuuvoq.” – Tuss 73:14, 16. w24.11 3 § 5-7

Jehova mianerigatsigu unnersiutigaarput. Jehovap mianerinissaanut arlalinnik pissutis­saqarpugut. Jehova killeqan­ngitsumik pissaaneqarpoq. (Tuss 96:4-7) Pinngor­titaanit tamanit ersarippoq asseqan­ngitsumik ilisimas­suseqartoq. Inuunerup pilerfigaa, inuussutis­satsinnillu tamanik pilersitsisuuvoq. (Saqq 4:11) Ilumoorfigin­nittuuvoq. (Saqq 15:4) Iliuusii tamarmik kinguneqarluartarput, neriorsuinermisullu iliortuaannarpoq. (Jos 23:14) Paasinarluinnarpoq Jehova pillugu Jeremia ima allammat: “Inuiaat tamarmik ilisimasortaanni kunngiisalu akornanni ilittut ittoqanngilaq”! (Jer 10:6, 7) Ataatatta qilammiusup mianerinissaanut ilumut pissutis­saqarluarpugut. Jehovali mianeriin­narnagu pingaarnertut asagatsigu unnersiutigaarput. w25.01 3 § 5-6

Guutimut akerlilersuisut taassuma peqatigiis­sortaasa ajunngitsortaat ajortumik isigineqalersin­niarsarisarpaat. Assersuutigalugu Biibilimi paasivarput Jehovap piumasaqaatigigaa kiffani timikkut, ileqqus­satigut anersaakkullu minguitsuussasut. Kinaluunniit peqqissiminani mingunnartumik iliuuseqar­tuartoq ilagiin­nikkunnaarsin­neqassasoq piumasaraa. (Kor 1. 5:11, 12; 6:9, 10) Biibilimi peqqussut tamanna maleruar­tarparput. Taamaalior­tarattali akerlilersortigut oqartarput asannit­tuunngitsugut, assuarin­nittartugut akaareqatigiin­ngitsugullu. Kina sallulior­tuunersoq eqqaamasariaqarparput. Saatani Diaavulu peqatigiis­sortagut pillugit salluliortarpoq. Taanna ‘sallumut ataataavoq’. (Joh 8:44; Mos 1. 3:1-5) Taamaattumik naatsorsuutigis­savarput Saatanip akerlilersortigut aqqutigalugit Jehovap peqatigiissortai pillugit salluliuutinik siammar­terissasoq. w24.04 10 § 13-14

Annikil­liornar­tussarsuaq aallartippat Babylon­nersuarlu suujunnaarsitaappat imaassinnaavoq inuit ilaasa eqqaalissagaat Jehovap Nalunaajaasuisa ukiorpassuarni taama pisoqassasoq oqaluus­sissutigisimagaat. Tamakkuninnga takunnittut ilaat allamik isiginnit­taaseqalerlutik Jehovamut kiffartorusulersin­naassappat? (Saqq 17:5) Taama pissappat tamanna Moorsisip nalaani Egyptenimi pisunut assingussaaq. Taamani Israalikkut Egypteni qimammassuk “peqataaniar­torpassuit assigiin­ngeqisut” aallaqataapput. (Mos 2. 12:38) Imaassinnaavoq taakkua ilaasa Moorsisip perluit qulit pillugit mianersoq­qussutai piviusun­ngortut takugamikkit Jehovamut uppertun­ngortut. Babylon­nersuup suujunnaarsitaanerata kingorna assingusumik pisoqassappat Harmagedonnip nalliutin­ngilaarnerani inuit uagutsinnut ilanngus­sinnaanerat ajorissavarput? Soorunami naamik! Ataatarpummi qilammiusoq ‘Guuti nallittuisuusoq saammaasorlu, kamajaatsoq ilumoornermik sallusuis­summillu peqangaartoq’ ilaarusupparput. – Mos 2. 34:6. w24.05 11 § 12-13

“Oqaatsit ineriar­tornartut tunngavigalugit malittarisassiaq” maleruarun­naarutsigu qanoq pisoqassava? Assersuuteqariarta. Kristumiut siulliit nalaanni ilagiin­niittut ilaat eqqunngitsumik oqarput Jehovap ullua nalliutereersimasoq. Allakkiaqarsimagunarpoq apustilimit Paulusimit allannerar­neqartunik taama imalinnik. Ilumoornerat qulakkiin­ngivillugu kristumiut Tessaluunikamiittut ilaasa tamanna upperaat allaallu tusatsiagaq ingerlateq­qillugu. Paulusimit najorneqarlutik ilinniar­tinneqarnertik eqqaamasimasuugunikku salloqit­tarneqarsimanavian­ngikkaluarput. (Tes 2. 2:1-5) Paulusip qatanngutit siunnersorpai tusakkatik tamaasa upperis­sanngikkaat. Paulusillu ikiorniarlugit Tessaluunikamiunut allakkami aappaanni ima inerniliivoq: “Taama uanga Paulusi nammineq assannik allallunga inuulluaq­qusivunga, tassa allakkanni tamani ilisarnaatitut allariaasera.” – Tes 2. 3:17. w24.07 12 § 13-14

Judiiami pissutsit ajorsiar­tuinnar­tillugit kristumiut hebræeriusut Jehovamut kiffartor­nerminni pinertusaar­tariaqarput. Taakkua ilaasa malersugaaneq sakkortuumik misigigaluaraat ilarpassuisa misigin­ngilaat. Paulusip eqqaavaa uppernikkut assigiin­ngitsunik misilin­neqaraluarlutik suli ajornerusumik misilin­neqarnissartik piareersimaf­figissagaat, tassa Jiisusitut allaat toqumut aalajaan­nissartik piareersimaf­figissavaat. (Hebr 12:4) Kristumiussuseq siaruariar­tortillugu juutit akerlilersuisut kamangaarlutillu peqqarniis­sigalut­tuinnarput. Ukiualuinnaat qaangiupput juutit 40-nit amerlanerusut ‘isumaqatigiipilul­lutillu uppernarsaammatali Paulusi aatsaat toqoreerunikku nerillutillu imerniarlutik’. (ApS 22:22; 23:12-14) Kristumiut uumissor­neqarlutillu malersor­neqassagaluarunik suli ataatsimiit­tassapput, nutaarsiassat nuannersut pillugit oqaluus­sisassapput uppernikkullu nakussatsit­tassallutik. w24.09 11 § 15

Johannesi Jiisusimut qanimut ikinngutaavoq apustiliullunilu. (Mat 10:2) Jiisusi kiffartornerani ilagisarpaa, tupinnartuliai takusarpai artornar­torsior­neranilu najorlugu. Jiisusip toqutaanera takuaa makititaaneratalu kingorna takullugu. Kristumiut siulliit ikittunnguit amerliar­tornerat takuaa. Aap, allaat nutaarsiassat nuannersut ‘inunnut tamanut oqaluus­sissutigineqarnerat’ angumeraa. (Kol 1:23) Johannesip utoqqarsuulluni Guutip oqaasianik allaqataanini immikkut pisinnaatitaaffigaa. “Jiisusimit Kristusimit saqqummersitat” alutornartut allappai. (Saqq 1:1) Iivangkiiliut ilaat allappaa. Aamma allakkat Guutimit isumassarsiarititaasut pingasut allappai. Allakkat pingajui uppeqatiminut Gaajusimut, anersaakkut ernermisut isigisaanut, allataavoq. (Joh 3. 1) Utoqqaap aalajaatsup taassuma allatai manna tikillugu Jiisusip malinnittaanut tamanut qiimmaal­laataapput. w24.11 12 § 15-16

Uiusup nuliaminik asannittup nuliani naleqar­tillugulu qujamasuutigisarpaa. Jehovamit tunissutitut naleqangaartutut isigaa. (Uss 18:22; 31:10) Taamaattumik inussiar­nisaarfigalugulu ataqqin­nittumik pisarpaa, aamma atoqatigiinnerup tungaatigut. Atoqatigiinnerup tungaatigut nuannarin­ngisaanik iliuuseqar­tinniarsarinavianngilaa nikanarsaataasin­naasumik nalunngeqatigin­nissutaanul­luunniit akornutaasin­naasumik. Aamma nammineq nalunngeqatigin­nissutiminut akornutaasin­naasumik iliuuseqar­niarnavianngilaq. (ApS 24:16) Qularis­sanngilat Jehovap nuannaarutigingaartaraa sapinngisannik nuliat oqaatsitigut iliuutsitigullu ataqqin­nittumik pigaangakku. Ataqqin­nittumik pisarnissaa aalajangiusimajuk nikanarsaataasumik iliuuseqan­nginnikkut akerlianilli inussiar­nisaarfigisarlugu, ataqqin­nittumik pisarlugu asannit­tuliorfigalugulu. Taamaalioruit takutissavat asallugu naleqar­tillugulu. Nuliat ataqqin­nittumik pisaruk, taava Jehovamut ikinngutaanerit – attaveqarnerit pingaar­nerpaaq – illersussavat. – Tuss 25:14. w25.01 13 § 17-18

Jehovap kiffaasa oqaluus­sinermi aallussil­luartuunertik kristumiuunerartunit allaanerus­sutigaat. Oqaluus­sinermi aallussil­luartuujuar­nissamut allaallu oqaluus­sinermik nuannarin­ninneruler­nissamut suna iluaqutigis­savarput? Oqaluus­sinermi qanoq aallussil­luartuusin­naanerput pillugu Jiisusi ilinniarfigisin­naavarput. Jiisusi oqaluus­sinermini aallussil­luartuujuarpoq. Piffissallu ingerlanerani allaat oqaluus­sinerulerpoq. Viinnequteqarfimmi sulisumut imminut assersuuppoq. Sulisup orpik fiiginequt ukiuni pingasuni naggoris­sarsimagaluarpaa, inerititaqan­ngilarli. Viinnequteqarfimmili sulisup neriuutigiuarpaa orpik taanna inerititaqalissasoq. Taanna assigalugu Jiisusi ukiut pingasut missaanni juutinut oqaluus­sisarsimavoq, taakkualu amerlanersaasa upperfigilin­ngilaat. Jiisusilli juutit imminiigin­narnagit oqaluus­siffigiuarpai. (Luk 13:6-9) Ilaarutsigu ilinniar­titsissutaalu naalakkutsigit aallussil­luartuujuarsin­naavugut. w25.03 14-15 § 1-4

Taavami isumaqaruit uppeqat aappaal­luarpasis­sinnaasoq? Ingerlaannaq oqarfigissaviuk soqutigalugu? Biibilimi allassimavoq silatooq iliuuseqar­tinnani ilisimasaqaler­niaqqaartartoq. Taamaattumik uppeqatit soqutiginerarlugu oqarfigin­nginnerani inuttut qanoq ittuunerata maluginiaq­qaartarnissaa silatusaar­neruvoq. Qanoq malunnaarsaarlutit maluginiarsin­naaviuk? Ilagiit ataatsimiit­tarnerini aamma katerisimaarnerni anersaakkut inuttullu qanoq ittuunera pissusilersorneralu maluginiar­tarsinnaavatit. Kikkut ikinngutigai? Suut eqqartortarpai? (Luk 6:45) Anguniagai illit anguniakkannut naapertuuppat? Utoqqaanertat imaluunniit anersaakkut inersimal­luartut allat taassuminnga ilisarisiman­nilluartut oqaloqatigisin­naavatit. (Uss 20:18) Aperisin­naavatit allanit qanoq tusaamaneqarnersoq aamma qanoq pissuseqarnersoq. (Ruth 2:11) Uppeqatilli soqutigisat maluginiar­tillugu nuanniil­liortin­nginnissaa eqqumaffigiuk. Inuttut ataqqiuk. w24.05 22 § 7-8

Utoqqaanertat isummipal­lassanngillat ajortuliorsimasoq peqqissimiumanavian­ngitsoq. Ajortuliorsimasut ilaat utoqqaanertanik ataatsimeeqatigiinnermi siullermi peqqissimisarput, allalli piffissaqar­nerusariaqarput. Taamaattumik utoqqaanertat aalajangersin­naapput ajortuliorsimasoq oqaloqatigeq­qinniarlugu. Immaqa ataatsimiinnerup siulliup kingorna ajortuliorsimasup imminut oqaaserineqartut pimoorus­silluni eqqarsaatigilissavai. Immaqa maniguulluni Jehovamut isumakkeerfigeq­qulluni qinussaaq. (Tuss 38:19) Taamaattumik ataatsimiinnermi tulliuttumi allamik isiginnit­taaseqalersimasinnaavoq. Ajortuliorsimasoq peqqissiminissamut ikiorniarlugu utoqqaanertat paasinnit­tuullutillu inussiar­nersuusarput. Iliuutsitik pilluaq­qoqqullugit Jehova qinnuigisarpaat, neriuutigisarpaallu ajortuliorsimasoq silattuaqillunilu peqqissimissasoq. – Tim 2. 2:25, 26. w24.08 22-23 § 12-13

Jehovap kissaatiginngilaa kinaluunniit suujunnaarsin­neqassasoq. Ajortuliortut imminut saammaan­narsinissaat kissaatigaa. (Kor 2. 5:20) Taamaammat oqaluttuarisaanerup ingerlanerani Jehovap innuttani, aamma kiffani ataasiakkaat, qimagus­simasut peqqissiminis­saannut uternis­saannullu kajumis­saartuartarpai. Ajortuliortunik peqqissiminissamut ikiuiniar­nerminni utoqqaanertat Jehovamik suleqateqarnertik immikkut pisinnaatitaaffigaat. (Rom 2:4; Kor 1. 3:9) Takorlooruk ajortuliortut peqqissimigaangata qanoq qilammi nuannaar­tigisarnersut. Ataatarput qilammiusoq Jehova savaatiminik utertoqaraangat nuannaangaartarpoq. Jehovap isumassuinera, nallittuinera ajunngisaangaarneralu eqqarsaatigigaangatsigit asaneruler­tarparput. – Luk 1:78. w24.08 31 § 16-17

Jiisusip inunnit kunngin­ngortin­neqarnissani akuerigaluaruniuk juutit Romamiunit naalakkersuif­figineqartut politikkikkut illersus­sagaluarpai. Qimariarlugit kisimiilluni qaqqamukarpoq. Allanit tatineqaraluarluni politikkimut akuliuk­kusunngil­luinnarpoq. Tamanna uagutsinnut ilinniagassaavoq pingaarutilik! Soorunami inuit piumaffiginavian­ngilaatigut tupinnar­tuliornikkut nerisitsis­sasugut napparsimasunillu ajorunnaarsitsis­sasugut, aamma kunngin­ngortin­niarnavian­ngilaatigut. Imaassin­naavorli qinersinissamut politik­kerimul­luunniit tapersersuinissamut peqataaq­qulluta kimigiiserfigigaatigut. Jiisusilli maligassiaa ersarippoq. Politikkimut akuliunneq ajorpoq, allaallu ima oqarpoq: “Kunngeqarfiga nunarsuarmeersuunngilaq.” (Joh 17:14; 18:36) Kristumiuugatta Jiisusip eqqarsariaasia iliuusiilu ilaarusuppagut. Uagut Guutip kunngeqarfia tapersersorparput, oqaluus­sissutigisarparput tikiunnissaalu qinnutigisarlugu. – Mat 6:10. w24.12 4 § 5-6

Misissuininni ilikkakkannik qanoq timitaliisin­naanerlutit eqqarsaatigisaruk. Assersuutigalugu Jehovap naapertuil­luartuunera nakerisarsiun­nginnikkut ilaarsinnaavat. Ajornakusooraluaraangal­luunniit Jehovap aqqa pillugu kajumillutit iliuuseqar­tuarnikkut uppeqatinnullu ajunngisaar­tuartarnikkut Jiisusip Ataataminut allanullu asanninnera ilaarsinnaavat. Aamma Jehovap inunnut iliuuserisimasarpassui pillugit ilisimasaqalersin­naaqqullugit utertitsissullu upperiler­niassammassuk allanut oqaluus­siuartarnikkut Jiisusi ilaaruk. Utertitsissut pillugu paasinnik­kiartuaar­nitsinni pingaar­titsiar­tuaarnitsinnilu Jehova Jiisusilu asanerujar­tuinnas­savagut. Taakkualu asanerujar­tuinnas­savaatigut. (Jaak 4:8) Qanortoq Jehovap tunissutai tamaasa atorluarlugit utertitsissut pillugu ilinniar­tuarisa. w25.01 25 § 16-17

Ullormut allassimaffimmi ersersin­neqarpoq ajortuliagut peqqissimis­sutigigutsigit Jehovap tigoriarlugit igissagai. Aamma imatut nutserneqarsinnaavoq: “Ajortuliakka ajortuliarineqarsiman­ngisaan­nartutut isigivatit.” Biibilimi tamanna aamma assersuummi allami erseqqis­sarneqarpoq. (Mika 7:18, 19) Versini allassimavoq Jehovap ajortuliagut immap itineranut igissagai. Itsaq immap itineranut igitat tiguneqaq­qissinnaan­ngillat. Assersuutit sammineranni paasivarput Jehovap isumakkeerfigigaangamisigut pisuusutut misigiun­naaqqulluta ajortuliatta oqimaaqqutaat tuitsinniit peertarai. Daavip oqaasii uku ilumoorput: “Pilluarput inatsisaatsutut iliuuseqarnertik pillugu isumakkeerfigineqarlutillu ajortuliaminnik matoorif­figineqartut.” (Rom 4:6, 7) Tamanna isumakkeerfigin­ninniviuvoq! w25.02 9 § 7-8

Nunarsuarmi maannakkut assersuutaasumik paratiiseqarpoq. Tassani inuit millionillit eqqisseqatigiil­luinnarlutillu ajunngitsuinnarnik aallutaqarput. Taakkualu taanna qimanngisaan­narniarlugu aalajangiusimavaat. Aamma inuppassuit taama nuannerluin­nartumik atugaqar­nissaat kissaatigaat. Suna pineqarami? Anersaakkut paratiisi! Nunarsuarmi Saatanip uumissuinermik ajussusermillu siammar­teriffigisaani Jehovap toqqissisimanartunik avatangiiseqar­tippaatigut. (Joh 1. 5:19; Saqq 12:12) Pissutsit ajortut inunnut ajoqutaangaartarput. Jehovalli anersaakkut ingerlal­luarnias­sagatta asannilluni toqqissisimatip­paatigut. Anersaakkut paratiisi Biibilimi ‘qimarnguf­fissatut’ aamma ‘naatsiivittut naggoril­luartutut’ allaatigineqarpoq. (Es 4:6; 58:11) Ulluni kingullerni erloqinar­torsiorfiusuni makkunani Jehovap pilluaq­qusineratigut anersaakkut paratiisimiittut nuannaarlutillu toqqissisimasin­naapput. – Es 54:14; Tim 2. 3:1. w24.04 20 § 1-2

Katikkusukkuit qularnan­ngitsumik tamanna Jehovamut qinnutigisarsimavat. Soorunami Jehovap neriorsun­ngilaatit aappartaar­tissallutit. Jehovalli pisariaqar­titatit misigis­sutsitillu soqutigai aappassarsior­ninnilu ikiorsin­naallutit. Taamaattumik kissaatigisatit misigis­sutsitillu oqaluttuarisakkit. (Tuss 62:9) Naammagit­tartuunissat ilisimas­suseqar­nissallu qinnutigisakkit. (Jaak 1:5) Ingerlaannaq aapparisin­naasannik nassaan­ngikkaluartutit Jehovap neriorsorpaatit isumassor­tuarumallutit isumagalutillu tamatigut asajuas­sallutit. (Tuss 55:23) Mianersuutigis­savalli aappassarsiorneq inuuninni pingaar­nerpaatilis­sannginnakku. (Flp 1:10) Pillualivis­sagaanni imaanngilaq katittoqar­tariaqartoq, Jehovamummi attaveqarluarneq pillualivis­sutaavoq. (Mat 5:3) Aamma kisimiitillutit oqaluus­sineruler­nissamut kiffaan­ngissuseqar­nerusin­naavutit. (Kor 1. 7:32, 33) Taamaattumik piffissaq pitsaanerpaamik atoruk. w24.05 21 § 4; 22 § 6

Qanoq sivisutigisumik peerariissavisi? Aalajangiipal­lannerit kingunerlutsitsisin­naapput. (Uss 21:5) Taamaattumik ilisarisimal­lualernissassi tungaanut peerariis­sinnaavusi. Pisariaqar­tumilli sivisunerusariaqanngilaq. Biibilimi allassimavoq: “Sivisunaartumik pissamaarnerup uummat nappaateqalersittarpaa.” (Uss 13:12) Peerariinnik nalunngisaqarutta qanoq iliorsin­naavugut? Neriartoq­qusinnaavagut, Biibilimik misissueqatigiin­nitsinnut qaaqqusin­naavagut imaluunniit sukisaarsaqatigisin­naavagut. (Rom 12:13) Immaqa pingajoqar­nissaannik imaluunniit biiliun­nissaannik ikiorsin­naavagut, sumiiffim­milluunniit allat ilisimasariaqan­ngisaannik oqaloqatigiis­sinnaanias­sammata ikiorsin­naavagut. (Gal 6:10) Aperineqaruit ilagisin­naaneritit ikiuinissamut periarfissatut isigiuk. Mianersuutigiulli peerariit kisimiitin­nginnissaat, kisimiitin­ngikkaluarlugit allat ilisimasariaqan­ngisaannik oqaloqatigiin­nissaannut periarfissikkit. w24.05 30 § 13-14

Utoqqaanertat ajortuliorsimasup iliuusii suut ajortuliornermut pissutaanersut paasiniar­tarpaat. Assersuutigalugu kristumiu nammineq Biibilimik atuartarun­naarami oqaluus­sisarun­naaramiluunniit anersaakkut sanngiilliva? Jehovamut akuttual­laartumik qinusarpa? Pileris­susipiluit akiorun­naarpai? Kikkut ilagisarpai? Sunik aliikkutaqartarpa? Aalajangigai taakku uummataanut qanoq sunniuteqarsimappat? Paasivaa aalajangikkani iliuutsinilu Ataataminut, Jehovamut, sunniuteqartut? Utoqqaanertat susassarin­ngisaminnik apeqquteqarnatik eqqarsalersitsisunilli apeqquteqar­nermikkut ajortuliorsimasoq ajortuliornermut pissutaasunik paasinnin­nissaanut ikiorsin­naavaat. (Uss 20:5) Aamma assersuusior­nermikkut erseqqis­sarsinnaavaat ajortuliorsimasup iliuusii qanoq ajortigisut. Immaqa ataatsimeeqatigiinnermi siullermi ajortuliorsimasup iliuutsini eqqarsariaatsinilu aliasuutigilissavai. Allaat peqqissimisinnaavoq. w24.08 22 § 9-11

Jiisusi aallussil­luarluni ‘Kunngeqarfik pillugu nutaarsiassat nuannersut’ oqaluus­sissutigisarpai nalunnginnamiuk Guutip tamanna kissaatigigaa. Jiisusip oqaluussineq inuunermini pingaar­nerpaatit­tuarpaa. Allaat kiffartornermi naalernerani ilinniar­titsiniarluni “illoqarfimmiit illoqarfimmut nunaqarfimmiillu nunaqarfimmut angalaartarpoq”. (Luk 13:22) Aamma ilinniartitani oqaluus­sinermik ilinniar­tittarpai. (Luk 10:1) Nutaarsiassanik nuannersunik oqaluussineq Jehovap Jiisusillu uagutsinnut suliassiis­sutaasa pingaar­nersaraat. (Mat 24:14; 28:19, 20) Jehovap inunnut isiginnit­taasiatut isiginnit­taaseqarutta oqaluus­sinermi aallussil­luarnerulersin­naavugut. Jehovap kissaatigaa inuit amerlanersaasa nutaarsiassat nuannersut tusassagaat annaanneqas­sasullu. (Tim 1. 2:3, 4) Tamanna angujumallugu oqaluus­sinermi pikkorin­neruler­niassagatta ilinniar­tittarpaatigut. Maannak­korpiaq inuit Jehovamut kiffartulin­ngikkaluarlutik immaqa siunissami annikil­liornar­tussarsuup naannginnerani taamaalior­nissaminnut periarfis­saqalissapput. w25.03 15-16 § 5-7

Kristumiut namminneq inuttut ataasiakkaatut nalunngeqatigin­nissutertik Biibilimit ilinniar­tinneqarsimasoq atussavaat. Ilaat ilagiinnit peerneqarsimasoq ilassil­luguluunniit ataatsimiinnermut tikilluaq­quserusussapput. Sivisuumilli oqaloqatiginagulu ilaginavian­ngilarput. Immaqa ilaat ima eqqarsassapput: ‘Biibilimi allaqqanngila kristumiu taama ittumik ilassinnittoq ajortuliaanik tapersersuisuusoq?’ (Joh 2. 9-11) Allassimaffiit ataqatigiin­neranni erserpoq ilitsersuut tamanna tunussisunut allanullu ajortulior­nissamut sunniiniartunut tunngasuusoq. (Saqq 2:20) Taamaattumik tunussisut ilinniar­titsissutaannik ajortulior­nermillu allamik siuarsaasoq utoqqaanertanit pulaarneqar­navianngilaq. Soorunami neriunnarpoq peqqissimissasoq. Tamannali pitinnagu taanna ilassisarnagulu ataatsimiinnernut qaaqqunavian­ngilarput. w24.08 30 § 14-15

Jiisusip tupinnar­tuliornikkut nerisitsisimanerata kingorna apustilit Kapernaamut umiatsiamik aallarput, Jiisusilu inuit imminik kunngin­ngortitsiniaraluartut qimallugit qaqqamut majuarpoq. (Joh 6:16-20) Apustilit tasersuarmiitillugit anorersualerlunilu mallersorsuan­ngorpoq. Taava Jiisusip immap qaavatigut pisulluni ornippai. Aamma Petrusi oqarfigaa tasersuup qaavatigut pisoqqullugu. (Mat 14:22-31) Jiisusi umiatsiamut ikimmat qatsorpoq. Apustilit tamanna tupigusuutigingaarlugu oqarfigaat: “Ilumut Guutip erneraatit.” (Mat 14:33) Malunnarpoq Jiisusip tupinnar­tuliornikkut inupparpassuit nerisereermagit taamatut oqaaseqan­ngimmata. Aatsaat Jiisusi tasersuup qaavatigut pisoreermat apustilit taamatut isummerput. Maluginiaruk Makkorsi qanoq allattoq: “[Apustilit] assut tupigusupput, Jiisusimmi iffiat-qaqortut atorlugit iliuusiata pingaaruteqassusia paasinngin­namikku.” (Mak 6:50-52) Aap, paasinngilaat Jiisusi Jehovamit qanoq annertutigisumik pissaaneqalersin­neqartoq. w24.12 5 § 7

Jehovap asannin­neranik qujamasuutigin­ninnerput ersersis­sinnaavarput eqqaaniaanissap qanilliar­tornerani kingornalu utertitsissummik qujamasuutigin­ninnitsinnik sapinngisatsinnik ersersitsinikkut. Eqqaaniaanermi najuunnissap pilersaarutiginerata saniatigut allanik qaaqqusisin­naavugut. Qaaqqusatit nassuiaatikkit eqqaaniaanermi susoqas­sanersoq. Iluaqutaassaaq jw.org-imi videut Sooq Jiisusi toqua? aamma Jiisusip toquneranik eqqaaniaaqataagit takutikkukkit. Utoqqaanertat unittooq­qasunik qaaqqusinissartik eqqaamassavaat. Jehovap savaataasa tammarsimasut ilaat uternis­saminut kajumis­suseqalerpat takorlooruk qilammiittut nunarsuarmiittullu qanoq nuannaar­tigissasut! (Luk 15:4-7) Eqqaaniaanermi uppeqatigut piinnarnagit aamma najuuteq­qaartut sivisuumillu najuussiman­ngitsut tikilluaq­qusaasutut misigitik­kusuppagut. – Rom 12:13. w25.01 29 § 15

Jehovap aamma uagutsinnik asanninnini kajumis­sissutigalugu ernini aallartippaa. (Joh 3:16; Joh 1. 4:9, 10) Jehovap ernini uagut pilluta toqusus­sanngor­tillugu aallartippaa kissaatigigamiuk naassaan­ngitsumik inuuneqalis­sasugut aamma ilaqutariis­sortaminut ilanngutis­sasugut. Una eqqarsaatigiuk: Adami ajortuliorami Jehovap ilaqutariis­sortaanut ilaasin­naajunnaarpoq. Tamatuma kingunerisaanik aamma uagut Guutip ilaqutariis­sortaanut ilaanata inunngorpugut. Utertitsissulli akilerneqareermat Guutimut uppertut taassumunngalu naalattut tamarmik siunissami ilaqutariis­sortaanut ilanngus­sinnaalerput. Maanna allaat Jehovap ajortitsinnik isumakkeerfigisarpaatigut, taamaat­tumillu tassunga uppeqatitsinnullu qanimut attaveqarsin­naavugut. Ilumut Jehovap asangaarpaatigut! – Rom 5:10, 11. w25.01 21 § 6

Jehovap ernituaminik pilliutaa tunissutaavoq nallernis­saqanngitsoq! (Kor 2. 9:15) Jiisusip inuunini pilliutigimmagu illit Jehova Guuti qanimut ikinngutigilersin­naalerpat. Aamma naassaan­ngitsumik inuunissamik neriuuteqalersin­naavutit. Jehovap asagamisigut utertitsissut pilersimmagu taassumunnga qujamasun­nissamut pissutis­sarpassuaqarpugut! (Rom 5:8) Jehovap Jiisusillu uagut pilluta iliuusiat eqqaamajuaan­narnias­sagatsigu Jiisusi peqqusivoq toqunera pillugu ukiumoortumik eqqaaniaanissamut najuuttaq­qulluta. (Luk 22:19, 20) 2026-mi eqqaaniaanissaq sisaman­ngornermi apriilip aappaanni pissaaq. Qularnanngilaq najuunnissarput tamatta pilersaarutigigipput. Pisussaq sapaatip-akunneranik sioqqullugu aamma eqqaaniaareernerup kingorna Jehovap erneratalu uagut pilluta iliuuserisimasaannik eqqarsaatigin­neqqissaar­nissarput tamatsinnut iluaqutaassaaq. w25.01 20 § 1-2

Jehovap Jiisusillu uagut pilluta iliuusiinik eqqarsaatigin­neqqissaar­tarnikkut uagutsinnut asanninnerat pillugu ilikkagaqar­tuaannarsin­naavutit. Immaqa ukioq manna eqqaaniaanissap qanilliar­tornerani aamma kingorna iivangkiiliut ilaat ataaseq imaluunniit arlallit peqqissaarlutit atuarsin­naavatit. Kapitalit arlallit ataatsikkut atuapal­lanniarsareqinagit. Unikaal­lariarlutilli Jehovap Jiisusillu asanissaannut pissutaasut eqqarsaatigikkit. Ukiorpassuarni Nalunaajaasuusimaguit immaqa eqqarsarputit sammisat ilisimal­luakkatit – soorlu Guutip naapertuil­luarnera, asanninnera utertitsissullu – pillugit suli nutaanik paasisaqarsin­naanerlutit. Sammisalli taakku allallu pillugit ilikkagaqar­tuarsin­naavugut. Taamaattumik Biibililersaarutaatigut atuaqqis­saarlugillu eqqarsaatigeq­qissaartakkit. w25.01 24-25 § 13-15