Jerusalemmi suujunnaarsin­neqartoq

Juudakkut Jehovamut naalanngeqat­taarput guutipilus­siortuarlutillu. Ukiorpassuarni Jehovap ikiorniar­tuarpai. Mianersoq­quniarlugit pruffiitinik amerlasuunik aallartitsisarpoq. Kisianni tusaajuman­ngillat. Akerlianik pruffiitit illaruaatigisarpaat. Guutipilus­siornerat unitsin­niarlugu Jehova qanoq iliorpa?

Babylonnimi kunngip, Nebukadnesarip, nunat assigiin­ngitsut sorsukkiar­torfigalugit ajugaaf­figisarpai. Jerusalemmi ajugaaf­figeqqaaramiuk kunngi Jojakini, naalagartat, sorsuttartut sanasullu tigusarai Babylon­nimukaal­lugillu. Aamma erlinnartuutit Jehovamik guutisiorfim­miittut tamaasa tiguai. Taava Nebukadnesarip Sidkija Juudami kunngin­ngortippaa.

Aallaqqaammut Sidkijap Nebukadnesari naalappaa. Kisianni nunat eqqaaniittut pruffiitillu ilumuun­ngitsut siunnersorpaat Sidkija Babylonnimut pikitsitsissasoq. Jeremiap mianersoqquaa oqarfigalugu: ‘Pikitsitsiguit Juudami toqoraan­nersuaqassaaq, kaannersuaqarluni nappaalanersuaqalerlunilu.’

Sidkija ukiut arfineq-pingasut kunngioreerluni aalajangerpoq Babylonnimut pikitsitsiniarluni. Egyptenimiut sakkutuuinut ikioqquvoq. Taava Nebukadnesarip sakkutuuni Jerusalemmimut saassus­sitikkiartorpai, illoqarfillu unguaat. Jeremiap Sidkija oqarfigaa: ‘Jehova oqarpoq Babylonnimut tunniutiinnaruit illit illoqarfillu ajortumik pineqar­navianngitsusi. Kisianni tunniutiin­nanngikkuit Babylonnimiut Jerusalemmi ikuallassavaat illillu tigusaralutit.’ Sidkija akivoq: ‘Tunniutiin­narnavian­ngilanga!’

Ukioq ataaseq affarlu qaangiummat Babylonnimiut sakkutuuisa Jerusalemmip qarmarsui putuaat illoqarfillu ikuallallugu. Guutisiorfik ikuallappaat, inuppassuit toqullugit tuusintilip­passuillu tigusaralugit.

Sidkija Jerusalemmimit qimaavoq, kisianni Babylonnimiut malersorpaat. Jeerikop eqqaani tigusaraat kunngimullu Nebukadnesarimukaallugu. Kunngip Sidkija isigitillugu erneri toquppai. Taava Sidkijap isai peerpai parnaarullugulu, kingornalu parnaarus­sivimmi toquvoq. Jehovalli Juudakkut ima neriorsorpai: ‘Ukiut 70-it qaangiuppata Jerusalemmimut uterteq­qikkumaarpassi.’

Inuusuttut Babylon­nimukaan­neqarsimasut suneqassappat? Jehovamut aalajaat­tuassappat?