Aalersuinerit ilumut pisariaqarpat?

SIORNA novembarimi aviisimi allaaserisami apeqqut qulaani pineqartoq dr. Ciril Godecimit, New Yorkimi Brooklynimi Long Island Hospital-imi urologinut immikkoortortami nakorsaanermit pisortaasuumit saqqummiunneqarpoq. Ima allappoq: „Ullumikkut aak nakorsaatitut akuerineqarsinnaagunanngilaq, taamatut katsorsaaneq peqqinnissamut pisortaqarfiup isumannaallisaanermut piumasaqaatinut naleqquttuunnginnami. Aak timip pisataasa ilagaat, aalersuinerlu inuup timaata pisataanik nuutsinneruvoq.“

Dr. Godec oqarpoq: „Allap timaata pisataanik nuutsinneq napparsimasumut katsorsaatitut kingullerpaatut neqeroorutigineqartarpoq. Ulorianartumik sunniuteqarsinnaanerata ilimanarnera pissutigalugu allap timaata pisataanik nuutsivigineqannginnermini katsorsaariaatsit toqqarneqarsinnaasut assigiinngitsut pillugit napparsimasoq eqqorluartumik paasissutissinneqaqqaartariaqarpoq.“ Aalersuineq pillugu ima inerniliivoq: „Taamatut katsorsaanerup pitsaassusia qularnangaarmat pilattaasartut amerlasuut aalajangersimapput ’aalersuineq atornaveersaarniarlugu’, nakorsaanermut tunngasut pissutigiinnarnagit aammattaaq inatsisinut tunngasut pissutigalugit.“

Aalersuinernik ajornartorsiutit annertuut ilaat tassaavoq inuit tusindilikkuutaat nappaatinik toqussutaasinnaasunik, ilaatigut aids-imik, tunillatsittarnerat. Naak aammik misissuineq sumiiffinni amerlasuuni pitsaanerulersimagaluartoq, dr. Godec erseqqissaavoq: „Aammik atuineq ulorianaateqarsinnaavoq aammik tunisisut tunillatsissimasut misissuinerit atorlugit aavisa suli akiuussutissaqalersimannginnerat takuneqarsinnaanngikkaangat.“

Dr. Godecip allaaserisani ima naggaserpaa: „Nakorsat pilattaasartullu ’iltimik neqeroorummut tunngatillugu paasisaqarnerujartornertik ilutigalugu nassuerutigaat aammik qalipaateqalersitsisup (hæmoglobinip) amerlassusiat siullermik isumaqarnertut qaffasitsiginissaa pisariaqanngitsoq, aammulli taarsiullugu atorsinnaasunik allanik nassaarnissamut periarfissaqartuaannangajattoq. Ukiup ataasiinnaap matuma siorna uummatinik tingunnillu nuutsilluni pilattarnerit ilungersunartut aammik annertuumik annaasaqarfiusarput annertuumillu aalersuinissaq pisariaqartutut isigineqartarluni. Maanna taamatut pilattaanerit aammik atuinani naammassineqartarput.

Siunissami qanittumi aalersuisarnerup taamaativinneqarnissaa ilimanarpoq. Aalersuinerit akisuinnaratillu nalorninartorujussuuinnanngillat; napparsimasulli pitsaasumik katsorsarneqarnerat annikilliserujussuartarpaat.“ (gE 22/8 99)