Inuusuttut sisamat Jehovamut naalattut

Nebukadnesarip Juudami naalagartat nuimasunillu siuaasaqartut Babylon­nimukaammagit kunngik­kormiuni qullersaatitani, Ashpenazi, taakkununnga nakkutil­liisunngortippaa. Nebukadnesarip Ashpenazi oqarfigaa nukappiaqqat peqqinnerit silatunerusullu toqqassagai. Taakku Babylonnimi pingaarutilinnik suliaqar­talernis­saminnut piareersar­neqarnias­sagamik ukiuni pingasuni ilinniar­tinneqassapput. Babylon­nimiusut atuarneq, allanneq oqalunnerlu ilinniassavaat. Aamma kunngip kunngik­kormiullu nerisarisar­tagaannik nerisar­nissaat naatsorsuutigineqarpoq. Nukappiaqqat taakkua ilaat sisamat tassaapput Daaniali, Hananja, Mishaeli Azarjalu. Ashpenazip Babylon­nimiusut ima allanik atserpai: Beltshassari, Shadraki, Meshaki Abed-Negolu. Taamatut ilinniagaqalernertik Jehovamut kiffartorun­naassutigissavaat?

Sisamat taakkua Jehovamut naalattuar­nissartik aalajangiusimavaat. Nalunngilaat kunngip nerisartagai nerisin­naanagit Jehovap inatsisaani inerteq­qutaasut nerisarmagit. Taamaattumik Ashpenazimut oqarput: ‘Kunngip nerisar­tagaanik nerisin­niaqinatigut.’ Ashpenazip akivai: ‘Nerinngikkussi kunngillu takugunisi napparsimarpasittusi toqussavaanga!’

Taava Daaniali isumassarsivoq. Paarsisuminut oqarpoq: ‘Ulluni qulini naatitaannarnik imiinnarmillu tunisin­naavatsigut. Taava kunngip nerisas­sarititaanik nerisimasunut sanillius­sinnaavatsigut.’ Paarsisuat akuersivoq.

Ullut qulit qaangiun­neranni Daaniali ikinngutaalu pingasut nukappiaqqanit allanit tamanit peqqinnerorpasipput. Naalannerat Jehovap nuannaarutigaa. Allaat Daaniali takorluukkanik sinnattunillu nassuiaasin­naasunngortippaa.

Ilinniarnerat naammassimmat Ashpenazip Nebukadnesarimukaappai. Kunngip oqaloqatigai, takuaalu Daaniali, Hananja, Mishaeli Azarjalu nukappiaqqanit allanit tamanit silatunerusut. Taakkulu sisamat kunngik­kormiuni sulilersippai. Kunngip pingaarutilinnut tunngasunik isumasiorfigikulasarpai. Kunngip ilisimasortaanit angakkuar­niartar­tunillu Jehovap ilisimas­suseqar­nerulersippai.

Daanialip, Hananjap, Mishaelip Azarjallu nunami allamiik­kaluarlutik Jehovamut kiffaanertik puiunngilaat. Aamma illit angajoqqaatit ilaginngik­kaluarlugil­luunniit Jehova eqqaamajuassaviuk?