Løveq uiannisaartoq savanngorpoq eqqissisimasoq
OQALUTTUARTOQ: ENRIQUE TORRES INUUSUNNEQ
UKIUMI 1941-mi qeqertami Puerto Ricomi Caribiamiittumi Spaniamiusut oqaaseqarfiusumi inunngorpunga. Angajoqqaakka piitsuupput katuuliullutik, qatanngutikkali, nukara (meeraalluni toqusoq) uangalu upperisamik ajoqersorneqanngilagut, qaqutiguinnarlu naalagiartarpugut.
1949-mi ilaqutariittut Puerto Rico qimapparput USA-mullu nuulluta. New York-imi East Harlemimut, Spanish Harlemimik taaneqartartumut, nuuppugut. Tassani najugaqarpugut 1953-ip tungaanut. Tuluit oqaasii ilikkaruminaatsikkakkit imminut naammagisimaanngilanga.
Ajortumik sunnerneqarneq
Kingorna Prospect Heightsimut Brooklynimiittumut nuuppugut. Taamani ikinngutinnit aqqusinermi inupilunnut ilanngunnissannut sunnerneqarpunga. Tamatuma kingorna aqqusinermi inupilunnut naalaganngorpunga. Taava inupilunnut allanut biilinik tillinniartartunut naalaganngorpunga. Aamma najugaqarfitta eqqunngitsumik aningaasannanniartartuinut aallertartunngorpunga. Pinerluttuliornerup silarsuaani qaffakkiartorpunga illunillu ammarterillunga tilliniartartunngorpunga. Suli 15-iliinnanga tigusaasaqattaareerpunga. Taamanilu atuarunnaareernikuuvunga.
16-inik ukioqarlunga isumaqatigiissut naapertorlugu pisortanit ukiuni tallimani Puerto Ricomiittussanngortitaavunga, unnerluussutit ilaannut nassuernerma kingorna pillaatisiara millisitaammat. Aatannut ilaqutaanullu nassiunneqarpunga. Aataga politiiusimavoq utoqqalinermini suliunnaarsimasoq tusaamasaallunilu ataqqisaasoq. Ukiorli ataaseq qaangiutiinnartoq aatama Brooklynimut utertippaanga, aalakoortunut perulluliortunullu peqataasarama, inunnillu tatiginarluanngitsunik ilaqartarama tillinniartarlungalu.
Ataatama inuuninni sunniuteqarnera
New Yorkimut uteqqikkama ataatama Jehovap nalunaajaasui Biibilimik atuaqatigisalersimavai. Uangali inooriaasera killup tungaanut ingerlavoq. Guutiitsutut inuunera ingerlatiinnarpara ikiaroornartunik imigassamillu atornerluisunngorpunga. Inupilunnut tillinniartartunut sakkulerlutillu ujajaasartunut ilannguppunga, tamatumalu kingunerisaanik 1960-imi parnaarussaavunga. Pisuutitaallunga ukiuni pingasuni parnaarussassanngortitaavunga.
1963-imi misiligummik iperagaavunga. Sivitsunngitsorli tigusaaqqillunga tillinniarsimasutut ukiuni marlunni Rikers Islandimi New Yorkimiittumi parnaarussassanngortitaavunga. 1965-imi iperagaavunga. Ukioq taanna toqutsisimasutut tigusaavunga. Løvertut kamangaartutut pissuseqalersimavunga.
Eqqartuussisut ukiuni 20-ni Dannemoramiittussatut eqqartuuppaanga, taanna naalagaaffiup New Yorkip avannarpasissuaniippoq. Parnaarussivimmi tassani ajornernut ilaalerpunga.
Taariikkattut ataataga Jehovamik nalunaajaasunik atuaqateqartarpoq. Kingusinnerusukkut kuisippoq ilagiinnilu Harlemimiittumi utoqqaanertatut kiffartulerpoq. Parnaarussivimmiinninni pulaartuarpaanga, Guutilu, aqqa siunertaalu pillugit oqaluttuuttuartarlunga.
Dannemorami parnaarussaanerma nalaani ingasattumik ernialerlugit taarsigassarsisitsisartunut ilannguppunga. Tamatuma nalaani 1971-imi parnaarussivimmi New Yorkimiittumi Atticamik taaneqartartumi pikitsitsisoqarpoq. Pikitsitsineq aviiserpassuit saqqaaniippoq, nunarsuarlu tamakkerlugu radiomi fjernsynimilu eqqartorneqarluni. Pikitsitsinerup kingorna parnaarussiviup pisortaata parnaarussat ajoqusersuisut parnaarussanit allanit immikkoortippai, kingorna pikitsitsisoqannginnissaa anguniarlugu. Parnaarussat taakku inini immikkoortuni kisimiilluinnartussanngortippai.
Parnaarussanit 2200-usunit 200-usugut inini kisimiilluinnartussatut parnaarussaavugut. Suli immikkoortitereqqiinnerup kingorna uagut unatarneqarujussuartussanngortitaavugut. ’Perorsaanermik’ taallugu ilaatigut nerisassat nukillaarsaatinik akoorneqarput.
Naalasseriitsuunerali pissutigalu aatsaat kisimiilluinnartussatut parnaarussaanngilanga. Kisianni aatsaat taama naakkittaatsigisumik pineqarpunga, tamatumalu sunnerujussuarpaanga. Saviminernik paffequtserneqarpunga, niukka qilersorneqarput, paarsisullu arlaleriarlutik unatarpaannga. Inuiaqatigiinnullu aalajangersimasunut ilaanera pissutaalluni narrunarsagaajuarpunga. Kisimiilluinnarlunga parnaarussaaninni narrunarsagaallunga unatarneqartarama akerliullunga qaammatini pingasuni killilimmik nerinaveersaarpunga. Tamannalu 25 kiilungajaannik oqinnerulissutigaara.
Ataatama peqqiilliornera pillugu parnaarussivimmi paarsisunut apeqqutilliissutai tusaanngitsuusaarneqarput. Neriuuteqanngitsutut misigigama eqqunngitsumillu pineqarama naalakkersuisunut ikiortissarsiorlunga allappunga.
Ataatama unatarneqartarnera narrunarsagaasarneralu, immikkullu parnaarussaasut nerisaat nukillaarsaatinik akoorneqartarnerat pillugu aviisinut arlaleriarluni oqaluttuarivai. Aviisi Amsterdam News kisimi qisuariarpoq pissutsillu erloqinartut allaaseralugit. Ataatama Albanymi New Yorkimiittumi pinerluttunik isumaginnittoqarfimmi pisortaq arlaleriarluni ornittarpaa, tamatigullu oqarfigineqartarpoq parnaarussivimmi nalinginnaasumiittunga. Naalakkersuisut parnaarussivimmi pissutsit pillugit allaaserisakka tigusaraluarpaat, qisuariarnerli ajorput. Aatsaat taama isumatsatsigilerpunga, arlaanik ikiortissaqarpasinnginnama.
Taavali ataatama oqaluttuarisartagaasa ilai eqqaalerpakka. Aalajangerpunga Guuti ikioqqullunga saaffiginiarlugu.
Guutimut ikiortissarsiorpunga
Guutimut qinunnginninni ataatama Jesusimuunngitsoq Ataataanulli Jehovamik atilimmut qinusarnissannik kajumissaariuarnera eqqaalerpara. Inimi parnaarussaaffinni natermut seeqqummerpunga inooriaaserlu qinersimasara, inuunerma affaa sinnerlugu parnaarussivimmiinninnik kinguneqartoq, aliasungaarlunga nalunaarutigaara. Ilungersortumik Jehova ikioqqullunga qinnuigaara, massakkummi paasivara taanna kisimi uannik ikiuissalluni piginnaaneqartoq.
Naluara qanoq sivisutigisumik qinunerlunga, kisianni inuuninni pisimasut oqaluttuaraakka peqqissimillungalu Jehovamut isumakkeerfigeqquvunga. Neriorsuivunga ilikkarneruniarlugu suliniuteqarniarsariniarlunga. Sivitsunngitsoq illup naqqata ataani parnaarussivimmut assingusumit kisimiilluinnarluni parnaarussaaffimmit aniguisitaavunga inimullu naliginnaasumut nuunneqarlunga, neriumajunnaarneralu unitsippara.
Jehovalu ilikkarneruniarlugu neriorsuutinga piviusunngortinniarlugu Ny Verden-Oversættelsen af De Hellige Skrifter atuartalerpara. Biibilimik nutsikkami tamatumani nuannarinerpaasara tassaavoq ungalua qorsuusoq. Qalipaataa nuannaraara parnaarussivimmi atisat, init, iikkat torsuusallu qasertumik arajunnartumik qalipaateqarmata. Tupaallaatigisannik tamakku kingusinnerusukkut qorsummik qalipanneqarput. Parnaarussivimi aqutsisut parnaarussivimmi Atticami pikitsitsinerup kingorna qalipaat taanna qinerpaat.
Amma atuagassiat Napasuliaq Alapernaarsuiffik aamma Iteritsi! ataatama uannut tunniuteqqusai atuartalerpakka. Jehovamut nalunaajaasorpassuit uppernertik pissutigalugu parnaarussaasimasut, uannillu ajornerujussuarmik atugaqartarsimasut pillugit atuakkakka killitsissutigeqaakka. Tamakku pinerluuteqarsimanngillat, naapertuilluanngitsuliorfigineqarpulli Guutimut aalajaattuarnertik pissutigalugu. Uangali pisassara pisimavara. Allaaserisat tamakkua killippaannga, Jehova innuttaalu pillugit annerusumik ilikkagaqarusulerpunga.
Ukiup tulliani kiisami saammaanneqarnissamut isumalioqatigiissitamut suliassanngortinneqarpunga. Suliaq uannut tunngasoq suliareqqitassanngortinneqarpoq; aamma immikkut parnaarussaaffimmi pineqarsimanera sammineqarpoq. Nuannaarpunga 1972-imi misiligummik iperagaanissara paasigakku.
Iperagaanerma kingorna sapaatip-akunneri marluk qaangiuttut Harlemip Spaniamiortaani Jehovamut Nalunaajaasut naalagaaffilersaarfianni ataatsimiinneq peqataaffigaara. Jehovalli innuttai ilagissallugit suli imminut qinngaqqunnartippunga. Jehova peqatigiissortaalu pillugit suli ilikkagassarpassuaqarpunga. Aamma taama sivisutigisumik parnaarussivimmiissimanerma kingorna allanngortitsinissara pisariaqartippara.
Ajoraluartumilli inooriaasitoqqap inuuserisimasama suli sunneqqavaanga. Ikiaroortaqqilerpunga, pinerluttuliortalerlunga inuunerlulerlungalu. Tamatuma kinguneranik parnaarussassanngortitaavunga, tamatumani ukiuni 15-ini. Taamaakkaluartoq misigivunga Jehova uummatinni ajunngitsumik takusaqarsimassasoq, taassuma tununngisaannarmanga. Allanut oqaatigerusuppara parnaarussaagaluaraanniluunniit Jehovap imminut saakkusuttut tununngisaannarai.
Parnaarussivimmi Biibili atuarpara
Parnaarussivimmut Dannemoramut uteqqikkama, sapaatip-akunneri tamaasa Jehovap Nalunaajaasuinik atuaqateqarnissamik periarfissat atortarpakka. Kingusinnerusukkut parnaarussivimmut Mid-Orangemut nuunneqarpunga, parnaarussivimmut ammasumut naalagaaffiup New Yorkip avannarpasissuaniittumut. Tassaavoq parnaarussivimmit Dannemoramit sutigut tamatigut isumannaallisagaasumit allanngornerujussuaq.
Ukiut marluk parnaarussaareerlunga parnaarussaq alla peqatigalugu Biibilimik atuaqqissaarnermut aalajangersimasumik peqataasalerpunga, tamannalu parnaarussivimmi oqartussat akueraat. Parnaarussap anaanaata, Jehovamut nalunaajaasuusup atuaqqissaaqatigineqarnissaa isumagisimavaa. Suli annerusumik ilisarsiartorpunga. Kiisami Biibilimi najoqqutassat inuuninni atortalerpakka, taamaalillungalu anersaakkut siuariartulerpunga.
Misiligummik iperagaanissamik arfineq-marloriarlunga akuerisaanngereerlunga arfineq-pingajussaani akuerisaaqqarpunga. Akuerisaannginninnut pissutaavoq „pinerluttulioqqajaanersuara“. Ukiuni 15-ini parnaarussassatut eqqartuunneqareerlunga ukiut arfineq-pingasut parnaarussaaqqareerlunga iperagaavunga.
Taartuminngaanniit iperagaaneq kingulleq
Iperagaanerma kingorna piffissami sivikitsumi ikiaroornartunik atornerluinermut uteqqittoorpunga. Aamma arnaq katissimanagu inooqatigaara. Tamanna 1972-imi aallartippoq. 1983-imili Jehovamik Nalunaajaasut peqatigalugit Biibili atuartaqqilerpara. Maannakkut kristumiut ataatsimiinneri aalajangersimasumik peqataaffigisalerpakka. Tamatumali aallartinnginnerani pujortassaarlungalu ikiaruussaarnikuuvunga.
Taamaakkaluartorli aappara katissimanagu suli inooqatigaara, tamannalu Guutip aappariinneq pillugu najoqqutassiaanut akerliuvoq. Tamatuma ilerasuuteqartippaanga, Biibilimillu atuaqatigineqarnissamik neqeroorut akuereqqugaluarpara taamaalilluta aappariinnerput katinnitsigut najoqqutassanut naapertuuttunngortinniarlugu. Akivorli Biibili inunnit allanneqarsimasoq angutit arnanut naqisimannissinnaaqqullugit, inatsisinullu naapertuuttumik katinnissaq pisariaqanngitsoq.
Paasivara arnamik Guutip aappariinnermut najoqqutassiaanik ataqqinningitsumik, ileqqorluttumik inooqateqarnera ingerlatiinnarsinnaanagu. Inooqatigiinnerput kipitippara Brooklynimullu nuullunga. Nalunngilara Guuti taassumalu siunertaa pillugu allanut oqaluussisinnaananga nammineq inuunera taassuma inatsisaanut naleqqutinngippat.
Inuuneralu Biibilimi najoqqutassanut naleqquttunngorsareerlugu, ukiut pingasut Biibilimik atuaqqissaareerlunga ilerasuuteqarnanga Guutip piumasaanik iliorusullunga inuunera tunniulluinnarsinnaalerpara. Tunniulluinnarninnullu ersiutaasutut Jehovap Nalunaajaasuisa ataatsimeersuarneranni kuisippunga. Guuti ataatama uannut eqqaajuartarsimasaa pillugu ilikkarneruniarlunga neriorsuuteqarnera peqqissimissutiginngisaannarpara. Parnaarussivimmilu Dannemorami Jehovamut neriorsuutinga atajuartinniarlugu, taassuma neriorsuuterpassuarminik piviusunngortitsinissaa tikillugu, ilungersorlunga atatinnarniarpara.
Paratiisi qilanaaraara
Jehovap nuna tamakkerlugu paratiisinngortitsinissaa qilanaareqaara. (Tussiaat 37:11, 29; Lúkarse 23:43) Kisianni aamma Guutip neriorsuutaa alla, tassa iliverniittut nunami naassaanngitsumik inuunissamut makititaanissaat qilanaareqaara. (Juánase 5:28, 29; apustilit suliait 24:15) Qanoq nuannertigissava asasakka iliverniittut tikilluaqqulerukkit, ilaatigut ataataga, nukara ikinngutikkalu allat toqujaarpallaarsimasut. Neriuut tamanna akulikitsumik eqqarsaatigisarpara, nuannaangaalersittaarpaangalu. Aamma qatanngutikka arnat marluk taakkualu meeraasa ilaat Jehovamut tunniulluinnarlutik kuisissimammata tipaatsuutigaara.
Ullumi allat upperisara inuuneralu pillugit oqaluttuussinnaagakkit, nuannaarutigaara tussiaasiortup oqaasii tuppallernartut Tussiaatit 72:12-14-imiittut: „Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa. Akiliullugit iperagaatissavai qunutitaanermit persuaalliorfigineqarnermillu, inuunerat erlinnangaarmat taassuma isaani.“
Jehovap uannut kamagittarsimanera uummatikkut nuannaarutigisarpara, innuttamilu iliuutsimikkut ilisarnaatissaata ilikkarnissaanut ikiorsimavaanga — løvertut qaasuttuunngitsutut, savatulli eqqissisimasutut, inussiarnersutut saamasutullu. Tamanna pisariaqarpoq, soorlu Biibilimi allassimasoq, ’Guuti qanilaartunik saammaassisarpoq’. — Ussatit 3:34. (gE 8/8 99)
[Qupp. 20-mi issuagaq]
„Tillinniartutut tigusaaqqippunga ukiuni marlunni Rikers Islandimi New Yorkimiittumi parnaarussassanngortitaavunga. 1965-imi iperagaavunga. Ukioq taanna toqutsisimasutut tigusaavunga. Løvertut kamangaartutut pissuseqalersimavunga.“
[Qupp. 21-mi assiliartaq]
Kuisikkama