Biibili Qanoq Oqarpa?

Ilinniagaqarneq Biibilimit akerlerineqarpa?

„ILISIMAATSUP KISIMI ILINNIAGAQARNEQ AJORAA.“ — Publilius Syrus, Moral Sayings, ukiunik naatsorsuisalerfitta siorna ukiunit hundredelinnit siullerneersoq.

BIIBILIMI kajumissaarneqarpugut ’silatussuseq isumatussuserlu annaanaveersaaqqullugit’. (Ussatit 3:21) Ilisimassutsip Guutiata, Jehovap, kissaatigaa pallorfiginnitsini ilinniartitaalluassasut. (1 Samuel 2:3; Ussatit 1:5, 22) Biibilimili allassimaffiit ilaat tamatuma akerlianik isumaqarsorinarsinnaapput. Assersuutigalugu, apustili Paulusip inooriaaserisimasani, ilaatigut ilinniagarisimasani, ima oqaatigisimavai: ’Tamaasa igitassaannaatippakka.’ (Filípimiut 3:3-8) Allakkani isumassarsiarititaasuni allani Paulus aamma oqarpoq ’ilisimassut silap matuma pia Guutimi sianiissutaasoq’. — 1 Korintumiut 3:19.

Tassa imaappa ilinniagaqarnissaq Biibilimi akerlerineqartoq? Kristumiu qanoq annertutigisumik silamiutut ilinniagaqartariaqarpa? Meeqqat atuarfianni atuarneq naammappa, imaluunniit ilinniaqqittariaqarpa?

Ukiuni hundredelinni siullerni ilinniagaqarneq

Kristumiut siulliit ilinniagaqarnikkut assigiinngeqisunik tunuliaqutaqarput. Apustilit Galilæamiuusut, Peter Johannesilu, angutit nuimasut ilaannit ’inuttut ilinniartitaanngitsutut ilisimaatsuusutullu’ isigineqarsimapput. (apustilit suliait 4:5, 6, 13) Tamanna ima paasisariaqarpa apustilit taakku atuartitaasimanngitsut imaluunniit allassinnaanatillu atuarsinnaanngitsut? Naamik, imaaginnarpoq Jerusalemimi juutit atuarfiisa qutsinnerusut ilaanni ilinniarsimanngitsut. Angutit kristumiussutsimut aallartitaasut sapiitsut taakkua kingorna allagaasigut uppernarsarneqarpoq ilinniarluarsimallutillu pikkorissuusut, Allakkanik erseqqissumik nassuiaasinnaallutik. Ilaatigut ilaquttamik timikkut pisariaqartitaannik pilersuinissaminnik ilitsersorneqarsimapput. Suleqatigiissimapput qularnanngitsumik isertitaqarfigilluartakkaminnik aalisarnermik inuussutissarsiuteqarlutik. — Mákorse 1:16-21; Lúkarse 5:7, 10.

Akerlianilli Lukas, ajoqersugaq iivangkiiliut ilaannik aamma apustilit suliáinik agdlagkat-nik allattoq, qutsissumik ilinniagaqarsimavoq. Nakorsatut ilinniarsimavoq. (Kulorsamiut 4:14) Nakorsatut tunuliaqutaqarnera allagaasigut isumassarsiarititaasutigut ersarilluarpoq. — Lúkarse 4:38; 5:12; apustilit suliait 28:8.

Apustili Paulus kristumiunngunngikkallarami taamanikkut ilinniartitsisut pikkorinnerit ilaannit, Gamalielimit, juutit inatsisaannik ilinniartinneqarsimavoq. (apustilit suliait 22:3) Paulusip ilinniagarisimasaa ullumikkut ilinniarnertuunngorniarluni ilinniarnermut naapertuussimagunarpoq. Inuiaqatigiillu juutit akornanni inuusuttut suliassamik aalajangersimasumik ilinniarnissartik ataqqinaatitut isigisarsimavaat, inuunerminni kingorna qutsinnerusumik ilinniagaqassamaaraluarunilluunniit. Paulus nukappiaraalluni tupiliortutut ilinniarsimagunarpoq, kingorna piffissaq tamaat oqaluussisartunngorami iluaqutigisaminik.

Paulusilli misiutiginngilaa silamiutut ilinniagaqarneq pisariaqartuugaluarluni Guuti pillugu ilisimassummut naleqangaartumut naleqqiullugu killilimmik naleqartoq. Taamaattumik Biibili naapertussagaanni Guuti Kristusilu pillugit ilisimasaqalernissaq pingaarneruvoq. Ullumikkut kristumiut silamiutut ilinniagaqarneq pillugu isuma tamanna pigiliutissappassuk pitsaassaaq. — Ussatit 2:1-5; Juánase 17:3; Kulorsamiut 2:3.

Pissutsit isumaliutigeqqissaartariaqarput

Ilinniagaqaqqinneq, atuagarsornikkut suliamilluunniit pikkorissaqqinnikkut, kristumiut ilaasa ilaquttaminnik timikkut pilersuinerminnut iluaqutigisimavaat. Ilaquttanik pilersuineq pitsaasuullunilu eqqortuuvoq, tassami ’inoqutinik isumaginninneq’ pisussaaffiuvoq illernartoq. (1 Timûtiuse 5:8) Piginnaanernik, pisussaaffimmik tamatuminnga naammassinninniarnermi iluaqutigisassanik, pigisaqalerneq atoriaannaasumik ilisimassuseqarnermut takussutissaavoq.

Piginnaanerilli tamakku angunissaannut tunngaviusumik atuarsimanermik naammassorinninngitsut iluaqutaasut ajoqutaasullu isumaliutigisariaqarpaat. Ilinniagaqaqqinnerup iluaqutaasa ilaattut taaneqarsinnaavoq ilungersuussilluni kristumiutut kiffartuutigaluni imminut ilaquttanillu pilersuisinnaalersitsisumik suliffissarsiuminarnerulersarmat. Immaqa aamma allanik timikkut ikiuinissaq ajornarunnaartarpoq, ’ajorsartunut tunniussassaqalerluni’. — Evfisumiut 4:28.

Aammali ajoqutissartaqarpoq. Sunik? Ilinniartitsissutigineqartut Guutimut Biibilimullu uppernermik sanngiillisitsisinnaasunik ilaqarsinnaapput. Paulusip kristumiut mianersoqqusimavai ’ilisarsisunik taanerlugaasut isumaliornerinut’ aamma ’ilisimaqqissaarniutinut salloqittaaniutinullu piunngitsunut inunnit maligassarsianut’. (1 Timûtiuse 6:20, 21; Kulorsamiut 2:8) Assortorneqarsinnaanngilaq ilinniarneqarsinnaasut ilaat kristumiut uppernerannik ajoqusiisinnaammata. Ilinniagaqaqqinniartut navianaatit taama ittut sianigisariaqarpaat.

Moses ’Egyptenimiut ilisimatuussutaannik tamanik ajoqersorneqarsimavoq’, taamaakkaluartorli ilinniakkani qularnanngitsumik arlalinnik guutillit ajoqersuutaannik Guutimik kanngunarsaasunik ilaqaraluartut uppernikkut nukittujuaannarsimalluni. (apustilit suliait 7:22) Ullumikkuttaaq kristumiut qanorluunniit ittunik avatangiiseqaraluaraangamik peqqinnanngitsumik sunnerneqarnaveersaartarput.

Ilinniagaqaqqinnerup navianaatigisinnaasaa alla tassaavoq ilisimalikkat pingaakujuutigineqalersinnaanerat. (1 Korintumiut 8:1) Inuit ilarpassui namminissarsiortumik pissuteqarlutik ilinniagaqartarput, allaallu ilumoorlutik ilikkagaqarusullutik ilinnialersuugaluit pingaakujulersinnaasarput. Isuma taama ittoq Guutip iluarinngilaa. — Ussatit 8:13.

Farisiiarit assersuutigeriartigik. Upperisarsioqatigiinnut taakkununnga ilaasortaasut ilisimasaminnik naapertuilluartuunerminnillu pisuusaarnerusumik kakkanniutiginnittuusimapput. Juutit ajoqersuisuisa oqaluttuarsiarpassuinik ilisimasaqarluarput, inuinnarnillu qutsissumik ilinniagaqarsimanngitsunik nikaginnittuullutik. Taakkununnga inuinnaat tassaapput ilisimaatsut, narrunartut allaallu perloqqusat. (Juánase 7:49) Kiisalu aningaaserituujupput. (Lúkarse 16:14) Taakkua pissusiisa takutippaat ilinniagaqarneq pingaarniartunngussutaasinnaasoq imaluunniit aningaaserituunngussutaasinnaasoq, kukkusunik pissutiginiagaqaraanni. Taamaattumik kristumiu ilinniarusutaminik tamatumalu annertussusianik aalajangiiniarnermini imminut ima aperissaguni silatusaassaaq: ’Sunik pissutiginiagaqarpunga?’

Nammineq aalajangigassaavoq

Soorlu ukiuni hundredelinni siullerni issimasoq ullumikkut kristumiut ilinniagaqarnikkut tunuliaqutaat assigiinngitsorujussuupput. Inuusuttut meeqqat atuarfiannik naammassinnittut angajoqqaatik peqatigalugit isumaliutigisariaqarpaat ilinniagaqassanerlutik imaluunniit naamik. Inersimasuttaaq ilaquttatik pitsaanerusumik pilersorsinnaalerumallugit aningaasaqarnerminnik pitsannguerusuttut immaqa ilinniagaqaqqinneq aaqqiissutissatut isigissavaat.a Atuagarsorluni ilinniarneqarsinnaasut ilaanni silassorissutsikkut piginnaanerit inuussutissarsiutitigut suliassatigullu piginnaanernit pingaarnerutinneqartarput. Immaqa atuagarsornikkut sivisuumik ilinniagaqareerluni paasinarsisarpoq suliassatigut misilittagaqarnani. Taamaattumik ilaat suliassamik ilinniaqqittarput imaluunniit teknikkimut tunngasunik ilinniagaqaqqittarput kingorna ajornannginnerusumik suliffissarsinissartik neriuutigalugu.

Qanorli pinissaq nammineq inuttut aalajangigassaavoq. Kristumiut ilinniagaqarnissaq pillugu imminnut eqqartuuteqattaartussaanatillu isornartorsioqattaartussaanngillat. Jakob allassimavoq: ’Kinaagavit aappat eqqartuunniarpiuk?’ (Jâko 4:12) Kristumiup ilinniagaqaqqinnissani eqqarsaatigiguniuk pitsaassaaq nammineq pissutiginiakkani misissussagunigit, qularnaarniarlugu namminissarsiortumik pigisalerituumillu siunertaqarnani.

Ilinniagaqarnermut oqimaatigiissumik isiginninnissaq nalunanngitsumik Biibilimi kajumissaarutigineqarpoq. Angajoqqaat kristumiuusut misiutiginngilaat Guutip oqaasia isumassarsiarititaasoq tunngavigalugu anersaakkut ilinniagaqarneq naleqarnerpaasoq, aammali meeqqamik ilinniagaqaqqinnermut oqimaaqatigiissumik isiginnilernissaat isumagisarpaat. (2 Timûtiuse 3:16) Inuuneq piviusorsiortumik isigaat ilinniagaqarnerullu, meeqqamik inersimasunngorlutik imminnut ilaquttaminnillu pilersuilernissaminnut pisariaqartunik piginnaasaqalissutigisinnaasaata, naleqassusia nalunagu. Ilinniagaqaqqissanerlutik imaluunniit naamik, ilinniagaqaqqissagunillu qanoq annertutigisumik, aalajangiiniarnerminni kristumiut tamarmik immikkut Jehova Guutimut asanninnerminnut naapertuuttumik silatuumik aalajangertariaqarput. Guutimummi tunniusimaneq ’sunut tamanut iluaqutaavoq inuunermut matumunnga piumaartussamullu atasumik unnersuummik ilaqarami’. — 1 Timûtiuse 4:8. (gE 8/3 98)

[Quppernerup ataani ilanngussaq]

[Qupp. 22-mi issuagaq]

„Silatussuseq isumatussuserlu annaanaveersaarniakkit alartaaserlugillu.“ — Ussatit 3:21

[Qupp. 23-mi issuagaq]

Kristumiu ilinniagaqaqqinnissaminik eqqarsaateqartoq silatusaassaaq pissutiginiakkani misissussallugit