Kunngeqarfik soraajuitsumik atasussaq

Unnuit ilaanni kunngi Nebukadnesari eqqumiitsumik sinnattorpoq sininnaveerutigisaminik. Angakkuar­niartartut qaaqquai oqarluni: ‘Sinnattora nassuiarsiuk.’ Oqarfigaat: ‘Illit sinnattut uagutsinnut oqaluttuariniaruk.’ Kisianni Nebukadnesarip akivai: ‘Naamik! Ilissi sinnattora oqaluttuaris­savarsi. Taamaaliun­ngikkussi toqussavassi!’ Taava oqaqqipput: ‘Illit sinnattut oqaluttuarigukku taava nassuiaatis­savatsigit.’ Kunngili akivoq: ‘Salloqit­tarniarsarivassinga. Sinnattora oqaluttuarisiuk!’ Kunngili akivaat: ‘Nunarsuarmi taamaaliorsin­naasumik inoqanngilaq. Piumasaqarfigival­laarpatsigut.’

Nebukadnesari kamangaarami peqqusivoq angakkuar­niartartut ilisimasullu tamarmik toqunneqassasut. Ilisimasut ilagaat Daaniali, Shadraki, Meshaki Abed-Negolu. Daaniali nassuiaasin­naaniassagami kunngi piffissaqar­teqqulluni qinnuigaa. Taava ikinngutinilu Jehovamut ikioqqullutik qinupput. Jehova qanoq iliorpa?

Jehovap takorluuisitsilluni Nebukadnesarip sinnattua Daanialimut takutippaa qanorlu isumaqar­neranik paasitillugu. Aqaguani Daaniali kunngip kiffaanukarpoq oqarluni: ‘Babylonnimi ilisimatuut toqoqinagit! Kunngip sinnattua nassuiarsin­naavara.’ Taava kiffap Daaniali Nebukadnesarimukaappaa. Daanialip kunngi oqarfigaa: ‘Guutip siunissami pisussanik nalunaarfigisimavaatit. Uku sinnattorivatit: Inuusaliarujussuaq takuat, niaqua kuultiusoq. Sakiaa taliilu sølviupput, naava siffiaalu kanngus­saapput, niui saviminiupput isigaalu ilaatigut saviminiullutik ilaatigullu marrarmit sanaajullutik. Taava ujarak qaqqamit kaanngarpoq, isigaalu eqqorpai sequmisil­lugillu. Inuusaliarujussuarlu sequmisitaavoq, sinnikuilu anorip teqqarpai. Ujarallu nunarsuaq tamakkerlugu qaqqarsuan­ngorpoq.’

Taava Daaniali ima nangippoq: ‘Sinnattut ima isumaqarpoq: Niaqua kuultiusoq tassa illit naalagaaffiit. Sølvi tassaavoq naalagaaffik ilinnut tulliulluni takkuttussaq. Taava naalagaaffik kanngussattut ittoq nunarsuaq tamakkerlugu aqutsilissaaq. Naalagaaffiup tullia saviminertut nukittutigissaaq. Naggataatigut naalagaaf­feqalissaaq ilaatigut saviminertut nukittutigisumik ilaatigullu marrartut sanngiitsigisumik. Ujarak qaqqarsuan­ngortoq tassa Guutip kunngeqarfia. Taassuma naalagaaffiit allat tamaasa aserortissavai namminerlu soraajuitsumik atassalluni.’

Nebukadnesari Daanialip saavani nunamut pallorpoq. Oqarpoq: ‘Guutivit uanga sinnattunnik paasitis­simavaatit. Guutinit allanit tamanit allaanerungaarpoq.’ Nebukadnesarip Daaniali toqunnagu ilisimasunut tamanut qullersan­ngortippaa Babylonnimilu naalagan­ngortillugu. Daanialip qinnutai Jehovap qanoq akisimanerai takusin­naaviuk?